ပစ်သတ်

မင်းလှ၊ မတ် ၉၊ ၂၀၂၅။

ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ ထန်းပင်ကုန်းအုပ်စု၊ နတ်ထမင်းကျေးရွာရာအိမ်မှူး သေနတ်ပစ်ခတ်ခံခဲ့ရပြီး သေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ ဆီက သိရပါတယ်။

သေဆုံးသူဟာ နတ်ထမင်းကျေးရွာရာအိမ်မှူး အသက် ၄၅ ဝန်းကျင် အငယ်လေး (ခ) သက်နိုင်စိုး ဖြစ်ပြီး မတ် ၈ ရက် နေ့လယ် ၁၁ နာရီ ၄၅ မိနစ်ဝန်းကျင်မှာ ၎င်းရဲ့နေအိမ်အတွင်း ဝင်ရောက် ပစ်ခတ်ခဲ့တာလို့ ဆိုပါတယ်။

“နတ်ထမင်းရွာက ရာအိမ်မှူးအငယ်လေး အိမ်ထဲမှာထိုင်နေတဲ့အချိန် ကျနော်တို့ ပူးပေါင်းရဲဘော်တွေနဲ့ အိမ်ထဲဝင်ပြီး ခေါင်းတည့်တည့်ကို ကျည် ၃ ချက်ပစ်တာ ပွဲချင်းပြီး သေပါတယ်။ ကျနော်တို့လည်း စစ်**ဂိတ် တော်တော်များများကိုဖြတ်ပြီး ရှင်းလင်းခဲ့ရတာလို့” သာယာဝတီခရိုင် တပ်ရင်း ၃၈၀၂ တပ်ခွဲ ၂ တာဝန်ရှိသူတဦးက ပြောပါတယ်။

ရာအိမ်မှူး အငယ်လေး (ခ) သက်နိုင်စိုးဟာ စစ်ကောင်စီတပ်ဖွဲ့ဝင်တွေနဲ့ပေါင်းပြီး ဒေသခံတွေဆီက စစ်မှုထမ်းကြေးကောက်ခံတာတွေ စစ်မှုထမ်းကြေးမပေးတဲ့သူတွေကို စစ်တပ်ခေါ်ကာ ဖမ်းခိုင်းတာတွေလုပ်တဲ့အပြင် PDF တွေကို စိန်ခေါ်နေတဲ့သူဖြစ်တယ်လို့ ဆိုပါတယ်။

ရာအိမ်မှူးကိုပစ်ခတ်ပြီးတာနဲ့ တော်လှန်ရေးတပ်ဖွဲ့တွေ ပြန်လည်ဆုတ်ခွာလာတာ‌ကြောင့် နောက်ဆက်တွဲအခြေအနေကို မသိရသေးဘူးလို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ တာဝန်ရှိသူတဦးက ဆက်ပြောပါတယ်။

ပစ်ခတ်မှုကို သာယာဝတီခရိုင် တပ်ရင်း ၃၈၀၂ တပ်ခွဲ ၂ နဲ့ မင်းလှမြို့နယ် ပြည်သူ့ကာကွယ်ရေးအဖွဲ့တို့က ပူးပေါင်းလုပ်‌ဆောင်ခဲ့တာဖြစ်ပါတယ်။

မတ် ၄ ရက်ကလည်း မင်းလှမြို့နယ်၊ ဦးတိုကညင်ပင်အုပ်စု၊ ဦးတိုမြန်မာစုရွာ‌နေ ပျူစောထီး ခင်မောင်ဝင်းကို တာကလေးရွာ ရန်ကုန်-ပြည်လမ်းဘေးရှိ ဇရပ်မှာထိုင်နေစဉ် သာယာဝတီခရိုင် တပ်ရင်း ၃၈၀၂ တပ်ခွဲ ၂ ပစ်ခတ်ခဲ့တာကြောင့် သေဆုံးခဲ့တယ်လို့ သိရပါတယ်။

စာတည်း – ကိုချမ်း

မကွေး၊ ဖေဖော်ဝါရီ ၂၄၊ ၂၀၂၅။

မကွေးတိုင်း၊ မကွေးခရိုင်၊ မကွေးမြို့နယ်၊ သက်ရင်းတောအုပ်စုအုပ်ချုပ်ရေးမှူး ဖေဖော်ဝါရီ ၂၄ ရက်မနက် ၅ နာရီခွဲလောက်မှာ ပစ်ခတ်ခံရပြီးသေဆုံးခဲ့တယ်လို့ Magway Guerrilla Warfare (မကွေးပြောက်ကျားတပ်ဖွဲ့)ဆီက သိရပါတယ်။

သက်ရင်းတောအုပ်စု၊ သက်ရင်းတောရွာမှာနေထိုင်တဲ့ အသက် ၅၀ အရွယ် အုပ်ချုပ်ရေးမှူးသန်းဇော်ကို သူ့ရဲ့နေအိမ်မှာ ဒေသခံကာကွယ်ရေးတပ်ဖွဲ့ဝင်တွေက ပစ်ခတ်ခဲ့တာပါ။

