ပွင့်ဖြူ

ပွင့်ဖြူ၊ ဧပြီ ၁၊ ၂၀၂၆။

မကွေးတိုင်း၊ ပွင့်ဖြူမြိုနယ်၊ ကနီကျေးရွာနဲ့လယ်မကျေးရွာမှာ ၃ ရက်အတွင်းမိုင်းထိခဲ့တာကြောင့် ပြည်သူ ၂ ဦးခြေထောက်ပြတ်သွားတယ်လို့ ဒေသခံတွေဆီက သိရပါတယ်။

ကနီကျေးရွာနေ အသက် ၃၀ အရွယ် ကိုအောင်ဝင်းဟာ မတ်လ ၂၉ ရက် နေ့လယ်ပိုင်းမှာ ကျေးရွာအနီး တောစပ်ကိုထင်းခုတ်သွားချိန် မိုင်းထိခဲ့ပြီး လယ်မကျေးရွာနေ အသက် ၁၃ နှစ်အရွယ် မနှင်းထက်ထက်လှိုင်ကတော့ မတ်လ ၃၁ ရက်မနက် ၇ နာရီမှာ ကျေးရွာနဲ့ ၁ မိုင်အကွာတောစပ်ကို ထင်းခုတ်သွားချိန် မိုင်းထိခဲ့တာလို့ ဆိုပါတယ်။

“ကိုအောင်ဝင်းကတောစပ်မှာ ခြေထောက်ကိုထိတာ။ ခြေထောက် ၁ ဖက်ကြေသွားတယ်။ သူကတောဘက်ကိုထင်းခွေသွားရာမှာ ထိတာ။ အဲ့ဘက်မှာ မိုင်းကွင်းတွေဘာတွေရှိတယ်။ လယ်မမှာလည်း မိုင်းထိတာဟုတ်တယ်။ အတည်ပြုလို့ရတယ်။ တောထဲသွားတာမှာထိတာ။ “လို့ ကျေးရွာနဲ့နီးစပ်သူတဦးက ပြောပါတယ်။

အဆိုပါမိုင်းထိတဲ့နေရာတွေမှာ ယခင်ကတော်လှန်ရေးတပ်တွေလှုပ်ရှားချိန် စစ်ရေးအခြေအနေအရမိုင်းထောင်ကာ ကန့်သတ်နေရာတွေသတ်မှတ်တာတွေရှိခဲ့ပြီး အခုပေါက်ကွဲတဲ့မိုင်းတွေဟာ ပြန်ဖြုတ်ဖို့ကျန်ခဲ့တဲ့မိုင်းတွေဖြစ်နိုင်တယ်လို့လည်း အထက်ပါဒေသခံက ခန့်မှန်းပါတယ်။

မိုင်းထိလို့ ကိုအောင်ဝင်းရဲ့ ညာဘက်ခြေဖဝါးနဲ့ မနှင်းထက်ထက်အောင်မှာ ဘယ်ဘက်ခြေဖဝါးကြေသွားခဲ့ပြီး ၂ ဦးစလုံးကိုတော့ မကွေးပြည်သူ့ဆေးရုံမှာ ဆေးကုသပေးနေရတယ်လို့ သိရပါတယ်။

ပြီးခဲ့တဲ့ဖေဖော်ဝါရီ ၂၆ ရက်ကလည်း စလင်းမြို့နယ်၊ မြောင်းဘောင်ကျေးရွာအနီး တောစပ်မှာ ပျားဖွတ်သွားတဲ့ လင်မယား ၂ ဦး မိုင်းထိလို့ ဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ကျော်ကြီး၊ ဒိန်းဂျား

ပွင့်ဖြူ၊ ဇန်နဝါရီ ၃၊ ၂၀၂၆။

မကွေးတိုင်း၊ ပွင့်ဖြူမြို့နယ်၊ ကျောင်းကုန်းကြီးကျေးရွာမှာ အုပ်ချုပ်ရေးမှူးနဲ့အဖွဲ့ပစ်ခတ်ခံရပြီး ၄ ဦးသေဆုံးခဲ့တယ်လို့ ပွင့်ဖြူမြို့နယ်တော်လှန်ရေးတပ်ပေါင်းစုတာဝန်ရှိသူဆီက သိရပါတယ်။

ဇန်နဝါရီ ၃ ရက်မနက် ၄ နာရီခန့်မှာ ကျေးရွာဘုန်းကြီးကျောင်းထဲ နေထိုင်နေတဲ့ ကျေးရွာအုပ်ချုပ်ရေးမှူး အသက် ၄၀ ကျော်အရွယ် ပြားဦး (ခ) မင်းခိုင်ဦးနဲ့အဖွဲ့ကို ဝင်ရောက်ပစ်ခတ်ခဲ့တာလို့ ဆိုပါတယ်။

