Tag:

စစ်ကိုင်း

စစ်တပ်ကျောင်းကားကို လုံခြုံရေးစောင့်ပေးပြီးပြန်လာတဲ့စစ်ကောင်စီတပ်ဖွဲ့ တိုက်ခိုက်ခံရလို့ ၄ ဦးသေ

by ကျော်ကြီး ၁ နှစ် အကြာက

written by ကျော်ကြီး

ကန့်ဘလူ၊ ဇူလိုင် ၁၅၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်၊ ဇီးကုန်းမြို့ပေါ်မှာ ကျောင်းကားလုံခြုံရေးလိုက်စောင့်ပေးပြီးပြန်လာတဲ့ စစ်ကောင်စီတပ်ဖွဲ့တိုက်ခိုက်ခံရပြီး ၄ ဦးသေတယ်လို့ ကန့်ဘလူခရိုင်ပကဖလှုပ်ရှားအဖွဲ့ထံက သိရပါတယ်။

ဇူလိုင် ၁၄ ရက် နေ့လယ် ၁ နာရီကျော်မှာ ဇီးကုန်းမြို့အထကကျောင်းကနေပြန်တဲ့စစ်တပ်ကျောင်းကားကို လုံခြုံရေးလိုက်စောင့်ပေးပြီးပြန်လာတဲ့ စစ်ကောင် စီတပ်ဖွဲ့တွေကို ကျောင်းအနီးမီတာ ၂၀၀ ခန့် မှာ လျှပ်တပြတ်ပစ်ခတ်ခဲ့တယ်လို့ ဆိုပါတယ်။

” တကယ်တမ်းဆိုရင် သူတို့က အရက်ထွက်ဝယ်တာမဟုတ်ဘူး။ စစ်ကောင်စီကျောင်းဖွင့်ထားတာရှိတယ်။ ၁ နာရီဆို စာသင်ကျောင်းဆင်းတော့ ၁၀ ယောက်လိုက်ပို့တာ။ ကျောင်းအပြန်ကျောင်းကားတွေကိုလိုက်စောင့်တာ။ ပြန်လာတဲ့အချိန်မှာ ၅ ယောက်၊ ၅ယောက် ခွဲသွားတာ။ တကယ်တမ်း တားဂတ် (target) ထားတာက ၁၀ (ယောက်) ကိုပေါ့နော်။ ၅ ယောက် ၅ ယောက်ခွဲပြန်သွားတော့ နောက်ဆုံးကျန်ခဲ့တဲ့ ၅ ယောက်ကို ပစ်ခတ်မှုစတင်လိုက်တာ” လို့ ကန့်ဘလူခရိုင်ပကဖလှုပ်ရှားအဖွဲ့ ဇီးကုန်းမစ်ရှင်တာဝန်ခံ ကိုပိုင်ချဲက မြေလတ်အသံကို ပြောပါတယ်။

ပစ်ခတ်ခံရတဲ့စစ်ကောင်စီတပ်ဖွဲ့ဟာ ဇီးကုန်းမြို့၊ အထကကျောင်းမှာတပ်စွဲနေတဲ့တပ်ဖွဲ့ဖြစ်ပြီး ၎င်းတို့ဟာ အထကကျောင်းကနေ ကန့်ဘလူ၊ စစ်ကောင်စီကြံစိုက်ပျိုးရေးတပ်ဆီပြန်မယ့်ကျောင်းကားကို ကျောင်းပြင်ပ မီတာ ၁၂၀၀ ခန့်အထိ နေ့စဥ်လိုက်ပို့ပေးတဲ့အဖွဲ့ဖြစ်တယ်လို့ ဆိုပါတယ်။

နှစ်ဖက်အပြန်အလှန်ပစ်ခတ်မှု မိနစ် ၂၀ ခန့်ဖြစ်ပွားခဲ့ပြီး တိုက်ပွဲအတွင်း စစ်ကောင်စီတပ်ဖွဲ့ဝင်တပ်ကြပ် ၁ ဦးနဲ့ မဒေါင်းလှပျူစောထီးအဖွဲ့ဝင် ၃ ဦး သေဆုံး၊ ၁ ဦး ထွက်ပြေးလွတ်မြောက်သွားကာ ၎င်းတို့ကိုင်ဆောင်တဲ့ AK သေနတ် ၁ လက်၊ ကာဘိုင် ၂ လက် သိမ်းဆည်းရရှိခဲ့တယ်လို့ သိရပါတယ်။

ပစ်ခတ်မှုဖြစ်ပွားချိန် ပြည်သူတွေရဲ့ ဆိုင်ခန်းအချို့နဲ့ ဆိုင်အတွင်း ပစ္စည်းအချို့ထိခိုက်ပျက်စီးတာတွေရှိခဲ့လို့ စိတ်မကောင်းဖြစ်မိတယ်လို့ သူကဆက်ပြောပါတယ်။

ပစ်ခတ်မှုဖြစ်ပြီး ညနေပိုင်းလောက်မှာ အထက ၁ ကျောင်းအတွင်းက စစ်ကောင်စီတပ်ဖွဲ့ဝင်တွေက သေဆုံးစစ်ကောင်စီတပ်ဖွဲ့ရုပ်အလောင်းတွေကို လာပြန်ကောက်သွားတယ်လို့ ၎င်းက ဆိုပါတယ်။

တိုက်ခိုက်မှုကို ကန့်ဘလူခရိုင်လှုပ်ရှား ပကဖဗိုလ်ရသ (ခ) ဗိုလ်ပိုင်ချဲအဖွဲ့နဲ့ ရေဦးနယ် ဓူဝံပကဖ ဂျာဂျာ တော်လှန်ရေးအဖွဲ့တို့က ပူးပေါင်းတိုက်ခိုက်ခဲ့တာလို့ သိရပါတယ်။

ဇွန် ၇ ရက်ကလည်း ကန့်ဘလူမြို့နယ်၊ ညောင်ပေါင်ရင်းကျေးရွာအနီးရှိ လင်ဗန်းဆည်မှာ ကင်းတာဝန်ကျ ပျူစောထီးအဖွဲ့တိုက်ခိုက်ခံရလို့ ၂ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ

၁ နှစ် အကြာက 0 comments 294 views

စစ်ရှောင် ၂၀ ကျော်သေခဲ့တဲ့ လင်းတလူးရွာဘုန်းကြီးကျောင်း ဗုံးကြဲခံရမှု PDF စခန်းကို ရှင်းလင်းတာလို့ စစ်တပ် ထောက်ခံသူတွေ သတင်းမှားဖြန့် (Fact Check)

by MLAT ၁ နှစ် အကြာက

written by MLAT

မြေလတ်အသံ၊ ဇူလိုင် ၁၅၊ ၂၀၂၅။

စစ်ကိုင်းမြို့နယ်၊ လင်းတလူးရွာရှိ စစ်ဘေးရှောင်တွေရှိနေတဲ့ဘုန်းကြီးကျောင်းကို စစ်ကောင်စီတပ်က လေ ကြောင်းနဲ့ ဗုံးကြဲတိုက်ခိုက်ခဲ့မှုကို PDF စခန်းကို ရှင်းလင်းချေမှုန်းတာလို့ စစ်တပ်ထောက်ခံတဲ့တယ်လီ ဂရမ်လူမှုကွန်ယက်တွေမှာ သတင်းအမှားဖြန့်ဝေနေပါတယ်။

■ သတင်းအမှားပျံ့နှံ့မှု ■

“စစ်ကိုင်းမြို့နယ်၊ လင်းတလူးရွာမှာ ပဒက်တွေစုဝေးနေတာကို တာဝန်သိပြည်သူတစ်ဦးက နေရာနဲ့တကွ သတင်းအတိအကျပေးလို့ တိုက်ခိုက်ချေမှုန်းခဲ့တာ အကြမ်းဖက်ပဒက်တွေ အတုံးအရုန်းငရဲကျကုန်တယ် (မူရင်းရေးသား ချက်အတိုင်း)” ဟုဆိုကာ ရေးသားဖြန့်ဝေထားတာ ဖြစ်ပါတယ်။

