မိုင်းထိ

ရေတာရှည်၊ ဒီဇင်ဘာ ၂၆၊ ၂၀၂၅။

ပဲခူးတိုင်း၊ ရေတာရှည်မြို့နယ်၊ နှောပင်ကျေးရွာမှာ ပဲခင်းထဲသွားတဲ့ သက်ကြီးအမျိုးသား ၁ ဦး မိုင်းထိပြီး ခြေထောက်ပြတ်သွားတယ်လို့ ကူညီလုပ်ဆောင်ပေးခဲ့သူတွေဆီက သိရပါတယ်။

မိုင်းထိသူဟာ နှောပင်ကျေးရွာနေ အသက် ၆၇ နှစ်အရွယ် ဦးစံအေးဆိုသူဖြစ်ပြီး ဒီဇင်ဘာ၂၅ ရက် ညနေ ၄ နာရီခန့်မှာ ရွာပြင်ပဲခင်းထဲကိုသွားချိန် မြေမြုပ်မိုင်းထိခဲ့တာလို့ ဆိုပါတယ်။

“သူအိမ်ကနေ ပဲခင်းအသွားမှာထိတာ။ ရွာဝန်းကျင်မှာပဲထိတာ။ ခွဲစိတ်ဖို့ကတော့ ဒီနေ့မှလုပ်ရမယ်။ ထိတာကညာဘက်ခြေထောက်ပါ”လို့ ကူညီလုပ်ဆောင်ပေးခဲ့သူတဦးကပြောပါတယ်။

မိုင်းထိလို့ ဦးစံအေးမှာ ညာဘက်ခြေကျင်းဝတ်ကနေပြတ်ထွက်သွားပြီး ဆေးရုံရောက်လာချိန် အရေးပေါ်သွေးသွင်းကာ ပြတ်သွားတဲ့ခြေထောက်ကို ဒီဇင်ဘာ ၂၆ ရက် ဒီကနေ့မှာ ခွဲစိတ်မှုပြုလုပ်သွားဖို့ရှိနေပြီး လိုအပ်တဲ့ဆေးစစ်မှုတွေလည်းပြုလုပ်ရမယ်လို့ ဆိုပါတယ်။

မိုင်းထိတဲ့နေရာဟာ စစ်ကော်မရှင်တပ်နဲ့ တော်လှန်ရေးတပ်တွေဘက်က စစ်ရေးလှုပ်ရှားသွားလာနေတဲ့နယ်မြေဖြစ်တာကြောင့် ဘယ်အဖွဲ့ကထောင်ထားတဲ့မိုင်းဆိုတာမသိရသေးဘူးလို့ ဆိုပါတယ်။

ပြီးခဲ့တဲ့ မတ်လ ၂ ရက်ကလည်း ရေတာရှည်မြို့နယ်၊ ကျွန်းတောကုန်းကျေးရွာမှာ ပဲကောက်ထွက်တဲ့ ၁၂ အရွယ် Grade – 3 ကျောင်းသား မိုင်းထိပြီး ခြေထောက် ၂ ချောင်းပြတ်သွားတယ် သိရပါတယ်။

စာတည်း – လင်း

ချောင်းဦး၊ သြဂုတ် ၂၂၊ ၂၀၂၅။

စစ်ကိုင်းတိုင်း၊ မုံရွာ-ချောင်းဦးလမ်းပိုင်းမှာ ခရီးသည်တင်ကားတွေ မိုင်းထိလို့ ယာဥ်မောင်း ၁ ဦးသေဆုံးကာ ယာဥ်နောက်လိုက် ၁ ဦး ထိခိုက်ဒဏ်ရာရရှိခဲ့တယ်လို့ ကြုံတွေ့ခဲ့ရသူခရီးသည်တွေဆီက သိရပါတယ်။

သြဂုတ် ၂၂ ရက်ဒီကနေ့ မနက် ၉ နာရီလောက်မှာ ချောင်းဦးမြို့နယ်၊ ရေပိုးစားကန်ရွာအနီး မုံရွာ-ချောင်းဦးလမ်းမှာ မုံရွာမြို့ကနေ မန္တလေးကို မောင်းနှင်လာတဲ့ ခရီးသည်တင်ကား ၃ စီးမှာ မိုင်းထိမှန်ခဲ့တာလို့ ဆိုပါတယ်။

“မုံရွာကနေ မန္တလေးဘက်သွားတဲ့ကားတွေ မိုင်းဆွဲခံရတာပါ။ Honda Fit ကားသေးနဲ့ ရွှေမြန်မာကားကတော့ တော်တော် ထိသွားတယ်။ ရှေ့မှန်တွေလည်း အက်ကွဲပြီး ကားဘော်ဒီ တခုလုံးလည်း ရစရာမရှိဘူး။ စစ်သားတွေ ရောက်လာပြီး ရှင်းလင်းရေးတွေတော့ လုပ်နေကြတာ တွေ့ခဲ့တယ်”လို့ ကိုယ်တိုင်ကြုံ တွေ့ခဲ့ရသူ ခရီးသည်တဦးက မြေလတ်အသံကို ပြောပါတယ်။

