စစ်သင်္ဘော ၁ စီးနဲ့ မော်တော် ၄ စီးမီးလောင်ပြီး စစ်ကောင်စီတပ်ဖွဲ့ဝင် ၅ ဦးသေဆုံး

မြေလတ်အသံ၊ ဇူလိုင် ၃၁၊ ၂၀၂၅။

စစ်ကိုင်းတိုင်း၊ မော်လိုက်ခရိုင်က မော်လိုက်နဲ့ ဖောင်းပြင်မြို့နယ်တို့မှာ ငမန်းစစ်ဆင်ရေးအဖြစ် စစ်သင်္ဘောနဲ့ စစ်လက်နက်ရိက္ခာတင်မော်တော်ကြီး စုစုပေါင်း ၂၀ ကျော်ကို ၃ ရက်ဆက်တိုက်ခိုက်ခဲ့တာကြောင့် ထိခိုက်သေဆုံးသူရှိပြီး သင်္ဘောနဲ့မော်တော်တွေလည်းမီးလောင်ခဲ့တယ်လို့ ဇူလိုင် ၃၁ ရက်မှာ မော်လိုက်ခရိုင် အမှတ် ၃ တပ်ရင်းက ထုတ်ပြန်ပါတယ်။

မုံရွာမြို့ကနေ ချင်းတွင်းမြစ်အတိုင်းထွက်ခွာလာတဲ့ စစ်ရေယာဥ် ၂၈ စီးအနက် ၂၃ စီးဟာ ဇူလိုင် ၂၅ ရက်မှာ ဖောင်းပြင်မြို့နယ်အပိုင်ကို ဝင်ရောက်လာချိန်မှာ ပထမအကြိမ်၊ ဖောင်းပြင်ကနေ မော်လိုက် မြို့နယ်ထဲကိုအသွား ဇူလိုင် ၂၆ ရက်မှာ ဒုတိယအကြိမ်နဲ့ ၂၈ ရက်မှာ ဖောင်းပြင်မြို့ နယ်ကနေ ဟုမ္မလင်းမြို့နယ်ကိုအထွက်မှာ တတိယအကြိမ်တိုက်ခိုက်ခဲ့တာလို့ဆိုပါတယ်။

“မုံရွာဘက်ကနေထွက်လာတာပါ။ ၂၈ စီးထွက်လာတာ၊ ဒီဘက်ကိုက ၂၃ စီးရောက်လာပါတယ်။ ဖောင်းပြင်မြို့ရောက်မှ ပြန်ပြင်ပြီးအထက်ကိုပြန်ဆန်ပါတယ်။ စကစတွေ သေဆုံးတာနဲ့ ဒဏ်ရာရတာက ၂၅ ရက်နဲ့ ၂၆ ရက်နေ့တွေ ပစ်ခတ်မှုအတွင်းမှာပါ။ ၂၈ ရက်နေ့မှာ နောက်ဆုံးပစ်တဲ့ဟာက သင်္ဘောမီးလောင်တာပဲ မြင်တွေ့ရပြီး စကစသေဆုံးမှုကိုသတင်းလိုက်နေဆဲပါ”လို့ ငမန်းစစ်ဆင်ရေးထဲမှ တာဝန်ရှိသူတစ်ဦးကပြောပါတယ်။

စစ်ကောင်စီတပ်ဖွဲ့ဝင် ၅ ဦးသေဆုံးတာနဲ့ ဒဏ်ရာရရှိတာကို တပ်တွင်းသတင်းရင်းမြစ်၊ စနိုက်ပါသမားတွေရဲ့ ပစ်ခတ်မှုမြင်ကွင်းနဲ့ ထောက်လှမ်းရေးသတင်းရယူမှုတို့ကနေ အတည်ပြုခဲ့တာဖြစ်ပြီး သေဆုံး၊ ဒဏ်ရာရသူတွေဟာ သင်္ဘောပေါ်ပါလာတဲ့ စစ်ကောင်စီတပ်သားတွေဖြစ်တယ်လို့ အထက်ပါတာဝန်ရှိသူကဆိုပါတယ်။

တိုက်ခိုက်မှု ၃ ကြိမ်အတွင်းမှာ စစ်ကောင်စီဘက်ကလည်း ၁၂၂ စက်အမြောက်ကြီးတွေနဲ့ ပြန်လည် ပစ်ခတ်ခဲ့တဲ့အပြင် တိုက်ခိုက်ရေးလေယာဥ် ၁ စီး၊ ၄၀ မမအတွဲလိုက် စက်သေနတ်တွေနဲ့ပါ ပစ်ခတ်ခဲ့ပေမယ့် တော်လှန်ရေးတပ်တွေဘက်ကထိခိုက်မှုမရှိခဲ့ဘူးလို့ အထက်ပါတာဝန်ရှိသူက ပြောပါတယ်။

