စစ်ဘေးရှောင်

ပေါက်၊ ဖေဖော်ဝါရီ ၁၁၊ ၂၀၂၆။

မကွေးတိုင်း၊ပေါက်မြို့နယ်၊ ချက်ကန်ရွာနဲ့သပြေရွာကြားမှာရှိတဲ့ တောတိုက်တွေကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့လို့ လူ ၅ ဦးသေဆုံးခဲ့တယ်လို့ ဒေသခံတွေထံက သိရပါတယ်။

ဖေဖော်ဝါရီ ၁၀ ရက် ယမန်နေ့ မနက် ၁၀ နာရီမှာ ပါရာမော်တာနဲ့ ဗုံး ၄ လုံး၊ မနက် ၁၁ နာရီကျော်မှာ တိုက်လေယာဥ်နဲ့ ဗုံး ၄ လုံး ကြဲချတိုက်ခိုက်ခဲ့တာဖြစ်ပြီး တောတိုက်နေအိမ်တွေပေါ် ကျရောက်ပေါက်ကွဲခဲ့တယ်လို့ ဆိုပါတယ်။

ပါရာမော်တာဗုံးကြဲတာမှာ တောတိုက်တွေနဲ့ ၃ ဖာလုံအကွာ တောစပ်တွေမှာ ကျရောက်ပေါက်ကွဲခဲ့လို့ လူထိခိုက်မှု မရှိခဲ့ပေမယ့် တိုက်လေယာဥ်ဗုံးကြဲမှုမှာ တောတိုက်နေအိမ်တွေပေါ်တည့်တည့် ကျပေါက်ကွဲတာကြောင့် လူသေဆုံးမှုများခဲ့တာလို့ ဆိုပါတယ်။

” ဈေးဆိုင်ကပ်လျက် အိမ်က ကျောင်းသူလေး ၁ ဦးက ခေါင်းပြတ်သွားတယ်။ သေတာက ၅ ဦး သေတာ၊ ၄ ဦးကတော့ နေရာတင်ပွဲချင်းပြီးသေတယ်။ ဈေးဆိုင်ကြီးလည်း မီးလောင်သွားတယ်၊ ဈေးဆိုင်နဲ့ အိမ် ၁ လုံးက ဒဲ့(တည့်)မှန်တာဆိုတော့ လုံးလုံးပြာကျတယ်” လို့ ပေါက်ဒေသခံတဦးက မြေလတ်အသံကို ပြောပါတယ်။

သေဆုံးသူတွေဟာ ပေါက်မြို့နယ်၊ ပုတီးရွာခံတွေဖြစ်ပြီး ၂၀၂၂ နှစ်လယ်ပိုင်းမှာ စစ်ကော်မရှင်တပ်က ပုတီးရွာကိုစစ်ကြောင်းထိုးမီးရှို့ခဲ့လို့ နေအိမ်တွေပျက်စီးခဲ့ရတဲ့ဒေသခံအချို့ဟာ ချက်ကန်နဲ့ သပြေရွာအကြား တောတိုက်တွေဆီ အဲ့ဒီလပိုင်းအတွင်းမှာပဲ ပြောင်းရွှေ့နေထိုင်နေကြတာဖြစ်ပြီး တောတိုက်တွေမှာ နေအိမ် ၅ လုံးနဲ့ စျေး ဆိုင် ၁ ဆိုင်သာရှိတယ်လို့ သိရပါတယ်။

ဗုံးကြဲတိုက်ခိုက်မှုကြောင့် တောတိုက်နေအိမ်နဲ့စျေးဆိုင်မှာနေထိုင်တဲ့ အသက် ၂၃ နှစ် မိုးကျော်၊ အသက် ၄၀ ကျော် မချိုကြီး၊ အသက် ၄၈ နှစ် မရွှေဝင်း၊ အသက် ၁၀ နှစ်ဝန်းကျင် မတင်မိုးနိုင်၊ အသက် ၁၆ နှစ် တင်မိုးလှိုင် တို့ သေဆုံးခဲ့ပြီး နောက်ထပ် အမျိုးသမီး ၃ ဦး ဒဏ်ရာရခဲ့တယ်လို့ သိရပါတယ်။

မြင်းခြံ၊ ဖေဖော်ဝါရီ ၅၊ ၂၀၂၆ ။

မန္တလေးတိုင်း၊ မြင်းခြံမြို့နယ်ထဲက ပြည်တော်သာ၊ တန်းဆောင်း၊ နတ်ညွန်းနဲ့ ဒါးကျွန်း(တောင်)၊ ဒါးကျွန်း(မြောက်)ရွာတွေကို စစ်ကော်မရှင်စစ်ကြောင်းက မီးရှို့လို့ အိမ်ခြေ ၁,၀၀၀ နီးပါး မီးလောင်ပျက်စီးထားတယ်လို့ မြင်းခြံမြို့နယ်ပကဖတာဝန်ရှိသူတွေထံက သိရပါတယ်။

