ကနီ

စစ်ကိုင်း၊ မေ ၁၈၊ ၂၀၂၃။

စစ်ကိုင်းတိုင်း၊ ကနီမြို့နယ်၊ ချောင်းမရွာကို စစ်ကောင်စီတပ်က မေလ ၁၇ ရက် မနေ့ကနေ့လည် ၂ နာရီ ခန့်မှာ လေယာဉ် ၂ စီးနဲ့ ဗုံးကြဲတိုက်ခိုက်ခဲ့တာကြောင့် ထိခိုက်ပျက်စီးမှုတွေရှိတယ်လို့ သိရပါတယ်။

ဂျက်ဖိုက်တာ ၂ စီးနဲ့ ချောင်းမရွာ အရှေ့ခြမ်းနဲ့အနောက်ခြမ်းကို ဗုံးကြဲတိုက်ခိုက်ခဲ့လို့ နေအိမ်၊ စာသင်‌ကျောင်းတချို့နဲ့ ရွာအနောက်ဘက်တောအစပ် ဘုန်းကြီးကျောင်းတကျောင်း ထိမှန်ပျက်စီးသွားတယ်လို့ ကနီဒေသခံတဦးက မြေလတ်အသံကို ပြောပါတယ်။

“မနေ့က ကြားရသလောက်က ချောင်းမရွာနဲ့ ၅မိုင်အကွာလောက်မှာထိတွေ့ပစ်ခတ်မှုဖြစ်တယ်။ အဲ့ဒါကို လေယာဉ် ၂ စီးနဲ့ ရှေ့ဆင့်နောက်ဆင့် ရွာထဲကို ဗုံးလာကြဲသွားတာ။ ၇ နှစ်ကလေးငယ်တဦး ဒဏ်ရာရသွားတယ်။ အိမ်ခြေတွေ ဘယ်လောက်ပျက်စီးသွားလဲ ဆိုတာတော့မသိရသေးဘူး” လို့ ပြောပါတယ်။

လေကြောင်းတိုက်ခိုက်မှုကြောင့် နေအိမ်နဲ့ စာသင်ကျောင်းတွေ ထိခိုက်ပျက်စီးခဲ့ပြီး ဒဏ်ရာရရှိသူတွေလည်းရှိတယ်လို့ သိရပေမယ့် အသေးစိတ်အချက်အလက်ကိုတော့ မသိရသေးပါဘူး။

ကနီမြို့နယ်ထဲမှာ မေလ ၁၁ ရက်နေ့ကစပြီး မေလ ၁၇ ရက် မနေ့ကအထိ စစ်ကောင်စီတပ်ဖွဲ့တွေနဲ့ ဒေသကာကွယ်ရေးပူးပေါင်းတပ်ဖွဲ့များကြား ထိတွေ့တိုက်ပွဲတွေ မကြာခဏဖြစ်ပွားနေတာလည်း ဖြစ်ပါတယ်။

တိုက်ပွဲများအတွင်း စစ်ကောင်စီတပ် ထိခိုက်သေဆုံးမှုတွေများပြားနေလို့ လေကြောင်းသုံးတိုက်ခိုက်နေတာလို့ တော်လှန်ရေးအင်အားစုတွေဘက်က ပြောဆိုထားပြီး မေလ ၁၄ ရက် ညနေ ၃နာရီလောက်ကလည်း ကနီမြို့နယ်၊ မင်းမရွာကို လေယာဉ်နဲ့ လာရောက်ဗုံးကြဲသွားတယ်လို့လည်း သိရပါတယ်။

စာတည်း – ရင်ငြိမ်း

ကနီ၊ ဧပြီ ၂၂၊ ၂၀၂၃။

စစ်ကိုင်းတိုင်း၊ ကနီမြို့နယ်အတွင်းမှာ ဧပြီလ ၂၁ ရက် မနေ့ ညနေ ၅ နာရီလောက်က လေပြင်းတိုက်ခတ်ခဲ့လို့ လူနေအိမ် ၁၅၀ နီးပါး ပျက်စီးသွားတယ်လို့ ဒေသခံတွေဆီက သိရပါတယ်။

