ပဲခူး

မြေလတ်အသံ၊ ဒီဇင်ဘာ ၂၂၊ ၂၀၂၅။

အမျိုးသားညီညွတ်ရေးအစိုးရ – NUG ရဲ့ အမှတ် ၂ စစ်ဆင်ရေးနယ်မြေ၊ ပဲခူးတိုင်းစစ်ဌာန၊ နည်းဗျူဟာ-၂၂ ရဲ့ အပတ်စဥ် ၁ စစ်ပညာသင်တန်းဆင်းပွဲအခမ်းအနာကို ဒီဇင်ဘာ ၂၁ ရက်မှာ ပြုလုပ်ခဲ့တယ်လို့ ဗျူဟာ-၂၂ ဆီက သိရပါတယ်။

အဆိုပါ အခြေခံစစ်ပညာသင်တန်းဆင်း တပ်ဖွဲ့ဝင် အမျိုးသား၊ အမျိုးသမီး ၁၅၀ ဦးရှိပြီး စက်တင်ဘာလကနေ ဒီဇင်ဘာ ၂၀ ရက်အထိ ၃ လကြာ လေ့ကျင့်သင်ကြားပြီးနောက် သင်တန်းဆင်းပွဲကို သာယာဝတီခရိုင်အတွင်းမှာပြုလုပ်ပေးခဲ့တာလို့ ဆိုပါတယ်။

“အရင်ကတော့ တပ်ရင်တွေမှာဘဲ သင်တန်းပေးကြတာပေါ့။ ခုကတော့ ဗျူဟာကနေ ဦးစီး ကျင်းပလုပ်ပေးတာဆိုတော့ ပိုစည်းလုံးပြီး ပိုမို အလုပ်တွေ တွင်ကျယ်လာတော့မှာပါ။ ဗျူဟာဆိုတဲ့ အတိုင်းဗျူဟာ ကျကျနဲ့စုစည်းပေါင်းစည်းပြီး အလုပ်တွေ ပိုလုပ်ပြနိုင်ကြမှာပါဗျ” ဗျူဟာ-၂၂ရဲ့ ဗျူဟာမှူးက ပြောပါတယ်။

သင်တန်းကာလအတွင်းမှာတော့ ကိုယ်ခံပညာရပ်၊ ကိုယ်ကာယ၊ စိတ်ဓာတ်ကြံ့ခိုင်ရေးသင်ခန်းစာ၊ နိုင်ငံရေးသင်ခန်းစာ၊ ဆက်သွယ်ရေးသင်ခန်းစာ၊ အခြေခံဆေးပညာရပ်၊ မိုင်းပညာရပ်တွေကို သင်ကြားခဲ့တာလို့ ဗျူဟာမှူးက ဆိုပါတယ်။

သင်တန်းဆင်းပွဲ အခမ်းအနားကို အစီအစဉ် ၉ ရပ်နဲ့ ကျင်းပခဲ့ပြီး အခမ်းအနားကို နည်းဗျူဟာ-၂၂ကွပ်ကဲမှုအောက်ရှိ တပ်ရင်း၊ တပ်ခွဲတွေမှ တာဝန်ရှိသူတွေ၊ ပကဖ တာဝန်ခံတွေ နဲ့ မဟာမိတ်အဖွဲ့အစည်းတွေ တပ်မှူး တာဝန်ခံတွေ တက်ရောက်ချီးမြှင့်ပေးကြတယ်လို့သိရပါတယ်။

စာတည်း – လင်း

ညောင်လေးပင်၊ ဒီဇင်ဘာ ၂၀၊ ၂၀၂၅။

ပဲခူးတိုင်း၊ ညောင်လေးပင်မြို့နယ်၊ သံတံတားစံပြကျေးရွာမှာ အုပ်ချုပ်ရေးမှူး ၁ ဦး သေနတ်နဲ့ပစ်ခံရပြီး သေဆုံးခဲ့တယ်လို့ 9 Stars UG အဖွဲ့ဆီက သိရပါတယ်။

