မြေလတ်အသံ၊ ဇူလိုင် ၃၀၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ဆယ်ရွာကနေ ဖမ်းဆီးထားတဲ့ ဒေသခံအရပ်သား ၃၀ ဦးကို ခေါ်ဆောင်ကာ တပ်ပြန်ဆုတ်လာတဲ့စစ်ကြောင်းကို ကြားဖြတ်တိုက်ခိုက်ခဲ့တယ်လို့ သာယာဝတီခရိုင်တပ်ရင်း ၃၈ဝ၂ တပ်ခွဲ ၅ က ဇူလိုင် ၂၉ ရက်မှာထုတ်ပြန်ပါတယ်။

အရပ်သားတွေကို ဖမ်းဆီးလာတဲ့ စစ်ကောင်စီတပ်ဖွဲ့အင်အား ၇၀ ခန့်ပါစစ်ကြောင်းဟာ ဆယ်ရွာကနေ ဘန့်ဘွေးကုန်းရွာစခန်းကို တပ်ပြန်ဆုတ်လာချိန် မြို့ချောင်း-စိန်ကန့် လန့်ရိုးမဖြတ်လမ်း ဒေသအခေါ် ၄၈ ပေါက် ဖုတ်တက်ကြီးအနီးမှာ ဇူလိုင် ၂၄ ရက် နေ့လယ် ၃ နာရီကျော်က မိနစ် ၂၀ ခန့်ကြာ တိုက်ခိုက်ခဲ့တာလို့ ဆိုပါတယ်။

” ဘန့်ဘွေးကုန်းက **စခန်းကို ** ၁၅လောင်းနဲ့ ဒဏ်ရာရ ၃ ကောင် သယ်လာတယ်လို့ ဒေသခံနဲ့တပ်ဖရဲသီးဆီကသိရတာပါ။ ပြည်သူ ၂၀ လောက်ကိုလည်းကြိုးချည်ဖမ်းလာတယ်ပြောပါတယ်” လို့ သာယာဝတီခရိုင်တပ်ရင်း ၃၈ဝ၂ တပ်ခွဲ ၅ တာဝန်ရှိသူက ပြောပါတယ်။

တိုက်ပွဲအတွင်း စစ်ကောင်စီတပ်သေဆုံးမှုတွေကို မြေလတ်အသံက သီးခြားအတည်မပြုနိုင်သေးဘဲ စစ်ကောင်စီတပ်ကဖမ်းဆီးလာတဲ့ ဆယ်ရွာခံအမျိုးသား ၃၀ ဦးအနက် ၇ ဦးမှာ တိုက်ပွဲတွေအကြား ထွက်ပြေးလွတ်မြောက်သွားခဲ့ပြီး ကျန် ၂၃ ဦးမှာ စစ်ကြောင်းနဲ့အတူ ဘန့်ဘွေးကုန်းစခန်းကို ခေါ်ဆောင်ခံခဲ့ရတယ်လို့ သိရပါတယ်။

အုတ်ဖိုမြို့နယ်၊ ဆယ်ကျေးရွာကို အထက်ပါစစ်ကြောင်းက ဇူလိုင် ၂၂ ရက်မှာဝင်ရောက်စီးနင်းပြီး ကလေးငယ်တွေအပါ အမျိုးသမီး၊ အမျိုးသား ၄၀ ဦးကိုဖမ်းဆီးခဲ့ပြီးနောက် ဇူလိုင် ၂၃ ရက်မှာ ကလေးငယ်တွေနဲ့ အမျိုးသမီးတွေကိုပြန်လွတ်ပေးကာ ဇူလိုင် ၂၄ ရက်မနက်ပိုင်းမှာ ဘန့်ဘွေးကုန်းရွာစခန်းကို တပ်ပြန်ဆုတ်လာခဲ့တာလို့ အထက်ပါတာဝန်ရှိသူက ပြောပါတယ်။

ဆယ်ကျေးရွာနဲ့ စစ်ကောင်စီတပ်စခန်းရှိတဲ့ ဘန့်ဘွေးကုန်းကျေးရွာဟာ ၁၂မိုင်ခန့်ကွာဝေးပြီး ဘန့်ဘွေးကုန်းရွာစခန်းကို ဖမ်းဆီးခေါ်ဆောင်ခံရတဲ့ ဆယ်ရွာခံ အမျိုးသား ၂၃ ဦးမှာ ဇူလိုင် ၂၉ ရက် ယမန်နေ့အထိ ပြန်လွတ်မြောက်တာမရှိသေးဘူးလို့ သိရပါတယ်။

စာတည်း – ဟိန်းစံ

မြတ်၊ ခေတ်သဒ္ဒါ

တိုက်ခိုက်တဲ့နေရာကို လေယာဥ်နဲ့ဗုံးလာကြဲလို့ ကသာဒေသခံ ၁ ဦး သေဆုံး

ကသာ၊ ဇူလိုင် ၂၇၊ ၂၀၂၅။

ဧရာဝတီမြစ်ကြောင်းအတိုင်း ဆက်လက်ဆန်တက်လာတဲ့ စစ်သင်္ဘောအုပ်စုကို စစ်ကိုင်းတိုင်း၊ ကသာမြို့နယ်အတွင်းမှာ တိုက်ခိုက်ခဲ့တယ်လို့ ဒေသတွင်းတော်လှန်ရေးတပ်ဖွဲ့ဝင်တွေဆီက သိရပါတယ်။

ဇူလိုင် ၂၆ ရက် ယမန်နေ့ မနက်ပိုင်းက ကသာမြို့ဆိပ်ကမ်းကနေ ထွက်ခွာသွားတဲ့ စစ်သင်္ဘော ၁၂ စီးကို မိုးတားလေးကျေးရွာအနီးအရောက်မှာ တိုက်ခိုက်ခဲ့တာလို့ ဆိုပါတယ်။

