သေဆုံး

စစ်ကိုင်း၊ ဧပြီ ၃၊ ၂၀၂၃။

စစ်ကိုင်းတိုင်း၊ ရွှေဘိုမြို့၊ တက္ကသိုလ်ဂိတ်ပေါက်မှာ အထိုင်ချတပ်စွဲထားတဲ့ စစ်ကောင်စီတပ်နဲ့ ဒေသခံကာကွယ်ရေးတပ်တို့ သွားရောက်တိုက်ခိုက်ရာက ၂ ဘက်စလုံး သေဆုံးမှုတွေရှိခဲ့တယ်လို့ Burma Rangers – ShweBo အဖွဲ့က သတင်းထုတ်ပြန်ပါတယ်။

ရွှေဘိုမြို့အရှေ့ဘက်အထွက် ရွှေဘို – ကျောက်မြောင်းလမ်းပေါ်က တက္ကသိုလ်ကျောင်းရှေ့က စစ်ကောင်စီဂိတ်မှာ မနေ့ညနေ ၃ နာရီလောက်က ထိတွေ့မှုဖြစ်ခဲ့တာလို့ ဆိုပါတယ်။

“ဂိတ်ရှေ့ကကောင် ၆ ယောက်ကျတာပါ။ ပစ်ခတ်မှုဖြစ်တာက စက္ကန့် ၃၀ လောက်ပဲရှိမယ်။ မြင်ရတာက ကျတဲ့အထဲမှာ စစ်ဗိုလ်တယောက်ပါတယ်၊ ရဲတယောက်လည်းပါတယ်၊ ကျန်တာက တပ်သားအဆင့်ဖြစ်ဖို့များတယ်၊ စစ်သားသေတာက ပွဲချင်းပြီးပဲ”လို့ Burma Rangers အဖွဲ့မှ သတင်းတာဝန်ခံ ဗိုလ်အေဓီကပြောပါတယ်။

စစ်ကောင်စီဘက်က ထိခိုက်သေဆုံးမှုတွေနဲ့ ပက်သက်လို့ မြေလတ်အသံက သီးခြားအတည်မပြုနိုင်သေးပါဘူး။

စစ်ကောင်စီဘက်က ပြန်လည်ပစ်ခတ်တဲ့အတွက် ကာကွယ်ရေးတပ်ဖွဲ့၀င်‌တွေဘက်က အသက်၂၂ နှစ်အရွယ် ရဲဘော်ဝဿန်နဲ့ ရဲဘော်ပေါက်စတို့ ကျဆုံးခဲ့ပြီး သူတို့ကို ဒီနေ့နေ့လယ် ၁၂ နာရီမှာ သင်္ဂြုလ်ခဲ့တယ်လို့ သူကဆက်ပြောပါတယ်။

ကျဆုံးရဲဘော်တွေက ဘယ်အဖွဲ့အစည်းကလည်း ဆိုတာကိုတော့ သတင်းပြန်ကြားရေးတာ၀န်ခံ ဗိုလ်အေဓီက ပြောကြားခဲ့ခြင်း မရှိပါဘူး။

အဲ့ဒီတိုက်ခိုက်မှုမှာ BurmaRangers – ShweBoနဲ့ မဟာမိတ်အဖွဲ့တွေဖြစ်တဲ့ ရွှေတောသား Local ပျောက်ကျားတပ်ဖွဲ့၊ Shwe Bo Dhuwun (PLA)၊ X-Force LPDF Shwe Bo၊ People’s Revolution Front – ပြည်သူ့တော်လှန်ရေးတပ်ဦး အဖွဲ့တို့ ပူးပေါင်းတိုက်ခိုက်ခဲ့တာလို့ သိရပါတယ်။

