တောင်သာမှာလည်း စစ်ကော်မရှင်တပ်ဖွဲ့ဝင် ၂ ဦးပစ်ခံရပြီး သေဆုံး

မြေလတ်အသံ၊ အောက်တိုဘာ ၂၈၊ ၂၀၂၅။

မကွေးတိုင်း၊ သရက်ခရိုင်၊ မင်းတုန်းမြို့နယ် ပုသိမ်-မုံရွာလမ်းပိုင်းမှာ စစ်ကော်မရှင်တပ်လက်အောက် တိုင်းအဆင့်ရဲမှူးလိုက်ပါလာတဲ့ ယာဥ်တန်းကို ဒေသကာကွယ်ရေးတပ်ဖွဲ့တွေက စောင့်ကြိုတိုက်ခိုက်ခဲ့ရာ ကား ၁ စီးကို မီးရှို့ဖျက်ဆီးနိုင်ပြီး ခဲယမ်းတွေသိမ်းဆည်းရရှိခဲ့တယ်လို့ သရက်ခရိုင်တပ်ရင်း ၄ က ထုတ်ပြန်ပါတယ်။

အောက်တိုဘာ ၂၈ ရက် ဒီကနေ့ နေ့လယ် ၁ နာရီခန့်မှာ မင်းတုန်းမြို့ဘက်မှ ဝန်တွင်းကျေးရွာဘက်ကိုမောင်းနှင်လာတဲ့ စစ်ကော်မရှင်ကား ၄ စီးကို မဲဇလီကျေးရွာနဲ့ ဝန်တွင်းကျေးရွာအကြားမှာ မိုင်းဆွဲတိုက်ခိုက်ခဲ့ရာ ဟိုင်းလပ်ယာဥ်(Hilux) ၁ စီး မိုင်းထိခဲ့တယ်လို့ ဆိုပါတယ်။

မိုင်းထိပြီးနောက် မောင်းနှင်ထွက်ပြေးသွားတဲ့ကားကို ဒေသကာကွယ်ရေးတပ်ဖွဲ့တွေက လိုက်လံပစ်ခတ်တိုက်ခိုက်ရာ မိုင်းထိတဲ့ကားကို လမ်းပေါ်ရပ်ထားခဲ့ကာ ကားပေါ်ပါ ထိခိုက်ဒဏ်ရာရသူတွေကို ကျန်ကား ၃ စီးနဲ့ တင်ဆောင်ပြီး မောင်းနှင်ထွက်ပြေးသွားခဲ့တယ်လို့ ထုတ်ပြန်ချက်မှာ ဖော်ပြပါတယ်။

တိုက်ခိုက်မှုအတွင်း မိုင်းဆွဲခံရပြီးပစ်ခတ်ခံရတဲ့ကားပေါ်ပါ စစ်ကော်မရှင်တပ်သား ၄ ဦး ထိခိုက်သေဆုံးနိုင်ပြီး ၇.၆၂ မမကျည် ၁၀၂ တောင့်၊ ကာဘိုင်ကျည် ၁၇ တောင့်၊ စစ်အသုံးအဆောင်ပစ္စည်းအချို့နဲ့ ငွေသား ၃ သိန်းကျပ်ကို သိမ်းဆည်းနိုင်ခဲ့ကာ စစ်ကော်မရှင်ကားကို မီးရှို့ဖျက်ဆီးခဲ့တယ်လို့ သိရပါတယ်။

တိုက်ခိုက်ခံရပြီးတဲ့နောက် မင်းတုန်းမြို့အဝင် ၅ မိုင်စစ်ဆေးရေးဂိတ်က စစ်ကော်မရှင်တပ်ဖွဲ့ဝင်တွေဟာ လက်နက်ကြီးနဲ့ ပစ်ခတ်နေတာကြောင့် ဒေသခံတွေနဲ့ခရီးသွားပြည်သူတွေသတိထားနေထိုင်ကြဖို့ ထုတ်ပြန်ချက်က သတိပေးထားပါတယ်။

ဒါ့အပြင် မန္တလေးတိုင်း၊ မြင်းခြံခရိုင်၊ တောင်သာမြို့နယ်မှာ ပြည်သူ့လွတ်မြောက်ရေးတပ် – PLA က တိုက်ခိုက်လို့ စစ်ကော်မရှင်တပ်ဖွဲ့ ၂ ဦးသေဆုံးပြီး သေနတ် ၁ လက် သိမ်းဆည်းရရှိခဲ့တယ်လို့ သိရပါတယ်။

အောက်တိုဘာ ၂၇ ရက် မနေ့ညနေပိုင်းမှာ တောင်သာမြို့နယ်အတွင်းစစ်ကော်မရှင်ကင်းစခန်းတခုက ဆိုင်ကယ်စီးနင်းထွက်ခွာလာတဲ့ တပ်ဖွဲ့ဝင် ၂ ဦးကို ပစ်ခတ်တိုက်ခိုက်ခဲ့တာဖြစ်ပြီး ၂ ဦးလုံးသေဆုံးခဲ့တယ်လို့ ဆိုပါတယ်။

