စစ်ကောင်စီတပ်

စစ်ကိုင်း၊ မေ ၂၉၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ဝမ်ပေါင်ကြေးနီကုမ္ပဏီ လုံခြုံရေးယူဖို့လာတဲ့ စစ်ကောင်စီတပ်စစ်ကြောင်းက ဒေသခံနေအိမ် ၁၀၀ လုံးခန့်ကို မွှေနှောက်ပစ္စည်းတွေယူသွားတယ်လို့ သိရပါတယ်။

မုံရွာ(နမခ)က ရောက်ရှိလာတဲ့ အင်အား ၁၀၀ ခန့်ပါစစ်ကြောင်းဟာ မေလ ၂၈ ရက် မနက်ပိုင်းကစတင်ပြီး ကံကုန်း၊ ဂုဏ်တော၊ ဒုန်းတောကျေးရွာတွေက နေအိမ်တွေကိုဝင်ရောက်မွှေနှောက်ပြီး ပြည်သူပိုင်ပစ္စည်းတွေ ယူဆောင်နေတာလို့ ဒေသခံတဦးက မြေလတ်အသံကို ပြောပါတယ်။

” ဒီတခေါက်လာတဲ့ စစ်ကြောင်းက တရုတ်တွေပြန်အထွက်ကို လာစောင့်ပေးတာလို့တော့သိရတယ်။ ၂၇ ရက်နေ့ညပိုင်းမှာ ဒုန်းတောဘက်ကို စဝင်လာတော့ ဒေသခံတွေကပြေးကြတယ်။ သူတို့ (စစ်ကြောင်း)က ဒုန်းတောဘုန်းကြီးကျောင်းမှာ တပ်စွဲပြီး ရွာ ၃ ရွာက အိမ်တွေကို မွှေတော့တာ” လို့ ပြောပါတယ်။

စစ်ကောင်စီတပ်၊ ရဲတပ်ဖွဲ့တွေပါဝင်တဲ့ စစ်ကြောင်းဟာ ကျေးရွာနေအိမ်တွေက ဆိုင်ကယ် ၇ စီး၊ ဆန်အိတ် ၊ ဆီ၊ ပန်ကာ၊ ရေခဲသေတ္တာနဲ့ အိမ်အသုံးအဆောင်ပစ္စည်းတွေကိုပါသယ်ယူပြီး စစ်ကြောင်းတပ်စွဲထားတဲ့ ဘုန်းကြီးကျောင်းမှာစုပုံကာ ပြန်သယ်ဖို့လုပ်ဆောင်နေကြတယ်လို့ ဆိုပါတယ်။

“စကစစစ်ကြောင်းက ဝမ်ပေါင်အတွက်မကြာခဏလာတယ်။ လာတိုင်းရွာတွေကို မွှေတယ်၊ ပစ္စည်းတွေ စိတ်ကြိုက်ယူတယ်။ ဒေသခံတွေကပြေးလိုက် ပြန်လာလိုက်ဖြစ်နေတယ်။ ခုအခေါက်က တော်တော်များတယ်သယ်ကြတာ။ ခုလိုလုပ်ရပ်ကို ဝမ်ပေါင်က တားပေးမလား၊ မတားပေးနိုင်ရင် ဝမ်ပေါင်ကို စစ်ရေးပစ်မှတ်အနေနဲ့ တိုက်ခိုက်သွားမယ်”လို့ Salingyi Border Task Force တာဝန်ရှိသူကပြောပါတယ်။

အဲ့ဒီ စစ်ကြောင်းဟာ မေလ ၂၉ ရက်နေ့ ဒီကနေ့ မနက်ပိုင်းထိ ဒုန်းတောဘုန်းကြီးကျောင်းကနေ ပြန်မထွက်သေးဘဲ ဒေသခံနေအိမ်တွေက ယူဆောင်ထားတဲ့ပစ္စည်းတွေကို စစ်သုံးကားတွေနဲ့ နမခဘက်ကို သယ်နေကြတယ်လို့ ဆိုပါတယ်။

