ပေါင်းတည်

ပေါင်းတည်၊ မတ် ၃၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့တနေရာမှာ မတ်လ ၃ ရက် ဒီနေ့မနက်အစောပိုင်းကမြို့ခံ ၇/လူငယ်တွေက ဆန္ဒပြခဲ့ကြတယ်လို့ သိရပါတယ်။

ပြီးခဲ့တဲ့ ၂၀၂၁ ခုနှစ် မတ်လ ၃ ရက်က မုံရွာမြို့ ဘုရားနီလမ်းမှာ ကျဆုံးခဲ့တဲ့ ကဗျာဆရာကေဇဝင်း ၂ နှစ်ပြည့် အထိမ်းအမှတ်အနေနဲ့ သူရေးသားခဲ့တဲ့ “ခင်ဗျားတို့နဲ့ ကျနော်ကွဲလွဲခဲ့လည်း ခင်ဗျားတို့အတွက် ကျနော် အသက်ပေးမှာပါပဲ” စာတန်းကိုကိုင်ကာ ဆန္ဒပြကြတာလို့ သိရပါတယ်။

စစ်ကောင်စီရဲ့ယုတ်မာကောက်ကျစ်မှုကြောင့် ကျဆုံးခဲ့သူတွေ ထောင်တွင်းအကျဉ်းချခံထားရသူတွေနဲ့ အိုးအိမ်စွန့်ခွါ ထွက်ခွါသွားရသူတွေအပါ CDM နိုင်ငံ့သူရဲကောင်းဝန်ထမ်းတွေအတွက် ရရာနည်းနဲ့ တော်လှန်ရေးမှာ ဆက်လက်ပါဝင်ကြဖို့နဲ့ မြို့ပေါ်ပြောက်ကျားလူထုသပိတ် လှုပ်ရှားမှုတွေမှာလည်း ပူးပေါင်းပေးကြဖို့ တော်လှန်ရဲဘော် ၇/တွေရဲ့ ထုတ်ပြန်ချက်မှာ ပြည်သူတွေကို တိုက်တွန်းထားပါသေးတယ်။

စာတည်း – 007

ပဲခူး၊ ဖေဖော်ဝါရီ ၁၀၊ ၂၀၂၃။

ပဲခူးတိုင်းအနောက်ခြမ်း ပေါင်းတည်မြို့ကို စစ်ကောင်စီက မာရှယ်လောထုတ်အပြီး ၈ ရက်အကြာ ဖေဖေါ်ဝါရီလ ၁၀ ရက် ဒီနေ့နေ့လယ် ၁၂ နာရီလောက်မှာ အုပ်ချုပ်ရေးမှူးတဦးကို နန်းထိုက်အောင်စစ်ဆင်ရေးအဖြစ် ရှင်းလင်းခဲ့တယ်လို့ Paungde People Defence Force ဆီက သိရပါတယ်။

ပေါင်းတည်မြို့နယ် သပြေကြီးအုပ်စုက အသက် ၅၂ နှစ်အရွယ် အုပ်ချုပ်ရေးမှူး ကိုတင်မော်ဝင်းဆိုသူကို ပြည်ခရိုင် PDF ၃၆၀၁ တပ်ရင်း ၁၊ တပ်ခွဲ ၅ နွေဦးအဖွဲ့က သေနတ်နဲ့ ၃ ချက် ပစ်ခတ်ခဲ့တာ ဖြစ်တယ်လို့ PPDF တပ်ဖွဲ့ဝင်တဦးက ပြောပါတယ်။

“ပထမသပြေကြီးစု အုပ်ချုပ်ရေးမှူးက ကျနော်တို့ ရှင်းလင်းပြီးလို့ သူကဒုတိယမြောက်တက်လာတဲ့သူ၊ ဆိုင်ကယ်နဲ့တယောက်တည်းရယ်။ သူနေတဲ့ ဇီးကုန်းလေးရွာကို ပြန်တာမှာ သပြေကြီးစုရွာနဲ့ ဇီးကုန်းလေးရွာကို လယ်ပြင်လမ်းဖောက်ထားတဲ့လမ်းမှာ ပစ်ခတ်ခဲ့တာပါ။ ကျောကို ၂ ချက် ဆိုင်ကယ်လဲကျတော့ နားထင်ကို တချက် ပစ်ခဲ့ပါတယ်” လို့ ပြောပါတယ်။

