ကျော်ကြီး၊ ဟယ်သာ

မြေလတ်အသံ၊ အောက်တိုဘာ ၈၊ ၂၀၂၅။

မန္တလေးတိုင်း၊ နွားထိုးကြီးမြို့နယ်နဲ့ ဆားလင်းကြီးမြို့နယ်မှာ စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် အမျိုးသမီး ၂ ဦးသေဆုံးပြီး ၁၁ ဦးထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

နွားထိုးကြီးမြို့နယ်၊ မကျီးကုန်းကျေးရွာက စစ်ရှောင်တွေနေတဲ့ဘုန်းကြီးကျောင်းကို အောက်တိုဘာ ၈ ရက် မနက် ၈ နာရီခွဲမှာ ဂျက်ဖိုက်တာနဲ့ ဗုံးကြဲခဲ့တာကြောင့် ဘုန်းကြီးကျောင်းဝင်းအတွင်း စစ်ရှောင်နေတဲ့ အမျိုးသမီး ၁ ဦးသေပြီး ၁၀ ဦးကျော်ဒဏ်ရာရတယ်လို့ ကူညီရေးလုပ်ဆောင်ပေးနေသူဆီက သိရပါတယ်။

“ရဲဘော်တွေလည်းမရှိဘဲ ဘုန်းကြီးကျောင်းကိုလေကြောင်းတိုက်ခိုက်မှုလုပ်သွားတာ။ ပြည်သူ ၁ ယောက် ဦးခေါင်းခွံလန်ပြီးဆုံးသွားတယ်။ ဒဏ်ရာရသူ ၁၀ ဦးကျော်တယ်။ ကလေး ၁ ယောက်ဆို ပေါင်ပြတ်သွားတယ်။”လို့ ကူညီကယ်ဆယ်ရေးလုပ်ဆောင်ပေးနေသူတဦးက ပြောပါတယ်။

ဗုံးထိမှန်တာကြောင့် အသက် ၄၅ နှစ်အရွယ် ဒေါ်ကြင်မှာ နေရာမှာတင်သေဆုံးပြီး စစ်ဘေးရှောင်ကလေးငယ်တွေ သံဃာတွေအပါအဝင် ၁၀ ဦးထက်မနည်းထိခိုက်ဒဏ်ရာရခဲ့ကာ ထိခိုက်သေဆုံးသူတွေကိုတော့ နီးစပ်ရာဆေးရုံဆေးခန်းတွေကို ပို့ဆောင်နေကြတယ်လို့ ဆိုပါတယ်။

ထိခိုက်သေဆုံးသူတွေက မကျီးကုန်းရွာခံတွေဖြစ်ပြီး တိုက်ပွဲအခြေအနေကြောင့် ကျေးရွာအတွင်း က နေအိမ်တွေမှာ မနေရဲဘဲ ဘုန်းကြီးကျောင်းထဲမှာ လာစုနေကြတာလို့ ဆိုပါတယ်။

မကျီးကုန်းကျေးရွာနဲ့ ၂ မိုင်ခန့်အကွာ စည်ပင်ကျေးရွာဘက်မှာ စစ်ကော်မရှင်တပ်နဲ့ ဒေသကာကွယ်ရေး ပူးပေါင်းတပ်တွေ တိုက်ပွဲဖြစ်နေတာ ၁၂ ရက်ရှိနေပြီလို့ သိရပါတယ်။