မြင်းခြံအခြေစိုက် ခမရ ၁၅ တပ်ကနေထွက်လာတဲ့ အင်အား ၁၀၀ ကျော်ပါစစ်ကြောင်းဟာ ဖေဖော်ဝါရီ ၄ ရက် မနက် ၅ နာရီခန့်မှာ ပြည်တော်သာကျေးရွာကို စတင်ဝင်ရောက်မီးဝင်ရှို့ပြီးနောက် ယမန်နေ့ညပိုင်းအထိ အခြားကျေးရွာ ၄ ရွာကိုပါ ဆက်တိုက်မီးရှို့ခဲ့တာလို့ ဆိုပါတယ်။

” ရွာတွေက ကပ်လျက်တွေဆိုတော့ ပြိုင်တူမီးရှိူ့သလိုဖြစ်တာ။ ပြည်တော်သာပြီးတော့ ဆက်တိုက်ရှို့တာ။ ရွာလုံးကျွတ်နီးပါးတွေလောင်တာ။ ထိတွေ့တိုက်ပွဲကိုမဖြစ်ရဘူး။ မနက်ဝေလီဝေလင်းတွေဝင် တန်းရှို့ အကာအကွယ်ကိုမရလိုက်ဘူး။ အမှန်ပြောရရင်တော့ အကြောက်တရားပေးတာ။”လို့ မြင်းခြံမြို့နယ်ပကဖတာဝန်ရှိသူတဦးက မြေလတ်အသံကို ပြောပါတယ်။

မီးရှို့ခံရတဲ့ ကျေးရွာ ၅ ရွာက အနည်းဆုံးအိမ်ခြေ ၁၅၀ ကနေ အများဆုံး ၄၀၀ အထိရှိတဲ့ကျေးရွာတွေပါဝင်ပြီး လတ်တလောသိရှိထားချက်အရ အိမ်​ခြေ ၁,၀၀၀ နီးပါး မီးလောင်ပျက်စီးထားကာ အသေးစိတ်ကို စာရင်းကောက်ယူဖို့ လုပ်ဆောင်နေတယ်လို့ သူကဆိုပါတယ်။

အဲ့ဒီစစ်ကော်မရှင်စစ်ကြောင်းဟာ ဖေဖော်ဝါရီ ၅ ရက် ဒီကနေ့မနက်ပိုင်းအထိ ဒါးကျွန်းနဲ့တန်းဆောင်းရွာအနီးမှာ ရှိနေသေးပြီး စစ်ကြောင်းထိုးမီးရှို့နေလို့ ပြည်တော်သာ၊ တန်းဆောင်း၊ နတ်ညွန်း၊ ဒါးကျွန်း(တောင်)ရွာနဲ့ (မြောက်)ရွာတွေအပါ ကျေးရွာ ၉ ရွာက ဒေသခံ ၅,၀၀၀ ကျော်ဘေးလွတ်ရာကို ပြေးနေရတယ်လို့ သိရပါတယ်။

မြင်းခြံခရိုင်ဟာ တော်လှန်ရေးတပ်တွေအားကောင်းတဲ့နယ်မြေဖြစ်ပြီး သီတာယုမွန်ဦးဆောင်တဲ့ ပျူစောထီးနဲ့စစ်ကော်မရှင်ပူးပေါင်းတပ်တွေကလည်း နယ်မြေအတွင်း စစ်ကြောင်းထိုးကာ ကျေးရွာတွေကို မီးရှို့တာနဲ့ ဒေသခံတွေကို ဖမ်းဆီးသတ်ဖြတ်တာတွေ မကြာခဏလုပ်ဆောင်တယ်လို့ ဒေသခံတွေနဲ့ ကာကွယ်ရေးတပ်ဖွဲ့တွေထံက သိရပါတယ်။

ချောက်၊ ဖေဖော်ဝါရီ ၃၊ ၂၀၂၆။

မကွေးတိုင်း၊ ချောက်မြို့နယ်ရှိ စစ်ကော်မရှင်တပ်တွေမီးရှို့ခဲ့တဲ့ ကျေးရွာ ၂ ရွာကို ဖေဖော်ဝါရီ ၂ ရက်မှာ ရိက္ခာတွေ ထောက်ပံ့ပေးခဲ့တယ်လို့ ချောက်မြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

စစ်ကော်မရှင်တပ်တွေရဲ့ မီးရှို့ဖျက်ဆီးမှုကိုခံထားရတဲ့ အဆိုပါကျေးရွာ ၂ ရွာက အိမ်ထောင်စု ၁၂၀ ကို ဆန်၊ ဆီ၊ ဆားအပါအဝင် အခြေခံရိက္ခာပစ္စည်းတွေထောက်ပံ့ပေးခဲ့တာလို့ ဆိုပါတယ်။