ပစ်သတ်ခံရသူဟာ သံတံတားစံပြကျေးရွာအုပ်ချုပ်ရေးမှူး အသက် ၄၅ နှစ်အရွယ် နိုင်ဝင်းဆိုသူဖြစ်ပြီး ဒီဇင်ဘာ ၁၉ ရက်ညနေ ၅ နာရီကျော်မှာ ရွာထဲရှိ အမှတ် ၉ ရပ်ကွက်လမ်းပေါ်မှာ ပစ်သတ်ခံရတာလို့ ဆိုပါတယ်။

“သူကဆိုင်ကယ်နဲ့လာတာကို လိုက်ပစ်ရတာ။ သူကလည်း မောင်းပြေးတာ။ သူလည်း လည်တယ်။ သူ့အိတ်ကို ဖြုတ်ထားပြီးပြီ။ အသီး(လက်ပစ်ဗုံး)ကို နှိုက်နေတာ။ ခေါင်းကို သုံးချက်ပစ်ခဲ့တာ”လို့ 9 Stars UG တာဝန်ခံ မြွေပွေးကပြောပါတယ်။

သေနတ်ကျည်ထိလို့ အုပ်ချုပ်ရေးမှူး ဝင်းနိုင် ဟာ နေရာမှာတင်သေဆုံးပြီးနောက် သူ့ဆီကနေ လက်ပစ်ဗုံး ၂ လုံး၊ မှတ်ပုံတင်၊ ကားသော့နဲ့ ဖုန်း ၁ လုံးတို့ကို သိမ်းယူရရှိခဲ့တယ်လို့ ဆိုပါတယ်။

အုပ်ချုပ်ရေးမှူးဝင်းနိုင်ဟာ စစ်ကော်မရှင်ရွေးကောက်ပွဲဖြစ်မြောက်ဖို့အတွက် ပြည်သူတွေ ကိုဖိအားပေးတာ၊ စစ်မှုထမ်းကြေး ၁ လ ၂၀,၀၀၀ ကျပ်ကောက်ခံတာ၊ စစ်မှု့ထမ်းပေါ်တာဆွဲတာလည်းလုပ်တာကြောင့် ခုလိုပစ်ခတ်ရှင်းလင်းခဲ့တာလို့ ဆိုပါတယ်။

ပစ်ခတ်မှုဖြစ်ပြီးနောက် ညောင်လေးပင်ရဲစခန်းက ရဲတွေလာရောက်စစ်ဆေးပြီး အလောင်းကိုဆေးရုံကို ယူဆောင်သွားကြတယ်လို့ သိရပါတယ်။

ပြီးခဲ့တဲ့နိုဝင်ဘာ ၈ ရက်ကလည်း ညောင်လေးပင်မြို့နယ်၊ စီပင်ကျေးရွာ၊ ဝိသဖန်းအင်းအနီး ဝန်းကျင်မှာ စီပင်ရွာအုပ်ချုပ်ရေးမှူးတပည့် ပျူစောထီးအဖွဲ့ဝင် မင်းမင်းဆိုသူပစ်သတ်ခံရလို့ သေဆုံးသွားသေးတယ်လို့ သိရပါတယ်။

စာတည်း – လင်း

ရေတာရှည်၊ ဒီဇင်ဘာ ၁၉၊ ၂၀၂၅။

ပဲခူးတိုင်း၊ ရေတာရှည်မြို့နယ်၊ ကျေးရွာတရွာက ဒေသခံတွေဟာ စစ်ကော်မရှင်ပြုလုပ်မယ့်ရွေးကောက်ပွဲကို ဆန့်ကျင်ကြောင်း ၃ ရက်ဆက်ဆန္ဒပြခဲ့ကြတယ်လို့ ဆန္ဒပြပွဲဦးဆောင်ပါဝင်သူဆီက သိရပါတယ်။