ဒါ့အပြင် စစ်ကိုင်းတိုင်း၊ ဆားလင်းကြီးမြို့နယ်၊ ကျားတက်ရွာကို အောက်တိုဘာ ၇ ရက်မှာလည်း စစ်ကော်မရှင်တပ်က လေကြောင်းကနေ ၂ ကြိမ်ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ကျားတက်ရွာအနီးကို မနက်ပိုင်းမှာ ဂျက်ဖိုက်တာနဲ့ဗုံး ၂ လုံးကြဲချိန် ပေါက်ကွဲ၊ ထိခိုက်မှုမရှိခဲ့ဘဲ နေ့လယ် ၃ နာရီလောက်မှာ ရွာထိပ်ဆီဆိုင်ရှေ့ကို ထပ်မံဗုံးကြဲခဲ့တာကြောင့် ဆီဆိုင်ပိုင်ရှင် အသက် ၄၀ အရွယ် အမျိုးသမီး ၁ ဦးသေဆုံးပြီး အသက် ၅၀ အရွယ် အမျိုးသား ၁ ဦးထိခိုက် ဒဏ်ရာရခဲ့တယ်လို့ ဆိုပါတယ်။

“ကျတာက ကျားတက်ရွာထိပ်ပေါ့၊ ဓာတ်ဆီဆိုင်ရှေ့တည့်တည့်ကျသွားတာ ဆီဆိုင်ပိုင်ရှင်ကတော့ ပြေးမလွတ်တဲ့သဘောထင်ပါတယ်။ အမြင့်ကြီးပဲ အပေါ်အမြင့်ကြီးကနေမှကြဲချတာ မနက်ကလည်း ဖိုက်တာလုပ်ထားတာဆိုတော့ ဒီဟာတော့ မြင်လဲမမြင်ရဘူး အသံပဲကြားရတာ ၃စီးတပြိုင်ထဲပဲ “လို့ ဒေသခံအမျိုးသမီးတဦးက ပြောပါတယ်။

နေ့လယ်ပိုင်းမှာ ဂျိုင်ရိုကော်ပတာ ၃ စီးနဲ့ ဗုံး ၃ လုံးကြဲချရာ ဆီဆိုင်ရှေ့နဲ့ ဆိုင်အနီးအနောက်ဘက်က လယ်ကွင်းတွေထဲကို ကျရောက်ခဲ့ပြီး ဒေသခံတချို့လည်းထွက်ပြေးတိမ်းရှောင်ခဲ့ကြတယ်လို့ ဆိုပါတယ်။

အောက်တိုဘာပထမအတွင်း စစ်ကော်မရှင်တပ်တွေရဲ့ ဂျိုင်ရိုကော်ပတာတွေဟာ ပုလဲမြို့နယ်၊ ဆားလင်းကြီးမြို့နယ်တို့ကိုဖြတ်ပြီး ပေါက်နဲ့ မြိုင်မြို့နယ်ဘက်ကို နေ့စဥ်နီးပါးဗုံးကြဲနေပြီး အမြင့်ပိုင်းကနေ ပျံသန်းနေကြတာကြောင့် ဒေသခံတွေလည်းသတိမထားနိုင်ခဲ့ကြဘူးလို့ ဒေသခံအမျိုးသမီးက ပြောပါတယ်။

“ပြောရရင်တော့ရှောင်တော့ရှောင်ကြတယ်။ ဒါပေမယ့် မနက်ခင်းကတက်သွားတာက သူတို့ နှစ်ကြိမ်တောင် လုပ်သွားတာဆိုတော့ ထပ်ပြီးတော့မလာတော့ဘူးထင်ပြီး နေတာလဲပါရင်ပါမှာပေါ့။ အခုရက်ပိုင်းထဲမှာ ဒီဘက်တွေကိုသန်သန်လာတာလေ၊ မမြင်ဘူးတော့ကျတော့ မမြင်ရဘူး အတော်ကိုမြင့်တယ်။” လို့ သူကပြောပါတယ်။

