စလင်း

မြေလတ်အသံ၊ ဖေဖော်ဝါရီ ၁၊ ၂၀၂၅။

စစ်ကောင်စီရဲ့ အပတ်စဥ် ၅ စစ်မှုထမ်းသင်တန်းကိုတက်ခဲ့ပြီးနောက် မကွေးတိုင်း၊ မင်းဘူးခရိုင်၊ စလင်းမြို့နယ် ခလရ ၂၅၃ ကိုအပို့ခံခဲ့ရတဲ့ စစ်ကောင်စီတပ်သား ၂ ဦးဟာ ဇန်နဝါရီ ၂၄ ရက်ညမှာ တပ်တွင်းထဲကနေထွက်ပြေးလာခဲ့ကြပါတယ်။

သူတို့ကတော့ အသက် ၂၅ နှစ်အရွယ် စစ်ကောင်စီတပ်သား ကျော်ရဲလင်းနဲ့ အသက် ၂၂ အရွယ် တပ်သားနေလင်းတို့ ဖြစ်ပါတယ်။

သူတို့ ၂ ဦး ထွက်ပြေးလာရင်း ဇန်နဝါရီ ၂၆ ရက်မှာ စလင်းနယ်အခြေစိုက် ဒေါင်းစစ်အောင် Local PDF တပ်ဖွဲ့ဝင်တွေနဲ့ တွေ့ခဲ့ပြီးနောက်မှာ ဘက်ပြောင်းခိုလှုံနိုင်ခဲ့ကြတယ်လို့ ဒေါင်းစစ်အောင် Local PDF အဖွဲ့တာဝန်ခံ ကိုထူးလေးက ပြောပါတယ်။

တပ်သားကျော်ရဲလင်းဟာ ဧရာဝတီတိုင်း၊ မအူပင်မြို့နယ်၊ သူဌေးကုန်းရွာဇာတိဖြစ်ပြီး တောင်ယာလုပ်ငန်းလုပ်ကိုင်ပြီး မိဘကိုလုပ်ကျွေးနေသူပါ။ ၂၀၂၄ ဧပြီမှာ စစ်မှုထမ်းမဲပေါက်တဲ့အတွက် နေအိမ်ကတိမ်းရှောင်ခဲ့ပေမယ့် ၃ လအကြာ ဇူလိုင်လမှာ အိမ်ကိုပြန်လာချိန် အဖမ်းခံခဲ့ရတာဖြစ်ပါတယ်။

မအူပင်ထောင်မှာ ထောင် ၁ လကျခဲ့ပြီးနောက် မအူပင် ၂၇ တပ်စုဆောင်းရေးမှာ ၂၅ ရက်ကြာနေခဲ့ရတယ်လို့ ဆိုပါတယ်။ အဲ့ဒီနောက် စက်တင်ဘာ ၉ ရက်ကစတင်ကာ စစ်သင်တန်း အပတ်စဥ် ၅ ကို နေပြည်တော် မိုးဆွေသင်တန်းရုံးမှာ ၃ လတက်ခဲ့ပြီး ဒီဇင်ဘာလမှာ ခလရ ၂၅၃ တပ်ထဲကို ရောက်ခဲ့တာလို့ တပ်သားကျော်ရဲလင်းက သူကြုံခဲ့ရတဲ့အခြေအနေတွေကို ပြန်ပြောပြပါတယ်။

အလားတူ တပ်သားနေလင်းကလည်း ပဲခူးတိုင်း၊ ပေါင်းတည်းမြို့နယ်ကဖြစ်ပြီး ကားဝပ်ရှော့တခုမှာ အလုပ်လုပ်ကာ မိဘတွေကို လုပ်ကိုင်ကျွေးမွေးနေတယ်လို့ သိရပါတယ်။ ဇူလိုင်လပိုင်းမှာ ပေါင်းတည်မြို့နယ်မှာပဲ စစ်ကောင်စီ တပ်ဖွဲ့ဝင်တွေရဲ့ အဓမ္မဖမ်းဆီးတာကို ခံခဲ့ရတာပါ။

၁၀ ရက်ဝန်းကျင်ထောင်ကျပြီး ထောင်မှထွက်ပြေးကာ ဧရာဝတီတိုင်းဘက်ကို ထွက်ပြေးခဲ့ပေမယ့် အဲ့ဒီမှာ ပြန်လည်ဖမ်းဆီးခံခဲ့ရပြီးနောက် စစ်တပ်ထဲကို ပို့လိုက်တာလို့ တပ်သားနေလင်းက ပြောပါတယ်။

