ပြည်သူနေအိမ်

ပြင်ဦးလွင်၊ ဇွန် ၁၃၊ ၂၀၂၆။

မန္တလေးတိုင်း၊ ပြင်ဦးလွင်မြို့နယ်၊ သုံးတောင်ရွာက နေအိမ် ၅၀ ကျော်ကို ရတနာပုံမြို့သစ်စီမံကိန်းမြေမှာ ပါဝင်နေတယ်ဆိုကာ အသွင်ပြောင်းအစိုးရက အဓမ္မဖယ်ရှားခိုင်းနေတယ်လို့ ဒေသခံတွေကပြောပါတယ်။

အဲ့ဒီနေအိမ်တွေဟာ အသွင်ပြောင်းသမ္မတ မင်းအောင်လှိုင်ရဲ့သားဖြစ်သူ အောင်ပြည့်စုံကုမ္ပဏီကဆောက်လုပ်မယ့် ရတနာပုံဆိုက်ဘာစီးတီးစီမံကိန်းဧရိယာအတွင်းမှာ ဝင်ရောက်ဆောက်လုပ်ထားတယ်ဆိုကာ အခုလ ၁၅ ရက်နေ့ နောက်ဆုံးထားဖယ်ရှားခိုင်းနေတာပါ။

မန္တလေး- ပြင်ဦးလွင်လမ်း၊ ပြင်စာရွာမြောက်ဘက်က ဆိုက်ဘာစီးတီး နည်းပညာတက္ကသိုလ် အဝင်ပေါက်ကနေ သုံးတောင်ရွာ၊ နတ်နန်းအထိ မြေဧကအားလုံးကို စီမံကိန်းမြေအဖြစ်သိမ်းယူလိုက်ပြီးနောက် အခုလို ဖယ်ရှားခိုင်းနေတာလို့ သိရပါတယ်။

ကားလမ်းမအနောက်ဘက်ရှိ နေအိမ်အလုံး ၅၀ ကျော်ကို ဇွန်လ ၈ ရက် နောက်ဆုံးထားဖျက်သိမ်းပေးဖို့ စာထုတ်ပြန်ပြီးတဲ့နောက် ဇွန်လ ၉ ရက်မှာ ဖျက်သိမ်းဖို့ကျန်နေတဲ့နေအိမ်တွေကို ဘူ‌‌ဒိုဇာနဲ့ ဖျက်ဆီးသွားခဲ့ပြီး နောက်ထပ်ကားလမ်းဘေးကပ်လျက်က နေအိမ်နဲ့ ဆိုင်ခန်းတွေကိုတော့ အခုလ ၁၅ ရက်နောက်ဆုံးထားဖျက်သိမ်းဖို့ ထပ်မံအကြောင်းကြားစာထုတ်ခဲ့တာလို့ သိရပါတယ်။

” ပထမတခါက သစ်တောပိုင်မြေကို ကျူးတယ်လို့ပြောတယ်။ ဒါကရွာမြေတွေ။ အခုဆိုမြေ ၁ ကွက်သိန်းထောင်ကြီးဂဏန်းရှိနေပြီ။ အခုကျ စီမံကိန်းနဲ့ မလွတ်လို့ဆိုပြီး အကုန်ဖျက်ခိုင်းတာ။ မဖျက်ရင်ဘူ‌ဒိုဇာနဲ့ ထိုးဖျက်ပြီး အကုန်ကာသွားတယ်” လို့ ပြင်ဦးလွင်ဒေသခံတဦးက မြေလတ်အသံကို ပြောပါတယ်။

စစ်ခေါင်းဆောင်မင်းအောင်လှိုင်က ၂၀၂၅ ကတည်းက ရတနာပုံဆိုက်ဘာစီးတီးစီမံကိန်း ပြန်လည်စတင်ဖို့ ပြောခဲ့ပြီးတဲ့နောက် အခုနှစ်ဆန်းပိုင်းက စတင်ကာ ပြည်သူပိုင်မြေနေရာတွေကို စီမံကိန်းမြေ ဆိုကာ ဆက်တိုက်သိမ်းယူနေတာလို့ သိရပါတယ်။

ဆားလင်းကြီး၊ ဧပြီ ၃၀၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ကံကုန်း၊ ဂုဏ်တော၊ ဒုန်းတောကျေးရွာတွေမှာ စစ်ကောင်စီ စစ်ကြောင်းက နေအိမ် ၂ လုံးကိုမီးရှို့ပြီး နေအိမ် ၁၀ လုံးထက်မနည်းကို မွှေနှောက်ကာ ပစ္စည်းတွေ ယူသွားတယ်လို့ သိရပါတယ်။

