မကွေး၊ ဇန်နဝါရီ ၃၀၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့အနီးက အုန်းတောရွာနဲ့ ကညှပ်ရွာကို စစ်ကောင်စီတပ်ဖွဲ့ဝင်တွေက မီးရှို့နေတယ်လို့ ဒေသခံတွေနဲ့ ဒေါင်းစစ်အောင် Local PDF ရဲ့ ထုတ်ပြန်ချက်အရ သိရပါတယ်။

အင်အား ၂၀၀ ဝန်းကျင်ပါတဲ့ စစ်ကောင်စီတပ်ဖွဲ့ဝင်တွေက ဇန်နဝါရီ ၃၀ ရက်ဒီမနက် ၁၀ နာရီခန့်မှာ ကား ၄ စီးနဲ့အတူ အုန်းတောရွာကိုဝင်ရောက်မီးရှို့ခဲ့ပြီးနောက် နေ့လယ် ၁၂ ခန့်မှာ ကညှပ်ရွာက နေအိမ်တွေကိုပါ ထပ်မံမီးရှို့ခဲ့တာပါ။

ကညှပ်ရွာကဒေသခံ လင်မယား ၂ ဦးကိုဖမ်းဆီးသွားတယ်လို့ ဆင်ဖြူကျွန်းမြို့ခံတဦးဆီကသိရပြီး မီးလောင်ပျက်စီးတဲ့အိမ်ခြေအရေအတွက်နဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

ဒါ့အပြင်မီးရှို့ပြီးနောက် စစ်ကောင်စီစစ်ကြောင်းဟာ ကျောင်းကုန်းကျေးရွာကိုဝင်ပြီး ဒေသခံတွေရဲ့ပစ္စည်းတွေကိုလည်း ကားတွေနဲ့သယ်ယူသွားတယ်လို့ သိရပါတယ်။

အုန်းတော၊ ကညှပ်ရွာနဲ့ ကျောင်းကုန်းရွာ ၃ ရွာပေါင်းမှာ စုစုပေါင်းလူဦးရေ ၁,၆၀၀ ခန့်ရှိပြီး ဒေသခံတွေလည်း ရွာကနေ တိမ်းရှောင်‌နေကြရပါတယ်။

ဇန်နဝါရီ ၂၉ ရက်မနေ့ကနေ့လယ် ၁၀ နာရီလောက်မှာ စစ်ကောင်စီတပ်ဖွဲ့ဝင်တွေဟာ ကျောင်းကုန်းကျေးရွာက ဒေသခံတွေရဲ့ပစ္စည်းတွေကို တွဲကား ၂ စီးနဲ့ဝင်ပြီးသယ်သွားခဲ့သေးတယ်လို့ ဆင်ဖြူကျွန်းမြို့ခံတဦးက ပြောပါတယ်။

ဒါ့အပြင် ဇန်နဝါရီ ၂၈ ရက်နဲ့ ၂၉ ရက်မှာလည်း ဆင်ဖြူကျွန်းမြို့၊ သရက်ချဥ်ကျေးရွာအနီးမှာ စလင်းမြို့အခြေစိုက် ခလရ ၂၅၃၊ ၂၅၄၊ ၂၅၅ ကစစ်ကောင်စီတပ်ဖွဲ့ဝင်တွေနဲ့ ဒေသခံကာကွယ်ရေးတပ်ဖွဲ့တို့တိုက်ပွဲဖြစ်ခဲ့ပြီး တိုက်ပွဲအတွင်းပစ်ခတ်တဲ့လက်နက်ကြီးဗုံးစထိမှန်လို့ စလင်း-ဆင်ဖြူကျွန်း ကားလမ်းနံဘေးရှိ မိုးဝန်းကျေးရွာက ဆယ်တန်းကျောင်းသူ ၁ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

စာတည်း – လင်း

မကွေး၊ ဇန်နဝါရီ ၂၈၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့နယ်အခြေစိုက် ခလရ ၂၅၃ ကထွက်ပြေးလာတဲ့ စစ်ကောင်စီတပ်သား ၂ ဦး ဒေါင်းစစ်အောင် Local PDF တပ်ဖွဲ့ဝင်တွေနဲ့တွေ့ပြီး ဘက်ပြောင်းခိုလှုံလာခဲ့တယ်လို့ အဲ့ဒီတပ်ဖွဲ့ဆီကသိရပါတယ်။