စာတည်း – လင်း

စစ်ကိုင်း၊ ဧပြီ ၃၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ပုလဲမြို့နယ်၊ မင်းတိုင်ပင်ရွာအနီး ဧပြီလ ၂ ရက် မနေ့ နေ့လည် ၁ နာရီခန့်မှာ ဖြစ်ပွားခဲ့တဲ့ တိုက်ပွဲအတွင်း စစ်ကောင်စီတပ်က ဗိုလ်ကြီး မင်းမြတ်သူ အပါ ၂ ဦး သေဆုံးခဲ့တယ်လို့ သိရပါတယ်။

မင်းတိုင်ပင်ရွာနဲ့ နှောကန်ရွာအကြားမှာ ဆိုင်ကယ်စီးစစ်ကောင်စီတပ်ဖွဲ့ဝင် ၂ ဦးက PDF တွေကို သေနတ်နဲ့ လိုက်လံပစ်ခတ်စဉ် PDF တွေဘက်က ပြန်လည်ခုခံပစ်ခတ်တာကြောင့် သေဆုံးတာလို့ ဒေါင်းနက်နယ်စည်းမခြားတပ်ဖွဲ့တာဝန်ခံ နတ်ဆိုးက မြေလတ်အသံကို ပြောပါတယ်။

“ဒီကောင် ၂ ကောင်က ကျနော်တို့ရဲဘော်တွေ ကင်းပုန်းဝပ်နေတဲ့နေရာကို လာပစ်တာ။ ကျနော်တို့က နောက်ကိုဆုတ်ပေးတာကို နောက်ကလိုက်ပစ်တယ်။ ဆုတ်ပေးရင်းကနေ ကာလို့ကောင်းတဲ့နေရာရောက်တော့ ကျနော်တို့က ပြန်ပြီးနှစ်ဖက်ဝိုင်းပစ်တာ ၂ ကောင်လုံး သေတယ်။ ၁ ကောင်က ၃ ပွင့် ဗိုလ်လို့ သိရတယ်” လို့ ပြောပါတယ်။

သေဆုံးခဲ့တဲ့စစ်ကောင်စီတပ်ဖွဲ့ဝင် ၂ ဦးဆီကနေ သူတို့ကိုင်ဆောင်တဲ့ MA 3 သေနတ် ၂ လက်၊ ကျည်ဘောက် ၄ ခု၊ ဖုန်း ၂ လုံးရရှိခဲ့ပြီး အဲ့ဒီစစ်ကောင်စီတပ်သားတွေဟာ ခမရ ၇၀၄ တပ်ရင်းက ဖြစ်တယ်လို့ ဆိုပါတယ်။

“သူတို့ဆီမှာ ဗုံးသီးတွေလည်း ပါတယ်။ သူတို့စစ်ကြောင်းက နောက်ကလိုက်လာလို့ အဲ့တာတွေတော့ မကောက်နိုင်ခဲ့ဘူး။ သေနတ် ၂ လက်နဲ့ ကျည်ဘောက်တွေရယ်၊ ဖုန်း ၂ လုံးရယ်၊ ရွှေဆွဲကြိုးအတု ၂ ကုံး ရယ် ရခဲ့တယ်။ သေနတ်တွေက သူတို့တပ်ရင်း အမှတ်အသားတွေနဲ့ ဖုန်းထဲက ဓာတ်ပုံတွေအရ ၇၀၄ တပ်ရင်းကလို့ သိရတယ်” လို့ သူကဆက်ပြောပါတယ်။

ခမရ ၇၀၄ တပ်ရင်းဟာ ရန်ကုန်တိုင်း၊ တိုက်ကြီးမြို့နယ်၊ တိုက်ကြီး-ဂျိုးဖြူလမ်းပေါ် ၁ မိုင်ရပ်ကွက် အခြေစိုက် စစ်ကောင်စီတပ်ရင်းဖြစ်ပြီး ဖူးကြီးအခြေစိုက် အမှတ် ၄ စစ်ဆင်ရေးကွပ်ကဲမှုဌာန ချုပ်(စကခ-၄) လက်အောက်ခံတပ်ရင်း ဖြစ်ပါတယ်။