“အိမ်ခြေ ၁၂၀ ကို လှူဒါန်းခဲ့ပါတယ်၊ အဓိကတော့ အခြေခံမီးဘေးသင့်ပြည်သူတွေလိုအပ်တဲ့ ဆန်၊ ဆီ၊ ဆား၊ ငါးပိ၊ ကြက်သွန်၊ ခရမ်းချဉ်သီး၊ ခရမ်းခေါင်းသီး၊ အားလူး၊ အသားတု စတဲ့စားနပ်ရိက္ခာတွေကို သွားရောက်လှူဒါန်းခဲ့တာပါ၊ ဆန်ဆိုရင် ၁ အိမ်ထောင်ကို ၄ ပြည်နှုန်း ပေးလှူဒါန်းခဲ့ပါတယ်။” လို့ ချောက်မြို့နယ်ပြည်သူ့ကာကွယ်ရေးအဖွဲ့ တာဝန်ရှိသူတဦးက ပြောပါတယ်။

ဒီထောက်ပံ့မှုဟာ အဆိုပါဒေသခံတွေအတွက် ခဏတာအဆင်ပြေနိုင်ပေမယ့် ရေရှည်နေထိုင် စားသောက်ဖို့ကတော့ အခက်အခဲတွေရှိနေသေးတယ်လို့ ဆိုပါတယ်။

“ကျနော်တို့လည်း တတ်နိုင်တာပဲလုပ်ရတာဆိုတော့ ပြည်သူမှပြည်သူသို့ အစီအစဉ်နဲ့ လုပ်ရတဲ့ အနေအထားဆိုတော့ ခေတ္တခဏ ၁ ရက်တန် ၂ ရက်တန်အထိတော့ သူတို့စားရေး သောက်ရေးတော့ အဆင်ပြေကောင်းပြေလိမ့်မယ်၊ ဒါပေမဲ့ ရေရှည်မှာတော့ အိမ်ရဲ့ ပိုင်ဆိုင်မှုတွေအကုန်လုံး ဆုံးရှုံးသွားတာဆိုတော့ သူတို့ဘဝတွေအတွက်က အခက်အခဲတွေ အများကြီးရှိပါတယ်။” လို့ သူက ပြောပါတယ်။

လက်ရှိမှာ နေအိမ်တွေမီးရှိ့ခံထားရတာကြောင့် အရိပ်ရှိတဲ့နေရာတွေမှာ နေထိုင်နေကြရပြီး နေစရာလည်း အခက်တွေ့နေတယ်လို့ သိရပါတယ်။

“ပြီးရင် သူတို့မှာ လွန်တီးခေါင်ပြင်ထဲမှာ နေရပြီး တဲလောက်တောင် မထိုးနိုင်ဘဲ အရိပ်ရှိတဲ့နေရာမှာ ဖြစ်သလို မိသားစုတွေ နေထိုင်ရတာ၊ တော်တော်လေး ခက်ခဲကြမ်းတမ်းကြပါတယ်၊ မီးဘေးသင့် ပြည်သူတွေရဲ့ အနေအထားကိုကြည့်ရတာ ရင်နာစရာလည်းကောင်းပါတယ်။” လို့ ဆိုပါတယ်။

အဆိုပါကျေးရွာ ၂ ရွာကို အခုနှစ် ဇန်နဝါရီ ၂၇ ရက်မှာ စစ်ကော်မရှင်တပ်တွေက စစ်ကြောင်းထိုး မီးရှို့ခဲ့တာကြောင့် နေအိမ် ၁၂၀ ပျက်စီးခဲ့တာလည်း ဖြစ်ပါတယ်။

စာတည်း – လင်း

မြေလတ်အသံ၊ ဇန်နဝါရီ ၂၀၊ ၂၀၂၆။

မကွေးတိုင်း၊ စလင်းမြို့နယ်မှာ စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ပြီး မြေပြင်ကနေပါ စစ်ကြောင်းထိုးနေတာကြောင့် ကျေးရွာ ၁၅ ရွာက ဒေသခံတွေ ထွက်ပြေးနေကြရတယ်လို့ ဒေသခံတွေကပြောပါတယ်။

ဇန်နဝါရီ ၂၀ ရက်မနက် ၁၀ နာရီကျော်မှာ စလင်းမြို့ပေါ်ရှိ စစ်ကော်မရှင်တပ်က ရှားတော၊ ကျောက်ရဲတုန်း၊ အောက်လှိုင်းကျေး ရွာတွေကို ဒရုန်းတွေနဲ့ ဗုံးကြဲတိုက်ခိုက်နေတာကြောင့် နေအိမ်တွေပျက်စီးမှုတွေလည်းရှိခဲ့တယ်လို့ စလင်းဒေသခံအမျိုးသားတဦးက ပြောပါတယ်။