လက်ရှိသေဆုံးခဲ့တဲ့ ကိုတင်မော်ဝင်း မတိုင်ခင် သပြေကြီးစု ကျေးရွာအုပ်ချုပ်ရေးမှူး လုပ်ခဲ့တဲ့ အသက် ၅၀ ကျော်အရွယ် ကိုမြဟန် ကို ပြီးခဲ့တဲ့နှစ် ဇွန်လ ၁၈ ရက်က လယ်ကွင်းပြင်မှာပဲ သေနတ်နဲ့ ရှင်းလင်းခံလိုက်ရတာ ဖြစ်ပါတယ်။

ကိုတင်မော်ဝင်းဟာ ပျူစောထီးအဖွဲ့ဝင် ဖြစ်သလို လူဦးရေစာရင်းကောက်တာ လောင်းကစားဝိုင်းတွေကို လစဉ်ကြေး၊ လိုင်းကြေးကောက်တာတွေ ပြုလုပ်ပြီး ပြည်သူကို စိတ်ဒုက္ခပေးသူ ဖြစ်တယ်လို့ PPDF ရဲ့ ထုတ်ပြန်ချက်မှာ ဖော်ပြထားပါတယ်။

ပေါင်းတည်မြို့နယ်အတွင်း စစ်ကောင်စီလက်ထက် အုပ်ချုပ်ရေးမှူး ၅ ဦးထက်မနည်း သေဆုံးခဲ့ပြီး ပစ်ခတ်တိုက်ခိုက်ခံရသူတွေလည်း ရှိခဲ့သလို ပြီးခဲ့တဲ့နှစ် နိုဝင်ဘာလ ၁၁ ရက်က ရှင်းလင်းခံရတဲ့ ကြို့ပင်သာ အုပ်ချုပ်ရေးမှူးနေရာမှာလည်း အုပ်ချုပ်ရေးမှူး မရှိသလို နယ်မြေထိစပ်နေတဲ့ မဲခေါင်းအုပ်စုမှာလည်း အုပ်ချုပ်ရေးမှူးလုပ်မယ့်သူ မရှိဘူးလို့ ဒေသခံတွေဆီက သိရပါတယ်။

ပဲခူး၊ ဇန်နဝါရီ ၂၄၊ ၂၀၂၃။

ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတည်မြို့မှာ ဇန်နဝါရီ ၂၅ ရက် ဒီနေ့မနက်အစောပိုင်းက နေအိမ်တလုံးနဲ့ စပါးကျီတလုံး မီးလောင်ဆုံးရှုံးခဲ့တယ်လို့ ဒေသခံတဦးဆီက သိရပါတယ်။

ပေါင်းတည်မြို့နယ်၊ ဗျက်ကြီးတောင်ကျေးရွာမှာ ဒီနေ့မနက် ၂ နာရီလောက်က လောင်ကျွမ်းခဲ့တာလို့ သိရပါတယ်။

“မီးကြွင်းမီးကျန်ကပဲစပြီး လောင်တယ်လို့ ပြောရမယ်။ ၂ ထပ် သွပ်မိုးပျဥ်ထောင်အိမ်တလုံးနဲ့ စပါးကျီတလုံး မီးထဲပါသွားတယ်။ လာရောက်ကူညီပေးတဲ့ အမျိုးသမီးတဦး မီးလောင်ဒဏ်ရာရရှိပြီး စိုးရိမ်ရတာကြောင့် ပေါင်းတည်ဆေးရုံကို ပို့ဆောင်ထားတယ်” လို့ ဒေသခံတဦးဆီက သိရပါတယ်။

ပေါင်းတည်မြို့နယ် မီးသတ်စခန်းက မီးငြှိမ်းသတ်ယာဉ် ၂ စီး၊ ရေသယ်ယာဉ် ၁ စီး၊ မင်းကွက် ၁ အရန်မီးသတ်စခန်းက မီးငြှိမ်းသတ်ယာဉ် ၁ စီးတို့နဲ့ နာရီဝက်အကြာ ငြိမ်းသတ်ခဲ့ရတယ်လို့ သိရပါတယ်။

ပြီးခဲ့တဲ့ဇန်နဝါရီလ ၁၃ ရက် ညနေ ၆ နာရီကလည်း ပေါင်းတည်မြို့ပေါ် ရွေးကောက်ပွဲကော်မရှင် ခြံဝင်းအတွင်းက အမှိုက်မီးရှို့ရာက ရုံးရှေ့ ပိတောက်ပင်ကို မီးကူးစက် လောင်ကျွမ်းခဲ့လို့ မီးသတ်ယာဥ် ၂ စီးနဲ့ အချိန် ၁ နာရီလောက်အကြာ ငြိမ်းသတ်ခဲ့ရပါသေးတယ်။