အုပ်ချုပ်ရေးမှူးသန်းဇော်ဟာ စစ်ကောင်စီအတွက် စစ်မှုထမ်းကြေးကောက်တာ၊ သတင်းပေးတာတွေရှိတဲ့အတွက် ခုလိုသေနတ်နဲ့ပစ်ခတ်ခဲ့တာလို့ ဆိုပါတယ်။

“ထွေအုပ်ဝန်ထမ်းတွေပေါင်း ပြီးတော့ သူရဲ့အုပ်စုထဲမှာ စစ်မှုထမ်းဖို့မဲကျတယ်ဆိုရင် ကျန်တဲ့မြို့နယ် ကျန်တဲ့နေရာဒေသက လူတွေနဲ့ပြန်အစားထိုးပြီး လုပ်စားတာတွေရှိတယ်။ ဘယ်မြို့နယ် ဘယ်ဒေသတွေမှာ ထူးခြားဖြစ်စဉ်သတင်းပို့တာတွေလည်း လုပ်တယ်၊ အဲ့ဒါ‌ကြောင့် သူ့အိမ်မှာ ကျနော်တို့ ရှင်းလင်းလိုက်တာ။” လို့ Magway Guerrilla Warfare (မကွေးပြောက်ကျားတပ်ဖွဲ့) တာဝန်ခံ ကံကြီးမောင်က ပြောပါတယ်။

ပစ်ခတ်ပြီးနောက် အုပ်ချုပ်ရေးမှူးသန်းဇော်ဆီကနေ ဖုန်း ၁ လုံးသိမ်းခဲ့ပြီး ဖုန်းထဲမှာလည်း စစ်ကောင်စီနဲ့ဆက်သွယ်ပြောဆိုထားတဲ့ အချက်အလက်‌တွေတွေ့ခဲ့တယ်လို့ သူကပြောပါတယ်။

သူဟာ မကွေးမြို့နယ်၊ ညောင်ကန်တိုက်နယ်၊ သက်ရင်းတောအုပ်စုထဲမှာရှိတဲ့ သက်ရင်းတောကျေးရွာနဲ့ သက်ရင်းစည်ပင်ရွာတို့ကို အုပ်ချုပ်နေသူဖြစ်ပါတယ်။

ပစ်ခတ်မှုဖြစ်ပြီးနောက် စစ်ကောင်စီတပ်ဖွဲ့ဝင်တွေက အင်အား ၃၀ ဝန်းကျင်နဲ့ အလောင်းကိုသွားယူကာ မကွေးမြို့ကို သယ်ဆောင်သွားတယ်လို့ သိရပါတယ်။

ဒီပစ်ခတ်မှုကို Magway Guerrilla Warfare (မကွေးပြောက်ကျားတပ်ဖွဲ့)၊ ဒေါင်းစစ်သည်ပြောက်ကျားတပ် (နတ်မောက်)နဲ့ Taungdwingyi Fighter Force LPDF တို့က ပူးပေါင်းလုပ်ဆောင်ခဲ့တာ ဖြစ်ပါတယ်။

ပြီးခဲ့တဲ့ ဇန်နဝါရီ ၂၀ ရက်ကလည်း မကွေးတိုင်း၊ တောင်တွင်းကြီးမြို့နယ်၊ မိအုအောင်းကျေးရွာမှာနေတဲ့ အုပ်ချုပ်ရေးမှူး သိန်းစိုးကို Magway Guerrilla Warfare (မကွေးပြောက်ကျားတပ်ဖွဲ့) က နေအိမ်မှာ ပစ်ခတ်ရှင်းလင်းခဲ့တယ်လို့ သိရပါတယ်။

စာတည်း – လင်း

ပဲခူး၊ ဇန်နဝါရီ ၂၉၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်မှာ ဇန်နဝါရီ ၂၈ ရက်နေ့လယ် ၁ နာရီလောက်မှာ ပျူစောထီး ၁ ဦးကို သေနတ်နဲ့ပစ်ခတ်ရာသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့ -အုတ်ဖို ဆီကသိရပါတယ်။

အုတ်ဖိုမြို့နယ်၊ သဖန်းပင်ဆိပ်ရွာမှာနေထိုင်တဲ့ ပျူစောထီး တင်နိုင်ထွန်း ဆိုသူကို အုတ်ဖိုတာဆုံနဲ့ သဖန်းပင်ဆိပ်ရွာကြားမှာ ဆိုင်ကယ်နဲ့လာတာကိုသတင်းရတဲ့အတွက် စောင့်ကြိုပစ်ခတ်ခဲ့တာလို့ ဆိုပါတယ်။

“သူက တပ်ကထွက်တာ။ အာဏာသိမ်းစက စစ်**စိတ် လုံးဝမပျောက်ဘူး။ ပြည်သူတွေအပေါ်လူပါးဝတဲ့ လူစားမျိုးပါ။ သူကြွေးကြော်တာက ငါသာခုချိန်ထိ စစ်ထဲကမထွက်သေးရင် ခုမြို့နယ်က PDF တွေကို အပြီးချေမှုန်းပစ်မယ်တဲ့။ သူ့ကြောင့်အသတ်ခံရတာက ပြည်သူ ၄ ယောက်၊ အဖမ်းခံရ၊ စစ်မှုထမ်းအတွက်ပေါ် တာကိုထည့်တာက ၈ ယောက်။ လူငယ်တွေချည်းပဲ။” လို့ ၃၈၀၂ တပ်ရင်း၊ တပ်ခွဲ ၄ မှ တပ်ခွဲမှူးရဲဘော်ဒေဝ က ပြောပါတယ်။

