နွားထိုးကြီး၊ မေ ၆၊ ၂၀၂၆။

မန္တလေးတိုင်း၊ နွားထိုးကြီးမြို့နယ်၊ အောင်သာရွာအနီးမှာတိုက်ပွဲဖြစ်ပြီး တော်လှန်ရေးတပ်ဖွဲ့ဝင် ၄ ဦးကျဆုံးခဲ့တယ်လို့ နွားထိုးကြီးမြို့နယ်ပကဖနဲ့ နီးစပ်သူတွေဆီက သိရပါတယ်။

မေလ ၃ ရက်မနက် ၅ နာရီခန့်မှာ နွားထိုးကြီးမြို့ပေါ်ကထွက်လာတဲ့ အင်အား ၂၀၀ ကျော်ပါ စစ်ကြောင်းကို အောင်သာရွာအနီးမှာ ကြားဖြတ်တိုက်ခိုက်ရာမှ တိုက်ပွဲဖြစ်ပွားခဲ့တာလို့ ဆိုပါတယ်။

“ကျနော်တို့ကာကင်းနဲ့ စစ်ကြောင်းနဲ့ တွေ့တယ်။ ရှေ့ပွိုင့်ထိုးလာတဲ့ကောင်တွေနဲ့ အရင်ထိတွေ့ဖြစ်တာ။ သူတို့ပွိုင့်ထိုးလာတဲ့ကောင်တွေက မှောက်သွားပြီ၊ ကိုယ့်ဘက်ကလည်းပွဲအခြေနေကောင်းနေပြီဆိုတော့ ရှေ့တက်တဲ့အချိန်မှာ သူတို့ဘက်ကနောက်တကြောင်းနဲ့ဝိုက်ခံလိုက်ရတာ”လို့ နွားထိုးကြီးမြို့နယ်ပကဖနဲ့ နီးစပ်သူတဦးက ပြောပါတယ်။

တိုက်ပွဲအတွင်းမှာ စစ်ကော်မရှင်ဘက်က ၁၅ ဦးခန့်ထိခိုက်သေဆုံးနိုင်ပြီး စစ်ကြောင်းက အင်အားများတာကြောင့် လက်နက်ခဲယမ်းတွေမသိမ်းဆည်းနိုင်ခဲ့ဘူးလို့ ဆိုပါတယ်။

တော်လှန်ရေးတပ်ဖွဲ့တွေဘက်ကတော့ အသက် ၂၅ နှစ်အောက်တွေဖြစ်တဲ့ နွားထိုးကြီးပကဖ အဖွဲ့ဝင် ၃ ဦး၊ မြင်းခြံခရိုင်တပ်ရင်း ၈ က တပ်ဖွဲ့ဝင် ၁ ဦးကျဆုံးခဲ့ပြီး သေနတ် ၄ လက်လည်းဆုံးရှုံးကာ တိုက်ပွဲအတွင်းကျဆုံးခဲ့ရတဲ့အလောင်းတွေကိုတော့ နေ့ချင်းကောက်ယူပြီး သင်္ဂြိုဟ်လိုက်ရတယ်လို့ ဆိုပါတယ်။

အဆိုပါစစ်ကြောင်းဟာ အောင်သာရွာထဲမှာ မေလ ၆ ရက်မနက်ပိုင်းအထိတပ်စွဲထားတာကြောင့် အောင်သာရွာ၊ ထနောင်းပင်လဲ၊ မကျည်းကန်ရွာတွေက ဒေသခံအချို့တိမ်းရှောင်နေကြရတယ်လို့ ဆိုပါတယ်။

စစ်ကော်မရှင်ထောကိခံတယ်လီဂရမ်တွေမှာတော့ အောင်သာရွာတိုက်ပွဲမှာ PDF ၄ ဦးကျဆုံးကာ သေနတ် ၄ လက်နဲ့ စစ်အသုံးအဆောင်ပစ္စည်းတွေ သိမ်းဆည်းရမိထားတယ်လို့ ဓာတ်ပုံတွေနဲ့တကွ ဖော်ပြရေးသားထားပြီး အဆိုပါပုံတွေဟာလည်းမှန်ကန်ကြောင်း နွားထိုးကြီးမြို့နယ်ပကဖနဲ့နီးစပ်သူက အတည်ပြုထားပါတယ်။