စကခ ၄ နဲ့လက်အောက်ခံတပ်ရင်းတွေဟာ စစ်ကိုင်းတိုင်း၊ စစ်ကိုင်းခရိုင်၊ ရေဦးခရိုင်နဲ့ ယင်းမာပင်ခရိုင်တွေမှာ စစ်ကြောင်းထိုးဝင်ရောက်နေတာဖြစ်ပြီး စစ်ဆင်ရေးကွပ်ကဲမှုဌာနချုပ်မှူး(စကခမှူး) ဟာ ဗိုလ်မှူးကြီး နိုင်ဇော်ဦး ဆိုသူဖြစ်တယ်လို့ တပ်သတင်းရင်းမြစ်တွေဆီက သိရပါတယ်။

နှောကံကျေးရွာက တိုက်ခိုက်မှုကိုတော့ ချင်းတွင်းရိုးမရာဇာတပ်ခွဲ ၂၊ ဒေါင်းနက်နယ်စည်းမခြားအဖွဲ့၊ ရဲခေါင်ပြောက်ကျားတပ်ဖွဲ့၊ ခရိုင်တပ်ရင်း(၂၀)တို့က ပူးပေါင်းလုပ်ဆောင်ခဲ့တာဖြစ်တယ်လို့ သိရပါတယ်။

စာတည်း – ရင်ငြိမ်း

စစ်ကိုင်း၊ ဧပြီ ၃၊ ၂၀၂၃။

စစ်ကိုင်းတိုင်း၊ ဟုမ္မလင်းမြို့နယ်၊ နောင်ပိုအောင်ကျေရွာရှိ စစ်ကောင်စီလက်အောက်ခံ နောင်ပိုအောင် ရဲစခန်းကို ဒေသခံကာကွယ်ရေးတပ်ဖွဲ့ဝင်တွေက ဧပြီလ ၂ ရက်ညပိုင်းမှာ ဝင်ရောက်တိုက်ခိုက်ခဲ့ရာ ထိခိုက်သေဆုံးမှုတွေ ရှိခဲ့တယ်လို့ သိရပါတယ်။

အဲ့ဒီစခန်းမှာ ရဲအင်အား ၁၅ ဦးဝန်းကျင် တပ်စွဲနေပြီး သူတို့ကို မနေ့ည ၉ နာရီခွဲလောက်မှာ ဝင်ရောက်တိုက်ခိုက်ခဲ့တာလို့ Homalin People’s Defense Force -HPDF 124 တာဝန်ခံ ကိုချာလီက ပြောပါတယ်။

“တိုက်ပွဲချိန်က ၁၅ မိနစ်လောက်ပဲ ကြာတယ်။ အဲဒီစခန်းမှာ သေဆုံးတာက ၃ ယောက်ရှိပြီး ထိခိုက်ဒဏ်ရာရသူတွေ များတယ်” လို့ Homalin People’s Defense Force -HPDF 124 တာဝန်ခံ ကိုချာလီက ပြောပါတယ်။

တိုက်ပွဲအတွင်း ရဲ ၃ ဦး သေဆုံးခဲ့တယ်လို့ ကာကွယ်ရေးရဲဘော်တွေက ပြောပေမယ့် ဒီသေဆုံးမှုနဲ့ပတ်သက်လို့ မြေလတ်အသံက သီးခြားအတည်မပြုနိုင်သေးပါဘူး။

ဒါ့အပြင် ရဲစခန်းအတွင်းက ဘန်ကာနဲ့ အဆောက်အဦးတွေ ပျက်စီးခဲ့ပြီး၊ လက်ရှိအချိန်အထိ ရဲတွေဘက်က စစ်ရေးလှုပ်ရှားမှုလုပ်ဖို့ ပြင်ဆင်နေတဲ့အပြင် လက်နက်တွေနဲ့လည်း ပစ်ခတ်တာတွေ လုပ်နေတယ်လို့ သိရပါတယ်။

