Tag:

ကန့်ဒေါင့်

အင်အားသုံးမီးရှို့နေတာက စစ်တပ်ရဲ့ ကန့်ဒေါင့်ရေရှည်ထိန်းချုပ်နိုင်ရေးအစီအမံလား (ဆောင်းပါး)

by ဟိန်းစံ ၁၁ လ အကြာက

written by ဟိန်းစံ

မြေလတ်အသံ၊ ဩဂုတ် ၂၄၊ ၂၀၂၅။

ကန့်ဒေါင့်ရဲစခန်းသိမ်းပိုက်ခံရသည့်တိုက်ပွဲအတွင်း တိုက်လေယာဥ် ၁ စီးပါအဆစ်ပေးလိုက်ရသည့် စစ်ကော်မရှင်တပ်က ပုလဲမြို့နယ်အတွင်း ကျေးရွာများကို အငြိုးတကြီး ပြန်လည်မီးရှို့နေသည်။

ဩဂုတ်လနောက်ဆုံးပတ်အတွင်းတွင် စစ်ကိုင်းတိုင်း၊ ပုလဲမြို့နယ်အတွင်းရှိ ကျေးရွာများကို စစ်ကော်မရှင်တပ်နဲ့ပျူစောထီးပူးပေါင်းတပ်များက လှည့်လည်စစ်ကြောင်းထိုးမီးရှို့ခဲ့ပြီး လက်ရှိအထိလည်း ကျေးရွာများအတွင်း တပ်စွဲထားဆဲဖြစ်သည်။

စစ်ကော်မရှင်တပ်များအနေဖြင့် ဩဂုတ်လဆန်းပိုင်းကတည်းက ကန့်ဒေါင့်ရွာအနီး ပျူစောထီးအထိုင်စခန်းတည်ရှိသည့် ဇီးဖြူကုန်းကျေးရွာသို့ စတင်ဝင်ရောက်လာခဲ့ခြင်းဖြစ်ပြီး တတိယအပတ်အတွင်း စစ်ကြောင်းများ စတင်လှုပ်ရှားလာခြင်းဖြစ်သည်။

ဩဂုတ် ၁၆ ရက်တွင် ဇီးဖြူကုန်းရွာပျူစောထီးအထိုင်စခန်းမှ အင်အား ၂၀၀ ကျော် ပါ စစ်ကော်မရှင်ပူးပေါင်းစစ်ကြောင်းသည် ညောင်ပင်ဇောက်ရွာ၊ ကွမ်းကိုင်းရွာများကို စတင်စစ်ကြောင်းထိုးလာပြီး ဩဂုတ်လ ၂၀ ရက်တွင် မင်းတိုင်ပင်ရွာကို ဝင်ရောက်တပ်စွဲကာ နေအိမ်များကို မီးရှို့ခဲ့ကြခြင်းဖြစ်ပြီး ယနေ့မနက်ပိုင်းအထိ ကျေးရွာတွင်းအခြေပြုလျက်ရှိသည်။

” ဒီနေ့မနက်တော့ မင်းတိုင်ပင်ကစစ်ကြောင်း ထပ်ပြီးခွဲထွက်သွားတယ်လို့ ကြားတယ်။ အတည်ပြုနေကြတုန်းပဲ။ ငှက်ပျောတော(တောင်)ရွာက စစ်ကြောင်းလည်း ပြန်ထွက်နေတယ်လို့ ကြားထားတယ်” ဟု မြေပြင်အခြေအနေကိုသိရှိသူတဦးက မြေလတ်အသံကို ပြောသည်။

ထို့နောက် မင်းတိုင်ပင်ကျေးရွာအတွင်းတပ်စွဲနေသည့် အင်အား ၂၀၀ ကျော်ပါ စစ်ကြောင်းမှ ထုတ်နုတ်အင်အား ၆၀ ခန့်သည် ဩဂုတ် ၂၂ ရက်တွင် အိုင်းမရွာသို့ ဆက်လက်ဝင်ရောက်ခဲ့ပြီး ထပ်မံမီးရှို့ခဲ့ကြောင်း ဒေသခံများထံက သိရသည်။