“သူတို့က ဘုန်းကြီးကျောင်းထဲမှာ စုနေနေတာကိုသိလို့ သူတို့နေတဲ့အခန်းထဲထိ ဝင်ပစ်ခဲ့တယ်။ ထိခိုက်တဲ့ ပျူတယောက်ကတော့ ကျည်မှန်ပြီးကာမှ ပုဆိုးစလွယ်သိုင်းထွက်ပြေးသွားတယ်။”လို့ ပွင့်ဖြူမြို့နယ် တော်လှန်ရေးတပ်ပေါင်းစုတာဝန်ရှိသူတဦးက ပြောပါတယ်။

ပစ်ခတ်ခံရလို့အုပ်ချုပ်ရေးမှူး ပြားဦး (ခ) မင်းခိုင်ဦး၊ အုပ်ချုပ်ရေးမှူးလက်ထောက်တွေဖြစ်တဲ့ ပျူစောထီးအောင်အောင်၊ ရင်မင်းထွန်း၊ အောင်မြင့်သူတို့ ၄ ဦးဟာ နေရာတင်သေဆုံးခဲ့တယ်လို့ ဆိုပါတယ်။

ရွာကနေ တိမ်းရှောင်သွားသူတွေကိုလည်း အဆိုပါအုပ်ချုပ်ရေးမှူးနဲ့အဖွဲ့က ရွာကိုပြန်မလာရင် ငွေကျပ် ၅ သိန်းဒဏ်ရိုက်မယ်လို့ ခြိမ်းခြောက်တာနဲ့ တော်လှန်ရေးအဖွဲ့တွေထိန်းချုပ်ထားတဲ့ရွာတွေက ပြည်သူတွေကိုလည်း ဖမ်းဆီးငွေညှစ်၊ ဆိုင်ကယ်တွေသိမ်းယူတာကြောင့် သွားရောက်ပစ်ခတ်ခဲ့တာ လို့ဆိုပါတယ်။

ပစ်ခတ်ပြီးနောက် ပျူစောထီးအဖွဲ့တွေကိုင်ဆောင်တဲ့ ဓားရှည် ၂ လက်၊ သေနတ် ၁ လက်၊ ကျည်ကာ ၁ ထည်၊ လက်ပစ်ဗုံး ၁ လုံး၊ ကျည်ဘောက် ၂ ခု၊ ဖုန်း ၃ လုံး၊ ကျည်ဆန်အချို့နဲ့ ငွေအချို့ကို သိမ်းဆည်းခဲ့တယ်လို့ ဆိုပါတယ်။

ဒီဇင်ဘာ ၂၃ ရက်ကလည်း ပွင့်ဖြူမြို့နယ်၊ ကျောင်းကုန်းကြီး ပျုစောထီးစခန်းကို တော်လှန်ရေးတပ်ဖွဲ့ဝင်တွေက ဝင်ရောက်တိုက်ခိုက်ရာက အပြန်အလှန်ပစ်ခတ်မှုဖြစ်ပြီး ပျူစောထီး ၆ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

စလင်း၊ အောက်တိုဘာ ၁၁၊ ၂၀၂၅။

မကွေးတိုင်း၊ ပွင့်ဖြူမြို့နဲ့ စလင်းမြို့နယ်၊ ငွေသောင်ကျေးရွာနဲ့ ချောက်ပင်ရွာက အမျိုးသား ၁၁ ဦး ပေါ်တာဆွဲဖမ်းဆီးခံရပြီး အဲ့ဒီထဲက ၃ ဦးကတော့ ငွေပေးပြီးပြန်ရွေးခဲ့ရတယ်လို့ ဒေသခံတွေဆီက သိရပါတယ်။

အောက်တိုဘာ ၇ ရက်မှာ ငွေတောင်ကျေးရွာအတွင်းသွားလာနေတဲ့ အသက် ၂၀ ကျော် အရွယ်အမျိုးသား ၇ ဦး၊ အောက်တိုဘာ ၈ ရက်က စလင်းမြို့ပေါ်ကိုလာတဲ့ ချောက်ပင်ကျေးရွာက အမျိုးသား ၁ ဦးနဲ့ အောက်တိုဘာ ၁၀ ရက်မှာ ငွေတောင်ကျေးရွာက ၂၃ နှစ်အရွယ် မောင်လှိုင်မျိုးသန်းတို့ကို စစ်ကော်မရှင်တပ်နဲ့ ပျူစောထီးတွေက ဖမ်းဆီးခဲ့တယ်လို့ ဆိုပါတယ်။