Homalin People’s Defense Force -HPDF 124၊ ခန္တီးခရိုင် တပ်ရင်း (၁)၊ HPDF – မိုးကြိုးနဲ့ HPDF အဖွဲ့တို့က ပူးပေါင်းလုပ်ဆောင်ခဲ့တာလည်း ဖြစ်ပါတယ်။

ပြီးခဲ့တဲ့ မတ်လ ၃၁ ရက်ကလည်း တော်စီရွာမှာ တပ်စွဲထားတဲ့ စစ်အုပ်စုကို Homalin People’s Defense Force -HPDF 124 အဖွဲ့က ဝင်ရောက်စီးနင်းတိုက်ခိုက်ခဲ့ရာ စစ်သား ၄ ဦး သေဆုံးပြီး ၇ ဦး ဒဏ်ရာပြင်းထန်ရရှိခဲ့ကာ HPDF 124 ရဲဘော် ၁ ဦးလည်း လက်မောင်းကျည်မှန်ပြီး အရိုးကျိုးသွားခဲ့တယ်လို့ သိရပါတယ်။

စာတည်း – လင်း

ပဲခူး၊ ဧပြီ ၃၊ ၂၀၂၃။

ပဲခူးတိုင်းဒေသကြီး၊ နတ်တလင်းမြို့နယ်၊ ကြက်မနက်ကျေးရွာရှိ စစ်ကောင်စီတပ်စွဲထားတဲ့ အထိုင်စခန်းကို ဝင်ရှင်းချိန် နှစ်ဖက်ထိခိုက်သေဆုံးတာတွေ ရှိခဲ့တယ်လို့ သိရပါတယ်။

ဧပြီလ ၁ ရက်နေ့ ည ၈ နာရီကျော်ခန့်မှာ အင်အား ၃၀ လောက်နဲ့ ကတုတ်ကျင်း၊ ဘန်ကာတွေနဲ့ အခိုင်အမာတပ်စွဲထားတဲ့ စစ်ကောင်စီစခန်းကို ပြည်သူ့ကာကွယ်ရေးပူးပေါင်းတပ်ဖွဲ့တွေက ပိတောက်ဖြူစစ်ဆင်ရေးအဖြစ် ဝင်ရောက်စီးနင်းချေမှုန်း တိုက်ခိုက်ခဲ့တယ်လို့ Bago Region PDF ပြန်ကြားရေးတာဝန်ရှိသူက ပြောပါတယ်။

“အင်အားတော့များတယ်။ သူတို့တပ်စွဲထားတာက ပဲခူးရိုးမကို ဖြတ်လေးဖြတ်လုပ်ချင်လို့ တပ်စွဲနေထိုင်နေတာဖြစ်တယ်။ တိုက်ပွဲဲဖြစ်တော့ သူတို့ စခန်းကုန်းကို ကျနော်တို့ဘက်က သိမ်းနိုင်ခဲ့တယ်။ ကျနော်တို့ဘက်ကလည်း ကျဆုံးတာရှိတယ်။ သူတို့က ပြည်သူ့နေအိမ်တွေမှာ တပ်စွဲထားတာဆိုတော့ သူတို့နေရာကို မီးရှို့တာတော့ မလုပ်ခဲ့ဘူး။ အဲလိုလုပ်ခဲ့ရင် အခြားပြည်သူနေအိမ်တွေလည်း မီးကူးသွားတာတွေဖြစ်မှာစိုးရတယ်” လို့ ပြောပါတယ်။

တိုက်ပွဲဖြစ်ပွားပြီးနောက်မှာ စစ်ကောင်စီဘက်မှ (၁)ဦးသေဆုံးကာ (၂)ဦးဒဏ်ရာ အပြင်းအထန် (စိုးရိမ်ရ) ရရှိခဲ့သလို စစ်ကောင်စီတပ်ဖွဲ့ဆီကနေ MA-3 ဒင်ခေါက် သေနတ် (၁) လက်၊ ကျည် (၂၀)နဲ့ လက်ပစ်ဗုံး (၁) လုံးတို့ကိုပါ သိမ်းဆည်းရရရှိခဲ့တယ်လို့ ဆိုပါတယ်။