ဒီတိုက်ခိုက်မှုကို မော်လိုက်ခရိုင်ကွပ်ကဲရေးရုံးတပ်ဖွဲ့၊ ခရိုင်တပ်ရင်း( ၁)(၂)(၃)(၄)၊ မော်လိုက်မြို့နယ် ပကဖ၊ ဖောင်းပြင်မြို့နယ်ပကဖ၊ စစ်ဒေသလက်ရုံးတပ်တွေ၊ ခန္တီးခရိုင်လက်နက်ကြီးအဖွဲ့၊ ကသာခရိုင်- တပ်ရင်း(၂)လက်နက်ကြီးအဖွဲ့တို့က ပူး ပေါင်းလုပ်ဆောင်ခဲ့တာဖြစ်ပါတယ်။

တိုက်ခိုက်ခံရပြီးနောက် အဆိုပါစစ်ရေယာဥ်တန်းဟာ ဖောင်းပြင်ကနေတဆင့် ဟုမ္မလင်းမြို့နယ်ကို ဇူလိုင် ၂၈ ရက်လယ်မှာရောက်ရှိခဲ့ပြီး အဲ့ဒီကနေတဆင့် ခန္တီးမြို့နယ် အထိ ဆက်လက်သွားမှာလို့ သိရှိရကြောင်း အထက်ပါတာဝန်ရှိသူကဆိုပါတယ်။

စာတည်း – လင်း

မြတ်၊ ခေတ်သဒ္ဒါ

တိုက်ခိုက်တဲ့နေရာကို လေယာဥ်နဲ့ဗုံးလာကြဲလို့ ကသာဒေသခံ ၁ ဦး သေဆုံး

ကသာ၊ ဇူလိုင် ၂၇၊ ၂၀၂၅။

ဧရာဝတီမြစ်ကြောင်းအတိုင်း ဆက်လက်ဆန်တက်လာတဲ့ စစ်သင်္ဘောအုပ်စုကို စစ်ကိုင်းတိုင်း၊ ကသာမြို့နယ်အတွင်းမှာ တိုက်ခိုက်ခဲ့တယ်လို့ ဒေသတွင်းတော်လှန်ရေးတပ်ဖွဲ့ဝင်တွေဆီက သိရပါတယ်။

ဇူလိုင် ၂၆ ရက် ယမန်နေ့ မနက်ပိုင်းက ကသာမြို့ဆိပ်ကမ်းကနေ ထွက်ခွာသွားတဲ့ စစ်သင်္ဘော ၁၂ စီးကို မိုးတားလေးကျေးရွာအနီးအရောက်မှာ တိုက်ခိုက်ခဲ့တာလို့ ဆိုပါတယ်။

” ၁၂ စီးဆန်တက်လာတဲ့အချိန် စောင့်ကြိုတိုက်ခိုက်ခဲ့ကြတာ။ ၁ စီးကတော့ မီးခိုးတွေအူထပြီး ထိခိုက်ပျက်စီးသွားတယ်။ စစ်** ထိခိုက် အသေအပျောက်ကိုတော့ ကျနော့်အနေနဲ့ အတည်မပြုနိုင်သေးဘူး။ သင်္ဘောပေါ်ကနေလည်း လက်နက်ကြီးတွေနဲ့ ဆက်တိုက်ကို ပစ်ခတ်ခဲ့တာ”လို့ တိုက်ခိုက်မှုမှာ ပါဝင်ခဲ့တဲ့ တော်လှန်ရေးတပ်ဖွဲ့ဝင်တဦးက မြေ လတ်အသံကို ပြောပါတယ်။

အဲ့ဒီစစ်သင်္ဘောတွေဟာ သပိတ်ကျင်းမြို့ကို ဖြတ်သန်းစဥ်မှာလည်း တိုက်ခိုက်ခံခဲ့ရတာဖြစ်ပြီး စစ်သင်္ဘော ၅ စီးပါတဲ့ ရေယာဥ် ၁၄ စီးအုပ်စုကို သလဲချောင်းကျေးရွာအနီး တိုက်ခိုက်ခဲ့တာကြောင့် ၁ စီးနစ်မြှုပ်သွားခဲ့ပြီး ၃ စီးထိခိုက်ပျက်စီးခဲ့ကြောင်း MDY-PDF က ဇူလိုင် ၂၂ ရက် မှာ သတင်းထုတ်ပြန်ခဲ့သလို တိုက်ခိုက်ခံရမှုကြောင့် သင်္ဘောပေါ်ပါ စစ်ကောင်စီတပ်ဖွဲ့ဝင် ၁၀ ဦး ထက်မနည်း သေဆုံးခဲ့တယ်လို့ စစ်ကောင်စီတပ်နဲ့နီးစပ်တဲ့သတင်းရင်းမြစ်တွေကလည်း အတည်ပြု ပြောပါတယ်။

” လက်နက်ကြီးတွေကျလာတာလေ။ သင်္ဘောတွေ အကုန်လုံးပေါ်ကထိကြတာများတယ်။ ပါလာတဲ့အထဲ သင်္ဘောတစီးပေါ်မှာပဲဆရာဝန်ပါတော့အကျဆုံးက တအားများတယ်”လို့ သပိတ်ကျင်းမြို့ကို စစ်ရေးကွပ်ကဲနေတဲ့ အလယ်ပိုင်းတိုင်းစစ်ဌာနချုပ်နဲ့နီးစပ်သူတဦးက ပြောပါတယ်။

