ရေစကြို

မကွေး၊ မတ် ၃၁၊ ၂၀၂၃။

မကွေးတိုင်း၊ ရေစကြိုမြို့နယ်အတွင်းရှိ ပြည်သူ့ကာကွယ်ရေးတပ်ဖွဲ့ – ရေစကြိုမြို့နယ်ရဲ့ တပ်စခန်းတခုကို စီးနင်းတိုက်ခိုက်ခံရတာကြောင့် ရဲဘော် ၅ ဦးသေဆုံးပြီး၊ လက်နက်အချို့လည်း ဆုံးရှုံးခဲ့တယ်လို့ သိရပါတယ်။

မတ်လ ၃၁ ရက်ဒီမနက်အစောပိုင်း ၄ နာရီလောက်မှာ ရေစကြိုအခြေစိုက် ခလရ ၂၅၆ မှ အင်အား ၇၀ ဝန်းကျင်ပါစစ်သားတွေက အလစ်ဝင်ရောက်ပြီး စီးနင်းတိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့ – ရေစကြိုမှ သတင်းနဲ့ပြန်ကြားရေးတာဝန်ခံက ပြောပါတယ်။

“စီးနင်းတဲ့အချိန်မှာ ရဲဘော်တွေနဲ့အနီးကပ်ထိတွေ့တိုက်ပွဲဖြစ်ခဲ့တယ်၊ ထိတွေ့တဲ့အချိန်မှာ ကျနော်တို့ရဲဘော် ၄ ဦးနဲ့ မဟာမိတ်ရဲဘော်တဦး ကျဆုံးခဲ့တယ်၊ မောင်းပြန်သေနတ်တွေလည်း ဆုံးရှုံးခဲ့တယ်” လို့ အတည်ပြုဖြေဆိုထားပါတယ်။

ထိတွေ့မှုဖြစ်နေချိန်အတွင်း မဟာမိတ်တပ်ဖွဲ့တွေလည်း စစ်ကူရောက်လာခဲ့ကာ တိုက်ပွဲအတွင်းပြည်သူ့ကာကွယ်ရေးတပ်ဖွဲ့ – ရေစကြိုမြို့နယ်က ရဲဘော် ၄ ဦးနဲ့ YLK ပျောက်ကြားတပ်ဖွဲ့က ရဲဘော် ၁ ဦးသေဆုံးခဲ့ပြီး၊ မဟာမိတ်အဖွဲ့တွေထဲက ရဲဘော် ၃ ဦးလည်း ထိခိုက်ဒဏ်ရာရရှိခဲ့တယ်လို့ ဆိုပါတယ်။

သေဆုံးရဲဘော်တွေကို ဒီညနေပိုင်းမှာ မီးသင်္ဂြုဟ်ပေးခဲ့ကာ သူတို့နဲ့ပက်သက်တဲ့ အချက်အလက်တွေကိုတော့ လုံခြုံရေးအရ ထည့်သွင်းပြောကြားခဲ့ခြင်းမရှိပါဘူး။

အဆိုပါစစ်ကောင်စီတပ်တွေဟာ မတ်လ ၃၀ ရက်မနေ့က စစ်ကြောင်းစထွက်လာချိန် ညောင်စောင့်ရွာနဲ့ သမန္တပို့ကျေးရွာကြားအရောက်မှာ မိုင်းဆွဲတိုက်ခိုက်ခံခဲ့ရပြီး အဲ့ဒီနောက်မှ အင်အားထပ်ဖြည့်ကာ ခုလို စီးနင်းတိုက်ခိုက်ခဲ့တာလို့လည်း သိရပါတယ်။

ရေစကြို၊ မတ် ၂၀၊ ၂၀၂၃။

မကွေးတိုင်း၊ ရေစကြိုမြို့နယ်၊ မီးလောင်ကျွန်းရွာကို စစ်ကောင်စီရဲ့တပ်မ ၉၉ ဘီလူးစစ်ကြောင်းက ရုတ်တရက် ပစ်ခတ်ဝင်ရောက်ကာ စီးနင်းထားပြီး ပြည်သူတွေကို ဖမ်းဆီးသတ်ဖြတ်တာတွေ လုပ်နေတယ်လို့ သိရပါတယ်။