” ၁၂ စီးဆန်တက်လာတဲ့အချိန် စောင့်ကြိုတိုက်ခိုက်ခဲ့ကြတာ။ ၁ စီးကတော့ မီးခိုးတွေအူထပြီး ထိခိုက်ပျက်စီးသွားတယ်။ စစ်** ထိခိုက် အသေအပျောက်ကိုတော့ ကျနော့်အနေနဲ့ အတည်မပြုနိုင်သေးဘူး။ သင်္ဘောပေါ်ကနေလည်း လက်နက်ကြီးတွေနဲ့ ဆက်တိုက်ကို ပစ်ခတ်ခဲ့တာ”လို့ တိုက်ခိုက်မှုမှာ ပါဝင်ခဲ့တဲ့ တော်လှန်ရေးတပ်ဖွဲ့ဝင်တဦးက မြေ လတ်အသံကို ပြောပါတယ်။

အဲ့ဒီစစ်သင်္ဘောတွေဟာ သပိတ်ကျင်းမြို့ကို ဖြတ်သန်းစဥ်မှာလည်း တိုက်ခိုက်ခံခဲ့ရတာဖြစ်ပြီး စစ်သင်္ဘော ၅ စီးပါတဲ့ ရေယာဥ် ၁၄ စီးအုပ်စုကို သလဲချောင်းကျေးရွာအနီး တိုက်ခိုက်ခဲ့တာကြောင့် ၁ စီးနစ်မြှုပ်သွားခဲ့ပြီး ၃ စီးထိခိုက်ပျက်စီးခဲ့ကြောင်း MDY-PDF က ဇူလိုင် ၂၂ ရက် မှာ သတင်းထုတ်ပြန်ခဲ့သလို တိုက်ခိုက်ခံရမှုကြောင့် သင်္ဘောပေါ်ပါ စစ်ကောင်စီတပ်ဖွဲ့ဝင် ၁၀ ဦး ထက်မနည်း သေဆုံးခဲ့တယ်လို့ စစ်ကောင်စီတပ်နဲ့နီးစပ်တဲ့သတင်းရင်းမြစ်တွေကလည်း အတည်ပြု ပြောပါတယ်။

” လက်နက်ကြီးတွေကျလာတာလေ။ သင်္ဘောတွေ အကုန်လုံးပေါ်ကထိကြတာများတယ်။ ပါလာတဲ့အထဲ သင်္ဘောတစီးပေါ်မှာပဲဆရာဝန်ပါတော့အကျဆုံးက တအားများတယ်”လို့ သပိတ်ကျင်းမြို့ကို စစ်ရေးကွပ်ကဲနေတဲ့ အလယ်ပိုင်းတိုင်းစစ်ဌာနချုပ်နဲ့နီးစပ်သူတဦးက ပြောပါတယ်။

ထိခိုက်သေဆုံးမှုများပြားတာကြောင့် သပိတ်ကျင်းမြို့မှာ ကမ်းကပ်ရပ်နားပြီး စစ်သင်္ဘောပေါ်ပါ အရေးကြီးလူနာနဲ့ အလောင်းတွေကို သပိတ်ကျင်းအခြေစိုက် အမှတ် ၁၃ တပ်မတော်တန်းမြင့်လေ့ကျင့်ရေးကျောင်း(တကက ၁၃)ထဲကို ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌သယ်ဆောင်သွားတယ်လို့ သိရပါတယ်။

စစ်သင်္ဘောအုပ်စုတွေဟာ ဇူလိုင် ၁၇ ရက်က မန္တလေးမြို့၊ ဂေါဝိန်ဆိပ်ကမ်းကနေ စတင်ထွက်ခွာလာတာဖြစ်ပြီး သပိတ်ကျင်းမှာ တိုက်ခိုက်ခံရပြီးနောက် လက်ကျန် စစ်သင်္ဘောတွေဟာ ဇူလိုင် ၂၂ ရက်မှာ ဂေါဝန်ဆိပ်ကမ်းကနေပဲ ထပ်မံဆန်တက်လာတဲ့ စစ်သင်္ဘော ၆ စီးအုပ်စုနဲ့ သပိတ်ကျင်းအထက် ပန်းပင်ရွာအနီးမှာ ပူးပေါင်းသွားခဲ့ပြီး ကသာမြို့ကို ဆက်လက်ဆန်တက်လာတာပါ။

အဲဒီစစ်သင်္ဘောတွေပေါ် လူ၊ လက်နက်၊ ခဲယမ်းနဲ့ ဆေးဝါးရိက္ခာတွေတင်ဆောင်လာတာဖြစ်ပြီး စစ်ရေး ပြင်းထန်နေတဲ့ ကချင်ပြည်နယ်၊ ဗန်းမော်မြို့ကို အင်အားဖြည့်တင်းနိုင်ဖို့ မြစ်ကြောင်းအတိုင်း ဆန်တက် လာတာဖြစ်ကာ စစ်သင်္ဘောအုပ်စုဟာ ဒီကနေ့မနက်ပိုင်းမှာ ရွှေကူမြို့နယ်အတွင်းရောက်ရှိနေပြီလို့ သိရပါတယ်။

ကသာမြို့နယ်အတွင်း စစ်သင်္ဘောတွေတိုက်ခိုက်ခံရတဲ့နေရာကို ယမန်နေ့ နေ့လယ် ၁၁ နာရီခွဲမှာ Y 12 လေယာဥ် ၁ ကြိမ်၊ နေ့လည် ၁၂ နာရီခွဲမှာ ဂျက်ဖိုက်တာနဲ့ ၁ ကြိမ် ဗုံးအလုံးရေ ၂၀ ကျော် ကြဲချ တိုက်ခိုက်ခဲ့လို့ အရပ်သား ၁ ဦးသေဆုံးကာ ၄ ဦးဒဏ်ရာရရှိခဲ့တယ်လို့ သိရပါတယ်။

