စစ်ကိုင်း

စစ်ကိုင်း၊ မေ ၂၆၊ ၂၀၂၃။

စစ်ကိုင်းတိုင်း၊ ရေဦးမြို့နယ်၊ ဖိန်းကားကျေးရွာကို စစ်ကောင်စီတပ်က မေလ ၂၅ ရက်မနေ့ကမနက် ၆ နာရီမှာ ဝင်ရောက်ပြီး လူနေအိမ် ၇ လုံးနဲ့အတူ အသက် ၈၀ အရွယ်အဘွားကိုပါ မီးရှို့သတ်သွားတယ်လို့ ရေဦးအခြေပြု People’s Defense Comrade ပြန်ကြားရေးတာဝန်ခံ ထူးခန့်ဇော်(အမေ့သား)က ပြောပါတယ်။

မီးရှို့အသတ်ခံရတဲ့အဘွားဟာ ဒေါ်သောင်းကြည်ဖြစ်ပြီး အသက် ၈၀ အရွယ်ဖြစ်ကာ စစ်ကောင်စီတပ်သားတွေက ကျေးရွာထဲဝင်လာချိန် နေအိမ်ထဲမှာ တဦးတည်းပိတ်မိကျန်ခဲ့တာဖြစ်တယ်လို့ သူက ပြောပါတယ်။

“စကစတွေက ရွာကအိမ်တွေကိုမီးရှို့တယ်။ ပြီးတော့ အိမ်ထဲမှာပိတ်မိနေတဲ့ အဘွားကိုသတ်ပြီးတော့ အိမ်မီးလောင်နေတဲ့အထဲ ထည့်သွားတာ။ အလောင်းကို အစအနပျောက်အောင်လုပ်တဲ့ သဘောပေါ့။ အဘွားရဲ့မီးရှို့ခံအလောင်းကို မနေ့က ရွာသားတွေ ရွာထဲခဏဝင်ကြည့်တဲ့အခါမှာ တွေ့ခဲ့တာ။ အိမ် ၇ လုံးပြာကျသွားတယ်”လို့ သူက ဆက်ပြောပါတယ်။

ရေဦးမြို့ပေါ်ကနေ အင်အား ၁၂၀ ခန့်ပါတဲ့ စစ်ကောင်စီတပ်သားတွေဟာ ရေဦး-တန့်ဆည် ကားလမ်းမဘေးက အိမ်ခြေ ၂၀၀ ကျော် ရှိ ဖိန်းကားကျေးရွာထဲကို ဝင်လာချိန် မြို့နယ်( ပကဖ)က မိုင်းဆွဲတိုက်ခိုက်ခဲ့လို့ စစ်ကောင်စီ တပ်သား ၃ ဦး ဒဏ်ရာရရှိခဲ့သေးတယ်လို့ ပြန်ကြားရေးတာဝန်ခံ ထူးခန့်ဇော်(အမေ့သား)က ပြောပါတယ်။

ဒါ့အပြင် ဖိန်းကားကျေးရွာကိုမီးရှို့သွားတဲ့ စစ်ကြောင်းဟာ မေလ ၂၃ ရက်မှာ ကံပေါက်ကျေးရွာအနီး မိုင်း ၂ ကြိမ်ဆွဲခံရပြီး အထိနာသွားတာကြောင့် ရေဦးမြို့ကိုဝင်ပြီး အင်အားပြန်ဖြည့်ကာ တကျော့ပြန်စစ်ကြောင်းထိုး နေတာဖြစ်ပါတယ်။

အခုစစ်ကြောင်းဟာ ရေဦးမြို့ပေါ်မှာ အထိုင်ချနေထိုင်တဲ့ တပ်မ(၁၁)က တပ်သားတွေဖြစ်ပြီး၊ သူတို့(စကစ)ဟာ မေလ ၄ ရက်မှာလည်း ချမ်းသာကျေးရွာရဲ့စာသင်ကျောင်းကို မီးရှို့တဲ့စစ်ကြောင်းဖြစ်သလို ရွှေဘိုမြို့၊ ခင်ဦးမြို့၊ ဒီပဲယင်းမြို့နယ်တွေကို တလှည့်ကျစီ လှည့်ပတ် စစ်ကြောင်းထိုးနေတဲ့ စစ်ကြောင်းတခုလည်း ဖြစ်ပါတယ်။