စစ်ကော်မရှင်တပ်က စစ်ကိုင်း၊ မကွေးနဲ့ မန္တလေးတိုင်းတို့အတွင်းမှာ လေကြောင်းတိုက်ခိုက်မှုတွေကို ခပ်စိပ်စိပ်လုပ်ဆောင်လျှက်ရှိနေပြီး ပြီးခဲ့တဲ့ အောက်တိုဘာ ၆ ရက် သီတင်းကျွတ်လပြည့်ညမှာလည်း ချောင်းဦးမြို့နယ်၊ ဗုံတိုကျေးရွာအနီး ဒေသတွင်းသပိတ်အဖွဲ့တွေနဲ့ ပြည်သူတွေစုပေါင်း ဆီးမီးသပိတ်လုပ်နေချိန် ဗုံးကြဲခဲ့တာကြောင့် ဒေသခံဒါဇင်နဲ့ချီသေဆုံးခဲ့ပါသေးတယ်။

စာတည်း – လင်း

ကျောက်ပန်းတောင်း၊ အောက်တိုဘာ ၃၊ ၂၀၂၅။

မန္တလေးတိုင်း၊ ကျောက်ပန်းတောင်းမြို့နယ်၊ ကိုင်းရွာနဲ့ စည်ပင်သာရွာကြား ကျောက်ပန်းတောင်း-မိတ္ထီလာလမ်းပိုင်းမှာ ရေတိုက်စားရာက တံတားကျိုးသွားတဲ့အတွက် ကားအစီးရေ ၃၀၀ ကျော် ပိတ်မိနေတယ်လို့ ကူညီပေးနေသူတွေဆီ သိရပါတယ်။

အောက်တိုဘာ ၃ ရက်နေ့ မနက် ၁၀ နာရီကျော်ကစပြီး ကားလမ်းမိုင်တိုင် ၅၁ အနီးရှိ ပေ ၂၀ ခန့်ရှိ တံတားမှာ ကျိုးကျခဲ့တာကြောင့် ခရီးသွားကားတွေဖြတ်သန်းလို့မရဘဲ ပိတ်မိနေခဲ့တာလို့ဆိုပါတယ်။

“မနက်က ကားလေး ၁ စီးလည်း သီသီလေးလွတ်သွားတာ။ နောက်က ကူးမယ်ကားတွေလည်း ရှေ့ကို ကူးမလို့ဟန်ပြင်တုန်းကျိုးသွားတာ။ အောက်ကနေ လှိုက်စားပြီး အပေါ်ကလည်းနည်းနည်း ကုန်ကားတွေ ဖြတ်တာလည်းများနေ၊ အောက်ကလည်းအထိန်းမရှိတော့ တံတားအချပ်ကလေးဘဲ ရှိတော့တဲ့ပုံစံမျိုး။ အဲ့ဒါလေးကမှ ကျိုးသွားတာ”လို့ ကူညီလုပ်ကိုင်ပေးနေသူတဦးကပြောပါတယ်။

ဒါ့ကြောင့် ခရီးသွားကားတွေဖြတ်သန်းလို့မရတော့ဘဲ ကျိုးကျသွားတဲ့နေရာကိုတော့ နေ့လယ် ၁ နာရီကျော်လောက်ကစတင်ပြီး မီးသတ်၊ လူမှုကူညီရေး၊ လမ်းဦးစီးဌာနနဲ့ဒေသခံတွေက ကျောက်တွေ ချကာ ပြန်လည်ပြင်ဆင်မှုတွေပြုလုပ်နေပြီလို့ သိရပါတယ်။

တံတားပြင်နေချိန် ကားလမ်းနှစ်ဖက်မှာ ခရီးသွားကားအစီးရေ ၃၀၀ ကျော်ထိပိတ်မိနေပြီး ဒီညနေ လောက်မှာ ကားတွေဖြတ်သန်းသွားလာနိုင်မယ့်အခြေအနေရှိနေတယ်လို့ ဆိုပါတယ်။

