◼ အမြန်လမ်းပေါ်က စစ်ကောင်စီစခန်း ၂ ခုလည်း တိုက်ခိုက်ခံရ

မြေလတ်အသံ၊ မတ် ၂၈ ၊ ၂၀၂၅ ။

ပဲခူးတိုင်း(အနောက်ခြမ်း)၊ ပေါက်ခေါင်းမြို့နယ်၊ ပေါက်ခေါင်း-အုတ်တွင်းအမြန်လမ်းပိုင်း( ပဲခူးရိုးဖြတ်လမ်း)မှာ စစ်ကောင်စီတပ်ကား ၂ စီးကို ကြားဖြတ်တိုက်ခိုက်ခဲ့တယ်လို့ တောင်ပိုင်းတိုင်းစစ်ဒေသ အမှတ် ၂ စစ်ဒေသခွဲက မတ် ၂၇ ရက် မနေ့ကထုတ်ပြန်ပါတယ်။

မတ် ၂၅ ရက် ည ၁၀ နာရီ မိနစ် ၂၀ ခန့်က အဆိုပါလမ်းပိုင်းအတိုင်းမောင်းနှင်လာတဲ့ စစ်ကောင်စီတပ်ကား ၂ စီးကို ဘော်ဒါကျေးရွာနဲ့ ပေါ်လံကြီးကျေးရွာအကြားမှာ ကြားဖြတ်တိုက်ခိုက်ခဲ့တာဖြစ်ပြီး တိုက်ခိုက်မှုကြောင့်အင်အား ၃၀ ခန့်ပါ စစ်ကောင်စီတပ်ကား ၁ စီးဟာ ကားလမ်းဘေး ချောက်ထဲကို ထိုးကျသွားခဲ့တယ်လို့ ဆိုပါတယ်။

” ရွှေတောင် ကုတင် ၁၀၀ ဆေးရုံမပို့ခင် တောင်လည်ဆေးရုံက ဆရာဝန်နှင့် အရေးပေါ် ဆေးကုသပြီး ဖောကား ၁ စီး၊ လိုက်ထရပ် ၁ စီးဖြင့် သေဆုံး/ဒဏ်ရာရလူနာများကို ရွှေတောင် ကုတင် ၁၀၀ စစ်ဆေးရုံသို့ တင်ဆောင်သွားကြောင်း သတင်းရရှိတယ်။”လို့ ပြည်သူ့ကာကွယ်ရေးတပ်မတော်၊ စစ်ဆင်ရေးနယ်မြေ ၂ ရဲ့ ပြန်ကြားရေးတာဝန်ခံ စောဒိုရှင်းက မြေလတ်အသံကို ပြောပါတယ်။

အဆိုပါတိုက်ခိုက်မှုကြောင့် စစ်ကောင်စီတပ်ကား ၂ စီးပေါ်ပါ စစ်ကောင်စီတပ်ဖွဲ့ဝင် ၁၁ ဦး သေဆုံးကာ ၁၂ ဦးခန့် ထိခိုက်ဒဏ်ရာတွေရရှိခဲ့ပြီး သေဆုံး၊ဒဏ်ရာရသူတွေကို နောက်ထပ်ကားတွေနဲ့ ပြည်နဲ့ရွှေတောင်မြို့အကြားရှိ အမှတ် ၁၆ ကုတင် ၁၀၀ စစ်ဆေးရုံကို သယ်ဆောင်သွားတယ်လို့ ဆိုပါတယ်။

စစ်ကောင်စီတပ်ဖွဲ့ဝင်တွေ သေဆုံးမှုအခြေအနေအသေးစိတ်တွေကိုတော့ မြေလတ်အသံက သီးခြားအတည်မပြုနိုင်သေးပါဘူး။

တိုက်ခိုက်မှုကို ပြည်သူ့ကာကွယ်ရေးတပ်မတော်၊ စစ်ဆင်ရေးနယ်မြေ ၂၊ တိုင်းစစ်ဌာန(ပဲခူး)၊ ဗျူဟာ ၂၁ ၊ ပြည်ခရိုင်တပ်ရင်း ၃၆၀၂ ၊ တပ်ခွဲ ၃ တို့က ပူးပေါင်း ကြားဖြတ်တိုက်ခိုက်ခဲ့တာပါ။