အဲဒီတိုက်ပွဲမှာ သာယာဝတီခရိုင် PDF တပ်ရင်း ၃၈၀၁၊ တပ်ခွဲ ၂ မှ တော်လှန်ရေးတပ်ဖွဲ့ဝင် (၂) ဦးပါ သေဆုံးခဲ့သေးတယ်လို့ သိရပါတယ်။

အဆိုပါ စီးနင်းတိုက်ခိုက်မှုကို ပိတောက်ဖြူစစ်ဆင်ရေးအနေနဲ့ သာယာဝတီခရိုင် PDF တပ်ရင်း ၃၈၀၁ မှ တပ်ခွဲ ၂၊ တပ်ခွဲ ၃၊ တပ်ခွဲ ၄၊ ပြည်ခရိုင် PDF တပ်ရင်း ၃၆၀၂ မှ တပ်ခွဲ ၅၊ တပ်စု ၂ နဲ့ ပြည်ခရိုင် PDF တပ်ရင်း ၃၆၀၁ ပူးပေါင်းလုပ်ဆောင်ခဲ့တာပါ။

၂၀၂၂ ခုနှစ် အောက်တိုဘာလ ၁၁ ရက်နေ့ မနက်ပိုင်းက ကြက်မနက်ကျေးရွာကို အင်အား ၆၀ လောက်နဲ့ စစ်ကြောင်းထိုးလာတဲ့ စစ်ကောင်စီအဖွဲ့ကို ဒေသကာကွယ်ရေးအဖွဲ့တွေက ကြားဖြတ်တိုက်ခိုက်ခဲ့ရာ စစ်ကောင်စီဘက်က ၂ ဦးသေဆုံးပြီး အများပြားဒဏ်ရာရခဲ့သေးတယ်လို့ သိရပါတယ်။

စာတည်း – 007

ပဲခူး၊ ဧပြီ ၂၊ ၂၀၂၃။

ပဲခူးတိုင်းအနောက်ခြမ်း၊ မင်းလှမြို့နယ်အပိုင် ပဲခူးရိုးမထဲမှာ စစ်ကောင်စီတပ်နဲ့ ဒေသခံတော်လှန်ရေးတပ်ဖွဲ့တို့ ထိတွေ့တိုက်ပွဲဖြစ်ပွားပြီး စစ်တပ်ဘက်က ၁ ဦးသေဆုံးခဲ့တယ်လို့ ဧပြီလ ၂ ရက် ဒီကနေ့မှာ Bago Region PDF က သတင်းထုတ်ပြန်ထားပါတယ်။

သာယာဝတီခရိုင် PDF တပ်ခွဲ ၃ စခန်းကို မတ်လ ၃၁ ရက်မနက် ၇ နာရီခွဲလောက်မှာ စစ်သားအင်အား ၅၀ ပါစစ်ကြောင်း ၂ ကြောင်းနဲ့ တိုက်ခိုက်လာလို့ တိုက်ပွဲ ဖြစ်ပွားခဲ့တာလို့ ဆိုပါတယ်။

“စခန်းစီးဖို့ ခြေလျင်တက်လာတာဗျ၊ ကျနော်တို့ဘက်က အသင့်ထောင်ထားတဲ့မိုင်းနဲ့ ခါချဥ်တောင်အနီးမှာဆွဲတာ။ စစ်သား ၁ ယောက်သေတယ်။ ဒဏ်ရာရသူလည်းရှိတယ်၊ အရေအတွက်တော့မသိဘူး”လို့ သာယာဝတီခရိုင် ၃၈၀၂၊ တပ်ခွဲ ၃ တာဝန်ရှိသူက မြေလတ်အသံကို ပြောပါတယ်။