ပဲခူးတိုင်းအနောက်ခြမ်းမှာ ပေါင်းတည်မြို့က မီးလောင်မှု ၂ ကြိမ်အပါ အခုနှစ်ဇန်နဝါရီလအတွင်း မီးလောင်မှု ၄ ကြိမ်ဖြစ်ပွားပြီး အခုလ ၁၁ ရက်က မိုးညိုမြို့နယ် မှက္ကတန်ရွာက နေအိမ် ၁၅ လုံး၊ ဇန်နဝါရီလ ၁၅ ရက်က ပြည်မြို့ကျောင်းကြီးအိုးတန်းရပ်ကွက်က မွေ့ယာအရောင်းဆိုင်တို့ကိုလည်း မီးလောင်ကျွမ်းခဲ့ပါသေးတယ်။

ပဲခူး၊ နိုဝင်ဘာ ၇၊ ၂၀၂၂။

ပဲခူးတိုင်းအနောက်ခြမ်း၊ ပေါင်းတည်မြို့နယ်မှာ ရဲတွေနဲ့ အုပ်ချုပ်ရေးမှူးတွေ မကြာခဏ သတ်ခံနေရလို့ မဆိုင်တဲ့ ဒေသခံပြည်သူတွေကို စစ်ကောင်စီက ဖမ်းထားတာ ၁၅ ဦးထက် မနည်းရှိနေပြီ ဖြစ်ပါတယ်။

PDF အနေနဲ့ ဒလံ အုပ်ချုပ်ရေးမှူးနဲ့ ရဲတွေကို မိုင်းဆွဲတာ ရှင်းလင်းတာတွေ လုပ်ရင် တရားဝင်ထုတ်ပြန်နေတာဖြစ်လို့ PDF နဲ့ မဆိုင်ပဲ ဒေသခံတွေကို ဖမ်းနေတာကို အပြင်းအထန် ကန့်ကွက်ရှုံ့ချတယ်လို့ PPDF တာဝန်ခံတဦးက ပြောပါတယ်။

“ကျနော်တို့ ပေါင်းတည်မှာ ဒလန်တွေ အုပ်ချုပ်ရေးမှူးတွေနဲ့ မိုင်းဆွဲတိုက်ခိုက်မှုတွေလုပ်တိုင်း PDFကလုပ်ရင် ကြေညာချက်ထုတ်တယ်။ ခုလည်း ဖားယားကြီးဖြစ်စဥ်မှာ ကြေညာချက်ထုတ်ပြီးသားကို မဆိုင်တဲ့ခရာပေါက်ရွာက CDM ကျောင်းဆရာ ကိုတက်တိုးနဲ့ ရွာသားတွေအပြင် ကြို့ပင်သာရွာသား ၂ ဦးကိုလည်း ဖမ်းပြီးနှိပ်စက်နေတယ်” လို့ ပြောပါတယ်။

ပြီးခဲ့တဲ့ နိုဝင်ဘာ ၅ ရက်က ကြို့ပင်သာ အုပ်ချုပ်ရေးမှူးကို ဖားယားကြီးရွာ သူ့အိမ်မှာပဲ ထောက်ခံစာ လုပ်ရင်း သတ်ခဲ့တဲ့ ဖြစ်စဉ်ကြောင့် နိုဝင်ဘာ ၆ ရက် မနေ့က ခရာပေါက်ရွာက CDM ကျောင်းဆရာအပါအဝင် ရွာသား ၆ ဦးကို ဖမ်းသွားခဲ့တာပါ။

“အုပ်ကြီး အသတ်ခံရမှုနဲ့ မဆိုင်တဲ့ ဆရာဦးတက်တိုး အပါအဝင် ခရာပေါက်ရွာသား လေးဦး အဖမ်းခံရတာ။ အဲနေ့က အုပ်ကြီးကို သေနတ်နဲ့ ပစ်တဲ့သူတွေကို ရွာသားတွေက ဖမ်းဆီးဖို့တောင် လုပ်ကြသေးတာ။ ဟိုက သေနတ်နဲ့ချိန်လို့ နောက်ပြန်ဆုတ်သွားတာ” လို့ ဒေသခံတဦးက ပြောပါတယ်။

