ချောက်၊ နိုဝင်ဘာ ၁၈၊ ၂၀၂၅။

မကွေးတိုင်း၊ ချောက်မြို့ကထွက်လာတဲ့ စစ်ကော်မရှင်ကားတွေကိုတိုက်ခိုက်ရင်း အာဠာဝက မြို့ပြပြောက်ကျားတပ်ဖွဲ့မှ စခန်းမှူးကျဆုံးခဲ့တယ်လို့ အဲ့ဒီတပ်ဖွဲ့ဆီက သိရပါတယ်။

နိုဝင်ဘာ ၁၇ ရက် နေ့လယ် ၁၁ နာရီခွဲလောက်မှာ ချောက်မြို့နယ် တနေရာမှာ စစ်ကော်မရှင် ကားတွေကိုတိုက်ခိုက်ရာက အပြန်အလှန်ပစ်ခတ်မှုဖြစ်ပြီး စခန်းမှူးအသက် ၁၉ နှစ်အရွယ် အောင်ဇင်မျိုး (ခ) ဥသြမှာ အဆုတ်ကို ကျည်ထိမှန်ပြီး နေရာမှာပဲ သေဆုံးခဲ့တာလို့ ဆိုပါတယ်။

“ချောက်မြို့က ထွက်လာတဲ့ ယာဉ်တန်းကို ချောက်မြို့နယ် တနေရာမှာ တိုက်ခိုက်တာ၊ ကား ၂ စီးကို ကြားဖြတ်တိုက်ခိုက်ရင်း သူပစ် ကိုယ်ပစ်အပြန်အလှန်ပစ်ခတ်ရင်း ထိမှန်တာ၊ အဆုတ်ကို ထိမှန်တာ၊ အလောင်းကို ပြန်ရခဲ့ပါတယ်၊” လို့ အာဠာဝက မြို့ပြပြောက်ကျားတပ်ဖွဲ့ တာဝန်ရှိသူတဦးက ပြောပါတယ်။

ထိတွေ့တိုက်ခိုက်မှုဖြစ်ပွားချိန် မိနစ် ၃၀ ခန့်ကြာခဲ့ပြီး စစ်ကော်မရှင်တပ်ဖွဲ့ဝင်တွေဘက်က ၅ ဦးသေဆုံးမှုရှိကာ တိုက်ခိုက်မှုဖြစ်ပြီးနောက် ၁ နာရီခန့်အကြာမှာ စစ်ကော်မရှင်ကားတွေက ချောက်မြို့ဘက်ကို ဆက်သွားခဲ့ကြပြီး အဲ့ဒီနောက်မှ အလောင်းကိုကောက်ယူခဲ့ရတယ်လို့ တာဝန်ရှိသူတဦးက ပြောပါတယ်။

အောင်ဇင်မျိုး (ခ) ဥသြရဲ့ ဈာပနအခမ်းအနားကို နိုဝင်ဘာ ၁၇ ရက် မနေ့ကညနေ ၃ နာရီခွဲလောက်က မကွေးခရိုင်အတွင်း တပ်ရင်းအခြေစိုက်ရာနေရာမှာ ပြုလုပ်ခဲ့ပြီး တပ်ဖွဲ့ဝင် ၃၀ ဦးဝန်းကျင်တက်ရောက်ခဲ့ကြတယ်လို့ သိရပါတယ်။

အောင်ဇင်မျိုးဟာ ၂၀၂၅ ခုနှစ် ၅ လပိုင်းမှာ အာဠာဝကမြို့ပြပြောက်ကျားတပ်ဖွဲ့ကိုစတင်ဝင်ရောက်ခဲ့တာဖြစ်ပြီး လက်ရှိမှာ စခန်းမှူးအဖြစ်တာဝန်ထမ်းဆောင်နေတာ ၂ လကြာပြီး မြန်မာလူမျိုးဖြစ်တယ်လို့ တာဝန်ရှိသူတဦးက ပြောပါတယ်။

၂၀၂၃ ဇွန်လမှာစတင်တည်ထောင်ခဲ့တဲ့ အာဠာဝက မြို့ပြပြောက်ကျားတပ်ဖွဲ့ဟာ ချောက်မြို့နယ်အခြေစိုက်ကာ စစ်ကော်မရှင်တပ်တွေကိုတော်လှန်တိုက်ခိုက်နေတာဖြစ်ပြီး တပ်ဖွဲ့တည်ထောင်ချိန်ကနေ လက်ရှိအချိန်ထိ တပ်ဖွဲ့ဝင် ၆ ဦးကျဆုံးခဲ့တာပါ။