မိုင်းထိတာကြောင့် ခရီးသည်တင်ယာဥ် Express ၁ စီး၊ Honda Fit ကားသေး(ခရီးသည်တင်) ၁ စီးနဲ့ အံစားတုံးခရီးသည်တင်ယာဥ် ၁ စီးတို့ မိုင်းစထိမှန်ခဲ့ကာ အံစာတုံးကားက ယာဥ်မောင်းအမျိုးသား နေရာမှာသေဆုံးခဲ့ပြီး ယာဥ်နောက်လိုက်မှာ ထိခိုက်ဒဏ်ရာ(ပြင်းထန်) ရရှိခဲ့တာကြောင့် မြင်းမူဆေးရုံမှာ အရေးပေါ် ဆေးကုသနေရပြီး အခြေအနေ စိုးရိမ်ရတယ်လို့ သိရပါတယ်။

ဒါ့အပြင် မိုင်းပေါက်ကွဲမှုကြောင့် Honda Fit ကားမှာ မောင်းနှင်မရတော့တဲ့အထိ အပျက်အစီးများခဲ့လို့ ကရိန်းကားနဲ့ မုံရွာဘက်ကို သယ်ဆောင်သွားကာ ယာဥ်မောင်းနဲ့ ခရီးသည်တွေ အထိခိုက်မရှိ​ခဲ့ဘူးလို့ ဆိုပါတယ်။

” အဲ့ကားသေးလေးပေါ်က ခရီးသည်တွေကိုတော့ သူတို့ကားသေးလိုင်းက ကားတွေကပဲ ကူညီပြီး မုံရွာဘက်ကို ပြန်ခေါ်သွားကြတယ်။ ခရီးသည်တွေအကုန် သူတို့နေအိမ်တွေ ပြန်ရောက်သွားကြပါပြီ။ မဟာနွယ်(Express) ကားကတော့ အထိခိုက်နည်းလို့ မန္တလေးဘက်ကို ဆက်မောင်းသွားတယ်”လို့ ခရီးသည်တင်ယာဥ်မောင်းတဦးက ပြောပါတယ်။

ခရီးသည်ယာဥ်တွေ မိုင်းထိတာကြောင့် အခင်းဖြစ်နေရာအနီး မုံရွာ – မန္တလေးလမ်းပိုင်းမှာ ကားအစီးရေ ၇၀ နီးပါးဟာ ၂ နာရီကျော်ကြာ လမ်းပိတ်ဆို့မှုဖြစ်ပွားခဲ့ပြီးနောက် လက်ရှိမှာတော့ ပုံမှန်အတိုင်းဆက်လက်သွားလာနေကြတယ်လို့ သိရပါတယ်။

ခရီးသည်တင်ကားတွေ မိုင်းထိတာနဲ့ ပတ်သက်ပြီး ဘယ်အဖွဲ့အစည်းတွေကလုပ်ဆောင်တယ်ဆိုတာ ကို မြေလတ်အသံအနေနဲ့ အတည်မပြုနိုင်သေးဘဲ မုံရွာ-ချောင်းဦးလမ်းပိုင်းဟာ စစ်ကော်မရှင်တပ်နဲ့ ကာကွယ်ရေးတပ်ဖွဲ့တွေအကြား တိုက်ပွဲဖြစ်ပွားတာနဲ့ မိုင်းဆွဲတိုက်ခိုက်မှုတွေကြောင့် အရပ်သားသေဆုံးမှုတွေ မကြာခဏဆိုသလို ဖြစ်ပွားလေ့ရှိတာပါ။

ပြီးခဲ့တဲ့ မတ် ၄ ရက်က မုံရွာ – ချောင်းဦးလမ်းပိုင်း နတ်ရေကန်အနီးမှာ စစ်ကော်မရှင်တပ်ဖွဲ့ဝင်နဲ့ ဒေသတွင်းကာကွယ်ရေးတပ်ဖွဲ့တွေ နှစ်ဖက် အပြန်အလှန် ပစ်ခတ်မှုအကြားမှာ ခရီးသည်တင်ကားပေါ်က ၁ နှစ်ခွဲအရွယ် ကလေးငယ် အပါအဝင် ၃ ဦးသေဆုံးခဲ့တယ်လို့လည်း သိရပါတယ်။

စာတည်း – မြတ်

ထန်းတပင်၊ ဇွန် ၆၊ ၂၀၂၅။

ပဲခူးတိုင်း၊ ထန်းတပင်မြို့နယ်၊ ရွှေအင်းမကျေးရွာမှာ အင်ဥထွက်ကောက်တဲ့အမျိုးသားတဦး မိုင်းထိပြီး ခြေထောက်ပြတ်သွားတယ်လို့ ကူညီပေးနေသူတွေဆီက သိရပါတယ်။