ပစ်ခတ်ပြီးနောက် လက်ပစ်ဗုံး ၁ လုံး၊ မိုဘိုင်းဖုန်း ၁ လုံးနဲ့ ဆိုင်ကယ် ၁ စီးတို့ကိုသိမ်းဆည်းခဲ့တယ်လို့ သိရပါတယ်။

ကိုတင်နိုင်ထွန်းဟာ ကာကွယ်ရေးအဖွဲ့တွေရဲ့အချက်အလက်တွေကို စစ်ကောင်စီတပ်ဖွဲ့ဝင်တွေဆီပေးပို့တာ၊ လူငယ်တွေကိုပေါ်တာဆွဲဖို့ စစ်ကောင်စီဆီသတင်းပေးတာ၊ ဖမ်းဆီးခိုင်းတာတွေလုပ်တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့-အုတ်ဖိုရဲ့ ထုတ်ပြန်ချက်မှာပါရှိပါတယ်။

ပြီးခဲ့တဲ့ ၂၀၂၄ ဒီဇင်ဘာ ၄ ရက်ကလည်း တိမ်မြှုပ်ရွာအခြေစိုက် ခမရ ၆ ကနေထွက်လာတဲ့စစ်ကောင်စီ ဆိုင်ကယ်ယာဉ်တန်းကို သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့ -အုတ်ဖို တပ်ဖွဲ့ဝင်တွေက စောင့်ကြိုတိုက်ခိုက်ခဲ့ရာ MA 3 သေနတ် ၁ လက်၊ ကျည်ဘောက် ၂ ခု၊ ၅.၅၆ ကျည် ၄၉ တောင့်၊ လက်ပစ်ဗုံး ၃ လုံး၊ မိုဘိုင်းဖုန်း ၂ လုံး၊ ကျောပိုးအိတ် ၁ လုံး၊ မှတ်ပုံတင် ၁ ခု၊ ငွေသား ၄၀,၀၀၀ ကျပ်နဲ့ ခမရ ၆ တပ်ရဲ့ လျှို့ဝှက်စာရွက်စာတမ်းများကို သိမ်းဆည်းရရှိခဲ့တယ်လို့ သိရပါတယ်။

စာတည်း – လင်း

ပဲခူး၊ မေ ၄၊ ၂၀၂၃။

ပဲခူးတိုင်းဒေသကြီး၊ ကျောက်ကြီးမြို့နယ်၊ တံခွန်တိုင်ကျေးရွာမှာ ဝပ်ရှော့ကနေ အိမ်ပြန်လာတဲ့ လူငယ်တဦးကို သေနတ်နဲ့ပစ်သတ်ခံခဲ့ရတယ်လို့ သိရပါတယ်။

မေလ ၃ ရက် ည ၇ နာရီခန့်မှာ ကျေးရွာကားဝပ်ရှော့မှာ အလုပ်လုပ်တဲ့ စောလေးလူထူး (ခ) ဖိုးခွားလေး (ခ) ဝဏ္ဏ ၂၃ နှစ်ဟာ နေအိမ်ကိုဆိုင်ကယ်နဲ့အပြန် တိုက်နယ်ဆေးရုံအနီးမှာ စစ်ကောင်စီတပ်သားတွေနဲ့ တိုးပြီး သေနတ်နဲ့ပစ်သတ်ခံခဲ့ရတာလည်း ဖြစ်ပါတယ်။

“စကစဘက်ကပစ်သတ်တာပါ သူ့တို့လမ်းကြောင်းထွက်လာတာကို ဆိုင်ကယ်မီးထွန်း မောင်းလာလို့ဆိုပြီး ဘလိုင်းပစ်သတ်ခံရတာပါ။ နတ်သံကွင်းကနေ ကျောက်ကြီးဘက်ကိုလာတဲ့ စစ်ကြောင်းကနေ ပစ်သွားတာပါ” လို့ ကျောက်ကြီး PDF. တပ်ရင်း ၉ တာဝန်ရှိသူက ပြောပါတယ်။

ခုလိုပစ်ခတ်ခံရတာကြောင့် ခါးဆစ်မှာ ကျည်ထိဒဏ်ရာရပြီး စိုးရိမ်ရလို့ နတ်သံကွင်းတိုက်နယ် ဆေးရုံကို တင်ပို့ကုသနေချိန်မှာ သေဆုံးသွားတာလို့ သိရပါတယ်။

“သူက ရွာမှာနေတာ စကားတောင် လေးလုံးကွဲအောင်ပြောတတ်တဲ့သူ မဟုတ်ဘူး။ အနေအေးတယ်။ စကစနဲ့ကော PDF တွေနဲ့ကော ပတ်သက်တဲ့သူမဟုတ်ဘူး။ ရွာထဲက ကားဝပ်ရှော့မှာ အလုပ်လုပ်တာ။ နောက်ကွယ်မှာကတော့ သူဘာလုပ်လဲဆိုတာတော့ မသိရဘူးပေါ့။ အပြင်ပန်းသိရသလောက်ကတော့ အေးဆေးနေတဲ့ ကလေးပါ”လို့ ဒေသခံတဦးက ပြောပါတယ်။

