ရေစကြို၊ မေ ၁၊ ၂၀၂၅။

မကွေးတိုင်း၊ ရေစကြိုမြို့၊ ခလရ ၂၅၈ တပ်က ထွက်လာတဲ့ အင်အား ၁၅၀ ပါ စစ်ကောင်စီစစ်ကြောင်းကို ဧပြီ ၂၉ ရက်နေ့က တိုက်ခိုက်ရာမှာ စစ်ကောင်စီတပ်ဘက်က ၃ ဦးသေဆုံးပြီး ၁၀ ဦးဒဏ်ရာရကာ ရေစကြို ပကဖ က တပ်ခွဲမှူး ၁ ဦး ကျဆုံးခဲ့တယ်လို့ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် ဆီက သိရပါတယ်။

အဆိုပါစစ်ကောင်စီစစ်ကြောင်းဟာ စစ်ကြောင်းထိုးထွက်လာတာဖြစ်ပြီး ရေစကြိုမြို့အထွက် သင်္ချိုင်းကုန်းအရောက် မနက် ၅ နာရီခန့်မှာ ကာကွယ်ရေးတပ်ဖွဲ့တွေက စတင်တိုက်ခိုက်ခဲ့ရာကနေ အပြန်အလှန်ပစ်ခတ်မှုဖြစ်ခဲ့တာလို့ ဆိုပါတယ်။

“မီတာ ၂၀၀နဲ့ ၃၀၀ လောက်ကနေ ကျနော်တို့ အပြန်အလှန်တိုက်ပွဲဖြစ်ခဲ့တာ၊ တိုက်ခိုက်နေစဉ်မှာပဲ မြို့ပေါ်နဲ့ ခလရ ၂၅၈ တပ်ထဲကနေ လက်နက်ကြီးပစ်ကူပေးတာတွေလုပ်တယ်၊ မြို့ပေါ်ကဆိုတာက ရုံးပေါင်းစုံထဲက ပစ်ကူပေးတာ၊ တပ်ထဲကကျတော့ ခလရ ၂၅၈ ကနေ လက်နက်ကြီးနဲ့လှမ်းပစ်တာ”လို့ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် သတင်းနှင့်ပြန်ကြားရေးတာဝန်ခံက ပြောပါတယ်။

တိုက်ပွဲဖြစ်ပွားချိန်ဟာ မနက် ၅ နာရီကနေ ညနေအထိ တနေကုန်နီးပါးကြာမြင့်ခဲ့ပြီး စစ်ကောင်စီတပ်ဖွဲ့ဝင် ၃ ဦးသေဆုံးကာ ၁၀ ဦးဒဏ်ရာရခဲ့တယ်လို့ သူကဆက်ပြောပါတယ်။

ဒါ့အပြင်ရေစကြို ပကဖ ရဲ့ တပ်ခွဲမှူး ၁ ဦးလည်းကျဆုံးခဲ့ရပြီး ၁ ဦးဒဏ်ရာရခဲ့ကာ ဧပြီ ၃၀ မှာဈာပနအခမ်းအနားကို ပြုလုပ်ခဲ့တယ်လို့ဆိုပါတယ်။

တိုက်ပွဲတွေအတွင်း အထိနာခဲ့တဲ့ စစ်ကောင်စီတပ်ဟာ ထန်းဆယ်ပင်ကျေးရွာက နေအိမ် ၁၀ လုံးကို မီးရှို့သွားပြီး ညနေ ၅ နာရီခန့်မှာတော့ ခလရ ၂၅၈ တပ်ထဲ ကို ပြန်လည်ဝင်ရောက်သွားတယ်လို့ လည်းဆိုပါတယ်။

အဆိုပါတိုက်ခိုက်မှုကို ပြည်သူ့ကာကွယ်ရေးတပ်ဖွဲ့-ရေစကြိုမြို့နယ်နဲ့ ပခုက္ကူခရိုင် အမှတ် ၉ တပ်ရင်း တို့က ပူးပေါင်းလုပ်ဆောင်ခဲ့တာဖြစ်ပါတယ်။