မိုင်းထိသူဟာ အသက် ၃၂ နှစ်အရွယ် ကိုထွန်းလင်းအောင်ဆိုသူဖြစ်ပြီး ဇွန် ၅ ရက်မနက် ၁၁ နာရီခန့်မှာ နေအိမ်အနီးတောစပ်မှာ အင်ဥသွားကောက်ရင်း မိုင်းနင်းမိခဲ့တာလို့ ဆိုပါတယ်။

“သူတို့မိသားစုက မြို့ပေါ်လည်းတက်မလာနိုင်ဘူး။ စားဝတ်နေရေး သွားရေးလာရေးအခက်အခဲပေါင်းစုံနဲ့ စားဖို့သောက်ဖို့ မနည်းရုန်းကန်နေရတာ။ ရွာထဲမှာဘဲ ကြုံရာကျပန်းလုပ်၊ အင်ဥကောက်မျှစ်ချိုး ဟင်းရွက်ခူးလုပ်တာ။ ဖြစ်တဲ့နေ့ကလည်း အိမ်နဲ့မနီးမဝေးမှာ အင်ဥကောက်တဲ့အချိန်မှာ မိုင်းမှန်သွားတာ”လို့ ကူညီဆောင်ရွက်ပေးနေသူတဦးကပြောပါတယ်။

မိုင်းထိလို့ အဆိုပါ အမျိုးသားမှာ ဘယ်ဘက်ခြေကျင်းဝတ်အောက်ပိုင်းက ပြတ်ထွက်သွားပြီး ညာဘက်ခြေထောက်နဲ့ ခန္ဓာကိုယ်တွေမှာ မိုင်းစမှန်ဒဏ်ရာတွေရထားတယ်လို့ ဆိုပါတယ်။

သူဟာ အလုပ်အကိုင်အဆင်မပြေတာကြောင့် ကျေးရွာမှာ ကြုံရာကျပန်းလုပ်ကိုင်ပြီး သားသမီး ၃ ဦးနဲ့ အမျိုးသမီးဖြစ်သူတို့ကို ရှာဖွေလုပ်ကိုင်ကျွေးမွေးနေသူဖြစ်လို့ ယခုလိုမိုင်းထိသွားတာကြောင့် မိသားစုစားဝတ်နေရေးလည်း ပိုပြီးကျပ်တည်းသွားတယ်လို့ သိရပါတယ်။

အခုမိုင်းထိတဲ့ဒေသဟာ နယ်မြေမငြိမ်သက်တဲ့ဒေသတခုဖြစ်ပြီး ယခင်တိုက်ပွဲတွေလည်းဖြစ်ဘူးတယ်လို့ ဆိုပါတယ်။

“နယ်မြေမငြိမ်သက် မအေးချမ်းတဲ့အထဲမှာပါတယ်။ ဘယ်ကစိုးမိုးထားတယ်ဆိုတာတော့ ကျနော်တို့ မသိရဘူး။ တိုက်ပွဲတွေဖြစ်ထားခဲ့တဲ့ဒေသ။ အခုတော့ဖြစ်မဖြစ်မသိရဘူး။ စစ်ရေးအခြေအနေနဲ့ ပတ်သက်ပြီးတော့ မသိရဘူး။ သူက နင်းမိတဲ့ မိုင်းဆိုတော့မြေမြှုပ်မိုင်းဖြစ်ဖို့များတယ်”လို့ အထက်ပါ ကူညီပေးနေသူက ဆက်ပြောပါတယ်။

လက်ရှိမှာတော့ မိုင်းထိထားသူကို တောင်ငူဆေးရုံမှာဆေးကုသနေရပြီး ဆေးကုသဖို့ ငွေကြေးအကူအညီ လိုအပ်နေသလို စောင်၊ ခြင်ထောင်တွေကအစမပါလာတဲ့အတွက် မြို့ခံပရဟိတအဖွဲ့တွေက ကူညီထားရတယ်လို့ ဆိုပါတယ်။

ပြီးခဲ့တဲ့ မတ် ၂ ရက်ကလည်း ရေတာရှည်မြို့နယ်၊ ကျွန်းတောကုန်းကျေးရွာမှာ မိဘတွေအတွက် အပိုဝင်ငွေရအောင် ပဲကောက်ထွက်တဲ့ G 3 ကျောင်းသား ၁၂ အရွယ်ကလေးငယ် မိုင်းထိလို့ ခြေထောက်နှစ်ချောင်းပြတ်ခဲ့ပါသေးတယ်။