မေလ ၅ ရက်နေ့မနက်မှာတော့ သေဆုံးသူရဲ့အလောင်းကို မိသားစုတွေက နေအိမ်ကိုပြန်ယူလာပြီး နာရေးကိစ္စပြုလုပ်ဖို့ စီစဥ်နေတယ်လို့ ဆိုပါတယ်။

ဇန်နဝါရီလ ၂ ရက်နေ့ညပိုင်းကလည်း ကျောက်ကြီးမြို့နယ်၊ ကျောက်ခဲကြီးကျေးရွာက နာရေးအိမ်မှာ စစ်ကောင်စီကင်းလှည့်တဲ့အဖွဲ့ရောက်နေချိန် လက်နက်ကိုင်အဖွဲ့တခုက လာပစ်လို့ စစ်ကောင်စီနဲ့ပျူစောထီး၊ ဒေသခံပြည်သူတွေအပါအဝင် ၄ ဦးသေဆုံးကာ ၁၀ ဦးကျော် ဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ပခုက္ကူ၊ မေ ၂၊ ၂၀၂၃။

မကွေးတိုင်း၊ ပခုက္ကူမြို့နယ်က ကျေးရွာတွေထဲကို မေလ ၂ ရက် ဒီမနက်ပိုင်းမှာ စစ်ကောင်စီတပ်သားတွေက အင်အားအလုံးအရင်းနဲ့ ဝင်ရောက်စီးနင်းခဲ့ပြီး ရွာခံအမျိုးသားတဦးကို ပစ်သတ်သွားတယ်လို့ ဒေသခံတွေဆီက သိရပါတယ်။

ပစ်သတ်ခံရသူဟာ ဆယ်လံကျေးရွာက အသက် ၂၀ ဝန်းကျင်အရွယ် ကိုဝေလုဖြစ်ပြီး စစ်ကြောင်းထိုးလာလို့ သူ့ရဲ့ငရုတ်စိုက်ခင်းကနေထွက်ပြေးချိန် စစ်ကောင်စီတပ်သားတွေက ပစ်ခတ်ခဲ့တာလို့ ဆယ်လံကျေးရွာသားတဦးက မြေလတ်အသံကို ပြောပါတယ်။

“စစ်ကြောင်းထိုးလာတဲ့အချိန်မှာ သူကစိုက်ခင်းကိုရေတင်နေတာ။ အဲအချိန်မှာ စကစတွေက စိုက်ခင်းနားကိုရောက်လာတော့ သူကထွက်ပြေးလို့ လိုက်ပစ်လိုက်တာ။ သေနတ်မှန်ပြီးတော့ သွေးထွက်လွန်ပြီး ပွဲချင်းပြီးသေသွားတာ” လို့ ပြောပါတယ်။

သေဆုံးသူ ကိုဝေလုရဲ့ရုပ်အလောင်းကိုတော့ ဆယ်လံရွာက သူ့ရဲ့မိဘတွေက လာရောက်ကောက်ယူပြီး ငွေသောင်ရွာမှာ မြေမြုပ်သဂြိုဟ်လိုက်တယ်လို့ ဆိုပါတယ်။

အင်အား ၁၅၀ ကျော်ပါတဲ့ အဲ့ဒီစစ်ကြောင်းဟာ ဒီမနက် ၆ နာရီကျော်မှာလည်း အိုင်းကြီးရွာနဲ့ညောင်လှရွာကို ဝင်ရောက်စီးနင်းခဲ့ပြီးနောက် ထွက်ပြေးတဲ့ ဒေသခံတွေရဲ့ဆိုင်ကယ်အစီးရေ ၃၀ ကျော်ကိုလည်း ယူသွားကြတယ်လို့ ဒေသခံတွေက ပြောပါတယ်။

” ရွာကနေဆိုင်ကယ်တွေ၊ စက်ဘီးတွေ၊ နွားလှည်းတွေနဲ့ပြေးကြရတာ။ စစ်ကြောင်းက ရွာအပြင်အထိ လိုက်စစ်တာ။ ရွာသားတွေကစိုက်ခင်းထဲမှာ ဆိုင်ကယ်ကိုရပ်ပြီးတော့ ပုန်းနေကြတာ။ အဲ့မှာရပ်ထားတဲ့ ဆိုင်ကယ်အစီး ၃၀ ကျော်လောက်ကို မောင်းတဲ့သူကမောင်းလို့ ကားပေါ်လည်း တင်သွားကြတယ်”လို့ ဒေသခံအမျိုးသမီးတဦးက ပြောပါတယ်။

လက်ရှိအချိန်မှာ စစ်ကြောင်းဟာ ကျေးရွာထဲကနေ ပြန်လည်ထွက်ခွာသွားပြီဖြစ်တာကြောင့် ထွက်ပြေးနေကြရတဲ့ ဒေသခံသောင်းချီထဲက တချိုကျေးရွာသားတွေအနေနဲ့ ရွာတွေအတွင်း ပြန်လည်ဝင်ရောက်နေကြရပြီလို့လည်း ဒေသခံတွေက ပြောဆိုကြပါတယ်။