တိုက်ပွဲဖြစ်ပွားပြီးနောက် စစ်ကောင်စီစစ်ကြောင်းဟာ ဆက်လက်စစ်ကြောင်းထိုးလာ တာမျိုး မရှိသေးဘဲ နောက်ကြောင်းပြန်ဆုတ်ကာ တပ်ဖျောက်ထားတာကြောင့် တိုက်ပွဲတွေဆက်ဖြစ်လာနိုင်တယ်လို့ သူက ဆက်ပြောပါတယ်။

ပြီးခဲ့တဲ့ မတ်လ ၂ ရက်ကလည်း မင်းလှ-မြို့ချောင်း-စိန်ကန့်လန့် ရိုးမဖြတ်ကျော် ကားလမ်းပေါ်က ခါချဉ်တောင်ကို စစ်ကြောင်းထိုးဖို့တက်လာတဲ့စစ်ကား ၃ စီးထဲက ၁ စီး တိမ်းမှောက်ခဲ့လို့ ဗိုလ်မှူးတဦး ပွဲချင်းပြီးသေဆုံးခဲ့ပါသေးတယ်။

အုတ်ဖို၊ နတ်တလင်း၊ ပေါင်းတည် စတဲ့မြို့တွေကို စစ်ကောင်စီတပ်က စစ်အုပ်ချုပ်ရေးကြေငြာပြီးတဲ့နောက် ပဲခူးရိုးမအနောက်ခြမ်းကို စစ်အင်အား တိုးချဲ့ချထားသလို အုတ်ဖိုနဲ့ မင်းလှမြို့နယ်အတွင်း ပဲခူးရိုးအစပ်တွေမှာ ဒေသခံကာကွယ်ရေးတပ်တွေနဲ့ မကြာခဏဆိုသလို ထိတွေ့တိုက်ပွဲတွေ ဖြစ်ပွားနေတာလည်း ဖြစ်ပါတယ်။

စစ်ကိုင်း၊ ဧပြီ ၁၊ ၂၀၂၃။

စစ်ကိုင်းတိုင်း၊ ပုလဲမြို့အနောက်ပိုင်း ဗိုလ်ချုပ်ကြေးရုပ်ရှေ့ကင်းလှည့်နေတဲ့ စစ်သား ၁၁ ဦးကို မိုင်းဆွဲတိုက်ခိုက်ခဲ့လို့ စစ်သား ၃ဦးသေဆုံးခဲ့တယ်လို့ ဒေါင်းနက်နယ်စည်းမခြား ပြောက်ကျားတပ်ဖွဲ့ဆီက သိရပါတယ်။

ဧပြီလ ၁ ရက် ဒီနေ့မနက် ၈ နာရီခွဲဝန်းကျင်လောက်မှာ ကင်းလှည့်နေတဲ့စစ်သားတွေကို ဗိုလ်ချုပ်ကြေးရုပ်နဲ့ ပေ ၅၀၀ အကွာအရောက်မှာ ရှေ့ထွက်မိုင်း ၄ လုံးနဲ့ မိုင်းဆွဲတိုက်ခိုက်ခဲ့တာလို့ ဒေါင်းနက်နယ်စည်းမခြားပြောက်ကျားတပ်ဖွဲ့ တာဝန်ခံ ရဲဘော်ပေ က ပြောပါတယ်။

” ရှေ့ထွက်မိုင်း ၄လုံးဆွဲလိုက်တဲ့အခါမှာ ၃ယောက် ကားခနဲ ကျသွားတယ်လို့ မြင်လိုက်ရပြီး ကျနော်တို့ ရဲဘော်တွေက ထွက်ပြေးလာခဲ့တယ်။ နောက်ဆုံး ပုလဲမြို့ထဲက သတင်းပေးချက်အရ ၃ယောက် သေတယ်။ ၂ယောက် ဒဏ်ရာရတယ်လို့ ကျနော်တို့ဆီ သတင်းရောက်လာပါတယ်” လို့ ပြောပါတယ်။