စာတည်း – လင်း

စစ်ကိုင်း၊ ဇွန် ၁၂၊ ၂၀၂၃။

စစ်ကောင်စီတပ်သားတွေရဲ့ ဖမ်းဆီးသတ်ဖြတ်တာကို ခံလိုက်ရတဲ့ စစ်ကိုင်းတိုင်း၊ ဆားလင်းကြီးမြို့နယ်၊ ပြည်သူ့ အုပ်ချုပ်ရေးအဖွဲ့ဝင် ဦးဗန့်ဂျီရဲ့ ရုပ်အလောင်းကို သွားယူချိန် မိုင်းထိမှန်ခဲ့တဲ့ PDF ရဲဘော်တဦးမှာ ခြေထောက်တဖက်ဖြတ်လိုက်ရတယ်လို့ သိရပါတယ်။

ခြေထောက်ဖြတ်လိုက်ရတဲ့ရဲဘော်မှာ ကျေးရွာကာကွယ်ရေးအဖွဲ့တခုမှ အသက် ၂၈ နှစ်အရွယ်ရှိ အမျိုးသားတဦးဖြစ်ပြီး၊ ဘယ်ဖက်ခြေထောက်ရဲ့ ဒူးအောက်ကနေ ဖြတ်ထုတ်လိုက်ရတာလို့ မြေပြင်မှ PDF ရဲဘော်တဦးက ပြောပါတယ်။

“လုံခြုံရေးအရ ရွာနာမည်နဲ့ သူ့ရဲ့နာမည်ကို ပြောလို့မရဘူး။ အခုကတော့ ခြေထောက်ဖြတ်လိုက်နိုင်လို့ အသက်အန္တရာယ်မစိုးရိမ်ရတော့ဘူး။ ကျေးလက်ဆေးခန်းတခုမှာ ဆေးကုသမှု ပေးထားတယ်”လို့ ဆိုပါတယ်။

စစ်ကောင်စီတပ်စွဲနေတဲ့ ညောင်ပင်ကြီးကျေးရွာအနီးက ထန်တောဆိပ်သစ်ကွင်းထဲမှာ စွန့်ပစ်ခံထားရတဲ့ ဦးဗန့်ဂျီရဲ့ ရုပ်အလောင်းကို ဇွန်လ ၁၁ ရက်မနက် ၈ နာရီ‌လောက်မှာ အထက်ပါရဲဘော်အပါအဝင် PDF အင်အား ၁၅ ဦးက သွားယူခဲ့ချိန် စစ်ကောင်စီထောင်ခဲ့တဲ့ မိုင်းတလုံးကို နင်းမိရာက ပေါက်ကွဲမှုဖြစ်ခဲ့တာလို့ အထက်ပါရဲဘော်က ပြောပါတယ်။

“မိုင်းကတော့ တလုံးတည်းပေါက်တာပါဗျ။ အလောင်းကောက်နေချိန်မှာ ပေါက်တာ။ ဒီရဲဘော်က နင်းမိတာဖြစ်လို့ ထိသွားတာပါ။ တခြားရဲဘော်တွေတော့ မထိမှန်ခဲ့ကြဘူး”လို့ ဆိုပါတယ်။

စစ်ကောင်စီတပ်သားတွေရဲ့ သတ်ဖြတ်တာကိုခံလိုက်ရသူ ဦးဗန့်ဂျီမှာ ဆားလင်းမြို့နယ်၊ ပြည်သူ့အုပ်ချုပ်ရေးအဖွဲ့ဝင်တဦးလည်း ဖြစ်သလို လက်ပံတောင်းတောင်ပင်မသပိတ်စစ်ကြောင်း ဦးဆောင်ကော်မတီဝင်အဖွဲ့ဝင်တဦးလည်း ဖြစ်ပါတယ်။

ဦးဗန့်ဂျီအပါအဝင် စစ်ကောင်စီလက်ချက်နဲ့ သေဆုံးခဲ့ရသူတွေအတွက် ဇွန်လ ၁၁ ရက် ည ၇ နာရီလောက်မှာလည်း ဖယောင်းတိုင်မီးတွေ ကိုင်ဆောင်ပြီး ဆုတောင်းသပိတ်တခုကို လက်ပံတောင်းတောင်ဒေသ ပင်မသပိတ် အပါအဝင် ဒေသခံကာကွယ်ရေးတပ်ဖွဲ့တွေက ဦးဆောင်ပြီး ပြည်သူတွေနဲ့အတူ ဆားလင်းကြီးမြို့နယ် တနေရာမှာ ပြုလုပ်ခဲ့ကြပါတယ်။

စာတည်း – လင်း

ပဲခူး၊ ဇွန် ၄၊ ၂၀၂၃။

ပဲခူးတိုင်းဒေသကြီး၊ ကျောက်ကြီးမြို့နယ်၊ နောင်ကုန်းကျေးရွာအနီး ကျောက်ကြီး-နတ်သံကွင်းကားလမ်းရှိ စစ်ပင်တံတား လာပြင်တဲ့အဖွဲ့ မိုင်းထိတာကြောင့် ၃ ဦးဒဏ်ရာရသွားတယ်လို့ သိရပါတယ်။

