ကလေး

ကလေး၊ ဧပြီ ၆၊ ၂၀၂၃။

စစ်ကိုင်းတိုင်း၊ ကလေးမြို့နယ်၊ ပျဉ်းတော်ဦးကျေးရွာအနီး နယ်မြေရှင်းလင်းရေးလုပ်ချိန် အသတ်ခံထားရတဲ့ အလောင်း ၃ လောင်း တွေ့ခဲ့ရပြီး အဲ့ဒီထဲမှာ PDF ရဲဘော်တဦးလည်း ပါဝင်တယ်လို့ သိရပါတယ်။

ဧပြီလ ၆ ရက် ဒီကနေ့မနက်ပိုင်းက တိုက်ပွဲတွေ ရပ်နားထားတဲ့အတွက် နယ်မြေခံကာကွယ်ရေးအဖွဲ့တွေက ရှင်းလင်းရေးဝင်ရောက်ခဲ့ရာ ပျဉ်းတော်ဦးနဲ့ နန်းစောင်းပုရွာကြားက လမ်းပိုင်းတနေရာမှာ တွေ့ခဲ့တာဖြစ်တာလို့ ကလေးဒေသခံတဦးက ဆိုပါတယ်။

“၂ ယောက်က ပြည်သူ၊ ၁ ယောက်က PDF၊ လူတွေပိတ်မိနေလို့သွားခေါ်တာကို သူပါအသတ်ခံလိုက်ရတာ။ ဝေဟင်ပစ်တဲ့နေ့က နှိပ်စက်ခံရပြီးမှ ပစ်သတ်ထားခဲ့တာ” လို့ ပြောပါတယ်။

အသက် ၃၀ ဝန်းကျင် နန်းချောင်းရွာသား ပြည်သူ ၂ ဦးနဲ့ ကလေးအခြေစိုက်တပ်ဖွဲ့တခုက ရဲဘော်တဦး ဖြစ်တယ်လို့ ကနဦးသိထားရပြီး မြေပြင်အခြေနေတွေကြောင့် ရဲဘော်နဲ့ပတ်သက်တဲ့ အသေးစိတ်အချက်လက်တွေတော့ မထုတ်ပြန်သေးဘူးလို့ သိရပါတယ်။

စစ်ကောင်စီက လေကြောင်းနဲ့ပစ်ခတ်တဲ့ ဧပြီလ ၂ ရက်နေ့က စစ်ကြောင်းနဲ့ထိပ်တိုက်တိုးပြီး အသတ်ခံရတာဖြစ်နိုင်တယ်လို့ ယူဆရပြီး၊ တွေ့ရှိချိန်မှာ အလောင်းတချို့က ပုတ်ပွပျက်စီးနေလို့ ဘယ်သူဘယ်ဝါဆိုတာ သိရဖို့ ကြန့်ကြာနေတယ်လို့လည်း ဆိုပါတယ်။

ကလေးမြို့မှာ မတ်လ ၃၀ ရက်ကနေ ဧပြီလ ၅ ရက်နေ့ထိ စစ်ကောင်စီနဲ့ နယ်မြေခံကာကွယ်ရေးအဖွဲ့ပေါင်းစုံ တိုက်ပွဲဖြစ်ပွားခဲ့ပြီး ၇ ရက်တာတိုက်ပွဲအတွင်း ရဲဘော် ၂ ဦး ကျည်ထိမှန်ကာ မစိုးရိမ်ရ ဒဏ်ရာရထားပြီး စစ်ကောင်စီဘက်ကလည်း သေဆုံးမှုတွေ ရှိခဲ့ပါသေးတယ်။

စာတည်း – လင်း

မကွေး၊ မတ် ၃၀၊ ၂၀၂၃။

မကွေးတိုင်းဒေသကြီး၊ သရက်ခရိုင်၊ ကံမမြို့နယ်ထဲက ကျေးရွာတွေမှာ ပေါင်ပုတ်လက်မကွေးတိုင်း၊ မြိုင်မြို့နယ်တောင်ပိုင်းက နှမ်းဆီကန်ကျေးရွာထဲကို ပျူစောထီးတပ်ဖွဲ့တွေကဝင်ရောက်လာပြီး လက်နက်တွေနဲ့ လိုက်လံပစ်ခတ်ခဲ့လို့ အသက် (၄)နှစ်အရွယ် ကလေးမငယ်တဦး သေဆုံးသွားခဲ့တယ်လို့ သိရပါတယ်။