မိုင်းဆွဲခံလိုက်ရတဲ့ စစ်သားတွေဟာ ပုလဲမြို့ပေါ်အထိုင်ချထားတဲ့ စစ်သားတွေဖြစ်လို့ ပုလဲမြို့စောင့်တပ်လို့ အခေါ်များပြီး တပ်အတိအကျကိုတော့ မသိရသေးပါဘူး။

ပြီးခဲ့တဲ့ ဖေဖော်ဝါရီလ ၁၉ ရက်ကလည်း ဆားလင်းကြီးမြို့နယ် နဲ့ ယင်းမာပင်မြို့အစပ်မှာရှိတဲ့ စစ်ကောင်စီယာယီစခန်းကို ဒေါင်းနက်နယ်စည်းမခြားပြောက်ကျားတပ်ဖွဲ့က ဝင်ရောက်စီးနင်း သိမ်းပိုက်နိုင်ခဲ့တယ်လို့ သိရပါတယ်။

စာတည်း- ဇို

မကွေး၊ ဧပြီ ၁၊ ၂၀၂၃။

မကွေးတိုင်းဒေသကြီး၊ ကျောက်ထုမြို့နယ်မှာ စစ်ကောင်စီတပ်ဖွဲ့ဝင်တွေနဲ့ ပြည်သူ့ကာ ကွယ်ရေးတပ်ဖွဲ့ဝင်တွေ ထိတွေ့တိုက်ပွဲဖြစ်ခဲ့ပြီး စစ်ကောင်စီဘက်က ၁၀ ဦးသေပြီး ဒဏ်ရာရသူတွေ များတယ်လို့ YDF ဆီက သိရပါတယ်။

ကျောက်ထုမြို့နယ်၊ စံရွာ အနောက်တောင်ကြောမှာ မတ်လ ၃၀ ရက် နေ့လယ် ၁၂ နာရီဝန်းကျင်အချိန် အင်အား ၁၃၀ နီးပါးရှိတဲ့ စစ်ကောင်စီစစ်ကြောင်းနဲ့ မဟာမိတ်ပူးပေါင်းတပ်ဖွဲ့ ၃ ဖွဲ့ တို့ ၂ ဘက် ထိတွေ့တိုက်ပွဲဖြစ်ခဲ့ကြတာ ဖြစ်တယ်လို့ ယောကာကွယ်ရေးတပ်ဖွဲ့ YDF တာဝန်ခံက ပြောပါတယ်။

“တိုက်ပွဲဖြစ်တာ ၂ နာရီလောက်ကြာမယ်။ စစ်သား ၁၀ ဦး သေတယ်။ ဒဏ်ရာရတဲ့သူလည်းများတယ်။ ဝါးနှစ်ရိုက်အကွာလောက်ပဲ ဝေးတော့ အတိုင်းသား မြင်နေရတယ်။ ကျနော်တို့ဘက်က ၂ ယောက် ဒဏ်ရာရတယ်” လို့ ဆိုပါတယ်။

စစ်ကောင်စီဘက်က ထိခိုက်သေဆုံးမှုကိုတော့ သီခြားအတည်မပြုနိုင်သေးပေမယ့် အဲ့ဒီတိုက်ပွဲမှာ စစ်ကောင်စီဘက်က အထိနာလို့ နေ့လယ် ၃ နာရီခွဲလောက်မှာ လေယာဉ်ပစ်ကူပေးခဲ့ရတယ်လို့ ဆိုပါတယ်။

ဒီတိုက်ပွဲမှာ ယောကာကွယ်ရေးတပ် YDF၊ CDF Mindat၊ ကျောက်ထု PDF တပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်တယ်လို့ သိရပါတယ်။
စာတည်း – ဇို