ဇွန်လ ၂ ရက်မနက် ၉ နာရီခန့်မှာ စစ်ကောင်စီတပ်က လုံခြုံရေးယူပေးပြီး တံတားလာပြင်တဲ့အဖွဲ့ လုပ်ငန်းလုပ်နေချိန် တံတားအနီးထောင်ထားတဲ့ မိုင်းထိပြီး အလုပ်သမား ၃ ဦးဒဏ်ရာရခဲ့တယ်လို့ ဒေသခံတဦးက ပြောပါတယ်။

“အဲဒီတံတားက အရင်ဆုံးတခါ မိုင်းကွဲပြီးကတည်းက လာထပ်ပြင်တဲ့အဖွဲ့ ဒရုန်းနဲ့ချခံရသေးတယ်။ အဲ့ကတည်းက တံတားပြင်တာ နားထားပြီး ပြီးခဲ့တဲ့ ရက်ပိုင်းကမှ ပြန်ပြင်နေတာ။ ခုတခါ မိုင်းထပ်ကွဲတယ်”လို့ သူက ပြောပြပါတယ်။

အဆိုပါ စစ်ပင်တံတားဟာ အခုနှစ် ဇန်နဝါရီလ ၉ ရက်က မိုင်းထောင်ဖောက်ခွဲခံရလို့ ပျက်စီးသွားတာဖြစ်ပြီး စစ်ကောင်စီလက်အောက်ခံ လမ်းတံတားဦးစီးဌာနကနေ ပျက်စီးသွားတဲ့နောက်ပိုင်း ပြင်ဆင်ဖို့ ကြိုးစားရာက အခုလို မိုင်းထိသွားတာဖြစ်ပါတယ်။

မိုင်းပေါက်ကွဲမှုဖြစ်လို့ တံတားပြင် အလုပ်သမားတွေဖြစ်တဲ့ စောရွှေဘ ၄၂ နှစ်၊ စောဂေါ်ရေး ၂၀ နှစ်ခန့်၊ နေရဲစိုး ၂၅ နှစ်တို့ဟာ ထိခိုက်ဒဏ်ရာရသွားလို့ ကျောက်ကြီးဆေးရုံကို ပို့ထားရတယ်လို့ သိရပါတယ်။

အဲဒီမိုင်းကိုတော့ ဘယ်အဖွဲ့က ဘာကြောင့်ထောင်ထားတယ်ဆိုတာ မသိရသေးပါဘူး။

ဇန်နဝါရီလ ၁၃ ရက်နေ့ မနက် ၁၀ နာရီခန့်မှာ စစ်ပင်တံတားအနီးမှာ တံတားပြင်နေတဲ့ စစ်ကောင်စီ လက်အောက်ခံအဖွဲ့ကို လက်နက်ကိုင်အဖွဲ့တခုက ဒရုန်းနဲ့တိုက်ခိုက်ခဲ့တာကြောင့် သုံးဘီးနဲ့လာတဲ့ ဒေသခံတွေ ထိခိုက်ခဲ့ရာ ၃ ဦးသေဆုံးပြီး ၄ ဦးဒဏ်ရာရခဲ့ပါသေးတယ်။

စာတည်း – လင်းဇေ

ပဲခူး၊ မေ ၉၊ ၂၀၂၃။

ပဲခူးတိုင်း၊ ကျောက်ကြီးမြို့နယ်၊ နတ်သံကွင်းကျေးရွာအနီးက မိုင်းခွဲခံထားရတဲ့ ဘုံသရောတံတားကို လာရောက်ပြုပြင်တဲ့ စစ်ကောင်စီအဖွဲ့တွေ မိုင်းထပ်ထိလို့ ထိခိုက်သေဆုံးမှုတွေ ရှိခဲ့တယ်လို့ သိရပါတယ်။

မေလ ၈ ရက်နေ့ မနက် ၁၀ နာရီဝန်းကျင်မှာ စစ်ကောင်စီအဖွဲ့တွေက တံတားကိုလာရောက်ပြုပြင်ချိန် ပျက်စီးနေတဲ့တံတားအနီးမှာ ထောင်ထားတဲ့မိုင်းကို နင်းမိပြီး ပေါက်ကွဲမှု ဖြစ်ခဲ့တာလို့ မြေပြင်နဲ့နီးစပ်တဲ့ PDF တပ်ဖွဲ့ဝင်တဦးက မြေလတ်အသံကို ပြောပါတယ်။