အလားတူဇန်နဝါရီ ၁၉ ရက်မှာ ဝမ်းပြည့်ကျေးရွာကို စစ်ကော်မရှင်တပ်က ဒရုန်းတွေနဲ့ ဗုံးကြဲတိုက်ခိုက်ခဲ့ရာ အမျိုးသမီး ၂ ဦးနဲ့ အမျိုးသား၂ ဦး ဒဏ်ရာရရှိခဲ့ပြီး အဲဒီထဲက အမျိုးသား ၁ ဦးနဲ့ အမျိုးသမီး ၁ ဦးတို့ဟာ ဒဏ်ရာပြင်းထန်ခဲ့တယ်လို့ဆိုပါတယ်။

“ဘာတိုက်ပွဲမှမရှိပါ။ ရွှေလေးသင်္ချိုင်းဘက်ကနေ ဒရုန်းတွေလွှတ်တင်တာ။ ဗုံးသီးတွေ ၁၀ ကျော်ကြဲတယ်။ ရွာကလူတွေ ထွက်ပြေးသွားကြပြီ။ ရွာထဲမှာ ၁ ယောက်မှ မကျန်တော့ဘူး”လို့ စလင်းဒေသခံအမျိုးသားတဦးက ပြောပါတယ်။

ဒါ့အပြင် ဇန်နဝါရီ ၁၈ ရက်မှာလည်း စလင်းမြို့ပေါ်ကနေ အင်အား ၂၀၀ ခန့်ပါစစ်ကော်မရှင်တပ်သားတွေက ပန်းတိမ်ကုန်း နဲ့ ကညှပ်ကျေးရွာတို့ကို စစ်ကြောင်းထိုးဝင်ရောက်လာပြီး အမျိုးသား ၉ ဦးကို ဖမ်းဆီးကာ နေအိမ်တွေကိုမီးရှို့ဖျက်ဆီးခဲ့တယ်လို့ သူကဆိုပါတယ်။

အဆိုပါစစ်ကြောင်းဟာ ကညှပ်ကျေးရွာကနေတဆင့် နောင်တော်လေးနဲ့ နောင်တော်ကြီးကျေးရွာတို့ကို ဒရုန်းတွေနဲ့ဗုံးကြဲတိုက်ခိုက်ပြီး ကျေးရွာအတွင်းဝင်ရောက်ကာ လူနေအိမ်တွေကို မီးရှို့ဖျက်ဆီးခဲ့တယ်လို့ဆိုပါတယ်။

“၁ ရက်တည်းကို ရွာ ၄ ရွာကို ဝင်ပြီးတော့မီးရှို့တာ။ ရွာထဲကိုမဝင်ခင် အရင်ဒရုန်းနဲ့ ဗုံးကြဲတယ်။ ပြီးမှ ရွာထဲဝင်တာ။ တွေ့တဲ့လူ ဖမ်းတာပဲ။ နောင်တော်ကြီးရွာမှာဆို ဘုန်းကြီးကျောင်းပါ ရှို့သွားတယ်။ ရွာတွေမှာ အိမ်တွေ ဘယ်လောက်ပျက်စီးသွားလဲ ဆိုတာကိုတော့ မသိရသေးဘူး”လို့ အထက်ပါအမျိုးသားက ပြောပါတယ်။

အခုလိုစစ်ကော်မရှင်တပ်က ဒရုန်းတွေနဲ့တိုက်ခိုက်ပြီး ကျေးရွာတွေကို ဝင်ရောက်မီးရှို့နေတာကြောင့် ဝမ်းပြည့်၊ ပန်းတိမ်ကုန်း၊ ကညှပ်၊ နောင်တော်ကြီး၊ နောင်တော်လေး၊ ဥယျာဥ်စု၊ ပန်းတော၊ ကျောက်ခဲကုန်း ၊ ရှားတော၊ ကျောက်ရဲတုန်း၊ အောက်လှိုင်း စတဲ့ကျေးရွာတွေအပါအဝင် ၁၅ ရွာက ထောင်နဲ့ချီတဲ့ဒေသခံတွေ ထွက်ပြေးနေကြရတာလို့ သူကဆိုပါတယ်။

လက်ရှိအချိန်ထိ အဆိုပါနေရပ်စွန့်ခွာထွက် ပြေးနေကြရတဲ့ ခန့်မှန်းခြေ ဒေသခံ ၅,၀၀၀ကျော်ဟာ တောတွေနဲ့ လယ်ကွင်းတွေထဲမှာ တဲထိုးပြီး ခိုလှုံနေကြရတာကြောင့် စားသောက်ရေး အခက်အခဲတွေ ဖြစ်တယ်ကြတယ်လို့ သိရပါတယ်။

စာတည်း – လင်း

မြေလတ်အသံ၊ ဇန်နဝါရီ ၁၉၊ ၂၀၂၆။

စစ်ကော်မရှင်တပ်နဲ့ ဒေသခံကာကွယ်ရေးတပ်တို့ရဲ့တိုက်ပွဲတွေကြောင့် နေရပ်စွန့်တိမ်းရှောင်နေရတဲ့ ပဲခူးတိုင်း၊ ကျောက်တံခါးနဲ့ ဖြူးမြို့နယ်က စစ်ဘေးရှောင်တွေအကူအညီလိုအပ်နေတယ်လို့ ပဲခူးတိုင်းပြည်သူ့ကာကွယ်ရေးအဖွဲ့ တိုင်းရုံးမှတာဝန်ရှိသူတဦးက ပြောပါတယ်။

