တိုက်ပွဲအတွင်း လက်နက်ခဲယမ်းတွေနဲ့ သုံ့ပန်း ၇ ဦးဖမ်းမိ

ကလေး၊ စက်တင်ဘာ ၁၁၊ ၂၀၂၅။

စစ်ကိုင်းတိုင်း၊ ကလေးခရိုင်၊ ကလေးမြို့နယ်၊ နန်းစောင်းပုရွာသစ်ကို ထိုးစစ်ဆင်လာတဲ့ စစ်ကော်မရှင်အဖွဲ့ကို တော်လှန်ရေးတပ်တွေက စက်တင်ဘာ ၂ ရက်မှာ တိုက်ခိုက်ခဲ့တာကြောင့် ထိခိုက်သေဆုံးမှုတွေရှိပြီး လက်နက်ခဲယမ်းနဲ့သုံ့ပန်းတွေလည်း ဖမ်းဆီးသိမ်းမိခဲ့တယ်လို့ အမှတ် ၁ စစ်ဒေသက စက်တင်ဘာ ၁၁ ရက် ဒီကနေ့မှာထုတ်ပြန်လာပါတယ်။

စက်တင်ဘာ ၂ ရက်မှာ ကလေးခရိုင်ကွပ်ကဲရေးမှူးဦးစီးတဲ့ ကလေးခရိုင် အမှတ် (၁၊ ၃၊ ၄) တပ်ရင်း၊ အထူးလှုပ်ရှား (၅၊ ၆) တပ်ရင်း၊ ကလေးမြို့နယ် ပကဖ၊ ကလေးဝမြို့နယ် ပကဖ၊ မင်းကင်းမြို့နယ် ပကဖ၊ ကလေးခရိုင် အထူးစစ်ကြောင်း၊ ကလေးမြို့နယ် ပြည်သူ့လုံခြုံရေးတပ်ဖွဲ့ (ပလဖ) နဲ့ Zoland PDF ပူးပေါင်းအဖွဲ့တို့က တိုက်ခိုက်ခဲ့တာဖြစ်ပြီး တိုက်ပွဲတွေအတွင်း စစ်ကော်မရှင်တပ်ဖွဲ့ဝင် သုံ့ပန်း ၇ ဦး ဖမ်းဆီးရမိပြီး အလောင်း ၄ လောင်းနဲ့ လက်နက် ၅ လက် သိမ်းဆည်းရမိခဲ့တယ်လို့ ဆိုပါတယ်။

စစ်ကော်မရှင်စစ်ကြောင်းဆီက MA1 ၃ လက်၊ MA3 ၁ လက်၊ MA11 ၁ လက်၊ 7.62 ကျည် ၂၇၇ တောင့်၊ 5.56 ကျည် ၈၉ တောင့်၊ RPG ဗုံးသီး ၁ လုံး၊ RPG ပို့ယမ်း ၃ ခု၊ နင်းမိုင်း ၁၂ ခလုံး၊ မိုင်းရှင်းစက် ၁ ခု၊ ကျည်အိမ်မျိုးစုံ ၁၉ ခုနဲ့ မူးယစ်ဆေး အမျိုးအစား ၃ မျိုး သိမ်းဆည်းရမိတယ်လို့ ထုတ်ပြန်ချက်မှာ ဖော်ပြပါတယ်။

စစ်ကော်မရှင်ဘက်က ဒကစ (ကလေး) လက်အောက်ခံ တတက-၁၀ မှ ဗိုလ်မှူး ရဲမျိုးမင်း၊ ဗိုလ်ကြီး ပြည့်ဖြိုးအောင်၊ ဗိုလ်ကြီး နိုင်းဝင်းစိုးတို့ ဦးစီးတဲ့ ခမရ ၃၆၁၊ ၃၆၂၊ ၃၆၃၊ ဆသရ-၆၊ ခလရ ၈၇၊ ၂၂၉၊ SNA၊ အိန္ဒိယနိုင်ငံသားတွေဖြစ်တဲ့ ကသည်း (ULFA)နဲ့ နာဂ (NSAC) သူပုန်တပ်ဖွဲ့ အင်အား ၁၃၀ ခန့် ထိုးစစ်ဆင်လာခဲ့တယ်လို့ ထုတ်ပြန်ချက်မှာ ဖော်ပြပါတယ်။