“ညဘက် တံတားမိုင်းခွဲခံရလို့ ပျက်စီးသွားတာ။ မနေ့မနက် သူတို့ လာပြင်ချိန် မိုင်းထပ်ထိတာ။ ဒီဘက်က ထောင်ထားတဲ့ နင်းမိုင်းထိသွားတာ။ စကစဘက်က AE တယောက် သေတယ်လို့တော့ သိရတယ်။ ဒဏ်ရာရသူတွေလည်း ရှိတယ်။ အဲဒါကိုတော့ အသေးစိတ်စုံစမ်းတုန်းပဲ” လို့ ပြောပါတယ်။

တံတားလာပြင်တဲ့အဖွဲ့မှာ စစ်ကောင်စီတပ်က လုံခြုံရေးယူပေးပြီး မြို့နယ်လမ်းတံတားဦးစီးဌာနက ဝန်ထမ်းအချို့နဲ့ စစ်အင်ဂျင်နီယာတပ်က တပ်ဖွဲ့တွေ ပါဝင်ကာ မိုင်းပေါက်ကွဲမှုကြောင့် လမ်းဦးစီးဌာနက AE သေဆုံးတယ်လို့ ပြောဆိုပေမယ့် သီးခြားအတည်ပြုနိုင်ဖို့ စုံစမ်းနေပါတယ်။

မိုင်းထိလို့ ထိခိုက်သေဆုံးသူတွေကိုတော့ စစ်ကောင်စီအဖွဲ့က လာရောက်ခေါ်ဆောင်သွားပြီး စစ်ဆေးရုံကို ပို့ဆောင်ထားတယ်လို့ သိရပါတယ်။

ဘုံသရောတံတားဟာ မေလ ၇ ရက်နေ့ ည ၁၂ နာရီခန့်က မိုင်းခွဲခံရလို့ ပြိုကျပျက်စီးခဲ့တာဖြစ်ပြီး ကျောက်ကြီး-နတ်သံကွင်းလမ်းပိုင်းပေါ်က တံတားတစင်းဖြစ်ကာ စစ်ကောင်စီတပ်က ရိက္ခာနဲ့စစ်ကူပေးပို့ရာမှာ အသုံးပြုနေသလို တော်လှန်ရေးအဖွဲ့တွေဘက်ကလည်း စစ်ရေးအရ အသုံးပြုနေတယ်လို့ သိရပါတယ်။

မတ်လ ၃၀ ရက်နေ့ မနက် ၈ နာရီ ၅၀ မိနစ်ခန့်မှာ ပဲနွယ်ကုန်းဘက်ကနေ ကျောက်ကြီးဘက်ကို မောင်းနှင်လာတဲ့ Fawကား ကျောက်ကြီး-နတ်သံကွင်းလမ်း ညောင်ကုန်းတံတားမှာ မိုင်း ထိလို့ ၂ ဦး သေ၊ ၃ ဦး ဒဏ်ရာရသွားတယ်လို့ သိရပါတယ်။

စာတည်း – ရင်ငြိမ်း

ကျောက်ကြီး၊ မတ် ၂၀၊ ၂၀၂၃။

ပဲခူးတိုင်း၊ ကျောက်ကြီးမြို့နယ်၊ ကျောက်ကြီး-နတ်သံကွင်းလမ်း ညောင်ကုန်းတံတားအနီးမှာ ဒုတိယအကြိမ် ကားတစီးမိုင်းထိပြီး ၃ ဦး သေဆုံးကာ ၂ ဦး ဒဏ်ရာရတယ်လို့ သိရပါတယ်။

မတ်လ ၂၀ ရက် ဒီမနက် ၇ နာရီခန့်မှာ ကျောက်ကြီးမြို့ဘက်နေ ပဲနွယ်ကုန်းရွာဘက်ကို မောင်းနှင်လာတဲ့ လိုက်ထရပ် အမျိုးအစား ”ဝင်းရတနာ” ခရီးသည်ပို့ဆောင်ရေးယာဥ်ဟာ ညောင်ကုန်းတံတား ရှောင်ကွင်းလမ်းကနေ မောင်းနှင်လာချိန် မိုင်းထိခဲ့တာလို့ ဒေသခံတဦးက ပြောပါတယ်။

“ကျောက်ကြီးကနေ ပဲနွယ်ကုန်းသွားမယ့် ကားပါ။ ခရီးသည်တင်ကားပေါ့။ ကားပေါ်မှာ အနောက်ကနေ ၃ ယောက်ပါတယ်။ ကားခေါင်းခန်းမှာ ၂ ယောက်ပါတယ်။ တံတားက အရင်မိုင်းထိပြီး ပျက်စီးသွားတော့ ပြုပြင်နေလို့ ရှောင်ကွင်းလမ်း လုပ်ထားတာ။ အဲ့ကနေသွားချိန် မိုင်းထိတာပါ” လို့ ပြောပါတယ်။