အဲ့ဒီအပြင် စစ်ကောင်စီက အခုလိုတွေ လုပ်နေတာဟာ ဒေသခံပြည်သူ့ကာကွယ်ရေးတပ် ( PDF ) တွေနဲ့ ပြည်သူတွေကို ရန်တိုက်ပေးနေတာ ဖြစ်တယ်လို့ မြို့ခံတဦးကလည်း ပြောဆိုထားပါတယ်။

ပေါင်းတည်မြို့နယ်မှာ မကြာခဏ ဆိုသလို ကင်းပတ်တဲ့ ရဲတွေ မိုင်းဆွဲခံရတာအပြင် အုပ်ချုပ်ရေးမှူးတွေ အသတ်ခံနေရလို့ မနေ့ကဖမ်းခံရတဲ့ ပြည်သူ ၆ ဦးအပါ စုစုပေါင်း ဒေသခံ ၁၅ ဦးကျော်ကို စစ်ကောင်စီက ဖမ်းဆီးနှိပ်စက်နေတယ်လို့ ဒေသခံတွေဆီက သိရပါတယ်။

ပဲခူး၊ ဇူလိုင် ၂၉၊ ၂၀၂၂။

ပဲခူးတိုင်းအနောက်ခြမ်း၊ ပေါင်းတည်မြို့နယ်၊ ပဲခူးရိုးမအစပ်မှာ စစ်ကောင်စီတပ်တွေက ဇူလိူင် ၂၉ ရက် ဒီနေ့မက်ပိုင်းကစလို့ လေယာဥ် ၂စီးနဲ့ ဝဲပျံကာ မြေပြင်ကလည်း တပ်အင်အားဖြည့်တင်းနေတယ်လို့ ဒေသခံတွေက ပြောတယ်။

ဒေသခံကျေးရွာတွေကိုလည်း ရဟတ်ယာဥ်တွေ ပျံသန်းခဲ့တာကြောင့် ရွာသားတွေလည်း ကြောက်ရွှံ ပုန်းရှောင်ကြတယ်လို့ ဆိုပါတယ်။

“မနက်ကလေယာဥ် ၂ စီးပေါ်မှာ စစ်သားတွေက လက်နက်တွေကို မြေပြင်ကို ချိန်ပြီး ဝဲနေတယ် တော်တော်ကြာတယ် ရွာတွေဖက်ကလည်း ကြောက်လို့ ရှောင်နေကြတာ အခုတော့ လေယာဥ်ပျံတာမျိုး မရှိတော့ဘူး “လို့ မျက်မြင်တွေခဲ့ရတဲ့ ဒေသခံတွေက ပြောပါတယ်။

စစ်ယာဥ်တန်းတွေနဲ့ တောင်ပေါ်ဒေသဘက်ကို စစ်ကူပို့နေတာလို့ ဆိုပါတယ်။

“ရဲကားတွေ စစ်ကားတွေလည်းပါတယ် စစ်သား ၆ ယောက်ကလည်း ဆိုင်ကယ် ၃ စီးနဲ့ စစ်ရောင် DCကားပေါ်မှာလည်း စစ်သားအပြည့်နဲ့ အင်အား စုစုပေါင်း ၃၀ လောက်တော့ရှိမယ် တောင်ပေါ်ဒေသဘက်ကို ဝါယာလက်စက်တွေရောပါသွားတယ် ညကတည်းက စစ်ကားက ၆ စီးလောက်တက်နေတာ “လို့ ဒေသခံတွေကပြောပါတယ်။

လက်ရှိမှာတော့ စစ်ကောင်စီဘက်က စစ်ကြောင်းထိုးကာ တောနင်းတာမျိုး မပြုလုပ်သေးပဲ အင်အားဖြည့်တင်းနေပြီး ဒေသခံတွေကတော့ စိုးရိမ်​နေကြပါတယ်။

ပေါင်းတည် PPDFရဲ့ လက်ချက်နဲ့ ဇူလိူင် ၂၈ ရက်မနေ့က စစ်ကောင်စီဘက်က သိမ်ကုန်းကျေးရွာ တာဝါတိုင်စောင့် အရာရှိတဦးအပါ စစ်သား ၄ ဦး သေဆုံးတာနဲ့ ပတ်သက်ပြီး မကျေနပ်တာကြောင့် အခုလို လေယာဥ်နဲ့ ဝဲပျံ ခြိမ်းခြောက်ကာ အင်အားဖြည့်တင်း နေတာဖြစ်တယ်လို့ ဒေသခံတွေဆီက သိရပါတယ်။