တည်းဖြတ် – HP⁩

အောင်စိုး၊ ဟယ်သာ

မန္တလေး၊ ဧပြီ ၃၀၊ ၂၀၂၅။

မန္တလေးတိုင်း၊ တောင်သာနဲ့ ကျောက်ပန်းတောင်းမြို့နယ်မှာဖြစ်ခဲ့တဲ့ ၂ ရက်တာတိုက်ပွဲအတွင်း စစ်ကောင်စီဘက်က တပ်ဖွဲ့ဝင် ၅ ဦးသေဆုံးပြီး ၂ ဦးအရှင်ဖမ်းမိကာ လက်နက်ခဲယမ်းတွေသိမ်းဆည်းနိုင်ခဲ့တယ်လို့ Popa Production and Guerilla Force (PGF) နဲ့ Bagan Ogre Force တပ်ဖွဲ့ဆီက သိရပါတယ်။

ဧပြီ ၂၇ ရက်မနက် ၆ နာရီကျော်မှာ ငါ့သရောက်မြို့နယ်ခွဲရဲစခန်းကနေ အင်အား ၁၂၀ ဝန်းကျင်နဲ့ ထွက်လာတဲ့စစ်ကောင်စီတပ်သားတွေကို တောင်သာမြို့နယ်၊ တောင်ခမောက်ကျေးရွာအနီးမှာ ၁ ကြိမ်၊ ဧပြီ ၂၈ ရက်မနက် ၉ နာရီကျော်က ကျောက်ပန်းတောင်းမြို့နယ်၊ ထောက်ရှာကျေးရွာအနီးမှာ ၁ ကြိမ် ကြားဖြတ်တိုက်ခိုက်ခဲ့တယ်လို့ ဆိုပါတယ်။

“စကစ ၁ လောင်းကတော့ တောင်ခမောက်တိုက်ပွဲမှာဗျ။ ကျန်တဲ့ ၄ လောင်းက ထောက်ရှာတိုက်ပွဲမှာတွေ့တာ။ သိမ်းဆည်ရမိတဲ့ လက်နက်တွေ၊ သုံ့ပန်းတွေကလည်း ထောက်ရှာတိုက်ပွဲမှာပါပဲဗျ။” လို့ Popa Production and Guerilla Force(PGF)မှ ဒုတာဝန်ခံ ဗျတ္တကပြောပါတယ်။

အရှင်ဖမ်းမိခဲ့တဲ့ ငါ့သရောက်မြို့နယ်၊ နယ်မြေရဲစခန်းမှ ရဲတပ်သား ၁ ဦးနဲ့ ညောင်ဦးမြို့ပေါ်မှ ပြည်သူ့စစ် ၁ ဦးတို့ကို စစ်သုံ့ပန်းဥပဒေနဲ့အညီ စစ်ဆေးနေတယ်လို့ ဆိုပါတယ်။

ဒါ့အပြင် အဲ့ဒီစစ်ကြောင်းကနေ M2 ၂ လက်၊ Equipment ၁ ခု၊ လက်ပစ်ဗုံး ၃ လုံး၊ စကားပြောစက် ၄ လုံး၊ 7.62 ကျည် ၈၀ နဲ့ အခြားဆက်စပ်ပစ္စည်းတွေ သိမ်းဆည်းရရှိခဲ့တယ်လို့ ဒုတာဝန်ခံဗျတ္တက ပြောပါတယ်။

ထောက်ရှာကျေးရွာတိုက်ပွဲအတွင်း ဒဏ်ရာရတဲ့ စစ်ကောင်စီတပ်ဘက်က စစ်ကြောင်းမှူးကို ဝဲလှောင်ရွာရဲစခန်းကိုပို့ဆောင်ခဲ့ပြီးနောက် စစ်ကြောင်းဖရိုဖရဲဖြစ်နေချိန် တိုက်ခိုက်ရေးလေယာဉ် ၁ စီးနဲ့ ၁၀ မိနစ်ကြာပစ်ကူပေးလာခဲ့တဲ့အတွက် တော်လှန်းရေးပူးပေါင်းအဖွဲ့တွေ ပြန်လည်ဆုတ်ခွာလာခဲ့ရတယ်လို့ ဆိုပါတယ်။