စစ်ကော်မရှင်တပ်များ၏ မီးရှို့မှုကြောင့် အိမ်ခြေ ၁,၀၀၀ ကျော်ရှိ မင်းတိုင်ပင်ရွာ၏ ၆၀ ရာခိုင်နှုန်း (အိမ်ခြေ ၅၀၀ ကျော်) မီးလောင်ပြာကျခဲ့ကြောင်း ဒေသခံများမှ ခန့်မှန်းထားပြီး မင်းတိုင်ပင်နှင့် အိုင်းမရွာတို့တွင် စစ်ကြောင်းများလက်ရှိအထိ ရှိနေခြင်းကြောင့် နေအိမ်ပျက်စီးမှုအသေးစိတ်အခြေအနေများကို မသိရှိရသေးပေ။

ပုလဲမြို့နယ်၊ ကန့်ဒေါင့်ရွာရဲစခန်းကို PLA နဲ့ မဟာမိတ်တော်လှန်ရေးပူးပေါင်းတပ်များက ဇွန်လ ၁၉ ရက်တွင် သိမ်းယူခဲ့ပြီး ၂ လနီးပါးအကြာ ဩဂုတ်လအတွင်း စစ်ကော်မရှင်တပ်က အဆိုပါစခန်းကို ပြန်လည်ရရှိရေးအင်အားအလုံးအရင်းဖြင့် ထိုးစစ်ဆင်လာခြင်းဖြစ်သည်။

စခန်းသိမ်းပိုက်မခံရမီရက်ပိုင်းတွင်လည်း ဇီးဖြူကုန်းပျူစောထီးအထိုင်စခန်းတိုက်ပွဲကို လေကြောင်းပစ်ကူလာရောက်သည့် တရုတ်ထုတ် F 7 တိုက်လေယာဥ် ၁ စီး ပျက်ကျခဲ့ရာ စစ်ကော်မရှင်တပ်က လေယာဥ်မှူးသေဆုံးပြီး တိုက်လေယာဥ်လည်း ပျက်စီးဆုံးရှုံးထားသည်။

စစ်ကော်မရှင်တပ်က ကန့်ဒေါင့်ရွာအနီး ကျေးရွာများဖြစ်သည့် ညောင်ပင်ဇောက်၊ ကွမ်းကိုင်း၊ မင်းတိုင်ပင်၊ ငှက်ပျောတော၊ အိုင်းမနဲ့ ချောင်းဦး ကျေးရွာများကို စစ်ကြောင်းထိုး မီးရှို့နေသော်လည်း ကန့်ဒေါင့်ရွာကို အပြည့်အဝ ပြန်လည်ထိန်းချုပ်နိုင်ခြင်းမရှိသေးကြောင်း PLA အတွင်းရေးမှူး ဒေါ်နီနီကျော်က ပြောသည်။

“ ကန့်ဒေါင့်ကိစ္စက အခု နောက်ပိုင်းရက်တွေ သတင်းတွေပြတ်နေတယ်ပေါ့လေ။ ပထမတုန်းက တော့ သူတို့ ကန့်ဒေါင့်ဘက်ကို စစ်ကြောင်းထိုးလာပြီးတော့ ကန့်ဒေါင့်နားအထိ ရောက်တယ်ပေါ့နော်။ တချို့သတင်းအရ လည်း သူတို့ ကန့်ဒေါင့်ထဲကို ခဏဝင်သွားတယ်၊ ဒါပေမယ့် သူတို့ ပြန်ထွက်သွားတယ်ပေါ့နော်။ ရဲဘော်တွေနဲ့ မဟာမိတ်တွေနဲ့၊ ကျမတို့ရဲဘော်တွေနဲ့ သူတို့ တချို့ရွာတွေမှာ ထိတွေ့တိုက်ပွဲဖြစ်တာတွေတော့ ရှိတယ်ပေါ့နော်၊ နောက်ပိုင်းအခြေအနေတော့ ကျမ မသိရသေးဘူး” ဟု သူက ပြောသည်။

