စစ်မှုထမ်း

မြေလတ်အသံ၊ ဇွန် ၆ ၊ ၂၀၂၆ ။

ပြည်သူ့စစ်မှုထမ်းနှစ်ပြည့်မြောက်ပြီးလို့ ပြန်လည်ရောက်ရှိလာသူ စစ်မှုထမ်းစစ်သားတွေကို ကြိုဆိုပွဲပြုလုပ်ခဲ့တယ်လို့ အသွင်ပြောင်းမကွေးတိုင်းအစိုးရအဖွဲ့က ဇွန်လ ၇ ရက်မှာ ထုတ်ပြန်လာပါတယ်။

ပြည်သူ့စစ်မှုထမ်းသင်တန်း အပတ်စဥ် ၁ နဲ့ ၂ အတွက် မကွေးတိုင်းကနေ ပို့ဆောင်လိုက်တဲ့သူတွေထဲက စစ်မှုထမ်းနှစ်ပြည့်ပြီး ပြန်လည်ရောက်ရှိလာသူ ၃၁၆ ဦးရှိကာ အဲ့ဒီစစ်မှုထမ်းစစ်သားဟောင်းတွေကို မကွေးတိုင်းဝန်ကြီးချုပ် ဦးတင်ကိုကို ဦးဆောင်ပြီးကြိုဆိုပွဲပြုလုပ်ခဲ့တာပါ။

အသွင်ပြောင်းမကွေးတိုင်းအစိုးရအဖွဲ့ဟာ စစ်မှုထမ်းသင်တန်းအပတ်စဥ် ၁ ကနေ လက်ရှိဖွင့်လှစ်ဆဲ အပတ်စဥ် ၂၅ အထိ မကွေးတိုင်းကနေ စစ်မှုထမ်းသင်တန်းသား ၁၀,၇၆၅ ဦး ပို့ဆောင်ခဲ့ပြီးဖြစ်တယ်လို့ အဲ့ဒီကြိုဆိုပွဲသတင်းထုတ်ပြန်ချက်မှာ ဖော်ပြပါတယ်။

အထက်ပါကိန်းဂဏန်းတွေအရ စစ်မှုထမ်းသင်တန်းအပတ်စဥ် ၁ ခုအလိုက် မကွေးတိုင်းကနေ ပို့ဆောင်တဲ့ ပြည်သူ့စစ်မှုထမ်းအင်အားဟာ ပျမ်းမျှ ၄၀၀ ဦးကျော်ရှိနေပြီး စစ်မှုထမ်းအပတ်စဥ် ၁ နဲ့ ၂ ကို မကွေးတိုင်းကနေ စစ်မှုထမ်းဖို့ပို့ဆောင်လိုက်တဲ့ လူဦးရေဟာ ၈၀၀ ကျော်အထိ ရှိနေတာပါ။

အခု အသွင်းပြောင်းမကွေးတိုင်းအစိုးရကပြုလုပ်တဲ့ နှစ်ပြည့်ပြီး ပြန်လည်ရောက်ရှိလာတဲ့ စစ်မှုထမ်း စစ်သားဟာ အပတ်စဥ် ၂ ခုပေါင်း ၃၁၆ ဦးသာရှိတာကြောင့် လူ ၅၀၀ ကျော် ၃ ပုံ ၂ ပုံခန့် လျော့နည်းနေတာလည်း ဖြစ်ပါတယ်။

အပတ်စဥ် ၁ ၊ ၂ ဆင်း စစ်မှုထမ်းစစ်သားတွေ ၂၀၂၄ အတွင်း သင်တန်းဆင်းပြီးနောက် မကွေးတပ်နယ်ကို ရောက်ရှိလာပြီး သေဆုံးမှုများပြားခဲ့ကြောင့် မကွေးတပ်နယ်နဲ့နီးစပ်သူတဦးက အခုလို ပြောပါတယ်။

” အဲ့ဒီတုန်းက ၈၈(တပ်မ) ကချင်ပြည်နယ်ထဲ ဝင်နေတဲ့အချိန်။ ပစ(ပြည်သူ့စစ်မှုထမ်း)တွေ သင်တန်းဆင်းရောက်လာကာစ ၃၁၇ (တပ်မ ၈၈ လက်အောက်ခံ မကွေးအခြေစိုက်တပ်ရင်း) ထဲမှာ အရင်စုထားတာ။ ပြီးတော့ ရှေ့တန်းပို့တာ တော်တော်များများသေကြတာပဲ။ သူတို့မပြောနဲ့ ၃၁၇ က သန္ဓေ(စစ်သား)တွေတောင် အများကြီးကျ(သေ)ကြတာ” လို့ သူက ပြောပါတယ်။

