တောင်တွင်းကြီး

မကွေး၊ ဇန်နဝါရီ ၂၆၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ ဆီစက်ကျေးရွာက အသက် ၁၃ နှစ်အရွယ်ကလေးငယ်ကို တရွာတည်းနေအမျိုးသားတဦးကသတ်ပြီး မိဘတွေဆီကို ကျပ်သိန်း ၁၀၀ တောင်းခဲ့တယ်လို့ မိသားစုဝင်တွေနဲ့နီးစပ်သူတွေဆီက သိရပါတယ်။

အသတ်ခံရသူဟာ ဆီစက် အမက ကျောင်းမှာတက်နေတဲ့ အသက် ၁၃ နှစ်အရွယ် ၅ တန်းကျောင်းသား မောင်ဒီမိုအောင်ဖြစ်ပြီး သတ်သူကတော့ တရွာတည်းသားဖြစ်သူ အသက် ၂၂ နှစ်အရွယ် ကိုဖြိုးပြည့်စုံ ဆိုသူဖြစ်တယ်လို့ဆိုပါတယ်။

ဇန်နဝါရီ ၂၃ ရက်နေ့လယ် ၂ နာရီခန့်မှာ မောင်ဒီမိုအောင်ဟာ နေအိမ်ကနေထမင်းစားပြီး ရွာထဲက သူငယ်ချင်းဖြစ်သူ နေအိမ်ထွက်သွားရာက လမ်းမှာပျောက်ဆုံးခဲ့တာဖြစ်ပြီး အဲ့ဒီနေ့ညနေ ၆ နာရီလောက်မှာ အသတ်ခံထားရတဲ့အလောင်းကို ကလေးနေအိမ်နဲ့ကိုက် ၅၀၀ အကွာ ရွာအရှေ့ဘက်တောထဲက ဝါးရုံပင်အောက်မှာ ပြန်တွေ့ခဲ့တာလို့ မိသားစုဝင်တွေနဲ့နီးစပ်သူက ပြောပါတယ်။

“ကလေးပျောက်တာကို (ဇန်နဝါရီ ၂၃ ရက် ညနေ) ၄ နာရီကျော်လောက်မှ သိတယ်။ ၅ နာရီကျော်လောက်မှာ သူ့မိဘဖုန်းထဲကို မက်ဆေ့ချ်ဝင်တယ်။ ငွေသိန်း ၁၀၀ တောင်းတယ်။ အဲ့ဒီအချိန်မှာ ရဲစခန်းကိုကလေး ပျောက်တာ သွားတိုင်နေကြချိန် ကလေးတွေ့တယ်တဲ့။ တွေတဲ့အချိန်မှာ ကလေးကသေနေပြီ။ သိန်း ၁၀၀ တောင်းပေမယ့်လောလောဆယ် ၁၀ သိန်းလွှဲရမယ်ဆိုပြီးစာပဲ ပို့လာနေတာ။”လို့ မိသားစုဝင်တွေနဲ့ နီးစပ်သူတဦးကပြောပါတယ်။

အလောင်းကိုတွေ့ချိန်မှာ ကလေးရဲ့ညာဘက် ညှပ်ရိုး၊ နောက်ကျောတွေမှာ ဓားမြှောင်နဲ့ထိုးသွင်းဒဏ်ရာ ၃ ချက်တွေ့ရတယ်လို့ ဆိုပါတယ်။

နေအိမ်ကို အလောင်းပြန်သယ်လာပြီးနောက် လူသတ်မှုကျူးလွန်သူကို ရဲနဲ့ကျေးရွာခံတွေက လိုက်လံစုံစမ်းခဲ့ပြီး ဇန်နဝါရီ ၂၄ ရက်မနက် ၁၀ နာရီလောက်မှာတော့ ကိုဖြိုးပြည့်စုံကို သူ့နေအိမ်မှာ ဝင်ရောက်ဖမ်းဆီးခဲ့တာလို့ မိသားစုဝင်တွေနဲ့ နီးစပ်သူတဦးကပြောပါတယ်။