အသက် ၂၅ နှစ်အရွယ် စစ်ကောင်စီတပ်သား ကျော်ရဲလင်းနဲ့ အသက် ၂၂ အရွယ် တပ်သားနေလင်းတို့ဟာ ဇန်နဝါရီ ၂၄ ရက်ညမှာ ခလရ ၂၅၃ တပ်ထဲကထွက်ပြေးလာခဲ့ပြီး ဇန်နဝါရီ ၂၆ ရက်မှာ ကာကွယ်ရေးတပ်ဖွဲ့ဝင်တွေနဲ့တွေ့ခဲ့ကြတာလို့ ဆိုပါတယ်။

“သူတို့ ၂ ဦးက ခလရ ၂၅၃ တပ်ထဲကဝင်လာတာဗျ။ သင်တန်းအပတ်စဉ်လည်းအတူတူပဲပြောတယ်ဗျ၊ ဆက်သွယ်ပြီးအလင်းဝင်လာတာတော့မဟုတ်ဘူး၊ တပ်ထဲမှာ ဖုန်းသုံးရင်းနဲ့အလင်းဝင်ရတဲ့ ဌာနတွေကိုတွေ့တာလည်းဖြစ်တယ်၊ သူတို့ တပ်ထဲကနေထွက်ပြေးလာတာ၊ ၂ ညအိပ်ပြီး ကျနော်တို့ရဲ့ ဒေါင်းစစ်အောင် Local PDF ရဲ့ ပွိုင့်တွေနဲ့တွေ့ပြီး စောင့်ကြိုခေါ်ယူလာခဲ့တာ” လို့ ဒေါင်းစစ်အောင် Local PDF အဖွဲ့တာဝန်ခံ ကိုထူးလေးက ပြောပါတယ်။

တပ်သားကျော်ရဲလင်းဟာ ဧရာဝတီတိုင်း၊ မအူပင်မြို့နယ်၊ သူဌေးကုန်းရွာဇာတိဖြစ်ပြီး ၂၀၂၄ ဧပြီမှာ စစ်မှုထမ်းမဲပေါက်တဲ့အတွက် နေအိမ်ကတိမ်းရှောင်ခဲ့ပေမယ့် ၃ လအကြာ ဇူလိုင်လမှာ အိမ်ကိုပြန်လာချိန် အဖမ်းခံခဲ့ရတာပါ။

မအူပင်ထောင်မှာ ထောင် ၁ လကျခဲ့ပြီးနောက် မအူပင် ၂၇ တပ်စုဆောင်းရေးမှာ ၂၅ ရက်ကြာနေခဲ့ရတယ်လို့ဆိုပါတယ်။ အဲ့ဒီနောက် စက်တင်ဘာ ၉ ရက်ကစတင်ကာ စစ်သင်တန်း အပတ်စဥ် ၅ ကို နေပြည်တော် မိုးဆွေသင်တန်းရုံး မှာ ၃ လတက်ခဲ့ပြီး ဒီဇင်ဘာလမှာ ခလရ ၂၅၃ တပ်ထဲကို ရောက်ခဲ့တာလို့ သူကပြောပါတယ်။

“တပ်ထဲကထွက်ပြေးရတာက အဲ့ဒီမှာနေရတာမပျော်ဘူး၊ ကိုယ့်ဘက်က နည်းနည်းလေးမှားတာနဲ့ တုတ်နဲ့ရိုက်တယ်၊ ပါးတွေနားတွေရိုက်တယ်၊ ပထမတော့ ရှေ့တန်းတွေထွက်ရင် လမ်းမှာထွက်ပြေးမယ်လို့စဉ်းစားတာ၊ နောက်ကျတော့ ကျနော့်သူငယ်ချင်း (တပ်သားနေလင်း) နဲ့တိုင်ပင်ပြီး ညတွင်းချင်းပြေးလာခဲ့တယ်” လို့ တပ်သားကျော်ရဲလင်းကပြောပါတယ်။

ကာကွယ်ရေးတပ်ဖွဲ့ဝင်တွေဆီရောက်တဲ့အခါမှာလည်း စစ်တပ်ထဲမှာနေရာတဲ့အခြေအနေနဲ့ ကွာခြားမှုတွေရှိတာကိုသိလာခဲ့ကာ ကာကွယ်ရေးတပ်ဖွဲ့မှာပဲနေပြီး စစ်ကောင်စီကိုပြန်လည်တိုက်ခိုက်သွားမယ် လို့ သူက ဆက်ပြောပါတယ်။