ပြည်သူ့စစ်မှုထမ်းဥပဒေကို ယခင်စစ်ကောင်စီက ၂၀၂၄ ဖေဖော်ဝါရီလမှာ အတည်ပြုပြီးနောက် ဧပြီလမှာ အပတ်စဥ် ၁ သင်တန်းကို စတင်ခဲ့ပြီး သင်တန်းအပတ်စဥ် ၁ ခုကို လူဦးရေ ၅,၀၀၀ နဲ့ နိုင်ငံအနှံ့သင်တန်းကျောင်းတွေမှာ ဖွင့်လှစ်ခဲ့တာပါ။

လက်ရှိမှာ စစ်မှုထမ်းအပတ်စဥ် ၁ နဲ့ ၂ ဟာ စစ်မှုထမ်းကာလ ၂ နှစ်ပြည့်မြောက်ပြီဖြစ်ပြီး နှစ်ပြည့်ပြီးသူတွေကို နေရပ်ပြန်ခွင့်ပေးနေကြောင်း စစ်တပ်ကဖော်ပြနေပေမယ့် ပြည်သူ့စစ်မှုထမ်းစစ်သားတွေအပေါ် စုဆောင်းရရှိမှုနဲ့ ကျဆုံး၊ ထိခိုက်ဒဏ်ရာရမှု အရေအတွက်တွေကိုတော့ ရှင်းရှင်းလင်းလင်းဖော်ပြတာမရှိပါဘူး။

စစ်မှုထမ်းအပတ်စဥ် ၁ ခုချင်းအလိုက် သင်တန်းသားအင်အားပြည့်မီဖို့ စစ်အစိုးရက ၎င်းတို့အဓိက ထိန်းချုပ်ထားနိုင်တဲ့ စစ်ကိုင်း၊ မကွေး၊ ပဲခူး၊ မန္တလေး၊ ရန်ကုန်၊ ဧရာဝတီ၊ တနင်္သာရီ စတဲ့တိုင်းဒေသကြီးတွေရဲ့ မြို့ကြီးတွေကနေ လူငယ်တွေကို ပေါ်တာဆွဲဖမ်းဆီးတာအပါအဝင် အဓိကပစ်မှတ်ထား စုဆောင်းခဲ့တာလည်း ဖြစ်ပါတယ်။

ဝက်လက်၊ ဇွန် ၁၊ ၂၀၂၆ ။

စစ်ကိုင်းတိုင်း၊ ဝက်လက်​မြို့နယ်၊ ရွှေဘို-မန္တလေးလမ်းပိုင်းမှာ စစ်မှုထမ်းသင်တန်းဆင်း စစ်သားဟောင်း ၁ ဦးကို ဖမ်းဆီးနိုင်ခဲ့တယ်လို့ ဝက်လက်မြို့နယ်ပကဖ တာဝန်ရှိသူတွေထံက သိရပါတယ်။

မေလ ၃၁ ရက် ယမန်နေ့မနက် ၉ နာရီခန့်က ဝက်လက်ပကဖအဖွဲ့ဝင်အချို့ဟာ အထက်ပါလမ်းပိုင်းမှာစစ်ဆေးရေးလုပ်နေချိန် မန္တလေးဘက်ကနေ ရွေဘိုဘက်ကိုမောင်းနှင်လာတဲ့ ခရီးသည်တင်ယာဥ်ပေါ်ကနေ ဖမ်းမိခဲ့တာလို့ ဆိုပါတယ်။

” လိုင်းကားနဲ့ မိသားစုလိုက်ပြန်လာတာ။ သူက စစ်မှုထမ်း ၂ နှစ်ပြီးလို့ ပြန်လာတဲ့သူ။ သူကိုစစ်ဆေးရမယ်။ စစ်ကြောင်းလိုက်တဲ့အခါတွေမှာ ရာဇဝတ်မှုကျူးလွန်ထားတာရှိရင် အရေးယူသွားမှာပါ” လို့ ဝက်လက်မြို့နယ်ပကဖပြန်ကြားရေးတာဝန်ရှိသူက မြေလတ်အသံကို ပြောပါတယ်။

ဖမ်းဆီးခံရသူဟာ စစ်မှုထမ်းသင်တန်းအပတ်စဥ် ၂ ဆင်း တပ်သားဟောင်း သိန်းဇော် ဖြစ်ပြီး ၎င်းနဲ့အတူ ကလေး ၄ ဦး၊ ဇနီးနဲ့ မိခင်ဖြစ်သူတို့ကို ဖမ်းမိခဲ့တာဖြစ်ပေမယ့် မိသားစုဝင်တွေနဲ့ကလေးတွေကို ခံဝန်ထိုးကာ နေ့ချင်းပြန်လွှတ်ပေးလိုက်တယ်လို့ ဆိုပါတယ်။