“ ပစ်လိုက်တော့ ၂ ယောက်လုံး သေသွားတယ်။ ဒါပေမယ့် ၁ ယောက်က သေနတ်တွေက မြောင်းထဲပြုတ်ကျသွားပြီး သူတို့တပ်စခန်းနဲ့လည်း နီးတော့လေ၊ လိုက်ရှာ မကောက်နိုင်ဘူး။ ညနေစောင်းသွားပြီဆိုတော့” လို့ ပြည်သူ့လွတ်မြောက်ရေးတပ်မတော် – PLA ပြောရေးဆိုခွင့်ရှိသူက မြေလတ်အသံကို ပြောပါတယ်။

သေဆုံးစစ်ကော်မရှင်တပ်သားတွေထံက BA 63 G3 သေနတ် ၁ လက်နဲ့ ကျည်ဆံအချို့ကို သိမ်းဆည်းရရှိခဲ့ကာ PLA တပ်ဖွဲ့ဝင်တွေ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။

ဆိပ်ဖြူ၊ အောက်တိုဘာ ၂၈၊ ၂၀၂၅။

မကွေးတိုင်း၊ ပခုက္ကူခရိုင်၊ ဆိပ်ဖြူမြို့နယ်၊ သံဇလုံရွာစစ်ဆေးရေးဂိတ်ကို ဒေသကာကွယ်ရေးတပ်ဖွဲ့တွေက ဝင်ရောက်တိုက်ခိုက်ခဲ့ပြီး နှစ်ဖက်ထိခိုက်သေဆုံးမှုရှိခဲ့တယ်လို့ ပခုက္ကူခရိုင် အမှတ် ၁၉ တပ်ရင်းတာဝန်ရှိသူတွေထံက သိရပါတယ်။

ဂွေးပင်ချောင်းရွာနဲ့ သံငယ်လုံးကျေးရွာကြားမှာတဲ့ရှိတဲ့ အဲ့ဒီစစ်ဆေးရေးဂိတ်မှာ စစ်ကော်မရှင်တပ်နဲ့ပြည်သူ့စစ်ပူးပေါင်းအင်အား ၁၂ ဦးခန့်ရှိတပ်စွဲနေတာဖြစ်ပြီး အောက်တိုဘာ ၂၇ ရက် မနက် ၅ နာရီခွဲခန့်မှာ ဒေသကာကွယ်ရေးတပ်ဖွဲ့တွေက ဝင်ရောက်တိုက်ခိုက်ခဲ့ရာ အပြန်အလှန်ပစ်ခတ်မှု မိနစ် ၃၀ ခန့်ဖြစ်ပွားခဲ့တယ်လို့ ဆိုပါတယ်။

” ဂိတ်ကတော့ ထိုင်ထားတာ ၂ လဝန်းကျင်ရှိပြီး။ တိုက်ပွဲက မိနစ် ၃၀ လောက်ဘဲ။ မြို့နဲ့နီးတော့ စစ်ကူအလွယ်လာနိုင်တဲ့ ဂိတ်ဗျ၊ စစ်ကြောင်းမှူးက လက်နက်ငယ်ထိခဲ့ပြီး ဘော်ဒီ(အလောင်း) ဆွဲချိန် မရလိုက်ဘူး”လို့ ပခုက္ကူခရိုင် အမှတ် ၁၉ တပ်ရင်းတာဝန်ရှိတဦးက မြေလတ်အသံကို ပြောပါတယ်။

တိုက်ပွဲအတွင်း စစ်ကော်မရှင်တပ်ဖွဲ့နဲ့ပြည်သူစစ် ၄ ဦးသေဆုံးခဲ့ပြီး MA 3 သေနတ် ၁ လက်၊ ကျည်ဆန်တချို့ သိမ်းဆည်းရရှိခဲ့တယ်လို့ သိရပါတယ်။

တော်လှန်ရေးတပ်တွေဘက်ကလည်း မကွေးတိုင်းပကဖရွေ့လျားစစ်ကြောင်း (Yenanthar column)ရဲ့ စစ်ကြောင်းမှူး ရဲဘော် ဆိပ်ဖြူ (ခ) ဟိန်းမင်းသူ တိုက်ပွဲကျသေဆုံးခဲ့ရပြီး ရုပ်အလောင်းပြန်မရခဲ့ဘူးလို့ ဆိုပါတယ်။

တိုက်ပွဲဖြစ်ပြီးတဲ့နောက် အခင်းဖြစ်နေရာကို စစ်ကော်မရှင်တပ်ဖွဲ့စစ်ကူတွေ ထပ်မံရောက်လာပြီး လက်ရှိမှာ အဲ့ဒီစစ်ဆေးရေးဂိတ်ကို အင်အားတိုးမြှင့်ချထားတယ်လို့ သိရပါတယ်။

အဆိုပါတိုက်ခိုက်မှုကို ပခုက္ကူခရိုင် အမှတ် ၁၉ တပ်ရင်း၊ မကွေးတိုင်းပကဖ ရွေ့လျားစစ်ကြောင်း( Yenanthar column)တို့ကပူးပေါင်းလုပ်ဆောင်ခဲ့တာပါ။