လက်ရှိရွာတွေကို ထိုးနေတဲ့စစ်ကြောင်းဟာ မြစ်ခြေမြို့အခြေစိုက် အမှတ် ၁ တိရစ္ဆာန်မွေးမြူရေးနဲ့ လေ့ကျင့်ရေးတပ် (ဒေသအခေါ် BPIတပ်)နဲ့ ကျွန်းချောင်း(EPC)စက်ရုံထဲမှာ တပ်စွဲနေကြတဲ့ စစ်ကောင်စီတပ်သားတွေဖြစ်ကြတယ်လို့ သိရပါတယ်။

စာတည်း-ရင်ငြိမ်း

ဆားလင်းကြီး၊ ဧပြီ ၂၅၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ မန်ကျည်းတန်းရွာအရှေ့ဘက်ရှိ ထန်းတောထဲမှာ ဓားစားခံအဖြစ် ဖမ်းဆီးခေါ်လာတဲ့ အမျိုးသား ၃ ဦးအပါအဝင် ၄ ဦးကို စစ်ကောင်စီတပ်ဖွဲ့တွေက သေနတ်နဲ့ ပစ်သတ်သွားတယ်လို့သိရပါတယ်။

ဧပြီလ ၂၅ ရက်ဒီမနက် ၈ နာရီလောက်မှာ စစ်ကောင်စီစစ်ကြောင်းဟာ မုံရွာမြို့တဖက်ကမ်းရှိ ညောင်ပင်ကြီးကျေးရွာကနေ မန်ကျည်းတန်းရွာထဲကိုဝင်ရောက်လာပြီးနောက် ဖမ်းဆီးလာတဲ့ အမည်မသိ အမျိုးသား ၃ ဦးရဲ့ နံဖူး၊ ကျောနဲ့ ရင်ဘတ်တွေကို သေနတ်နဲ့ပစ်သတ်သွားတာလို့ ဆားလင်းကြီးဒေသခံတဦးက ပြောပါတယ်။

“သူတို့တွေက ညောင်ပင်ကြီးတောက်လျှောက်ရွာတွေကို သေနတ်တွေဖောက်ပြီး စစ်ကြောင်းထိုးတယ်။ အဲဒီကနေထွက်လာပြီး ဆားလင်းကြီးနယ်ထဲကို ဝင်တယ်။ လမ်းရိုးအတိုင်းမသွားပဲနဲ့ လယ်ကွင်းတွေဘက်ကနေ သူတို့အရင်သွားနေကျ လမ်းကြောင်းအတိုင်း သွားကြတယ်။ ဖောင်းကတာနဲ့ မန်ကျည်းတန်းကြားထဲမှာ အဲဒီ ၃ ယောက်ကို သတ်ပစ်ခဲ့တယ်။ အဲဒီ ၃ ယောက်က တခြားနယ်ဘက်ကနေ ဖမ်းခေါ်လာတဲ့သူတွေ ဖြစ်မယ်ဗျ၊ ကျနော်တို့ဘက်ကတော့ မဟုတ်ဘူး”လို့ ဆိုပါတယ်။

အသတ်ခံရသူတွေဟာ အသက် ၃၀ ဝန်းကျင်ရှိပြီး၊ အလောင်းတွေကိုတော့ ဒီနေ့လယ် ၁ နာရီ ၁၅ မိနစ်လောက်မှာ ဒေသခံတွေက တွေ့ရှိခဲ့တာဖြစ်သလို သူတို့နဲ့ပက်သက်တဲ့ အသေးစိတ် အချက်အလက်တွေကိုတော့ မြေလတ်အသံက သီးခြားအတည်မပြုနိုင်သေးပါဘူး။

အဲဒီစစ်ကောင်စီစစ်ကြောင်းဟာ ဒီနေ့မနက်ပိုင်းပဲမှာ မြိုင်မြို့နယ်သားတဦးဖြစ်တဲ့ အသက် ၂၉ နှစ်အရွယ် ကိုဝင်းနောင်ဆိုသူနဲ့ ဆားလင်းကြီးမြို့နယ်၊ ရွှေလှေရွာတံတားထိပ်မှာ ထိပ်တိုက်တွေ့ချိန် သေနတ်နဲ့ ပစ်သတ်ခဲ့သေးတယ်လို့လည်း ဆိုပါတယ်။

လက်ရှိမှာတော့ အဲဒီစစ်ကောင်စီတပ်ဖွဲ့ဟာ စစ်ကြောင်း ၂ ကြောင်းခွဲပြီး ဆားလင်းကြီးမြို့နယ်ထဲက ရေခါးရွာထဲကို ဝင်ရောက်သွားကာ လက်နက်ပစ်ဖောက်သံတွေနဲ့ မိုင်းပေါက်ကွဲသံတွေလည်း ကြားနေရတယ်လို့ ဒေသခံတွေဆီက သိရပါတယ်။

ပြီးခဲ့တဲ့ မတ်လ ၂၉ ရက်ကလည်း ဆားလင်းကြီးနယ်ထဲကို စစ်ကောင်စီတပ်က စစ်ကြောင်းထိုးလာလို့ ရွာ ၁၄ ရွာက ဒေသခံသောင်းနဲ့ချီ ထွက်ပြေးတိမ်းရှောင်ခဲ့ရပါသေးတယ်။