မတ်လ ၃၀ ရက် ဒီနေ့ မနက် ၈ နာရီကျော်လောက်မှာ မြိုင်နယ်တောင်ပိုင်း၊ သရက်ကန်ကျေးရွာက ပျူစောထီးတွေဟာ အင်အား ၃၀ နီးပါး နဲ့ နှမ်းဆီးကန်ကျေးရွာထဲကို လက်နက်တွေပစ်ဖောက်ပြီး ဝင်ရောက်လာခဲ့တယ်လို့ ဒေသခံတွေက ဆိုပါတယ်။

ပျူစောထီးတပ်ဖွဲ့တွေ ဝင်ရောက်လာလို့ ဒေသခံပြည်သူတွေဟာ ကြောက်လန့်ပြီး ထွက်ပြေးတိမ်းရှောင်နေချိန် ပျူစောထီးတွေက လက်နက်တွေနဲ့ လိုက်လံပစ်ခတ်ခဲ့လို့ ကလေးမလေးတဦး လက်နက်ထိမှန်ပြီး သေဆုံးသွားတာပါ။

“ပျူစောထီးတွေ နေတဲ့နေရာနဲ့ နှမ်းဆီကန်ရွာက ၄ မိုင်လောက်ပဲ ဝေးတယ်။ ပျူတွေက ခဏခဏ နှမ်းဆီကန်ရွာထဲကို ဝင်တယ်။ သူတို့လာတော့ ရွာသားတွေ ပြေးတယ်။ ပြေးလို့ဆိုပြီးလိုက်ပစ်တော့ ကလေးတဦးကို ထိသွားတယ်” လို့ ဆိုပါတယ်။

ပျူစောထီးတွေလက်ချက်ကြောင့် သေဆုံးသွားတဲ့ အသက် (၄) နှစ်အရွယ် ကလေးမလေးရဲ့ ရုပ်အလောင်းကိုလည်း မိသားစုဝင်တွေက သဂြိုလ်ပေးလိုက်ပြီလို့လည်း သိရပါတယ်။

ပျူစောထီးတပ်ဖွဲ့တွေဟာ နေ့လယ် ၁၂ နာရီကျော်လောက်မှာ ကျေးရွာထဲကနေ ပြန်လည်ထွက်ခွာချိန် နှမ်းဆီကန်ရွာသား ၁၀ ဦးကျော်ကို လူသားဒိုင်းအဖြစ် ဖမ်းဆီးခေါ်ဆောင်သွားပြီး လမ်းတဝက်အရောက်မှာတော့ ပြန်လည်လွှတ်ပေးခဲ့တယ်လို့ သိရပါတယ်။

ပြီးခဲ့တဲ့ ၂၀၂၂ ခုနှစ် သြဂုတ်လနဲ့ နိုဝင်ဘာလမှာလည်း နှမ်းဆီရွာက နေအိမ် ၁၉ လုံးကို စစ်ကောင်စီ၊ ပျူစောထီးတပ်ဖွဲ့တွေက မီးရှို့ဖျက်ဆီးသွားတယ်လို့လည်း We Love Myaing အဖွဲ့က ထုတ်ပြန်ထားပါသေးတယ်။

စာတည်း – 007

စစ်ကိုင်း၊ မတ် ၂၈၊ ၂၀၂၃။

စစ်ကိုင်းတိုင်း၊ ကလေးမြို့နယ်၊ လက်ပံချောင်းကျေးရွာမှာ မတ်လ ၂၇ ရက်မနေ့ နေ့လယ် ၁၂ နာရီလောက်က စစ်ကောင်စီတပ်တွေပစ်လိုက်တဲ့ လက်နက်ကြီးကျည် ကျရောက်ပေါက်ကွဲခဲ့လို့ ဒေသခံအမျိုးသမီးတဦး ကျည်ထိမှန် ဒဏ်ရာရရှိခဲ့ပါတယ်။

အသက် ၃၀ နှစ်အရွယ် မဇူးထန်က နေအိမ်ထဲရှိနေချိန် လက်နက်ကြီးကျည် တလုံးက သူ့အိမ်အနောက်ဖက်ကို ကျရောက်ပေါက်ကွဲရာမှာ ဒဏ်ရာရရှိသွားတာလို့ ရွာခံသားတဦးက ပြောပါတယ်။

“ဒဏ်ရာကတော့ ဘယ်ဖက်ခြေထောက်မှာ ရသွားတာ။ သူမကို ကလေးမြို့ ဆေးရုံကို ပို့လိုက်ရတယ်။ အသက်အန္တရာယ်တော့ မစိုးရိမ်ရဘူး” လို့ ဆိုပါတယ်။

