မန္တလေး

မြင်းခြံ၊ စက်တင်ဘာ ၁၊ ၂၀၂၅။

မန္တလေးတိုင်းအခြေစိုက် မြင်းခြံခရိုင်တပ်ရင်း ၁၀ က တပ်ဖွဲ့ဝင် ၄ ဦး တပ်ရင်းကထွက်ပြေးသွားခဲ့တယ်လို့ မြင်းခြံခရိုင်တပ်ရင်း ၄ တာဝန်ရှိသူတွေဆီက သိရပါတယ်။

ထွက်ပြေးသွားသူတွေက တပ်ဖွဲ့ဝင် မျိုးမင်းသိန်း၊ လွင်ဦး၊ စိုင်းဇင်ထွန်း၊ နိုင်ဝင်းတို့ ၄ ဦးဖြစ်ပြီး ဩဂုတ်လတတိယအပတ်လောက်မှာ တာဝန်ကျရာနေရာတွေကနေ တဦးနဲ့တဦးချိတ်ဆက်ပြီး တရက်တည်း အတူထွက်ပြေးသွားကြတာလို့ ဆိုပါတယ်။

“ကျနော်တို့ တပ်ရင်းရဲ့ ထုတ်ပြန်ထားတဲ့စည်းကမ်းတွေကို မလိုက်နာဘဲ ထွက်ပြေးသွားတယ်။ အရင်သတ်မှတ်ထားတဲ့ စည်ကမ်းရှိသလို လတ်တလောထုတ်ပြန်ထားတဲ့ စည်းကမ်းရှိတယ်။ ဒါတွေကိုမလိုက်နာနိုင်လို့ ပြေးသွားကြတာ။ သူတို့က အရင်ကတော့ LPDF အဖွဲ့တခုကပါ။ အသေးစိတ်တော့ ပြောလို့မရသေးဘူး”လို့ မြင်းခြံခရိုင်တပ်ရင်း ၄ တာဝန်ရှိသူတဦးကပြောပါတယ်။

သူတို့ ၄ ဦးဟာ ထွက်ပြေးသွားပြီးနောက် တပ်ရင်းနဲ့ပတ်သက်ပြီး တိုက်ခိုက်ပြောဆိုမှုတွေရှိလာတဲ့အတွက် တပ်ပြေးတွေအဖြစ်ကြေညာရတာလို့ သူကဆက်ပြောပါတယ်။

ထွက်ပြေးသွားတဲ့သူ ၄ ဦးဟာ ၂ ပတ်ခန့်ကြာလာတဲ့အထိ စစ်ကော်မရှင်တပ်ဆီ ဘက်ပြောင်း ခိုလှုံသွားတာမျိုး သတင်းမရသေးပေမယ့် ၎င်းတို့နေထိုင်ခဲ့တဲ့ ကျေးရွာတွေက စခန်းငယ်အချို့ ဆုတ်ခွာရတာ၊ တပ်ရင်းတွေမှာ ကတုတ်ကျင်းတွေ ပြင်ဆင်ရတာ၊ တပ်စခန်းလုံခြုံရေးတိုးမြှင့်ရတာနဲ့ လေကြောင်းရန် အန္တရာယ်အတွက် ကြိုတင်ကာကွယ်မှုတွေပြုလုပ်ထားရတယ်လို့ သိရပါတယ်။

၄ ဦးစလုံးဟာ ၂၀၂၅ ဇန်နဝါရီလလောက်အတွင်းမှ LPDF အဖွဲ့တခုကနေ မြင်းခြံခရိုင်တပ်ရင်း ၁၀ ကိုပြောင်းရွှေ့လာကြတာလို့သိရပြီး ဘယ် LPDF အဖွဲ့ကနေ ပြောင်းလာတယ်ဆိုတာကိုတော့ တပ်ရင်းတာဝန်ရှိသူတွေဘက်က ထုတ်ဖော်ပြောကြားတာမျိုးမရှိပါဘူး။

ဩဂုတ် ၂၄ ရက်ကလည်း ကျောက်ဆည်ခရိုင်အမှတ် ၂ တပ်ရင်းက ဆေးတပ်သား ၁ ဦးနဲ့ထောက်ပို့ ၁ ဦး စစ်ကော်မရှင်တပ်ဆီ ဘက်ပြောင်းသွားတယ်လို့သိရပါတယ်။

စာတည်း – လင်း

ရေစကြို၊ ဩဂုတ် ၂၇၊ ၂၀၂၅။

မကွေးတိုင်း၊ ရေစကြိုမြို့၊ အမှတ် (၇)၊ နှစ်ထောင်ပြည့်ရပ်ကွက်က အမျိုးသား ၁ ဦး စစ်ကော်မရှင်တပ်တွေရဲ့ ပစ်ခတ်တာကိုခံရပြီး သေဆုံးခဲ့တယ်လို့ ရေစကြိုမြို့ခံတွေဆီက သိရပါတယ်။