အဲဒီကနေ တပ်သားနေလင်းဟာ စက်တင်ဘာ ၉ ရက်ကစပြီး ရန်ကုန်တိုင်း ရဲမွန်အရာရှိသင်တန်းကျောင်းမှာ စစ်သင်တန်းအပတ်စဥ် ၅ ကို တက်ခဲ့ရကာ ဒီဇင်ဘာ ၉ ရက်မှာ စလင်းမြို့ ခလရ ၂၅၃ ကို ပို့ဆောင်ခံခဲ့ရတာ ဖြစ်ပါတယ်။

ခလရ ၂၅၃ ကိုရောက်တဲ့အချိန်မှာ မအူပင်က တပ်သားကျော်ရဲလင်းနဲ့တွေ့ဆုံခဲ့ကြပြီး ၂ ဦးသား ထွက်ပြေးဖို့ တိုင်ပင်ကာ ၂၀၂၅ ဇန်နဝါရီ ၂၄ ရက်ညက တပ်ထဲကနေ ထွက်ပြေးလာတယ်လို့ တပ်သားနေလင်းက ဆိုပါတယ်။

ကာကွယ်ရေးတပ်ဖွဲ့ရှိတဲ့ရွာကို သွားနေရင်း လမ်းမှာ ၂ ညအိပ်ကာ စားစရိတ်အတွက် သူတို့မှာပါလာတဲ့ ဖုန်း ၁ လုံးကို ရောင်းခဲ့ရတယ်လို့ ဆိုပါတယ်။ ဇန်နဝါရီ ၂၆ ရက်နေ့မှာတော့ ဆင်ဖြူကျွန်းမြို့နယ် နွယ်တမယ်ရွာအကျော်မှာ ကာကွယ်ရေးတပ်ဖွဲ့ဝင်တွေနဲ့တွေ့ကာ သူတို့ရဲ့ ဖြစ်စဉ်တွေကို ပြောပြခဲ့တယ်လို့ တပ်သားကျော်ရဲလင်းက ပြောပါတယ်။

စစ်သင်တန်းတက်ခဲ့ချိန်တုန်းကလည်း သင်တန်းတလျှောက်မှာ စစ်ကောင်စီတပ်ဖွဲ့ဝင်တွေကလက်နက်ပေးကိုင်တာမျိုးမရှိဘဲ ရွာတွေထဲကိုစစ်ကောင်စီတပ်သားတွေနဲ့အတူ ပတ်ကင်းလိုက်ရတာမျိုးတွေ လုပ်ခဲ့ရတယ်လို့ တပ်သားကျော်ရဲလင်းဆီက သိရပါတယ်။

သူတို့ ၂ ဦးထွက်ပြေးလာချိန်မှာ လက်နက်ခဲယမ်းတွေမပါလာဘဲ လက်ရှိမှာတော့ ၂ ဦးစလုံးကို ဒေါင်းစစ်အောင်တပ်ဖွဲ့ စခန်းမှာ ထိန်းသိမ်းစောင့်ရှောက်ထားတယ်လို့ ဒေါင်းစစ်သည် Local PDF အဖွဲ့တာဝန်ခံ ကိုထူးလေးက ပြောပါတယ်။

စစ်ကောင်စီအောက်ပါသွားကြပေမယ့် သူတို့ဟာ အစကတည်းက တနေ့စစ်ထဲကနေ ထွက်ပြေးမယ်လို့ ၂ ဦးသားက ရည်ရွယ်ချက်ရှိနေကြတာပါ။ တပ်ထဲမှာ ဖိနှိပ်ခံရတာတွေ အရိုက်ခံရတာတွေလည်း ကြုံခဲ့ကြရတယ်လို့ ဆိုကြပါတယ်။ အခုတော့ ကာကွယ်ရေးတပ်ဖွဲ့ထဲကို ဘက်ပြောင်းခိုလှုံနိုင်ကြပြီဖြစ်လို့ အိမ်ကို မပြန်ချင်ကြသေးပဲ ကာကွယ်ရေးတပ်ဖွဲ့ဝင်တွေနဲ့အတူ စစ်ကောင်စီကို ပြန်လည်တိုက်ခိုက်သွားဖို့ ဆန္ဒရှိနေကြတာပါ။

ဒေါင်းစစ်အောင် ကာကွယ်ရေးတပ်ဖွဲ့က သူတို့ကို မိသားစုတွေနဲ့လည်း ဆက်သွယ်ခွင့်ပေးထားသလို သူတို့သွားချင်တဲ့ တော်လှန်ရေး အဖွဲ့အစည်းတွေရှိရင်လည်း ချိတ်ဆက်သွားလာဖို့ ခွင့်ပြုထားတယ်လို့ တာဝန်ခံကိုထူးလေးက ပြောပါတယ်။

