ကျောက်ဆည်၊ ဩဂုတ် ၂၇၊ ၂၀၂၅။

မန္တလေးတိုင်း၊ ကျောက်ဆည်ခရိုင်အမှတ် ၂ တပ်ရင်းက ဆေးတပ်သား ၁ ဦးနဲ့ ထောက်ပို့ ၁ ဦး စစ်ကော်မရှင်တပ်ဆီ ဘက်ပြောင်းသွားတာကြောင့် စခန်းလုံခြုံရေးကို ပိုမိုတိုးမြှင့်ထားရတယ်လို့ တပ်ရင်းတာဝန်ရှိသူတွေဆီက သိရပါတယ်။

ဆေးတပ်သား နေကြီး (ခ) ဘယ်လေး (ခ) နေမျိုးလင်းနဲ့ ထောက်ပို့လုပ်နေသူ စိုးကြီးဆိုသူတို့ဟာ ဩဂုတ် ၂၄ ရက်က တပ်ရင်းကနေ တာဝန်ကျဒေသကိုပြန်လွှတ်လိုက်ချိန်မှာ ဝက်လက်မြို့နယ်၊ ရွာသာကြီးရွာရှိ စစ်ကော်မရှင်တပ်စခန်းဆီကို ဘက်ပြောင်းသွားကြတာလို့ ဆိုပါတယ်။

“သွားတာက ခရီးသွားဖို့လွှတ်လိုက်တာကနေ အလင်းဝင်သွားတာ။ သူတာဝန်ကျတဲ့နေရာကို ခွင့်ပြည့်လို့ဆိုပြီး ပြန်လွှတ်လိုက်တာ။ သူနဲ့အတူနောက်တယောက်က အပြင်ထောက်ပို့တယောက်။ ထောက်ပို့ကအခြားအဖွဲ့တွေအတွက် ထောက်ပို့လုပ်နေတာ။ သူတို့ထွက်သွားတဲ့နေ့မှာပဲ နေ့ခင်းလောက်မှာ အဲ့ဘက်နယ်မြေခံအဖွဲ့အစည်းတွေက သတင်းပို့လာတာ။ ကျနော်တို့ထပ်စုံစမ်းတော့ ဝင်သွားတာအတည်ပြုနိုင်ခဲ့တယ်” လို့ ကျောက်ဆည်ခရိုင် တပ်ရင်း ၂ စခန်းမှူး ရင်ငြိမ်မိုး က ပြောပါတယ်။

ဘက်ပြောင်းသူတွေနဲ့အတူ လက်နက်ခဲယမ်းတွေပါသွားတာမရှိဘဲ ဆေးပစ္စည်းအချို့နဲ့ ယူနီဖောင်းအချို့သာ ပါသွားကာ ခုလိုဘက်ပြောင်းသွားတာကြောင့် လေကြောင်းရန်နဲ့ စခန်းလုံခြုံရေးအတွက် စိုးရိမ်မှုတော့ရှိတယ်လို့ ကိုရင်ငြိမ်းမိုးက ဆက်ပြောပါတယ်။

“စခန်းလုံခြုံရေးက ပိုတိုးမြှင့်ထားရတယ်။ ကိုယ့်လူက ရန်သူဘက် ပါသွားတာကိုး။ လေကြောင်းတိုက်ခိုက်မှုကိုတော့ ပိုပြီးဂရုစိုက်နေရတယ်။ စစ်ကြောင်းထိုးလာတာမရှိဘူး။ ရဲဘော်တွေဆီ ဆက်သွယ်တာတွေလည်း မရှိဘူး။”လို့ ပြောပါတယ်။

နေကြီးဟာ ၂၀၂၃ မှာ ကျောက်ဆည်ခရိုင်တပ်ရင်း ၂ ကို ရောက်ရှိကာ အခြေခံစစ်သင်တန်းတက်ရောက်ပြီး နောက် တပ်ဖွဲ့ဝင်ဖြစ်လာပြီး တပ်ဖွဲ့အတွင်းနေထိုင်ချိန်မှာ စည်းကမ်းကောင်းပြီး တပ်ဖွဲ့အတွက် တာဝန် ကျေပွန်စွာအလုပ်လုပ်နိုင်သူဖြစ်တယ်လို့ ဆိုပါတယ်။

ယခုလို ကျောက်ဆည်ခရိုင်တပ်ရင်း ၂ က တပ်ဖွဲ့ဝင်တွေ စစ်ကော်မရှင်တပ်ဆီ ဘက်ပြောင်းသွားတာဟာ ခုတကြိမ်က ပထမဆုံးအကြိမ်ဖြစ်တယ်လို့လည်း သိရပါတယ်။