တည်းဖြတ် – လင်းဇေ

စစ်ကိုင်း၊ မေ ၂၆၊ ၂၀၂၃။

စစ်ကိုင်းတိုင်း၊ အင်းတော်မြို့နယ်နဲ့ ဗန်းမောက်မြို့နယ်မှာ မေလတတိယပတ်အတွင်း တိုက်ပွဲတွေပြင်းထန်နေပြီး စစ်ကောင်စီက လေယာဉ်နဲ့ ဆက်တိုက်ဗုံးကြဲနေတာကြောင့် အသက်အရွယ်ကြီးသူ ၃ ဦး သေဆုံးပြီး ဘုန်းကြီးကျောင်းနဲ့ စာသင်ကျောင်းတွေ ပျက်စီးသွားခဲ့တယ်လို့ ဒေသခံတွေက ဆိုပါတယ်။

မေလ ၂၀ ရက်ကနေ ၂၄ ရက်အထိ ဗန်းမောက်မြို့နယ်မှာ တိုက်ပွဲတွေပြင်းထန်ခဲ့ပြီး စစ်ကောင်စီဘက်မှ အကျအဆုံးများတာကြောင့် လေကြောင်းအကူဖြင့် ဗုံးကြဲတိုက်ခိုက်ခဲ့ရာ ဗန်းမောက်မြို့နယ်၊ နောင်ကန်ရွာမှ ထွက်မပြေးနိုင်ဘဲ ရွာမှာကျန်ခဲ့တဲ့ အသက် ၆၀ ဝန်းကျင် အဖိုး၊အဖွား ၂ ဦး သေဆုံးခဲ့ရတာပါ။

အလားတူ အင်းတော်မြို့နယ်မှာလည်း မေလ ၂၂ ရက်ကနေ ၂၅ ရက်အထိ တိုက်ပွဲများပြင်းထန်ခဲ့ရာ စစ်ကောင်စီဘက်က အထိအခိုက်အရမ်းများနေတာအကြောင့် လေယာဉ်ဖြင့် ဗုံး ၂၆ လုံး ကြဲချခဲ့လို့ အင်းတော်မြို့နယ်၊ ကျွန်းတောရွာက အသက် ၉၀ အရွယ် အဖွားတဦးသေဆုံးခဲ့ပြီး ကျေးရွာရှိ ဘုန်းကြီးကျောင်း၊ စာသင်ကျောင်းနဲ့ လူနေအိမ်အများအပြား ပျက်စီးသွားခဲ့တယ်လို့ ဒေသခံတွေက ဆိုပါတယ်။

“အဲ့ဒီအဖွားက ဘုန်းကြီးကျောင်းမှာ သွားရှောင်နေတာ၊ လေယာဉ်က အဲ့ကိုကျဲတော့ ဗုံးအားနဲ့ လေဟပ်ပြီး နှလုံးရပ်သေတယ်လို့ သိရတယ်၊ အလောင်းက အခုထိဘုန်းကြီးကျောင်းထဲမှာပဲ ဘာမှလုပ်လို့မရသေးဘူး”လို့ ဒေသခံတဦးက ပြောပါတယ်။

အင်းတော်၊ ကျွန်းတောရွာက သေဆုံးသွားတဲ့အဖွားဟာ ဒေါ်မိသိန်း အသက် ၉၃ နှစ်အရွယ်ဖြစ်ပါတယ်။

“‌အင်းတော်ကိုက တကြိမ်ကို ၂ လုံးနဲ့ မနက်က ၈ ကြိမ်၊ ညနေပိုင်းမှာ ၅ ကြိမ်၊ ဗန်းမောက်ကကျ ဗုံးကြီး ၂လုံးကြဲတယ်၊ လေကြောင်းပစ်ချိန် အဖိုးအဖွားတွေ အိမ်ပေါ်ကိုကျတာ၊ ရွာတွေက အကုန်ရှောင်ပေမယ့် မပြေးနိုင်တဲ့ အသက်ကြီးပိုင်းတွေ ကျန်ခဲ့တာ”လို့ Indaw Revolution – IR ရဲဘော်တဦးက ဆက်ပြောပါတယ်။

မေလ ၂၅ ရက် မနေ့ကတနေ့တည်း အင်းတော်ဘက်ကို မနက် ၁၀ နာရီနဲ့ ညနေ ၃ နာရီခွဲမှာ ဗုံးကြဲခဲ့ပြီး ဗန်းမောက်ကိုတော့ ည ၉ နာရီခွဲမှာ လေကြောင်းပစ်ကူ သုံးခဲ့တာဖြစ်တယ်လို့ Indaw Revolution – IR ရဲဘော်တဦးက ပြောပါတယ်။