ကနီမြို့နယ် ချင်းတွင်းမြစ်အနောက်ဘက်ကမ်းက ကျေးရွာတွေဖြစ်တဲ့ အိုင်တောင် မြောက်ရွာ၊ အရှေ့ရွာ၊ အနောက်ရွာနဲ့ အဲ့ဒီအနီးနားမှာရှိတဲ့ ကျေးရွာ ၅ ရွာကို အချိန်အခါမဟုတ် လေပြင်းတိုက်ခတ်ခဲ့တာကြောင့် လူသေဆုံးတာမျိုး မရှိပေမယ့် နေအိမ် တော်တော်များများပျက်စီးသွားတယ်လို့ ကနီဒေသခံတဦးက မြေလတ်အသံကို ပြောပါတယ်။

“မိုးများပြီး လေကြမ်းတာ။ လေပြင်းဝင်တာ ၈ ရွာပေါ့။ အဲ့ဒီလောက် လေကြမ်း၊မိုးကြမ်းတာ တခါမှမကြုံဖူးဘူး ပထမဆုံးပဲ။ မီးတွေလည်း ဖြတ်ခံထားရတာ ၂ ရက်ရှိပြီ။ အခုချိန်ထိလည်း မီးမလာသေး” လို့ဆိုပါတယ်။

မနေ့ ညနေ ၅ နာရီလောက်မှာ လေပြင်း စတင်တိုက်ခတ်ခဲ့တာ ဖြစ်ပြီး အချိန် ၄၅ မိနစ်ခန့် တိုက်ခတ်ခဲ့တာဖြစ်ကာ ညနေ ၆ နာရီဝန်းကျင်မှာ လေပြင်းတိုက်ခတ်တာ ရပ်တန့်ခဲ့ပေမယ့် မိုးကတော့ ဆက်လက်ရွာသွန်းခဲ့တယ်လို့ သိရပါတယ်။

မနေ့ညနေပိုင်းမှာ ကနီမြို့နယ်အပါအဝင် မြန်မာပြည်အထက်ပိုင်းဒေသတွေဖြစ်တဲ့ စစ်ကိုင်းတိုင်းအတွင်းက မြို့နယ်တချို့နဲ့ ကချင်ပြည်နယ်အတွင်း မြို့နယ်တချို့မှာလည်း လေပြင်းတိုက်ခတ်ကာ မိုးသည်းထန်စွာ ရွာသွန်းမှုတွေ ဖြစ်ပေါ်ခဲ့တယ်လို့ သိရပါတယ်။

စာတည်း – ရင်ငြိမ်း

ကနီ၊ ဧပြီ ၁၄၊ ၂၀၂၃။

စစ်ကိုင်းတိုင်း၊ ကနီမြို့နယ်၊ တူမီးသင်္ကြန်ကာလအတွင်းမှာ ကျဆုံးခဲ့တဲ့ ရဲဘော် (၁၀) ဦးအတွက် ၂ နှစ်ပြည့် အခမ်းအနားကို ကနီနွေဦးတော်လှန်ရေးသပိတ်အင်အားစုနဲ့ ပြည်သူတချို့က ကျင်းပခဲ့ကြပါတယ်။

ဧပြီလ ၁၄ ရက် ဒီနေ့ မနက် ၇ နာရီလောက်မှာ ကနီ နွေဦးသပိတ်တော်‌လှန်ရေးသပိတ်အင်အားစုနဲ့ ဒေသခံပြည်သူတွေ စုပေါင်းပြီး လူဦးရေ ၁၀၀ ကျော်နဲ့ ကနီနယ် မုံရွာ-ယားကြီး-ကလေးဝ ကားလမ်းမတနေရာမှာ အောက်မေ့ဖွယ်အခမ်းအနားကို ကျင်းပခဲ့တယ်လို့ သပိတ်မှာပါဝင်သူ တဦးက ပြောပါတယ်။

“ဒီနေ့နံနက် ၇ နာရီမှာစပြီး ၇ ခွဲမှာပြီးတယ်ဗျ။ လမ်းမကြီးပေါ်မှာပါ လုံခြုံရေးအရမို့ပါ။ မုံရွာ-ယာကြီး-ကလေးဝ လမ်းက မဟာဗျူဟာကျတဲ့ လမ်းကြီးဆိုတော့ အချိန်ကြာကြာလုပ်ဖို့က အဆင်မပြေလို့ပါ။ အရင်နှစ်ကလည်း အောက်မေ့ဖွယ်အခမ်းအနားကို ပြုလုပ်ပေးပါတယ်” လို့ ဆိုပါတယ်။