နေကြီးနဲ့ အဆက်အသွယ်ရှိတဲ့ တော်လှန်ရေးလုပ်ဖော်ကိုင်ဘက်တွေအနေနဲ့ သတိထားကြဖို့နဲ့ သူ့ကြောင့် ဖြစ်ပေါ်လာတဲ့ နောက်ဆက်တွဲပြသနာတွေကို တပ်ရင်းကတာဝန်ယူမှာ မဟုတ်ဘူးလို့ ဩဂုတ် ၂၆ ရက်မှာ ကျောက်ဆည်ခရိုင် တပ်ရင်း ၂ သတင်းထုတ်ပြန်အသိပေးထားပါတယ်။

စာတည်း – လင်း

ကျောက်ဆည်၊ ဧပြီ ၁၊ ၂၀၂၅။

မန္တလေးတိုင်း၊ ကျောက်ဆည်မြို့မှာ ငလျင်ငယ်တွေလှုပ်နေသေးတဲ့အတွက် ဒေသခံတွေစိုးရိမ်ပြီး နေအိမ်တွေကိုမပြန်ဘဲ လမ်းပေါ်မှာအိပ်နေရတယ်လို့ ဒေသခံတွေဆီကသိရပါတယ်။

မတ် ၂၈ ရက်လှုပ်ခတ်ခဲ့တဲ့ငလျင်နောက်ပိုင်း ဧပြီ ၁ ရက်ဒီနေ့အထိ နေ့စဥ်ငလျင်ငယ်တွေ အနည်းဆုံး ၃ ကြိမ်မှ ၅ ကြိမ်ကြားလှုပ်ခတ်နေတယ်လို့ဆိုပါတယ်။

“သဘာဝဘေးမို့ ဘယ်ချိန်လှုပ်မယ်မသိကြတော့ ထမင်းစားလည်းအဲ့စိတ်၊ အိပ်လည်းအဲ့စိတ်။ ကောင်းကောင်းမအိပ်ရဲသေးဘူး ထထလှုပ်နေလို့” လို့ ဒေသခံတဦးကပြောပါတယ်။

ဒါ့ကြောင့် မြို့ခံအများစုမှာ နေအိမ်ထဲမှာဝင်မအိပ်ရဲကြဘဲ အဆောက်အဦနဲ့လွတ်ရာ အိမ်ပြင်တွေမှာ ထွက်ပြီး အိပ်နေကြတာလို့ သူကဆက်ပြောပါတယ်။

“ခံစားရတာတော့အကုန်လုံးက ဘာအသံကြားကြားလန့်ဖြန့်ပြီးနေနေရတယ်။ တခုခုဆိုပြေးဖို့ထိ ‌ပြင်ဆင်နေရတာ အိမ်ထဲကိုမ၀င်ရဲကြဘူး။ အပြင်မှာပဲထွက်ထိုင်နေကြတာများတယ်။ ညပိုင်းတွေလည်း အပြင်မှာဘဲအိပ်ကြတယ်။ ခဏလောက်လေးဘဲ အိမ်ထဲဝင်ရဲကြတာ။ ခုလိုနေတာက တမြို့လုံးနီးပါးလို့ ပြောလို့ရတယ်။”လို့ သူကပြောပါတယ်။

မတ် ၃၀ ရက် ငလျင်ထပ်လှုပ်ချိန်မှာလည်း တိမ်းစောင်းအက်ကွဲနေတဲ့နေအိမ်အချို့ ထပ်မံ ပြိုကျတာတွေရှိခဲ့ပြီး လူထိခိုက်တာတော့မရှိဘူးလို့ ဆိုပါတယ်။

မြို့ထဲမှာ အခြေခံစားသောက်ကုန်ရောင်းတဲ့ ဆိုင်တွေပြိုကျပျက်စီးတာ၊ မပျက်စီးပေမယ့်လည်း သူခိုးရန်ကြောက်ပြီး ဆိုင်အများစုကပိတ်ထားတာကြောင့် ရေသန့်နဲ့ စားသောက်စရာတွေအလွယ်တကူဝယ်မရဘဲ ရှိတဲ့ရိက္ခာနဲ့ ချွေတာစားသောက်နေကြရတယ်လို့ အထက်ပါဒေသခံက ပြောပါတယ်။

ထိခိုက်ပျက်စီးမှုရှိခဲ့တဲ့သူတွေအတွက် အထိအခိုက်မရှိတဲ့နေအိမ်အချို့က စားသောက်စရာနဲ့ရေ လိုက်လံဝေငှကြပေမယ့် ထိခိုက်ပျက်စီးမှုရှိခဲ့တဲ့သူတွေကများတာကြောင့် ရိက္ခာလုံလောက်မှုမရှိဘူးလို့ သိရပါတယ်။