ဒေသခံ အင်အား ၅၀၀ ကျော်က ဒီဇင်ဘာ ၁၆ ရက်ကနေ ၁၈ ရက်အထိ ရေတာရှည်မြို့နယ်၊ မြောက်ပိုင်းကျေးရွာတရွာမှာ ရွေးကောက်ပွဲကို ဆန့်ကျင်ကြောင်းကို ကျေးရွာတဝိုက်မှာ ချီတက်လမ်းလျှောက်ဆန္ဒပြတာ၊ စုဝေးဆန္ဒပြတောင်းဆိုတာတွေ ပြုလုပ်ခဲ့ကြတယ်လို့ ဆိုပါတယ်။

“၂၀၂၅ အခု အတုအယောင်ရွေးကောက်ပွဲကို နေ့စဥ်မပြတ် ဆန္ဒပြချီတက်ကန့်ကွက်တဲ့အနေနဲ့ ရက်ဆက်ဆန္ဒပြပွဲကို ပြုလုပ်ခဲ့တာ၊ အဓိကရည်ရွယ်ချက်က စကမရွေးကောက်ပွဲလုပ်တယ်ဆိုတာ လွတ်လပ်ပြီးတရားမျှတတဲ့ ရွေးကောက်ပွဲမဟုတ်ဘဲ ပြည်သူလူထုကို လိမ်ညာဂျင်းထည့်ပြီး သူတို့ရဲ့စစ်သက်တမ်းကြာရှည်ပြီး စစ်ကျွန်ဘဝကို ရေရှည်ဖြစ်ထွန်းဖို့ရာ ပြည်သူကို သက်သက်ခုတုံးလုပ်တာကို နိုင်ငံတကာကလည်းသိဖို့ရာအတွက် ကမ္ဘာ့သတင်းမီဒီယာတွေမှာလည်း ကျယ်ကျယ်ပြန့်ပြန့်ဖြစ်ပေါ်လာရာ ရည်ရွယ်ပြီးလုပ်တာ”လို့ ဆန္ဒပြပွဲ ဦးဆောင်ပါဝင်သူတဦးက ပြောပါတယ်။

သမ္မတဦးဝင်းမြင့်နဲ့ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်အပါအဝင် နိုင်ငံရေးအကျဥ်းသားအားလုံး အမြန်ဆုံးပြန်လွတ်ပြီး ဖက်ဒရယ်နိုင်ငံတော်ပေါ်ပေါက်ဖို့ဆက်လက် ဆန္ဒပြသွားမှာလို့လည်း ဆိုပါတယ်။

ပြီးခဲ့တဲ့ ဒီဇင်ဘာ ၆ ရက်ကလည်း ရေတာရှည်မြို့နယ်မြောက်ခြမ်းတနေရာမှာ ဒေသခံရာကျော်က ရွေးကောက်ပွဲကိုဆန့်ကျင်ကြောင်း ဆန္ဒပြခဲ့ကြသေးတယ်လို့ သိရပါတယ်။

စာတည်း – လင်း

ကျောက်ကြီး၊ ဒီဇင်ဘာ ၉၊ ၂၀၂၅။

ကရင်အမျိုးသားအစည်းအရုံး-KNU ထိန်းချုပ်နယ်မြေ ပဲခူးတိုင်း၊ ကျောက်ကြီးမြို့နယ်၊ ကျောက်စရစ်ကျေးရွာဘုန်းကြီးကျောင်းကို စစ်ကော်မရှင်တပ်ကစက်တပ်လေထီးနဲ့ဗုံးကြဲတိုက်ခိုက်ခဲ့လို့ သက်ကြီးအမျိုးသမီး ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဒီဇင်ဘာ ၈ ရက် ယမန်နေ့ မနက် ၁၁ နာရီခန့်မှာ ကျောက်ကြီးမြို့ဘက်ကနေလာတဲ့ စက်တပ်လေထီး(ပါရာမော်တာ) ၁ စီးဟာ ကျေးရွာဘုန်းကြီးကျောင်းအတွင်းကို ဗုံး ၂ လုံးကြဲချခဲ့တာလို့ ဆိုပါတယ်။

