ချမ်းအေးသာစံ

မန္တလေး၊ ဇန်နဝါရီ ၁၅၊ ၂၀၂၆။

မန္တလေးတိုင်း ၊ချမ်းအေးသာစံမြို့နယ်၊ အောင်နန်းရိပ်သာအရှေ့ရပ်ကွက်မှာ မီးလောင်မှုဖြစ်လို့ နေအိမ် ၇ လုံးမီးလောင်ပျက်စီးခဲ့တယ်လို့ ကူညီဆောင်ရွက်ပေးခဲ့သူတွေထံက သိရပါတယ်။

ဇန်နဝါရီ ၁၄ရက် ယမန်နေ့ညနေ ၅ နာရီကျော်မှာ အောင်နန်းရိပ်သာရပ်ကွက် ၃၄ ×၃၅ လမ်းကြား၊ ၈၂×၈၃ လမ်းကြားရှိ ဦးလှသိန်းဆိုသူနေအိမ်ကနေ မီးစတင်လောင်ခဲ့တာဖြစ်ပြီး အနီးအနားနေအိမ်တွေကိုပါ မီးကူးစက်လောင်ကျွမ်းခဲ့တာလို့ ဆိုပါတယ်။

” ထမင်းပေါင်းအိုးနဲ့ ထမင်းတည်ထားရာကနေ ဝါယာရှော့ဖြစ်ပြီး မီးစလောင်တာ။ အိမ်ရှင်တွေအိမ်မှာရှိပေမယ့် မီးမငြှိမ်းနိုင်လို့ ဘေးအိမ်တွေပါကူးကုန်တာ။”လို့ မီးငြှိမ်းသတ်ရာမှာကူညီပေးခဲ့သူတဦးက မြေလတ်အသံကို ပြောပါတယ်။

မီးလောင်မှုကြောင့် ဦးလှသိန်းနေအိမ်အပါအဝင် အနီးဝန်းကျင် နေအိမ် ၇ လုံးမီးလောင်ပျက်စီးခဲ့ပြီး လူထိခိုက်တာတော့မရှိခဲ့ပေမယ့် နေအိမ်တွေပျက်စီးမှုကြောင့် ပြည်သူ ၄၀ ခန့် မီးဘေးသင့်ခဲ့ရတယ်လို့ သိရပါတယ်။

မန္တလေးမီးသတ်တွေနဲ့ အခြေစိုက်လူမှုကူညီရေးအသင်းတွေ ဝိုင်းဝန်းမီးငြှိမ်းသတ်ခဲ့လို့ မီးလောင်ပြီးတနာရီကျော်အကြာမှာ မီးငြှိမ်းသတ်နိုင်ခဲ့တယ်လို့ သိရပါတယ်။

နိုဝင်ဘာ ၂၈ ရက်ကလည်း အမရပူရမြို့နယ်၊ ဘုံအိုးကျေးရွာရှိ နေအိမ် ၁ လုံးက ဆိတ်ခြံမှာ ခြင်ဆေးထွန်းထားရမှ မီးလောင်မှုဖြစ်လို့နေအိမ် ၈ လုံးမီး လောင်ပျက်စီးမှု ဖြစ်ပွားခဲ့ပါသေးတယ်။

မန္တလေး၊ ဇွန် ၇၊ ၂၀၂၅။

မန္တလေးတိုင်း၊ ချမ်းအေးသာစံမြို့နယ်၊ ပြည်ကြီးပျော်ဘွယ်အနောက်ရပ်ကွက်၊ ၈၇ လမ်း၊ ၃၃ လမ်းနဲ့ ၃၄ လမ်းကြားက လူစည်ကားရာနေရာမှာ အမျိုးသမီး ၁ ဦး ဓားနဲ့ခုတ်၊ ငွေလုခံရတယ်လို့ ဒေသခံတွေဆီက သိရပါတယ်။

ဇွန် ၆ ရက်နေ့လယ် ၁ နာရီခန့်မှာ စစ်ကိုင်းမြို့နေ့ အသက် ၂၃ နှစ်အရွယ်အမျိုးသမီးဟာ ဖြစ်စဥ်နေရာ အနီးက ငွေလွှဲဆိုင်တဆိုင်ကနေ ငွေထုတ်ပြီးအပြန်မှာ လုယက်ခံရတာလို့ ဆိုပါတယ်။

“သူက ငွေလွှဲဆိုင်ကနေ ထွက်လာတာကို ဓားနဲ့ခုတ်တာ။ ကောင်မလေးလက်မောင်းကတော့ ထုတ်ချင်းပေါက်သွားတယ်။ တရားခံကမမိသေးဘူး။ ဓားနဲ့ခုတ်သွားတဲ့သူတွေက ဘယ်နှစ်ဦးလည်းဆိုတာတော့ မသိရသေးဘူး”လို့ ဒေသခံတဦးကပြောပါတယ်။