အခမ်းအနားမှာ သပိတ်အင်အားစုနဲ့ ဒေသခံတွေက သွေးသစ္စာသီချင်းသံပြိုင် သီဆိုတာ၊ စစ်အာဏာရှင်ကြွေးကြော်သံတွေနဲ့ ကြွေးကြော် ဆန္ဒပြတာ၊ သပိတ်ဦးဆောင်သူတွေက စစ်အာဏာရှင်ဆန့်ကျင်ရေး တော်လှန်ရေးတရားတွေ ဟောပြောတာ၊ လွမ်းသူ့ပန်းခွေချတာတွေကို ပြုလုပ်ခဲ့ကြတယ်လို့ သိရပါတယ်။

ပြီးခဲ့တဲ့ ၂၀၂၁ ခုနှစ် သင်္ကြန်အကြတ်နေ့၊ ကနီနယ်၊ လှည်းဘီးပွဲ (မုံရွာ-ယာကြီး-ကလေးဝ လမ်း လှည်းဘီးစားသောက်ဆိုင်နား ဖြစ်တဲ့တိုက်ပွဲ)မှာ အာဇာနည်ရဲဘော် (၇) ဦး ကျဆုံးသွားပြီး နှစ်ဆန်းတရက်နေ့ ဆယ်ရွာချောင်တိုက်ပွဲမှာလည်း အာဇာနည်ရဲဘော် (၃) ဦး တူမီးလက်နက်ကိုင်ဆွဲပြီး တိုက်ပွဲဝင်ရင်း ကျဆုံးသွားခဲ့တယ်လို့ ဆိုပါတယ်။

ဧပြီလ ၁၃ ရက်နေ့ မနေ့ကလည်း ကနီမြို့နယ်က နွေဦးတော်လှန်ရေးသပိတ်အင်အားစုက တူမီးသပိတ် တူမီးသင်္ကြန် စစ်ဏာရှင်ဆန့်ကျင်ရေးသပိတ် သင်္ကြန်အကြိုနေ့မှာ ကျင်းပပြုလုပ်ခဲ့ပါသေးတယ်။

စာတည်း – 007

ကနီ၊ ဧပြီ ၁၃၊ ၂၀၂၃။

စစ်ကိုင်းတိုင်း၊ ကနီမြို့နယ်မှာ ကနီနွေဦးတော်လှန်ရေးသပိတ် အင်အားစုနဲ့ ပြည်သူတွေ ဦးဆောင်ပြီး တော်လှန်သင်္ကြန် (အကြိုနေ့)သပိတ် ပြုလုပ်ခဲ့ပါတယ်။

ဧပြီလ ၁၃ ရက် ဒီနေ့မနက် ၇ နာရီလောက်မှာ အင်အား ၁၀၀ ကျော်နဲ့ စစ်အာဏာရှင်ဆန့်ကျင်ရေး သပိတ်ကို မုံရွာ-ယာကြီး-ကလေးဝ ကားလမ်းတနေရာမှာ ကျင်းပပြုလုပ်ခဲ့တယ်လို့ သပိတ်မှာ ပါဝင်သူတဦးက ပြောပါတယ်။

“အချိန်က မနက် ၇ နာရီမှာစပြီး ၇ နာရီ ၂ဝ မိနစ်မှာ ပြီးပါတယ်။ တူးမီးသပိတ် တူမီးသင်္ကြန်၊ အာဇာနည်စိတ်မွေး ဖက်ဒရယ်တည်ဆောက်၊ အလံမလိပ် အသံမတိတ် စခကျွန်မခံ ကနီသပိတ် ဘန်နာ စာသား‌တွေ ကိုင်ဆောင်ပြီး စစ်အာဏာရှင် ဆန့်ကျင်ရေးတရား ဟောပြောခဲ့ကြတယ်” လို့ ဆိုပါတယ်။

ဒါ့အပြင် သွေးသစ္စာသီချင်း သီဆိုပြီး “စခများသေ အညာမြေ၊ ဘာသင်္ကြန်လဲ တော်လှန်သင်္ကြန် တူမီးသပိတ် တူမီးသင်္ကြန်” စတဲ့ စစ်အာဏာရှင်ဆန်ကျင်ရေး ကြွေးကြော်သံတွေကိုလည်း ကြွေးကြော်ခဲ့ကြတယ်လို့ သိရပါတယ်။