ဒီပစ်ခတ်မှုကို ကလေးအခြေစိုက် ဒေသကွပ်ကဲမှုစစ်ဌာနချုပ်မှ လုပ်ခဲ့တာဖြစ်ပြီး တိုက်ပွဲမဖြစ်ပဲ အကြောင်းမဲ့ ပစ်ခတ်ခဲ့တာလို့ ဆိုပါတယ်။

“လက်နက်ကြီးကျည်တွေက သုံး၊ လေးလုံးလောက်ကျ တယ်ဗျ။ အဲဒီထဲကမှ အိမ်ထဲကိုတော့ တလုံးပဲကျတာ။ ကျန်တဲ့အလုံးတွေကတော့ ရွာအပြင်မှာ ကျသွားတာ။ ရွာကလူတွေကတော့ အိမ်တွင်းကနေ အိမ်ပြင်မထွက်ရဲကြတော့ဘူး”လို့ ဆိုပါတယ်။

စစ်ကောင်စီတပ်တွေရဲ့ လက်နက်ကြီး ရမ်းသမ်းပစ်ခတ်မှု၊ စမ်းသပ်ပစ်ခတ်မှုတို့ကြောင့် စစ်ကိုင်းတိုင်း၊ မကွေးတိုင်း၊ ပဲခူးတိုင်းတို့က မြို့နယ်အချို့မှာ အရပ်သား ထိခိုက်၊ သေဆုံးမှုတွေ မကြာခဏဆိုသလို ရှိနေတယ်လို့ ဒေသခံတွေဆီက သိရပါတယ်။

ပြီးခဲ့တဲ့ မတ်လ ၁၃ ရက်ည ၅ နာရီလောက်မှာ မကွေးတိုင်း၊ ပခုက္ကူမြို့နယ်၊ ကျွန်းချောင်း EPC ရုံးဝန်ထမ်းတွေနေထိုင်တဲ့ ရပ်ကွက်ထဲကို စစ်ကောင်စီတပ်တွေပစ်လိုက်တဲ့ လက်နက်ကြီးကျည် ကျရောက်ပေါက်ကွဲခဲ့ရာ ပေါက်တောကျေးရွာမှ မိသားစုဝင် ၄ ဦး ပြင်းထန်ဒဏ်ရာရှိခဲ့ပါတယ်။

ဒါ့အပြင် အခုနှစ်ဖေဖေါ်ဝါရီလ ၂၁ ရက်ည ၈ နာရီလောက်မှာလည်း ခင်ဦးမြို့နယ်၊ အင်းပတ်ကွေ့ကျေးရွာထဲကို စစ်တပ်ကပစ်လိုက်တဲ့ လက်နက်ကြီးကျည် ထိမှန်လို့ အသက် ၆၀ နှစ်အရွယ်အဘွားတဦးနဲ့ ၃၀ နှစ်အရွယ်အမျိုးသားတဦး ကျည်ထိမှန် ဒဏ်ရာရခဲ့ပါသေးတယ်။

စာတည်း – လင်း

ကလေး၊ မတ် ၁၀၊ ၂၀၂၃။

စစ်ကိုင်းတိုင်း၊ ကလေးမြို့ပေါ်က စစ်ကောင်စီတပ်သားတွေဟာ အရပ်သားကား ၂၉ စီးကို ချောဆွဲပြီး ချင်းပြည်နယ်မှာရှိတဲ့ စစ်ကောင်စီတပ်သားတွေဆီကို လက်နက်နဲ့ရိက္ခာ ပို့ဆောင်နေတယ်လို့ သိရပါတယ်။

ကလေးမြို့ဒေသကွပ်ကဲမှုစစ်ဌာနချုပ်(ဒကစ) တပ်မှ စစ်ကောင်စီတပ်သားတွေဟာ အရပ် သားပိုင် ၁၂ ဘီးကား ၁၀ စီး၊ ၆ ဘီးကား ၁၉ စီးတို့နဲ့ မတ်လ ၉ ရက်မနက်ပိုင်းမှာ ချင်းပြည်နယ်၊ ဖလမ်းမြို့ဘက်ကို ထွက်ခွာခဲ့တာ ဖြစ်တယ်လို့ UG တပ်ရင်း ဦးဆောင်သူ ရန်မင်းနိုင်က ပြောပါတယ်။