ဒါ့အပြင် မတ် ၂၆ ရက် မနက် ၁ နာရီ ၁၀ မိနစ်မှာလည်း ပြည်သူ့ကာကွယ်ရေးတပ်မတော်၊ စစ်ဆင်ရေးနယ်မြေ ၂ အတွင်းရှိ ရန်ကုန်-မန္တလေးအမြန်လမ်း ၁၂၇ မိုင်အနီး မင်းရဲ ရဲစခန်းနဲ့ ၁၂၄ မိုင်အနီး နတ်ရေတွင်းရဲစခန်းတွေကို ပြည်သူ့ကာကွယ်ရေးတပ်မတော်၊ စစ်ဆင်ရေးနယ်မြေ ၂၊ တိုင်းစစ်ဌာန (ပဲခူး)၊ဗျူဟာ ၂၂ ၊ အမှတ် ၃၈၀၁ တပ်ရင်းနဲ့ အမှတ် ၃၇၀၁ တပ်ရင်းတွေက တပြိုင်တည်းဝင်ရောက်တိုက်ခိုက်ခဲ့တယ်လို့ တောင်ပိုင်းတိုင်းစစ်ဒေသအမှတ်၂ စစ်ဒေသခွဲရဲ့ ထုတ်ပြန်ချက်မှာ ဖော်ပြထားပါတယ်။

အဆိုပါအမြန်လမ်းပေါ်ကစခန်းတွေ တိုက်ခိုက်မှုအတွင်း စစ်ကောင်စီတပ်ဖွဲ့ဝင် ၁ ဦး သေဆုံးကာ ၄ ဦး အပြင်းအထန် ထိခိုက်‌ဒဏ်ရာတွေ ရ‌ရှိခဲ့တယ်လို့ ထုတ်ပြန်ချက်က ဆိုပါတယ်။

ရွှေဘို၊ မတ် ၁၅၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ဥသျှစ်ကန်ကျေးရွာ သုသာန်အနီး၊ ကျွန်းတောကွေ့ ရွှေဘို-ရေဦးလမ်းပိုင်းမှာ ပျူစောထီးရိက္ခာသယ်ကားကို ကြားဖြတ်တိုက်ခိုက်ခဲ့ပြီး ၂ ဦးသေဆုံးကာ ကားကိုမီးရှို့ဖျက်ဆီးနိုင်ခဲ့တယ်လို့ ရွှေဘိုမြို့နယ်ပကဖ ပြန်ကြားရေးထံက သိရပါတယ်။

မတ် ၁၄ ရက် ညနေ ၃ နာရီ မိနစ် ၄၀ ခန့်မှာ ပန်းရံကျေးရွာ ပျူစောထီးခေါင်းဆောင် အောင်ကျော် ဦးဆောင်ပြီး ဇီးဖြူကုန်း၊ ပန်းရံ၊ ဇီးကုန်းလေးက ပျူစောထီးတပ်ဖွဲ့ဝင် ၆၀ ဝန်းကျင်နဲ့ ရွှေဘိုမြို့ လေ့ကျင့်ရေး ၈ တပ်ထဲကနေ ရိက္ခာထုတ်ပြီးပြန်လာတဲ့ ကား ၃ စီးကို လမ်းကနေကြားဖြတ်တိုက်ခိုက်ခဲ့တာလို့ ဆိုပါတယ်။

“ဖြတ်တိုက်တဲ့အချိန်မှာ ကား ၂ စီးက ရပ်သွားပြီးတော့မှ လူတွေက အကုန်ထွက်ပြေးသွားတယ်။ ထိတွေ့တိုက်ပွဲက ၁ နာရီကျော်ကျော် ကြာလိုက်တယ်။ ရွှေဘိုကျွန်းတောလမ်းပေါ့နော်။ အဲ့လိုဖြစ်နေချိန် ရွှေဘိုမြို့ကညန ကနေ လက်နက်ကြီးပစ်ကူပေးတယ်။ မြေခွန်ဘက်က ပေါသိန်းတို့ ပျူအုပ်စုကလည်း ကျနော်တို့ဘက်ကို ထိုးစစ်ဆင်တယ်။”လို့ ရွှေဘိုမြို့နယ်ပကဖပြန်ကြားရေးတာဝန်ခံ မင်းသားက ပြောပါတယ်။