“စလင်းမြို့နယ် ငွေသောင်ကျေးရွာကနေ လူငယ် ၇ ဦးကို ပျူစောထီးအဖွဲ့က ဖမ်းဆီးခေါ်ဆောင် သွားတာရှိတယ်၊ အဲ့ဒီလူငယ် ၇ ဦးထဲက ၃ ဦးကတော့ ငွေပေးလို့ လွတ်မြောက်လာတယ်၊ ၃ ဦးကတော့ သိန်း ၅၀ ကနေ သိန်း ၈၀ အထိ ပေးပြီးရွေးရတယ်” လို့ ပြည်သူ့ညီနောင် – စလင်းအဖွဲ့ တာဝန်ခံ ကိုပြည်သူ က ပြောပါတယ်။

အဲ့ဒီနောက် အောက်တိုဘာ ၇ ရက်မှာ ဖမ်းဆီးခံရသူတွေထဲက ၃ ဦးကတော့ အောက်တိုဘာ ၈ ရက်မှာ စလင်းမြို့ ရဲစခန်းကိုငွေပေးပြန်လွတ်ခဲ့ကာ ကျန် ၆ ဦးကတော့ စလင်းမြို့မရဲစခန်းမှာ ဒီကနေ့ထိ ဖမ်းဆီးခံထားရဆဲ ဖြစ်တယ်လို့ သူကပြောပါတယ်။

ဒါ့အပြင် အောက်တိုဘာ ၁၁ ရက်မှာလည်း ပွင့်ဖြူမြို့နယ်၊ ကပြည့်လမ်းကွဲမှာ မကွေး-စလင်း-ဆင်ဖြူကျွန်း ပြေးဆွဲနေတဲ့ ခရီးသည်တင်ကားပေါ်ကနေ အသက် ၃၀ အရွယ် အမျိုးသား ၂ ဦးကို စစ်ကော်မရှင်တပ်တွေက ဖမ်းဆီးခဲ့တယ်လို့ နောက်ထပ်ဒေသခံတဦးဆီက သိရပါတယ်။

“အဲ့ဒီကပြည့်လမ်းခွဲမှာတင် လူငယ်တွေ အတော်များများ ပေါ်တာဆွဲဖမ်းဆီးခံရနိုင်တယ်ဗျ။ ကျနော်က အရှေ့ကားပေါ်မှာဆိုတော့ နောက်ကားတွေလည်း ဖမ်းဆီးစစ်ဆေးနေတာတွေ့တယ်ဗျ။ နန်းထိုက်တော်ဝင်ကားနောက်မှာ မိုးသောက်ရောင်နီကားလည်းပါတယ်၊ အဲ့နောက်မှာလည်း ကားတွေရှိသေးတယ်ဗျ။ စစ်**တွေက ၁၅ ယောက်လောက်ရှိတယ်ဗျ။ ယူနီဖောင်းတွေ လက်နက်တွေနဲ့ ကားပေါ်ကလူတွေ အတင်းဆင်းခိုင်းပြီးဆွဲတာဗျ။” လို့ ဒေသခံတဦးကပြောပါတယ်။

အဆိုပါ ဖမ်းဆီးခံရသူတွေနဲ့ပက်သက်တဲ့ နောက်ဆက်တွဲအခြေအနေတွေကိုတော့ မြေလတ်အသံက သီးခြားအတည်မပြုနိုင်သေးပါဘူး။

မကွေးတိုင်းအတွင်း စလင်း၊ ပွင့်ဖြူ၊ ချောက်စတဲ့မြို့နယ်တို့မှာ စစ်ကော်မရှင်တပ်နဲ့ ပျူစောထီးတွေက မြို့ပေါ်ရပ်ကွက်တွေအပြင် ကျေးရွာတွေဘက်မှာပါ ပေါ်တာဆွဲဖမ်းဆီးမှုတွေ မကြာခဏပြုလုပ်လျှက် ရှိနေတာပါ။

ပြီးခဲ့တဲ့ စက်တင်ဘာ ၂၇ ရက်ကလည်း လယ်ကွင်းထဲ နွားစာရိတ်နေတဲ့ ဖေါင်းလင်းကျေးရွာက လူငယ် ၁ ဦးကိုဖမ်းဆီးခံခဲ့ရပြီး ဒီကနေ့အထိပြန်မလွတ်လာသေးဘူးလို့ သိရပါတယ်။

စာတည်း – လင်း

◼ မိုင်းကွဲပြီးနောက် ကင်းလှည့်စစ်ဆေးပြီး လူငယ်တဦးကို ဖမ်းဆီး

ပွင့်ဖြူ၊ ဇူလိုင် ၂၀၊ ၂၀၂၅။

မကွေးတိုင်း၊ ပွင့်ဖြူမြို့ပေါ်မှာ အာဇာနည်နေ့အခမ်းအနားပြုလုပ်မယ့်နေရာအနီး မိုင်းကွဲလို့ စစ်ကောင်စီ ဘက်က အခမ်းအနားဖျက်သိမ်းခဲ့ရတယ်လို့ ဒေသခံတွေဆီက သိရပါတယ်။