လက်ရှိမှာ ဖမ်းမိထားတဲ့ တပ်သားဟောင်း သိန်းဇော်ကို ရွှေဘိုခရိုင်တပ်ရင်း ၁ ကို လွှဲပြောင်းထားပြီး ၎င်းဟာ စစ်မှုထမ်းအပတ်စဥ်သင်တန်းဆင်း ၂ ပြီးနောက် တိုက်ပွဲတွေနည်းပါးတဲ့ တနိုင်းအခြေစိုက် ခလရ ၂၉၇ ကို ရောက်ရှိကာ ပြီးခဲ့တဲ့ မေလ ၁၈ ရက်မှာ စစ်မှုထမ်း ၂ နှစ်ပြည့်ပြီး စစ်တပ်ကနေထွက်ခွင့်ရခဲ့သူဖြစ်တယ်လို့ သိရပါတယ်။

စစ်တပ်က ပြည်သူစစ်မှုထမ်းအပတ်စဥ် ၁ နဲ့ ၂ က စစ်မှုထမ်း၂ နှစ်ပြီးမြောက်သူတွေကို တပ်ကနေ ထွက်ခွင့်ပေးနေတယ်လို့ စစ်တပ်ကိုထောက်ခံရေးသားနေတဲ့ တယ်လီဂရမ်ချန်နယ်အချို့တွေမှာ ဖော်ပြနေကြတာလည်း ဖြစ်ပါတယ်။

စစ်မှုထမ်း ၂ နှစ်ပြည့်မြောက်တဲ့ စစ်မှုထမ်းအပတ်စဥ် ၁ နဲ့ ၂ မှာ စစ်မှုထမ်းစစ်သား ၁၀,၀၀၀ ဝန်းကျင် တက်ရောက်ခဲ့ရတာဖြစ်ပြီး စစ်မှုထမ်းနှစ်ပြည့်ပြီးနောက် စစ်တပ်ကနုတ်ထွက်ခွင့်ရရှိသူဟာ ရာဂဏန်းသာရှိတယ်လို့ စစ်တပ်အသိုင်းအဝိုင်းထံက သိရပါတယ်။

ရွှေဘို၊ ဇန်နဝါရီ ၁၄၊ ၂၀၂၆ ။

စစ်ကိုင်းတိုင်း၊ ရွှေဘိုမြို့ပေါ်နဲ့အနီးဝန်းကျင်တွေမှာ ဇန်နဝါရီလဒုတိယပတ်အတွင်း လူငယ်အမျိုးသား ၅၀ ဦးကျော် စစ်မှုထမ်းအတွက် ပေါ်တာဆွဲဖမ်းဆီးခံထားရတယ်လို့ မြို့ခံတွေထံက သိရပါတယ်။

ဇန်နဝါရီ ၆ ရက်ကနေ ၁၂ ရက်အတွင်းမှာ စစ်ကော်မရှင်တပ်သား၊ ရဲ၊ ပျူစောထီး၊ ထွေအုပ်ဝန်ထမ်းတွေပါတဲ့ ပူးပေါင်းအဖွဲ့အင်အား ၄၀ကျော်ဟာ ရွှေဘိုမြို့တွင်း၊ စက်မှုဇုံ၊ ဘူတာ၊ မြို့အဝင်အထွက်နေရာတွေနဲ့ ရွှေဘိုမြို့ကနေ မင်းကုန်းရွာအထွက်လမ်းပိုင်းတွေမှာ အသက် ၁၈ကနေ ၃၅ နှစ်အကြားရှိ လမ်းသွားလမ်း လာတွေကို ဖမ်းဆီးခဲ့တာလို့ ဆိုပါတယ်။

” ကလေးပါသွားတဲ့နေ့ကဆို ၁ ရက်တည်း ၂၁ ယောက်။ အဲ့နေ့နောက်ပိုင်း ၄၊ ၅ ယောက် နေ့တိုင်းဆွဲတယ်။ မနက်ခင်းတွေ့ တွေ့တဲ့သူအကုန်ဆွဲသွားတာပဲ။ ၆ နာရီ ၈ နာရီလောက်ထိ နေရာစုံမှာဖမ်းဆွဲတာ”လို့ ပေါ်တာဆွဲဖမ်းဆီးခံထားရတဲ့ ရွှေဘိုမြို့ခံလူငယ်နဲ့နီးစပ်သူတဦးက မြေလတ်အသံကို ပြောပါတယ်။

ဖမ်းဆီးခံရသူတွေထဲမှာ ရွှေဘိုမြို့ပေါ်က ပုဂ္ဂလိကဆေးရုံဝန်ထမ်း၊ ပုဂ္ဂလိကဘဏ်ဝန်ထမ်း၊ စက်မှုဇုံဆန်စက်ဝန်ထမ်း၊ အမြန်ချောပို့ဝန်ထမ်းတွေနဲ့ လက်လုပ်လက်စားလူငယ်တွေပါဝင်ပြီး စစ်ကော်မရှင်ပူးပေါင်းတပ်တွေ ပေါ်တာဆွဲဖမ်းဆီးခဲ့တဲ့ ဇန်နဝါရီလဒုတိယပတ်အတွင်း ရွှေဘိုမြို့ပေါ်မှာ လူသွားလူလာ မရှိသလောက်အထိ နည်းပါးခဲ့တယ်လို့လည်း ဆိုပါတယ်။