တိုက်ပွဲအတွင်း စစ်ကော်မရှင်ဘက်က လက်နက်ကြီးတွေနဲ့ ပစ်ခတ်တာ၊ ဒရုန်းတွေနဲ့ ဗုံးချတိုက်ခိုက်မှုတွေပြုလုပ်ခဲ့ကာ စစ်ကော်မရှင်တပ်ဟာ ကလေးခရိုင်အတွင်းကသည်း – ULFA နဲ့ နာဂ – NSAC သူပုန်တပ်ဖွဲ့တို့ကို ယခုနှစ် ဩဂုတ်လကစတင်အသုံးပြုခဲ့ပြီး ၎င်းအဖွဲ့တွေဟာ ဩဂုတ်လအတွင်း ချင်းတွင်းမြစ်ကြောင်းအတိုင်း ခန္တီးခရိုင်အတွင်းမှ စုန်ဆင်းလာသော သင်္ဘောတွေနဲ့ လိုက်ပါခဲ့တယ်လို့ လည်း ဆိုပါတယ်။

စစ်ကော်မရှင်စစ်ကြောင်းဟာ ဩဂုတ် ၆ ရက်က စတင်ထိုးစစ်ဆင်တိုက်ခိုက်လာတာဖြစ်ပြီး ဩဂုတ် ၁၅ ရက်မှာလည်း စစ်ကော်မရှင်ဘက်က သုံ့ပန်း ၁ ဦး၊ အလောင်း ၃ လောင်းနဲ့ လက်နက်မျိုးစုံ ၁၀ လက် တို့ကို တော်လှန်ရေးတပ်တွေဘက်က သိမ်းဆည်းရမိခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ သြဂုတ် ၂၄၊ ၂၀၂၅။

စစ်ကိုင်းတိုင်း၊ ကလေးမြို့နယ်မှာ စစ်ကော်မရှင်တပ်နဲ့ တော်လှန်ရေးပူးပေါင်းတပ်ဖွဲ့တို့ ၁၀ ရက်တာ ထိတွေ့တိုက်ပွဲဖြစ်ခဲ့ပြီး စစ်ကော်မရှင်တပ်ဖွဲ့ဝင် ၃ ဦးသေဆုံးပြီး သုံ့ပန်း ၁ ဦးနဲ့ လက်နက်ခဲယမ်းတွေကိုလည်း ဖမ်းမိသိမ်းဆည်းခဲ့တယ်လို့ သြဂုတ် ၂၄ ရက်ဒီကနေ့မှာ အမှတ် ၁ စစ်ဒေသက ထုတ်ပြန်ပါတယ်။

ကလေးမြို့ပေါ်ကနေ အင်အား ၁၂၀ ပါတဲ့ စစ်ကော်မရှင်တပ်ဖွဲ့ဝင်တွေက နန်းစောင်းပုကျေးရွာကို ထိုးစစ်ဆင်လာခဲ့တာကြောင့် သြဂုတ် ၆ ရက်ကနေ ၁၅ ရက်အထိ ၁၀ ရက်ကြာ တိုက်ပွဲဖြစ်ပွားခဲ့တာလို့ ဆိုပါတယ်။

တိုက်ပွဲအတွင်း စစ်ကော်မရှင်တပ်ဖွဲ့ဝင် ၁ ဦးကို အရှင်ဖမ်းမိခဲ့ပြီး ရုပ်အလောင်း ၃ လောင်းနဲ့ MG 42 ၁ လက်၊ BA 100 ၁ လက်၊ MA 4 ၁လက်၊ MA E ၂လက်၊ MA 1 ၂လက်၊ MA 3 ၂လက်၊ G 3 ၁ လက်တို့ကို ကနဦး သိမ်းဆည်းရရှိခဲ့ပါတယ်။