“ကားပေါ်မှာ ရိက္ခာနဲ့ စကစမိသားစုတွေ ပါတယ်။ အရပ်သား ဓါးစာခံ ၃၀ လောက် ပါမယ်။ ချင်းပြည်နယ်က သူတို့တပ်တွေ ရိက္ခာ၊ ခဲယမ်း အားနည်းနေလို့ပို့တာ။ လေယာဥ်တွေနဲ့လည်း မပို့ရဲတော့ အရပ်သားကားနဲ့ ပို့နေတာပါ။ မတ် ၃ ရက်နေ့က mi 17 တစီး အပစ်ခံရလို့ လေကြောင်းမသုံးတော့တာ” လို့ ဆိုပါတယ်။

ဒီကုန်ကား ၂၀ ကျော်ကို စစ်ကောင်စီအင်အား ၂၀၀ ဝန်းကျင်နဲ့အတူ သံချပ်ကာ ကား ၂ စီး လည်း လုံခြုံရေးလိုက်ပါခဲ့ကြသေးတယ်လို့ သူကဆိုပါတယ်။

ဒီကားတွေထဲမှာ အရပ်သား ၃၀ ဝန်းကျင်ကို စစ်ကောင်စီတပ်သားတွေက ဓားစာခံအဖြစ် ခေါ်ဆောင်သွားတာနဲ့ ပတ်သက်လို့ မြေလတ်အသံအနေနဲ့ သီးခြားအတည်မပြုနိုင်သေးသလို နောက်ဆက်တွဲအခြေအနေကိုလည်း ဆက်လက်စုံစမ်းနေဆဲ ဖြစ်ပါတယ်။

အဆိုပါ ကုန်တင်ကားတွေကို စစ်ကောင်စီတပ်သားတွေက မတ်လ ၆ ရက်နေ့ကတည်းက စီးပွားရေးလုပ်ငန်းရှင်တွေဆီကနေ ချောဆွဲထားတာဖြစ်ပြီး အဲဒီထဲက ကားတချို့ကိုလည်း မတ်လ ၇ ရက်နေ့မှာ ဟားခါးမြို့ကို ဆန်တွေ ပို့ခိုင်းခဲ့သေးတယ်လို့ သိရပါတယ်။

စာတည်း – 007

ကလေး၊ မတ် ၉၊ ၂၀၂၃။

စစ်ကိုင်းတိုင်း(အထက်ပိုင်း)၊ ကလေးမြို့၊ မြို့နယ်စည်ပင်ရုံးဟာ အခွန်တွေ အဆမတန် တိုးတောင်းနေတဲ့အပြင် သာမာန်လက်လုပ်လက်စားဈေးသည်တွေကို ဖမ်းဆီးတာတွေ လုပ်ဆောင်နေလို့ သတိပေးစာပို့ခဲ့တယ်လို့ သိရပါတယ်။

ကလေးမြို့နယ်အတွင်း စစ်တပ်ခေါ်ပြီး လက်နက်အားကိုးနဲ့ အတင်းအဓမ္မ အခွန်ကောက်ခံနေလို့ မတ်လ ၇ ရက်နေ့ မနက် ၁၀ နာရီခွဲလောက်က စည်ပင်ဝန်ထမ်းတွေကနေတဆင့် သတိပေးစာနဲ့အတူ ၇.၆၂ မမ၊ ၅.၅၆ မမ၊ ၉ မမ ကျည်တွေနဲ့အတူ Special Under Ground(SUG) အဖွဲ့က သတိပေးစာ ပေးပို့ခဲ့တယ်လို့ ဆိုပါတယ်။

“မြို့မဈေးမှာ အသားလိုင်စင်တွေက သိန်းထောင်ချီ ဈေးပေါက်တော့ အသားရောင်းတဲ့ ဈေးသည်တွေဆီကနေ မရရအောင် အခွန်ကောက်တယ်။ စျေးက အသားသည် ကောင်မလေးတွေကို အခွန်မဆောင်လို့ဆိုပြီး စည်ပင်က စစ်တပ်ခေါ်ပြီး လက်နက်အပြည့်အစုံနဲ့ ဝင်ဖမ်းသွားတာ။ ၉ ယောက်လောက် အဖမ်းခံထားရတယ်။ ၃ယောက်ကတော့ မနေ့က အလုပ်ကြမ်းနဲ့ထောင် ၃ နှစ်ချလိုက်ပြီ။ သာမာန်လက်လုပ်လက်စားဈေးသည်တွေ” လို့ ကလေးမြို့ဒေသခံတဦးက မြေလတ်အသံကို ပြောပါတယ်။