မတ်လ ၁၉ ရက် မနေ့ကမနက် ၆ နာရီ‌ဝန်းကျင်ကတည်းက ရွာမှာ စီးနင်းတပ်စွဲထားတာဖြစ်ပြီး၊ စစ်ရှောင်ပြည်သူအများစု အဖမ်းခံထားရသလို အသတ်ခံထားရသူတွေလည်း ရှိနေတယ်လို့ ဒေသခံတဦးက ပြောပါတယ်။

“စစ်ရှောင်အများစု ဖမ်းမိသွားတာပေါ့။ ပြည်သူတွေ ရှောင်နေတဲ့နေရာကို ပစ်ပြီးဝင်စီးတော့ ဒဏ်ရာရတဲ့သူတွေ ရပေါ့။ လွတ်လာတဲ့သူတွေရဲ့ ပြောစကားအရတော့ အသတ်ခံထားရတဲ့ အလောင်း ၂ လောင်း တွေ့တယ်လို့‌တော့ သိရတယ်။ သတင်းတွေကတော့ မျိုးစုံထွက်နေတာ။ အသတ်ခံရတာ ဒီထပ်များတယ်လို့လည်း‌ ကြားနေရတယ်။ စစ်ကြောင်းထွက်သွားမှပဲ သေချာသိရမှာ။ မနေ့ကတော့ ရွာထဲက ဆိုင်ကယ်တွေကို ၃ ကြိမ် မီးရှို့တယ်” လို့ ပြောပါတယ်။

ဓားစာခံအဖြစ် ပြည်သူ ၂၀၀ ကျော်ကို ဖမ်းဆီးထားပြီး၊ သူတို့ကို နေရာ ၃ နေရာ ခွဲထားကာ အဲ့ဒီရွာမှာ ရေစကြိုနဲ့ မြောင်မြို့နယ်အတွင်း ကျေးရွာတွေက ဒေသခံတွေ လာရောက် တိမ်းရှောင်နေကြတာဖြစ်သလို အဖမ်းခံရသူတွေထဲမှာ ရွာပေါင်းစုံက ဒေသခံတွေပါဝင်တယ်လို့ ဆိုပါတယ်။

ဒါ့အပြင် မနေ့က စစ်ကြောင်းဝင်ချိန်မှာလည်း အသက် ၈၀ ဝန်းကျင် အဘိုးတဦး အသတ်ခံရပြီး၊ ၁၇ နှစ်အရွယ် လူငယ်တဦးလည်း ကျည်ထိမှန်ခဲ့တာကြောင့် အခြေအနေ စိုးရိမ်ရကာ ထပ်တိုးကျည်ထိမှန်ထားတဲ့သူတွေလည်း ရှိနေနိုင်တယ်လို့ အထက်ပါဒေသခံက ပြောပြပါတယ်။

ရွာကိုစစ်ကြောင်းဝင်ချိန်ကနေ ဒီကနေ့အချိန်ထိ စစ်အုပ်စုရဲ့သတ်ဖြတ်တာကို ခံရသူ အရေအတွက်နဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲပါ။

အဆိုပါ ဘီလူးစစ်ကြောင်းဟာ ပြီးခဲ့တဲ့မတ်လ ၂ ရက်ကလည်း စစ်ကိုင်းမြို့နယ်၊ တာတိုင်ကျေးရွာက ဒေသခံ ၁၆ ဦးကို ဓါးစာခံအဖြစ် ဖမ်းခေါ်သွားပြီး အဲ့ဒီထဲက ၁၅ ဦးကို စစ်ကြောင်းချီရာလမ်းမှာတင် သတ်ခဲ့ပါသေးတယ်။