အလောင်းတွေ့တဲ့တောဘက်ကနေ ကိုဖြိုးပြည့်စုံပြန်ထွက်လာတာကို တွေ့သူတွေ၊ ရွာခံမိန်းကလေး တယောက်ဆီကနေ သေဆုံးသူမိဘတွေရဲ့ဖုန်းနံပါတ်ကိုတောင်းတာ၊ လွန်ခဲ့တဲ့ ၁၀ ရက်လောက်ကတည်းက သူဟာငွေဆယ်သိန်းလိုအပ်နေတဲ့အတွက် ကျေးရွာထဲကရင်းနှီးသူတွေဆီက လိုက်လံအကူညီတောင်းတာ စတဲ့အချက်တွေကိုသိရတာကြောင့် ကိုဖြိုးပြည်စုံနဲ့သက်ဆိုင်မှုရှိမယ်ယူဆပြီး သွားရောက်ဖမ်းဆီးခဲ့ကြတာဖြစ်ပြီး ကလေးကိုသတ်ခဲ့ကြောင်းလည်း သူကိုယ်တိုင်ဝန်ခံခဲ့တယ်လို့ သိရပါတယ်။

“သူရဲ့ထွက်ဆိုချက်အရ သူက ဓားနဲ့လည်ပင်းနားထောက်ပြီးနင့်မိဘဆီက ငွေတောင်းပေးဆိုပြီး စလိုက်တဲ့အချိန်တဲ့ ကလေးကအော်ပြီးထလိုက်တော့ သွားစူးတာ။ အဲ့တော့မထူးတော့ဘူးဆိုပြီး နောက်ကျောကနေ နှစ်ချက်ထပ်ထိုးလိုက်တယ်လို့တော့ပြောတယ်။ ဓားမြှောင်နဲ့ထိုးတာလို့ ပြောတယ်။”လို့ ကိုဖြိုးပြည့်စုံရဲ့ထွက်ဆိုချက်ကို ကိုးကားပြီး အထက်ပါမိသားစုဝင်နဲ့နီးစပ်သူက ဆက်ပြောပါတယ်။

ကလေးငယ်ရဲ့ နာရေးကိုတော့ ဇန်နဝါရီ ၂၅ ရက်မှာပဲပြုလုပ်ခဲ့ပြီး လက်ရှိမှာတော့ ဖြိုးပြည့်စုံကို ဆပ်သွားနယ်မြေရဲစခန်းမှာ ဖမ်းဆီးထားတယ်လို့ ဆိုပါတယ်။

ဇန်နဝါရီ ၁၇ ရက်ကလည်း တောင်တွင်းကြီးမြို့နယ်၊ ဆပ်သွားကျေးရွာမှာ တရွာတည်းနေ အမျိုးသားက အသက် ၅ နှစ် ၈ လအရွယ်ကလေးငယ်ကို တောထဲခေါ်ပြီး လည်ပင်းညှစ်သတ်ခဲ့ပေမယ့် ကလေးငယ်က အသက်မသေဘဲ ပြန်လွှတ်လာကာ လူသတ်မှုကျူးလွန်သူကိုတော့ ဖမ်းဆီးရမိခဲ့တယ်လို့ သိရပါတယ်။

စာတည်း – လင်း

မကွေး၊ ဇန်နဝါရီ ၁၉၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ ဆတ်သွားကျေးရွာက အသက် ၅ နှစ်အရွယ်ကလေးငယ် ၁ ဦးကို တရွာတည်းနေအမျိုးသားက တောထဲခေါ်ပြီးသတ်ဖို့ကြိုးစားခဲ့ပေမယ့် မသေဘဲပြန်လွတ်လာခဲ့တယ်လို့ ကလေးငယ်ရဲ့မိသားစုနဲ့နီးစပ်သူဆီက သိရပါတယ်။