မိုင်းထိတာကြောင့် အသက် ၄၀ နှစ်အရွယ် အမျိုးသမီး ၁ ဦးနဲ့ ၅၀ နှစ်အရွယ် အမျိုးသား ၂ ဦး သေဆုံးခဲ့ပြီး ခရီးသည်အမျိုးသမီး ၁ ဦးနဲ့ ယာဥ်မောင်းအမျိုးသားမှာ ဒဏ်ရာရသွားတယ်လို့ သိရပါတယ်။

သေဆုံးသူနဲ့ ဒဏ်ရာရသူတွေကိုတော့ လက်ရှိမှာ ဒေသတွင်းပရဟိတအသင်းတွေက ကျောက်ကြီးပြည်သူ့ဆေးရုံကို ပို့ဆောင်ပေးထားရတယ်လို့ ဆိုပါတယ်။

ဒီမိုင်းတွေကို ဘယ်အဖွဲ့အစည်းက ထောင်ထားခဲ့လဲဆိုတာကိုတော့ မြေလတ်အသံက သီးခြားအတည်ပြုနိုင်ဖို့ စုံစမ်းနေဆဲဖြစ်ပါတယ်။

ဖေဖော်ဝါရီလ ၃ ရက်ကလည်း ကျောက်ကြီးကနေ ပဲနွယ်ကုန်းကို စျေးရောင်းဖို့ထွက်လာတဲ့ လိုက်ထရပ်အဖြူရောင်ယာဥ်ဟာ ညောင်ကုန်းတံတား ရှောင်ကွင်းလမ်းအရောက်မှာပဲ မိုင်းထိခဲ့လို့ ကလေး ၁ ဦးအပါအဝင် ၄ ဦး ဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ဂန့်ဂေါ၊ မတ် ၁၈၊ ၂၀၂၃။

မကွေးတိုင်း၊ ဂန့်ဂေါခရိုင်၊ ထီးလင်းမြို့နယ်အတွင်း မိုင်းရှင်းဖို့ထွက်လာတဲ့ အင်အား ၆ ဦးပါရှေ့ပြေးပွိုင့်တပ်စိတ်စစ်ကြောင်း မတ်လ ၁၇ ရက် ညနေ ၄ နာရီခန့်မှာ ဆေးမင်းတောရွာမြောက်ဘက်ရှိ အင်းနားလမ်းခွဲမှာ မိုင်းဆွဲတိုက်ခိုက်ခံခဲ့ရတယ်လို့ သိရပါတယ်။

လက်နက်ခဲယမ်းတွေ သယ်ဆောင်လာတဲ့ စစ်ကောင်စီတပ်ယာဉ်တန်းတွေဖြတ်သန်းမယ့် လမ်းပိုင်းကို မိုင်းလာရှင်းတဲ့ တပ်မ ၇၇ လက်အောက်ခံ စစ်ကောင်စီတပ်သားတွေဖြစ်ပြီး ပဒေသာမိုင်းနဲ့ တိုက်ခိုက်ခဲ့လို့ ၄ ဦး သေဆုံးတယ်လို့ Yaw Revolution Army-ထီးလင်းခေါင်းဆောင် သခင်ဇော်က မြေလတ်အသံကို ပြောပါတယ်။

“ယာဉ်တန်းလာမယ့် လမ်းကြောင်းကို မိုင်းရှင်းတဲ့ရှေ့ပြေးပွိုင့်တပ်စိတ် ၆ ယောက်အဖွဲ့တွေက ကျနော်တို့ မိုင်းကွင်းထဲရောက်လာတာ၊ ပဒေသာမိုင်း ၁၂ လုံးနဲ့ဆွဲလိုက်တာ ၄ ယောက်သေတယ်။ သူတို့က ရှေ့ပြေးပွိုင့် နောက်ကစစ်ကြောင်းမှာ ကျန်တာအယောက် ၃၀ လောက်ရှိတယ်” လို့ ပြောပါတယ်။

သေဆုံးခဲ့တဲ့ စစ်ကောင်စီတပ်ဖွဲ့ဝင် ၄ ဦးဟာ ဂန့်ဂေါခရိုင်အတွင်း စစ်ကြောင်းထိုးဝင်ရောက်နေတဲ့ တပ်မ ၇၇ လက်အောက်ခံ တပ်ရင်းတခုရဲ့ တပ်ကြပ်ကြီးအဆင့် ၁ ဦး၊ ဒုတပ်ကြပ်အဆင့် ၁ ဦး နဲ့ တပ်သား ၂ ဦးတို့ဖြစ်တယ်လို့ သိရပါတယ်။

အဲ့ဒီစစ်ကြောင်းဟာ မိုင်းဆွဲခံရပြီးနောက် ထီးလင်း – ဂန့်ဂေါလမ်းမကြီးအတိုင်း ဂန့်ဂေါဘက်ကို ဦးတည်ဆက်သွားနေတယ်လို့ သူကဆက်ပြောပါတယ်။