“ကွာခြားမှုကအများကြီးပါ၊ ဒီမှာကတော့ အစစအရာရာ အေးအေးဆေးဆေးနေရတယ်၊ တပ်ထဲမှာက စစ်ဆင်ရေး မထွက်ရရင်အလုပ်တွေလုပ်ရတယ်၊ အလုပ်လုပ်လို့အဆင်မပြေရင် အပြောခံအရိုက်ခံ ရတယ်၊ တပ်ထဲမှာတော့ အချုပ်အနှောင်များတယ်၊ ကျနော့်နယ်ဘက်က ကာကွယ်ရေးအဖွဲ့ထဲမှာနေပြီး စစ်ကောင်စီကို ပြန်တော်လှန်သွားချင်တယ်”လို့ သူက ဆိုပါတယ်။

အလားတူ တပ်သားနေလင်းကလည်း ပဲခူးတိုင်း၊ ပေါင်းတည်းမြို့နယ်ကဖြစ်ပြီး ဇူလိုင်လပိုင်းမှာ ပေါင်းတည်မြို့နယ်မှာပဲ စစ်ကောင်စီတပ်ဖွဲ့ဝင်တွေရဲ့အဓမ္မဖမ်းဆီးတာကို ခံခဲ့ရပါတယ်။

၁၀ ရက်ဝန်းကျင်ထောင်ကျပြီး ပြန်လွတ်လာချိန်မှာ ဧရာဝတီတိုင်းဘက်ကိုထွက်ပြေးခဲ့ပေမယ့် အဲ့ဒီမှာပြန်လည်ဖမ်းဆီးခံခဲ့ရပြီးနောက် စစ်သင်တန်းကိုရောက်ခဲ့တာလို့ တပ်သားနေလင်းက ပြောပါတယ်။

စက်တင်ဘာ ၉ ရက်ကစပြီး ရန်ကုန်တိုင်း ရဲမွန်အရာရှိသင်တန်းကျောင်းမှာ စစ်သင်တန်းအပတ်စဥ် ၅ ကို တက်ခဲ့ရကာ ဒီဇင်ဘာ ၉ ရက်မှာ စလင်းမြို့ ခလရ ၂၅၃ ကို ပို့ဆောင်ခံခဲ့ရတာဖြစ်ပါတယ်။

ခလရ ၂၅၃ ကိုရောက်တဲ့အချိန်မှာ တပ်သားကျော်ရဲလင်းနဲ့တွေ့ဆုံတိုင်ပင်ကာ ခုလိုထွက်ပြေးလာခဲ့ကြတာလို့ တပ်သားနေလင်းက ပြောပါတယ်။

“ဆင်ဖြူကျွန်းမြို့၊ နွယ်တမယ်ရွာကျော်ပြီး PDF တွေဆီရောက်လာတာ၊ သူငယ်ချင်း ၂ ဦးလမ်းလျှောက်ရင်းနဲ့ အမကြီး ၁ ဦး၊ အကိုကြီး ၁ ဦးနဲ့တွေ့တာ၊ ကျနော်တို့ကအစက စစ်သားတွေ အောက်မေ့ပြီးလိမ်သေးတာ၊ အမကြီးတို့ကဘယ်ကလည်း ကျနော်ကမေးတော့ PDF အဖွဲ့ကလို့ ပြောတာ‌ကြောင့် ကျနော်ဖြစ်စဉ်ပြောပြပြီး သူတို့ထဲဝင်ခဲ့တာပါ”လို့ ဆိုပါတယ်။

ထွက်ပြေးလာချိန်မှာ လက်နက်ခဲယမ်းတွေမပါလာဘဲ လက်ရှိမှာ သူတို့ ၂ ဦးကို ဒေါင်းစစ်အောင်တပ်ဖွဲ့ စခန်းမှာ ထိန်းသိမ်းစောင့်ရှောက်ထားတယ်လို့ ဒေါင်းစစ်အောင် Local PDF တာဝန်ခံကိုထူးလေးက ပြောပါတယ်။

“သူတို့လက်နတ်ခဲယမ်းတွေမပါခဲ့ဘူးဗျ၊ သူတို့တပ်တွင်းအကြီးပိုင်းတွေကလည်း ပြေးလို့ရှိရင်ပြေး လက်နတ်ယူမသွားနဲ့ အဲ့လိုပြောတယ်လို့ ထွက်ပြေးလာသူ ၂ ဦးကပြောတယ်၊ လက်နတ်ယူသွားလို့ ဖမ်းလို့မိရင်အသေပစ်သတ်မယ် (ပြောလို့)လက်နတ်တွေပါမလာဘူး” လို့ ဆိုပါတယ်။