” သင်္ဘောတွေကို လေကြောင်းကနေ လုံခြုံရေးယူပေးသလိုနဲ့ ဗုံးကြဲချတာပေါ့။ မိုးတားလေးရွာနဲ့ မြေနုရွာကြားကို အရင်ကြဲတယ်။ အကြိမ်ရေ ၂၀ ကျော်ကို ကြဲချခဲ့တာ” လို့ ကသာမြို့နယ်မှာလှုပ်ရှားနေတဲ့ အထက်ပါရဲဘော်က ပြောပါတယ်။

ဗုံးကြဲတိုက်ခိုက်ခံရတာကြောင့် မြေနုကျေးရွာကအမျိုးသား ၁ ဦးသေဆုံးခဲ့ပြီး မြေနုနဲ့နလယ်အင်းကျေးရွာက ဒေသခံအမျိုးသား ၄ ဦး ဒဏ်ရာရခဲ့ကာ မိုးတားလေးကျေးရွာ ဘုရားကုန်းရှိ သာသနာ့အဆောက်အဦတွေလည်း ထိခိုက်ပျက်စီးခဲ့တယ်လို့ သိရပါတယ်။

စစ်သင်္ဘောတွေဆန်တက်တဲ့ မြစ်ကြောင်းတလျှောက် မြစ်ကမ်းနံဘေးရွာတွေကို စစ်ကောင်စီတပ်ကလေကြောင်းကနေဗုံးကြဲတိုက်ခိုက်နေပြီး ဝက်လက်မြို့နယ်အတွင်းရောက်ရှိစဥ်ကလည်း ဧရာဝတီမြစ်ကမ်းနံဘေးက ရွာတွေကို လေယာဥ်နဲ့ ဗုံးကြဲတိုက်ခိုက်လို့ ပြည်သူ ၂၁ ဦး သေဆုံးခဲ့ပါသေးတယ်။

စာတည်း – ဟိန်းစံ

အလောင်းလာကောက်တဲ့အဖွဲ့ကို ဒရုန်းနဲ့ဗုံးထပ်ချလို့ ၄ ဦးဒဏ်ရာရ

ရွှေဘို၊ ဇူလိုင် ၂၃၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ရွှေဘို-ရေဦးလမ်းပိုင်းတနေရာမှာ ဆိုင်ကယ် ၃ စီးနဲ့ မိုင်းလာထောင်တဲ့ စစ်ကောင်စီတပ်ဖွဲ့ တိုက်ခိုက်ခံရပြီး ၄ ဦးသေဆုံးတယ်လို့ ရွှေဘိုခရိုင်အမှတ် ၄ တပ်ရင်းသတင်းတာဝန်ခံထံက သိရပါတယ်။

ဇူလိုင် ၂၂ ရက်ယမန်နေ့ မနက် ၆ နာရီကျော်မှာ စစ်ကောင်စီတပ်နဲ့ရဲတပ်ဖွဲ့ပူးပေါင်းအင်အား ၆ ဦးဟာ ရွှေဘိုကနေ လိပ်ချင်းကျေးရွာဘက်ကို ဆိုင်ကယ် ၃ စီးနဲ့မောင်းနှင်လာစဥ် ကြားဖြတ်ပစ်ခတ်ခဲ့တာလို့ ဆိုပါတယ်။

” လိပ်ချင်းဘက်လာပြီး မိုင်းလာလာထောင်တာပေါ့။ ကျနော်တို့ဘက်ကနေ ကြားထဲကနေဖြတ်ပစ်တာ။ လာတာက ၃ စီးမှာ ၂ စီးက ကပ်လာတာ။ နောက်ဆုံး ၁ စီးက ခပ်လှမ်းလှမ်းကျန်နေတော့ ရှေ့က ၂ စီးကိုပဲ ပစ်လိုက်ရတယ်။ နောက်ဆုံး ၁ စီးက ခံပစ်နေတာနဲ့ဘဲ ပစ္စည်းအကုန် လုံးမရလိုက်ဘူး”လို့ ရွှေဘိုခရိုင်အမှတ် ၄ တပ်ရင်း သတင်းတာဝန်ခံက မြေလတ်အသံကို ပြောပါတယ်။

အဆိုပါပစ်ခတ်မှုအတွင်း စစ်ကောင်စီတပ်ဖွဲ့ဝင်နဲ့ရဲတပ်ဖွဲ့ဝင် ၄ ဦးသေဆုံးခဲ့ပြီး BA 63 (G3) သေနတ် ၁ လက်၊ ကျည်ဘောက် ၂ ခု၊ ကျည် ၁၆၈ တောင့်၊ လက်ပစ်ဗုံး ၁ လုံးနဲ့ ဆက်စပ်ပစ္စည်းတချို့ သိမ်းဆည်းရရှိခဲ့တယ်လို့ ဆိုပါတယ်။

ပစ်ခတ်မှုဖြစ်ပြီးနောက် ၁ နာရီကျော်အကြာမှာ စစ်ကောင်စီဘက်က သေဆုံးသူတွေရဲ့အလောင်းတွေကို လာကောက်ချိန် ဒရုန်းနဲ့ဗုံးသီးချထပ်မံတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၄ ဦး ဒဏ်ရာရရှိခဲ့တယ်လို့ သိရပါတယ်။