ကန့်ဒေါင့်ရွာအနီးကို စစ်ကောင်စီတပ်များအင်အားအများအပြားဖြင့်ရောက်ရှိနေပြီး ကျေးရွာအတွင်းအခြေပြုတပ်စွဲထားခြင်းမရှိသေးသည်မှာ ကန့်ဒေါင့်ရဲ စခန်းသိမ်းပိုက်ပြီးနောက် တော်လှန်ရေးပူးပေါင်းတပ်များမှ ရဲစခန်းအတွင်းရှိ စစ်ကော်မရှင်တပ်ဖွဲ့ဝင်များ တည်ဆောက်ထားသည့် ဘန်ကာများ ၊ အဆောက်အဦများအားလုံးကို မြေတူးစက်များဖြင့် ဖြိုချဖျက်ဆီးရှင်းလင်းခဲ့ခြင်းကြောင့်ဟု မြေပြင်အခြေအနေသိရှိသူတဦးမှ ခန့်မှန်းပြောဆိုသည်။

“ ကန့်ဒေါင့်က ပြန်ပါသလောက်ဖြစ်နေပြီ။ ရွာထဲကို စစ်ကြောင်းတွေက ဝင်လိုက်ထွက်လိုက်လုပ်ပြီး ပျောက်နေတယ်။ ရဲစခန်းက ခုကဘာမှမရှိတော့ဘူး ကွင်းပြင်ကြီးလိုဖြစ်နေတာ။ အကုန်ဒိုဇာနဲ့ထိုးပြီးရှင်းထားတာ ။ ဒီကောင်တွေ ဘန်ကာတွေ ကတုတ်ကျင်းတွေ ဘာမှမရှိတော့ ရွာထဲ အပြီးမဝင်သေးတဲ့အခြေအနေမျိုး” ဟု ၎င်းက ဆိုသည်။

စစ်ကော်မရှင်တပ်ကိုထောက်ခံရေးသားနေသည့် တယ်လီဂရမ်ချန်နယ်များတွင် မင်းတိုင်ပင်ကျေးရွာကို ပြန်လည်သိမ်းပိုက်နိုင်ပြီးဟု ဩဂုတ်လ ၂၂ ရက်တွင် ရေးသားဖော်ပြနေကြသော်လည်း လက်ရှိစစ်ကော်မရှင်တပ် စစ်ကြောင်းထိုးဝင်ရောက်တပ်စွဲနေသည့်နေရာများသည် တော်လှန်ရေးတပ်ဖွဲ့များ၏ အထိုင်စခန်းများတည်ရှိခြင်းမရှိဟုလည်း ဒေသခံများက ဆိုသည်။

လက်ရှိတွင် စစ်ကော်မရှင်စစ်ကြောင်းများက ကန့်ဒေါင့်ကျေးရွာအား ပြန်လည်ထိန်းချုပ်ထားနိုင်သည့်အခြေအနေဖြစ်ကြောင်း မြေပြင်တပ်ဖွဲ့ဝင်များက ပြောဆိုထားပြီး မင်းတိုင်ပင်၊ ငှက်ပျောတော၊ အိုင်းမ၊ ချောင်းဦးနှင့် လက်ပုကန်ရွာများတွင် စစ်ကြောင်း ၁ ကြောင်းလျှင် အင်အား ၆၀ ဝန်းကျင်ဖြင့် စစ်ကြောင်း ၅ ကြောင်းခွဲပြီး တပ်ဖြန့်ထားသည်။

ထို့အပြင် ကန့်ဒေါင့်အနီးရှိ ပျူစောထီးအားကောင်းသည့် ဇီးဖြူကုန်း၊ အင်မထီး၊ သရက်ကန်ကျေးရွာအထိုင် စခန်းများကို စစ်ကော်မရှင်တပ်က အင်အားဖြည့်တင်းနေသည်။

ဩဂုတ်လ ၂၂ ရက်နေ့လယ်ပိုင်းတွင် ဇီးဖြူကုန်းရွာပျူစောထီးအထိုင်စခန်းသို့ မုံရွာ နမခမှ ပျံသန်းလာသည့် Mi-17 ထောက်ပို့ရဟတ်ယာဥ်ဖြင့် လူအင်အားထပ်မံဖြည့်တင်းခဲ့ကြောင်းသိရှိရပြီး ထပ်မံရောက်ရှိသည့် စစ်အင်အားများကိုလည်း ကန့်ဒေါင့်အနီးရှိ စစ်ကြောင်းများထံ ဆက်လက်ပို့ဆောင်နေကြောင်း သိရသည်။