ပဲခူး၊ မေ ၁၉၊ ၂၀၂၂။

ပဲခူးတိုင်း၊ အနောက်ခြမ်းပေါင်းတည်မြို့မှာ စစ်ကောင်စီက အမျိုးသားတဦးကို စစ်ဆေးစရာရှိလို့ ဖမ်းဆီးသွားခဲ့ပြီး ၂၄နာရီမပြည့်ခင်မှာပဲ သေဆုံးသွားတယ်လို့ မိသားစုဝင်တွေကို အကြောင်းကြားလာခဲ့ပါတယ်။

အသက် ၃၈နှစ်အရွယ် ကိုမင်းမင်းဟာ ပေါင်းတည်မြို့နယ် ကြို့ပင်အုပ်စု ဟင်္သာကန်ကျေးရွာမှာ နေထိုင်သူဖြစ်ပြီး NLD ပါတီဝင်တဦးဖြစ်ကာ မေလ ၁၈ရက် မနေ့က နေ့လယ်ပိုင်းမှာ စစ်တပ်က ဖမ်းဆီးပြီး စစ်ကြောရေးမှာ သေဆုံးခဲ့တာဖြစ်တယ်လို့ ဒေသခံတဦးက ပြောပါတယ်။

“ကိုမင်းမင်း ဖုန်းကို စစ်တယ် ဖုန်းထဲမှာ ဘာမှ မတွေ့ဘူး မတွေ့တော့ လူကိုစစ်မယ် ဆိုပြီးခေါ်သွားတာ ညက ၈နာရီလောက်အထိ အကောင်း ခုမနက်မှ သေပြီလို့ သိရတာ”လို့ သူနဲ့နီးစပ်သူတဦးက ပြောပါတယ်။

ဖမ်းဆီးခံရစဥ်က ကိုမင်းမင်းဟာ ကျန်းမာရေးကောင်းမွန်ပြီး စစ်ကောင်စီကတော့ ပန်ကာလေအအေးမိကာ သေဆုံးတာလို့ သတင်းလွှင့်ထားပြီး ဒေသခံတွေကတော့ မေလ ၁၅ ရက်နေ့က ကိုမင်းမင်းရဲ့ ကွမ်းယာဆိုင်ရဲ့တောင်ဖက် နှစ်ဖာလုံခန့်အကွာမှာ မိုင်းခွဲခံရလို့ ရဲတဦး ပြင်းထန်ဒဏ်ရာ ရခဲ့တာနဲ့ ပတ်သက်ပြီး လက်စားချေ သတ်ဖြတ်ခံရတာလို့ ဆိုပါတယ်။

ကိုမင်းမင်းဟာ ရပ်ရွာအတွင်းမှာ ပရဟိတဆောင်ရွက်သူတဦးလည်း ဖြစ်ပြီး ဇနီးဖြစ်သူနဲ့အတူ သမီးတယောက်နဲ့ သားတယောက်ကျန်ရစ်ခဲ့ပါတယ်။

အာဏာသိမ်း စစ်တပ်ဟာ ပြီးခဲ့တဲ့ မေလ ၁၇ ရက်နေ့ ဟင်္သာကန်ရပ်ကွက်က ကြံ့ခိုင်ရေးထောက်ခံသူ မိသားတစုနဲ့ အခြားမိသားတစုကို ဖမ်းဆီးကာ ပိုက်ဆံတောင်းပြီး ညအချိန်ရောက်မှ ပြန်လွှတ်ပေးခဲ့တယ်လို့လည်း သိရပါတယ်။

ပဲခူး၊ ဧပြီ ၂၁၊ ၂၀၂၂။

ပဲခူးတိုင်းအနောက်ခြမ်း၊ ပေါင်းတည်မြို့မရဲစခန်းက ဧပြီ ၂၀ ရက် မနေ့ နေ့လည်ပိုင်းက အဲကွန်းပြင်သူတဦးကို အဲကွန်းပြင်ချင်လို့ဟုဆိုကာ လိမ်လည်ခေါ်ယူပြီး ရဲစခန်းအရောက်မှာ ဖမ်းဆီးထားခဲ့ပါတယ်။