ဖမ်းဆီးထားသူတွေကို စစ်ကော်မရှင်တပ်တွေတပ်စွဲထားတဲ့ ရွှေဘိုမြို့ စုပေါင်းရုံးမှာထိန်းသိမ်းထားပြီး လက်ရှိမှာ အစားအသောက်တွေနဲ့အဝတ်အထည်တွေ ပေးပို့ခွင့်ရထားတယ်လို့ သိရပါတယ်။

ဖမ်းဆီးထားတဲ့လူငယ်တွေကို ရွှေဘိုမြို့အခြေစိုက် အမှတ် ၈ စစ်အခြေခံလေ့ကျင့်ရေးတပ်မှာ ဆေးစစ်ထားပြီး လက်ရှိမှာ စစ်သင်တန်းကျောင်းကို ပို့ဆောင်ခံရဖို့ စောင့်ဆိုင်းနေရတယ်လို့ ဆိုပါတယ်။

စစ်ကော်မရှင်တပ်က ၂၀၂၄ ဖေဖော်ဝါရီလမှာ စစ်မှုမထမ်းမနေရဥပဒေထုတ်ပြန်ပြီးနောက် ပြီးခဲ့တဲ့နှစ်ကုန်ပိုင်းအထိ ပြည်သူ့ စစ်မှုထမ်းသင်တန်းအပတ်စဥ် ၂၀ အထိဖွင့်လှစ်ထားခဲ့ပြီး လစဥ်ဖွင့်လှစ်နေတဲ့ စစ်မှုထမ်းသင်တန်းအပတ်စဥ်တွေမှာ လူဦးရေပြည့်မီစေရေး ပေါ်တာဆွဲဖမ်းဆီးမှုတွေလုပ်ဆောင်နေကာ စစ်ကိုင်း၊ မကွေး၊ ပဲခူးနဲ့ ဧရာဝတီတိုင်းတွေက လူငယ်တွေကို ပစ်မှတ်ထား ဖမ်းဆီးနေတာလည်း ဖြစ်ပါတယ်။

ပေါက်ခေါင်း၊ ဒီဇင်ဘာ ၂၂၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်၊ အနောက်ကြို့ကုန်းရွာအထက်တန်းကျောင်းမှာ Grade-9 တက်နေတဲ့ ကျောင်းသား ၂ ဦး အွန်လိုင်းကနေအလုပ်ရမယ်ဆိုပြီးခေါ်ရာက စစ်မှုထမ်းစုဆောင်းခံရပြီးနောက် ၃ ရက်အကြာမှာ ပြန်လွတ်လာတယ်လို့ မိသားစုနဲ့နီးစပ်သူတွေဆီက သိရပါတယ်။

ဒီဇင်ဘာ ၂၁ ရက်ညနေ ၄ နာရီခန့်မှာ ပြည်ကားကြီးဝင်းမှာ လိုင်းကားနဲ့ပြန်ရောက်လာတာကြောင့် မိသားစုတွေကသွားရောက်ခေါ်ဆောင်ခဲ့ကြတယ်လို့ ဆိုပါတယ်။

“လမ်းမှာတင် လူချိန်းခေါ်သွားတာ။ သူတို့ကိုခေါ်သွားတာက ကပစ ၁၉ က စစ်သားတွေက ခေါ်ပြီးတော့ ပြည်၊ မြဝတီဘဏ်အနီးကို ပို့ပေးခဲ့တယ်။ အဲ့ကနေ ကပစ ၁၆ က စစ်သားတွေက လာခေါ်သွားတယ်။ သတင်းတွေတက်လာတော့ ကပစ ၁၆ က ဗိုလ်က မိသားစုဆီဆက်သွယ်ပြီး ကလေးတွေကိုလိုင်းကားနဲ့ပြန်တင်ပေးလိုက်တာ”လို့ မိသားစုနဲ့နီးစပ်သူတဦးက ပြောပါတယ်။

အွန်လိုင်းပေါ်ကနေ ကျောင်းသား ၂ ဦးကိုအလုပ်ရမယ်ဆိုပြီး လိမ်လည်ခေါ်ယူသူတွေက ကပစ ၁၉ ကစစ်ကော်မရှင်တပ်ဖွဲ့ဝင်တွေလို့သိရကြောင်း သူကဆိုပါတယ်။