စာတည်း – လင်း

ဆားလင်းကြီး၊ ဧပြီ ၂၅၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ရွှေလှေကျေးရွာကိုစစ်ကြောင်းထိုးလာတဲ့ စစ်ကောင်စီတပ်က လမ်းသွားလမ်းလာ ပြည်သူတဦးကို ဧပြီလ ၂၅ ရက် ဒီနေ့ မနက် ၉ နာရီလောက်မှာ ပစ်သတ်သွားတယ်လို့ သိရပါတယ်။

အသတ်ခံရသူဟာ မြိုင်မြို့နယ်တွင် နေထိုင်သူ အသက် ၂၉ နှစ်အရွယ် ကိုဝင်းနောင် ဆိုသူဖြစ်ပြီး ညောင်ပင်ကြီး − ဆားလင်းကြီးလမ်းပိုင်းအတိုင်း ဆိုင်ကယ်မောင်းနှင်လာစဉ် ရွှေလှေရွာတံတားထိပ်မှာ အင်အား ၁၀၀ ခန့်ရှိ စစ်ကောင်စီစစ်ကြောင်းနဲ့တွေ့ပြီး သေနတ်နဲ့ပစ်ခတ်ခံခဲ့ရတာလို့ ဒေသခံတဦးက မြေလတ်အသံကို ပြောပါတယ်။

“ကိုဝင်းနောင်က မြိုင်နယ်ကလို့ပဲ သိတယ်။ သူက စစ်ကြောင်းထိုးလာတာကို မသိဘူး။ အဲဒါနဲ့ ဆိုင်ကယ်ကို ဒီအတိုင်း စီးလာတာ၊ စစ်ကြောင်းနဲ့တွေ့တော့ အပစ်ခံရတာ။ သေနတ်ထိတော့ ဆိုင်ကယ်ရော လူရော လဲကျသွားတယ်။ အဲဒီအချိန် စကစတပ်တွေက အနားလာပြီး ဓားတွေနဲ့ သူရဲ့ဗိုက်ကို မွန်းပြီးသတ်သွားတယ်” လို့ ပြောပါတယ်။

စစ်ကောင်စီတပ်က ပစ်ခတ်လို့ ဆိုင်ကယ်မောင်းနှင်သူ ကိုဝင်းနောင် သေဆုံးခဲ့ပြီး သူနဲ့အတူ စီးနင်းလိုက်ပါလာတဲ့ အမျိုးသားတဦးကတော့ ထွက်ပြေးလွတ်မြောက်သွားတယ်လို့ သူကဆက်ပြောပါတယ်။

ကိုဝင်းနောင်ရဲ့ ရုပ်အလောင်းကိုတော့ မြိုင်မြို့နယ်ထဲက မိသားစုဝင်တွေက နာရေးကားနဲ့ လာရောက်ယူဆောင်သွားကာ လက်ရှိအချိန်မှာ အဲ့ဒီစစ်ကောင်စီစစ်ကြောင်းဟာ ဆားလင်းကြီးမြို့ပေါ်ကို ပြန်လည်ထွက်ခွာသွားတယ်လို့ သိရပါတယ်။

ပြီးခဲ့တဲ့ မတ်လ ၂၉ ရက်နေ့ကလည်း ဆားလင်းကြီးနယ်ထဲကို စစ်ကောင်စီတပ်က စစ်ကြောင်းထိုးလာလို့ ရွာ ၁၄ ရွာက ဒေသခံသောင်းနဲ့ချီ ထွက်ပြေးတိမ်းရှောင်ခဲ့ရတယ်လို့ သိရပါတယ်။

စာတည်း – ရင်ငြိမ်း

စဥ့်ကူး၊ ဧပြီ ၂၁၊ ၂၀၂၃။

မန္တလေးတိုင်း၊ စဥ့်ကူးမြို့နယ်ရှိ ကျေးရွာတရွာကနေအိမ် ၂၀၀ ကျော်ကို စစ်ကောင်စီအဖွဲ့က မီးရှို့ဖျက်ဆီးခဲ့ပြီး အမျိုးသမီးတဦးနဲ့ စိတ်ဝေဒနာသည်အမျိုးသားတဦးကိုပါ သေနတ်နဲ့ ပစ်သတ်ခဲ့တယ်လို့ သိရပါတယ်။

အင်အား ၄၀ ဝန်းကျင်ပါ စစ်သားနဲ့ပျူစောထီးတွေက ဧပြီလ ၂၀ ရက် မနေ့ကမနက် ၇ နာရီလောက်မှာ ဘုံသာကုန်းကျေးရွာထဲကို ဝင်ရောက်မွှေနှောက်ကာ ပစ္စည်းတွေကိုယူပြီး ရွာသား အသက် ၆၀ နှစ်အရွယ်စိတ်ဝေဒနာသည် ဦးကျော်တင်အေးကို သေနတ်နဲ့ပစ်သတ်သွားခဲ့တာလို့ စဥ့်ကူး ကင်းထောက်မြေပြင်သတင်းအဖွဲ့က တာဝန်ရှိသူတဦးက ပြောပါတယ်။