စာတည်း – လင်း

မြေလတ်အသံ၊ နိုဝင်ဘာ ၇၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်မှာ စစ်ကော်မရှင်တပ်နဲ့ ဘုန်းဘွဲ့ရွာပြည်သူ့ကာကွယ်ရေးအဖွဲ့တို့ ထိတွေ့ တိုက်ပွဲဖြစ်ပြီး တိုက်ပွဲအတွင်း ပကဖ တပ်ဖွဲ့ဝင် ၇ ဦး ကျဆုံးခဲ့တယ်လို့ တော်လှန်ရေးတပ်ဖွဲ့ဝင်တွေဆီက သိရပါတယ်။

နိုဝင်ဘာ ၆ ရက် မနေ့ကမနက် ၆ နာရီကျော်မှာ ဘုန်းဘွဲ့ရွာထဲကိုဝင်ရောက်လာတဲ့ စစ်ကော်မရှင်တပ်ဖွဲ့ဝင် အင်အား ၂၀ ခန့်နဲ့ ပကဖတပ်ဖွဲ့ဝင် ၁၇ ဦးဝန်းကျင်တို့ ထိတွေ့တိုက်ပွဲဖြစ်ခဲ့တာလို့ ဆိုပါတယ်။

“ရွာကအိမ်တွေကို သူတို့က(စကမ)မီးရှို့ထားလို့ ပကဖတွေ ဝင်ငြှိမ်းတာ။ **မရှိ‌တော့ဘူးဆိုပြီး ပြန်ဝင်တာ။ မနက်လင်းတော့ **ကပြန်ဝင်တော့ ထိတွေ့မှုဖြစ်ပြီးကျကုန်တာ”လို့ ရွှေဘိုခရိုင်မှ တော်လှန်ရေးတပ်ဖွဲ့ဝင်တဦးက ပြောပါတယ်။

ကျဆုံးသူတွေရဲ့ကိုယ်ရေးအချက်အလက်အသေးစိတ်ကိုတော့ အတိအကျမသိရှိရသေးပေမယ့် ၎င်းတို့ဟာ တိုက်ပွဲအတွင်း ကျဆုံးခဲ့တာမှန်ကန်ကြောင်း အထက်ပါတပ်ဖွဲ့ဝင်က အတည်ပြု ပြောဆိုပါတယ်။

ပြီးခဲ့တဲ့နိုဝင်ဘာ ၄ ရက်မှာ တပ်မ ၃၃ နဲ့ ခလရ ၄၂ တပ်ရင်းတို့က အင်အား ၁၀၀ ခန့်ပါစစ်ကြောင်းဟာ ဘုန်းဘွဲ့ကျေးရွာကို စစ်ကြောင်းထိုးဝင်ရောက်လာပြီး နေအိမ် ၂၀ ဝန်းကျင်ကိုမီးရှို့ကာ ရွာမှာစခန်းချ ညအိပ်ခဲ့တယ်လို့ သူက ပြောပါတယ်။

အဲ့ဒီစစ်ကြောင်းဟာ ဘုန်းဘွဲ့ရွာကတဆင့် နိုဝင်ဘာ ၅ ရက်မနက်မှာ ဝက်လက်မြို့နယ်၊ စိုင်နိုင်လေး ရွာကိုဝင်ရောက်ပြီးနေအိမ်တွေမီးရှို့တပ်စွဲနေခဲ့ရာက နိုဝင်ဘာ ၆ ရက်မနက်မှာ ဘုန်းဘွဲ့ရွာကို ပြန်ဝင်သွားချိန် ပကဖတွေနဲ့တိုက်ပွဲဖြစ်ပွားခဲ့တာလို့ အထက်ပါတပ်ဖွဲ့ဝင်က ဆိုပါတယ်။