စစ်မှုထမ်းစုဆောင်းခံရသူတွေဟာ ဒန်းတောင်ရွာနဲ့ ကန်သာယာရွာက အသက် ၁၆ နှစ်အရွယ် မောင်တင်မျိုးအောင်နဲ့ မောင်သော်ဇင်ဖြိုးဆိုသူဖြစ်ပြီး အွန်လိုင်းကနေ ခင်မင်သူတဦးက အလုပ်ပေးမယ်ဆိုတာကြောင့် ဒီဇင်ဘာ ၁၈ ရက်မှာ ကျောင်းသွားမယ်ဆိုပြီး နေအိမ်ကနေ ထွက်သွားကြရာမှ စစ်မှုထမ်းစုဆောင်းခေါ်ဆောင်တာကိုခံလိုက်ရတာပါ။

ဒီဇင်ဘာ ၁၉ ရက်မှာ သူတို့ ၂ ဦးဟာ ကပစ ၁၆ လို့ ယူဆရတဲ့ တပ်မှာ စစ်သားစုဆောင်းခံထားရကြောင်းကို သူငယ်ချင်းတွေကိုပြောပြတာကြောင့် သူငယ်ချင်းတွေက မိသားစုတွေကိုပြန်လည်ပြောပြချက်အရ မိသားစုဝင်တွေသိရှိခဲ့ရတာလည်း ဖြစ်ပါတယ်။

စာတည်း – လင်း

ခန္တီး၊ ဒီဇင်ဘာ ၁၀၊ ၂၀၂၅။

စစ်ကိုင်းတိုင်း၊ ခန္တီးမြို့မှာ ခရစ်ယာန်သင်းအုပ်ဆရာ ၁ ဦး ဒီဇင်ဘာ ၈ ရက်မှာ စစ်မှုထမ်း ဖမ်းဆီးခံရတယ်လို့ မြို့ခံတွေဆီက သိရပါတယ်။

အသက် ၄၀ ဝန်းကျင်အရွယ်ရှိ မကန်နောင်နှစ်ခြင်းအသင်းတော် သင်းအုပ်ဆရာ ဦးဆန်းကြီးဆိုသူကို ခန္တီးမြို့ စက်လှေဆိပ်မှာ စစ်ကော်မရှင်အဖွဲ့ဝင်တွေက ဖမ်းဆီးသွားတာလို့ ဆိုပါတယ်။

“မိသားစုနဲ့တော့ တွေ့ခွင့်ရတယ်။ ပြန်လွှတ်ပေးဖို့ ညှိနှိုင်းနေတာတော့ရှိတယ်။ အဆင်ပြေတယ်လို့တော့ မကြားမိသေးဘူး”လို့ ဖြစ်စဥ်ကိုသိထားတဲ့ မြို့ခံတဦးကပြောပါတယ်။

ဖမ်းဆီးထားတဲ့ သင်းအုပ်ဆရာကို ခန္တီးမြို့မရဲစခန်းရဲ့ စစ်မှုထမ်းတွေအတွက်သီးသန့်ထားတဲ့ အဆောင်မှာထားရှိထားပြီး ဒီဇင်ဘာ ၁၀ ရက်အထိတော့ စစ်မှုထမ်းပို့ဆောင်တာမရှိသလို ပြန်လွှတ်ပေးတာလည်း မရှိသေးဘူးလို့ ဆိုပါတယ်။

အဆိုပါစခန်းဝင်းအတွင်းမှာလည်း စစ်မှုထမ်းအတွက် ဖမ်းဆီးခံထားရသူ လူငယ် ၂၀ ခန့်ရှိနေပြီး လေယာဥ်မလာသေးတာကြောင့် စောင့်ဆိုင်းနေတယ်လို့သိရကာ ခန္တီးကနေ စစ်မှုထမ်းဖမ်းထားသူတွေကို စစ်ကိုင်းအခြေစိုက် တပ်မ ၃၃ ကိုပို့ဆောင်လေ့ရှိတယ်လို့ သိရပါတယ်။

ခန္တီးမြို့မှာ စစ်မှုထမ်းအတွက် မြို့နယ်စီမံကောင်စီအဖွဲ့ကနေ အဓိကထားလုပ်ဆောင်နေပြီး တပတ်စဥ်ကို အနည်းဆုံး လူ ၁၀ ဦးရှာဖွေပြီး ပို့ဆောင်ပေးရလေ့ရှိတယ်လို့ ဆိုပါတယ်။

“နဂတောင်တန်းအခြေနေအရနဲ့ ဟုမ္မလင်းအခြေနေအရ ကျန်နေရာတွေက SNA နဲ့ငြိမ်းချမ်းရေး အဖွဲ့တွေကြီးစိုးရာဒေသဆိုတော့ ခန္တီးကိုပဲ ဖိအားပေးပြီး စစ်မှုထမ်းပေးတာကို အဓိကထားလုပ်နေသလို ဖြစ်နေတယ်။ တပတ်စဥ်ကိုအနည်းဆုံး ၁၀ ဦးလောက်ကို ပေးနေရတာ”လို့ အထက်ပါဒေသခံက ဆက်ပြောပါတယ်။