အဲ့ဒီနောက် ဘုံသာကုန်းကျေးရွာနဲ့ ၁ မိုင်သာသာဝေတဲ့ ခက်သင်ကျေးရွာကို စစ်ကြောင်းဆက်ထိုးသွားပြီး နေ့လယ် ၂ နာရီလောက်မှာတော့ နေအိမ်တွေကိုမီးရှို့ဖျက်ဆီးပြီး အသက် ၂၀ နှစ်အရွယ် မဆုမြတ်မြတ်ထက်ကိုလည်း သတ်သွားခဲ့ကာ၊ ခက်သင်ရွာသား ၁ ဦးလည်း ခုထိ ပျောက်နေသေးတယ်လို့ ဆိုပါတယ်။

“ရွာကိုမီးရှို့တဲ့အဖွဲ့ထဲမှာ ပျူတွေများတယ်။ ဘာလို့လည်းဆိုတော့ စဥ့်ကူးနယ်၊ မြစ်အရှေ့ဘက်ရွာတွေက ပျူစောထီးတွေအခြေချတဲ့ရွာတွေ များတယ်၊ ခက်သင်ရွာသား တယောက်လည်း ပျောက်နေတယ်။ ရွာသားတွေပြောတာတော့ သတ်လိုက်ပြီတဲ့ ကျနော်တို့လည်း မသိရတော့ အတိအကျပြောလို့မရဘူး”လို့ ဆိုပါတယ်။

ခက်သင်ရွာ မီးရှို့ခံရတာဟာ ခုတကြိမ်က ပထမဆုံးဖြစ်ပြီး၊ အိမ်ခြေ ၇၀၀ ကျော်ရှိတဲ့အနက် နေအိမ် ၂၀၀ ကျော်မီးလောင်ပျက်စီးခဲ့ပါတယ်။

အဲ့ဒီစစ်ကောင်စီတပ်သားတွေဟာ မနေ့ကညနေ ၅ နာရီလောက်မှ စဥ့်ကူးမြို့နယ်၊ ထုံးကြီးရွာဘက်ကို ပြန်လည် ထွက်ခွာသွားခဲ့ပြီး စစ်ကြောင်းထိုးခံခဲ့ရတဲ့ရွာတွေက ဒေသခံတွေကတော့ ကျေးရွာထဲကို ဝင်ရောက်နေထိုင်ခြင်း မရှိသေးဘူးလို့ သိရပါတယ်။

စာတည်း – လင်း

ပေါင်းတည်၊ ဧပြီ ၂၁၊ ၂၀၂၃။

ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတည်မြို့နယ်၊ ဇီးပင်လှရွာ အုပ်ချုပ်ရေးမှူးကို ဧပြီလ ၂၀ ရက် မနေ့ညနေက သေနတ်နဲ့ ပစ်သတ်ခဲ့တယ်လို့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ – PPDFရဲ့တာဝန်ရှိသူက ပြောပါတယ်။

အသက် ၅၈ နှစ်အရွယ် အုပ်ချုပ်ရေးမှူး ကိုဌေးအောင်ဟာ ညနေ ၄ နာရီခွဲလောက်မှာ ပေါင်းတည်မြို့ဘက်ကနေ မှတ်တိုင်ရွာဘက်ကို ဆိုင်ကယ်နဲ့တဦးတည်းအပြန် ဘုရားငါးဆူရွာနဲ့မြို့ကြီးရွာအကြား မြေနီလမ်းမှာ သေနတ်နဲ့ ပစ်သတ်ခဲ့တာလို့ ဆိုပါတယ်။

“ကျနော်တို့ရဲဘော်တွေ ပစ်ခတ်တာကို သိသွားပုံရတယ်။ ဆိုင်ကယ်ကို လှဲပြီးမြောင်းထဲဆင်းပြေးတာကို ၅ ချက် ပစ်ခတ်ခဲ့တာပါ။ ရေအိုင်ထဲမှာ ပွဲချင်းပြီးပဲ” လို့ PPDFရဲ့တာဝန်ရှိသူက ပြောပါတယ်။

စစ်ကောင်စီရဲ့ဝါဒဖြန့်တယ်လီဂရမ်မှာတော့ ကိုဌေးအောင်ရဲ့ခန္ဓာကိုယ်မှာ ပစ္စတိုသေနတ်ဒဏ်ရာ ၄ ချက် ရရှိခဲ့တယ်လို့ ဆိုပါတယ်။

အဲဒီတိုက်ခိုက်မှု့ကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ ပြည်ခရိုင်တပ်ရင်း ၃၆၀၁ မြို့ပြပြောက်ကျားတပ်ခွဲ ၃ နဲ့ တပ်ခွဲ ၄ တို့က လုပ်ဆောင်ခဲ့တာလို့ သိရပါတယ်။

အခုသေဆုံးတဲ့ အုပ်ချုပ်ရေးမှူးဟာ ပြီးခဲ့နှစ် အောက်တိုဘာလ ၁၈ ရက်ညက ပစ်သတ်ခံရတဲ့ ဇီးပင်လှကျေးရွာ အုပ်ချုပ်ရေးမှူး ကိုအောင်ထွန်းနိုင်ရဲ့နေရာမှာ အစားထိုးလုပ်ကိုင်တဲ့ စစ်ကောင်စီခန့် အုပ်ချုပ်ရေးမှူး ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