“ကျနော်တို့အနေနဲ့ မျက်မြင်အလောင်းကတော့ ၅ လောင်းဗျ။ ဒါပေမဲ့ ကျနော်တို့တပ်တွင်းဖရဲသီး သတင်းပေးချက်အရတော့ ၄၃ ဦးခန့် ထိခိုက်သေဆုံးရှိနိုင်တယ်လို့ သိရတယ်ဗျ။ အတိအကျတော့ ကျနော်တို့လည်း မသိရဗျ။ လောလောဆယ် ကျနော်တို့အနေနဲ့ မျက်မြင်တွေ့ရတာတော့ အလောင်း ၅ လောင်းရယ်။ တိုက်ပွဲဖြစ်တဲ့နေရာမှာ စကစတွေမီးရှို့သွားတဲ့ အလောင်းနေရာတွေလည်း တွေ့ရှိရတယ်။”လို့ Bagan Ogre Force တာဝန်ခံ ကိုဇီးကွက်က ပြောပါတယ်။

ဒါ့အပြင် ခုတွေ့ရှိထားတဲ့ စစ်ကောင်စီတပ်ဖွဲ့ဝင်အလောင်း ၅ လောင်းထဲမှာ တပ်ကြပ် ၁ ဦး ပါဝင်တယ်လို့ 21 Baganမှ သတင်းနဲ့ ပြန်ကြားရေး တာဝန်ခံယက္ခက ပြောပါတယ်။

အဲ့ဒီစစ်ကောင်စီစစ်ကြောင်းဟာ ဧပြီ ၂၇ ရက်မှာတိုက်ခိုက်ခံရပြီးနောက် တောင်ခမောက်ရွာကို မီးရှို့ခဲ့သေးကာ ဒေသခံ ၂ ဦးကိုဖမ်းဆီးခဲ့ပေမယ့် ညနေဘက်မှာပြန်လွှတ်ခဲ့တယ်လို့ 21 Baganမှ သတင်းနဲ့ ပြန်ကြားရေး တာဝန်ခံယက္ခက ပြောပါတယ်။

တိုက်ပွဲအတွင်း တော်လှန်ရေးပူးပေါင်းအဖွဲ့ ၁၂ ဖွဲ့ထဲက Popa Production and Guerilla Force(PGF)မှ တပ်ဖွဲ့ဝင် ၁ ဦးထိခိုက်ဒဏ်ရာရရှိခဲ့ပေမယ့် စိုးရိမ်စရာမရှိဘူးလို့သိရပါတယ်။

ဒီတိုက်ခိုက်မှုကို ပုဂံပြည်ဘီလူးတပ်၊ Popa Production and Guerilla Force(PGF)၊ ညောင်ဦးခရိုင် တပ်ရင်း ၅၊ မြင်းခြံခရိုင်တပ်ရင်း ၃၊ ရန်ကြီးအောင် PDF (ညောင်ဦးမြို့နယ်ပကဖ)၊ 21 Bagan PDF၊ မိုးမခပြောက်ကျားတပ်၊ ဒေါင်းရင်သွေးတပ်ဖွဲ့၊ ဂဠုန်ပြောက်ကျားတပ်၊ မန်းဘခိုင်ပြည်သူ့ ကာကွယ်ရေးတပ်ဖွဲ့ ၊ Scorpions People Defend Force၊ ညောင်ဦးခရိုင် ပကဖတို့က ပူးပေါင်း လုပ်ဆောင်ခဲ့တာဖြစ်ပါတယ်။