မကွေးတိုင်း၊ စလင်းမြို့နယ်အတွင်းမှာ အခြေစိုက်တဲ့ ဒေါင်းစစ်အောင် Local PDF ဆီကို အလင်းဝင်လာသူ စုစုပေါင်း ၆ ဦးရှိပြီ ဖြစ်ပါတယ်။

သတင်း နှင့် တည်းဖြတ် – ငြိမ်းဇော်

အင်တာဗျူး – ဒိန်းဂျား၏

မကွေး၊ ဇန်နဝါရီ ၃၀၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့၊ သရက်ချဉ်ကျေးရွာမှာ ‌ကာကွယ်ရေးအဖွဲ့တွေရဲ့ နယ်မြေထဲဝင်လာတဲ့ စစ်ကောင်စီစစ်ကြောင်း ၂ ရက်တာ တိုက်ခိုက်ခံရပြီး စစ်ကောင်စီဘက်က သေဆုံးသူတွေနဲ့ ဒဏ်ရာရသူ များပြားတယ်လို့ ဒေါင်းစစ်အောင် Local PDF ထံက သိရပါတယ်။

စစ်ကောင်စီစစ်ကြောင်းဟာ ခလရ ၂၅၃၊ ခလရ ၂၅၄၊ ခလရ ၂၅၅ တပ်က စစ်သားတွေဖြစ်ကာ ဇန်နဝါရီ ၂၈ ရက်က အင်အား ၂၀၀ ဝန်းကျင်နဲ့ စလင်းကနေ စစ်ကြောင်းထွက်လာကာ မိုးဝန်းကျေးရွာနဲ့ သာစည်ကျေးရွာကြားမှာ မိုင်းဆွဲခံခဲ့ရလို့ ၄ ဦးသေဆုံးတယ်လို့ ‌သိရပါတယ်။

အလားတူ အဆိုပါစစ်ကြောင်းဟာ ဇန်နဝါရီ ၂၉ ရက်မှာလည်း ဆင်ဖြူကျွန်းမြို့ သမြင်းကင်းရွာနဲ့ ကျောင်းကုန်းရွာဘက်ကို ဦးတည်လာပြီး သရက်ချဉ်ကျေးရွာနဲ့ ကျောင်းကုန်းရွာကြားမှာ မနက် ၈ နာရီ ၁၅ မိနစ်ဝန်းကျင်ကစပြီး ကာကွယ်ရေးတပ်ဖွဲ့တွေနဲ့ ၁ နာရီကြာ ထိတွေ့တိုက်ပွဲဖြစ်ကာ စစ်ကောင်စီဘက်က သေဆုံးထိခိုက်မှုတွေရှိတယ်လို့ တာဝန်ခံ ကိုထူးလေးက ပြောပါတယ်။

ကာကွယ်ရေးတပ်ဖွဲ့တွေ ပြောဆိုချက်အရ ၂ ရက်တာ တိုက်ပွဲမှာ စစ်ကောင်စီဘက်က ခန့်မှန်းခြေ ၁၀ ဦးသေဆုံးပြီး ဒဏ်ရာရသူတွေလည်း အများအပြားရှိတယ်လို့ ဆိုပါတယ်။ လက်ရှိ ဇန်နဝါရီ ၃၀ ရက်နေ့အထိ စလင်းမြို့နယ်၊ ဆင်ဖြူကျွန်းမြို့၊ သရက်ချဉ်ကျေးရွာအနီးမှာ စစ်ကောင်စီတပ်ဖွဲ့ဝင်တွေနဲ့ တော်လှန်ရေးတပ်ဖွဲ့တွေ နှစ်ဘက် ဆိုင်ထားနေဆဲလို့ သိရပါတယ်။

ဒီတိုက်ခိုက်မှုကို ဒေါင်းစစ်အောင် Local PDF၊ မင်းဘူးခရိုင်လက်ရုံးအဖွဲ့၊ မကွေးတိုင်း ဒရုန်းတပ်ဖွဲ့၊ မင်းဘူးခရိုင် တပ်ရင်း ၅ ဒရုန်းတပ်ဖွဲ့၊ မင်းဘူးခရိုင်တပ်ရင်း ၁ ၊မင်းဘူးခရိုင်တပ်ရင်း ၅၊ ဗမာ့တပ်တော်အဖွဲ့၊ မင်းဘူးခရိုင် စလင်းမြို့နယ် (ပကဖ)အဖွဲ့နဲ့ အခြားမဟာမိတ်တပ်ဖွဲ့တို့က ပူးပေါင်းလုပ်ဆောင်ခဲ့တာလို့ သိရပါတယ်။

တည်းဖြတ် – HP