ဓားနဲ့ခုတ်ခံရသူ အမျိုးသမီးငယ်မှာ စိုးရိမ်ရတာကြောင့် မန္တလေးပြည်သူ့ဆေးရုံကို ဒေသလူမှုကူညီရေး အသင်းတွေက ပို့ဆောင်ပေးထားရပြီး လုယက်ခံရလို့ ငွေကျပ် သိန်း ၃၀ ပါသွားတယ်လို့ ဆိုပါတယ်။

ဇွန် ၇ ရက်ထိ ဓားနဲ့ခုတ်ခံရတဲ့ အမျိုးသမီးငယ်က ဆေးရုံမဆင်းရသေးဘဲ ဆေးကုသမှု ဆက်လက်ခံယူနေရပေမယ့် အသက်အန္တရာယ်ကတော့မစိုးရိမ်ရတော့ဘူးလို့ သိရပါတယ်။

ဓားခုတ်မှုဖြစ်တဲ့နေရာက ငွေလွှဲဆိုင်ရဲ့ မျက်စောင်းထိုးလောက်အနေထားသာရှိပြီး လူသွားလူလာ အမြဲတမ်းရှိနေတဲ့လမ်းဖြစ်ကာ လုယက်သူကိုလည်းမဖမ်းမိသေးဘူးလို့ ဒေသခံကပြောပါတယ်။

ဧပြီ ၂၈ ရက်ကလည်း ချမ်းမြသာစည်မြို့နယ်၊ အောင်ပင်လယ်ရပ်ကွက်၊ ၁၀၃×၁၀၄ လမ်းကြား၊ ၅၅ လမ်းပေါ်ရှိ “ရွှေဇာမဏီ”ရွှေဆိုင်ဓါးပြတိုက်ခံရပြီး ရွှေ ၂၀ ကျပ်သားကျော်ပါသွားတယ်လို့ သိရပါတယ်။

စာတည်း – လင်း

မန္တလေး ၊ဇန်နဝါရီ ၁၇၊ ၂၀၂၅။

မန္တလေးတိုင်း၊ ချမ်းအေးသာစံမြို့နယ်၊ ကဉ္စနမဟီရပ်ကွက် ၇၇ လမ်း၊ ၃၃ လမ်းနဲ့ ၃၄ လမ်းကြားရှိ Diamond Plaza တတိယထပ်ပေါ်ကနေ ပန်းရံလုပ်သားအမျိုးသမီးတဦး ပြုတ်ကျသေဆုံးခဲ့တယ်လို့ ဒေသခံတွေဆီက သိရပါတယ်။

သေဆုံးသူဟာ အသက် ၅၂ နှစ်အရွယ် ဒေါ်ဝင်းမြိုင်ဖြစ်ပြီး ဇန်နဝါရီ ၁၆ ရက် ညနေ ၃ နာရီကျော်မှာ အလုပ်လုပ်နေရင်း ပြုတ်ကျခဲ့တာလို့ဆိုပါတယ်။

“အလုပ်လုပ်နေရင်း ပြုတ်ကျတာ။ ကြမ်းခင်းချော်ပြီး ပြုတ်ကျတာမျိုး။ သူက ပန်းရံအလုပ်သမားပါ။ သူနေတာက မီးရထားဝန်းလိုင်းခန်းမှာ ငှားနေကြတာ။”လို့ ဒေသခံတဦးက ပြောပါတယ်။

Diamond Plaza တတိယထပ်ဟာ ပျက်စီးမှုရှိနေတာကြောင့် ပြန်လည်ပြင်ဆင်မှုတွေ လုပ်ဆောင်နေတာလို့ သိရပါတယ်။

ဒေါ်ဝင်းမြိုင်ပြုတ်ကျချိန် အဆောက်အဦအောက်မှာရှိတဲ့ အုတ်လှေခါးနဲ့ ဦးခေါင်းကိုရိုက်မိတာကြောင့် နေရာမှာတင် ဦးခေါင်းကွဲဒဏ်ရာနဲ့ သေဆုံးခဲ့တာလို့ ဆိုပါတယ်။

အလောင်းကိုတော့ ဒေသခံလူမှုကူညီရေးအသင်းတွေက မန္တလေးပြည်သူ့ဆေးရုံကြီးက ရင်ခွဲရုံကို ပို့ဆောင်ထားတယ်လို့ ဒေသခံတဦးက ပြောပါတယ်။

ဒေါ်ဝင်းမြိုင်မှာ အမျိုးသားဖြစ်သူလည်း ဆုံးပါးထားပြီး အသက် ၂၀ အရွယ်သမီး ၁ ဦး၊ အသက် ၁၀ နှစ်အရွယ်သား ၁ ဦးတို့နဲ့ အတူနေထိုင်နေရသူဖြစ်တယ်လို့ သိရပါတယ်။

စာတည်း – လင်း