ဒီကနေ့အထိ ကျောက်ဆည်မြို့မှာ လျှပ်စစ်မီး၊ ဖုန်းလိုင်းနဲ့ ကယ်ဆယ်ရေးအဖွဲ့တွေကလည်း ထိခိုက်သေဆုံးသူတွေကိုရှာဖွေနေကြဆဲဖြစ်ကာ အပျက်အစီးတွေကို မရှင်းလင်းနိုင်သေးဘူးလို့ ဆိုပါတယ်။

ငလျင်ကြောင့် မတ် ၃၁ ရက်အထိ စာရင်းအရ ကျောက်ဆည်မြို့မှာ သေဆုံးသူ ၆၀ ကျော်ထိရှိလာပြီး ထိခိုက်ဒဏ်ရာရသူ ၁၀၀ ကျော်ထိရှိလာကာ ပျောက်ဆုံးနေသူတွေလည်း ရှိနေသေးတယ် ဒေသတွင်းပရဟိတအဖွဲ့တွေဆီက သိရပါတယ်။

စာတည်း – လင်း

ကျောက်ဆည်၊ ဧပြီ ၅၊ ၂၀၂၃။

မန္တလေးတိုင်းဒေသကြီး၊ ကျောက်ဆည်မြို့နယ်၊ အနောက်မယ်ဇယ်ပင်ကျေးရွာမှာ မီးဖို မီးကြွင်းမီးကျန်ကနေ မီးလောင်ခဲ့တာကြောင့် နေအိမ် ၃ လုံး ပြာကျသွားတယ်လို့ သိရပါတယ်။

ဧပြီလ ၅ ရက်ဒီမနက် ၉ နာရီခွဲ‌လောက်မှာ အနောက်မယ်ဇယ်ပင်ကျေးရွာနေ ဦးဝင်းနေအိမ်မှာ ထမင်းအိုးတည်ပြီးနောက် မီးကို ကုန်အောင်မသတ်ဘဲ ထားခဲ့ရာကနေ မီးလောင်မှုဖြစ်ပွားခဲ့တာလို့ ဒေသခံတဦးက ပြောပါတယ်။

“မီးဖို မီးကြွင်းမီးကျန်ကနေ စလောင်တာပါ။ ဒီဘက်ခြမ်းက ထင်းမီးသုံးတာ များတယ်။ သတိမထားမိတော့ မီးလောင်ရာကနေ ဘေးအိမ်တွေပါ မီးကူးကုန်တယ်။ အိမ်တွေကတော့ လုံးဝအကုန်ပဲ။ မီးလောင်ထားတဲ့ တိုင်တွေလောက်ပဲ ကျန်တယ်” လို့ ပြောပါတယ်။

မီးလောင်တာကြောင့် သွပ်မိုး၊ ပျဥ်ခင်းပျဥ်ကာ နေအိမ် ၃ လုံး မီးလောင်ပျက်စီးခဲ့လို့ ကာလတန်ဖိုး ကျပ်သိန်း ၂၀၀ ခန့် ပျက်စီးဆုံးရှုံးခဲ့ရပြီး၊ အိမ်ထောင်စု ၃ စု၊ လူဦးရေ ၁၀ ဦးကျော် မီးဘေးသင့်လို့ ကျေးရွာဘုန်းကြီးကျောင်းမှာ ယာယီနေထိုင်နေရတယ်လို့ ဆိုပါတယ်။

ဒါ့အပြင် မတ်လ ၁၇ ရက်နေ့မနက် ၈ နာရီခန့်မှာလည်း ကျောက်ဆည်မြို့နယ်၊ ငါးဆူကျေးရွာနေ ဦးစိုးသန်းနေအိမ်ရှိ မီးအားမြှင့်စက်နေ အပူလွန်ကဲပြီး မီးလောက်ရာမှာ နေအိမ်တွေကို မီးကူးစက်လောင်ကျွမ်းခဲ့လို့ နေအိမ် ၄ လုံး မီးလောင်ပျက်စီးခဲ့ပါသေးတယ်။

အလားတူ ဖေဖော်ဝါရီလ ၂၀ ရက်ကလည်း ကျောက်ဆည်မြို့နယ်၊ မြောင်းဦးကျေးရွာမှာ မီးလောင်မှုကြောင့် လူနေအိမ် ၂၅ လုံး မီးလောင်ပျက်စီးခဲ့ပါသေးတယ်။

စာတည်း – လင်း