ဗန်းမောက်မှာလည်း မေလ ၂၀ ရက်ကနေ ၂၄ ရက်ထိ တိုက်ပွဲတွေဖြစ်နေပြီး စစ်ကောင်စီဘက်က ဗိုလ်ကြီးတဦး အပါအဝင် ၃၀ နီးပါးသေဆုံးကာ လက်နက်ခဲယမ်းတွေလည်း သိမ်းမိထားတယ်လို့ သိရပါတယ်။

အဆိုပါ ဗန်းမောက်တိုက်ပွဲကို စစ်ကူသွားမယ့် အင်းတော်စစ်ကြောင်းဟာလည်း မေလ ၂၂ ရက်နေ့ကတည်းက အင်းတော်မြို့နယ်၊ ရွာသာယာရွာနားမှာ တိုက်ပွဲစတင်ဖြစ်ပွားနေပြီး ဒီနေ့အထိ အင်းတော်ထဲမှာပဲ ပိတ်မိနေသေးတဲ့အတွက် စစ်ကောင်စီက ၂ မြို့နယ်လုံးကို လေကြောင်းပစ်ကူတွေ သုံးနေတာဖြစ်တယ်လို့ အင်းတော်ရဲဘော်တဦးက ဆိုပါတယ်။

တိုက်ပွဲတွေ စတင်ဖြစ်ပွားတဲ့ မေလ ၂၀ ရက်ကနေ ၂၅ ရက်ထိ ၅ ရက်တာကာလအတွင်း စစ်ကောင်စီဘက်က လေကြောင်းနဲ့ ၃ ရက်ပစ်ကူပေးခဲ့ပြီး ရဲဘော် ၉ ဦး ဗုံးစထိမှန်ထားကာ မစိုးရိမ်ရဒဏ်ရာတွေ ရရှိခဲ့ပါသေးတယ်။

စာတည်း – လင်းဇေ

စစ်ကိုင်း၊ မေ ၂၅၊ ၂၀၂၃။

စစ်ကိုင်းတိုင်း၊ မုံရွာမြို့ပေါ် က လူစည်ကားရာနေရာတွေမှာ လုံခြုံရေးပတ်ကင်းကားတွေစစ်ဆေးတာတွေနဲ့ အန္တရာယ်ရှိတယ်ဆိုတာသိပေမယ့် ပြောက်ကျားသပိတ်နဲ့ ဆန္ဒပြခဲ့တာလို့ အညာပစ်တိုင်းထောင်လေးများအဖွဲ့ဆီက သိရပါတယ်။

မေလ ၂၅ ရက် နေ့လယ် ၁၁ နာရီခွဲအချိန်လောက်မှာ လူ ၃ ဦးနဲ့ သပိတ်ပြုလုပ်ခဲ့ကြတာပါ။

“သပိတ်ဆိုတာ နွေဦးတော်လှန်ရေးရဲ့ထောက်တိုင်တွေထဲမှာ ပါဝင်သလို လူထုကိုယ်စား ကျမတို့လူငယ်တွေက အာဏာရှင်ကိုအလိုမရှိကြောင်း နိုင်ငံတကာကိုပြချင်လို့ပါ။ ဒုက္ခရောက်နေကြတဲ့ ပြည်သူတွေရှိနေတာကို မြို့ပေါ်မှာ အပြုံးမပျက်သွားလာစားသောက်နေကြတဲ့သူတွေရှိနေလို့ မီးမောင်းထိုးပြရတာဖြစ်တယ်”လို့ သပိတ်ဦးဆောင်သူ အမျိုးသမီးတဦးက ပြောပါတယ်။

“ကျေးလက်မှာပေးဆပ်၊ မြို့ပြမှာအပြုံးမပျက်၊ လုံးဝ အုပ်ချုပ်ခွင့်မရစေရ၊ ဖက်ဆစ်စနစ် သပိတ်မှောက် ဖက်ဒရယ်လမ်းကိုရဲရဲလျှောက်” စာသားပါ ဘန်နာတွေကို ကိုင်ဆောင်ကာ မုံရွာမြို့ပေါ်ရှိ ကျောက္ကာလမ်း၊ နာရီစင်နဲ့ ကန်သာယာ စတဲ့နေရာတွေမှာ ဆန္ဒထုတ်ဖော်ခဲ့ကြတာလည်း ဖြစ်ပါတယ်။

စာတည်း – လင်း

စစ်ကိုင်း၊ မေ ၂၅၊ ၂၀၂၃။

စစ်ကိုင်းတိုင်း၊ ကောလင်းမြို့နယ်အတွင်းမှာ ကျေးရွာ ပကဖ ရဲဘော် ၁ ဦးအပါအဝင် အမျိုးသား ၅ ဦးကို စစ်ကောင်စီတပ်သားတွေက မေလ ၂၃ ရက်မှာ သတ်ခဲ့တယ်လို့ သိရပါတယ်။