လက်ရှိမှာ အဲဒီအင်အား ၁၀၀ ခန့်ပါစစ်ကြောင်းဟာ ဝက်လက်မြို့နယ်ကိုရောက်ရှိနေတဲ့ အင်အား ၁၅၀ ပါစစ်ကြောင်းနဲ့ပေါင်းပြီး ရွာသားကြီး၊ တံတားဦး၊ ထုံးဘို၊ တမာကုန်း၊ ရွာ‌တော်ကုန်း၊ မူးကြီးစတဲ့ ရွာတွေကိုမီးရှို့ပြီးနောက် နိုဝင်ဘာ ၆ ရက်ညပိုင်းမှာ ဝက်လက်မြို့ပေါ်ကို ပြန်ဝင်သွားတယ်လို့ သိရပါတယ်။

စာတည်း – လင်း

ဆိပ်ဖြူ၊ အောက်တိုဘာ ၂၈၊ ၂၀၂၅။

မကွေးတိုင်း၊ ပခုက္ကူခရိုင်၊ ဆိပ်ဖြူမြို့နယ်၊ သံဇလုံရွာစစ်ဆေးရေးဂိတ်ကို ဒေသကာကွယ်ရေးတပ်ဖွဲ့တွေက ဝင်ရောက်တိုက်ခိုက်ခဲ့ပြီး နှစ်ဖက်ထိခိုက်သေဆုံးမှုရှိခဲ့တယ်လို့ ပခုက္ကူခရိုင် အမှတ် ၁၉ တပ်ရင်းတာဝန်ရှိသူတွေထံက သိရပါတယ်။

ဂွေးပင်ချောင်းရွာနဲ့ သံငယ်လုံးကျေးရွာကြားမှာတဲ့ရှိတဲ့ အဲ့ဒီစစ်ဆေးရေးဂိတ်မှာ စစ်ကော်မရှင်တပ်နဲ့ပြည်သူ့စစ်ပူးပေါင်းအင်အား ၁၂ ဦးခန့်ရှိတပ်စွဲနေတာဖြစ်ပြီး အောက်တိုဘာ ၂၇ ရက် မနက် ၅ နာရီခွဲခန့်မှာ ဒေသကာကွယ်ရေးတပ်ဖွဲ့တွေက ဝင်ရောက်တိုက်ခိုက်ခဲ့ရာ အပြန်အလှန်ပစ်ခတ်မှု မိနစ် ၃၀ ခန့်ဖြစ်ပွားခဲ့တယ်လို့ ဆိုပါတယ်။

” ဂိတ်ကတော့ ထိုင်ထားတာ ၂ လဝန်းကျင်ရှိပြီး။ တိုက်ပွဲက မိနစ် ၃၀ လောက်ဘဲ။ မြို့နဲ့နီးတော့ စစ်ကူအလွယ်လာနိုင်တဲ့ ဂိတ်ဗျ၊ စစ်ကြောင်းမှူးက လက်နက်ငယ်ထိခဲ့ပြီး ဘော်ဒီ(အလောင်း) ဆွဲချိန် မရလိုက်ဘူး”လို့ ပခုက္ကူခရိုင် အမှတ် ၁၉ တပ်ရင်းတာဝန်ရှိတဦးက မြေလတ်အသံကို ပြောပါတယ်။

တိုက်ပွဲအတွင်း စစ်ကော်မရှင်တပ်ဖွဲ့နဲ့ပြည်သူစစ် ၄ ဦးသေဆုံးခဲ့ပြီး MA 3 သေနတ် ၁ လက်၊ ကျည်ဆန်တချို့ သိမ်းဆည်းရရှိခဲ့တယ်လို့ သိရပါတယ်။

တော်လှန်ရေးတပ်တွေဘက်ကလည်း မကွေးတိုင်းပကဖရွေ့လျားစစ်ကြောင်း (Yenanthar column)ရဲ့ စစ်ကြောင်းမှူး ရဲဘော် ဆိပ်ဖြူ (ခ) ဟိန်းမင်းသူ တိုက်ပွဲကျသေဆုံးခဲ့ရပြီး ရုပ်အလောင်းပြန်မရခဲ့ဘူးလို့ ဆိုပါတယ်။

တိုက်ပွဲဖြစ်ပြီးတဲ့နောက် အခင်းဖြစ်နေရာကို စစ်ကော်မရှင်တပ်ဖွဲ့စစ်ကူတွေ ထပ်မံရောက်လာပြီး လက်ရှိမှာ အဲ့ဒီစစ်ဆေးရေးဂိတ်ကို အင်အားတိုးမြှင့်ချထားတယ်လို့ သိရပါတယ်။