စာတည်း – လင်း၊ တည်းဖြတ် – M

ရေစကြို ၊ ဧပြီ ၂၉ ၊ ၂၀၂၅။

မကွေးတိုင်း၊ ရေစကြိုမြို့နယ်၊ ဗလဘကျေးရွာကို စီးနင်းဝင်ရောက်လာတဲ့ စစ်ကောင်စီစစ်ကြောင်းကို ပိတ်ဆို့ပစ်ခတ်ခံရလို့ သေဆုံးမှုများပြားတယ်လို့ PDF တပ်ဖွဲ့ဝင်တွေက ပြောပါတယ်။

ဗလဘကျေးရွာကို ထိုးဖောက်စီးနင်းလာတဲ့ စစ်အင်အား ၂၅၀ ကျော်ပါ စစ်ကြောင်းကို နယ်မြေခံတပ်ဖွဲ့တွေက အဆိုပါကျေးရွာအနီး စောင့်ကြိုပစ်ခတ်ခဲ့ပြီးနောက် ဧပြီ ၂၀ နဲ့ ၂၁ ရက် ၂ ရက်ကြာတိုက်ပွဲဖြစ်ပွားခဲ့တာလို့ ဆိုပါတယ်။

“ အလောင်းတွေကို ပခုက္ကူကိုသုံးဘီးနဲ့ခိုးသယ်တယ်လို့ သိရတယ်။ သူတို့အထိနာတဲ့အတွက် ဗလဘကျေးရွာကို ရွာလုံးကျွတ်နီးပါးမီးရှို့သွားတယ်။ ဧပြီ ၂၂ ရက်မှာ ပခုက္ကူမြို့ကို ပြန်ထွက်သွားတယ်” လို့ ရေစကြိုတပ်ပေါင်းစုသတင်းနဲ့ ပြန်ကြားရေးတာဝန်ခံက ပြောပါတယ်။

အဆိုပါ ၂ ရက်ကြာတိုက်ပွဲအတွင်း စစ်ကောင်စီတပ်ဖွဲ့ဝင် ၂၀ ဦးထက်မနည်းသေဆုံး ၃၀ ကျော်ဒဏ်ရာရရှိခဲ့ပြီး ရေစကြိုတပ်ပေါင်းစုတပ်ဖွဲ့ဘက်ကလည်း PDF တပ်ဖွဲ့ဝင် ၁ ဦး သေဆုံးကာ ၃ ဦးဒဏ်ရာရခဲ့တယ်လို့ ဆိုပါတယ်။

တိုက်ပွဲတွေအတွင်း အထိနာခဲ့တဲ့ စစ်ကောင်စီတပ်က တိုက်ပွဲဖြစ်ပွားစဥ်နဲ့ ဖြစ်ပွားပြီးချိန်တွေမှာလည်း လေကြောင်းပစ်ကူပေးတိုက်ခိုက်ခဲ့ရပြီး တပ်မ ၁၀၁ လက်အောက်ခံပူးပေါင်းတပ်တွေဖြစ်တဲ့အဆိုပါစစ်ကြောင်းဟာ လက်ရှိမှာ ပခုက္ကူတပ်မ ၁၀၁ ကို ပြန်လည်ဝင်ရောက်သွားပြီလို့ သိရပါတယ်။

တိုက်ခိုက်မှုကို ရေစကြိုတပ်ပေါင်းစု၊ ပခုက္ကူခရိုင် တပ်ရင်း ၂၊ ၃၊ ၁၀၊ ရေစကြိုမြို့နယ်ပြည်သူ့လုံခြုံရေးအဖွဲ့ (ပ.လ.ဖ)၊ ပခုက္ကူမြို့နယ်ပြည်သူ့ကာကွယ်ရေးအဖွဲ့ တပ်ရင်း ၁ (ပ.က. ဖ)၊ ရေစကြိုမြို့နယ်ပြည်သူ့ကာကွယ်ရေးအဖွဲ့ (ပ.က.ဖ)၊ ကမ္မတပ်ပေါင်းစု၊ နယ်စည်းမခြား ပြည်သူ့ကာကွယ်ရေးတပ်ဖွဲ့၊ အမေ့လက်ရုံးပျောက်ကျားတပ်၊ ဒေါင်းညီနောင် နဲ့ Wolf Brothers Burma Revolution Ranger တို့က ပူးပေါင်းလုပ်ဆောင်ခဲ့တာဖြစ်ပါတယ်။