အလားတူ မတ်လ ၅ ရက်ကလည်း မြင်းမူမြို့နယ်၊ လက္ကပင်ကျေးရွာကို အင်အား ၁၀၀ ကျော်နဲ့ ဝင်ရောက်လာပြီး ပြည်ကြီးတံခွန်ဆရာတော် ဦးအဂ္ဂ၊ PDF ရဲဘော် ၅ ဦး၊ ရွာခံအမျိုးသား ၄ ဦးတို့ကို ဖမ်းဆီးပြီးနောက် အဲဒီထဲက PDF ရဲဘော် ၅ ဦးကို သတ်ဖြတ်ပြီး အလောင်းတွေကို မြစ်ထဲမျောခဲ့ကြတယ်လို့ သိရပါတယ်။

စာတည်း – လင်း

ရေစကြို၊ မတ် ၁၉၊ ၂၀၂၃။

မကွေးတိုင်း၊ ရေစကြိုမြို့ အမှတ် ၂ ရပ်ကွက်ရှိ စုပေါင်းရုံးဝန်းထဲမှာရှိတဲ့ ရဲနဲ့ စစ်သားတွေကို မတ်လ ၁၈ ရက်မနေ့ညပိုင်းမှာ ဒေသခံကာကွယ်ရေး တပ်ဖွဲ့ဝင်တွေက အဝေးပစ်ရှေ့ထွက်လောင်ချာနဲ့ အနီးကပ် ပစ်ခတ်တိုက်ခိုက်ခဲ့ပါတယ်။

ခလရ ၂၅၈ က တပ်သားတွေအပါအဝင် စစ်သားနဲ့ရဲအင်အား ၂၀၀ ဝန်းကျင်ရှိနေတဲ့ အဲ့ဒီရုံးဝန်းထဲကို မနေ့ည ၇ နာရီခန့်မှာ ပစ်ခတ်ခဲ့ကြတာလို့ Myingyan Black Tiger (MBT) မှ ဗိုလ်မိုက်ခဲက ပြောပါတယ်။

“အင်အားက အယောက် ၂၀၀ ကျော်ရှိတာ။ ကျနော်တို့ ရှေ့ထွက်လောင်ချာနဲ့ သွားပစ်တာ။ မနေ့က ၇ နာရီထိုးမှာပစ်တာ၊ ၁ ချက်ထဲပဲပစ်ခဲ့တာ၊ အနီးကပ်ပစ်ခတ်နိုင်ခဲ့တာ၊ ထိခိုက်သေဆုံးမှုကိုတော့ မစုံစမ်းရသေးဘူး” လို့ ပြောပါတယ်။

ပစ်ခတ်မှုကြောင့် ရုံးဝန်းအတွင်းရှိ အဆောက်အဦအချို့မီးလောင်ပျက်စီးခဲ့ပြီး အသေးစိတ်အချက်အလက်တွေကိုတော့ မသိရသေးဘူးလို့လည်း ဆိုပါတယ်။

အဲ့ဒီစုပေါင်းရုံးဝန်းကို တိုက်ခိုက်တာဟာ ခုတကြိမ်နဲ့ဆို ၄ ကြိမ်မြောက်ရှိပြီး၊ စစ်ကောင်စီဘက်က ၂၅ ဦးနဲ့အထက်သေဆုံးခဲ့တယ်လို့လည်း ဗိုလ်မိုက်ခဲက ပြောပါတယ်။

ပြီးခဲ့တဲ့မတ်လ ၆ ရက်ကလည်း ရေစကြိုနယ်ရှိ MBT စခန်းအတွင်း စစ်ကြောင်းထိုးဝင်လာတဲ့ စစ်သားတွေမိုင်းဆွဲခံရပြီး ၄ ဦးသေဆုံးခဲ့သေးတယ်လို့ ဆိုပါတယ်။

ရေစကြိုမြို့နယ်အတွင်းမှာ စစ်ကောင်စီအဖွဲ့တွေနဲ့ ဒေသခံကာကွယ်ရေးတပ်တို့ မကြာခဏထိတွေ့မှုဖြစ်နေသလို စစ်ကောင်စီလက်အောက်ခံ ဌာနဆိုင်ရာရုံးတွေ ပစ်ခတ်တိုက်ခိုက်တာခံနေရပြီး၊ အုပ်ချုပ်ရေးမှူးတွေနဲ့ စစ်တပ်သတင်းပေး ဆိုသူတွေလည်း ပစ်ခတ်ရှင်းလင်းခံနေရတာပါ။