တိုက်ပွဲအတွင်း သေဆုံးခဲ့တဲ့ပန်းရံကျေးရွာက ပျူစောထီးတပ်ဖွဲ့ဝင် ၂ ဦးရဲ့အလောင်းတွေကို ပျူစောထီးတပ်ဖွဲ့ဝင်တွေက ပြန်လည်ဆွဲထုတ်သွားတယ်လို့ သိရကာ စက်သုံးဆီပေပါ ၁ လုံး၊ စားအုန်းဆီ ၆ ပုံး သိမ်းဆည်းနိုင်ခဲ့ပြီး ပျူစောထီးတပ်ဖွဲ့ဝင်တွေရဲ့ကားကိုတော့ မီးရှို့ဖျက်ဆီးခဲ့တယ်လို့ ဆိုပါတယ်။

အဆိုပါ တိုက်ခိုက်မှုကို ရွှေဘိုမြို့နယ် ပကဖတာဝန်ခံရဲ့ကွပ်ကဲမှုနဲ့ ရွှေဘိုမြို့နယ်ပကဖ တိုက်ခိုက်ရေးအဖွဲ့(PDO)မှ ဦးဆောင်ကာ တိုက်နယ် (၅)ပကဖ တိုက်ခိုက်ရေးအဖွဲ့၊ ဂဠုန်ကြီး ပကဖ၊ ဘီလူးညီနောင် ပကဖ၊ လှိုင်းလုံးနီအဖွဲ့၊ AK ပကဖ၊ တိုက်နယ် (၁) Golden Future Force ပကဖ၊ MC ပကဖ၊ တာဂဏန်းနဂါးမင်း ပကဖအဖွဲ့တို့က ပူးပေါင်းတိုက်ခိုက်ခဲ့တာလို့ ဆိုပါတယ်။

ဖေဖော်ဝါရီ ၂၈ ရက်ကလည်း ရွှေဘိုမြို့နယ်၊ ဥသျှစ်ကန်ကျေးရွာ သုသာန်အနီး ရွှေဘို-ရေဦးလမ်းပိုင်းပေါ်မှာ ရိက္ခာထုတ်ပြီးပြန်လာတဲ့ ပျုစောထီးအဖွဲ့ ကြားဖြတ်တိုက်ခိုက်ခံရလို့ ၃ ဦးသေခဲ့တယ်လို့ သိရပါတယ်။

စာတည်း – ကိုချမ်း

ရေစကြို၊ မတ် ၁၊ ၂၀၂၅။

မကွေးတိုင်း၊ ရေစကြိုမြို့နယ်၊ ချင်းတွင်းမြစ်အရှေ့ဘက် ရေလယ်ကျွန်းဒေသကို စစ်ကြောင်းထိုးလာတဲ့ စစ်ကောင်စီတပ်ဖွဲ့ဝင်တွေကြားဖြတ်တိုက်ခိုက်ခံရတဲ့အတွက် ထိခိုက်သေဆုံးသူတွေရှိပြီး အရှင်ဖမ်းမိထားသူတွေလည်းရှိတယ်လို့ မြင်းခြံခရိုင်တပ်ရင်း ၉၊ Myingyan Black Tiger – MBT တပ်ဖွဲ့ဆီက သိရပါတယ်။

ခြေလျင်အင်အား ၂၀၀ ကျော်ပါစစ်ကောင်စီစစ်ကြောင်းကို ဖေဖော်ဝါရီ ၂၆ မနက် ၈ နာရီကနေ ညနေ ၃ နာရီအထိ ရေလယ်ကျွန်းသောင်ပြင်မှာ ဒေသခံမဟာမိတ်ပူးပေါင်းတပ်ဖွဲ့တွေက တိုက်ခိုက်ခဲ့ကြတာပါ။

“စစ်ကောင်စီရဲ့ ဂျက်ဖိုက်တာနဲ့ Mi 35 တို့က ဝဲပြီးပတ်ပစ်ပေးတဲ့အတွက်ကြောင့် ကျနော်တို့ အကုန်လုံးကိုတော့ သုတ်သင်ရှင်းလင်းနိုင်ခြင်းမရှိဘူး။ တကယ်လို့ လေယာဉ်သာမပါဘူးဆိုရင် စစ်ကြောင်းတကြောင်းလုံးကို အမှုန့်ကြေသွားအောင်အထိ ကျနော်တို့ လုပ်နိုင်မဲ့အနေအထား ရှိပါတယ်။”လို့ Myingyan Black Tiger – MBT ခေါင်းဆောင်ဗိုလ်မိုက်ခဲက ပြောပါတယ်။

တိုက်ခိုက်မှုအတွင်း စစ်ကောင်စီဘက်က ၃ ပွင့်ဗိုလ် ၁ ဦးအပါအဝင် ၉ ဦးသေဆုံးပြီး ၉ ဦးကိုလည်း အရှင်ဖမ်းမိခဲ့တယ်လို့ သူကဆက်ပြောပါတယ်။