ဧပြီလ ၂၉ ရက် မနက် ၆ နာရီဝန်းကျင်မှာ ကြေးနီသယ်ဆောင်မယ့်ကားတွေ လုံခြုံရေးအတွက် မုံရွာ(နမခ) ကနေ ဝမ်ပေါင်ကုမ္ပဏီကို ထွက်ခွာလာတဲ့ စစ်ကား ၂ စီးနဲ့ အင်အား ၇၀ ကျော်ပါ စစ်ကောင်စီ တပ်ဖွဲ့ဝင်တွေဟာ ဝမ်ပေါင်ဆိုက်အနီးရွာတွေက နေအိမ်တွေကိုမီးရှို့ကာ၊ ပစ္စည်းတွေလုယူသွားတာလို့ ဒေသခံတဦးက မြေလတ်အသံကို ပြောပါတယ်။

“သူတို့က လာကတည်းကိုက ကားပေါ်ကနေ လမ်းဘေးဝဲ၊ယာကို ပစ်ခတ်ပြီးလာကြတော့ ရွာသားတွေက ပြေးကြတာ။ အဲ့တော့မှ သူတို့က အိမ်တွေတက်မွှေ၊ မီးရှို့တာတွေလုပ်တာ။ ပြီးတော့ ဝမ်ပေါင်ကုမ္ပဏီထဲ ဝင်တယ်။ ကြေးနီသယ်ကားတွေကို လုံခြုံရေးယူပေးပြီး နမခဘက် ပြန်လှည့်သွားကြတာ။ ဒေသခံတွေဆီက ယူသွားတဲ့ပစ္စည်းတွေကိုတော့ နောက်ထပ်ကားတွေနဲ့ သယ်သွားတယ်”လို့ ပြောပါတယ်။

အဲ့ဒီစစ်ကောင်စီတပ်တွေဟာ ဒုန်းတောကျေးရွာမှ နေအိမ်တလုံးနဲ့ ရေတင်စက်ကို မီးရှို့ခဲ့သလို ဂုဏ်တောကျေးရွာက ကွမ်းခြံတဲနဲ့ ရေတင်စက်တွေကိုလည်း ထပ်မံမီးရှို့ခဲ့တယ်လို့ ဆိုပါတယ်။

ဒါ့အပြင် နေအိမ်တွေကို မွှေနှောက်ရှာဖွေပြီး တန်ဖိုးရှိပစ္စည်းတွေအပါအဝင် ဆန်အိတ်၊ ဆီပုံး၊ မွေ့ယာ၊ water cooler ၊ air cooler ၊ ပန်ကာစတဲ့ပစ္စည်းတွေကိုပါ ယူဆောင်သွားတယ်လို့ သိရပါတယ်။

စစ်ကောင်စီတပ်က သေနတ်ပစ်ဖောက်ဝင်ရောက်လာလို့ အနီးဝန်းကျင်က ကျေးရွာတွေဖြစ်တဲ့ အုံတုံပင်၊ ကျေးစာကျ၊ ဘိန်းနွယ်ချောင်၊ ဂုဏ်တော၊ ဒုန်းတော၊ ကံကုန်း ကျေးရွာတွေက ဒေသခံအများအပြားဟာ ဘေးလွတ်ရာကို ထွက်ပြေးတိမ်းရှောင်ကြရတယ်လို့ ဆိုပါတယ်။

မုံရွာ(နမခ)ကနေ ဝမ်ပေါင်ကုမ္မဏီအတွက် ကြေးသယ်လမ်းကြောင်း လုံခြုံရေးယူပေးတဲ့ စစ်ကောင်စီတပ် ဟာ တလမှာ ၁ ကြိမ်ကနေ ၃ ကြိမ်အထိ စစ်ကြောင်းဝင်လေ့ရှိပြီး စစ်ကြောင်းဝင်တိုင်း ဒေသခံတွေရဲ့ နေအိမ်နဲ့ပစ္စည်းတွေကို ဖျက်စီး၊ ခိုးယူတာတွေလုပ်ဆောင်တယ်လို့ ဒေသခံတွေကပြောပါတယ်။

စာတည်း-ရင်ငြိမ်း