ဇန်နဝါရီ ၁၀ ရက်ကစလို့ ကျောက်တံခါးနဲ့ ဖြူးမြို့နယ်အစပ်ရှိ ရွာ ၁၉ ရွာရှိ အိမ်ထောင်စာ ၈၀၁ စုမှ ဒေသခံ ၂,၀၀၀ ကျော်က နေရပ်ကတိမ်းရှောင်လာရကာ လက်ရှိမှာ စားနပ်ရိက္ခာ၊ ဆေးဝါးနဲ့ အဝတ်အထည်တွေလိုအပ်နေတယ်လို့ ဆိုပါတယ်။

“တချို့ကလေးငယ်တွေနဲ့ အဘိုး၊အဘွားတွေက ဖျားတာ၊ နှာစေး၊ ချောင်းဆိုးတာတွေ ဖြစ်နေကြတယ်။ သောက်ဆေးတွေက ရွာကနေပါတဲ့သူတွေရှိတယ်။ မပါလာကြတဲ့သူတွေရှိတယ်။ အဲ့ဒါတွေနဲ့ မျှသောက်နေကြတယ်။ စားသောက်တာကျတော့ ဆန်ရှိတဲ့သူနဲ့မရှိသူတွေ မျှစားကြတယ်။ အနီးနားက တောထဲတွေက ဟင်းတွေရှာစားကြတယ်။ အဲ့လိုလည်ပတ်နေကြတာကို တွေ့ခဲ့ရတယ်။ တာရှည်ဆိုရင်တော့ ခက်ခဲလာမယ်လေ”လို့ ပဲခူးတိုင်းပြည်သူ့ကာကွယ်ရေးအဖွဲ့ တိုင်းရုံးမှတာဝန်ရှိသူတဦးက ပြောပါတယ်။

အဆိုပါစစ်ဘေးရှောင် အိမ်ထောင်စု ၈၀၁ စုထဲက အိမ်ထောင်စု ၃၀၀ ကျော်အတွက် ပဲခူးတိုင်းပကဖ က ငွေကျပ်သိန်း ၆၀ ကို ဖြူးမြို့နယ်လူသားချင်းစာနာထောက်ထားရေးအဖွဲ့ထံတဆင့် ဇန်နဝါရီ ၁၇ ရက်မှာထောက်ပံ့ပေးခဲ့ကာ နောက်ထပ်ထောက်ပံ့မယ့်အဖွဲ့အစည်းတွေတော့ မရှိသေးဘူးလို့ သူက ဆက်ပြောပါတယ်။

အဲ့ဒီစစ်ရှောင်တွေမှာ အမျိုးသမီး ၁,၃၂၀ ဦးနဲ့ အမျိုးသား ၁,၁၇၉ ဦးရှိပြီး အမျိုးသမီးတွေအတွက် လစဥ်သုံးတွေလည်းလိုအပ်နေပြီး တိုက်ပွဲလွတ်ရာကျေးရွာတွေရှိ စာသင်ကျောင်း၊ ဘုန်းကြီးကျောင်းတွေမှာ ခိုလှုံနေကြသလို တချို့ကလည်း လယ်ကွင်းတွေထဲမှာ တဲထိုးပြီးနေကြရတယ်လို့ ဆိုပါတယ်။

ပဲခူးတိုင်း၊ ကျောက်တံခါးမြို့နယ်၊ တောကျွဲအင်းမြို့အပါအဝင် ကျောက်တံခါးနဲ့ အုတ်တွင်းမြို့နယ်မှ စစ်ကော်မရှင်စခန်း ၁၄ ခုကို ဇန်နဝါရီ ၉ ရက် ဒီမနက်အစောပိုင်းမှာ ဒေသခံကာကွယ်ရေးတပ်တွေက ဝင်ရောက်တိုက်ခိုက်ပြီး လက်နက်ခဲယမ်းတွေသိမ်းဆည်းခဲ့တယ်လို့ ပဲခူးတိုင်းစစ်ဒေသက ထုတ်ပြန်ခဲ့ပါတယ်။

ဒါ့အပြင် ဇန်နဝါရီ ၁၂ ရက်မှာလည်း ကျောက်တံခါးမြို့နယ်၊ ပဲနွယ်ကုန်းမြို့၊ ကြိမ်ခါးကုန်း ကျေးရွာကို စစ်ကြောင်းထိုးလာတဲ့ အင်အား ၁၂၀ကျော်ပါ စစ်ကော်မရှင်တပ်သားတွေကို PDFပူးပေါင်းတပ်ဖွဲ့တွေ က ကြားဖြတ် တိုက်ခိုက်ခဲ့ရာ စစ်ကြောင်းမှူး ဗိုလ်မှူး ၁ ဦးအပါအဝင် စစ်သား ၂၀ ဦးသေဆုံးပြီး သေနတ် ၁၀ လက်ကျော် သိမ်းဆည်းရရှိခဲ့တယ်လို့ သိရပါတယ်။