အဆိုပါအကြောင်းအရာကို စစ်ကောင်စီကိုအစဥ်တစိုက်ထောက်ခံရေးသားနေတဲ့ Subscribers ၆၁,၀၀၀ ကျော်ရှိ ဘညွန့်တယ်လီဂရမ်ချန်နယ်က ဇူလိုင် ၁၁ ရက် နေ့လယ် ၁၁ နာရီ ၂၄ မိနစ်မှာ စတင်ဖြန့်ဝေခဲ့တာဖြစ်ပြီး ဇူလိုင် ၁၅ ရက် ဒီကနေ့ နေ့လယ်ပိုင်းအထိ ကြည့်ရှုသူ ၂၃,၀၀၀ ကျော် Reaction ၂၂၉ ခုနဲ့ မှတ်ချက် ၁၆ ခု ရှိခဲ့တာ ဖြစ်ပါတယ်။

ဒါ့အပြင်လေကြောင်းတိုက်ခိုက်မှုနဲ့ပတ်သက်ပြီး မှိုင်းဝေတယ်လီဂရမ်ချန်နယ်ကနေလည်း “ယနေ့နံနက်ပိုင်းလင်း တလူးရွာရှိ အကြမ်းဖက် PDF စခန်းအား ရှင်းလင်းချေမှုန်းခဲ့ရာ အကြမ်းဖက် PDF အများအပြားသေဆုံး (မူရင်း ရေးသားချက်အတိုင်း)” ဟုဆိုကာ ရေးသားဖြန့်ဝေနေတာ ဖြစ်ပါတယ်။

စစ်ကောင်စီကိုထောက်ခံရေးသားနေတဲ့ Subscribers ၁၇၈,၀၀၀ ကျော်ရှိ မှိုင်းဝေ တယ်လီဂရမ်ချန်နယ်က ဇူလိုင် ၁၁ ရက် နေ့လယ် ၁၂ နာရီ ၁၀ မိနစ်မှာ စတင်ဖြန့်ဝေခဲ့တာဖြစ်ပြီး ဇူလိုင် ၁၅ ရက် ဒီကနေ့ နေ့လယ်ပိုင်းအထိ ကြည့်ရှုသူ ၃၃,၇၀၀ ကျော် Reaction ၇၈၈ ခုရှိခဲ့တာ ဖြစ်ပါတယ်။

သတင်းမှားဖော်ပြမှုတွေကို အောက်ပါလင့်ခ်တွေမှာ ဝင်ရောက်ကြည့်ရှုနိုင်ပါတယ်။

ဘညွန့် တယ်လီဂရန်ချန်နယ် မှ ဖော်ပြမှု – https://archive.ph/rVlFe

မှိုင်းဝေ တယ်လီဂရန်ချန်နယ် မှ ဖော်ပြမှု – https://archive.ph/I5Shu

အဆိုပါအကြောင်းအရာ တယ်လီဂရန်လူမှုကွန်ယက်မှာပျံ့နှံ့နေမှုကို မြေလတ်အသံက ပြန်လည်စစ်ဆေးခဲ့ရာ အချက်အလက်မှားယွင်းနေတဲ့ သတင်းတု၊ သတင်းမှား ဖြစ်ကြောင်း စိစစ်တွေ့ရှိခဲ့ရပါတယ်။

■ သတင်းမှားဖြစ်ကြောင်း စိစစ်ဖော်ပြချက် ■

အကြောင်းအရာနဲ့ပတ်သက်ပြီး သတင်းမှားဖော်ပြချက်မှာပါဝင်တဲ့ လင်းတလူးရွာဆိုတဲ့ နေရာဖော်ပြချက်ကို အသုံးပြုပြီး Google မှာ “လင်းတလူးရွာ” စာသားနဲ့ရှာဖွေကြည့်ရာ “BBC Burmese” သတင်းဌာန Facebook စာမျက်နှာမှာ “လင်းတလူး လေကြောင်းတိုက်ခိုက်ခံရမှု လူနှစ်ဒါဇင်ကျော် သေဆုံး” ဆိုတဲ့ သတင်းကိုတွေ့ရှိရပြီး “စစ်ရှောင်တွေခိုလှုံနေတဲ့ဘုန်းကြီး‌ကျောင်းကို စစ်ကောင်စီတပ်က ဗုံးကြဲတိုက်ခိုက်ခဲ့” တယ်လို့ ဖော်ပြထားတာကို တွေ့ရှိရပါတယ်။

ဆက်လက်ပြီး Google မှာ “လင်းတလူးရွာ” ဆိုတဲ့စာသားနဲ့ ထပ်မံရှာဖွေကြည့်ရာမှာ BBC Burmese မှ ဖော် ပြချက်အပြင် အခြားလွတ်လပ်တဲ့သတင်းဌာနတွေကလည်း အဆိုပါဖြစ်စဉ်နဲ့ပတ်သက်ပြီး သတင်းဖော်ပြထားကာ အဲ့ဒီဖော်ပြချက်တွေအရ ၂၀၂၅ ဇူလိုင် ၁၁ ရက် မနက်အစောပိုင်းမှာ စစ်ကိုင်းမြို့နယ်၊ လင်းတလူးရွာ၊ မဟာသစ္စဝါဒီကျောင်းတိုက်ကို စစ်ကောင်စီက လေကြောင်းတိုက်ခိုက်မှုပြုလုပ်ခဲ့ပြီး အဆိုပါကျောင်းတိုက်မှာ လာရောက်စစ်ရှောင်နေကြတဲ့ စစ်ရှောင်ပြည်သူတွေ သေဆုံး ထိခိုက်ကြောင်း ဖော်ပြကြပါတယ်။

လွပ်လပ်တဲ့သတင်းဌာနတွေရဲ့ဖော်ပြချက်တွေကို အောက်ပါလင်ခ့်တွေမှာ ကြည့်ရှုနိုင်ပါတယ် –

လင်းတလူး လေကြောင်းတိုက်ခိုက်ခံရမှု လူနှစ်ဒါဇင်ကျော် သေဆုံးကြောင်း BBC Burmese မှ ၂၀၂၅ ခုနှစ်၊ ဇူလိုင် ၁၁ ရက်တွင် သတင်းဖော်ပြချက် – သတင်းကြည့်ရန်

ဝါတွင်းကာလမှာ စစ်ကောင်စီက ဘုန်းကြီးကျောင်းကို ဗုံးကြဲလို့ ၃၀ ကျော် သေဆုံးပြီး ၂၀ ကျော် ထိခိုက်ဒဏ်ရာ ရကြောင်း CJ Platform မှ ၂၀၂၅ ခုနှစ်၊ ဇူလိုင် ၁၁ ရက်တွင် သတင်းဖော်ပြချက် – သတင်းကြည့်ရန်

စစ်ရှောင်တွေခိုလှုံနေတဲ့ ဘုန်းကြီးကျောင်းကို စစ်ကောင်စီဗုံးကြဲခဲ့ကြောင်း The Irrawaddy – Burmese Edition မှ ရုပ်သံသတင်းဖော်ပြချက် – သတင်းကြည့်ရန်

ဒါကြောင့် လင်းတလူးရွာ လေကြောင်းတိုက်ခိုက်ခံရမှုဟာ စစ်ကောင်စီဝါဒဖြန့်တယ်လီဂရမ်ချန်နယ်တွေက ဖော် ပြနေတဲ့ PDF စခန်းကို တိုက်ခိုက်တယ်ဆိုတဲ့ ဖော်ပြချက်ဟာ သတင်းအမှားတခုသာ ဖြစ်ပါတယ်။

■ သတင်းအမှားဖြန့်ဝေနေတဲ့ အကောင့်များအား စိစစ်ချက် ■

သတင်းအမှားဖြန့်ဝေနေတဲ့ ဘညွန့် တယ်လီဂရမ်ချန်နယ်နဲ့ မှိုင်းဝေ တယ်လီဂရမ်ချန်နယ်တို့ကို စိစစ်ကြည့်ရာမှာ လူမျိုးရေး၊ ဘာသာရေးအမုန်းစကားတွေနဲ့သတင်းမှားတွေကို အစဉ်တစိုက်ဖြန့်ဝေနေပြီး စစ်ကောင်စီတပ်ကို ထောက်ခံရေးသားဝါဒဖြန့်နေတဲ့ ချန်နယ်တခုဖြစ်တာကို စိစစ်တွေ့ရှိရပါတယ်။