စစ်ကော်မရှင်စစ်ကြောင်းများကြောင့် မင်းတိုင်ပင်၊ လက်ပုကန်၊ နှောကန်၊ နှောရိုး၊ ကျောက်ဖျာကန်၊ မြေနီကုန်း၊ ငှက်ပျောတော၊ စပါးစေ့၊ မန်ကျည်းကုန်း၊ အိုးဘို၊ အိုင်းမ၊ သရက်ချောင်းနား၊ သပြေကုန်း၊ ညောင်ပင်စု၊ ကုန်းကိုင်း၊ ကုက္ကိုလ်ကုန်း စသည့်ကျေးရွာများမှ ဒေသခံ ၈,၀၀၀ ကျော်နေရပ်စွန့်ခွာထွက်ပြေးနေရကြောင်း သိရသည်။

စစ်ကော်မရှင်တပ်မှ စစ်အင်အားအများအပြားဖြင့် စစ်ကြောင်းများခွဲကာ တပ်ဖြန့်နေခြင်း၊ ကန့်ဒေါင့်ရွာအနီးကျေးရွာများကို စစ်ကြောင်းထိုးမီးရှို့မှုများလုပ် ဆောင်နေခြင်းသည် ကန့်ဒေါင့်ရွာကို ရေရှည်ပြန်လည်ထိန်းချုပ်နိုင်ရေး လုပ်ဆောင်နေခြင်းဖြစ်ကြောင်း မြေပြင်တော်လှန်ရေးတပ်ဖွဲ့ဝင်များက သုံးသပ်ထားသည်။

၁၁ လ အကြာက 0 comments 58 views

ကန့်ဒေါင့်ရဲစခန်းကို တော်လှန်ရေးတပ်တွေထိန်းချုပ်ထားဆဲဟု ဆို

by ကျော်စွာ ၁၂ လ အကြာက

written by ကျော်စွာ

ပုလဲ၊ ဩဂုတ် ၂၊ ၂၀၂၅။

ပြည်သူ့လွတ်မြောက်ရေးတပ်မတော် – PLA နဲ့ ပူးပေါင်းတပ်တွေသိမ်းပိုက်ထားတဲ့ ပုလဲမြို့နယ်၊ ကန့်ဒေါင့်ရဲစခန်းကို စစ်ကောင်စီတပ်ကပြန်လည်မထိန်းချုပ်နိုင်သေးဘူးလို့ မြေပြင်တော်လှန်ရေးတပ်တွေဆီက သိရပါတယ်။

ဩဂုတ် ၂ ရက်မှာ ကန့်ဒေါင့်ရဲစခန်းကို စစ်ကောင်စီဘက်က ပြန်လည်သိမ်းပိုက်သွားပြီလို့ ပြည်သူတွေအကြားမှာပျံ့နှံ့မှုတွေရှိနေခဲ့ပေမယ့် ဒီကနေ့ညနေပိုင်းအထိ တော်လှန်ရေးတပ်တွေဘက်က ထိန်းချုပ်ထားဆဲဖြစ်တယ်လို့ သိရပါတယ်။

လက်ရှိအချိန်ထိ PLA အပါအဝင် တော်လှန်ရေးပူးပေါင်းတပ်တွေက ဆက်လက်ကာကွယ်ထားကြောင်း ကျားသစ်နက်တပ်မတော်မှ ကိုဥက္ကာက မြေလတ်အသံကိုအတည်ပြုထားပါတယ်။

ပုံစာ – ကန့်ဒေါင့်စခန်းသိမ်းပြီးနောက် နယ်မြေရှင်းလင်းရေးလုပ်နေသည့် တော်လှန်ရေးတပ်ဖွဲ့ဝင်အချို့။ (ပုံဟောင်း)

“စစ်တပ်ထိုင်သွားတာ မဟုတ်ဘူးဗျ။ အခုချိန်ထိ သူတို့ထိုးစစ်ပေါ့နော်၊ ကန့်ဒေါင့်ပြန်ရရှိရေးအတွက် ထိုးစစ်လုပ်နေတာပါဗျ စစ်ကောင်စီက။ ဒါကို ကျနော်တို့ တော်လှန်းရေးအင်အားစုတွေက ပူးပေါင်းပြီးတော့ ကာကွယ်နေပါတယ်၊ လုံးဝ ဒီကန့်ဒေါင့်ကို ပြန်ပေးလိုက်ရတယ်ဆိုတာ သတင်းအမှားပါ။” လို့ ကိုဥက္ကာက ပြောပါတယ်။