စာတည်း – လင်း

ညောင်ဦး၊ ဇန်နဝါရီ ၁၇၊ ၂၀၂၆။

မန္တလေးတိုင်း၊ ညောင်ဦးမြို့နယ်ထဲက နပ္ပလင်၊ လက်ဝဲနဲ့ ဇီးစမြင်ကျေးရွာတွေကို စစ်ကော်မရှင် စစ်ကြောင်းတွေက မီးရှို့ခဲ့တာကြောင့် နေအိမ် ၂၀၀ ကျော်မီးလောင်ပျက်စီးခဲ့တယ်လို့ Black Eagle PDF (Bagan) ဆီက သိရပါတယ်။

ဇန်နဝါရီ ၁၆ ရက်မနက် ၆ နာရီကျော်မှာ ညောင်ဦးဘက်ကလာတဲ့ အင်အား ၁၆၀ ပါ စစ်ကြောင်းဟာ လက်ဝဲကျေးရွာကို ဝင်ရောက်လာပြီးနောက် ကျေးရွာထဲက နေအိမ်တွေကိုမီးရှို့ခဲ့တာကြောင့် နေအိမ် ၁၂၀ ခန့် မီးလောင်ပျက်စီးခဲ့တယ်လို့ ဆိုပါတယ်။

“လက်ဝဲကို အလုံးအရင်းနဲ့ဝင်လာတယ်။ ရွာထဲကပစ္စည်းတွေကို ကားနဲ့တိုက်(သယ်)တယ်။ ရွာထဲက ကားတွေနဲ့ ကားတွေချောဆွဲ ပစ္စည်းတွေတိုက်(သယ်)ပြီး မီးရှို့တယ်။ ရွာကလူတွေက မီးငြှိမ်းဖို့ဝင်တော့လည်း အဝင်မခံဘူး။ အဲဒါပြီးတော့ သဲပြင်တောရွာဘက် တက်သွားတယ်။”လို့ Black Eagle PDF (Bagan) တာဝန်ရှိသူက ပြောပါတယ်။

လက်ဝဲရွာကို စစ်ကော်မရှင်စစ်ကြောင်းက မီးရှို့နေချိန် နောက်ထပ်အင်အား ၇၀ ခန့်ပါတဲ့ စစ်ကြောင်း ၁ ကြောင်းက မနက် ၉ နာရီလောက်မှာ နပ္ပလင်ကျေးရွာကို ဝင်ရောက်မီးထပ်မံမီးရှို့ခဲ့တာကြောင့် နေအိမ် ၇ လုံး မီးလောင်ပျက်စီးပြီး ရွာအဝင်အဝတွေမှာ မိုင်းထောင်ကာ ညောင်ဦးဘက်ကို ပြန်ဆုတ်သွားတယ်လို့ ဆိုပါတယ်။

ဒါ့အပြင် လက်ဝဲရွာကိုမီးရှို့တဲ့စစ်ကြောင်းထဲက ၂ ဖွဲ့ခွဲပြီး ၁ ဖွဲ့က သဲပြင်တောကျေးရွာမှာညအိပ်ခဲ့သလို နောက် ၁ ဖွဲ့က ကံကြီးကုန်းကျေးရွာမှာ ညအိပ်ခဲ့တယ်လို့ သိရပါတယ်။

ကံကြီးကုန်းကျေးရွာမှာ ညအိပ်ရပ်နားခဲ့တဲ့စစ်ကြောင်းက ဇန်နဝါရီ ၁၇ ရက် ဒီမနက် ၇ နာရီလောက်မှာ ဇီးစမြင်ကျေးရွာကိုဝင်ရောက်မီးရှို့ခဲ့ရာ နေအိမ် ၁၀၀ ခန့် မီးလောင်ပျက်စီးခဲ့ပါတယ်။

အလားတူ ဒီနေ့လယ် ၁ နာရီခန့်မှာလည်း ဇီးစမြင်ကျေးရွာကို မီးရှို့တဲ့စစ်ကြောင်းနဲ့သဲပြင်တောက စစ်ကြောင်းဟာ ယာတောကြီးကျေးရွာမှာ ပေါင်းပြီးတပ်စွဲကာနေထိုင်နေတယ်လို့ ဆိုပါတယ်။

စစ်ကော်မရှင်စစ်ကြောင်းဝင် မီးရှို့ခဲ့တဲ့ ကျေးရွာတွေဟာ ၁ ရွာနဲ့ ၁ ရွာ ၁ မိုင်ဝန်းကျင်၊ ၁ မိုင်ကျော်ခန့်သာ ဝေးတဲ့ရွာတွေဖြစ်တယ်လို့ သိရပါတယ်။