ထိခိုက်သေဆုံးမှုများပြားတာကြောင့် သပိတ်ကျင်းမြို့မှာ ကမ်းကပ်ရပ်နားပြီး စစ်သင်္ဘောပေါ်ပါ အရေးကြီးလူနာနဲ့ အလောင်းတွေကို သပိတ်ကျင်းအခြေစိုက် အမှတ် ၁၃ တပ်မတော်တန်းမြင့်လေ့ကျင့်ရေးကျောင်း(တကက ၁၃)ထဲကို ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌သယ်ဆောင်သွားတယ်လို့ သိရပါတယ်။

စစ်သင်္ဘောအုပ်စုတွေဟာ ဇူလိုင် ၁၇ ရက်က မန္တလေးမြို့၊ ဂေါဝိန်ဆိပ်ကမ်းကနေ စတင်ထွက်ခွာလာတာဖြစ်ပြီး သပိတ်ကျင်းမှာ တိုက်ခိုက်ခံရပြီးနောက် လက်ကျန် စစ်သင်္ဘောတွေဟာ ဇူလိုင် ၂၂ ရက်မှာ ဂေါဝန်ဆိပ်ကမ်းကနေပဲ ထပ်မံဆန်တက်လာတဲ့ စစ်သင်္ဘော ၆ စီးအုပ်စုနဲ့ သပိတ်ကျင်းအထက် ပန်းပင်ရွာအနီးမှာ ပူးပေါင်းသွားခဲ့ပြီး ကသာမြို့ကို ဆက်လက်ဆန်တက်လာတာပါ။

အဲဒီစစ်သင်္ဘောတွေပေါ် လူ၊ လက်နက်၊ ခဲယမ်းနဲ့ ဆေးဝါးရိက္ခာတွေတင်ဆောင်လာတာဖြစ်ပြီး စစ်ရေး ပြင်းထန်နေတဲ့ ကချင်ပြည်နယ်၊ ဗန်းမော်မြို့ကို အင်အားဖြည့်တင်းနိုင်ဖို့ မြစ်ကြောင်းအတိုင်း ဆန်တက် လာတာဖြစ်ကာ စစ်သင်္ဘောအုပ်စုဟာ ဒီကနေ့မနက်ပိုင်းမှာ ရွှေကူမြို့နယ်အတွင်းရောက်ရှိနေပြီလို့ သိရပါတယ်။

ကသာမြို့နယ်အတွင်း စစ်သင်္ဘောတွေတိုက်ခိုက်ခံရတဲ့နေရာကို ယမန်နေ့ နေ့လယ် ၁၁ နာရီခွဲမှာ Y 12 လေယာဥ် ၁ ကြိမ်၊ နေ့လည် ၁၂ နာရီခွဲမှာ ဂျက်ဖိုက်တာနဲ့ ၁ ကြိမ် ဗုံးအလုံးရေ ၂၀ ကျော် ကြဲချ တိုက်ခိုက်ခဲ့လို့ အရပ်သား ၁ ဦးသေဆုံးကာ ၄ ဦးဒဏ်ရာရရှိခဲ့တယ်လို့ သိရပါတယ်။

” သင်္ဘောတွေကို လေကြောင်းကနေ လုံခြုံရေးယူပေးသလိုနဲ့ ဗုံးကြဲချတာပေါ့။ မိုးတားလေးရွာနဲ့ မြေနုရွာကြားကို အရင်ကြဲတယ်။ အကြိမ်ရေ ၂၀ ကျော်ကို ကြဲချခဲ့တာ” လို့ ကသာမြို့နယ်မှာလှုပ်ရှားနေတဲ့ အထက်ပါရဲဘော်က ပြောပါတယ်။

ဗုံးကြဲတိုက်ခိုက်ခံရတာကြောင့် မြေနုကျေးရွာကအမျိုးသား ၁ ဦးသေဆုံးခဲ့ပြီး မြေနုနဲ့နလယ်အင်းကျေးရွာက ဒေသခံအမျိုးသား ၄ ဦး ဒဏ်ရာရခဲ့ကာ မိုးတားလေးကျေးရွာ ဘုရားကုန်းရှိ သာသနာ့အဆောက်အဦတွေလည်း ထိခိုက်ပျက်စီးခဲ့တယ်လို့ သိရပါတယ်။

စစ်သင်္ဘောတွေဆန်တက်တဲ့ မြစ်ကြောင်းတလျှောက် မြစ်ကမ်းနံဘေးရွာတွေကို စစ်ကောင်စီတပ်ကလေကြောင်းကနေဗုံးကြဲတိုက်ခိုက်နေပြီး ဝက်လက်မြို့နယ်အတွင်းရောက်ရှိစဥ်ကလည်း ဧရာဝတီမြစ်ကမ်းနံဘေးက ရွာတွေကို လေယာဥ်နဲ့ ဗုံးကြဲတိုက်ခိုက်လို့ ပြည်သူ ၂၁ ဦး သေဆုံးခဲ့ပါသေးတယ်။

စာတည်း – ဟိန်းစံ