နမခကနေ ဝမ်ပေါင်ကုမ္မဏီ ကြေးနီသယ်ကားလမ်းကြောင်းလုံခြုံရေးအတွက် တလကို ၁ ကြိမ်ကနေ ၃ ကြိမ်အထိလွှတ်လေ့ရှိပြီး လုံခြုံရေးလာရောက်တဲ့ စစ်ကြောင်းတွေဝင်ရောက်လာတိုင်း ပြည်သူပိုင်ပစ္စည်းတွေကိုဖျက်ဆီး၊ ခိုးယူတာတွေလုပ်ဆောင်တာကြောင့် အုံတုံပင်၊ ကျေးစာကျ ၊ဘိန်းနွယ်ချောင် ၊ ဂုဏ်တော၊ ဒုန်းတော၊ ကံကုန်းကျေးရွာတွေက ဒေသခံ ၇၀၀၀ လောက်ဟာ အမြဲတမ်းလိုလိုထွက် ပြေးနေကြရတယ်လို့ ဒေသခံတွေကပြောပါတယ်။

ဧပြီလ ၂၉ ရက်နေ့မနက်ပိုင်းကလည်း ကြေးနီသယ်ကားလမ်းကြောင်းလုံခြုံရေး စစ်ကောင်စီစစ်ကြောင်းက ဒုန်းတောနဲ့ ဂုဏ်တောကျေးရွာက ကွမ်းခြံတဲ၊ နေအိမ် ၁ လုံးနဲ့ ရေစက် ၂ လုံးကို မီးရှို့ခဲ့ပြီး နေ အိမ် ၁၀ လုံးကို ဝင်မွှေကာ ပစ္စည်းတွေယူဆောင်သွားသေးတယ်လို့ သိရပါတယ်။

စာတည်း – ရင်ငြိမ်း

စစ်ကိုင်း၊ မေ ၂၈၊ ၂၀၂၃။

စစ်ကိုင်းတိုင်း၊ မုံရွာခရိုင်၊ ချောင်းဦးမြို့နယ်၊ ငါးယှန်ကျေးရွာက လူနေအိမ်တွေကို စစ်ကောင်စီတပ်သားတွေက မေလ ၂၇ ရက် မနက် ၁၁ နာရီကျော်မှာ မီးရှို့ပြီး ရွာခံ ၆၀ ကျော်ကိုလည်း ဖမ်းဆီးသွားခဲ့တယ်လို့ သိရပါတယ်။

စစ်ကား ၂ စီးနဲ့အင်အား ၁၀၀ ကျော်ပါ စစ်ကောင်စီတပ်သားတွေဟာ ကျေးရွာအတွင်းဝင်ရောက်လာပြီး နေအိမ် ၂ လုံးကိုမီးရှို့ကာ အသက် ၃၀ နဲ့ ၄၀ အကြားရှိ ရွာခံအမျိုးသား၊အမျိုးသမီး ၆၀ ကျော်ကို ချောင်းဦးမြို့ရဲစခန်းကို ဖမ်းခေါ်သွားတာဖြစ်တယ်လို့ ချောင်းဦး PDF ရဲဘော်တဦးက မြေလတ်အသံကို ပြောပါတယ်။

“ငါးယှန်ရွာမှာ တောင်ကုန်းဆိုတဲ့အပိုင်းရှိတယ်။ အဲဒီအပိုင်းက အိမ်ကိုမီးရှို့တာ။ပြီးတော့ တွေ့တဲ့လူတွေကိုဖမ်းတာ။ အသက်ကြီးပိုင်းတွေကိုတော့ ချန်ထားခဲ့တယ်။ အဖမ်းခံရသူတွေက ၆၀ ကျော်တော့ နာမည်တွေမသိရသေးဘူးဗျ။ အခုအချိန်ထိ ပြန်မလွတ်လာကြသေးဘူး” လို့ ပြောပါတယ်။

လက်ရှိမှာ ငါးယှန်ရွာအတွင်း စစ်ကောင်စီတပ်ဖွဲ့ဝင်တချို့ တပ်စွဲနေထိုင်နေပြီး အဲ့ဒီစစ်ကောင်စီတပ်ဖွဲ့ဟာ မုံရွာ-ချောင်းဦးလမ်းပိုင်းမှာ ယမန်နေ့ နေ့လယ်ပိုင်းက မိုင်းရှင်းလင်းရေးလုပ်နေချိန် ဒေသကာကွယ်ရေးတပ်ဖွဲ့တွေဘက်က မိုင်းခွဲတိုက်ခိုက်ခဲ့လို့ အရာရှိ ၁ ဦး အပါအဝင် ၅ ဦးဒဏ်ရာရရှိခဲ့တယ်လို့ ဆိုပါတယ်။