မေ ၄ ရက်ကလည်း တောင်သာမြို့နယ်၊ သံဘိုရွာမကျေးရွာမှာ နယ်မြေရှင်းလင်းရေးသွားတဲ့ ကာကွယ်ရေးတပ်ဖွဲ့ဝင်တွေ တိုက်ခိုက်ခံရပြီး ၁၁ ဦးကျဆုံးခဲ့တယ်လို့ သိရပါတယ်။

စာတည်း – လင်း

တိုက်ပွဲဖြစ်ပြီးနောက် ရွာ ၂ ရွာကိုစစ်တပ်က ဗုံးကြဲ

ကောလင်း၊ ဒီဇင်ဘာ၂၀၊ ၂၀၂၅။

စစ်ကိုင်းတိုင်း၊ ကောလင်းမြို့နယ်အရှေ့ခြမ်းက သစ်ဖုလတောင်မှာ စစ်ကော်မရှင်တပ်နဲ့ တော်လှန်ရေးတပ်တွေတိုက်ပွဲဖြစ်ပြီး တော်လှန်ရေးတပ်ဖွဲ့ဝင် ၁ ဦးကျဆုံးခဲ့တယ်လို့ ဒေသခံတွေဆီက သိရပါတယ်။

စစ်ကော်မရှင်တပ်ဖွဲ့ဝင် အင်အား ၅၀ ဝန်းကျင်တပ်စွဲနေတဲ့ သစ်ဖုလရွာကို ဒီဇင်ဘာ ၁၈ ရက် ညပိုင်းကနေစလို့ တော်လှန်ရေးတပ်တွေဘက်က သွားရောက်တိုက်ခိုက်ခဲ့ကာ ၁၉ ရက် မနေ့က မနက်ပိုင်းအထိတိုက်ပွဲဖြစ်ခဲ့တယ်လို့ ဆိုပါတယ်။

“သစ်ဖုလမှာ တပ်စွဲထားတဲ့စကစကို ကိုယ့်ဘက်ကသွားတိုက်တာပေါ့။ စကစဘက်က ထောင်ထားတဲ့ မိုင်းကိုနင်းမိပြီး ထိခိုက်ဒဏ်ရာရတဲ့သူလည်းရှိတယ်။ အထိအတွေ့မှာတော့ ရဲဘော် တယောက်ကျတယ်”လို့ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌တိုက်ပွဲအခြေအနေကိုသိရှိသူတဦးကပြောပါတယ်။

လေကြောင်းတိုက်ခိုက်မှုကြောင့် တော်လှန်ရေးတပ်တွေပြန်လည်ဆုတ်ခွာခဲ့ပြီး စစ်တပ်ကအဲ့ဒီတောင်မှာပဲ တပ်စွဲထားတယ်လို့ သိရပါတယ်။ သစ်ဖုလတောင်ကို စစ်တပ်က ၂၀၂၁ အာဏာသိမ်းကတည်းက တပ်စွဲထားတာပါ။

တိုက်ပွဲအတွင်း စစ်ကော်မရှင်ဘက်က လေကြောင်းတိုက်ခိုက်ခဲ့တဲ့အပြင် တိုက်ပွဲဖြစ်ပြီးနောက် မနေ့က မနက် ၁၀ နာရီလောက်မှာလည်း သစ်ဖုလတောင်အနီးက ကျောက်တန်းရွာကို လေကြောင်းတိုက်ခိုက်ကာ စက်လက်တွေနဲ့လည်းပစ်ခတ်ခဲ့ပြီး ထိခိုက်မှုတော့မရှိခဲ့ဘူးလို့ ဆိုပါတယ်။

ဒါ့အပြင် နေ့လယ် ၂ နာရီမှာလည်း ကြိုးကြာဥရွာကို လေကြောင်းတိုက်ခိုက်ခဲ့တာကြောင့် စာသင်ကျောင်း ၁ လုံးပျက်စီးပြီး ကျောင်းဝန်းအတွင်း စပါးလှန်းနေတဲ့အမျိုးသမီး ၃ ဦး ထိခိုက်ဒဏ်ရာရခဲ့တယ်လို့ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌တိုက်ပွဲအခြေအနေကိုသိရှိသူတဦးက ပြောပါတယ်။

အဲ့ဒီနောက် မနေ့ကညပိုင်းမှာလည်း ဝန်းသို ၁၀၁ တပ်ကနေ ကောလင်းမြို့နယ်အရှေ့ခြမ်းကို ဟောင်ဝစ်ဇာတွေနဲ့ ပစ်ခတ်ခဲ့တယ်လို့ ဆိုပါတယ်။