ကန့်ဒေါင့်ရွာအနီးမှာ ဩဂုတ် ၁ ရက်ညပိုင်းကလည်း အင်အား ၁၂၀ ခန့်ပါစစ်ကြောင်းနဲ့ PLA ပူးပေါင်းတပ်တွေနဲ့ စစ်ကောင်စီတပ်တို့ ထိတွေ့တိုက်ပွဲဖြစ်ခဲ့သေးတယ်လို့ သူက ဆက်ပြောပါတယ်။

“ကန့်ဒေါင့်ပရဝုဏ်မှာ ဖြစ်တာဗျ၊ ကန့်ဒေါင့်နဲ့ အနီးကပ်ဆုံးနေရာတွေမှာ သူတို့ ထိုးစစ်ဆင်လာတာ၊ ကျနော်တို့နဲ့ ထိတွေ့မှုဖြစ်တာမဟုတ်ဘူး၊ ဒါတော့ PLA နဲ့ဖြစ်တာပေါ့၊ အခုလည်း ကျနော်တို့ ရဲဘော်တွေ အားလုံးပေါ့၊ PLA ပါမယ်၊ ကျားသစ်နက်ပေါ့ ကျနော်တို့ ယင်းမာပင်ခရိုင် တပ်ရင်း ၁၁ပါမယ်၊ နောက် အညာဗျူဟာပါမယ်၊ ABSDF တို့ပါမယ်၊ အခြား Local တွေပါမယ်ပေါ့၊ အားလုံးက ကာကွယ်နေပါတယ်ဗျ။” လို့ ကိုဥက္ကာက ဆိုပါတယ်။

ကန့်ဒေါင့်နဲ့နီးတဲ့ရွာတွေမှာ နှစ်ဖက်ထိတွေ့တိုက်ပွဲတွေဖြစ်နေပေမယ့် ကန့်ဒေါင့်ကိုစစ်ကောင်စီတပ်က ဝင်သိမ်းသွားတယ်ဆိုတာဟာ သတင်းမှားသာဖြစ်ကြောင်း PLAရဲ့ ပြောရေးဆိုခွင့်ရှိသူ ရဲဘော် နီနီကျော်က မြေလတ်အသံကိုအတည်ပြုပြောဆိုပါတယ်။

“အခုလည်း ကန့်ဒေါင့်နဲ့ ၂ရွာ ၃ရွာအကွာက ရွာတွေမှာတိုက်ပွဲဖြစ်နေတယ်လို့ သိရတယ်၊ အဲဒီတော့ ကန့်ဒေါင့်ထဲကို သူတို့ ဝင်သိမ်းသွားတယ်ဆိုတဲ့သတင်းက မှားနေတယ်။” လို့ ရဲဘော်နီနီကျော်က ပြောပါတယ်။

ဒါ့အပြင် လက်ရှိအချိန်ထိ စစ်ကောင်စီတပ်ကကန့်ဒေါင့်စခန်းကို အလုံးစုံပြန်လည် ထိန်းချုပ်ထားနိုင်တာမျိုးမရှိသေးဘဲ တော်လှန်ရေးတပ်တွေနဲ့ စစ်ဆိုင်နေတဲ့အနေအထားသာ ရှိသေးတယ်လို့ ယင်းမာပင်ခရိုင်ထဲက ဒေသခံတပ်ဖွဲ့ဝင်တဦးကလည်း ပြောပါတယ်။

“ကန့်ဒေါင့်ထဲမှာ PLA တွေရော သူတို့ဆိုင်ထားတဲ့သဘောမှာ ရှိတယ်၊ အဲဒီလို အနေအထားတော့ရှိတယ်၊ ပြန်ပေးလိုက်ရတယ်ဆိုတာတော့ လက်ရှိအချိန်အထိ မပြတ်သေးတဲ့ကိစ္စလို့ ပြောလို့ရတယ်။” လို့ သူကပြောပါတယ်။

