စစ်ကော်မရှင်

မိုးကုတ်၊ ဒီဇင်ဘာ ၁၊ ၂၀၂၅။

စစ်‌‌ကော်မရှင်တပ်တွေပြန်လည်တောင်းယူခဲ့တဲ့ မန္တလေးတိုင်း၊ မိုးကုတ်နဲ့ ရှမ်းပြည်နယ်မြောက်ပိုင်း၊ မိုးမိတ်မြို့အနီးမှာ နိုဝင်ဘာ ၃၀ ရက်မနေ့ညပိုင်းက စစ်ကော်ရှင်တပ်နဲ့ တော်လှန်ရေးတပ်တွေတိုက်ပွဲဖြစ်ပြီးနောက် စစ်ကော်မရှင်ဘက်ကအင်အားထပ်တိုးနေတယ်လို့ ဒေသခံစစ်ရေးသတင်းအရင်းမြစ်တွေဆီက သိရပါတယ်။

နိုဝင်ဘာ ၃၀ ရက် မနေ့က ညနေ ၅ နာရီခွဲမှာ မိုးကုတ်မြို့အပြင်ထွက်လာတဲ့ စစ်ကော်မရှင်တပ်နဲ့ တော်လှန်ရေးတပ်တွေတိုက်ပွဲဖြစ်ခဲ့ကာ မိုးမိတ်မြို့မှာလည်း ည ၈ နာရီခန့်မှာ တိုက်ပွဲဖြစ်ခဲ့တယ်လို့ စစ်ရေးသတင်းအရင်းမြစ်တဦးက ပြောပါတယ်။

“နာရီဝက်ကြာ ထိတွေ့ တိုက်ပွဲငယ် ဖြစ်ပွားတယ်။ အဲ့ဒီနောက်တော့ စစ်တပ်ဘက်က ပြန်ဆုတ်သွားတယ်ပေါ့နော်။ ထိခိုက်သေဆူံးနဲ့ ပတ်သက်ပြီးတော့ သိမထားရသေးပါဘူး။ မိုးကုတ်မှာဆိုရင်လည်း ထိတွေ့ဖြစ်ခဲ့တဲ့နယ်မြေမှာ စစ်တပ်အင်အားတွေထပ်တိုးထားသလို မိုးမိတ်မှာဆိုရင်လည်း စစ်အင်အားတွေ တိုးချဲ့ပြင်ဆင်နေတာတွေ တွေ့ရပါတယ်”လို့ သူကပြောပါတယ်။

တိုက်ပွဲဖြစ်တဲ့နေရာ အသေးစိတ်ကို လုံခြုံရေးအရထုတ်ဖော်မပြောပေမယ့် စစ်ကော်မရှင် ဘက်ကတော့ မိုးကုတ်နဲ့ မိုးမိတ်မြို့အပြင်ဘက်က ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌တောင်ကုန်းတချို့ကို နယ်မြေချဲ့လာတဲ့အတွက် တိုက်ပွဲဖြစ်ပွားခဲ့တာလို့ ဆိုပါတယ်။

ဒီဇင်ဘာ ၁ ရက်ဒီနေ့မှာတော့ ထပ်မံတိုက်ပွဲဖြစ်တာမရှိသေးဘဲ စစ်ကော်မရှင်ဘက်က မိုးမိတ်မြို့ကို အင်အားတိုးတာနဲ့ ထိတွေ့တိုက်ပွဲဖြစ်ခဲ့တဲ့ နေရာတချို့ကို အင်အားဖြန့်ထားတယ်လို့ ဆိုပါတယ်။

၁၀၂၇ စစ်ဆင်ရေးမှာ မိုးကုတ်နဲ့မိုးမိတ်မြို့ကို TNLAနဲ့ PDF ပူးပေါင်းတပ်တွေကသိမ်းယူခဲ့ပြီးနောက် အောက်တိုဘာ ၂၇ နဲ့ ၂၈ ရက်မှာ စစ်ကော်မရှင်နဲ့ TNLA တပ်ဖွဲ့တို့ တရုတ်ရဲ့ကြားဝင် စေ့စပ်မှုအပြီး TNLA တပ်ဖွဲ့က စစ်ကော်မရှင်ဆီ လွှဲပြောင်းဖို့ သဘောတူခဲ့တာပါ။

အဲ့ဒီနောက် နိုဝင်ဘာ ၂၉ ရက် ညပိုင်းကစလို့ စစ်ကော်မရှင်တပ်က အင်အားအလုံးအရင်းနဲ့ မိုးကုတ်နဲ့ မိုးမိတ်မြို့တွေထဲကို ပြန်ဝင်လာတာလို့ သိရပါတယ်။