သတင်း – မြတ်

မြေလတ်အသံ၊ ဇူလိုင် ၂၅၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်မှာ အင်အား ၁၀၀ ကျော်နဲ့ထိုးစစ်ဆင်လာတဲ့ စစ်ကောင်စီတပ်သားတွေကို ခုခံတိုက်ခိုက်ရင်း တော်လှန်ရေးတပ်ဖွဲ့ဝင် ၁ ဦး ကျဆုံးခဲ့တယ်လို့ ရွှေဘိုခရိုင်အမှတ် ၂၆ တပ်ရင်းဆီက သိရပါတယ်။

အဲ့ဒီစစ်ကြောင်းဟာ ရွှေဘိုမြို့နယ်ရှိ တော်လှန်ရေးတပ်ဖွဲ့တွေသိမ်းပိုက်ထားတဲ့နေရာကို ထိုးစစ်ဆင်လာချိန် ဇူလိုင် ၂၄ ရက်မနက် ၈ နာရီကျော်ကစပြီး ၁ နာရီ ခန့်ကြာ တော်လှန်ရေးတပ်တွေနဲ့ ထိတွေ့တိုက်ပွဲဖြစ်ခဲ့တာလို့ဆိုပါတယ်။

“ရန်သူ့စစ်ကြောင်းကို ခုခံရင်း မြင့်မြတ်စွာကျဆုံးခဲ့တာပါ။ ရန်သူ့စစ်ကြောင်းကို ကောင်းစွာ ခုခံချေမှုန်းနိုင်ခဲ့ပါတယ်။ ရန်သူ့ဘက်က ထိခိုက်ကျဆုံးမှုများစွာနဲ့ ဆုတ်ခွာသွားပေမယ့် ရန်သူ့လက်နက်နဲ့ အလောင်းတော့မရခဲ့ပါဘူး”လို့ ရွှေဘိုခရိုင်အမှတ် ၂၆ တပ်ရင်းမှ တပ်ရင်းမှူး ပီလွန်ကပြောပါ တယ်။

ကျဆုံးသူမှာ ရွှေဘိုခရိုင်အမှတ် ၂၆ တပ်ရင်းမှ တပ်ဖွဲ့ဝင်ရန်လင်းဖြစ်ပြီး တိုက်ပွဲအတွင်း ဦးခေါင်းကို ကျည်ထိမှန်ခဲ့တာဖြစ်ပြီး ၎င်းရဲ့ရုပ်အလောင်းကိုတော့ ဇူလိုင် ၂၄ ရက်နေ့လယ်မှာ မြေမြှုပ် သင်္ဂြိုဟ်လိုက်ပြီလို့ သူကဆက်ပြောပါတယ်။

တပ်ဖွဲ့ဝင်ရန်လင်းဟာ ရှမ်း-မန်းစစ်ဆင်ရေး၊ စဉ့်ကူးမြို့သိမ်းတိုက်ပွဲတို့မှာ ပါဝင်တိုက်ခိုက်ခဲ့သူဖြစ်ပြီး သူ့အနေနဲ့ ရှေ့တန်းရက်စေ့လို့ တပ်ချိန်းတဲ့အချိန်မှာ နောက်တန်းမပြန်ဘဲ လက်ရှိတိုက်ပွဲမှာဆက်လက် တိုက်ပွဲဝင်ရင်း ကျဆုံးခဲ့တာလို့ တပ်ရင်းမှူး ပီလွန်ကပြောပါတယ်။

အထက်ပါစစ်ကောင်စီစစ်ကြောင်းဟာ ဇူလိုင် ၂၅ ရက်ဒီကနေ့အထိ ဆက်လက် ထိုးစစ်ဆင်လာနေတာကြောင့် နှစ်ဖက်တိုက်ပွဲပြင်းထန်နေပြီး တိုက်ပွဲဝင်နေတဲ့ ညီနောင် ၆ ရင်းဖြစ်တဲ့ ရွှေဘိုခရိုင်အမှတ် ( ၁၅၊၁၈၊ ၂၃၊ ၂၆၊ ၉၇၀၆၊ ၁၇၀၁) တပ်ရင်းတွေမှာ ကျည်၊ ခဲယမ်းတွေ လိုအပ်လျှက်ရှိနေတယ်လို့သိရပါတယ်။