“ကျနော်တို့ မျက်မြင်မှာကိုက အလောင်း ၉ လောင်းရတယ်၊ အရှင်က ၉ ဦးဖမ်းမိတယ်၊ ဒဏ်ရာရက ၂၀ ကျော်လောက်ရှိပါတယ်။ အရှင်ဖမ်းမိတဲ့အထဲမှာတော့ စစ်သားတွေလည်းပါတယ်၊ ပျူစောထီးတွေလည်းပါတယ်၊ သေဆုံးအထဲမှာတော့ ၃ ပွင့်ဗိုလ် ၁ ဦးလည်းပါတယ်။”လို့ မြင်းခြံခရိုင်တပ်ရင်း ၉၊ Myingyan Black Tiger-MBT ခေါင်းဆောင်ဗိုလ်မိုက်ခဲက ပြောပါတယ်။

ဒါ့အပြင် ၆၀ မမ ၁ လက်၊ RPG 7 ၁ လက်၊ လက်နက်ငယ်အချို့နဲ့ ခဲယမ်းတွေ သိမ်းဆည်းရမိခဲ့ပြီး MBT တပ်ဖွဲ့ဝင် ၂ ဦးနဲ့ပူးပေါင်းတပ်ဖွဲ့တွေဘက်က ထိခိုက်ဒဏ်ရာရသူတချို့ရှိခဲ့တယ်လို့ ဆိုပါတယ်။

အပြန်အလှန်ပစ်ခတ်မှုဖြစ်နေချိန် စစ်ကောင်စီဘက်ကလေကြောင်းသုံးပစ်ခတ်တိုက်ခိုက်ခဲ့တဲ့အပြင် ရေစကြိုမြို့ပေါ်အထိုင်တပ်ကနေလည်း ၆၀ မမ၊ ၈၁ မမ လက်နက်ကြီးတွေနဲ့ပစ်ကူပေးခဲ့တယ်လို့ ဗိုလ်မိုက်ခဲကဆက်ပြောပါတယ်။

“ဂျက်ဖိုက်တာအရင်လာတာ၊ ဂျက်ဖိုက်တာကော Mi 35 ကော မနက် ၉ နာရီလောက်ကစပစ်တာ။ ၁ ကြိမ်စီပဲ ပစ်ခတ်‌သွားတာ၊ ပစ်တာကတော့တော်တော်များတယ်၊ ဘယ်နှစ်ချက်ပစ်လဲ ဘယ်နှစ်လုံးကြဲလဲဆိုတာ ကျနော်လည်း မမှတ်မိတော့ဘူး။” လို့ သူကဆက်ပြောပါတယ်။

အဆိုပါစစ်ကောင်စီစစ်ကြောင်းမှာ ခမရ ၂၅၆၊ ခမရ ၂၅၇၊ ခမရ ၂၅၈ ကတပ်သားတွေအပြင် ပြည်သူ့စစ်နဲ့ပျူစောထီးတပ်ဖွဲ့ဝင်တွေလည်းပါဝင်တယ်လို့ သိရပါတယ်။

ဒီတိုက်ခိုက်မှုတွေကို မြင်းခြံခရိုင်တပ်ရင်း ၉ Myingyan Black Tiger-MBT၊ မြောင်တပ်ပေါင်းစု၊ Royal Brother Defence Force (RBDF)၊ သွေးသောက်တပ်ဖွဲ့၊ ရေစကြိုမြို့နယ် (ပလဖ)၊ MSPDF နဲ့ ညီနောင်မဟာမိတ်တို့က ပူးပေါင်းလုပ်ဆောင်ခဲ့တာဖြစ်ပါတယ်။

လက်ရှိအချိန်မှာတော့ စစ်ကောင်စီစစ်ကြောင်းဟာ ရေစကြိုမြို့နယ်ထဲက ငြိမ်းဇာနည်တပ်စခန်းရဲ့ သောင်ပြင်အရှေ့ဘက်မှာ အင်အားထပ်ဖြည့်ထားပြီး စစ်ကြောင်းထပ်ထိုးလာရင်တော့ အပြန်အလှန် တိုက်ပွဲထပ်ဖြစ်နိုင်တယ်လို့ ဒေသခံကာကွယ်ရေးတပ်ဖွဲ့ဝင်တွေဆီက သိရပါတယ်။

စာတည်း – လင်း