ဒါ့အပြင် တော်လှန်ရေးတပ်ဖွဲ့ဝင်တွေအနေနဲ့ လက်ရှိစစ်ရေးအခြေအနေအရ ကန့်ဒေါင့်စခန်းကနေ ဆုတ်ခွာထားတဲ့အခြေအနေရှိပေမယ့် ကန့်ဒေါင့်စခန်းထဲအထိ စစ်ကောင်စီတပ်တွေ ရောက်လာတာမျိုး၊ အထိုင်ချသွားတာမျိုးတွေတော့ မရှိသေးဘူးလို့ ဒေသတွင်းတော်လှန်ရေးတပ်ဖွဲ့ဝင် ၁ ဦးက ပြောပါတယ်။

ကန်ဒေါင့်ကျေးရွာနယ်မြေရဲစခန်းကို PLA၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက် တစ်တပ်ဦး – ABSDF၊ ကျားသစ်နက်တပ်မတော် စတဲ့တပ်ဖွဲ့တွေအပါအဝင် တော်လှန်ရေးတပ်တွေက ဇွန် ၂ ရက်က စတင်ထိုးစစ်ဆင်တိုက်ခိုက်ခဲ့ရာ ၁၇ ရက်အကြာ ဇွန် ၁၉ ရက်မှာ အပြီးသိမ်းပိုက်ရရှိခဲ့တာ ဖြစ်ပါတယ်။

စာတည်း – လင်း

၁၂ လ အကြာက 0 comments 42 views

တိုက်ပွဲ သတင်း

ပုလဲတိုက်ပွဲကိုပို့ခံရတဲ့ စစ်ကောင်စီတပ်သား ၁ ဦး ဘက်ပြောင်းခိုလှုံ

by အောင်စိုး ၁ နှစ် အကြာက

written by အောင်စိုး

မြေလတ်အသံ၊ ဇွန် ၁၅၊ ၂၀၂၅။

စစ်ကိုင်းတိုင်း၊ ပုလဲမြို့နယ်၊ ကန့်ဒေါင့်ရွာစခန်းသိမ်းတိုက်ပွဲကိုပို့ခံရတဲ့ စစ်ကောင်စီတပ်သား ၁ ဦး လက်နက်ခဲယမ်းတွေနဲ့အတူ ဘက်ပြောင်းခိုလှုံလာခဲ့တယ်လို့ ဇွန် ၁၅ ရက်ဒီကနေ့မှာ ယင်းမာပင်ခရိုင် အမှတ် ၁၂ တပ်ရင်းက ထုတ်ပြန်ပါတယ်။

ဘက်ပြောင်းလာသူမှာ အသက် ၄၀ အရွယ် တပ်သား ထက်လင်းအောင် (ခ) ကျော်ကို ဖြစ်ပြီး MA1 ၁ လက်၊ ကျည် ၄၅ တောင့်၊ လက်ပစ်ဗုံး ၁ လုံး၊ M 14 နင်းမိုင်း ၁ လုံးနဲ့ အတူ ဇွန် ၆ ရက်မှာ စစ်ကြောင်းကနေထွက်ပြေးလာတာလို့ ဆိုပါတယ်။

“ဖုန်းတွေကတော့ သိမ်းခံထားရတယ်တဲ့။ စစ်ကြောင်းကနေထွက်ပြေးလာပြီး ရွာတွေက ဘယ်ဘက်ရှိတာလဲမေးပြီး အလင်း၀င်လာတာပါ။ ပုလဲနယ်မရောက်ခင်ကတည်းက အလင်း၀င်ဖို့ စစ်ကြောင်းထဲမှာပါတဲ့ စိတ်ချင်းတူတဲ့ ၂ ယောက် ညှိထားရာကနေ အလင်း၀င်မဲ့ နောက်တယောက်က ထိတွေ့မှုဖြစ်ပြီးကျသွားလို့ တယောက်တည်း စစ်ကြောင်းထွက်ပြေးလာတာ။”လို့ ယင်းမာပင်ခရိုင် အမှတ် ၁၂ တပ်ရင်းမှတာဝန်ရှိသူတဦးက ပြောပါတယ်။