ဘညွန့် တယ်လီဂရန်ချန်နယ် – https://archive.ph/AKuGk

မှိုင်းဝေ တယ်လီဂရန်ချန်နယ် – https://archive.ph/0nO5G

ဘညွန့် တယ်လီဂရမ်ချန်နယ်နဲ့ မှိုင်းဝေ တယ်လီဂရမ်ချန်နယ်တွေဟာ သတင်းအမှားတွေနဲ့ အမုန်းစကားတွေကို အစဉ်တစိုက်ဖြန့်ဝေနေတာဖြစ်ပြီး ၎င်းချန်နယ်တွေ ယခင်ကဖြန့်ဝေခဲ့တဲ့ သတင်းအမှားတွေထဲက Myanmar Fact-checking Network – MFCN ကနေ စိစစ်ဖော်ပြထားတဲ့ သတင်းအမှားအကြောင်းအရာတချို့ကို အောက်ပါ လင့်ခ်တွေမှာ ကြည့်ရှုနိုင်ပါတယ်။

ဘညွန့် တယ်လီဂရန်ချန်နယ် မှ ယခင်က သတင်းအမှားဖော်ပြမှု – https://shorturl.at/RzdMu

မှိုင်းဝေ တယ်လီဂရန်ချန်နယ် မှ ယခင်က သတင်းအမှားဖော်ပြမှု – https://shorturl.at/yxyEF

■ သုံးသပ်ချက် ■

စစ်တပ်ဝါဒဖြန့်တယ်လီဂရမ်ချန်နယ်တွေဟာ စစ်ကောင်စီတပ်ရဲ့ စစ်ရှောင်အရပ်သားတွေနေထိုင်ရာနေရာတွေနဲ့ ဘာသာရေးအဆောက်အဦတွေကို ပစ်ခိုက်တိုက်ခိုက်မှုတွေကို ဖုံးကွယ်နိုင်ဖို့အတွက် စစ်ရေးပစ်မှတ် PDF တွေ ဖြစ်ကြောင်း သတင်းတု၊ သတင်းမှားတွေ ရည်ရွယ်ချက်ရှိရှိလုပ်ကြံဖန်တီးကာ ဖြန့်ဝေလေ့ရှိပါတယ်။

အခုဖြစ်စဉ်မှာဆိုရင်လည်း စစ်ကောင်စီတပ်က စစ်ရေးနဲ့သက်ဆိုင်ခြင်းမရှိတဲ့ အရပ်သားပြည်သူနေထိုင်ရာ စစ် ရှောင်ဘုန်းကြီးကျောင်းကို လေကြောင်းတိုက်ခိုက်မှုပြုလုပ်ခဲ့ပြီး လူအစုလိုက်အပြုံလိုက် သေဆုံး၊ ဒဏ်ရာရရှိခဲ့ မှုတွေအပေါ် ဖုံးကွယ်နိုင်ဖို့အတွက် သေဆုံးသူတွေမှာ အရပ်သားတွေမဟုတ်ဘဲ စစ်ရေးပစ်မှတ် PDF တွေလို့ လုပ်ကြံဖန်တီး ဖြန့်ဝေနေတာဖြစ်ပါတယ်။

ဒါကြောင့် ဒီလိုသတင်းတွေကိုတွေ့ရင် အလွယ်တကူမယုံကြည်သင့်ဘဲ အချက်အလက်အတည်ပြုပြီးဖော်ပြတဲ့ လွတ်လပ်သောသတင်းဌာနတွေရဲ့ သတင်းဖော်ပြချက်တွေကို ကြည့်ရှုပြီး နှိုင်းယှဉ်စဉ်းစားနိုင်ဖို့ အကြံပြုအပ်ပါတယ်။

၁ နှစ် အကြာက 0 comments 29 views

သတင်း

ရွှေဘို-မြစ်ကြီးနားလမ်းပေါ်က ထမင်းဆိုင်နဲ့ ဆီသယ်ကားတွေဗုံးကြဲခံရလို့ ၄ ဦး ဒဏ်ရာပြင်းထန်ပြီး ဆီကားတွေမီးလောင်

by ကျော်ကြီး ၁ နှစ် အကြာက

written by ကျော်ကြီး

ကျော်ကြီး၊ အောင်စိုး

ကောလင်း၊ ဇူလိုင် ၁၅၊ ၂၀၂၅။

စစ်ကိုင်းတိုင်း(အထက်ပိုင်း) ကောလင်းမြို့နယ်အရှေ့ခြမ်း၊ ဒိုးပင်ကျေးရွာ ရွှေဘို-မြစ်ကြီးနားလမ်းပေါ်ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၄ ဦးဒဏ်ရာပြင်းထန်ရရှိခဲ့တယ်လို့ ကောလင်းခရိုင်အမှတ် ၁ တပ်ရင်းထံက သိရပါတယ်။

ရွှေဘို-မြစ်ကြီးနားလမ်းပေါ်ကို ဇူလိုင် ၁၄ ရက် ညနေ ၄ နာရီ ၃၈ မိနစ်မှာ တိုက်လေယာဥ် ၁ စီးနဲ့ ဗုံး ၃ လုံးကြဲချတိုက်ခိုက်ခဲ့တာဖြစ်ပြီး လမ်းနံဘေးထမင်းဆိုင်နဲ့ ဆိုင်အနီးရပ်နားနေတဲ့ စက်သုံးဆီတင်ကားတွေအနီးကျရောက်ပေါက်ကွဲခဲ့တာလို့ ဆိုပါတယ်။

ဓာတ်ပုံ – ကောလင်းခရိုင်ပြည်သူ့ကာကွယ်ရေးတပ်ဖွဲ့ တပ်ရင်း ၁။

” ထမင်းဆိုင်ရဲ့အနီးလမ်းမပေါ်ရပ်ထားတဲ့ ဆီဘောက်ဆာ ၂ စီးကိုအစမှန်ပြီး မီးလောင်ပျက်စီးတယ်။ ကျတာက ဆီဘောက်ဆာကားတွေရပ်တဲ့ ကွင်းလိုမျိုးမ ဟုတ်ဘူး။ လမ်းမတန်းထမင်းဆိုင်ဘေးကိုချ (ရပ်)ပြီး ထမင်းဝင်စားကြတာ” လို့ ကောလင်းခရိုင်အမှတ် ၁ တပ်ရင်းတာဝန်ရှိသူတဦးက မြေလတ်အသံကို ပြောပါတယ်။

ဗုံးကျပေါက်ကွဲတာကြောင့် စစ်ဘေးရှောင်ရင်း ထမင်းဆိုင်ဖွင့်ထားတဲ့ အသက် ၃၀ ကျော် အမျိုးသမီး ၁ ဦး၊ ၎င်းရဲ့သမီးဖြစ်သူ အသက် ၁၂ နှစ် မိန်းကလေး ၁ ဦး၊ အသက် ၃၀ ကျော် စက်သုံးဆီသယ်တွဲကားမောင်းနှင်သူ ၂ ဦးစုစုပေါင်း ၄ ဦးဒဏ်ရာရရှိခဲ့ပြီး စက်သုံးဆီတင်ကား ၂ စီး မီးလောင်ပျက်စီးခဲ့ကာ ထမင်းဆိုင်နဲ့ အနီးအနားကဆိုင်အချို့လည်းပျက်စီးတယ်လို့ သိရပါတယ်။

စစ်ကောင်စီဘက်က ဗုံးလာချတဲ့ ဒိုးပင်ကျေးရွာအနီးမှာ တိုက်ပွဲဖြစ်ပွားနေတာမရှိဘဲ အရပ်သားပြည်သူထိခိုက်အောင် ရည်ရွယ်ချက်ရှိရှိ ဗုံးလာချတာဖြစ် ကြောင်း အထက်ပါတာဝန်ခံက ဆက်ပြောပါတယ်။

ဒေသတွင်းသတင်းအချက်အလက်တွေကို ဖော်ပြနေတဲ့ Kawlin Information အဖွဲ့ဝင်အမျိုးသားတဦးကလည်း ဗုံးကြဲခံရမှုဖြစ်စဥ်နဲ့ပတ်သက်ပြီးအခုလိုပြောပါတယ်။