မေလ ၁၁ ရက်ကလည်း စစ်ကောင်စီတပ်သားတွေက ချောင်းဦး-မုံရွာကားလမ်းမဘေးမှာတည်ရှိတဲ့ အိမ်ခြေ ၁၀၀၀ ခန့်ရှိ ငါးယှန်ရွာကို ပစ်ခတ်ဝင်ရောက်ပြီး မီးရှို့ခဲ့တာကြောင့် လူနေအိမ် ၂၀၀ ကျော် မီးလောင်ပျက်စီးခဲ့သလို အမျိုးသားတဦးလည်း လက်နက်ကြီးစထိမှန် သေဆုံးခဲ့တယ်လို့ သိရပါတယ်။

စာတည်း – ရင်ငြိမ်း

စစ်ကိုင်း၊ မေ ၂၅၊ ၂၀၂၃။

စစ်ကိုင်းတိုင်း၊ ချောင်းဦးမြို့နယ်၊ အမြင့်မြို့ဟောင်းရဲစခန်းမှာတပ်စွဲထားတဲ့ စစ်ကောင်စီတပ်ဖွဲ့တွေဟာ လမ်းသွားလမ်းလာ ဆိုင်ကယ်၊ကားတွေကိုဖမ်းဆီးပြီး ငွေကြေးအဆမတန်တောင်းခံနေတယ်လို့ ဒေသခံတွေဆီက သိရပါတယ်။

အမြင့်မြို့ဟောင်းရဲစခန်းမှာ တနှစ်ကျော်ကြာတပ်စွဲထားတဲ့ အင်အား ၅၀ ခန့်ရှိစစ်ကောင်စီတပ်ဟာ ပြီးခဲ့တဲ့ဧပြီလကစတင်ကာ အမြင့်မြို့ဟောင်းလမ်းပေါ်က ကား၊ဆိုင်ကယ်တွေကိုဖမ်းဆီးပြီး ယာဉ်ပေါ်ပါ ငွေကြေးတွေကိုယူဆောင်သလို ကားနဲ့ဆိုင်ကယ်တွေကိုလည်း ငွေကြေးအဆမတန်တောင်းပြီး ပြန်ရွေးခိုင်းတယ်လို့ မုံရွာအမြင့်လမ်းသတင်းမှန်ပြန်ကြားရေးတာဝန်ခံတဦးက ပြောပါတယ်။

“အမြင့်မြို့ဟောင်းလမ်းပိုင်းကနေ ဖြတ်သန်းသွားလာနေတဲ့ ပြည်သူတွေဆီက ဆိုင်ကယ်တွေဖမ်းဆီးပြီး တစီးကို ၃ သိန်းနဲ့ ပြန်ရွေးခိုင်းတယ်။ ကားတွေဆို ကားပေါ်ပါတဲ့ပိုက်ဆံအကုန်ယူတယ်။ ဆိုင်ကယ်တွေဖမ်းပြီးရင် တရက်ထဲအပြီးရွေးခိုင်းတယ်။ သူတို့တောင်းတဲ့ငွေပမာဏ မပေးနိုင်ရင် တော်တော်တောင်းပန်ပြီးမှ တဝက်ကြေးပေးရတယ်” လို့ ပြောပါတယ်။

အဲ့ဒီစစ်ကောင်စီတပ်တွေဟာ တပ်စွဲထားတဲ့ ၁ နှစ်ကျော်ကာလအတွင်း ရဲစခန်းအပြင်ဘက်ကို သွားရောက်လစာမထုတ်ရဲတဲ့အတွက် အခုလိုဖမ်းဆီးပြီး ငွေကြေးအမြောက်အမြား တောင်းယူနေတာလို့ ပြောဆိုပေမယ့် သီးခြားတော့အတည်မပြုနိုင်ပါဘူး။