စာတည်း – ဟိန်းစံ၊ တည်းဖြတ် – HP

မင်းလှ၊ ဧပြီ ၂၉၊ ၂၀၂၅။

ပဲခူးတိုင်းအနောက်ခြမ်း၊ မင်းလှမြို့နယ်မှာ စစ်‌ကောင်စီစစ်ကြောင်းနဲ့ PDF ပူးပေါင်းတပ်တွေ တိုက်ပွဲဖြစ်ပြီးစစ်ကောင်စီတပ်သား ၁၀ ဦးသေကာ ၁ ဦးအရှင်ဖမ်းမိပြီး လက်နက်ခဲယမ်းတွေ သိမ်းဆည်းနိုင်ခဲ့တယ်လို့ တိုက်ခိုက်ရာမှာပါဝင်တဲ့ ပြည်သူ့ကာကွယ်ရေးတပ်ဖွဲ့တွေက မနေ့က သတင်းထုတ်ပြန်ပါတယ်။

ဧပြီ ၂၇ ရက် မနက်အစောပိုင်းမှာ မင်းလှမြို့နယ် သရော်ကုန်ရွာကထွက်လာတဲ့ စစ်ကောင်စီ အင်အား ၇၀ ဦးပါခြေလျင်စစ်ကြောင်းဟာ မနက် ၉ နာရီလောက်မှာ ငမိုးရိပ်ရွာအတွင်းကို ရောက်နေချိန် PDF ပူး‌ပေါင်းတပ်တွေက တိုက်ခိုက်တာကို ခံခဲ့ရတာပါ။

လက်နက်ကြီးငယ်တွေနဲ့ပစ်ခတ်ရင်း နှစ်ဘက်တိုက်ပွဲပြင်းထန်နေချိန် မနက် ၁၁ နာရီလောက်မှာ စစ်ကောင်စီတပ်က Mi 35 ရဟတ်ယာဉ် ၁ စီး ဂျက်ဖိုက်တာ ၂ စီးနဲ့ လေကြောင်းပစ်ကူပေးခဲ့ပေမယ့် စစ်ကောင်စီဘက်ကသေဆုံးမှုများပြားခဲ့တယ်လို့ ၃၈၀၂ တပ်ခွဲ ၂ တပ်ခွဲမှူး ဗိုလ်တိမ်တိုက် ကပြောပါတယ်။

တိုက်ပွဲကြာချိန် ၂ နာရီခန့်အတွင်းမှာ စစ်ကောင်စီဘက်က ၁၀ ဦး သေပြီး ၁ ဦးကို အရှင်ဖမ်းမိကာ လက်နက်ငယ် ၁ ဒါဇင်နီးပါးနဲ့ စစ်အသုံးဆောင်ပစ္စည်းတချို့ သိမ်းဆည်းရမိခဲ့ပါတယ်။

အဲဒီတိုက်ခိုက်မှုမှာ သာယာဝတီခရိုင် တပ်ရင်း ၃၈၀၂ မှ တပ်ခွဲ ၁ Dragon Brothers (GBK-PDF)၊ တပ်ခွဲ ၂၊ တပ်ခွဲ ၃၊ တပ်ခွဲ ၄ မြေအောက်ပြောက်ကျားတပ်ဖွဲ့-အုတ်ဖို၊ တပ်ခွဲ ၅၊ တပ်ခွဲ ၆ Black Dragon (GBK-PDF) နဲ့ သာယာဝတီခရိုင် တပ်ရင်း ၃၈၀၃၊ သာယာဝတီ ခရိုင် တပ်ရင်း ၃၈၀၁ မှ တပ်ခွဲ ၆ AyeYarNyiNaung၊ ပဲခူးခရိုင် တပ်ရင်း ၃၇၀၁ တပ်ခွဲ ၅ တို့ ပူး‌ပေါင်းတိုက်ခိုက်ခဲ့တာဖြစ်ပြီး PDFရဲဘော် ၁ ဦးလည်း မစိုးရိမ်ရတဲ့ဒဏ်ရာရှိခဲ့ပါတယ်။