မတ်လ ၁၈ ရက်မနေ့ကမနက်ပိုင်းမှာလည်း ရေစကြိုအခြေစိုက် ခလရ ၂၅၆ အနီး ကင်းစောင့်နေသူတွေကို ရေစကြိုမြို့နယ်-ပ.က.ဖ အဖွဲ့မှဝင်ရောက်တိုက်ခိုက်ခဲ့ရာ အသက် ၇၀ နှစ်အရွယ် စစ်မှူးထမ်းဟောင်း ဦးကျောက်ခဲဆိုသူ နေရာတင်ပွဲချင်းပြီး သေဆုံးခဲ့ပါတယ်။

ပခုက္ကူ၊ မတ် ၁၆၊ ၂၀၂၃။

မကွေးတိုင်း ၊ ပခုက္ကူခရိုင်၊ ရေစကြိုမြို့နယ်မှာ အရပ်ဖက်ယာဥ်တွေနဲ့ စာရွက်စာတန်းတွေ သယ်ဆောင်လာတာကို လုံခြုံရေးယူပေးနေတဲ့ စစ်ကောင်စီတပ်ဖွဲ့ ပစ်ခတ်တိုက်ခိုက်ခံခဲ့ရတယ်လို့ သိရပါတယ်။

အင်အား ၇၀ နီးပါးနဲ့ လုံခြုံရေးယူနေတဲ့ စစ်ကောင်စီစစ်ကြောင်းကို မတ်လ ၁၅ ရက် မနေ့က နေ့လည် ၃ နာရီခွဲလောက်မှာ မအူကျေးရွာ ပန်းခြံနား၊ ရေစကြို-ချောင်းဦးကားလမ်းနဲ့ ရထားသံလမ်းကြားမှာ ဝင်ရောက်တိုက်ခိုက်ခဲ့တာ ဖြစ်ပြီး တိုက်ခိုက်ချိန် နာရီဝက်ခန့်ကြာမြင့်တယ်လို့ ရေစကြို ပကဖတပ်ဖွဲ့ဝင် တဦးက ပြောပါတယ်။

”ဒိုင်နာကားကို လုံခြုံရေးယူပေးနေတဲ့ စကစတွေကို တိုက်ခိုက်ခဲ့တာပါ။ သူတို့ဘက်က သေဆုံးမှုကို ဘယ်လိုသိရလဲဆိုတော့ ထိတွေ့ပစ်ခတ်နေချိန် သူတို့ဘက်က လူ ၇ ယောက်၊ ၈ယောက်လောက်က ရှေ့ကိုတက်လာတယ်။ အဲဒီလူတွေကို ကျနော်တို့က ပစ်ခတ်ရှင်းလင်းခဲ့တာ” လို့ ဆိုပါတယ်။

ထိတွေ့ပစ်ခတ်မှုဖြစ်ပွားနေချိန် စစ်ကောင်စီဘက်က လက်နက်ကြီးတွေနဲ့ ပြန်လည်ပစ်ခတ်ခဲ့တဲ့အပြင် မအူရဲစခန်းက စစ်ကူတွေ လာရောက်ပစ်ကူပေးခဲ့လို့ တဦးဒဏ်ရာရရှိခဲ့တယ်လို့ အထက်ပါ တပ်ဖွဲ့ဝင်က ဆက်ပြောပါတယ်။

”သူတို့မှာပါတဲ့ လက်နက်ကြီးတွေနဲ့ရော ရဲစခန်းကနေလက်နက်ကြီးတွေနဲ့ ပစ်ကူပေးတဲ့အတွက် ကျနော်တို့ ရဲဘော်တွေ ဆုတ်ခဲ့တယ်။ ဆုတ်ခဲ့တဲ့အချိန် ရဲဘော်တဦးရဲ့ပေါင်ကိုထိသွားတယ်” လို့ ဆိုပါတယ်။