အသတ်ခံရသူတွေဟာ ကြေးအင်းကျေးရွာပြည်သူ့ကာကွယ်ရေးအဖွဲ့မှ ရဲဘော် နေဆန်းအောင် ၂၂ နှစ်၊ ကျောက်ကာရွာသား ဆေးဆရာ ဦးသိန်းအေး ၄၄ နှစ်၊ မောင်းကော်ရွာသား မင်းလှိုင်၊ ကျော်မင်းသိန်းနဲ့ ကန့်ဘလူနယ်ကနေ လာရောက်စစ်ရှောင်နေတဲ့ ကိုဖိုးဝ တို့ဖြစ်ကြတယ်လို့ ကောလင်း PDF မှ ရဲဘော်တဦးက ပြောပါတယ်။

“ကျေးရွာပကဖရဲဘော်က လွယ်မောက်တောင်ရွာအနီးက တိုက်ပွဲမှာအဖမ်းခံရတာ၊ ဆေးဆရာကိုတော့ သဲကောရွာကဖမ်းပြီး လွယ်မောက်ရွာအရောက်မှာ သတ်ပြီးတော့ အိမ်သာကျင်းထဲ ထည့်ထားခဲ့တာ။ မောင်းကော်က ၂ ယောက်ကတော့ ကိုယ့်ရွာထဲမှာ အသတ်ခံရတာ။ နောက်တယောက်ကတော့ ကန့်ဘလူနယ်က စစ်ရှောင်နေတာ။ သူက အောက်သီတရာရွာအထွက်မှာ နွားကျောင်းနေချိန် စကစတွေနဲ့တွေ့လို့ ပစ်သတ်ခံရတာ”လို့ ဆိုပါတယ်။

အလောင်းတွေကို မေလ ၂၄ ရက်နေ့ တနေ့တည်းမှာ တွေ့ရှိခဲ့ပြီး အဲ့ဒီနေ့မှာတင် သင်္ဂြို​​ဟ်ပေးလိုက်တယ်လို့ အထက်ပါရဲဘော်က ဆက်ပြောပါတယ်။

ကောလင်းမြို့ပေါ်ကနေ အင်အား ၈၀ ကျော်ပါတဲ့ စစ်ကြောင်းဟာ မေလ ၂၁ ရက်မှာ ကြာအင်းနဲ့ သဒွတ်ခုံကျေးရွာ၊ ၂၂ ရက်မှာ သဲကောကျေးရွာ၊ ၂၃ ရက်မှာ လွယ်မောက်တောင်ကျေးရွာတို့ကို ဝင်ရောက်မွှေနှောက်ခဲ့ပြီးနောက် ကာကွယ်ရေးတပ်ဖွဲ့တွေနဲ့ ထိတွေ့တိုက်ပွဲဖြစ်ပွားခဲ့တာလို့ သိရပါတယ်။

တိုက်ပွဲဖြစ်ပွားပြီးနောက် အဲဒီစစ်ကြောင်းဟာ လွယ်မောက်ကျေးရွာထဲ တညအိပ်ပြီး ဒေသခံတွေနဲ့ ကာကွယ်ရေးတပ်ဖွဲ့တွေရဲ့ ဆိုင်ကယ် ၁၀ စီးကို မီးရှို့ခဲ့ကာ မေလ ၂၄ ရက်မှာတော့ ကျွန်းတောကျေးရွာ အရှေ့ဘက်လယ်ကွင်းအထိ စစ်ကြောင်းထိုးပြီး ကောလင်းမြို့ပေါ်ကို နောက်ကြောင်းပြန်သွားခဲ့ကြတယ်လို့ ဆိုပါတယ်။

အလားတူ ကိုးတောင်ဘို့ ယာယီစခန်းကနေ အင်အား ၇၀ ကျော်ပါတဲ့ နောက်ထပ်စစ်ကြောင်းတခုဟာလည်း မေလ ၂၂ ရက်က အောက်သီတရာကျေးရွာအရှေ့ဘက် ဘုရား ၂ ဆူတောင်၊ ၂၃ ရက်မှာ အောက်သီတရာ၊ ယားတောင်နဲ့ မောင်းကော်ကျေးရွာတို့ကို ဝင်ရောက်မွှေနှောက်ပြီး အပြန်မှာလည်း ကာကွယ်ရေးတပ်တွေနဲ့ တိုက်ပွဲတကြိမ် ထပ်ဖြစ်ခဲ့ပါသေးတယ်။

စာတည်း – လင်း