အမြင့်မြို့ထဲက ရွှေကြိုးရစ်ဘုရားနဲ့ ညိုမိတို့ရွာစာကြည့်တိုက်အနီး ပြည်သူတွေအလုပ်သွား၊ ပြန်ချိန်တွေမှာ စစ်ကောင်စီတပ်က ဖမ်းဆီးမှုတွေကိုအဓိကထားလုပ်ဆောင်နေလို့ အခြေခံလုပ်သားပြည်သူတွေ အခက်အခဲကြုံတွေ့နေရတယ်လို့ ဆိုပါတယ်။

မုံရွာ-အမြင့်-ချောင်းဦးလမ်းပိုင်းဟာ စစ်ကောင်စီတပ်နဲ့ လက်အောက်ခံရဲတွေ မကြာခဏ ပစ်ခတ်တိုက်ခိုက်ခံနေရတဲ့နေရာတွေဖြစ်လို့ ယခင်က အခုလိုဖမ်းဆီးငွေတောင်းတာတွေမရှိပေမယ့် ပြီးခဲ့တဲ့ ဧပြီလကစလို့ လုပ်ဆောင်လာတာလို့ ဒေသခံတွေကပြောပါတယ်။

စာတည်း − ရင်ငြိမ်း

စစ်ကိုင်း၊ မေ ၁၉၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ မြေနဲကျေးရွာရှိ စွမ်းရည်ထက်ဆီဆိုင်မှာတပ်စွဲထားတဲ့ စစ်ကောင်စီတပ်က တိုက်ပွဲဖြစ်ပွားတာမရှိဘဲ လက်နက်ကြီးတွေနဲ့ပစ်ခတ်ခဲ့လို့ ဘာသာရေးအဆောက်အဦးတွေ ထိမှန်ပျက်စီးခဲ့တယ်လို့ သိရပါတယ်။

တပ်စွဲထားတဲ့ဆီဆိုင်ကနေ မုံရွာတောင်နယ်ကျေးရွာဘက်ကို မေလ ၁၇ ရက် ည ၈ နာရီဝန်းကျင်မှာ ၆၀ မမ ဗုံးသီးတွေနဲ့ ပစ်ခတ်ခဲ့တာကြောင့် အဲ့ဒီရွာဘုန်းကြီးကျောင်းမှာရှိတဲ့ ကျောင်းဆောင်နဲ့ ဘုရားစေတီတချို့ထိမှန် ပျက်စီးသွားတာလို့ မုံရွာဒေသခံတဦးက ပြောပါတယ်။

“သူတို့(စကစ)နေရာနဲ့ မုံရွာတောင်နယ်ရွာက ၁ မိုင်ကျော်လောက်ပဲရှိတယ်။ အရင်ကလည်း အခုလို လက်နက်ကြီးတွေနဲ့ရမ်းသမ်းပစ်တယ် ထိခိုက်တာတွေတော့မရှိခဲ့ဘူး။ ဒီတခါမှ ၂ လုံးပစ်တာ ဘုန်းကြီး ကျောင်းကိုထိသွားတယ်။ လူတော့မထိဘူး။ သူတို့က စိတ်မကြည်ရင်မကြည်သလိုပစ်တာ” လို့ မြေလတ်အသံကို ပြောပါတယ်။

စစ်ကောင်စီတပ်စွဲထားတဲ့ စွမ်းရည်ထက်ဆီဆိုင်နဲ့အနီးတဝိုက်က ကျေးရွာဒေသခံတွေဟာ ထွက်ပြေးတိမ်းရှောင်ရတာမျိုးမရှိသေးပေမဲ့လည်း လက်နက်ကြီးတွေနဲ့ပစ်ခတ်မှုတွေရှိနေလို့ ညဘက်တွေမှာ သတိထားအိပ်စက်နေရကာ စစ်ကြောင်းထိုးဝင်ရောက်လာနိုင်တဲ့အတွက်လည်းအသင့်အနေအထားပြင်ဆင်ထားရတယ်လို့ ဆိုပါတယ်။