ထက်လင်းအောင်ဟာ မုံရွာမြို့အခြေစိုက် အနောက်ပိုင်းစစ်ဌာနချုပ်ကနေ တိုက်ပွဲပြင်းထန်နေတဲ့ ကန့်ဒေါင့်စခန်းကို ရဟတ်ယာဉ်နဲ့စစ်ကူပို့လာတဲ့ အင်အား ၁၄၀ ပါစစ်ကောင်စီအဖွဲ့တွေနဲ့ ပါဝင်လာခဲ့တာလို့ သူကဆိုပါတယ်။

ပြီးခဲ့တဲ့ဇွန် ၂ ရက်မှစကာ တော်လှန်ရေးတပ်ဖွဲ့တွေထိုးစစ်ဆင်တိုက်ခိုက်နေတဲ့ ကန့်ဒေါင့်ကျေးရွာနယ်မြေရဲစခန်းသိမ်းတိုက်ပွဲဟာ ဇွန် ၁၅ရက်ဒီကနေ့အထိ တိုက်ပွဲပြင်းထန်နေသလို စစ်ကောင်စီတပ်ဘက်ကလည်း လေကြောင်းကနေ နေ့တိုင်းဗုံးကြဲနေတာကြောင့် ဒေသခံထိခိုက်သေဆုံးမှုရှိနေတယ်လို့ သိရပါတယ်။

လက်ရှိမှာ ထက်လင်းအောင်အနေနဲ့ သူ့နေရပ်ကိုပြန်ရင်ဖမ်းဆီးခံရမှာစိုးလို့ နေရပ်ကိုမပြန်ဘဲ မုံရွာခရိုင် အမှတ် ၁၂ တပ်ရင်းမှာပဲ လွတ်လွတ်လပ်လပ်နေထိုင်ခွင့်ပြုထားတယ်လို့ အထက်ပါတာဝန်ရှိသူက ဆိုပါတယ်။

ဧရာ၀တီတိုင်း၊ ပန်းတနော်မြို့ခံတဦးဖြစ်တဲ့ ထက်လင်းအောင်ဟာ ၂၀၂၄ အောက်တိုဘာလမှာ ပန်းတတော်မြို့မရဲစခန်းမှာ အချုပ်ကျခံနေရာကနေ အမှတ် ၅ ခြေမြန်တပ်သားသစ်အဖြစ် ခေါ်ဆောင်ခံရကာ စစ်သင်တန်း ၅ လပြီးဆုံးပြီးနောက် ရေနီမြို့နဲ့ တောင်ငူမြို့ နယ်တို့က စစ်မြေပြင်မှာ တာဝန် ၂ လထမ်းဆောင်ခဲ့ဖူးတယ်လို့ သိရပါတယ်။

ပြီးခဲ့တဲ့နှစ် အောက်တိုဘာ ၂၆ ရက်ကလည်း ပုလဲမြို့နယ်၊ ကန်ဒေါင့်နယ်မြေရဲစခန်းက အသက် ၃၇ နှစ်အရွယ် ရဲတပ်ကြပ် ၁ ဦး BA 63 (G3) သေနတ် ၁ လက်နဲ့ ကျည်အချို့၊ လက်ပစ်ဗုံး ၁ လုံးယူဆောင်ကာ ပုလဲမြို့ နယ်ပြည်သူ့အုပ်ချုပ်ရေးအဖွဲ့ (ပအဖ)ထံ အလင်းဝင်ရောက်လာတာလို့ သိရပါတယ်။

စာတည်း – လင်း

၁ နှစ် အကြာက 0 comments 14 views

27 July 2026 2:29 PM

ကန့်ဒေါင့်

အင်အားသုံးမီးရှို့နေတာက စစ်တပ်ရဲ့ ကန့်ဒေါင့်ရေရှည်ထိန်းချုပ်နိုင်ရေးအစီအမံလား (ဆောင်းပါး)

ကန့်ဒေါင့်ရဲစခန်းကို တော်လှန်ရေးတပ်တွေထိန်းချုပ်ထားဆဲဟု ဆို

ပုလဲတိုက်ပွဲကိုပို့ခံရတဲ့ စစ်ကောင်စီတပ်သား ၁ ဦး ဘက်ပြောင်းခိုလှုံ

MYAELATT

ATHAN

သတင်း

ဆောင်းပါး

အထူးကဏ္ဍ