အဲကွန်းပြင်ဆင်သူမှာ ရန်ကုန်-ပြည်လမ်း အထက်တန်းကျောင်းရှေ့က အသက် ၅၅ နှစ်အရွယ် ဦးရဲလေး(ခ)ဦးရဲထွဋ် ဆိုသူဖြစ်ပါတယ်။

“ရဲက သူ့အိမ်ကို လာတယ်။ အဲယားကွန်း ပြင်ချင်လို့ ပြောတယ်။ မီးပျက်နေတော့ ကိုရဲလေးက မီးလာမှ လာမယ် ပြောပြီး၊ မီးလာတော့ သွားတယ်​။ အဲမှာ ဖမ်းထားလိုက်တာ” လို့ ရဲနဲ့ နီးစပ်သူတဦးက ပြောပါတယ်။

ဦးရဲလေးဟာ အဲကွန်းပြင်တဲ့ အလုပ်နဲ့ အသက်မွေးနေသူဖြစ်ပြီး ယခင်ကလည်း မီးပွိုင့်
ပျက်တဲ့အခါတွေမှာ သွားရောက်ပြုပြင်ပေးတာမျိုးတွေ ရှိပေမယ့် အာဏာသိမ်းပြီး နောက်ပိုင်း သူ့အိမ်ကို ရဲကလာရောက် မေးမြန်းတာမျိုးတွေ ရှိခဲ့ဘူးပါတယ်။

အခုချိန်အထိ ဘာကြောင့်ဖမ်းဆီးသွားတယ်ဆိုတာကို မသိရသေးသလို ပေါင်းတည်ရဲစခန်းကနေ တခြားနေရာကို ခေါ်ဆောင်သွားတယ်လို့သိရပြီး လက်ရှိမှာ ကျန်းမာရေးကောင်းမွန်နေတယ်လို့ သူ့မိသားစုနဲ့ နီးစပ်သူတဦးဆီက သိရပါတယ်။

ပဲခူး၊ ဇန်နဝါရီ ၆၊ ၂၀၂၂။

ပဲခူးတိုင်းအနောက်ခြမ်းပေါင်းတည်မြို့လျပ်စစ်ရုံးကို ဒီနေ့မနက်၉နာရီ ၁၅မိနစ်လောက်က ဗုံးတလုံးပေါက်ကွဲခဲ့​တယ်လို့ မြို့ခံတဦးကပြောပါတယ်။

မီတာခအဓမ္မကောက်ခံနေတာနဲ့ မီတာအသစ်တပ်ဆင်တဲ့ပြည်သူတွေအပေါ်မှာ လာဘ်စားတာရယ်ကြောင့် အခုလို သတိပေးဖေါက်ခွဲခဲ့တာလို့ သိရပါတယ်။

“ပေါင်းတည်မြို့မှ အတင်းအဓမ္မကောက်ခံနေတာရယ် နောက်တခါ မီတာခအသစ်တပ်ဆင်ချင်လို့ အသစ်လျောက်တဲ့သူတွေကို ပေါင်းတည်လျပ်စစ်မြိူ့မှူးက သူ့ကို သီးခြားလာဘ်မထိုးဘူးဆိုရင်အဲလူတွေကိုခက်ခဲကြန့်ကြာအောင်လုပ်တယ် ဒါကြောင့် ပထမအကြိမ် အသံဗုံးနဲ့သတိပေးဗုံးခွဲခဲ့တာပါ လူနဲ့အဆောက်အဉီထိခိုက်မူမရှိပါဘူး” လို့ ပေါင်းတည်ပြည်သူ့ကာကွယ်ရေးတပ်ဖွဲ့ (PPDF)နဲ့နီးစပ်သူတဦးကပြောပါတယ်။

ပြီးခဲ့တဲ့ ဇန်နဝါရီ ၃ ရက်နေ့ကလည်း ပေါင်းတည်PPDFဟာ မြို့ပေါ်မှာရှိတဲ့မီးရထားဘူတာကို လုံခြုံရေးယူဖို့ လာတဲ့ စစ်ကောင်စီတွေကို ပြင်းအားမြင့်အဝေးထိန်းမိုင်းနှစ်လုံးနဲ့ ဖောက်ခွဲတိုက်ခိုက်ခဲ့လို့ စစ်ကောင်စီ ၂ဦးနေရာမှာ ပွဲချင်းပြီးသေကာ ၁ဦးပြင်းထန်ဒဏ်ရာရအောင် လုပ်ဆောင်ခဲ့ကြောင်း သိရပါတယ်။