ပြီးခဲ့တဲ့ မတ်လ ၁၅ ရက်နေ့ကလည်း အဲ့ဒီစစ်ကောင်စီတပ်ဖွဲ့ဟာ မုံရွာမြို့နယ်ထဲက ထနောင်းတောတောင်ရွာကို ဝင်ရောက်လာပြီး နေအိမ်အလုံး ၆၀ ကျော်ကိုမီးရှို့ဖျက်ဆီးခဲ့တာကြောင့် ထွက်မပြေးနိုင်တဲ့ အသက် ၇၀ အရွယ်အဘွားတဦးလည်း မီး လောင်သေဆုံးသွားခဲ့သေးတယ်လို့သိရပါတယ်။

စာတည်း − ရင်ငြိမ်း

စစ်ကိုင်း၊ မေ ၁၈၊ ၂၀၂၃။

စစ်ကိုင်းတိုင်း၊ ကနီမြို့နယ်၊ ချောင်းမရွာကို စစ်ကောင်စီတပ်က မေလ ၁၇ ရက် မနေ့ကနေ့လည် ၂ နာရီ ခန့်မှာ လေယာဉ် ၂ စီးနဲ့ ဗုံးကြဲတိုက်ခိုက်ခဲ့တာကြောင့် ထိခိုက်ပျက်စီးမှုတွေရှိတယ်လို့ သိရပါတယ်။

ဂျက်ဖိုက်တာ ၂ စီးနဲ့ ချောင်းမရွာ အရှေ့ခြမ်းနဲ့အနောက်ခြမ်းကို ဗုံးကြဲတိုက်ခိုက်ခဲ့လို့ နေအိမ်၊ စာသင်‌ကျောင်းတချို့နဲ့ ရွာအနောက်ဘက်တောအစပ် ဘုန်းကြီးကျောင်းတကျောင်း ထိမှန်ပျက်စီးသွားတယ်လို့ ကနီဒေသခံတဦးက မြေလတ်အသံကို ပြောပါတယ်။

“မနေ့က ကြားရသလောက်က ချောင်းမရွာနဲ့ ၅မိုင်အကွာလောက်မှာထိတွေ့ပစ်ခတ်မှုဖြစ်တယ်။ အဲ့ဒါကို လေယာဉ် ၂ စီးနဲ့ ရှေ့ဆင့်နောက်ဆင့် ရွာထဲကို ဗုံးလာကြဲသွားတာ။ ၇ နှစ်ကလေးငယ်တဦး ဒဏ်ရာရသွားတယ်။ အိမ်ခြေတွေ ဘယ်လောက်ပျက်စီးသွားလဲ ဆိုတာတော့မသိရသေးဘူး” လို့ ပြောပါတယ်။

လေကြောင်းတိုက်ခိုက်မှုကြောင့် နေအိမ်နဲ့ စာသင်ကျောင်းတွေ ထိခိုက်ပျက်စီးခဲ့ပြီး ဒဏ်ရာရရှိသူတွေလည်းရှိတယ်လို့ သိရပေမယ့် အသေးစိတ်အချက်အလက်ကိုတော့ မသိရသေးပါဘူး။

ကနီမြို့နယ်ထဲမှာ မေလ ၁၁ ရက်နေ့ကစပြီး မေလ ၁၇ ရက် မနေ့ကအထိ စစ်ကောင်စီတပ်ဖွဲ့တွေနဲ့ ဒေသကာကွယ်ရေးပူးပေါင်းတပ်ဖွဲ့များကြား ထိတွေ့တိုက်ပွဲတွေ မကြာခဏဖြစ်ပွားနေတာလည်း ဖြစ်ပါတယ်။

တိုက်ပွဲများအတွင်း စစ်ကောင်စီတပ် ထိခိုက်သေဆုံးမှုတွေများပြားနေလို့ လေကြောင်းသုံးတိုက်ခိုက်နေတာလို့ တော်လှန်ရေးအင်အားစုတွေဘက်က ပြောဆိုထားပြီး မေလ ၁၄ ရက် ညနေ ၃နာရီလောက်ကလည်း ကနီမြို့နယ်၊ မင်းမရွာကို လေယာဉ်နဲ့ လာရောက်ဗုံးကြဲသွားတယ်လို့လည်း သိရပါတယ်။

စာတည်း – ရင်ငြိမ်း