မိုးသည်းထန်စွာပြီး ကြက်မောက်တောင်ဆည်ထဲကို ဝင်လာတဲ့ရေပမာဏ များလာပြီး ရေပိုလွှဲကနေ ရေတွေ ကျော်ကျလာတာကြောင့် စက်တင်ဘာ ၃၀ ရက် မနက် ၅ နာရီကျော်လောက်ကစတင်ပြီး ကျောက်ပန်းတောင်း-မိတ္ထီလာ လမ်းမကြီး၊ ကားလမ်း မိုင်တိုင်အမှတ် ၅၁/၄ကနေ ၅၁/ ၇ အကြား ၃ ဖာလုံလောက် ရေကျော်ခဲ့ပါတယ်။

ဆည်ရေကျော်ပြီး ရေကျများလာတာကြောင့် ရေစီးကြောင်းတလျှောက် လယ်ဧက ၂၀၀ ကျော် ရေနစ်မြုပ်တာဖြစ်ခဲ့ပြီး လက်ရှိမှာတော့ ရေပြန်လည်ကျဆင်းနေပြီး ကားလမ်းပေါ်မှာ ရေအနည်း ငယ်လောက်သာကျန်ရှိတော့တယ်လို့ သိရပါတယ်။

စာတည်း – လင်း

မြင်းခြံ၊ အောက်တိုဘာ ၃၊ ၂၀၂၅။

မန္တလေးတိုင်း၊ မြင်းခြံမြို့နယ်၊ ညောင်ပင်ရွာကို ပျူစောထီး သီတာယုမွန်ဦးဆောင်တဲ့ ပျူစောထီးနဲ့ စစ်ကော်မရှင်တပ်ပူးပေါင်းအဖွဲ့က ၃ ရက်ဆက်မီးရှို့ခဲ့တယ်လို့ မြင်းခြံပြည်သူ့ကာကွယ်ရေးအဖွဲ့ တာဝန်ရှိသူတွေဆီက သိရပါတယ်။

စက်တင်ဘာ ၂၈ ရက်ကစပြီး မြင်းခြံဘက်ကနေ အင်အား ၂၀၀ ကျော်နဲ့စစ်ကြောင်းထိုးလာတဲ့ အဲ့ဒီစစ်ကြောင်းဟာ စက်တက်ဘာ ၂၉ ရက်ကနေ အောက်ဆိုဘာ ၁ ရက်အထိ ညောင်ပင်ရွာကို ၄ ကြိမ်နီးပါး မီးရှို့ထားတယ်လို့ဆိုပါတယ်။

“ညောင်ပင်ရွာကိုဘဲ သုံးလေးကြိမ်လောက်ရှိနေပြီး မီးရှို့နေတာ။ ဝင်လိုက်ထွက်လိုက် ပြန်ရှို့လိုက်လုပ် နေတာ။ အိမ်ခြေကတော့ သေချာအတိအကျမရသေးဘူး။ လက်ရှိထိတော့ ကျနော်တို့ သိထားတာက ညောင်ပင်တရွာဘဲရှိသေးတယ်။ သီတာယုမွန်တို့ ပြည်သူ့စစ်တွေပါတယ်”လို့ မြင်းခြံမြို့နယ်ပကဖ တာဝန်ရှိသူတဦးက ပြောပါတယ်။

ခုလိုမီးရှို့ခဲ့တာကြောင့် အိမ်ခြေ ၃၀၀ ဝန်းကျင်ရှိ ညောင်ပင်ရွာက နေအိမ် ၄၀ ကျော်မီးလောင် ပျက်စီးနိုင်ပြီး အောက်တိုဘာ ၂ ရက် ဒီကနေ့အထိ စစ်ကြောင်းကရွာကနေပြန်မထွက်သေးတာကြောင့် ပျက်စီးမှုအတိအကျတော့ မသိရသေးဘူးလို့ဆိုပါတယ်။

စစ်ကြောင်းဝင်လာလို့ ညောင်ပင်၊ သဲရွာ၊ ခင်မတဲ၊ မြောက်ကွန်း၊ ရွာကြီး၊ ရွာသစ်အပါအဝင် ကျေးရွာ ၇ ရွာလောက်က ဒေသခံ ၅,၀၀၀ ကျော်ဟာ စက်တင်ဘာ ၂၈ ရက်လောက်ကစပြီး စစ်ရှောင်နေရကာ အောက်တိုဘာ ၃ ရက်နေ့အထိ နေရပ်မပြန်ကြရသေးဘူးလို့ သိရပါတယ်။