” ဗုံးကြဲချိန် မိုးရွာနေတာဖြစ်လို့ လူနည်းတယ်။ အဲ့နေရာက ထမင်းဆိုင်နဲ့ဆီဆိုင်တွေ။ ရွှေဘို-မြစ်ကြီးနားလမ်းဘေးတင် စည်ကားနေတဲ့နေရာပေါ့။ အဲနားမှာဆီကား ၂ စီး။ ပြီးတော့ဆီရောင်းတဲ့ဆိုင် အဲ့တာကို မှန်တယ်။ ဆီကား ၂ စီးပျက်သွားတယ်။ ထိတာ ၄ ဦး၊ ၁ ဦးကတော့သေမယ်ထင်တယ်”လို့ ၎င်းက ပြောပါတယ်။

ဒိုးပင်ကျေးရွာဟာ အိမ်ခြေ ၁၅၀ ကျော် လူဦးရေ ၆၀၀ ခန့်နေထိုင်တဲ့ကျေးရွာဖြစ်ပြီး စစ်ကောင်စီတပ်က ဗုံးကြဲချပြီးနောက် ထပ်မံဗုံးကြဲခံရမှာစိုးရိမ်ပြီး ရွာလုံးကျွတ် ထွက်ပြေးနေရတယ်လို့ ဆိုပါတယ်။

ပြီးခဲ့တဲ့ ဇွန် ၉ ရက်ကလည်း ကောလင်းမြို့နယ်၊ ဖလဲကျေးရွာကိုလေကြောင်းကနေ ဗုံးကြဲတိုက်ခိုက်ခဲ့ရာ ပြည်သူ ၃ ဦးထိခိုက်ဒဏ်ရာရပြီး နေအိမ် ၆ လုံးပျက်စီးခဲ့တယ်လို့ သိရပါတယ်။

စာတည်း – ဟိန်းစံ

၁ နှစ် အကြာက 0 comments 67 views

သတင်း

တန့်ဆည်ဒေသခံတွေကို လေကြောင်းအန္တရာယ်အသိပညာပေး

by အောင်စိုး ၁ နှစ် အကြာက

written by အောင်စိုး

မြေလတ်အသံ၊ ဇူလိုင် ၁၃၊ ၂၀၂၅။

စစ်ကိုင်းတိုင်း၊ တန့်ဆည်မြို့နယ်ဒေသခံတွေကို လေကြောင်းအန္တရာယ်အသိပညာပေးဟောပြောပွဲလုပ်ပြီး သရုပ်ပြလေ့ကျင့်တာတွေနဲ့ တော်လှန်ရုပ်ရှင်ပြသမှုတွေကို လုပ်ဆောင်ခဲ့တယ်လို့ ဗျူဟာ – ၅၂၊ ပေါ်ဦး စစ်ကြောင်းဆီကသိရပါတယ်။

ဇူလိုင်လပထမအပတ်မှာ တန့်ဆည်မြို့နယ်ရှိ ကျေးရွာ ၂ ရွာကပြည်သူတွေကို လေကြောင်းတိုက်ခိုက်ခံရချိန် အရေးပေါ်နေထိုင်နည်း၊ ဗုံးခိုကျင်းတူးနည်း၊ သရုပ်ပြလေ့ကျင့်တာတွေ၊ အကြံပြုချက် လက်ကမ်းစာစောင်တွေ ဖြန့်ဝေတာ၊ တော်လှန်ရုပ်ရှင်ဇာတ်ကားတွေပြသတာတွေကို ပေါ်ဦးစစ်ကြောင်းနဲ့ မြို့နယ် လူသားခြင်း စာနာထောက်ထားရေးအဖွဲ့ တာဝန်ခံတို့က ပူးပေါင်းပါဝင်ဆောင်ရွက်ခဲ့လို့ ဆိုပါတယ်။

“ကျေးရွာအလိုက် လူဦးရေအနည်းအများတော့ကွာပါတယ်။ ၅၀၀ နဲ့ ၈၀၀ ကြားရှိပါတယ်။ မတက်ရောက်နိုင်တဲ့ ပြည်သူတွေကိုလည်း ပြန်လည်မျှဝေပေးဖို့ လက်ကမ်းစာစောင်တွေလည်းပေးပါတယ်”လို့ ဗျူဟာ -၅၂၊ ပေါ်ဦးစစ်ကြောင်းမှ တာဝန်ရှိသူတဦးကပြောပါတယ်။

စစ်ကောင်စီတပ်က ကျေးရွာတွေကို စစ်ရေးလှုပ်ရှားမှုမရှိဘဲ လေယာဥ်နဲ့ ဗုံးကြဲတိုက်ခိုက်နေလို့ ပြည်သူတွေနဲ့ ကျောင်းသား၊ ကျောင်းသူတွေ အသက်ဆုံးရှုံးမှုအနည်းဆုံးနဲ့ ကိုယ်တိုင်ကာကွယ်နေထိုင်တတ်ဖို့အတွက် အခုလို အသိပညာပေးဟောပြောခဲ့ရတာလို့ အထက်ပါတာဝန်ရှိသူကဆိုပါတယ်။

အထက်ပါဟောပြောသရုပ်ပြတာတွေ ကျေးရွာ အုပ်စုအလိုက် ၁ ကြိမ်၊ ကျေးရွာတရွာချင်းစီအလိုက် ၂ ကြိမ် ပြုလုပ်ပေးပြီး နောက်ထပ် အခုလိုမလုပ်ပေးရသေးတဲ့ကျေးရွာတွေကိုလည်း စစ်ရေးအေးတဲ့အချိန်တွေနဲ့ လုံခြုံရေးစိတ်ချရတဲ့အချိန်တွေမှာ ဆက်လက်လုပ်ဆောင်ဖို့ရှိသလို လက်ကမ်းစာစောင်တွေကိုလည် မြို့နယ်အတွင်းရှိ အိမ်တိုင်စေ့ မျှဝေဖို့ စီစဥ်ထားတယ်လို့ သူကဆိုပါတယ်။

ပြီးခဲ့တဲ့ဇူလိုင် ၁၁ ရက်ကလည်း စစ်ကိုင်းမြို့ နယ်၊ လင်းတလူကျေးရွာရှိ စစ်ဘေးရှောင်ပြည်သူ ၁၅၀ ခန့် ခိုလှုံနေကြတဲ့ ဘုန်းကြီးကျောင်းကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေးငယ် ၃ ဦးအပါအဝင် ၂၃ ဦးသေဆုံးပြီး ၅၀ ဦးဒဏ်ရာရရှိခဲ့တယ်လို့ သိရပါတယ်။

စာတည်း – လင်း

၁ နှစ် အကြာက 0 comments 15 views

ရုပ်သံ အင်တာဗျူး

လူအစုလိုက်အပြုံလိုက် သေဆုံးခဲ့တဲ့ လင်းတလူးရွာဗုံးကြဲမှုဖြစ်စဉ် (အင်တာဗျူး)

by သောမက်စ်လင်း ၁ နှစ် အကြာက

written by သောမက်စ်လင်း

မြေလတ်အသံ၊ ဇူလိုင် ၁၃၊ ၂၀၂၅။

ဇူလိုင်လ ၁၁ ရက်မနက်မိုးမလင်းခင် ၁ နာရီဝန်းကျင်မှာ စစ်ကိုင်းမြို့နယ်၊ လင်းတလူးကျေးရွာရှိ စစ်ဘေးရှောင်တွေတည်းခိုနေထိုင်နေတဲ့ ဘုန်းကြီးကျောင်းဝန်းအတွင်းကို စစ်ကောင်စီတပ်က တိုက်လေယာဉ်နဲ့ ဗုံးကြဲတိုက်ခိုက်ခဲ့ပါတယ်။

ဒီတိုက်ခိုက်မှုအတွင်း ၁၀ နှစ်အရွယ်ကလေး ၃ ဦးအပါ စုစုပေါင်း ၂၃ ဦးသေဆုံးခဲ့ပြီး ၅၀ ကျော်ထိခိုက် သေဆုံးခဲ့ပါတယ်။ လင်းတလူးရွာမှာ ဘယ်လိုတွေဖြစ်ခဲ့လဲဆိုတာကို ဗုံးကြဲပြီးနောက် ကျေးရွာအတွင်း သွားရောက်ကူညီပေးခဲ့တဲ့ ဒေသခံအမျိုးသားတဦးကို မြေလတ်အသံက ဆက်သွယ်မေးမြန်းထားပါတယ်။