အဆိုပါတိုက်ခိုက်မှုကို ပခုက္ကူခရိုင် အမှတ် ၁၉ တပ်ရင်း၊ မကွေးတိုင်းပကဖ ရွေ့လျားစစ်ကြောင်း( Yenanthar column)တို့ကပူးပေါင်းလုပ်ဆောင်ခဲ့တာပါ။

အောက်တိုဘာ ၂၅ ရက်ကလည်း ဆိပ်ဖြူမြို့နယ်၊ ဂွေးပင်ချောင်းကျေးရွာအနီးမှာ စစ်ကော်မရှင်စစ်ကြောင်းမိုင်းဆွဲတိုက်ခိုက်ခံရလို့သေဆုံးထိခိုက်မှုတွေရှိခဲ့တယ်လို့ သိရပါတယ်။

စာတည်း – ဟိန်းစံ

ပေါက်၊ စက်တင်ဘာ ၄၊ ၂၀၂၅။

မကွေးတိုင်း၊ ပေါက်မြို့နယ် ရှေ့တန်းတနေရာမှာ စစ်ကော်မရှင်စစ်ကြောင်းကို အပြန်အလှန်ပစ်ခတ်ရင်း ဗိုက်ပွင့်ပြီး တပ်ဖွဲ့ဝင် ၁ ဦးကျဆုံးခဲ့တယ်လို့ ပခုက္ကူခရိုင် အမှတ်-၁၁ တပ်ရင်းဆီက သိရပါတယ်။

ကျဆုံးခဲ့သူဟာ ပခုက္ကူခရိုင် အမှတ်-၁၁ တပ်ရင်း PPC တပ်ဖွဲ့ဝင် အသက် ၁၉ နှစ်အရွယ် ကျော်ဇင်ဝင်း (ခ) တာယာဖြစ်ပြီး စက်တင်ဘာ ၁ ရက်မှာ စစ်ကော်မရှင်ဘက်ကပစ်ခတ်တဲ့ကျည်မှန်ပြီး ဗိုက်ပွင့် ကျဆုံးခဲ့တာလို့ ဆိုပါတယ်။

“ဗိုက်ပွင့်သွားတာ၊ လမ်းမှာမိုးရွာတော့ ဆေးရုံအချိန်မှီမရောက်တော့ ကျဆုံးသွားတာ၊ ရှေ့တန်းတနေရာမှာ ဖြစ်သွားတာပါ၊ ကျနော်တို့ ကာကွယ်ရေးတပ်ဖွဲ့တွေ လုပ်ထုံးလုပ်နည်းအတိုင်း အမိန့်ပြန်တမ်းထုတ်ပြီး သေနက် ၃ လက်နဲ့ ၁ လက်ကို ၃ ချက်ဖောက်ပြီးသင်္ဂြိုဟ်တယ်” ပခုက္ကူခရိုင် အမှတ် ၁၁ တပ်ရင်း ပြန်ကြားရေးတာဝန်ခံက ပြောပါတယ်။

ကျဆုံးတပ်ဖွဲ့ဝင်ရဲ့ ဈာပနအခမ်းအနားကိုတော့ စက်တင်ဘာ ၃ ရက်က ပေါက်မြို့နယ်ထဲမှာ မကွေးတိုင်းဗျူဟာရုံးအုပ်အဖွဲ့၊ ပခုက္ကူခရိုင် အမှတ် ၁၁ တပ်ရင်း ဒုတပ်ရင်းမှူးနဲ့ တပ်ဖွဲ့ဝင်တွေ တက်ရောက်ခဲ့ကြတယ်လို့ ဆိုပါတယ်။

စစ်ကော်မရှင်တပ်နဲ့တိုက်ပွဲတွေအတွင်း တပ်ဖွဲ့ဝင်ကျော်ဇင်ဝင်းအပါအဝင် ပခုက္ကူခရိုင် အမှတ်-၁၁ တပ်ရင်းမှ တပ်ဖွဲ့ဝင် ၇ ဦးအထိ ကျဆုံးထားတယ်လို့ သိရပါတယ်။

စာတည်း – လင်း