စစ်ရှောင်ဒေသခံ

ထီးချိုင့်၊ ဧပြီ ၅၊ ၂၀၂၃။

စစ်ကိုင်းတိုင်း၊ ထီးချိုင့်မြို့နယ်မှာ နေအိမ်တွေမီးရှို့ခံရလို့ ထွက်ပြေးတိမ်းရှောင်နေကြရတဲ့ စစ်ဘေးရှောင် ၂၅၀၀ ကျော်မှာ ကျန်းမာရေးချို့တဲ့မှုဒဏ်ကို ခံစားနေရတာကြောင့် အရေးပေါ်အကူအညီတွေ လိုအပ်နေတယ်လို့ သိရပါတယ်။

အဲ့ဒီဒေသခံတွေ တိမ်းရှောင်နေကြတဲ့ နေရာမှာ ရေရှားပါးမှု၊ အစားအစာလုံလုံလောက်လောက် မစားရတာတွေကြောင့် ကလေးတွေနဲ့ သက်ကြီးရွယ်အိုတွေမှာ ဝမ်း‌လျှော၊ ဝမ်းပျက်ရောဂါနဲ့ ဖျားနာတာတွေဖြစ်နေကြတာလို့ စစ်ရှောင်တွေ ခိုလှုံနေတဲ့နေရာကို သွားရောက်ကြည့်ရှု့ခဲ့တဲ့ Royal Tiger Support Battalion မှ တာဝန်ရှိသူတဦးက ပြောပါတယ်။

“ဒီရောဂါဖြစ်နေတာက ကလေးတွေနဲ့ အဘိုး၊အဘွားတွေ များတယ်။ နေကြရတဲ့ တဲတွေကလည်း အမိုးတောင် မရှိကြဘူး။ မိုးကာတွေလိုတယ်။ ရေကတော်တော်ရှားတယ်။ တချို့မှာဆိုရင် ဝတ်စရာအဝတ်တောင် မရှိကြဘူး။ ကျနော်တို့အဖွဲ့က တတ်နိုင်သလောက်တော့ လှူခဲ့တယ်။ ဒါပေမဲ့ လူကများတော့ မလောက်ငှဘူး” လို့ ဆိုပါတယ်။

အင်အား ၁၀၀ ကျော်ပါတဲ့ စစ်ကောင်စီတပ်က မတ်လ ၃၁ ရက်မှာ ထီးချိုင့်နယ်ကညောင်ပင်သာကျေးရွာ၊ ဧပြီလ ၂ ရက်မှာ မယ်ဇလီရွာနဲ့ ရတနာအောင်ရွာတို့ကို မီးရှို့ခဲ့တာကြောင့် အခုလိုထွက်ပြေးနေရတာဖြစ်ပြီး၊ မီးရှို့မှုကြောင့် ညောင်ပင်သာရွာက လူနေအိမ် ၂၁၈ လုံး၊ မယ်ဇလီရွာက ၈၉ လုံး၊ ရတနာအောင်ရွာက ၅ လုံးတို့ ပြာကျပျက်စီးခဲ့တယ်လို့ သိရပါတယ်။

အထက်ပါကျေးရွာတွေက ဒေသခံတွေ ထွက်ပြေး‌တိမ်းရှောင်နေကြရဝာာဖြစ်ပြီး၊ သူတို့တွေအတွက် တတ်နိုင်သလောက် ကူညီလှူဒါန်းလိုတဲ့ မိဘပြည်သူတွေအနေနဲ့ Royal Tiger Support Battalion Page ကို တိုက်ရိုက်ဆက်သွယ်နိုင်သလို NUG Pay၊ Kpay တို့ကလည်း ဆက်သွယ်လှူဒါန်းနိုင်တယ်လို့ ပြောဆို တိုက်တွန်းထားပါတယ်။

ပြီးခဲ့တဲ့ မတ်လ ၃၁ ရက်မှာလည်း ထီးချိုင့်မြို့နယ်က ဝဲကြီးနဲ့ အင်ဒေါင်းကျေးရွာအကြားကို တိုက်ပွဲမဖြစ်ဘဲ စစ်ကောင်စီက တိုက်ခိုက်ရေးလေယာဥ်တစီးနဲ့ ညနေ ၄ နာရီလောက်မှာ ဗုံးကြဲခဲ့တာကြောင့် စစ်ဘေးရှောင် ၆ ဦး သေဆုံးပြီး၊ ၃ ဦးထက်မနည်း ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

စာတည်း – လင်း

ပခုက္ကူ၊ မတ် ၁၇၊ ၂၀၂၃။

မကွေးတိုင်း၊ ပခုက္ကူမြို့နယ်ကနေ ပုဂံ၊ ညောင်ဦးဘက် သွားတဲ့လမ်းကို စစ်ကောင်စီတပ်သားတွေက မတ်လ ၁၆ ရက် မနေ့ကစတင်ပြီး ပိတ်လိုက်တာကြောင့် စစ်ရှောင်ဒေသခံ ၈ ထောင်ဝန်းကျင် ပိတ်မိနေတယ်လို့ ဒေသခံတွေက ပြောပါတယ်။