ခန္တီးမြို့ဟာ လူဦးရေ ၃၀,၀၀၀ ကျော်ရှိပြီး စစ်မှုထမ်းအသက်အရွယ် အကျုံးဝင် လူဦးရေက ၃,၀၀၀ ဝန်းကျင်ခန့်ရှိလို့ မြို့ခံအမျိုးသားတွေအတွက် အခက်ကြုံနေကြရတယ်လို့ သိရပါတယ်။

ပြီးခဲ့တဲ့ နိုဝင်ဘာလမှာလည်း ခန္တီးမြို့ကို စစ်ကော်မရှင်ခန့် စစ်ကိုင်းတိုင်းဝန်ကြီးချုပ်လာစဥ် မြို့မိမြို့ဖ တွေက စစ်မှုထမ်းပေးရမှုယာယီရပ်ဆိုင်းပေးဖို့ တောင်းဆိုခဲ့ပေမယ့် ဝန်ကြီးချုပ်က သူ့အနေနဲ့ လုပ်ပေးလို့မရကြောင်း ပြောဆိုခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ နိုဝင်ဘာ ၆၊ ၂၀၂၅။

မန္တလေးတိုင်း၊ မိတ္ထီလာခရိုင်၊ ဝမ်းတွင်းမြို့နယ်ရှိ ကျေးရွာ ၂ ရွာက အမျိုးသား ၃ ဦးကို စစ်ကော်မရှင် လက်အောက်ခံရဲတပ်ဖွဲ့ဝင်တွေက ဖမ်းဆီးသွားခဲ့တယ်လို့ ဒေသခံတွေဆီက သိရပါတယ်။

ဖမ်းဆီးခံရသူ ၃ ဦးမှာ အသက် ၂၀ ကျော်အရွယ် ကျောင်းကုန်းရွာသား ၁ ဦးနဲ့ ရွာသစ်ကျေးရွာသား ၂ ဦးတို့ဖြစ်ကြကာ နိုဝင်ဘာ ၆ ရက်မနက် ၁ နာရီကျော်က ဖမ်းဆီးခံခဲ့ရတာလို့ ဆိုပါတယ်။

“ဒီနေ့ညဉ့် ၁ နာရီအချိန်လောက်မှာလေ ရွာသစ်ရွာထဲ ရွာအလယ်ပိုင်းကအိမ်တွေ တစ်အိမ်တက်ဆင်း စစ်ပြီး လူငယ်တွေ့တဲ့အိမ်က လူငယ်ချောဆွဲခံရတာပဲ။ ပြီးတော့ ကျောင်းကုန်းထဲဝင်ဖမ်းတာ။ ရဲ**တွေက လူငယ်ရှိတဲ့အိမ်တွေကိုဆိုရင် တံခါးတွေကို အတင်းဆွဲဖွင့်တယ်။ သေနတ်ပြတယ်။ ဇွတ်အတင်းဝင်ရောက်ပြီးကိုဖမ်းတာ”လို့ ဝမ်းတွင်းဒေသခံအမျိုးသားတဦးက ပြောပါတယ်။

ပင်းတလဲရဲစခန်းမှ ရဲတွေဟာ ကျောင်းကုန်း နဲ့ ရွာသစ်ရွာတို့ကို လူဖမ်းဆီးဖို့ဝင်ရောက်လာချိန် ဆိုင်ကယ် ၄ စီးနဲ့ တပ်သား ၈ ဦးပါရှိပြီး သေနတ်ပစ်ဖောက်ဝင်ရောက်လာခဲ့တာလို့ အထက်ပါအမျိုးသားက ပြောပါတယ်။

အဆိုပါ ဖမ်းဆီးခံအမျိုးသား ၃ ဦးကို ၎င်းတို့ကျေးရွာနဲ့ ၇ မိုင်ကျော်ကွာဝေးတဲ့ ပင်းတလဲကျေးရွာရဲစခန်းမှာ ချုပ်နှောင်ထားတာကိုသိရှိရတာကြောင့် မိသားစုဝင်တွေက နိုဝင်ဘာ ၆ ရက်ဒီမနက် ၁၀ နာရီကျော်မှာ ရဲစခန်းကိုသွားရောက်ပြီး တွေ့ခွင့်တောင်းကြပေမယ့် တွေ့ခွင့်မပေးဘူးလို့လည်း သူကဆိုပါတယ်။

“စစ်မှုထမ်းအတွက် ချောဆွဲတာပါ။ စမထ(စစ်မှုထမ်း)အပါတ်စဉ် ဖွင့်ခါနီးပြီလေ။ ၉ ရက်နေ့လား ၁၀ ရက်နေ့လား လစဉ်ဖွင့်တာ။ လူမပြည့်လို့ဆွဲနေကျပါပဲ။ လတိုင်းဖမ်းတယ်။ လကုန်၊လဆန်း ရက်ရောက်တိုင်းချောဆွဲတာ”လို့ အထက်ပါအမျိုးသားက မှတ်ချက်ပေးပါတယ်။