ဒါ့အပြင် မိသားစုတွေနဲ့လည်း ဆက်သွယ်ခွင့်ပေးထားသလို သူတို့သွားချင်တဲ့ တော်လှန်ရေး အဖွဲ့အစည်းတွေရှိရင်လည်း ချိတ်ဆက်သွားလာဖို့ ခွင့်ပြုထားတယ်လို့ တာဝန်ခံကိုထူးလေးက ပြောပါတယ်။

မကွေးတိုင်း၊ စလင်းမြို့နယ်အတွင်းမှာ အခြေစိုက်တဲ့ ဒေါင်းစစ်အောင် Local PDF ဆီကို အလင်းဝင်လာသူ စုစုပေါင်း ၆ ဦးရှိပြီလို့ သိရပါတယ်။

စာတည်း – လင်း

မကွေး ၊ဇန်နဝါရီ ၁၇၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့၊ နွယ်တမယ်တံတားမှာ ဝာာဝန်ကျနေတဲ့ စစ်ကောင်စီတပ်ဖွဲ့ဝင် ၁ ဦး ကင်းကျတဲ့အချိန်ထွက်ပြေးလာပြီး ဘက်ပြောင်းခိုလှုံလာတယ်လို့ ဒေါင်းစစ်အောင် Local PDF ဆီက သိရပါတယ်။

အသက် ၃၀ နှစ်အရွယ် စစ်ကောင်စီတပ်ဖွဲ့ဝင် ကျော်စွာထက် ဟာ ဇန်နဝါရီ ၁၅ ရက် နွယ်တမယ်တံတားမှာ ကင်းကျတဲ့အချိန် ထွက်ပြေးလာခဲ့တာဖြစ်ပြီး ဒေါင်းစစ်သည်အဖွဲ့ ရှေ့ကင်းပွိုင့်က ရဲဘော်တွေနဲ့အတွေ့မှာ လက်ထောင်ပြပြီး ဘက်ပြောင်းခိုလှုံခဲ့တာလို့ ဒေါင်းစစ်အောင် Local PDF အဖွဲ့တာဝန်ခံကပြောပါတယ်။

“ကျနော်တို့နဲ့ ချိတ်ဆက်ပြီးဝင်လာတော့ မဟုတ်ဘူး။ သူကင်းစောင့်တဲ့နေရာကနေ ကင်းကျတဲ့အချိန်ထွက်ပြေးလာတာ။ ကျနော်တို့ရဲ့ ရှေ့ကင်းပုန်းက တွေ့တာဗျ။ တွေ့တဲ့အခါမှာ မေးတော့ ကျနော်အလင်းဝင်တာပါဆိုပြီး လက်ထောင်ပြီး အလင်းဝင်လာတာ။ ကျနော်တို့နဲ့ ချိတ်ဆက်ထားတာ မဟုတ်ဘူး။” လို့ ဒေါင်းစစ်အောင် Local PDF တာဝန်ခံ ကိုထူးလေးက ပြောပါတယ်။

ဘက်ပြောင်းခိုလှုံလာသူ ကျော်စွာထက် ဟာ စစ်သားစုဆောင်းရေးမှာ ပါဝင်လာသူဖြစ်ပြီး သင်တန်းတက်ပြီးချိန် ခလရ ၂၅၄၊ ၂၅၅ တပ်ထဲမှာ ၃ ရက်အကြာနေခဲ့ရကာ အဲ့ဒီကနေတဆင့် နွယ်တမယ်တံတားမှာ တာဝန်ကျခဲ့သူဖြစ်ပါတယ်။ ၁၀ ရက်ခန့်အကြာမှာ နွယ်တမယ်တံတားကနေ ထွက်ပြေးလာတယ်လို့သိရပြီး ရောက်ရှိလာတာမကြာသေးတဲ့အတွက် တပ်နဲ့ပတ်သက်တဲ့အကြောင်းအရာတွေကိုတော့ မေးမြန်းလို့မရဘူးလို့ သူကဆိုပါတယ်။