ဩဂုတ် ၂၆ ရက် ညနေ ၂ နာရီခွဲမှာ အဲ့ဒီရပ်ကွက်ရှိ ပန်းခြံထဲမှာတပ်စွဲနေတဲ့စစ်ကော်မရှင်တပ်တွေက ဆိုင်ကယ်စီးအမျိုးသား ၂ ဦးကို လိုက်လံပစ်ခတ်ချိန် ရပ်ကွက်တွင်းရှိ နေအိမ် ၁ အိမ်မှာ အဝတ်လှမ်းနေတဲ့ အသက် ၃၉ နှစ် အရွယ် ကိုဇော်ဇော်ဝင်းကို ထိမှန်ပြီးသေဆုံးခဲ့တာလို့ ဆိုပါတယ်။

“လူ ၂ ဦးက အရက်ဆိုင်ကပြန်လာတာ၊ ဦးထုပ်မဆောင်းဘူး၊ အရက်ကလည်း မူးနေတော့ မေ့မေ့ရော့ရော့နဲ့ သူတို့ရှေ့မှာ ဦးထုပ်မဆောင်းပဲနဲ့ ဆိုင်ကယ်စီးပြေးလို့ဆိုပြီး ဆိုင်ကယ်နဲ့ ၅ ဦးလောက်ကလိုက်ပစ်တာ၊ လိုက်ပစ်ရင်းနဲ့ အမှတ် (၇)၊ နှစ်ထောင်ပြည့်ရပ်၊ တိလောကဘကကျောင်းနဲ့ မျက်နှာချင်းဆိုင် အနောက်ဘက်အိမ်မှာရှိတဲ့ ရေချိုးပြီး အဝတ်လျှော်ပြီး၊ အဝတ်လှန်းနေတဲ့ အမျိုးသား ၁ ဦး (ကျည်ထိ) သေသွားတာ”လို့ ရေစကြိုမြို့ခံတဦးက ပြောပါတယ်။

ကိုဇော်ဇော်ဝင်းဟာ မြိုင်မြို့နယ်က ရေနံမှော်တခုမှာ အလုပ်လုပ်ကိုင်နေသူဖြစ်ပြီး နေအိမ်ကိုပြန်ရောက်ချိန် နာရီပိုင်းအတွင်းမှာတင် ခုလိုပစ်ခတ်ခံခဲ့ရတာဖြစ်သလို ပစ်ခတ်ခံရချင်းဆေးရုံကိုသွားပေမယ့် ဦးခေါင်းနဲ့ ခန္ဓာကိုယ် ကျည်ထိမှန် ဒဏ်ရာတွေနဲ့ ဆေးရုံမှာတင်သေသွားတာလို့ သိရပါတယ်။

“တကယ်တော့ သူက လူပျိုကြီးပါ၊ မိအိုဖအို လုပ်ကိုင်ကျွေးနေတာ၊ ရေနံမှော်ထဲက ပြန်ရောက်တာ ၁ နာရီကျော်ကျော်ပဲရှိသေးတယ်၊ ခဏနားပြီး အဝတ်လျှော် အဝတ်လှန်းနေတုန်းမှာ ဖြစ်သွားတာ၊ ရေစကြိုဆေးရုံပေါ်ရောက်သေးတယ်၊ အသက်ကယ်ဆေး ၂ လုံးထိုးတာကို မမှီလိုက်ဖူး၊ သေသွားတာ၊” လို့ ရေစကြိုမြို့ခံတဦးကပြောပါတယ်။

ကိုဇော်ဇော်ဝင်ရဲ့အလောင်းကိုတော့ သြဂုတ် ၂၇ ရက်ဒီညနေ ၃ နာရီဝန်းကျင်မှာ သင်္ဂြိုဟ်သွားမယ်လို့လည်း သိရပါတယ်။

ရေစကြိုမှာ ဆိုင်ကယ်စီးဦးထုပ် မဆောင်းတာ၊ ဆိုင်ကယ် ၂ ဦးစီးလာရင် ရပ်ခိုင်းပြီး မရပ်ပါက နောက်ကနေ လိုက်လံပစ်ခတ်လေ့ရှိတယ်လို့ သိရပါတယ်။