စစ်ကြောင်းဝင်မီးရှို့နေလို့ ဇီးစမြင်၊ ယာကြီးတော၊ လက်ဝဲ၊ နပ္ပလင်၊ မကျည်းတန်း၊ အနောက်အုံ၊ သဲပြင်တော၊ ပွဲတိုင်း၊ သချင်းကန်၊ ကံကြီးကုန်းကျေးရွာတွေက လူဦးရေ ၅,၀၀၀ ဝန်းကျင် ထွက်ပြေးတိမ်းရှောင်နေကြရပါတယ်။

ပြီးခဲ့တဲ့ဇန်နဝါရီ ၄ ရက်ကနေ ၆ ရက်အတွင်း စစ်ကော်မရှင်စစ်ကြောင်းဟာ ဇီးစမြင်၊ မီးလောင်ဖျား၊ စကားကျေးရွာတွေက နေအိမ် ၇၀ ကျော်ကို မီးရှို့ဖျက်ဆီးခဲ့သေးတယ်လို့ သိရပါတယ်။

စာတည်း – လင်း

ဝက်လက်၊ ဇန်နဝါရီ ၁၇၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ညောင်ကန်ကျေးရွာက စစ်ရှောင်တွေနေထိုင်တဲ့ စာသင်ကျောင်းကို စစ်ကော်မရှင်တပ်က လေကြောင်းကနေဗုံးကြဲခဲ့တာကြောင့် ၁ ဦးသေဆုံးပြီး ၄ ဦးဒဏ်ရာရတယ်လို့ ဝက်လက်မြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဇန်နဝါရီ ၁၆ ရက်မနက် ၁၁ နာရီမှာ တံတားဦးကနေတက်လာတဲ့ ဂျက်ဖိုက်တာ ၁ စီးက စစ်ဘေးရှောင်တွေနေထိုင်တဲ့နေရာကို ပေါင် ၂၀၀ ဗုံး ၄ လုံးနဲ့ကြဲပြီး ပွိုင့်ဖိုက်နဲ့လည်း ပစ်ခတ်သွားတာလို့ ဆိုပါတယ်။

“စစ်ဘေးရှောင်တွေနေတဲ့ စာသင်ကျောင်းနဲ့ စာသင်ကျောင်းအနောက်ဘက်က ၁ အိမ်ကျော်ကို ပစ်သွားတာ။ စာသင်ကျောင်းပေါ်ကို ကျတယ်။ အိမ်ပေါ်ကိုလည်း ကျတယ်။ မီးလောင်တာတွေ ရှိတယ်။”လို့ ဝက်လက်မြို့နယ်ပြည်သူ့ကာကွယ်ရေးအဖွဲ့ ပြန်ကြားရေးတာဝန်ခံက ပြောပါတယ်။

ဗုံးကြဲပစ်ခတ်ခံရလို့ အသက် ၄၀ ကျော်အရွယ်အမျိုးသမီး ၁ ဦးနေရာတင်သေဆုံး၊ ၄ ဦးထိခိုက်ကာ အချက်အလက်တွေကိုတော့ စာရင်းကောက်ယူနေဆဲဖြစ်ပြီး စာသင်ကျောင်းဆောင် ၂ ဆောင်၊ နေအိမ် ၁ လုံးလည်း မီးလောင်ပျက်စီးခဲ့တယ်လို့ သိရပါတယ်။

ဘုန်းကြီးကျောင်းမှာနေထိုင်နေကြတဲ့ စစ်ဘေးရှောင်တွေဟာ စဉ့်ကူး၊ မတ္တရာနယ်ဘက်က လာရောက်နေထိုင်နေကြတာ ၃ လခန့်ရှိပြီး စုစုပေါင်းဦးရေ ၂၀၀ ဝန်းကျင်ရှိကာ ဗုံးကြဲခံရပြီးနောက် ပြောင်းရွှေ့နေထိုင်နေကြရတယ်လို့ ဆိုပါတယ်။

ဇန်နဝါရီ ၁၅ ရက်ကလည်း ဝက်လက်မြို့နယ်၊ ရေလည်မှော်ကျေးရွာကို စစ်ကော်မရှင်အဖွဲ့တွေ ပစ်ခတ်တဲ့ လက်နက်ကြီးကျရောက်ပေါက်ကွဲလို့ အမျိုးသမီး ၂ ဦးနဲ့အမျိုးသား ၁ ဦးတို့သေဆုံးခဲ့ပါသေးတယ်။

စာတည်း – လင်း

မြေလတ်အသံ၊ ဇန်နဝါရီ ၈၊၂၀၂၆။

စစ်ကိုင်းနဲ့မကွေးတိုင်းက မြို့နယ် ၃ ခုမှာ လေယာဥ်နဲ့ဗုံးကြဲတိုက်ခိုက်ခံရလို့ စစ်ဘေးရှောင်ဒေသခံ ၅ ဦး သေဆုံးခဲ့တယ်လို့ ဒေသခံတွေထံက သိရပါတယ်။