စစ်ကောင်စီဟာ နွယ်တမယ်မှာတာဝန်ကျတဲ့ စစ်ကောင်စီတပ်သားတွေ ထွက်ပြေးတာများနေတာကြောင့် ဇန်နဝါရီ ၁၇ ရက် ဒီနေ့ နေ့လယ် ၂ နာရီဝန်းကျင်မှာ တပ်သားအသစ်နဲ့အဟောင်း လဲလှယ်တာတွေလုပ်နေတယ်လို့ သိရပါတယ်။

ဘက်ပြောင်းခိုလှုံလာသူ ကျော်စွာထက် ကတော့ မိသားစုဆီပြန်သွားရင် ဖမ်းဆီးအရေးယူခံရနိုင်တာကြောင့် သူချိတ်ဆက်ထားတဲ့သူငယ်ချင်းတွေရှိတဲ့ ပြည်သူ့ကာကွယ်ရေးတပ်ဖွဲ့ဆီသွားကာ စစ်ကောင်စီတပ်တွေကို ပြန်လည်တော်လှန်ချင်တယ်လို့ ဆိုတာကြောင့် သေချာစိစစ်နေပြီး မှန်ကန်တယ်ဆိုပါက ဆက်သွယ်ပြီး ပို့ပေးသွားမယ်လို့ တာဝန်ခံကိုထူးလေးက ဆက်ပြောပါတယ်။

ကျော်စွာထက်ဟာ မန္တလေးတိုင်း၊ ပြည်ကြီးတံခွန်မြို့နယ်ကဖြစ်ပြီး ထွေအုပ်ရုံးက စစ်မှုထမ်းဆင့်ခေါ်စာနဲ့ ဆေးစစ်ဖို့ ၂ ရက်ကြာမယ်ဆိုကာ ဆယ်အိမ်မှူးကလာရောက်ခေါ်ဆောင်တာကြောင့် ထွေအုပ်ရုံးကိုရောက်ခဲ့ပါတယ်။ အဲ့ဒီညနေမှာ စုဆောင်းရေးတပ် ၉၁၀ ကိုပို့ဆောင်ခံလိုက်ရကာ သင်တန်း ၁၁ ပတ်တက်ခဲ့ရပြီး ဒီဇင်ဘာ ၂၈ ရက်မှာ သင်တန်းဆင်းကာ ၃၀ ရက်မှာ ပခုက္ကူတပ်မ ၁၀၁ ကိုရောက်ခဲ့ပါတယ်။

တိုက်ပွဲဝင်ဖူးတာမရှိသေးဘဲ ကင်းစောင့်တာဝန်သာလုပ်ဆောင်ခဲ့ရပြီး ဇန်နဝါရီလအစောပိုင်းမှာ ခလရ ၂၅၅ တပ်ရင်းကိုရောက်ရှိခဲ့ကာ အဲ့ဒီကနေ ဆင်ဖြူကျွန်းမြို့၊ နွယ်တမယ်တံတားမှာ ကင်းစောင့်တာဝန်ကျပါတယ်။ ကင်းစောင့်နေချိန် ကာကွယ်ရေးတပ်ဖွဲ့တွေက ဒရုန်းချတာကြောင့်ရော၊ စစ်ကောင်စီတပ်ထဲမှာနေထိုင်ရတာ မပျော်တော့တာကြောင့်ပါ အခွင့်ရချိန်ထွက်ပြေးလာခဲ့တယ်လို့ သိရပါတယ်။

“ကျနော်တို့ ကင်းစောင့်နေတဲ့အချိန် အပေါ်ကနေ ဒရုန်းတွေပြုတ်ကျတယ်။ ကျနော်လည်း လန့်တာပေါ့ဗျာ။ ကျနော်တို့က တပ်သားသစ်ဆိုတော့ ဘာလုပ်ရလဲမသိဘူး၊ ဘာကြံရမှန်းမသိဘူး။ ပြောရရင်တော့ ကျနော်တို့က တပ်ထဲမှာလည်းမပျော်ဘူး။ အဲ့ဒါနဲ့ထွက်ပြေးလာတာ။” လို့ စစ်ကောင်စီတပ်သား ကျော်စွာထက်က ပြောပါတယ်။

မကွေးတိုင်း၊ စလင်းမြို့နယ်အတွင်းမှာ အခြေစိုက်တဲ့ ဒေါင်းစစ်အောင် Local PDF ဆီကို အလင်းဝင်လာသူ စုစုပေါင်း ၂ ဦးရှိပြီလို့ သိရပါတယ်။

စာတည်း – ကိုချမ်း