” ကလေးက ဘုန်းကြီးကျောင်းထဲကစားနေတာ။ သက်ကြီးအမျိုးသမီးကတော့ ဘုန်းကြီးကျောင်းထဲ တရားလာအားထုတ်နေတာ။ ဘုန်းကြီးကလည်း ကျောင်းအတွင်းရှိနေချိန်ထိကြတာ”လို့ ဖြစ်စဥ်ကိုသိရှိတဲ့ဒေသကာကွယ်ရေးအဖွဲ့ဝင်တဦးက မြေလတ်အသံကို ပြောပါတယ်။

ဗုံးစထိမှန်တာကြောင့်ဘုန်းကြီးကျောင်းအတွင်းတရားထိုင်နေတဲ့ အသက် ၇၆ နှစ် ဒေါ်စိန်မြိုင်မှာ နေရာမှာသေဆုံးခဲ့ပြီး သက်တော် ၅၀ နှစ်ကျော်ရှိ ဦးဇင်း ကျော်ဝင်းနဲ့ အသက် ၁၂ နှစ်အရွယ် မောင်နေဇော်အောင်တို့ ဒဏ်ရာပြင်းထန်ရရှိခဲ့တယ်လို့ သိရပါတယ်။

ဒါ့အပြင် ဗုံးကျရောက်ပေါက်ကွဲမှုကြောင့် ဘုန်းကြီးကျောင်းဆောင် ၁ ခုနဲ့ ဘုန်းကြီးကျောင်းအနီးရှိလူနေအိမ် ၃ လုံးပျက်စီးခဲ့တယ်လို့ သိရပါတယ်။

စစ်ကောင်စီဘက်က စက်တပ်လေထီးနဲ့ လာရောက်ဗုံးကြဲခဲ့တဲ့ ကျောက်စရစ်ကျေးရွာနဲ့အနီးဝန်းကျင်မှာ တိုက်ပွဲဖြစ်ပွားတာမရှိသလို စစ်ရေးလှုပ်ရှားမှုတွေလည်းမရှိဘဲ ဗုံးလာကြဲသွားတာလို့ သိရပါတယ်။

၂၀၂၁ စစ်အာဏာသိမ်းပြီးနောက် စစ်ကော်မရှင်တပ်က လေကြောင်းကနေဗုံးကြဲတာ၊ လက်နက်ကြီးနဲ့ပစ်ခတ်တာ၊ မီးရှို့ဖျက်ဆီးတာတွေကြောင့် ဗုဒ္ဓဘာသာဘုန်းကြီးကျောင်း၊ ဝတ်ပြုဗလီနဲ့ ခရစ်ယာန်ဘုရားကျောင်းတွေအပါ ဘာသာရေးအဆောက်အအုံ ၂၀၀ ကျော်အထိ ပျက်စီးမှုရှိခဲ့တယ်လို့ မြန်မာပြည်တွင်းလူ့အခွင့်အရေးချိုးဖောက်မှုတွေကို စောင့်ကြည့်မှတ်တမ်းတင်နေတဲ့ IIMM၊ Myanmar Wintess အဖွဲ့တွေရဲ့အချက်အလက်တွေကို ကိုးကားပြီး ဗာတီကန်အခြေစိုက် Fides သတင်းဌာနက ပြီးခဲ့တဲ့နိုဝင်ဘာလအတွင်းမှာ ဖော်ပြခဲ့ပါတယ်။

ဒီဇင်ဘာ ၃ ရက်ကလည်း ကျောက်ကြီးမြို့နယ်၊ ညောင်ပင်သာကျေးရွာမှာ စစ်ကော်မရှင်ဘက်က လက်နက်ကြီးနဲ့ပစ်၊ စက်တပ်လေထီးနဲ့ဗုံးကြဲလို့ CDM ဆရာဝန်အပါအဝင် ၅ ဦးသေဆုံးခဲ့ပြီး ၇ ဦးဒဏ်းရာရခဲ့တယ်လို့ သိရပါတယ်။

စာတည်း – ဟိန်းစံ