ဒါ့အပြင် အဲ့ဒီဒေသအတွင်း စစ်ရေးအခြေအနေတင်းမာကာ တော်လှန်ရေးတပ်တွေနဲ့လည်း တိုက်ပွဲတွေ ဖြစ်နေတယ်လို့ ဆိုပါတယ်။

စက်တင်ဘာ ၁၈ ရက်ကလည်း မြင်းခြံမြို့နယ်၊ ကျောက်တိုင်ကျေးရွာမှာ စစ်ကော်မရှင်ဘက်က ဂျိုင်ရိုကော်ပတာနဲ့ ဗုံးကြဲလို့ သံဃာ ၁ ပါးပျံလွန်ပြီး အမျိုးသမီးကြီး ၁ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

မိုးကုတ်၊ အောက်တိုဘာ ၁၊၂၀၂၅။

မန္တလေးတိုင်း၊ မိုးကုတ်မြို့ကို စစ်ကော်မရှင်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ပြည်သူ ၂ ဦးထိခိုက်ဒဏ်ရာရကာ နေအိမ်တချို့ ပျက်စီးခဲ့တယ်လို့ ဒေသခံတွေဆီက သိရပါတယ်။

အောက်တိုဘာ ၁ ရက် ဒီနေ့မနက် ၁၁ နာရီဝန်းကျင်မှာ မိုးကုတ်မြို့အနောက်ခြမ်း၊ ဒေါ်နန်းကြည်တောင် အနီးကို စစ်ကော်မရှင်တပ်က ဂျက်ဖိုက်တာနဲ့ ပေါင် ၂၅၀ ဗုံးတွေ ကြဲခဲ့ကာ ရေထွက်ကြီးကျေးရွာအနီးကို ကျခဲ့တာလို့ သိရပါတယ်။

“ရေထွက်ရွာက ၂ ယောက်ထိတယ်။ရေထွက်ကြီးသွားတဲ့လမ်း ညောင်ပင် မရောက်ခင် သံဗန်းတွေ လုပ်တဲ့အိမ်နားကျတာပါ။ အမျိုးသား ၂ ဦးလို့သိရပါတယ်”လို့ ဒေသခံတဦး ကပြောပါတယ်။

ထိခိုက်ဒဏ်ရာရသူတွေထဲက ၁ ဦးကတော့ ဒဏ်ရာပြင်းထန်ကာ စိုးရိမ်ရတယ်လို့သိရပါတယ်။

ပြီးခဲ့တဲ့ စက်တင်ဘာလအတွင်းမှာ စစ်ကော်မရှင်က မိုးကုတ်မြို့ကို လေကြောင်းကနေ ၂ ကြိမ် ဗုံးကြဲတိုက်ခိုက်ခဲ့တယ်လို့ TNLA ကလည်းထုတ်ပြန်ထားပါတယ်။

စစ်ကော်မရှင်တပ်က မန္တလေးတိုင်းအတွင်း မိုးကုတ်၊ မတ္တရာ၊ စဉ့်ကူးနဲ့ သပိတ်ကျင်းနယ်တို့ကို ဆက်တိုက် လေကြောင်းတိုက်ခိုက်နေပြီး စက်တင်ဘာ ၁၆ ရက် မနက် ၇ နာရီကျော်မှာလည်း မိုးကုတ်မြို့ကို ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးဒဏ်ရာရရှိပြီး လူနေအိမ် ၄ လုံး ပျက်စီးခဲ့တယ်လို့ ဒေသခံတွေဆီက သိရပါတယ်။

ဓါတ်ပုံ – TNLA

သတင်း – မြတ်