တည်းဖြတ် – HP

၁ နှစ် အကြာက 0 comments 32 views

တိုက်ပွဲ သတင်း

မြင်းမူနဲ့ ချောင်းဦးမှာ စစ်ကောင်စီတပ်တွေတိုက်ခိုက်ခံရလို့ သေဆုံးသူများဟုဆို

by ဒိန်းဂျား ၁ နှစ် အကြာက

written by ဒိန်းဂျား

မြင်းမူ၊ ဇူလိုင် ၁၂၊ ၂၀၂၅။

စစ်ကိုင်းတိုင်း၊ မြင်းမူမြို့နယ်နဲ့ ချောင်းဦးမြို့နယ်မှာ ၂ ရက်အတွင်း စစ်ကောင်စီတပ်တွေတိုက်ခိုက်ခံရပြီး ထိခိုက်သေဆုံးသူတွေရှိခဲ့တယ်လို့ ဒေသခံကာကွယ်ရေးတပ်ဖွဲ့တွေဆီက သိရပါတယ်။

မြင်းမူမြို့နယ်၊ အလ္လကပ္ပကျေးရွာမှာ ဆက်ကြေးကောက်နေတဲ့ စစ်ကောင်စီတပ်ဖွဲ့ဝင်တွေကို ဇူလိုင် ၁၁ ရက် မနေ့ နေ့လယ် ၁၀ နာရီဝန်းကျင်မှာ တိုက်ခိုက်ခဲ့တယ်လို့ မြောက်မြို့နယ် TGR ပြည်သူ့ ကာကွယ်ရေးတပ်ဖွဲ့မှ ဗိုလ်တိုက်ဂါးက ပြောပါတယ်။

“အလ္လကပ္ပရွာအလယ်က ဈေးကွင်းက ကိုးဆူဘုရားအနားမှာ ဂိတ်ချပြီးကောက်နေတဲ့ စစ်ကောင်စီတပ်ဖွဲ့ ဝင်တွေကို အီနာဂါ၊ ဂန်းငယ်တွေနဲ့ သွားပြီးပစ်ခတ်တိုက်ခိုက်ခဲ့တာ၊ ပိုက်ဆံထွက်တောင်းတဲ့ ** ၃ ကောင်ကတော့ နေရာတင်တုံးကနဲ လဲသွားတာ၊ သေသွားသလားတော့ ကျနော်တို့အတည်ပြုလို့ မရဘူး” လို့ ဗိုလ်တိုက်ဂါးက ပြောပါတယ်။

ပုံစာ – အလ္လကပ္ပကျေးရွာဂိတ်တွင် ဆက်ကြေးကောက်နေသည့် စစ်ကောင်စီတပ်ဖွဲ့ဝင်များကို တိုက်ခိုက်နေစဥ်။

ဒီတိုက်ခိုက်မှုပြီးနောက် ကာကွယ်ရေးတပ်ဖွဲ့ဝင်တွေ ဆုတ်ခွာသွားတဲ့နောက်ကို စစ်ကောင်စီတပ်ဖွဲ့ဝင်တွေက ကားတွေနဲ့လိုက်လာခဲ့ကာ အဲ့ဒီကားတွေကိုလည်း မိုင်းဆွဲတိုက်ခိုက်ခဲ့တယ်လို့ သူက ဆက်ပြောပါတယ်။

“ကျနော်တို့က ကြိုတင်ပြင်ဆင်ထားတဲ့ မိုင်းတွေနဲ့ မဟာမိတ်တပ်ဖွဲ့တွေပေါင်းပြီး တိုက်ခိုက်ခဲ့တယ်၊ သူတို့ စစ်ကား ၅ စီးလာတယ်၊ ၁ စီးက ရွာထဲချပြီးတော့ ခြေလျင်လျှောက်လာတယ်၊ ကျန်တဲ့ ၄ စီးက အလ္လကပ္ပတောင်ဘက်အထွက် တာဘောင်ဘက် ရဲဘော်တွေနောက်ကို လိုက်လာတယ်၊ ကျနော်တို့ ပစ်မှတ်ထားတဲ့ တားဂတ်ရောက်တဲ့အချိန် ကားကိုမိုင်းဆွဲတိုက်ခိုက်ခဲ့တယ်၊ ** ၁၅ ကောင်ကတော့ နေရာမှာတင်ပွဲချင်းပြီးသေတယ်” လို့ ဗိုလ်တိုက်ဂါးက ပြောပါတယ်။

တိုက်ခိုက်ပြီးနောက် စစ်ကောင်စီဘက်က ၁၅ ဦးသေဆုံးပြီး သေဆုံးဒဏ်ရာရသူတွေကိုလည်း ကားနဲ့မြင်းမူဆေးရုံကိုသယ်သွားတယ်လို့ ဆိုပါတယ်။

ဒီတိုက်ခိုက်မှုကို မြောင်မြို့နယ် TGR ပြည်သူ့ကာကွယ်ရေးတပ်၊ ကျောက်ဆည်ခရိုင်တပ်ရင်း ၂၊Black Eagle Defence Force (MMU)၊ အလ္လလကပ္ပတိုက်နယ် ပကဖ၊ မြင်းမူမြို့နယ် ပလဖ၊ ရေနဂါး ချောင်းဦးမြို့နယ် ပြည်သူ့ကာကွယ်ရေးအဖွဲ့နဲ့ ဒေသခံတော်လှန်ရေးအဖွဲ့တို့က ပူးပေါင်း ပြုလုပ်ခဲ့တာလို့ သိရပါတယ်။

အလားတူ ချောင်းဦးမြို့နယ်၊ ကံကြီးကုန်းကင်ပွန်းတော်ရွာကို ရိက္ခာပို့ပြီးပြန်လာတဲ့ စစ်ကောင်စီသံပြားကာကား ၅ စီးကိုလည်း မုံရွာ-ချောင်းဦးလမ်းပိုင်းမှာ ဇူလိုင် ၁၀ ရက်ည ၇ နာရီလောက်မှာ ပစ်ခတ်တိုက်ခိုက်ခဲ့ တယ်လို့ မုံရွာခရိုင်တပ်ရင်း အမှတ် ၂၃ တပ်ခွဲ ၂ ဆီက သိရပါတယ်။

“ဟိုဘက်မှာ ထိခိုက်ဒဏ်ရာရတဲ့သူတွေကို ခေါ်ပြီးတော့ မုံရွာမြို့ကို ပြန်လာတာလို့ကြားတယ်၊ ချောင်းဦးဘက်ကနေ ပြန်လာတာ၊ ပျူစောထီးရွာတွေကနေ ဒဏ်ရာရသူတွေကို သယ်လာတာ၊ ကားတွေက မြောက်ကိုမောင်းသွားတဲ့အချိန်မှာ မုံရွာ-မန္တလေးလမ်းမကြီးပေါ်တက်ပြီးတော့ လိုက်လံ ပစ်ခတ်ခဲ့သေးပါတယ်၊”လို့ မုံရွာခရိုင် တပ်ရင်းအမှတ် ၂၃၊ တပ်ခွဲ ၂ တာဝန်ခံက ပြောပါတယ်။

ပစ်ခတ်တိုက်ခိုက်ပြီးနောက် စစ်ကောင်စီကားတွေက ည ၉ နာရီမှာ မုံရွာမြို့ထဲကို ပြန်ဝင်သွားတယ်လို့သိရပြီး သေဆုံးထိခိုက်မှုကိုတော့ အတည်မပြုနိုင်သေးဘူးလို့ ဆိုပါတယ်။

အဆိုပါတိုက်ခိုက်မှုကို GOLDEN PEOCOCK ATTACK FORCE၊ မုံရွာခရိုင်တပ်ရင်း အမှတ် ၂၃ တပ်ခွဲ ၂၊ မုံရွာခရိုင်အမှတ် ၁၇ တပ်ရင်း တပ်ခွဲ ၃၊ TIGER FIGHTER M_21.2၊ AERA(71)LOCAL PEOPLE DEFENCE FORCE တို့က ပူးပေါင်းတိုက်ခိုက်ခဲ့တာလို့ သိရပါတယ်။