ဇန်နဝါရီ ၇ ရက် ယမန်နေ့ နေ့လယ် ၂ နာရီကျော်မှာ ရွှေဘိုမြို့နယ်အနောက်ခြမ်း ရွာဆိုးရွာနဲ့ မြို့လှရွာအကြားရှိ စစ်ဘေးရှောင်တွေနေထိုင်ရာ တဲဆောင်တွေကို တိုက်ခိုက်ရေးလေယာဥ် ၂ စီးနဲ့ ဗုံးကြဲတိုက်ခိုက်ခဲ့တာပါ။

“ဗုံးကြဲတာက စစ်ရှောင်တွေရဲ့တဲတိုက်တွေကို တည့်တည့်ကျတာပါ။ သေဆုံးသူက ၄ ယောက်လို့ အတည်ပြုပါတယ်။ ဖိုက်တာနဲ့ ၂ကြိမ်တောင် ကြဲသွားတာ။ ဘာတိုက်ပွဲမှကို မရှိတာဗျ။ တဲက အလုံး ၁၀ လောက် မီးလောင်ကျွမ်းသွားတယ်”လို့ ရွှေဘိုဒေသခံအမျိုးသားတဦးက မြေလတ်အသံကို ပြောပါတယ်။

ဗုံးကြဲခံရမှုကြောင့် စစ်ရှောင်တဲတိုက်တွေမှာနေထိုင်နေတဲ့ စဉ့်ကူးနဲ့သပိတ်ကျင်းမြို့နယ်တွေကနေ စစ်ရှောင်လာရောက်သူ အသက် ၃၀ ဝန်းကျင် အမျိုးသမီး၂ ဦးနဲ့ အသက် ၄၀ ကျော် အမျိုးသား ၂ ဦး သေဆုံးခဲ့တယ်လို့ သိရပါတယ်။

အလားတူ မကွေးတိုင်း၊ မြိုင်မြို့နယ်၊ ကြက်မောက်ကျေးရွာတွေကို စစ်ကော်မရှင်တပ်က လေ​ယာဥ်တွေနဲ့ ဗုံးကြဲတိုက်ခိုက်ခဲ့လို့ အသက်မပြည်သေးတဲ့ အမျိုးသမီး ၁ဦးသေဆုံးပြီး ၆ ဦးဒဏ်ရာရရှိခဲ့တယ်လို့ သိရပါတယ်။

ဇန်နဝါရီ ၆ ရက် ည ၉ နာရီကျော်မှာ ကြက်မောက်ကျေးရွာကို တိုက်လေယာဥ်နဲ့ ဗုံး ၁ လုံးကြဲချခဲ့တာဖြစ်ပြီး ကျေးရွာတွင်း နေအိမ်တွေပေါ်ကျရောက်ပေါက်ကွဲကာ အသက် ၁၆ နှစ်အရွယ် မိန်းကလေး ၁ ဦးသေဆုံးခဲ့တာလို့ မြိုင်ဒေသခံတဦးက ပြောပါတယ်။

အလားတူ ဇန်နဝါရီ ၇ ရက်ညနေ ၆ နာရီကျော်မှာ ဂန့်ဂေါမြို့နယ်၊ မြင်းဇာကျေးရွာဘုန်းကြီးကျောင်းကို တိုက်ခိုက်ရေးလေယာဥ်နဲ့ ဗုံး၂ လုံးကြဲချခဲ့လို့ သံဃာ ၂ ပါး ဒဏ်ရာရရှိခဲ့တယ်လို့ ဂန့်ဂေါဒေသခံတဦးထံက သိရပါတယ်။

“(မြင်းဇာရွာ) ဗုံးကြဲတာက ရွာထဲတော့ အခုက ပထမဦးဆုံးအကြိမ်ပါ။ ရွာနားတွေတော့ အရင်နှစ်တွေက ၁ ကြိမ် ရှိခဲ့ဖူးပါတယ်။ တော်လှန်ရေးအင်အားစုတွေ ခိုလှုံနိုင်တယ်လို့ ယူဆပုံရတယ်။ တကယ်က အဲ့ရွာမှာ မနေဘူး။ မရှိဘူး။ ဒဏ်ရာရတဲ့ ဘုန်းကြီး ၁ ပါးနဲ့ ကိုရင် ၁ ပါးတော့ မစိုးရိမ်ရ” လို့ ဂန့်ဂေါဒေသခံအမျိုး သားတဦးက ပြောပါတယ်။

ဗုံးကြဲတိုက်ခိုက်မှုအတွင်း ဘုန်းကြီးကျောင်းဝန်းအတွင်းရှိ ကျောင်းဆောင်တချို့၊ မီးစက်ရုံ၊ ရေအိုးစင်တို့ မီးလောင်ပျက်စီးခဲ့တယ်လို့ သိရပါတယ်။