ကလေးမြို့မှာ ဗိုလ်ချုပ်လမ်းမပေါ်ကလွဲရင် အမှိုက်ကားတွေမလာလို့ ရပ်ကွက်နေပြည်သူတွေက ကိုယ့်အစီစဉ်နဲ့ ကိုယ်အမှိုက်တွေ ပစ်နေရပြီး၊ မီးလောင်ရင်လည်း မီးသတ်ကားတွေ မလာဖို့ စည်ပင်ဦးစီးက ပိတ်ပင်ထားတယ်လို့ ဆိုပါတယ်။

အသားလိုင်စင်တွေကလည်း ဈေးအဆမတန်များနေတဲ့အတွက် ဈေးသည်အများစုဟာ အခွန်ဆောင်နိုင်ခြင်း မရှိဘဲ၊ လိုင်စင်မဲ့ဈေးရောင်းမှုနဲ့ အဖမ်းခံနေရတာတွေ ရှိတယ်လို့ သိရပါတယ်။

စာတည်း – ရင်ငြိမ်း

ကလေး၊ မတ် ၆၊ ၂၀၂၃။

စစ်ကိုင်းတိုင်း၊ ကလေးမြို့ပေါ်က ပျူစောထီးအဖွဲ့ရဲ့ ခေါင်းဆောင်ဆိုသူကို မတ်လ ၅ ရက်မနက် ၁၂ နာရီကျော်မှာ ပစ်ခတ်ရှင်းလင်းခဲ့တယ်လို့ မြို့ပြ UG အဖွဲ့တာဝန်ရှိသူက ပြောပါတယ်။

သေဆုံးသူမှာ အောင်မေတ္တာရပ်ကွက်နေ ချမ်းမြေ့အောင်(ခ)ဖိုးချမ်းဖြစ်ပြီး၊ သူ့ကို စမ်းမြို့ရပ်ကွက်၊ ဗိုလ်ချုပ်လမ်းမကြီးပေါ်မှာ ပစ်ခတ်ခဲ့တာ ဖြစ်တယ်လို့ ကလေးမြို့ မြို့ပြစီမံချက် UG အဖွဲ့မှ ဦးဆောင်သူ ကိုရန်မင်းနိုင်က ပြောပါတယ်။

“ခေါင်းကို သုံးချက် ပစ်ခဲ့တာပါ။ နေရာမှာတင် ပွဲချင်းပြီးတယ်။ သူက အဲဒီရပ်ကွက်ကို ဘာသွားလုပ်တာလဲတော့ မသိဘူး။ သူက တယောက်တည်းသွားနေတာ” လို့ ဆိုပါတယ်။

ဖိုးချမ်းမှာ က‌လေးမြို့ပေါ်နဲ့ ကျေးရွာတွေက ဆိုင်ကယ် အစီးပေါင်း ၁၀၀ ကျော် ခိုးယူရာမှာ ဂိုဏ်းခေါင်းဆောင် ပြုလုပ်သူ၊ အိတ်စွပ်ရွာက ၁၅ နှစ်အရွယ် မိန်းကလေးတစ်ဦးအား အဓမ္မပြုကျင့် သတ်ထားခဲ့သူ၊ ရွှေဘုံသာဘုရားကြီးလမ်းက လူမိုက်ကျော်ကြီးတို့အဖွဲ့အား ဦးဆောင်ကာ ခိုးဆိုးလုနှိုက် အနုကြမ်းစီးရန် စေခိုင်းခဲ့သူ ဖြစ်တယ်လို့ ဆိုပါတယ်။

ဒါ့အပြင် ကလေးမြို့ရွှေဆိုင်တဆိုင်ကို သေနတ်အတိုတလက်နဲ့ အနုကြမ်းစီးခဲ့ဖူးသူ၊ တော်လှန်ရေးသမားတွေကို ဖမ်းဆီးရာမှာ ​ရှေ့က ဦးဆောင်ပြီး ပါဝင်သူ ဖြစ်သလို PDF တွေရဲ့ လည်းချောင်းသွေးဖောက်သောက်မည်ဟု ကြိမ်းဝါးထားသူ ဖြစ်တယ်လို့ ကိုရန်မင်းနိုင်က ပြောပါတယ်။

ဒါ့အပြင် ကလေးမြို့ မြို့ပြစီမံချက် UG အဖွဲ့အနေနဲ့ မြို့ပေါ်မှာ ကျန်ရှိနေသေးတဲ့ စစ်ကောင်စီ လက်ပါးစေသူတွေကို သတိပေးထားတယ်လို့ ဆိုပါတယ်။

စာတည်း – 007