စာတည်း – လင်း

၁ နှစ် အကြာက 0 comments 76 views

ရုပ်သံ သတင်း

စစ်ကိုင်းတံတားပေါ်တက်လာတဲ့ ခရီးသွားနဲ့အိမ်စီးကားတွေပေါ်က လူငယ်အမျိုးသား ၃၀ ကျော်ကို စစ်တပ်ပေါ်တာဆွဲ (ရုပ်/သံ)

by ခေတ်သဒ္ဒါ ၁ နှစ် အကြာက

written by ခေတ်သဒ္ဒါ

စစ်ကိုင်း၊ ဇူလိုင် ၁၂၊ ၂၀၂၅။

စစ်ကိုင်းတံတားပေါ်ကို ဖြတ်သန်းလာတဲ့ ခရီးသွားနဲ့ အိမ်စီးကားတွေပေါ်က အမျိုးသားအယောက် ၃၀ ကျော်ကို စစ်ကောင်စီတပ်က ပေါ်တာဆွဲဖမ်းဆီးသွားတယ်လို့ မျက်မြင်ကြုံတွေ့ရသူ ခရီးသွားတဦးက မြေလတ်အသံကို ပြောပါတယ်။

ဇူလိုင် ၁၀ ရက် မနက် ၁၀ နာရီလောက်က စစ်ကိုင်းမြို့ဘက်ခြမ်း တံတားကြေးကောက်ခံတဲ့ဂိတ်မှာ လက်နက်ကိုင် ယူနီဖောင်းအပြည့်အစုံဝတ်ဆင်ထားတဲ့ စစ်ကောင်စီတပ်ဖွဲ့ဝင် ၁၀ ဦးကျော်ဟာ ခရီးသွားကားတွေကိုတားဆီးပြီး ကားတွေပေါ်မှာလိုက်ပါလာတဲ့ လူငယ်အမျိုးသား ၃၀ ကျော်ကို ဖမ်းဆီးခေါ်ဆောင်သွားခဲ့တာလို့ ဆိုပါတယ်။

” ကျမတို့ကားပေါ်က ယောက်ျားလေး ၄ ယောက်ပါသွားတယ်။ မှတ်ပုံတင်၊ ပိုက်ဆံအိတ်နဲ့ အင်္ကျီအဝတ်အစားထုပ်တွေ ယူခိုင်းပြီး သူတို့လိုက်ထရပ်ကားပေါ် တက်ခိုင်းတာ။ ဘာမှပြောချိန်မရဘူး သေနတ်တွေနဲ့ချိန်ပြီး “ကိုယ်နဲ့မဆိုင်ရင် ဝင်မပါကြနဲ့” လို့ အော်ဟစ်ပြောဆိုနေတာ။ ကားပေါ်ကို ငုတ်တုပ်လေးတွေ တန်းစီလို့ ပါသွားကြတာ။ အိမ်စီးကား ပါဂျဲရို(Pajero)တွေလည်း မလွတ်ဘူး”လို့ ဖြစ်စဥ်ကို ကြုံတွေ့ ခဲ့ရတဲ့အမျိုးသမီးတဦးက မြေလတ်အသံကို ပြောပါတယ်။

စစ်ကောင်စီတပ်ဖွဲ့ဝင်တွေဟာ စစ်ကား ၁ စီး၊ လိုက်ထရပ်(Light Truck) ကား ၂ စီးနဲ့ လာရောက်ဖမ်းဆီးတာဖြစ်ပြီး စစ်ကိုင်းတံတားပေါ်တက်လာတဲ့ ခရီးသည်တင်ကား(Express)၊ အံစာတုံးကား၊ ဟွန်ဒါဖစ် (Honda Fit) ကားအသေးတွေအပါ အိမ်စီးကား အစီး ၂၀ ကျော်ကို ရပ်တန့်ခိုင်းကာ ကားပေါ်က အမျိုးသားတွေကို မှတ်ပုံတင်နဲ့တကွ ကားအောက်ဆင်းခိုင်းပြီးနောက် မှတ်ပုံတင်နဲ့တိုက်ဆိုင်စစ်ဆေးပြီး ဖမ်းဆီးတာလို့ဆိုပါတယ်။

“ကားအောက်ဆင်း မှတ်ပုံတင်လေးတွေကိုင်ပြီး တယောက်ချင်းစီ တန်းစီနေရတာ။ တယောက်ပြီးတယောက် တပွင့်ပါတဲ့ဗိုလ်ဆီကို မှတ်ပုံတင်ပြရတယ်။ အသက်အရွယ်တွက်ပြီး အသက်ပြည့်တဲ့ သူတွေကိုတော့ စစ်မှုထမ်းဖို့ ကားပေါ်တက်ခိုင်းတော့တာ။ မှတ်ပုံတင်ကတော့ ကားပေါ်ယူသွားလို့မရဘူး ထားခဲ့ရတာ။”လို့ အထက်ပါ အမျိုးသမီးက ပြောပါတယ်။

စစ်ကောင်စီတပ်ဖွဲ့ဝင်တွေက မှတ်ပုံတင်ပါအသက်ကိုတွက်ချက်ပြီး အသက် ၂၀ နဲ့ ၃၀ ကျော်အကြားအရွယ် အမျိုးသား ၃၀ ကျော်ကို ရွေးချယ်ဖမ်ဆီးသွားတာဖြစ်ကာ အသက် ၄၀ ဝန်းကျင်အရွယ် အမျိုးသားတွေကိုတော့ ဖမ်းဆီးမသွားတာကြောင့် စစ်မှုထမ်းဖမ်းဆီးခေါ်ဆောင်ခံရတာဖြစ်နိုင်တယ်လို့ ၎င်းက သုံးသပ်ပြောပါတယ်။

ဖမ်းဆီးခေါ်ဆောင်ခံရသူတွေရဲ့ မှတ်ပုံတင်တွေနဲ့ ကိုင်ဆောင်တဲ့မိုလ်ဘိုင်းဖုန်းတွေကို စစ်ကောင်စီတပ်ဖွဲ့ဝင် ၁ ဦးထံအပ်နှံခဲ့ရပြီး ဖမ်းဆီးမှု ၁ နာရီကျော်ကြာလို့ ကား ၂ စီးပေါ် လူပြည့်သွားပြီးတဲ့နောက် တံတားကိုပြန်လည်ဖြတ်သန်းခွင့်ပြုခဲ့ကာ ၎င်းတို့ စစ်ကားနဲ့ ဖမ်းဆီးထားသူတွေတင်ဆောင်ထားတဲ့ လိုက်ထရပ်ကား ၂ စီးက စစ်ကိုင်းမြို့ဘက်ကို ဦးတည်မောင်းနှင်သွားခဲ့တယ်လို့ ဆိုပါတယ်။

စစ်ကိုင်းတံတားပေါ်က စစ်ကောင်စီတပ်တွေရဲ့ အဓမ္မဖမ်းဆီးမှုကြောင့် ဇူလိုင် ၁၀ ရက်အတွက် မုံရွာ-မန္တလေးခရီးစဥ် ကားလက်မှတ်ဖြတ်ထားတဲ့ အရေးကြီးကိစ္စမရှိသူခရီးသည်အမျိုးသားတွေကို ကားဂိတ်တွေကတဆင့် ဆက်သွယ်ကာ ရက်နောက်ဆုတ်ပေးခဲ့တယ်လို့ အဝေးပြေးကားမောင်းနှင်သူတွေဆီကနေ စုံစမ်းသိရပါတယ်။

အဆိုပါ ဖမ်းဆီးမှုနဲ့ပတ်သက်ပြီး ဇူလိုင် ၁၀ ရက်မှာ မန္တလေးမြေပြင်ကင်းထောက် MDY Revolution အဖွဲ့ကလည်း သတင်းထုတ်ပြန်ထားတာကို တွေ့ရှိရပါတယ်။

စာတည်း – ဟိန်းစံ၊ တည်းဖြတ် – HP

၁ နှစ် အကြာက 0 comments 38 views

သတင်း

စစ်သင်္ဘောအုပ်စုကိုရှောင်မောင်းရာက ကုန်တင်သင်္ဘောမှောက်ပြီး လူ ၄ ဦးပျောက်ဆုံးနေ

by ကျော်ကြီး ၁ နှစ် အကြာက

written by ကျော်ကြီး

မြင်းမူ၊ ဇူလိုင် ၁၂၊ ၂၀၂၅။

စစ်ကိုင်းတိုင်း၊ မြင်းမူမြို့နယ်၊ လက္ကပင်ကျေးရွာအနီး ဧရာဝတီမြစ်အတွင်းမှာ ကုန်တင်သင်္ဘော ၁ စီးတိမ်းမှောက်ပြီး လူ ၄ ဦးပျောက်ဆုံးနေတယ်လို့ မြင်းမူအခြေစိုက် ဒေသကာကွယ်ရေးအဖွဲ့ဝင်တွေထံက သိရပါတယ်။