ပိတ်မိနေကြသူတွေဟာ ကျွန်းချောင်း(EPC) စက်ရုံရဲ့ပတ်ဝန်းကျင်ကျေးရွာ ၁၁ ရွာက ဒေသခံတွေဖြစ်ပြီး၊ စားနပ်ရိက္ခာတွေလည်း ပြတ်တောက်တော့မယ့် အခြေအနေကို ရောက်နေပြီလို့ ထွက်ပြေးနေရသူတဦးက ပြောပါတယ်။

“စကစတွေက နေ့တိုင်းတရွာဝင် တရွာထွက် မွှေနှောက်နေတာ။ ဒီနေ့မှာလည်း လက်နက်ကြီးတွေ ပစ်ခတ်နေတယ်။ ကမ္ဘာပျက်နေသလိုပါပဲ။ ကျနော်တို့မှာ ပုဂံ၊ညောင်ဦးဘက်ကိုလည်း ထွက်ပြေးလို့မရတော့ဘူး။ စကစတွေဝင်လာရင် တခြားတရွာထွက်ပြေး၊ အဲ့ရွာကိုဝင်လာရင် နောက်တရွာကိုထွက်ပြေးနဲ့ စက်ဝိုင်းထဲ ပြေးနေရသလိုပါပဲ။ စားနေရတာကလည်း အခုရှိတာလေးတွေ ကုန်တော့မယ်” လို့ ဆိုပါတယ်။

စစ်ကောင်စီတပ်တွေဟာ မတ်လ ၁၇ ရက် ဒီနေ့မနက်မှာလည်း EPC စက်ရုံထဲကနေ ဖောကားတစီး၊ ဆိုင်ကယ်အစီး၂၀ကျော်၊ ခြေကျင်အင်အား၂၀ ဝန်းကျင်နဲ့အတူ ကားလမ်းမအတိုင်းထွက်လာကာ လက်ရှိမှာ ညောင်လှကျေးရွာထဲကို ဝင်သွားကြတယ်လို့ နောက်ထပ် အမျိုးသားတဦးက ပြောပါတယ်။

“ဒေသခံတွေက မနက်လင်းကတည်းကနေ ကစဥ့်ကလျားဖြစ်နေကြတာ။ ပုဂံဘက်ကိုထွက်ပြေးမယ်ဆိုရင်လည်း မရတော့ဘူး။ ခရီးသွားတွေကိုပဲ သွားခွင့်ပြုတယ်တဲ့။ စစ်ရှောင်တွေကို အဲ့ဒီဖက်ကို လုံးဝမကူးရတော့ဘူးတဲ့။ ကျနော်တို့ဘက် ထွက်လမ်းက အဲ့ဒီတလမ်းပဲ ရှိတော့တာကို ပိတ်လိုက်ပြီ” လို့ ဆိုပါတယ်။

အဆိုပါဒေသခံတွေအနေနဲ့ ပုဂံ၊ညောင်ဦးဘက်ကို သွားလိုပါက ဘုမိယျလှေဆိပ် (ကူတိုးဆိပ်)ကို ဖြတ်သွားရပြီး၊ အဲ့ဒီလှေဆိပ်မှာ စစ်ကောင်စီတပ်သားတွေက ဂိတ်ဖွင့်ပြီး အသွားအလာကို ပိတ်ပင်တားမြစ်ထားတာလည်း ဖြစ်ပါတယ်။

အဲ့ဒီကျေးရွာနယ်မြေကို EPC စက်ရုံနဲ့ BPI တပ်က စစ်ကောင်စီတပ်သားတွေဟာ နေ့တိုင်းလိုလို စစ်ကြောင်းထိုးမွှေနှောက်နေပြီး၊ မနေ့ကဆိုရင်လည်း ချမ်းသာကြီးကျေးရွာထဲမှာ ခိုလှုံနေကြတဲ့ စစ်ဘေးရှောင်တွေရဲ့ ဆိုင်ကယ်အစီးရေ ၂၁ စီးကို ခိုးယူခဲ့တယ်လို့ စစ်ရှောင်တွေက ပြောပါတယ်။

ချမ်းသာကြီး၊ မြို့စိုး၊ ငှက်ပျောတော၊ သီရိလေး၊ ပေါက်တော၊ ကံကြီးစု၊ အိုင်ကြီး၊ ညောင်လှ၊ ညောင်နီပင်၊ သိမ်တော်၊ ဆယ်လံရွာက ဒေသခံပြည်သူတွေ ပိတ်မိနေကြတာလည်း ဖြစ်ပါတယ်။