ဇူလိုင် ၁၉ ရက်မနက် ၇ နာရီခန့်မှာ အလယ်ပိုင်းရပ်ကွက်နဲ့ အရှေ့ပိုင်းရပ်ကွက်အကြားရှိ လွတ်လပ်ရေး ကျောက်တိုင်အနီးမှာ မိုင်းပေါက်ကွဲခဲ့တာလို့ ဆိုပါတယ်။

“အသေအပျောက်တွေတော့ မရှိဘူး။ မိုင်းကလည်းအသေးစားလေးဆိုတော့။ ဒါပေမယ့် သူတို့(စကစ)ဘက်က ထိတ်လန့်ပြီးတော့ မြို့ထိပ်တွေပတ်လည်မှာ စစ်ဆေးပိတ်ဆို့တာတွေတော့ လုပ်သွားတယ်။ အစကတော့ စကစဘက်က အခမ်းအနားလုပ်ဖို့စီစဥ်ထားတာ။ အစီအစဥ်လည်း ပျက်သွားတယ်။ ကင်းချထားတဲ့သူတွေလည်း ပျောက်ကုန်တယ်။”လို့ ဖြစ်စဥ်ကိုသိထားတဲ့ ဒေသခံတဦးက ပြောပါတယ်။

မိုင်းကွဲပြီးနောက်မှာ မြို့ပတ်လမ်းနဲ့ လက်ခုပ်ရွာလမ်းခွဲ၊ ပွင့်ဖြူမြို့တောင်ဘက်အထွက် အထကကျောင်းအနီး၊ စက်မှု ၁ စံပြထိပ်အနီးမှာ စစ်ဆေးမှုတွေပြုလုပ်ခဲ့သလို မြို့တွင်းမှာ ကားတွေနဲ့ ကင်းလှည့်ထွက်တာတွေပြုလုပ်ခဲ့တယ်လို့ ဆိုပါတယ်။

ပွင့်ဖြူမြို့နယ်စီမံအုပ်ချုပ်ရေးအဖွဲ့က ဦးဆောင်ကာ မနေ့မနက် ၁၀ နာရီကျော်လောက်မှာ ၇၈ နှစ်မြောက် အာဇာနည်နေ့အခမ်းအနားကို ပြုလုပ်ဖို့စီစဥ်ထားတာဖြစ်ပြီး အခမ်းအနားပျက်သွားပြီးနောက် ဩဥဆွဲတဲ့အစီအစဥ်တွေကိုပါ မလုပ်တော့ဘူးလို့ ဆိုပါတယ်။

စစ်ကောင်စီတပ်တွေက မြို့ပတ်လမ်းနဲ့လက်ခုပ်ရွာလမ်းခွဲကို စစ်ဆေးမှုပြုလုပ်နေချိန်မှာ ဆိုင်ကယ်နဲ့လာတဲ့ ဒေးဒရဲကျေးရွာနေ အသက် ၂၀ ကျော်အရွယ် လူငယ်တဦးကိုလည်း ရိုက်နှက်ဖမ်းဆီးသွားခဲ့ပြီး ဘယ်ကို ခေါ်ဆောင်သွားလည်းဆိုတာတော့ စုံစမ်းနေဆဲလို့ ဆိုပါတယ်။

အဆိုပါ မိုင်းဖောက်ခွဲမှုကိုတော့ ဘယ်အဖွဲ့အစည်းတွေဘက်က ပြုလုပ်ခဲ့တယ်ဆိုတာ သက်ဆိုင်ရာအဖွဲ့တွေဘက်က ဇူလိုင် ၂၀ ရက် မနက်ပိုင်းထိ သတင်းထုတ်ပြန်တာမျိုး မပြုလုပ်သေးပါဘူး။

ပြီးခဲ့တဲ့နှစ် အောက်တိုဘာ ၁၁ ရက်ကလည်း ပွင့်ဖြူမြို့၊ မြောက်ဘက်အထွက်၊ ရွှေလက်ပံရပ်ကွက် အကွေ့ ပွင့်ဖြူမြို့ ဆိုင်းဘုတ်အနီးမှာ ယာဥ်စစ်ဆေးဖို့ရောက်လာတဲ့ ယာဥ်ထိန်းနဲ့စစ်တပ်အဖွဲ့ မိုင်းဆွဲခံရလို့ ယာဥ်ထိန်း ၂ ဦးဒဏ်ရာရခဲ့တဲ့ဖြစ်စဥ် ရှိခဲ့ပါသေးတယ်။

စာတည်း – လင်း