အဆိုပါသင်္ဘောဟာ ဇူလိုင် ၅ ရက်က မုံရွာကနေ မန္တလေးဘက်ကို ရေကြောင်းအတိုင်းမောင်းနှင်လာတဲ့ ကုန်တင်သင်္ဘောဖြစ်ပြီး ဖြစ်စဉ်နေရာအရောက်မှာ စစ်သင်္ဘောအုပ်စုနဲ့ ထိပ်တိုက်တွေ့လို့ တိမ်းရှောင်မောင်းနှင်ရာက တိမ်းမှောက်ခဲ့တာလို့ ဆိုပါတယ်။

” စစ်သင်္ဘောလာတာ ကြောက်ပြီးတော့ ဘေးကပ်မောင်းတာ။ အဲ့နားတွေက ကျောက်ဆောင်တွေရှိတယ်။ ကျောက်ဆောင်တွေဝင်တိုက်ပြီး မှောက်တာ။ ပြည်သူသင်္ဘောပါ။ စစ်သင်္ဘောက ဆီမီးခုံဘက်ကို သွားတာ။ စစ်သင်္ဘော ၁ စီး ထောက်ပို့လှေတွေပါဆို ၁၉ စီး။ အလုံးအရင်းဆိုတော့ကြောက်ပြီး ဘေးကပ်မောင်းရင်းမှောက်တာ”လို့ မြင်းမူဒေသကာကွယ်ရေးအဖွဲ့ဝင်တဦးက မြေလတ်အသံကို ပြောပါတယ်။

တိမ်းမှောက်တဲ့သင်္ဘောဟာ “ချင်းတွင်းလတ်”အမည်ပါ ကုန်တင်သင်္ဘောဖြစ်ပြီး သင်္ဘောပေါ်မှာ စက်မောင်းနှင်သူအပါ လုပ်သား ၇ ဦး ပါဝင်ပြီး စက်သုံးဆီ၊ ဆန်၊ အခြေခံစားသောက်ကုန်တွေနဲ့ လူသုံးကုန်ပစ္စည်းတွေတင်ဆောင်လာတယ်လို့ သိရပါတယ်။

သင်္ဘောတိမ်းမှောက်မှုကြောင့် သင်္ဘောပေါ်ပါသူ ၇ ဦးစလုံး ရေနစ်မြုပ်ခဲ့ကာ အဲ့ဒီထဲက ၃ ဦးကိုသာ အသက်ရှင်လျက် ဇူလိုင် ၅ ရက်မှာ နေ့ချင်းပြန်လည်ကယ်ဆယ်ရရှိခဲ့ပေမယ့် ၄ ဦးကတော့ ဒီကနေ့ ဇူလိုင် ၁၂ ရက်အထိ ပျောက်ဆုံးနေဆဲဖြစ်တယ်လို့ သိရပါတယ်။

တိမ်းမှောက်သွားတဲ့ သင်္ဘောပေါ်ပါကုန်ပစ္စည်းတွေထဲက အလွယ်တကူသယ်ယူလို့ရတဲ့ ပစ္စည်းတွေကို အနီးအနားနေပြည်သူတွေက ဝိုင်းဝန်းဆယ်ယူပေးခဲ့ကြပြီး သင်္ဘောအောက်ပိနေတဲ့ ပစ္စည်းတွေကိုတော့ ထုတ်ယူလို့မရသေးပါဘူး။

ဒါ့အပြင် တိမ်းမှောက်နေတဲ့သင်္ဘောကိုလည်း ဇူလိုင် ၁၂ ရက်အထိ ပြန်လှန်မဆယ်ယူနိုင်သေးဘဲ တိမ်းမှောက်တဲ့နေရာအနီးဝန်းကျင်မှာပဲ ကြိုးတွေနဲ့ဆွဲထားပြီး မျောပါမသွားအောင်ထိန်းထားရတယ်လို့ သိရပါတယ်။

စာတည်း – ဟိန်းစံ

၁ နှစ် အကြာက 0 comments 104 views

သတင်း

စစ်ကိုင်းတံတားပေါ်တက်လာတဲ့ ခရီးသွားနဲ့အိမ်စီးကားတွေပေါ်က လူငယ်အမျိုးသား ၃၀ ကျော်ကို စစ်တပ်ပေါ်တာဆွဲ

by ခေတ်သဒ္ဒါ ၁ နှစ် အကြာက

written by ခေတ်သဒ္ဒါ

စစ်ကိုင်း၊ ဇူလိုင် ၁၂၊ ၂၀၂၅။

” ကျမတို့ကားပေါ်က ယောက်ျားလေး ၄ ယောက်ပါသွားတယ်။ မှတ်ပုံတင်၊ ပိုက်ဆံအိတ်နဲ့ အင်္ကျီအဝတ်အစားထုပ်တွေ ယူခိုင်းပြီး သူတို့လိုက်ထရပ်ကားပေါ် တက်ခိုင်းတာ။ ဘာမှပြောချိန်မရဘူး သေနတ်တွေနဲ့ချိန်ပြီး “ကိုယ်နဲ့မဆိုင်ရင် ဝင်မပါကြနဲ့” လို့ အော်ဟစ်ပြောဆိုနေတာ။ ကားပေါ်ကို ငုတ်တုပ်လေးတွေ တန်းစီလို့ ပါသွားကြတာ။ အိမ်စီးကား ပါဂျဲရို(Pajero)တွေလည်း မလွတ်ဘူး”လို့ ဖြစ်စဥ်ကို ကြုံတွေ့ ခဲ့ရတဲ့အမျိုးသမီးတဦးက မြေလတ်အသံကို ပြောပါတယ်။

“ကားအောက်ဆင်း မှတ်ပုံတင်လေးတွေကိုင်ပြီး တယောက်ချင်းစီ တန်းစီနေရတာ။ တယောက်ပြီးတယောက် တပွင့်ပါတဲ့ဗိုလ်ဆီကို မှတ်ပုံတင်ပြရတယ်။ အသက်အရွယ်တွက်ပြီး အသက်ပြည့်တဲ့ သူတွေကိုတော့ စစ်မှုထမ်းဖို့ ကားပေါ်တက်ခိုင်းတော့တာ။ မှတ်ပုံတင်ကတော့ ကားပေါ်ယူသွားလို့မရဘူး ထားခဲ့ရတာ။”လို့ အထက်ပါ အမျိုးသမီးက ပြောပါတယ်။

စာတည်း – ဟိန်းစံ

၁ နှစ် အကြာက 0 comments 139 views

တိုက်ပွဲ သတင်း

ရွှေဘိုက စစ်တပ်စခန်း ၄ ခုကိုသိမ်းပိုက်နိုင်မှု နှစ်ဖက်သေဆုံးများကာ ခမရ ၁၂ ဒုတပ်ရင်းမှူးကို အရှင်ဖမ်းမိ

by ကျော်ကြီး ၁ နှစ် အကြာက

written by ကျော်ကြီး

ရွှေဘို၊ ဇူလိုင် ၁၁၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်အတွင်းက စစ်ကောင်စီတပ်နဲ့ပျူစောထီးပူးပေါင်းအထိုင်စခန်း ၄ ခုကို သိမ်းပိုက်ခဲ့တဲ့ တိုက်ပွဲတွေအတွင်း ဒုတပ်ရင်းမှူး ၁ ဦးအရှင်ဖမ်းမိကာ လက်နက်၊ ခဲယမ်းအများအပြားသိမ်းယူနိုင်ခဲ့တယ်လို့ တော်လှန်ရေးတပ်ဖွဲ့တွေဆီက သိရပါတယ်။

ဇူလိုင် ၄ ရက် မနက် ၅ နာရီခန့်ကစတင်ကာ စခန်း ၃ ခုပေါင်း အင်အား ၁၄၀ ခန့်ရှိတဲ့ ဟင်္သာကြီးကျေးရွာရှိ စစ်တပ်စခန်းကုန်း၊ ဘိုးနတ်တောင်စခန်းကုန်းနဲ့ တောင်လှစခန်းကုန်းတွေကို ဒေသကာကွယ်ရေးပူးပေါင်းတပ်တွေဘက်က တပြိုင်နက်ဝင်ရောက်တိုက်ခိုက်ခဲ့တာလို့ ဆိုပါတယ်။