ဒါ့အပြင် MG 42 ပြောင်းပို ၂ ခု၊ RPG ဒုံးသီး ၅ ခု၊ ကျည်ဘောက်မျိုးစုံ ၂၄ ခု၊ ၄၀ မမ ဗုံးသီး ၁၂ လုံး၊ ၇.၆၂ ကပစကျည် ၁,၉၀၃ တောင့်၊ ၅.၅၆ ကပစကျည် ၁,၃၈၉ တောင့်၊ ၁၄ မိုင်း ၅ ခု၊ ၈၄ မမ မှန်ပြောင်း ၁ ခု၊ ၈၁ မမ မှန်ပြောင်း ၁ ခု၊ အီနာဂါ ဗုံးသီး ၁ ခု၊ ကျည်ကာဦးထုပ် ၁ လုံးတို့ကိုလည်း ထပ်မံသိမ်းဆည်းရရှိခဲ့တယ်လို့ ထုတ်ပြန်ချက်မှာဖော်ပြပါတယ်။

စစ်ကြောင်းထိုးလာတဲ့ စစ်ကော်မရှင်တပ်မှာ တတက ၁၀ မှ ဗိုလ်မှူး သန်းမင်းထိုက်၊ ဗိုလ်ကြီး ထွန်းလင်းသူ၊ စကခ ၁၀ လက်အောက်ခံ ခမရ ၃၆၃ မှ ဗိုလ်ကြီး ၀င်းမင်းစိုး တို့ဦးစီးတဲ့ စစ်ကြောင်းဖြစ်တယ်လို့လည်း ဆိုထားပါတယ်။

အဆိုပါတိုက်ခိုက်မှုကို အမှတ် (၅) အထူးလှုပ်ရှားတပ်ရင်း၊ အမှတ် (၆) အထူးလှုပ်ရှားတပ်ရင်း၊ ကလေးခရိုင် အမှတ် (၄) တပ်ရင်း၊ ကလေးခရိုင် အထူးစစ်ကြောင်း (PDF + ပကဖ)၊ ကလေးမြို့နယ် ပကဖ၊ ကလေးဝမြို့နယ် ပကဖ၊ မင်းကင်းမြို့နယ် ပကဖ၊ PDF Zoland -Drone Team တို့က ပူး‌ပေါင်းလုပ်ဆောင်ခဲ့ တာဖြစ်ပါတယ်။

ဖြူး၊ ဇူလိုင် ၃၀၊ ၂၀၂၅။

ပဲခူးတိုင်း၊ ဖြူးမြို့နယ်၊ ဝဲဒေါင့်ဝဲကြီးကျေးရွာတိုက်ပွဲအတွင်းမှာ ကလေး ၁ ဦးအပါအဝင် ပြည်သူ ၄ ဦးသေဆုံးပြီး ၅၀ ကျော်ဒဏ်ရာရတယ်လို့ ကူညီဆောင်ရွက်ပေးနေသူတွေဆီက သိရပါတယ်။

ဇွန် ၂၉ ရက်မနက် ၂ နာရီခန့်မှာ ကျေးရွာအတွင်းတပ်စွဲထားတဲ့ စစ်ကောင်စီအဖွဲ့ကို ဖြူးပကဖ ပူးပေါင်းတပ်တွေဘက်က လာရောက်တိုက်ခိုက်ရာမှ တိုက်ပွဲပြင်းထန်ခဲ့ရာ နှစ်ဖက်လက်နက်ကြီး ပစ်ခတ်တာရှိသလို စစ်ကောင်စီဘက်က လေကြောင်းကနေလာရောက်ဗုံးကြဲတာတွေလည်းရှိခဲ့တယ်လို့ ဆိုပါတယ်။

“နှစ်ဖက်ပွဲကနေချိန်မှာ စကစဘက်က လေကြောင်းအကူအညီတောင်းတဲ့အချိန်မှာ လာကြဲသွားတာလည်းပါတယ်။ အစမှန်တဲ့ဒဏ်ရာများတယ်။ ဗုံးကြဲစတွေနဲ့ လက်နက်ကြီးစမှန်တာတွေ ရှိတယ်”လို့ ကူညီဆောင်ရွက်ပေးနေသူတဦးက ပြောပါတယ်။

လေကြောင်းကနေကြဲတဲ့ ဗုံးပေါက်ကွဲစတွေနဲ့ လက်နက်ကြီးစတွေမှန်တာကြောင့် အသက် ၇ နှစ်အရွယ် မောင်ဇွဲပြည့်၊ အသက် ၃၀ ကျော်အရွယ်အမျိုးသမီး ၁ ဦး၊ ၃၅ နှစ်အရွယ် ဒေါ်သီတာဦး နဲ့ ၅၆ နှစ်အရွယ် ဒေါ်ခင်အေးစုတို့ သေဆုံးခဲ့တယ်လို့ ဆိုပါတယ်။