မိုးကုတ်ဟာ ပတ္တမြားအများဆုံးထွက်ရာမြို့ဖြစ်ပြီး မိုးမိတ်ကတော့ စိန်ထွက်ရာ မြို့အဖြစ် ထင်ရှားပါတယ်။

သတင်း – မြတ်

ရေစကြို၊ နိုဝင်ဘာ ၈၊ ၂၀၂၅။

မကွေးတိုင်း၊ ရေစကြိုမြို့အထွက် ပေကုန်းရွာအနီးမှာ စစ်ကော်မရှင်တပ်ဖွဲ့ဝင်တွေ မိုင်းဆွဲတိုက်ခိုက်ခံရပြီးနောက်မှာ ပေကုန်းရွာကနေအိမ်တွေကို မီးရှို့ဖျက်ဆီးခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

နိုဝင်ဘာ ၇ ရက်နေ့လယ် ၂ နာရီဝန်းကျင်မှာ ခလရ ၂၅၇၊ ၂၅၆၊ ၂၅၇ တပ်ရင်းတွေက ပူးပေါင်းအင်အား ၅၀ ဝန်းကျင်ပါတဲ့စစ်ကြောင်းဟာ ပေကုန်းရွာအနီး လမ်းကင်းယူနေချိန်မှာ ဒေသကာကွယ်ရေးတပ်တွေကတိုက်ခိုက်ခဲ့တာလို့ ဆိုပါတယ်။

“မိုင်းကွင်းပေါ်မှာ သူတို့ ၁၀ ဦးလောက်ရှိနေတဲ့အချိန် ကျနော်တို့က မိုင်းဆွဲလိုက်တာ၊ မိုင်း ၃ လုံးဆွဲလိုက်တာ၊ ၂ ပွင့်ဗိုလ် ၁ ကောင်နဲ့ တပ်သား ၂ ဦးသေသွားတယ်၊” လို့ ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ခေါင်းဆောင်ဝေကြီးက ပြောပါတယ်။

ထိခိုက်သေဆုံးတဲ့တပ်သားတွေကိုကားနဲ့ပြန်ခေါ်သွားပြီး နိုဝင်ဘာ ၈ ရက်ဒီမနက်ပိုင်းမှာ နာရေးလုပ်တယ်လို့သိရကြောင်း ရေစကြိုပကဖခေါင်းဆောင်ဝေကြီးက ပြောပါတယ်။

မိုင်းဆွဲခံရပြီးနောက် စစ်ကော်မရှင်တပ်တွေဘက်က ပြန်လည်ပစ်ခတ်လို့ ဒေသခံပြည်သူ ၂ ဦးထိခိုက်ဒဏ်ရာရခဲ့ကာ ပေကုန်းရွာက နေအိမ် ၃ လုံးကိုလည်း မီးရှို့သွားတယ်လို့ ဆိုပါတယ်။

“ဒီကနေ့အခြေအနေကတော့ အေးဆေးပါ။ ဖြစ်တဲ့နေ့ကတော့ လက်နက်ကြီး၊ လက်နက်ငယ်တွေနဲ့တောက်လျှောက်ပစ်တာ၊ ပြည်သူ ၂ ဦးဒဏ်ရာရတယ်။ တဲ ၃ လုံးလည်းမီးရှို့သွားတယ်။ မီးရှို့ခံရတာက ပေကုန်းကျေးရွာက တဲ ၃ လုံးပါ။ အဲ့ဒီရွာက တိမ်းရှောင်ရတာမျိုးတော့ မရှိဘူး။” လို့ သူကဆက်ပြောပါတယ်။

ပြီးခဲ့တဲ့ ဇူလိုင် ၇ ရက်ကလည်း ရေစကြိုမြို့ ငြိမ်းဇာနည်စစ်မှုထမ်း‌ဟောင်းရုံးကနေ ခဲယမ်းတွေတင်ဆောင်လာတဲ့ ကား ၁၀ စီးကို ရေစကြိုမြို့နယ် ပကဖက တိုက်ခိုက်ခဲ့ပါသေးတယ်။