အဆိုပါ တိုက်ခိုက်မှုကိုတော့ ရွှေဘိုခရိုင်တပ်ရင်း ၄၊ တပ်ခွဲ ၁ နဲ့ မဟူရာရွှေဘိုသားတပ်ဖွဲ့ဝင်တွေက တိုက်ခိုက်ခဲ့တာဖြစ်ပြီး တော်လှန်ရေးတပ်ဖွဲ့တွေဘက်က ထိခိုက်မှုမရှိခဲ့ဘူးလို့ ဆိုပါတယ်။

ဇွန် ၂၈ ရက်ကလည်း ရွှေဘိုမြို့နယ်၊ ဟင်္သာကြီးကျေးရွာ ပျူစောထီးစခန်း၊ စစ်ကောင်စီစခန်းကုန်းနဲ့ ဘိုးနတ်တောင်စခန်းတွေကို တိုက်ခိုက်ခဲ့ရာမှာ စစ်ကောင်စီတပ်ဖွဲ့ဝင် ၂၄ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ

ကားကိုမီးရှို့ပြီး လက်နက်ခဲယမ်းတွေကို PDF သိမ်းဆည်း

မန္တလေး၊ ဇူလိုင် ၂၁၊ ၂၀၂၅။

မန္တလေးတိုင်း၊ နွားထိုးကြီးမြို့နယ်အပိုင် ရန်ကုန်-မန္တလေးအမြန်လမ်း မိုင်တိုင် ၃၁၈ မှာ ရဲတပ်ဖွဲ့ဝင်တွေ စီးလာတဲ့ကားကို ပစ်ခတ် တိုက်ခိုက်ရာ ရဲ ၂ ဦးသေဆုံးပြီး လက်နက်ခဲယမ်းတွေကို သိမ်းဆည်းခဲ့တယ်လို့ Natogyi People Defence Force မြင်းခြံခရိုင်အမှတ် ၄ တပ်ရင်း ဆီက သိရပါတယ်။

အဲ့ဒီရဲတပ်ဖွဲ့ဝင်တွေမောင်းနှင်လာတဲ့ကားကို ဇူလိုင် ၂၀ ရက် မနက် ၇ နာရီခွဲဝန်းကျင်မှာ အသင့်စောင့်ပြီး ပြောက်ကျားပုံစံနဲ့ပစ်ခတ်တိုက်ခိုက်ခဲ့ပြီး ကားကိုလည်းမီးရှို့ခဲ့တယ်လို့ ဆိုပါတယ်။

“ကားကတော့ စစ်သုံး ရဲသုံး ကားပဲ၊ ကားပေါ်မှာပါတာက ၂ ဦးပဲပါတာ၊ ကားပေါ်ပါတာက ရဲတွေပါ၊ ကားပေါ်ပါတဲ့ ၂ ဦးလုံးကတော့သေတယ်၊ ကျနော်တို့ ကားကိုတော့မယူခဲ့ဘူး၊ မီးရှို့ဖျက်ဆီးခဲ့တယ်၊ အလောင်း ၂ လောင်းကိုတော့ ကားနဲ့ မနီးမဝေးမှာထားခဲ့တာ”လို့ Natogyi People Defence Force မြင်းခြံခရိုင်အမှတ် ၄ တပ်ရင်း တာဝန်ခံက ပြောပါတယ်။

ဒီပစ်ခတ်မှုကို Natogyi People Defence Force မြင်းခြံခရိုင်အမှတ် ၄ တပ်ရင်းနဲ့ တပ်ရင်း ၁၀ တို့က ပူးပေါင်းလုပ်‌ဆောင်ခဲ့တာဖြစ်ပြီး တိုက်ခိုက်ချိန်အတွင်း လမ်းသွားလမ်းလာပြည်သူတွေ ထိခိုက်မှုမရှိအောင် တားဆီးထားခဲ့တယ်လို့လည်း ဆိုပါတယ်။

“ပစ်ခတ်ခဲ့တဲ့အချိန်မှာ အရမ်းရှုပ်ထွေးတာတော့ မဖြစ်ခဲ့ဘူး၊ သူတို့ကား ၁ စီးပဲ လမ်းမပေါ်မှာ ပေါ်ပေါ် ထင်ထင်ရှိတာ၊ တချို့ကားတွေက နောက်မှာပဲကျန်ခဲ့တာ၊ ပစ်ခတ်မှုဖြစ်စဉ်မှာ ပြည်သူတွေ ထိခိုက်မှာ စိုးတာကြောင့် ဟိုဘက် ဒီဘက်လမ်းတွေ ကျနော်တို့တားစီးထားတာတွေရှိတယ်၊” လို့ သူကဆက်ပြောပါတယ်။

ပစ်ခတ်ပြီးနောက် ရဲတပ်ဖွဲ့ဝင်တွေကိုင်ဆောင်လာတဲ့ BA-94 ၂ လက်၊ ကျည်ဘောက် ၅ ခု၊ 9 မမ ကျည် ၁၂၃ တောင့်၊ 7.62 ကျည် ၁၂၇ တောင့်တို့ကို သိမ်းဆည်းပြီး ပြန်လည်ဆုတ်ခွာခဲ့ကြတယ်လို့ ဆိုပါတယ်။

ပြီးခဲ့တဲ့ ဇွန် ၂၃ ရက်ကလည်း ဝက်လူးနယ်မြေရဲစခန်းကို စစ်ကူလာတဲ့စစ်ကြောင်းကို Natogyi People Defence Force မြင်းခြံခရိုင်အမှတ် ၄ တပ်ရင်း တိုက်ခိုက်ခဲ့ပါသေးတယ်။