” (ဟင်္သာကြီး)ရွာထဲရောက်မှ သူပစ်ကိုယ်ပစ်ကျတာ။ စခန်း ၃ ခုလုံးကိုအဖွဲ့တွေ ခွဲခွဲပြီး တပြိုင်နက်တည်းဝင်လုံးတာ။ * *တွေဘက်ကဆို သေဆုံးများတယ်။ အချို့အလောင်းဆို နေရာဝင်ထိုင်ရတော့ ပုပ်စော်နံမှာစိုးလို့တခါတည်းရှင်းရတာ”လို့ ရွှေဘိုခရိုင်တပ်ရင်း ၂၃ IO(ထောက်လှမ်းရေး) အမျိုးသမီးက မြေ လတ်အသံကို ပြောပါတယ်။

စစ်ကောင်စီစခန်း ၃ ခုအနက် ဟင်္သာကြီးနဲ့ ဘိုးနတ်တောင်စခန်းကုန်းတို့ကို ညနေ ၃ လောက်မှာ သိမ်းဆည်းနိုင်ခဲ့ပြီး တောင်လှစခန်းကုန်းကိုတော့ ဇူလိုင် ၅ ရက်မနက်ပိုင်းမှာ သိမ်းပိုက်နိုင်ခဲ့တယ်လို့ ဆိုပါတယ်။

အထက်ပါစခန်း ၃ ခုကနေ ဆုတ်ခွာထွက်ပြေးသွားတဲ့ စစ်ကောင်စီတပ်ဖွဲ့တွေဟာ ဘိုးထွန်းကျော် ဗျူဟာစခန်းကုန်းမှာ သွားရောက်ပူးပေါင်းခဲ့တာကြောင့် ၎င်းစခန်းကုန်းကိုဆက်လက်တိုက်ခိုက်ခဲ့ရာ ဇူလိုင် ၇ ရက်မှာ ထပ်မံသိမ်းပိုက်နိုင်ခဲ့တယ်လို့ သိရပါတယ်။

ဒါ့အပြင် စစ်ကောင်စီတပ်ဖွဲ့တွေရဲ့ စခန်းတွေပတ်လည်မှာ မိုင်းအလုံး ၃၀၀ ကျော်ထောင်ထားပြီး ဗန်ကာတွေနဲ့ အခိုင်အမာတပ်စွဲထားတာကြောင့် တော်လှန်ရေးတပ်ဖွဲ့ဝင်တွေအနေနဲ့ အနီးကပ်ရင်ဆိုင် တိုက်ခိုက်ခဲ့ရတယ်လို့ ဆိုပါတယ်။

ရွှေဘိုခရိုင် ၉၇၀၆ တပ်ရင်းက ရှေ့တန်းတပ်ဖွဲ့ဝင် ၁ ဦးက”ကျည်ပေါက်တာအရမ်းများတယ်။ ဖိုက်တာနဲ့လည်း လာကြဲတယ်။ ကျနော်တို့ရဲဘော်တွေအကုန်လုံး အသေခံဝင်လုံးပြီးအရတိုက်ခဲ့ရတာ”လို့ ပြောပါတယ်။

အဆိုပါ တိုက်ပွဲတွေအတွင်း စစ်ကောင်စီဘက်က ၉ ဦးသေဆုံးခဲ့ကာ ဟင်္သာကြီးကျေးရွာထဲကနေ ကျောက်မြောင်းအခြေစိုက် ခမရ ၁၂ ဒုတပ်ရင်းမှူး ဗိုလ်မှူး ချမ်းလွင်မောင်ကို ဒဏ်ရာရလျက် အရှင်ဖမ်းမိခဲ့ပြီး သိမ်းဆည်းရမိတဲ့ စစ်ကောင်စီတပ်ဖွဲ့ဝင်တွေရဲ့ လက်နက်တွေဟာ များပြားတာကြောင့် အရေအတွက်စိစစ်ဆဲဖြစ်တယ်လို့ ဆိုပါတယ်။

လက်ရှိမှာ တိုက်ပွဲဖြစ်ပွားရာနေရာတွေကို စစ်ဆင်ရေးနယ်မြေအဖြစ်သတ်မှတ်ကာ မိုင်းရှင်းလင်းရေးနဲ့ နယ်မြေရှင်းလင်းရေး လုပ်ငန်းတွေလုပ်နေပြီး ဒေသကာကွယ်ရေးပူးပေါင်းတပ်ဖွဲ့ဝင်တွေဘက်ကလည်း ထိခိုက်ဒဏ်ရာရသူ ၇ ဦးထက်မနည်းရှိခဲ့ပြီး ရွေဘိုခရိုင် အမှတ် ၂၃ တပ်ရင်းက တပ်ဖွဲ့ဝင် ၄ ဦးဖြစ်တဲ့ ပိုင်ဇေ၊ သူရိန်၊ ရောင်နီ၊ အေစီတို့ တိုက်ပွဲကျသေဆုံးခဲ့တယ်လို့ သိရပါတယ်။

ဒီဗျူဟာကုန်းတွေဟာ စကျောက်မြောင်းအခြေစိုက် ခမရ ၁၂ တပ် စစ်ကောင်စီတပ်နဲ့ ပျူစောထီးတွေရှိတဲ့ မခေါက်ကျေးရွာတွေအနီးမှာရှိပြီး စစ်တပ်အားထားရတဲ့ ပျူစောထီးကျေးရွာနဲ့ ဗျူဟာကုန်းတွေဖြစ်ပါတယ်။

တိုက်ခိုက်မှုကိုတော့ ရွှေဘိုခရိုင်တပ်ရင်း ၁၅၊ ၁၈၊ ၂၃၊ ၂၆၊ ၁၇၀၁၊ ၉၇၀၆ တပ်ရင်းတွေနဲ့ Brave Brothers (Local PDF)၊ တိုက်နယ်(၄) ရွှေဘိုကျားကြီး(ပကဖ)တို့ စုပေါင်းတိုက်ခိုက်ခဲ့တယ်လို့ သိရပါတယ်။

စာတည်း – မြတ်

၁ နှစ် အကြာက 0 comments 93 views

Newer Posts

Older Posts

30 October 2026 3:03 AM

စစ်ကိုင်း

စစ်တပ်ကျောင်းကားကို လုံခြုံရေးစောင့်ပေးပြီးပြန်လာတဲ့စစ်ကောင်စီတပ်ဖွဲ့ တိုက်ခိုက်ခံရလို့ ၄ ဦးသေ

■ သတင်းအမှားပျံ့နှံ့မှု ■

■ သတင်းမှားဖြစ်ကြောင်း စိစစ်ဖော်ပြချက် ■

■ သတင်းအမှားဖြန့်ဝေနေတဲ့ အကောင့်များအား စိစစ်ချက် ■

■ သုံးသပ်ချက် ■

တန့်ဆည်ဒေသခံတွေကို လေကြောင်းအန္တရာယ်အသိပညာပေး

လူအစုလိုက်အပြုံလိုက် သေဆုံးခဲ့တဲ့ လင်းတလူးရွာဗုံးကြဲမှုဖြစ်စဉ် (အင်တာဗျူး)

မြင်းမူနဲ့ ချောင်းဦးမှာ စစ်ကောင်စီတပ်တွေတိုက်ခိုက်ခံရလို့ သေဆုံးသူများဟုဆို

စစ်သင်္ဘောအုပ်စုကိုရှောင်မောင်းရာက ကုန်တင်သင်္ဘောမှောက်ပြီး လူ ၄ ဦးပျောက်ဆုံးနေ

စစ်ကိုင်းတံတားပေါ်တက်လာတဲ့ ခရီးသွားနဲ့အိမ်စီးကားတွေပေါ်က လူငယ်အမျိုးသား ၃၀ ကျော်ကို စစ်တပ်ပေါ်တာဆွဲ

ရွှေဘိုက စစ်တပ်စခန်း ၄ ခုကိုသိမ်းပိုက်နိုင်မှု နှစ်ဖက်သေဆုံးများကာ ခမရ ၁၂ ဒုတပ်ရင်းမှူးကို အရှင်ဖမ်းမိ

MYAELATT

ATHAN

သတင်း

ဆောင်းပါး

အထူးကဏ္ဍ