အလားတူ နိုဝင်ဘာ ၅ ရက်ည ၉ နာရီကျော်ကလည်း ဝမ်းတွင်းမြို့နယ်၊ သစ်ပလွေကန်ကျေးရွာက အသက် ၂၀ နဲ့ ၃၀ ကြားရှိ အမျိုးသား ၂ ဦးကို စစ်ကော်မရှင်လက် အောက်ခံရဲတပ်သားတွေက ဝင်ရောက်ဖမ်းဆီးခဲ့ပြီး သူတို့ကိုလည်း ပင်းတလဲရွာရဲစခန်းမှာပဲ ချုပ်နှောင်ထားတယ်လို့ ဒေသခံတွေဆီက သိရပါတယ်။

အခုလို နေအိမ်တွေထဲအထိဝင်ရောက်ကာ မကြာခဏဖမ်းဆီးနေတာကြောင့် ဒေသခံတွေအနေနဲ့ နေ၀င်ရင်အပြင်မထွက်ရဲကြတော့ဘူးလို့ဆိုပါတယ်။

ပြည်သူ့စစ်မှုထမ်းအပတ်စဥ် ၁ ကို ၂၀၂၄ ဧပြီ ၈ ရက်မှာစတင်ဖွင့်လှစ်ခဲ့တာဖြစ်ပြီး ပျှမ်းမျှအားဖြင့် ၁ လကို အပတ်စဥ် ၁ ခုဖွင့်လှစ်နေတာဖြစ်ကာ လက်ရှိမှာ အပတ်စဥ် ၁၈ ကို အောက်တိုဘာ ၂၁ ရက်မှာ နောက်ဆုံးဖွင့်လှစ်ထားတာ ဖြစ်ပါတယ်။

စာတည်း – လင်း

ဆားလင်းကြီး၊ သြဂုတ် ၁၁၊ ၂၀၂၅။

မကွေးတိုင်း၊ ဆားလင်းကြီးမြို့နယ်ပြည်သူ့ကာကွယ်ရေးအဖွဲ့ဆီ စစ်မှုထမ်းသင်တန်းဆင်းတပ်သား ၇ ဦး ဘက်ပြောင်းခိုလှုံလာတယ်လို့ တပ်ဖွဲ့တာဝန်ရှိသူဆီက သိရပါတယ်။

အဆိုပါစစ်ကောင်စီတပ်ဖွဲ့ဝင် ၇ ဦးဟာ MA1 သေနတ် ၂ လက်၊ ကျည် ၃၀၀၊ လက်ပစ်ဗုံး ၃ လုံး၊ နင်းမိုင်း ၂ လုံးတို့နဲ့အတူ ဘက်ပြောင်းခိုလှုံလာတယ်လို့ သိရပါတယ်။

ဘက်ပြောင်းခိုလှုံသူတွေဟာ အမှတ် ၉၂၉ ထောက်ပံ့နှင့်ပို့ဆောင်ရေးတပ်ရင်း (ထပရ ၉၂၉) (မုံရွာ)မှ ၆ ဦး၊ အမှတ် ၉၁၀ စစ်မြေပြင်အင်ဂျင်နီယာတပ်ရင်း (စအရ ၉၁၀) (မန္တလေး) မှ ၁ ဦး၊ စုစုပေါင်း ၇ ဦး ဖြစ်ပြီး အသက် ၂၀ အရွယ်ကနေ ၂၉ ကျော်အရွယ်တွေ ဖြစ်တယ်လို့ ဆိုပါတယ်။

ဘက်ပြောင်းခိုလှုံလာသူတွေထဲက အပတ်စဥ် ၈ သင်တန်းဆင်းတပ်သားတဦးကတော့ “ဂျိုးဖြူသင်တန်းကျောင်းမှာ သင်တန်း ၂ လခွဲတက်ခဲ့ပြီး အဲဒီ၂ လခွဲကနေ သင်တန်းကိုပြောင်းခဲ့ပြီး သင်တန်းမှာ (Fatigue)ဖက်ထိပ်လုပ်ဖို့အတွက် ၃ လ သူတို့ခိုင်းတာတွေပဲလုပ်နေရတယ်။ အဲ့ဒါပြီးတော့ စစ်ဆင်ရေးဆိုပြီး ဘာမသိညာမသိနဲ့ ကျနော်တို့ကိုလွှတ်တယ်”လို့ သူကြုံခဲ့ရတဲ့အခြေအနေတွေကို ပြောပြပါတယ်။