စာတည်း – လင်း

ဒဏ်ရာရတဲ့ အလောင်းတွေကို ကား ၅ စီးနဲ့ မန္တလေးပြန်သယ်

မတ္တရာ၊ ဇူလိုင် ၂၀၊ ၂၀၂၅။

မန္တလေးတိုင်း၊ မတ္တရာမြို့နယ်နဲ့ ပုသိမ်ကြီးမြို့နယ်အစပ်က စစ်ကောင်စီအထိုင်စခန်းကို တော်လှန်ရေးတပ်တွေ ဝင်ရောက်တိုက်ခိုက်ခဲ့ပြီး စစ်တပ်က ကား ၅ စီးနဲ့ ဒဏ်ရာရတဲ့ အလောင်းတွေကို မန္တလေးမြို့အတွင်း ခေါ်ဆောင်သွားတယ်လို့ ဒေသခံတွေဆီက သိရပါတယ်။

မတ္တရာ-မန္တလေးကားလမ်းပိုင်းမှာရှိတဲ့ စစ်ကောင်စီရဲ့နောက်တန်းအထိုင်စခန်းတွေဖြစ်တဲ့ မြကန်သာရွာနဲ့ သရက်ကိုင်းရွာအထိုင်စခန်းတွေကို တော်လှန်ရေး တပ်တွေက ဒီနေ့မနက် အစောပိုင်းမှာ ဝင်ရောက်တိုက်ခိုက်ခဲ့တာလို့ သိရပါတယ်။

“ဒီနေ့ မနက်ပိုင်းက မတ္တရာမြို့ထဲ နာရေးကားတွေအကုန် ခေါ်သွားတယ်။မန္တလေးဘက်ကို ကား ၅ စီးတောင်ထွက်သွားတယ်။ ဒီကောင်တွေ(စကစ)တော်တော်သေတယ်လို့ကြားတယ်”လို့ တော်လှန်ရေးတပ်ဖွဲ့ဝင်တဦးက ပြောပါတယ်။

အဲ့ဒီနောက် Y-12 နဲ့ ၁၄ ကြိမ် ၁ ခါ၊ ၁၀ ကြိမ် ၁ ခါ‌၊ ဂျက်ဖိုက်တာနဲ့ ၆ ကြိမ် မတ္တရာမြို့နယ်အရှေ့ ခြမ်းကို လေကြောင်းတိုက်ခိုက်မှုပြုလုပ်သွားတယ်လို့ သိရပါတယ်။

အဲဒီကျေးရွာထဲက မြကန်သာ ကျေးရွာဟာ စစ်တပ်ရဲ့ နောက်တန်းစခန်းအဖြစ် ဆေးကုသသူတွေပါရှိတဲ့ အဓိကနေရာဖြစ်တယ်လို့လည်း သိရပါတယ်။

ဒါ့အပြင် ဒီရွာဟာ မတ္တရာမြို့နယ်က စစ်သားစုဆောင်းရေးတပ်၊ ထီးတော်မိုးတပ်ရဲ့ မြောက်ဘက်မှာရှိပြီး စစ်တပ်ကခံစစ်ကို ဒီနေရာကနေ ထပ်မံပြင်ဆင်နေတာလို့ သိရပါတယ်။

မတ္တရာမြို့နယ်အရှေ့ခြမ်းကို စစ်တပ်ကထိုးစစ်ဆင်ပြီး ပြန်လည်သိမ်းယူဖို့ကြိုးစားနေချိန်မှာ ၎င်းတို့ရဲ့ နောက်တန်းစခန်းကို အလစ်အငိုက်ဝင်တိုက်ခံရတာလို့ သိရပါတယ်။

စစ်တပ်ကစစ်မှုထမ်းသင်တန်းဆင်းတွေ အများအပြားကို မတ္တရာမြို့နယ်အရှေ့ခြမ်းကိုပို့ဆောင်ပြီး ထိုးစစ်ဆင်နေတာ ၆ လနီးပါးရှိနေပြီလို့ သိရပါတယ်။

သတင်း – ဧပရယ်

ကန့်ဘလူ၊ ဇူလိုင် ၁၅၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်၊ ဇီးကုန်းမြို့ပေါ်မှာ ကျောင်းကားလုံခြုံရေးလိုက်စောင့်ပေးပြီးပြန်လာတဲ့ စစ်ကောင်စီတပ်ဖွဲ့တိုက်ခိုက်ခံရပြီး ၄ ဦးသေတယ်လို့ ကန့်ဘလူခရိုင်ပကဖလှုပ်ရှားအဖွဲ့ထံက သိရပါတယ်။

ဇူလိုင် ၁၄ ရက် နေ့လယ် ၁ နာရီကျော်မှာ ဇီးကုန်းမြို့အထကကျောင်းကနေပြန်တဲ့စစ်တပ်ကျောင်းကားကို လုံခြုံရေးလိုက်စောင့်ပေးပြီးပြန်လာတဲ့ စစ်ကောင် စီတပ်ဖွဲ့တွေကို ကျောင်းအနီးမီတာ ၂၀၀ ခန့် မှာ လျှပ်တပြတ်ပစ်ခတ်ခဲ့တယ်လို့ ဆိုပါတယ်။

” တကယ်တမ်းဆိုရင် သူတို့က အရက်ထွက်ဝယ်တာမဟုတ်ဘူး။ စစ်ကောင်စီကျောင်းဖွင့်ထားတာရှိတယ်။ ၁ နာရီဆို စာသင်ကျောင်းဆင်းတော့ ၁၀ ယောက်လိုက်ပို့တာ။ ကျောင်းအပြန်ကျောင်းကားတွေကိုလိုက်စောင့်တာ။ ပြန်လာတဲ့အချိန်မှာ ၅ ယောက်၊ ၅ယောက် ခွဲသွားတာ။ တကယ်တမ်း တားဂတ် (target) ထားတာက ၁၀ (ယောက်) ကိုပေါ့နော်။ ၅ ယောက် ၅ ယောက်ခွဲပြန်သွားတော့ နောက်ဆုံးကျန်ခဲ့တဲ့ ၅ ယောက်ကို ပစ်ခတ်မှုစတင်လိုက်တာ” လို့ ကန့်ဘလူခရိုင်ပကဖလှုပ်ရှားအဖွဲ့ ဇီးကုန်းမစ်ရှင်တာဝန်ခံ ကိုပိုင်ချဲက မြေလတ်အသံကို ပြောပါတယ်။