ပြီးခဲ့တဲ့ ၂၀၂၄၊ စက်တင်ဘာ ၁၅ ရက်ကလည်း ရေစကြို အမှတ် ၁ ထင်းတန်းရပ်ကွက်မှာ ဆိုင်ကယ်စီးလာတဲ့ လူငယ် ၂ ဦးကို စစ်ကော်မရှင်က ပစ်ခတ်လို့ သေဆုံးခဲ့ပါသေးတယ်။

စာတည်း – လင်း

မြေလတ်အသံ၊ ဩဂုတ် ၂၂၊ ၂၀၂၅။

မန္တလေးတိုင်း၊ မိတ္ထီလာမြို့နယ်ပြည်သူ့ကာကွယ်ရေးတပ်ဖွဲ့(ပကဖ)ယာယီတာဝန်ခံ စစ်ကော်မရှင်တပ်ရဲ့ ပစ်ခတ်ဖမ်းဆီးမှုကိုခံခဲ့ရတယ်လို့ မြို့နယ်ပကဖနဲ့နီးစပ်သူတဦးထံက သိရပါတယ်။

ဖမ်းဆီးခံရသူမှာ အသက် ၂၀ ကျော်အရွယ်ရှိ မိတ္ထီလာပကဖယာယီတာဝန်ခံ ကေကြီးဖြစ်ပြီး ဩဂုတ် ၁၄ ရက် ညနေပိုင်းက ဒရုန်းနဲ့ဆက်စပ်ပစ္စည်းတွေသယ်ယူဖို့ ကား ၂ စီးနဲ့ ထွက်ခွာလာစဥ် အမြန်လမ်း မိုင်တိုင် ၂၇၈ အနီး မန္တလေး-ရန်ကုန်ဘက်ခြမ်းမှာ ပစ်ခတ်ဖမ်းဆီးခံရတာလို့ ဆိုပါတယ်။

” ဒရုန်းပစ္စည်းသွားသယ်တာ။ ၂ စီးသွားတာ။ ၁ စီးမိသွားတယ်။ ထောင်ဖမ်းခံရတာ။ ကင်းပုန်းနဲ့မိတာ။ ကားကလည်း လှည်းလမ်းကြောင်းထဲကျပြီး မြေကျွံသွားချိန် ပစ်ခတ်မှုဖြစ်ပြီး သူတယောက်ပဲထိပြီးကျန်ခဲ့တာ။ ကျန်တဲ့သူတွေက လွတ်လာတယ်” လို့ မိတ္ထီလာမြို့နယ်ပကဖနဲ့နီးစပ်သူက မြေလတ်အသံကို ပြောပါတယ်။

စစ်ကော်မရှင်တပ်ကင်းပုန်းရဲ့ စောင့်ကြိုပစ်ခတ်ခံရတာကြောင့် ယာယီပကဖတာဝန်ခံမှာ ကျည်ထိမှန်ဒဏ်ရာနဲ့ ဖမ်းဆီးခံလိုက်ရသလို ၎င်းစီးနင်းလာတဲ့ကား ၁ စီးဆုံးရှုံးသွားခဲ့ပြီး ကျန်ကား ၁ စီးနဲ့ နောက်ထပ်တပ်ဖွဲ့ဝင် ၃ ဦးက လွတ်မြောက်ခဲ့တယ်လို့ သိရပါတယ်။

ဒရုန်းပစ္စည်းတွေသယ်ယူဖို့ ထွက်ခွာလာစဥ် အသွားခရီးမှာပစ်ခတ်ခံရတာကြောင့် ပစ္စည်းတွေမသယ်ယူနိုင်ခဲ့ဘဲ တပ်ဖွဲ့ဝင်တွေကလည်း လက်နက်တွေလည်း ယူဆောင်မသွားတာကြောင့် ယာယီပကဖတာဝန်ခံနဲ့ ကား ၁ စီး သာဆုံးရှုံးမှုရှိခဲ့တယ်လို့ ၎င်းက ဆိုပါတယ်။

ယာယီပကဖတာဝန်ခံ ကေကြီး ကို ဩဂုတ် ၂၂ ရက် ဒီကနေ့အထိ မိတ္ထီလာအခြေစိုက် တပ်မ ၉၉ ဌာနချုပ် စစ်ကြောရေးမှာ ဖမ်ဆီးထိန်းသိမ်းထားကြောင်း စုံစမ်းသိရှိထားကာ လက်ရှိမှာ ကျန်တပ်ဖွဲ့ဝင်တွေနဲ့ ယာယီတာဝန်ခံနဲ့ဆက်စပ်သူတွေလုံခြုံရေးအတွက် လိုအပ်တဲ့အစီအမံတွေလုပ်ဆောင်ပြီးပြီလို့ သိရပါတယ်။

စာတည်း – ဟိန်းစံ