မတ်လ ၁၅ ရက်နဲ့ မတ်လ ၁၆ ရက်တွေမှာလည်း ပခုက္ကူမြို့နယ်ကနေ ထီးလင်းမြို့နယ်ထဲ လူ၊ လက်နက်၊ ခဲယမ်းတွေ တင်ဆောင်လာတဲ့ တပ်မ ၇၇ စစ်ကောင်စီယာဉ်တန်း ၃၂ စီးကို ထီးလင်းမြို့နယ်အတွင်းမှာ ၅ ကြိမ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် အများအပြားထိခိုက်သေဆုံးတယ်လို့ ဒေသကာကွယ်ရေးတပ်ဖွဲ့ဝင်တွေက ပြောပါတယ်။

ကန့်ဘလူ၊ မတ် ၁၆၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ ချပ်ကြီးကျေးရွာအနီးမှာ မိုင်းနင်းမိပြီး သံဃာ ၁ ပါး ဒဏ်ရာရသွားတယ်လို့ သိရပါတယ်။

မတ်လ ၁၅ ရက်ညနေ ၆ နာရီခန့်မှာ ချပ်ကြီးကျေးရွာရှိ ညောင်တုန်းဘုန်းကြီးကျောင်းမှ ဆရာတော်ဥူးသောဘနဟာ ချပ်ကြီးကျေးရွာအနောက်ဘက်ကို ခြေလျင်လမ်းလျှောက်သွားချိန် မိုင်းထိခဲ့တာလို့ ဒေါင်းရာဇာချပ်သင်းအဖွဲ့ တာဝန်ရှိသူက ပြောပါတယ်။

“အဲဒီရွာက ပျူရွာ။ အဲရွာနားက ဘယ် PDF အဖွဲ့မှ ကပ်ဖို့မလွယ်ဘူး။ သူတို့ရွာကို PDF တွေ မလာနိုင်အောင်ဆိုပြီး ရွာပတ်လည်မှာ မိုင်းထောင်ထားတာ။ ခု သံဃာတော်တပါး မိုင်းထိတဲ့ကိစ္စက သူတို့ထောင်ထားတဲ့မိုင်းပဲ ဖြစ်နိုင်တယ်” လို့ ပြောပါတယ်။

ဒီမိုင်းတွေကို ချပ်ကြီးကျေးရွာရှိ ပျူစောထီးတွေက ထောင်ထားတာ ဖြစ်နိုင်တယ်လို့ ကာကွယ်ရေးရဲဘော်တွေက ခန့်မှန်းပေမယ့် မြေလတ်အသံက သီးခြားအတည်မပြုနိုင်သေးပါဘူး။

မိုင်းထိလို့ ဆရာတော်ဟာ ဝဲဘက်ခြမ်း ခြေကျင်းဝတ်ပြတ်ထွက် ဒဏ်ရာရသွားတာကြောင့် ရွှေဘိုမြို့နယ် ပြည်သူ့ဆေးရုံကို ပို့ထားရတယ်လို့ သိရပါတယ်။

ချပ်ကြီးကျေးရွာဟာ ပျူစောထီးနဲ့စစ်ကောင်စီတပ်တွေ အထိုင်ချတပ်စွဲထားတဲ့ ကျေးရွာ ၁ ရွာဖြစ်ပြီး၊ အနည်းဆုံးအင်အား ၂၀ ကျော် ရှိတယ်လို့ ဆိုပါတယ်။

မတ်လ ၂ ရက်မနက် ၅ နာရီဝန်းကျင်မှာလည်း စစ်ကောင်စီတပ်နဲ့ပျူအင်အား ၆၀ ကျော်ရှိတဲ့ ချပ်ကြီးရွာကို KB2 တပ်ရင်းနဲ့ ဒေသ ပကဖ အဖွဲ့တွေက ပူးပေါင်းတိုက်ခိုက်ခဲ့ကာ ပျူစောထီးစခန်းကို သိမ်းနိုင်ခဲ့ပြီး ပျူစောထီးနဲ့ စစ်ကောင်စီအဖွဲ့ ၄၀ ကျော် သေဆုံးခဲ့သလို ဒေသကာကွယ်ရေးတွေဘက်က ၃ ဦး ထိခိုက်ဒဏ်ရာရခဲ့သေးတယ်လို့ သိရပါတယ်။

ဒါ့အပြင် ပျူစောထီးနဲ့ စစ်ကောင်စီတပ်သားတွေ ကိုင်တဲ့ လက်နက် ၁၅ လက်နဲ့ ဆက်စပ်ပစ္စည်းတွေကို သိမ်းဆည်းနိုင်ခဲ့တယ်လို့လည်း ဆိုပါတယ်။

စာတည်း – လင်း