ဒါ့အပြင် ကလေးငယ် ၄ ဦးအပါအဝင် အမျိုးသမီး၊ အမျိုးသား ၄၅ ဦးခန့်ဒဏ်ရာခဲ့ကာ စောင့်ကြည့်ကုသရမယ့်အခြေအနေကြောင့် ဆေးရုံမှာကုသမှုခံယူနေရသူ ကလေးငယ် ၃ ဦးအပါအဝင် ၂၀ ဦးခန့်ရှိနေသေးပြီး ကျန်သူတွေကတော့ ဆေးရုံကနေ နေအိမ်ပြန်သွားကြပြီလို့ သိရပါတယ်။

ဆေးရုံမှာကုသဆဲ လူနာတွေအနက် ၇ လသားအရွယ်ကလေးငယ် အပါအဝင် ၅ ဦးက စိုးရိမ်ရအခြေအနေရှိပြီး ကျန်သူတွေကတော့ ဦးခေါင်း၊ လက်၊ ခြေထောက်၊ ခန္ဓာကိုယ်တွေမှာ အစမှန်ဒဏ်ရာတွေရထားကြတာလို့ ဆိုပါတယ်။

ဝဲဒေါင့်ဝဲကြီးကျေးရွာရှိ စစ်ကောင်စီကင်းစခန်းကို တိုက်ခိုက်ခဲ့ရာ တိုက်ပွဲ ၅ နာရီခန့်ကြာမြင့်ခဲ့ပြီး တိုက်ပွဲအတွင်းမှာ စစ်ကောင်စီဘက်က ၁၀ ဦးထက်မနည်းသေဆုံးကာ ရန်ကုန်တိုင်းပကဖ အဖွဲ့ဝင် ၁ ဦးသေဆုံးပြီး ဖြူးပကဖအဖွဲ့ဝင်တဦးဒဏ်ရာရတယ်လို့ ဖြူးပကဖကထုတ်ပြန်ထားပါတယ်။

အဆိုပါတိုက်ပွဲအခြေအနေနဲ့ပတ်သက်ပြီး ဖြူးပကဖထံကို မြေလတ်အသံက ဆက်သွယ်မေးမြန်းထားပေမယ့် ပြန်လည်ဖြေကြားတာမျိုးမရှိပါဘူး။

အဆိုပါ တိုက်ခိုက်မှုကို ဖြူးမြို့နယ်ပကဖ၊ ရန်ကုန်တိုင်းပကဖ တိုက်ခိုက်ရေးတပ်ဖွဲ့(၃)၊ ဧရာဝတီအမှတ်(၃)တပ်ရင်းနှင့် အာဠာဝကစစ်ကြောင်းတို့ ပူးပေါင်းတိုက်ခိုက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဇွန် ၂၅ ရက်ကလည်း ပဲခူးတိုင်း၊ ညောင်လေးပင်၊ ကျောက်တံခါး၊ ဖြူးမြို့နယ်တွေအတွင်းက ရန်ကုန်-မန္တလေး အမြန်လမ်းဟောင်းပေါ်ရှိ စစ်ကောင်စီတပ်ဖွဲ့စခန်း ၉ ခုကို တပြိုင်နက် တိုက်ခိုက်ခံရပြီး တိုက်ပွဲတွေအတွင်း စစ်ကောင်စီတပ်ဖွဲ့ဝင် ၂၀ ဦးထက်မနည်းသေဆုံးကာ ရဲအုပ် ၁ ဦးအပါ စစ်သုံ့ပန်း ၃ ဦးကို ဖမ်းဆီးရရှိခဲ့ပြီး တော်လှန်ရေးတပ်ဖွဲ့တွေဘက်ကလည်း ၁ ဦး သေဆုံး၊ ၂ ဦး ထိခိုက်ဒဏ်ရာရခဲ့သလို လက်နက်ခဲယမ်းအများအပြားကိုလည်း သိမ်းဆည်းရမိခဲ့တယ်လို့ NUG ကာကွယ်ရေးဝန်ကြီးဌာနထုတ်ပြန်ချက်အရ သိရပါတယ်။

စာတည်း – လင်း