စာတည်း – လင်း

ဝက်လက်၊ နိုဝင်ဘာ ၅၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်ထဲက ကျေးရွာတွေကို စစ်ကော်မရှင်အင်အား ၃၀၀ ခန့်နဲ့ စစ်ကြောင်းထိုးနေတာကြောင့် ပြည်သူ ၆,၀၀၀ ကျော်ထွက်ပြေးနေရတယ်လို့ ဝက်လက်မြို့နယ် ပြည်သူ့ကာကွယ်ရေးအဖွဲ့ရဲ့ ပြန်ကြားရေးတာဝန်ရှိသူက သိရပါတယ်။

နိုဝင်ဘာ ၅ ရက်ဒီမနက် ၇ နာရီကျော်လောက်ကစပြီး ရွာသာကြီးရွာမှ အင်အား ၈၀ ပါစစ်ကြောင်းက တံတားဦးကျေးရွာဘက်၊ ရွှေဘိုမြို့နယ်၊ ဘုန်းဘွဲ့ရွာဘက်ကထွက်လာတဲ့ အင်အား ၁၅၀ ခန့်ပါ စစ်ကြောင်းနဲ့ လှတောရွာဘက်က ထွက်လာတဲ့ အင်အား ၅၀ ခန့်ပါစစ်ကြောင်းက စိုင်းနိုင်ကြီး၊ စိုင်းနိုင်လေးကျေးရွာတွေဘက်ကိုစစ်ကြောင်းထိုးလာနေတာလို့ ဆိုပါတယ်။

“စစ်ကြောင်းထိုးနေတယ်။ ပစ်တာတွေတော့ရှိတယ်။ ရွာတွေထဲကို ပစ်ခတ်ဝင်တာ။ စစ်ကြောင်းက ၃ ကြောင်း။ ပြည်သူတွေကတော့ ထွက်ပြေးနေရတာလည်းများတယ်။ ပြေးရတဲ့ရွာတွေက ရွာကြီးတွေချည်းဘဲ”လို့ ဝက်လက်မြို့နယ်ပကဖ သတင်းနဲ့ပြန်ကြားရေးတာဝန်ရှိသူကပြောပါတယ်။

စစ်ကော်မရှင်စစ်ကြောင်းဝင်လာချိန် အချိန်မီထွက်ပြေးနိုင်တာတွေကြောင့် လက်ရှိအချိန်ထိ ဒေသခံ ဖမ်းဆီးပစ်ခတ်ခံရတာမျိုးမရှိဘူးလို့ ဆိုပါတယ်။

ဒီညနေ ၃ နာရီခန့်မှာ ရွာသာကြီးဘက်ကထွက်လာတဲ့ စစ်ကြောင်းက တမာကုန်းကျေးရွာ စာသင်ကျောင်းမှာရောက်နေပြီး ကျန်စစ်ကြောင်းနှစ်ကြောင်းက စိုင်နိုင်လေး၊ စိုင်နိုင်ကြီးရွာတဝိုက်မှာ ရှိနေတယ်လို့ သိရပါတယ်။

စစ်ကြောင်းဝင်လာလို့ အိမ်ခြေ ၂၀၀ ကနေ ၇၀၀ ကြားရှိတဲ့ စိုင်နိုင်ကြီး၊ စိုင်နိုင်လေး၊ တံတားဦး၊ သမကုန်း၊ တမာကုန်း၊ ရွာတော်ကုန်း၊ အုတ်နဲဘုတ်၊ ဆင်တဝဲအပါအဝင် ကျေးရွာ ၈ လောက်က ဒေသခံ ၆,၀၀၀ ကျော်ခန့်ထွက်ပြေးနေရပါတယ်။

စစ်ကြောင်းဝင်လာချိန် စိုင်နိုင်ကြီးနဲ့ဘုန်းဘွဲ့ကျေးရွာအကြားမှာ စစ်ကော်မရှင်စစ်ကြောင်းကို ဒေသကာကွယ်ရေးတပ်ဖွဲ့တွေဘက်က မိုင်းဆွဲတိုက်ခိုက်ခဲ့ပြီး ထိခိုက်သေဆုံးမှု အခြေအနေကိုတော့ မသိရသေးဘူးလို့ ဆိုပါတယ်။

နိူဝင်ဘာ ၂ ရက်ကလည်း ဝက်လက်မြို့နယ်၊ ရွာသာကြီးကျေးရွာကလာတဲ့ စစ်ကော်မရှင် စစ်ကြောင်းက မောက္ကဒီးကျေးရွာက ပြည်သူ ၄၀ ကျော်ကိုဖမ်းသွားပြီး နိုဝင်ဘာ ၅ ရက် ဒီနေ့အထိပြန်မလွတ်လာသေးဘူးလို့ သိရပါတယ်။

စာတည်း – လင်း