ဘက်ပြောင်းလာသူ ၇ ဦးဟာ ရန်ကုန်တိုင်းနဲ့ မကွေးတိုင်းတွေကနေ ဖမ်းဆီးခံခဲ့ရသူတွေဖြစ်ပြီး သူတို့ကို ဩဂုတ် ၁၀ ရက် မနေ့က အခမ်းအနားကျင်းပကာ မြို့နယ်ပြည်သူ့အုပ်ချုပ်ရေးအဖွဲ့က လက်နက်ပါသူ ၁ ဦးကို ကျပ်သိန်း ၅၀ ကျပ်၊ လက်နက်မပါသူ ၁ ဦးကို ၅သိန်းကျပ် ပေးအပ်ခဲ့တယ်လို့လည်း သိရပါတယ်။

စာတည်း – မြတ်

မြေလတ်အသံ၊ ဇူလိုင် ၂၉၊ ၂၀၂၅ ။

စစ်ကိုင်းတိုင်း၊ မုံရွာမြို့ စီးပွားရေးတက္ကသိုလ်အနီး အလုပ်ရုံ ၁ ခုအတွင်းက လူငယ်အမျိုးသား ၉ ဦးကို စစ်ကောင်စီတပ်က ပေါ်တာဆွဲဖမ်းဆီးသွားတယ်လို့ ဖမ်းဆီးခံရသူတွေနဲ့ နီးစပ်သူတွေဆီက သိရပါတယ်။

ဖမ်းဆီးခံရသူတွေဟာ ကွမ်းယာပစ္စည်းတွေဖြစ်တဲ့ ကွမ်းသီး၊ နှပ်ဆေး၊ ထုံး၊ ဆေးရွက်ကြီးတွေ ထုတ်လုပ်ဖြန့်ဖြူးတဲ့လုပ်ငန်းက အလုပ်သမားတွေဖြစ်ပြီး ဇူလိုင် ၂၇ ရက် မှာ အင်အား ၁၅ ဦးခန့်ပါ စစ်ကောင်စီတပ်ဖွဲ့တွေက အလုပ်ရုံအတွင်း ဝင်ရောက်ဖမ်းဆီးသွားတာလို့ ဆိုပါတယ်။

“စုစုပေါင်း အလုပ်သမား ၁၁ ယောက်ရှိတာ ၉ ယောက်ကိုဖမ်းသွားတယ်။ အလုပ်ရုံအတွင်းဝင်လာပြီး မိန်းကလေးတွေနေရစ် ကျန်တဲ့အမျိုးသားတွေလိုက်ခဲ့ဆိုပြီးခေါ်သွားတာ။ ၂ ယောက်က မိန်းကလေးမို့ ခေါ်မသွားတာ”လို့ ဖမ်းဆီးခံရသူတွေနဲ့ နီးစပ်သူဒေသခံတဦးက မြေလတ်အသံကို ပြောပါတယ်။

ဖမ်းဆီးခံရသူတွေဟာ ချင်းတွင်းမြစ်အနောက်ဘက်ကမ်း ယင်းမာပင်မြို့နယ်ကျေးရွာတွေကနေ မုံရွာမြို့ကို လာရောက်အလုပ်လုပ်ကိုင်တဲ့ အသက် ၂၅ နဲ့ ၃၅ နှစ်ကြားရှိ အမျိုးသားတွေဖြစ်ပြီး လက်ရှိ မုံရွာ နမခစစ်ဌာနချုပ်ကို ပို့ဆောင်ခံထားရတယ်လို့ ဆိုပါတယ်။

စစ်ကောင်စီက ဇူလိုင် ၂၂ ရက်က စတင်ကာ မုံရွာမြို့နေရာအနှံ့မှာ လိုက်လံဖမ်းဆီးပေါ်တာဆွဲနေတာဖြစ်ပြီး အခုလဒုတိယအပတ်မှာပဲ စစ်ကိုင်းတံတားပေါ်က ခရီးသွားကားတွေကိုတားပြီး လူငယ်အမျိုးသား ၃၀ ကျော်ကို ရွေးချယ်ဖမ်းဆီးသွားခဲ့ပါတယ်။

ဇူလိုင် ၁၄ ရက်မှာ စစ်မှုထမ်းသင်တန်းအပတ်စဥ် ၁၅ ကို နိုင်ငံတဝှမ်းစစ်ကောင်စီတပ် သင်တန်းကျောင်းတွေမှာ ဖွင့်လှစ်ခဲ့ကြောင်း စစ်ကောင်စီက ထုတ်ပြန်ခဲ့ပြီးနောက် အပတ်စဥ် ၁၆ ဖွင့်လှစ်နိုင်ရေး မဲနှိုက်ခေါ်ဆောင်တာအပြင် အခုလို ဖမ်းဆီးခေါ်ဆောင်တာတွေ လုပ်ဆောင်နေတာလည်းဖြစ်တယ်လို့ CDM တပ်မတော်သားတဦးက ပြောပါတယ်။

စာတည်း – ဟိန်းစံ