ပစ်ခတ်ခံရတဲ့စစ်ကောင်စီတပ်ဖွဲ့ဟာ ဇီးကုန်းမြို့၊ အထကကျောင်းမှာတပ်စွဲနေတဲ့တပ်ဖွဲ့ဖြစ်ပြီး ၎င်းတို့ဟာ အထကကျောင်းကနေ ကန့်ဘလူ၊ စစ်ကောင်စီကြံစိုက်ပျိုးရေးတပ်ဆီပြန်မယ့်ကျောင်းကားကို ကျောင်းပြင်ပ မီတာ ၁၂၀၀ ခန့်အထိ နေ့စဥ်လိုက်ပို့ပေးတဲ့အဖွဲ့ဖြစ်တယ်လို့ ဆိုပါတယ်။

နှစ်ဖက်အပြန်အလှန်ပစ်ခတ်မှု မိနစ် ၂၀ ခန့်ဖြစ်ပွားခဲ့ပြီး တိုက်ပွဲအတွင်း စစ်ကောင်စီတပ်ဖွဲ့ဝင်တပ်ကြပ် ၁ ဦးနဲ့ မဒေါင်းလှပျူစောထီးအဖွဲ့ဝင် ၃ ဦး သေဆုံး၊ ၁ ဦး ထွက်ပြေးလွတ်မြောက်သွားကာ ၎င်းတို့ကိုင်ဆောင်တဲ့ AK သေနတ် ၁ လက်၊ ကာဘိုင် ၂ လက် သိမ်းဆည်းရရှိခဲ့တယ်လို့ သိရပါတယ်။

ပစ်ခတ်မှုဖြစ်ပွားချိန် ပြည်သူတွေရဲ့ ဆိုင်ခန်းအချို့နဲ့ ဆိုင်အတွင်း ပစ္စည်းအချို့ထိခိုက်ပျက်စီးတာတွေရှိခဲ့လို့ စိတ်မကောင်းဖြစ်မိတယ်လို့ သူကဆက်ပြောပါတယ်။

ပစ်ခတ်မှုဖြစ်ပြီး ညနေပိုင်းလောက်မှာ အထက ၁ ကျောင်းအတွင်းက စစ်ကောင်စီတပ်ဖွဲ့ဝင်တွေက သေဆုံးစစ်ကောင်စီတပ်ဖွဲ့ရုပ်အလောင်းတွေကို လာပြန်ကောက်သွားတယ်လို့ ၎င်းက ဆိုပါတယ်။

တိုက်ခိုက်မှုကို ကန့်ဘလူခရိုင်လှုပ်ရှား ပကဖဗိုလ်ရသ (ခ) ဗိုလ်ပိုင်ချဲအဖွဲ့နဲ့ ရေဦးနယ် ဓူဝံပကဖ ဂျာဂျာ တော်လှန်ရေးအဖွဲ့တို့က ပူးပေါင်းတိုက်ခိုက်ခဲ့တာလို့ သိရပါတယ်။

ဇွန် ၇ ရက်ကလည်း ကန့်ဘလူမြို့နယ်၊ ညောင်ပေါင်ရင်းကျေးရွာအနီးရှိ လင်ဗန်းဆည်မှာ ကင်းတာဝန်ကျ ပျူစောထီးအဖွဲ့တိုက်ခိုက်ခံရလို့ ၂ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ

မြင်းခြံ၊ ဇူလိုင် ၄၊ ၂၀၂၅။

မန္တလေးတိုင်း၊ မြို့သာဘက်ကနေ ငါန်းဇွန်မြို့နယ်ရှိ စစ်ကောင်စီအထိုင်စခန်းတွေကို လက်နက်နဲ့ ရိက္ခာပို့လာတဲ့စစ်ကောင်စီစစ်ကြောင်းကို ပစ်ခတ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၃၀ ကျော်သေဆုံးပြီး ရိက္ခာကား ၂ စီးနဲ့ စစ်သုံ့ပန်း ၂ ဦးဖမ်းဆီးထားတယ်လို့ Zero ပြောက်ကျားတပ်မဟာ တပ်ရင်း ၇ မြင်းခြံခရိုင် ဆီက သိရပါတယ်။

ဇူလိုင် ၃ ရက်‌မနေ့က မြို့သာဘက်ကနေ စမိတ်ခုံရွာ၊ ငါးမြှာကြီးရွာ၊ ဆုံရွာနဲ့ ဂွေ့ကြီးရွာဘက်ဆီ လက်နက်နဲ့ရိက္ခာတွေတင်လာတဲ့ကား ၅ စီးကို အင်အား ၁၀၀ ပါ စစ်‌ကြောင်းကလုံခြုံရေးပေးပြီး စစ်ကြောင်းထွက်လာချိန် ကြိုတင်သတင်းရတဲ့အတွက် ငါန်းဇွန်မြို့နယ်နဲ့ မြင်းခြံမြို့နယ်အစပ်မှာ စောင့်ကြိုတိုက်ခိုက်ခဲ့တာလို့ ဆိုပါတယ်။