အောက်တိုဘာ ၂၅ ရက်ကလည်း ဆိပ်ဖြူမြို့နယ်၊ ဂွေးပင်ချောင်းကျေးရွာအနီးမှာ စစ်ကော်မရှင်စစ်ကြောင်းမိုင်းဆွဲတိုက်ခိုက်ခံရလို့သေဆုံးထိခိုက်မှုတွေရှိခဲ့တယ်လို့ သိရပါတယ်။

စာတည်း – ဟိန်းစံ

မင်းတုန်း၊ အောက်တိုဘာ ၂၆၊ ၂၀၂၅။

မကွေးတိုင်း၊ မင်းတုန်းမြို့အဝင်မှာ ကုန်ကားတွေကို ငွေကြေးကောက်ဖို့လာတဲ့ ရဲတပ်သား ၂ ဦးကို ပစ်ခတ်ပြီး လက်နက်တွေလည်းသိမ်းဆည်းခဲ့တယ်လို့ သရက်ခရိုင်အမှတ် ၄ တပ်ရင်း သတင်းနဲ့ပြန်ကြားရေးတာဝန်ခံ ကိုမြတ် က ပြောပါတယ်။

မင်းတုန်းမြို့ပေါ်ကလာတဲ့ ရဲတပ်သားနေမင်းထက်နဲ့ သန်းထိုက်စိုးတို့ကို မင်းတုန်းမြို့အဝင်လမ်းပိုင်း အင်းလယ်ကုန်းရွာအနီးမှာ အောက်တိုဘာ ၂၆ ရက်ဒီမနက် ၆ နာရီမှာ ပစ်ခတ်ခဲ့တာလို့ ဆိုပါတယ်။

“အမြဲတမ်း ၂ ယောက်တော့မဟုတ်ပါဘူး။ တခါတလေကျရင် ၄ ယောက် ၅ ယောက်ပေါ့။ နေ့စဉ်ရက်ဆက်ကြီးမဟုတ်ဘူးလို့ ဆိုလိုချင်တာပေါ့။ ဂိတ်ချ အမြဲတမ်းပုံမှန်လုပ်နေတာမျိုးတော့ မဟုတ်ဘူးပေါ့။ သူတို့ငွေလိုရင် လိုသလိုမျိုးနေမှာပေါ့၊ အလောင်းကို နာရေးကူညီမှုကား၂ စီးနဲ့ **တွေနဲ့ လာပြီးတော့ ကောက်သွားတာဖြစ်ပါတယ်”လို့ ကိုမြတ်က ပြောပါတယ်။

ပစ်ခတ်ပြီးနောက် G 3 ၂ လက်၊ ကျည်ဘောက် ၂ ခု၊ ကျည် ၂၉ တောင့်၊ လက်ပစ်ဗုံး ၁ လုံး၊ လက်ထိပ် ၁ ခု၊ ဖုန်း ၁ လုံးနဲ့ ငွေသား ၆,၅၀၀၀ ကျပ်တို့ကို သိမ်းဆည်းခဲ့တယ်လို့လည်း ဆိုပါတယ်။

မင်းတုန်းမြို့က စစ်ကော်မရှင်တပ်ဖွဲ့ဝင်တွေဟာ အဆိုပါလမ်းပိုင်းမှာလာတဲ့ ကုန်ကားတွေဆီကနေ ခြိမ်းခြောက်ငွေတောင်းလေ့ရှိပြီး ကားသမားတွေမှာလည်း ကျပ်သိန်း ၅၀ ဝန်းကျင်လောက်ထိပေးရကာ လမ်းပိုင်းတလျောက် ပေါ်တာဆွဲဖမ်းဆီးတာတွေလည်းလုပ်တယ်လို့ သိရပါတယ်။

ဒီပစ်ခတ်မှုကို ပြည်သူ့ကာကွယ်ရေးတပ်မတော်၊ သရက်ခရိုင်အမှတ် ၄ တပ်ရင်း၊ တပ်ခွဲ ၂၊ တပ်စိတ် ၅ ကလုပ်ဆောင်ခဲ့တာပါ။

ပြီးခဲ့တဲ့ စက်တင်ဘာ ၂၈ ရက်ည ၁၁ နာရီကျော်ကလည်း မင်းတုန်းမြို့ပေါ်ကနေ စစ်ကော်မရှင်တပ်တွေ မောင်းနင်လာတဲ့ကားကို ကျောက်တိုင်ရွာအနီးမှာ စစ်ဆေးဖို့ရပ်တန့်ခိုင်းရာ မရပ်ဘဲ ပစ်ခတ်ထွက်ပြေးခဲ့ပြီးနောက် တော်လှန်ရေးတပ်တွေလိုက်လံပစ်ခတ်ချိန်မှာ ကားကိုထားပြီး ထွက်ပြေးကြတာကြောင့် ကျန်ခဲ့တဲ့ကားကို မီးရှို့ဖျက်ဆီးခဲ့တယ်လို့ United States Of Burma Army -USBA ဆီက သိရပါတယ်။

စာတည်း – လင်း