ဇန်နဝါရီ ၁၇ ရက်ညနေ ၃ နာရီကျော်မှာ ဆတ်သွားကျေးရွာ အမက စာသင်ကျောင်းကဆင်းလာတဲ့ အသက် ၅ နှစ် ၈ လအရွယ် မောင်စွမ်းပြည့်အောင် ကို အသက် ၃၀ အရွယ် ကိုရဲမင်းထက် ဆိုသူက သူ့နဲ့အတူလိုက်ဖို့ပြောပြီး ရွာနဲ့ ၂ မိုင်အကွာကတောထဲကို ဆိုင်ကယ်နဲ့ခေါ်သွားခဲ့တယ်လို့ ဆိုပါတယ်။

တောထဲရောက်တဲ့အချိန် ကလေးငယ်ရဲ့လည်ပင်းကိုအင်္ကျီနဲ့ပတ်ညှစ်ပြီးနောက် လည်ပင်းနဲ့မျက်နှာတွေကို ဆေးလိပ်မီးနဲ့ထိုးခဲ့ကြောင်း ကလေးငယ်ရဲ့ပြန်ပြောပြချက်အရသိရတယ်လို့ မိသားစုနဲ့ နီးစပ်သူကပြောပါတယ်။

“ကလေးကို တောထဲလည်းရောက်ကော အင်္ကျီအဖြူလက်ရှည်နဲ့ လည်ပင်းကိုအသားကုန် စည်းတာ။ နှစ်ထပ်သုံးထပ်စ ည်းတာ။ ပြီးတော့ သူစောင့်ကြည့်တယ်။ သားက သေချင်ယောင်ဆောင်လိုက်တယ် တဲ့။ အသက်မရှုတဲ့ပုံစံ လုပ်လိုက်တော့ သေပြီဆိုပြီးတော့ သူ့ဆေးလိပ်မီးနဲ့တို့ကြည့်သေးတယ်တဲ့။ လည်ပင်းတချက် ပါးတချက် တို့ကြည့်သေးတယ်။ အဲဲ့ဒီမှာသေပြီဆိုပြီး ခြုံပုတ်ထဲထားခဲ့တာတဲ့။”လို့ ကလေးငယ်ရဲ့ပြန်ပြောပြချက်ကို မိသားစုနဲ့နီးစပ်သူက ဆက်ပြောပါတယ်။

ကလေးငယ်ပျောက်ဆုံးသွားတာကြောင့် မိသားစုဝင်တွေနဲ့အတူ ရဲနဲ့ကျေးရွာအုပ်ချုပ်ရေးအဖွဲ့တွေက တညလုံးနီးစပ်ရာကို ရှာဖွေခဲ့ကြပေမယ့်မတွေ့ခဲ့ရဘူးလို့ ဆိုပါတယ်။

ဇန်နဝါရီ ၁၈ ရက်မနက် ၇ နာရီလောက်ကျမှ ရွာခံတောင်သူတဦး တောထဲကိုလှည်းနဲ့ထင်းခုတ်သွားချိန်မှာ ငိုနေတဲ့ မောင်စွမ်းပြည့်အောင်ကိုတွေ့ရှိပြီး နေအိမ်ကိုပြန်ပို့ဆောင်ပေးခဲ့တာလို့ မိသားစုဝင်နဲ့ နီးစပ်သူကပြောပါတယ်။

ကလေးကိုပြန်တွေ့ချိန်မှာ မျက်နှာမှာဖောယောင်နေပြီး လည်ပင်းနဲ့မျက်လုံးတွေမှာလည်း သွေးခြေဥတွေ ဖြစ်နေတာကိုတွေ့ရတယ်လို့ သူကဆက်ပြောပါတယ်။