” ကား ၅ စီးကို ဘယ်ညာချန်ရံပြီး တက်လာတဲ့ စစ်သားတွေက ကျနော်တို့နဲ့ထိပ်တိုက်တွေ့တယ်။ ကျနော်တို့ မိုင်းတွေကာထားတာ။ သူတို့ကမိုင်းတွေမြင်သွားပြီး ကစဥ့်ကလျားနဲ့ထွက်ပြေးတယ်။ သေနတ်တွေလည်း ပစ်ဖောက်တယ်။ လျှိုတွေထဲဝင်သွားတယ်၊ ကျနော်တို့က စနိုက်ပါနဲ့ထောက်တယ်။ ပထမဆုံးမှန်တဲ့သူက စစ်ကြောင်းမှူးဗျ။ ယူနီဖောင်းပါတယ်”လို့ ဗိုလ်သက်ကြီးက ပြောပါတယ်။

အဲဒီနောက် စစ်ကြောင်းဟာ ရိက္ခာကား ၂ စီးကို အကာအကွယ်ယူကာ လက်နက်ခဲယမ်းကားကို ပြန်လည်မောင်းယူပြီး မြို့သာဘက်ကို ပြန်ထွက်သွားတယ်လို့ သိရပါတယ်။

“ဒါတောင်မှ သေတဲ့ **တွေရဲ့ အလက်တချို့ပြန်ကောက်ပြီး တင်မောင်းသွားတာရှိတယ်။ အဲ့မှာ ကျနော်တို့က လိုက်ပစ်တော့ ကားပေါ်မှာ ၃၊ ၄ ယောက်လောက်ထပ် သေသွားတယ်”လို့ ‌‌‌‌ဗိုလ်သက်ကြီး ပြောပါတယ်။

အဲ့ဒီနောက် နယ်မြေရှင်းလင်းရေးလုပ်ရာမှာ တပ်ကြပ်ကြီးအပါအဝင် စစ်ကောင်စီတပ်ဖွ့ဝင် ၃ ဦးကို စစ်သုံ့ပန်းအဖြစ်ဖမ်းဆီးခဲ့ပြီး အဲ့ဒီထဲက ၁ ဦးကတော့ တော်လှန်ရေးတပ်ဖွဲ့ဝင်ရဲ့ သေနတ်ကိုလုယူခဲ့တာကြောင့် ပစ်ခတ်ခဲ့ရာသေဆုံးခဲ့တယ်လို့ ဆိုပါတယ်။

မနက် ၇ နာရီကျော်ကနေ ၁၁ နာရီအထိ ၄ နာရီနီးပါးအကြာ တိုက်ပွဲဖြစ်ခဲ့ပြီး မြို့သာဘက်ကနေ စစ်ကောင်စီတပ်ဘက်က ဟောင်ဝစ်ဇာတွေနဲ့ ပစ်ခတ်ခဲ့သလို လေယာဉ်တက်လာတဲ့ သတင်းလည်း ရတာကြောင့် တပ်ပြန်ဆုတ်ခဲ့တယ်လို့ ဗိုလ်သက်ကြီးကပြောပါတယ်။

ဒီတိုက်ပွဲကို မြင်းခြံခရိုင်တပ်ရင်း ၇ (ဇီးရိုး ပျောက်ကြားတပ်)နဲ့မန္တလေးခရိုင်တပ်ရင်း ၅ မဟာမိတ်တပ်ဖွဲ့တွေ ပူးပေါင်းတိုက်ခိုက်ခဲ့တာလို့ သိရပါတယ်။

စာတည်း – မြတ်

တိုက်ပွဲကြောင့် ဒေသခံ ၄,၀၀၀ ကျော်စစ်ရှောင်နေရ

ထန်းတပင်၊ ဇွန် ၁၃၊ ၂၀၂၅။

ပဲခူးတိုင်း၊ ထန်းတပင်မြို့နယ်၊ မြို့စိုးကျေးရွာကို စစ်ကြောင်းထိုးလာတဲ့စစ်ကောင်စီတပ်ဖွဲ့ တိုက်ခိုက်ခံရပြီး ၇ ဦးသေဆုံးခဲ့တယ်လို့ တောင်ငူခရိုင် အမှတ် ၂ တပ်ရင်းဆီက သိရပါတယ်။

ဇွန် ၁၂ ရက်မနက် ၇ နာရီခန့်မှာ ဇရပ်ကြီး ခလရ ၇၃ တပ်၊ ကျွဲပွဲ၊ အုတ်တွင်းအခြေစိုက်စစ်ကောင်စီ ပူးပေါင်းအင်အား ၁၂၀ ခန့်ပါစစ်ကြောင်းနဲ့ ထန်းတပင်မြို့ဘက်ကလာတဲ့စစ်ကြောင်းတို့က မြို့စိုးကျေးရွာကိုဝင်ချိန်မှာ တိုက်ခိုက်ခဲ့ကြတာလို့ ဆိုပါတယ်။

“သူတို့(စကစ)က မြို့စိုးတံတားကနေ မြို့စိုးရွာထဲဝင်လာလို့ ထိတွေ့ မှုဖြစ်တာပါ။ တိုက်ပွဲကတော့ ၁ နာရီကျော်လောက်ဖြစ်တယ်။ ဒီနေ့ထိ ရွာထဲမှာရှိနေတုန်းဘဲ။ စကစထိခိုက်သေဆုံးက မြင်လိုက်ရတဲ့ သူတွေရှိလို့ ပြန်သိရတာ”လို့ တောင်ငူခရိုင် အမှတ် ၂ တပ်ရင်း ပြန်ကြားရေးတာဝန်ရှိသူက ပြောပါတယ်။

တိုက်ပွဲအတွင်း စစ်ကောင်စီတပ်ဖွဲ့ဝင် ၇ ဦးသေဆုံးပြီး လက်ရှိအချိန်ထိ စစ်ကောင်စီစစ်ကြောင်းက မြို့စိုးကျေးရွာထဲရှိနေသေးတာကြောင့် စစ်ဆိုင်နေတဲ့အခြေအနေရှိနေတယ်လို့လည်း သိရပါတယ်။