စာတည်း – လင်း

မုံရွာ၊ မေ ၁၃၊ ၂၀၂၅။

စစ်ကိုင်းတိုင်း၊ မုံရွာမြို့နယ်၊ မအူကျေးရွာအနီး မုံရွာ-ချောင်းဦးလမ်းပိုင်းပေါ် ပစ်ခတ်မှုနှစ်ဖက် သေဆုံးမှုရှိတယ်လို့ မေ ၁၃ ရက်မှာ မုံရွာခရိုင် အမှတ် ၂၂ နတ်ဆိုး တပ်ရင်းက သတင်း ထုတ်ပြန်ပါတယ်။

မေ ၁၁ ရက်မနက် ၁၁ နာရီကျော်ခန့်မှာ မအူဂိတ်ကနေ ကားတွေကိုငွေတောင်းဖို့ ဆိုင်ကယ်တွေနဲ့ ထွက်လာတဲ့ စစ်ကောင်စီတပ်သား ၃ ဦးဟာ မအူဂိတ်နဲ့ မီတာ ၅၀၀ ခန့်အကွာ မထသ ဂိတ်ဟောင်း အနီး ကွမ်းယာဆိုင်နဲ့ ဂိတ်ဟောင်းနားမှာရှိနေချိန် တော်လှန်ရေးတပ်တွေက ဝင်ရောက်ပစ်ခတ်ခဲ့ရာက နှစ်ဖက်အပြန်အလှန်ပစ်ခတ်မှုဖြစ်ခဲ့တာလို့ ဆိုပါတယ်။

“ကျနော်ရဲဘော်တွေက အဲ့နားရောက်တော့ တဖက်ဂိတ်ထဲက တယောက်ကိုမေ့သွားတာလား၊ ဘယ်လိုဖြစ်သွားလည်းမသိရဘူး။ နှစ်နေရာပစ်ရမယ်လို့မှာလိုက်တာ။ ကွမ်းယာဆိုင်ထဲက နှစ်ယောက်ကိုပစ်ပြီးတော့ လက်နက်ဆင်းကောက်ချိန် ဂိတ်ထဲကတယောက်က ကျနော့်ရဲဘော်တွေကိုပစ်လိုက်တာ”လို့ မုံရွာခရိုင်အမှတ် ၂၂ နတ်ဆိုးတပ်ရင်းက တပ်ရင်းမှူးနတ်ဆိုးကပြောပါတယ်။

ပစ်ခတ်မှုအတွင်း စစ်ကောင်စီတပ်သား ၂ ဦး၊ နတ်ဆိုးအဖွဲ့ဝင် အသက် ၂၉ အရွယ် လှမျိုးအောင်၊ အသက် ၂၅ နှစ်အရွယ် ညိမ်းမင်းဇော်၊ အသက် ၁၇ နှစ် အရွယ် ချစ်ထူးခန့်တို့ ၃ ဦးသေဆုံးပြီး ပစ္စတိုသေနတ် ၃ လက်၊ ဆိုင်ကယ် ၃ စီ ဆုံးရှုံးခဲ့တယ်လို့ ဆိုပါတယ်။

သေဆုံးအဖွဲ့ဝင် ၃ ဦးရဲ့အလောင်းတွေလည်း ပြန်မရတာကြောင့် အဖွဲ့ဝင်တွေရဲ့ အဝတ်အထည်တွေနဲ့တင် မေ ၁၂ ရက်မှာ နာရေးပြုလုပ်ခဲ့ရတယ်လို့သိရပါတယ်။

စစ်အာဏာသိမ်း ၄ နှစ်ကျော်ကာလအတွင်း မုံရွာခရိုင်အမှတ် ၂၂ နတ်ဆိုးတပ်ရင်းက အဖွဲ့ဝင် ၁၀ ဦးထိ ကျဆုံးထားပြီး ယခုလိုမစ်ရှင်လုပ်ဆောင်ရင်း ကျဆုံးသူက ၃ ဦးဖြစ်ကာ ကျန်ကျဆုံးအဖွဲ့ဝင်တွေက မိုင်းမတော်တဆမှုနဲ့ စစ်ကောင်စီစစ်ကြောင်းတွေရဲ့ဖမ်းဆီးသတ်ဖြတ်တာခံရလို့ ဖြစ်တယ်လို့ တပ်ရင်းမှူး နတ်ဆိုးက ပြောပါတယ်။

စာတည်း – လင်း