တိုက်ခိုက်မှုကို ပြည်သူ့ကာကွယ်ရေးတပ်ဖွဲ့ ရေစကြိုမြိုနယ်(ပ.က.ဖ)၊ ပခုက္ကူခရိုင်တပ်ရင်း အမှတ်(၉)၊ Super Fighter Drone တပ်ဖွဲ့တို့က ပူးပေါင်းတိုက်ခိုက်ခဲ့ကြတာလို့ သိရပါတယ်။

စာတည်း – ရင်ငြိမ်း

ရေစကြို၊ မတ် ၇၊ ၂၀၂၃။

မကွေးတိုင်း၊ ရေစကြိုမြို့၊ PDF ထိန်းချုပ်မြို့ပေါ် ရပ်ကွက်အတွင်း နယ်ကျွံစစ်ကြောင်းထိုးလာတဲ့ စစ်ကောင်စီတပ်ကို မိုင်းဆွဲတိုက်ခိုက်ခဲ့တယ်လို့ Myingyan Black Tiger – MBT အဖွဲ့ဆီက သိရပါတယ်။

မတ်လ ၆ ရက်နေ့ မနေ့နေ့လည် ၁၁ နာရီလောက်မှာ အင်အား ၁၀၀ ဝန်းကျင်နဲ့ စစ်ကြောင်း ၃ ကြောင်း ခွဲကာ ဝင်ရောက်လာတာ ဖြစ်ပြီး အင်အား ၂၅ ယောက်ခန့် စစ်ကြောင်းဟာ PDF နယ်မြေ အမှတ် ၁ ထင်းတန်းရပ်ကွက်အတွင်း နယ်ကျွံလာချိန် မိုင်းဆွဲတိုက်ခိုက်ခဲ့တာလို့ အဖွဲ့တာဝန်ခံ ဗိုလ်မိုက်ခဲက မြေလတ်အသံကို ပြောပါတယ်။

“ရုံးပေါင်းစုံနဲ့ ဆေးရုံမှာ တပ်စွဲထားတဲ့ကောင်တွေ စစ်ကြောင်း ၃ ကြောင်းခွဲပြီးတော့ ဝင်လာတာ။ ရေစကြို မြို့ အမှတ် ၁ ထင်းတန်းရပ်ကွက်က ကျနော်တို့အပိုင်စိုးမိုးထားတဲ့နယ်မြေ။ အဲ့ဒီစစ်ကြောင်း ၃ ခုထဲက အင်အား ၂၅ လောက်က နယ်ကျွံလာတဲ့အချိန် အသင့်ထောင်ထားတဲ့ မိုင်းကွင်းထဲ ကင်းသမားက ခွဲခဲ့တာ။ ၄ ယောက်သေဆုံးပြီး အများအပြား ဒဏ်ရာရတယ်” လို့ ပြောပါတယ်။

မိုင်းဆွဲတိုက်ခိုက်မှုကြောင့် သေဆုံးတဲ့သူတွေကို သင်္ဂြိုလ်တာမျိုး မရှိသေးဘဲ ဒဏ်ရာရသူတွေကိုတော့ ရေစကြိုမြို့နယ် ဆေးရုံကြီးမှာ ပို့ဆောင်ထားတယ်လို့ တပ်တွင်းသတင်းရင်းမြစ်တွေရဲ့ပြောဆိုချက်ကို ကိုးကားပြီး သူကဆက်လက်ပြောပါတယ်။

ပြီးခဲ့တဲ့ ဖေဖော်ဝါရီလ ၁ ရက်နေ့ကလည်း ရေစကြိုမြို့၊ အမှတ် ၂ စည်ပင်သာယာရပ်ကွက် စုပေါင်းရုံးထဲမှာ တပ်စွဲနေတဲ့ စစ်အုပ်စုကို Myingyan Black Tiger(MBT) အဖွဲ့က လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့ရာ စစ်သား ၄ ဦး သေဆုံးခဲ့တယ်လို့ သိရပါတယ်။

စာတည်း – ရင်ငြိမ်း