ပြီးခဲ့တဲ့ ဧပြီ ၂၆ ကလည်း မင်းလှမြို့နယ် ဆားချောင်းရွာထိပ် ကြိုးတံတားပေါ်ကို တက်လာတဲ့ စစ်ကောင်စီတပ်သားတွေကို တိုက်ခိုက်ခဲ့သလို ဧပြီ ၂၂ ရက်မနက်က မင်းလှမြို့နယ် ရန်ကုန်-ပြည်လမ်းရှိ အညာတန်းကြီးရွာက စားသောက်ဆိုင်ကိုရောက်နေတဲ့ စစ်အုပ်စုကို တိုက်ခိုက်ခဲ့လို့ အဲဒီနေ့မွန်းလွဲပိုင်းမှာပဲ စစ်ကောင်စီတပ်က မင်းလှမြို့နယ် ပဲခူးရိုးမအစပ်က ကျေးရွာတွေကို ရဟတ်ယာဉ်နဲ့ ပစ်ခတ်တိုက်ခိုက်ခဲ့ပါသေးတယ်။

သတင်း – မောင်ဆွေအင်း၊ တည်းဖြတ် – HP

မုံရွာ၊ ဧပြီ ၂၈၊ ၂၀၂၅။

စစ်ကိုင်းတိုင်း၊ မုံရွာမြို့၊ နမခ ကထွက်လာတဲ့ အင်အား ၂၀ ပါစစ်ကောင်စီစစ်ကြောင်းကို ဧပြီ ၂၄ ရက်နေ့မှာ တိုက်ခိုက်ခဲ့တယ်လို့ မုံရွာမြို့နယ် ပြည်သူ့ကာကွယ်ရေးအဖွဲ့ ဆီက သိရပါတယ်။

အဆိုပါစစ်ကြောင်းဟာ ဧပြီ ၂၄ ရက်မနက် ၉ နာရီကျော်မှာ ခိုးသန်းရွာကို ရိက္ခာလာစုတဲ့အချိန် ခိုးသန်းရွာအဝင်မှာ ကြားဖြတ်တိုက်ခိုက်ခဲ့တာလို့ ဆိုပါတယ်။

တိုက်ခိုက်မှုကြာချိန် မိနစ် ၃၀ ခန့်ဖြစ်ပွားခဲ့ပြီး စစ်ကောင်စီတပ်ဘက်က ၃ ဦးသေကာ ၇ ဦးဒဏ်ရာရသွားတယ်လို့ မုံရွာမြို့နယ် ပြည်သူ့ကာကွယ်ရေးအဖွဲ့ ရဲ့တာဝန်ခံက ပြောပါတယ်။
ဒါ့အပြင် မုံရွာအခြေစိုက် အမတ ၅၀၈ အမြောက်တပ်ကနေ လက်နက်ကြီးပစ်ကူပေးတာတွေ လုပ်ပေမဲ့ တော်လှန်ရေးတပ်ဖွဲ့ဝင်တွေ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့လည်းဆိုပါတယ်။

အဆိုပါတိုက်ခိုက်မှုကို မုံရွာမြို့နယ် ပြည်သူ့ကာကွယ်ရေးအဖွဲ့၊ တိုက်နယ် ၅ ပကဖ၊ Tribal Force၊ Black Flacon၊ God Of Monywa၊Golden Eagle၊ Sun King Envoy၊ God of Snake ၊ယက္ခ ၊ မုံရွာခရိုင်တပ်ရင်း ၁ တို့က ပူးပေါင်းလုပ်ဆောင်ခဲ့တာလို့ သိရပါတယ်။

တည်းဖြတ် – HP