စစ်ကြောင်းထိုးမှုနဲ့ တိုက်ပွဲကြောင့် ကိုးတိုင်၊ ပွဲသာ၊ ဂွေးပင်ရိုး၊ အရှေ့ကုန်း၊ ဇီးဖြူသောင်၊ ဘုရားကုန်း၊ အောက်တင်းကုတ်၊ ခုံစု၊ မြို့စိုးကျေးရွာတွေက ဒေသခံ ၄,၀၀၀ ကျော်ထွက်ပြေးနေရတယ်လို့ အထက်ပါပြန်ကြားရေးတာဝန်ရှိသူက ဆိုပါတယ်။

မြို့စိုးကျေးရွာနဲ့အနီးဝန်းကျင်ရွာတွေဟာ KNLA ပူးပေါင်းတပ်တွေ ထိန်းချုပ်ထားတဲ့ဒေသတွေဖြစ်ပြီး မြို့စိုးတံတား ထန်းတပင်ဘက်ခြမ်းမှာတော့စစ်ကောင်စီဘက်က အင်အား ၄၀ ကျော်နဲ့တပ်စွဲထားတယ်လို့ သိရပါတယ်။

ပြီးခဲ့တဲ့ မတ် ၂၇ ရက်ကလည်း အုတ်တွင်းမြို့နယ်၊ ညောင်ခြေထောက်အပိုင် ရန်ကုန်-မန္တလေး လမ်းဟောင်းပေါ်မှာ စစ်ကောင်စီတပ်ဖွဲ့ဝင် ၁၀ ဦးလိုက်ပါလာတဲ့ ကားကို တောင်ငူခရိုင်အမှတ် ၂ တပ်ရင်းနဲ့ပူးပေါင်းအဖွဲ့တွေက တိုက်ခိုက်ခဲ့ရာ ၅ ဦး သေဆုံးခဲ့သေးတယ်လို့ သိရပါတယ်။

စာတည်း – လင်း

မြိုင်၊ ဧပြီ ၂၀၊ ၂၀၂၅။

မကွေးတိုင်း၊ မြိုင်မြို့၊ ချောင်းဆုံလမ်းမှာ ဂိတ်ဖွင့်လုံခြုံရေးယူနေတဲ့ စစ်ကောင်စီတပ်ဖွဲ့ဝင်တွေ တိုက်ခိုက်ခံရပြီး ၂ ဦးသေဆုံးခဲ့တယ်လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့က သတင်းထုတ်ပြန်ပါတယ်။

ဧပြီ ၂၀ ရက်ဒီမနက် ၆ နာရီခွဲမှာ စစ်သား၊ ရဲနဲ့ပျူစောထီးတွေစုပြီး လုံခြုံရေးယူနေချိန် ဒေသခံ ကာကွယ်ရေးတပ်ဖွဲ့ဝင်တွေကတိုက်ခိုက်ခဲ့ရာ ရဲ ၁ ဦးနဲ့ ပျူစောထီး ၁ ဦးသေဆုံးခဲ့တယ်လို့ ဆိုပါတယ်။

“ချောင်းဆုံလမ်းဂိတ်မှာ စစ်ကောင်စီတပ်သားနဲ့ ပျူစောထီး ၁၅ ယောက်လောက်ရှိတဲ့အချိန် အလစ်ဝင်ပစ်တာ။ ရဲတစ်ယောက်နဲ့ ပျူစောထီးတစ်ယောက်သေတယ်။ အလောင်းတွေကိုလဲ ခုနေ့လယ်အထိလာသယ်သံမကြားမိဘူး ”လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့ တာဝန်ရှိသူတဦးက ပြောပါတယ်။

ပစ်ခတ်မှုဖြစ်ပြီးနောက် စစ်ကောင်စီတပ်ဖွဲ့ဝင်တွေကိုင်ဆောင်တဲ့ MA-1 ၁ လက်၊ Carbine ၁ လက်၊ ကျည် ၂၃ တောင့်တို့ကို သိမ်းဆည်းနိုင်ခဲ့တယ်လို့ ဆိုပါတယ်။

စစ်ကောင်စီဘက်ကပြန်လည်ပစ်ခတ်တာတွေမရှိဘဲ မြိုင်မြို့ အထက ၂ ကျောင်းဘက်ကို ထွက်ပြေးသွားကြတယ်လို့ အထက်ပါတာဝန်ရှိသူက ဆက်ပြောပါတယ်။

အဆိုပါဂိတ်ဟာ လွန်ခဲ့တဲ့ ၂ နှစ်နီးပါးကတည်းကဖွင့်လစ်ထားတာဖြစ်ပြီး ပြည်သူတွေကိုဖမ်းဆီးစစ်ဆေးတာတွေလုပ်လေ့ရှိတယ်လို့ ဆိုပါတယ်။

ဒီတိုက်ခိုက်မှုကို မြိုင်ပြည်သူ့ကာကွယ်ရေးတပ်ဖွဲ့၊ အညာတပ်ပေါင်းစု၊ ပွိုင့်တစ်ထောင် ဗိုလ်ပြောင်အဖွဲ့တို့က ပူးပေါင်းတိုက်ခိုက်ခဲ့တယ်လို့ သိရပါတယ်။

ဒါ့အပြင် အဆိုပါဂိတ်ကိုဆက်လက်တိုက်ခိုက်သွားမှာဖြစ်တဲ့အတွက် မြို့ထဲမှာရှိတဲ့ဒေသခံပြည်သူတွေအနေနဲ့ စစ်ကောင်စီတပ်ဖွဲ့ဝင်တွေနဲ့အနီးမှာမနေကြဖို့ မြိုင်ပကဖ ကသတင်းထုတ်ပြန်ထားပါတယ်။

သတင်း – ဟယ်သာ၊ စာတည်း – လင်း