ဧပြီလ ၁၅ ရက် မနက် ၁၀ နာရီလောက်ကလည်း ပေါင်းတည်မြို့နယ်၊ အဂ္ဂရာပြည့်အုပ်စု၊ အုပ်ချုပ်ရေးမှူး ကိုထွန်းထွန်းဦးကို သခွတ်စောက်ရွာက သူရဲ့နေအိမ်အတွင်းမှာ ပေါင်းတည်ပြည်သူ့ကာကွယ်ရေးတပ်ဖွဲ့က ပစ်ခတ်ရှင်းလင်းခဲ့ပါသေးတယ်။

ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့၊ ပြည်ခရိုင်တပ်ရင်း ၃၆၀၁ တပ်ခွဲ ၄၊ တပ်ခွဲ ၅ နဲ့ ၃၆၀၂ တပ်ခွဲ ၄ ပူးပေါင်းအဖွဲ့ဟာလည်း ဧပြီလ ၂၀ ရက် မနေ့ကပဲ ပဲခူးရိုးမပေါ်ကို စစ်သားအင်အား ၂၇ ဦးလောက်နဲ့ စစ်ကြောင်းထိုးလာတဲ့ စစ်ကောင်စီတပ်ကို ပေါင်းတည်မြို့နယ်၊ ကိုင်းကွင်းရွာအနီးကနေ မိုင်း ၂ လုံးဆွဲကာ တိုက်ခိုက်ခဲ့လို့ စစ်သား ၃ ဦးလောက် ဒဏ်ရာရခဲ့ပါသေးတယ်။

စာတည်း – လင်း

မြိုင်၊ ဧပြီ ၁၀၊ ၂၀၂၃။

မကွေးတိုင်း၊ မြိုင်မြို့နယ်၊ ညောင်အုပ်ရွာကို စစ်ကောင်စီတပ်သားတွေက ဧပြီလ ၉ ရက်မှာ မီးရှို့ဖျက်စီးခဲ့ပြီး၊ စိတ်ကျန်းမာရေးချို့တဲ့သူ တဦးကိုလည်း သေနတ်နဲ့ပစ်သတ်ခဲ့တယ်လို့ သိရပါတယ်။

မုံရွာအခြေစိုက် အနောက်မြောက်တိုင်းစစ်ဌာနချုပ်က စစ်သားအင်အား ၄၀ ကျော်ဟာ မနေ့ည ၇ နာရီလောက်မှာ ညောင်အုပ်ရွာကိုဝင်ရောက် မီးရှို့ခဲ့ပြီးနောက် အဲ့ဒီရွာကိုရောက်နေတဲ့ သဲကြီးရွာက စိတ်ကျန်းမာရေးချို့တဲ့သူ အသက် ၃၉ နှစ်အရွယ် ကိုအောင်ဇော်လင်းကိုပါ သေနတ်နဲ့ပစ်သတ်ခဲ့တာလို့ Pnlhoenix Ranger PDFရဲ့ တပ်ဖွဲ့ဝင်တဦးက ပြောပါတယ်။

“ဘာတိုက်ပွဲမှမရှိပဲ တမင်သက်သက်လာပြီး မီးရှို့သွားတာ။ အိမ်ခြေတရာလောက်ရှိတာကို ၃ ပုံ ၁ ပုံလောက်ပါသွားတယ်။ ပထမဆုံးမီးရှို့ခံရတာပဲ။ သဲကြီးရွာက စိတ်မနှံ့တဲ့ အကိုတယောက်ကိုလည်း ညောင်အုပ်ရွာမှာပဲ ဦးခေါင်းတေ့ပစ်သွားတာ”လို့ ပြောပါတယ်။

အဲ့ဒီစစ်ကောင်စီတပ်သားတွေကို ရဟက်ယာဥ် ၄ စီးနဲ့ ညောင်အုပ်ရွာအနီးမှာ လာချခဲ့တာဖြစ်ပြီး၊ ရွာကိုမီးရှီု့ပြီးချိန် ည ၁၂ နာရီလောက်မှာတော့ ရဟက်ယာဥ်တွေနဲ့ပဲ ပြန်ခေါ်သွားတယ်လို့ Pnlhoenix Ranger PDFရဲ့ တပ်ဖွဲ့ဝင်တဦးက ပြောပါတယ်။

ခုလိုမီးရှို့လို့ ညောင်အုပ်ရွာက နေအိမ် ၂၉ လုံးမီးလောင်ပျက်စီးပြီး၊ လက်ရှိမှာ ဒေသခံ ၁၅၀ လောက်က နွားလှည်းတွေပေါ်မှာ ယာယီအမိုးမိုးကာ နေထိုင်နေကြသလို အချို့ကလည်း ကျေးရွာစာသင်ကျောင်းထဲမှာ နေထိုင်နေရတယ်လို့ ဆိုပါတယ်။

ပြီးခဲ့တဲ့ဧပြီလ ၈ ရက်ကလည်း မြိုင်မြို့နယ်တောင်ပိုင်း၊ အိုင်းမ(အနောက်)ရွာကို စစ်တပ်ကမီးရှို့ခဲ့လို့ နေအိမ် ၁၈ လုံးမီးလောင်ပျက်စီးခဲ့ရပါသေးတယ်။