“သူ့အမေဆို ဒါကကျမသားမဟုတ်ဘူးဆိုတာထိတောင် ဖြစ်တယ်။ ကလေးက ကျောင်းသွားချိန်က အဝတ်ကအသစ်။ သတ်ဖို့ခံထားရတော့ ဖုတ်တွေကလူး၊ တကိုယ်လုံးပေကျံနေတာ။ လည်ပင်းကိုညှစ်ထားတော့ သွေးတွေက မျက်နှာ၊ လည်ပင်း၊ မျက်လုံးဆိုလည်း သွေးခြေဥဖြစ်နေတော့ စုတ်ပြတ်သတ် ဖောယောင်နေတော့မမှတ်မိတာ။”လို့ သူကဆက်ပြောပါတယ်။

အိမ်ကိုပြန်ရောက်ရောက်ချင်း တောင်တွင်းကြီးဆေးရုံကို ကနဦးပို့ဆောင်ခဲ့ပြီး အဲ့ဒီကနေတဆင့် စိုးရိမ်ရတဲ့အခြေအနေရှိတာကြောင့် နေပြည်တော် ကုတင် ၁၀၀၀ ဆေးရုံကိုပြောင်းရွှေ့ ကုသနေရတယ်လို့ ဆိုပါတယ်။

ကလေးငယ်မှာ လည်ပင်းညှစ်ခံထားရတဲ့ဒဏ်ကြောင့် လေပြွန်ရောင်၊ မျက်လုံးအစ် ညိုမဲ၊ မျက်နှာနဲ့ လည်ပင်းတွေမှာလည်း မီးလောင်ဒဏ်ရာတွေရှိပြီး ဆက်လက်စောင့်ကြည့်ကုသရမယ့် အခြေအနေမှာ ရှိနေသေးတယ်လို့ သိရပါတယ်။

ကလေးငယ်တက်နေတဲ့ကျောင်းဟာ နေအိမ်နဲ့မဝေးတာကြောင့် ပုံမှန်အချိန်မှာဆို မိသားစုဝင်တဦး (သို့မဟုတ်) ပွဲရုံအလုပ်သမားတဦးဦးက ကျောင်းဆင်းချိန်သွာကြိုလေ့ရှိပေမယ့် ဖြစ်စဥ်ဖြစ်တဲ့နေ့မှာတော့ ကုန်ကားတွေရောက်နေတာကြောင့် သွားကြိုဖို့ မသိမထားမိဘဲဖြစ်ခဲ့ရတာလို့ မိသားစုဝင်နဲ့ နီးစပ်သူကပြောပါတယ်။

ကိုရဲမင်းထက်ဟာလည်း ကလေးငယ်ရဲ့ မိဘတွေပိုင်ဆိုင်တဲ့ပွဲရုံမှာ ၂ နှစ်နီးပါး အလုပ်လုပ်ခဲ့ဖူးပြီး ပွဲရုံမှာ အလုပ်လုပ်စဥ်ကာလမှာ အတူအလုပ်လုပ်နေသူတွေအပေါ် ကြီးနိုင်ငယ်ညှင်းလုပ်တာကြောင့် အလုပ်ရှင်တွေဘက်က မကြာခဏသတိပေးခံရဖူးပြီး လွန်ခဲ့တဲ့ ၃ လလောက်က သူသဘောနဲ့သူ အလုပ်ကနေ ထွက်သွားခဲ့သူဖြစ်တယ်လို့ ဆိုပါတယ်။

ခုလိုနှိပ်စက်ခဲ့သူဟာ ရဲမင်းထက်ဆိုတာကို ကလေးငယ်ရဲ့ပြောပြချက်အရသိရတဲ့အတွက် ဇန်နဝါရီ ၁၈ ရက်မနက်ပိုင်းမှာပဲ ဆတ်သွားရွာထဲက သူ့နေအိမ်မှာ ရဲ၊ စစ်တပ်နဲ့ ကျေးရွာအုပ်ချုပ်ရေး အဖွဲ့ဝင်တွေကဖမ်းဆီးခဲ့ပြီး လက်ရှိမှာတော့ ဆတ်သွားနယ်မြေရဲစခန်းမှာ ချုပ်နှောင်ထားတယ်လို့ သိရပါတယ်။

စာတည်း – လင်း