စစ်ကိုင်း

စစ်ကိုင်း၊ ဒီဇင်ဘာ ၂၄၊ ၂၀၂၂။

စစ်ကိုင်းတိုင်း၊ စစ်ကိုင်းမြို့၊ ပန်းဘဲတန်းရပ်ကွက်ရှိ မြို့နယ်စိုက်ပျိုးရေးဦးစီးဌာနရုံးအတွင်း ဗုံးပေါက်ကွဲမှုဖြစ်ပြီး ၉ ဦး ဒဏ်ရာရရှိခဲ့တယ်လို့ သိရပါတယ်။

ဒီဇင်ဘာလ ၂၃ ရက်မနေ့ကနေ့လည် ၂ နာရီလောက်မှာ အဆိုပါစိုက်ပျိုးရေးရုံးအတွင်း ဗုံးပေါက်ကွဲခဲ့တာလို့ ဒေသခံတဦးက ပြောပါတယ်။

“ရုံးထဲပေါက်ကွဲမှုဖြစ်တာတော့ ဟုတ်တယ်။ ဌာနဆိုင်ရာရုံးဆိုတော့ ဝင်လို့လည်းမရဘူးလေ။ ပြန်သိရတာက အပြင်ကလာပစ်တယ်လည်း ပြောနေကြသလို သူတို့ရုံးကိုလာပေးတဲ့ ပါဆယ်ထုပ်ကနေ ပေါက်တယ်လို့လည်းပြောနေကြတယ်။ ရုံးထဲကလူတွေ ထိခိုက်သွားတာတော့ ရှိတယ်။ ထိခိုက်သွားသူတွေထဲမှာ ဒုဦးစီးမှူးတွေလည်းပါတယ်”လို့ ပြောပါတယ်။

ဗုံးပေါက်ကွဲမှုကြောင့် ရုံးဝန်ထမ်းတွေဖြစ်တဲ့ ဒုဦးစီးမှူး ဒေါ်ဖြူဖြူဝင်း၊ ဒေါ်နွဲ့နွဲ့၊ ဦးသီဟန်ဦး၊ ဒုလက်ထောက်ဦးစီးမှူးဖြစ်တဲ့ ဒေါ်ဝင်းမြတ်မော်၊ လက်ထောက်ဦးစီးမှူးတွေဖြစ်တဲ့ ဒေါ်ဆွေဆွေအောင်၊ ဒေါ်လှလှရီ၊ အငယ်တန်းစာရေးဖြစ်တဲ့ ဒေါ်သီသီလှိုင်၊ မမိုးမြင့်သူနဲ့ အသက် ၁၁ လအရွယ် ကလေးတဦးပါ ထိခိုက်ခဲ့တယ်လို့ဆိုပါတယ်။

အဲဒီအပြင် ရုံးပြတင်းပေါက်မှန်အချို့လည်း ထိခိုက်ပျက်စီးတာတွေရှိခဲ့တယ်လို့ သိရပါတယ်။

ထိခိုက်ဒဏ်ရာရသူတွေကိုတော့ စစ်ကိုင်းပြည်သူ့ဆေးရုံကို ပို့ဆောင်ကုသထားပြီး အများစုက မစိုးရိမ်ရဒဏ်ရာတွေ ရထားတယ်လို့ ဆိုပါတယ်။

ဒီဖောက်ခွဲမှုကို ဘယ်အဖွဲ့က ဘာကြောင့်လုပ်တယ်ဆိုတာကိုတော့ ထုတ်ပြန်ထားတာ မရှိသေးပါဘူး။

အောက်တိုဘာလ ၄ ရက်ကလည်း စစ်ကိုင်းမြို့၊ ပါရမီရပ်ကွက်ရှိ မြို့နယ် လဝကရုံးဗုံးပစ်ခံရပြီး ကလေးငယ် ၁ ဦးနဲ့ လူငယ် ၁ ဦး ထိခိုက်ဒဏ်ရာရရှိခဲ့ပါသေးတယ်။

မြေလတ်အသံ၊ ဒီဇင်ဘာ ၂၃၊ ၂၀၂၂။

လက်ရှိဒီဇင်ဘာလအတွင်း စစ်ကိုင်းတိုင်း၊ ရေဦးမြို့နယ်ကို နယ်မြေရှင်းလင်းရေးလုပ်မယ်ဆိုပြီးတော့ စစ်ကြောင်းထိုးလာတဲ့ စစ်ကောင်စီစစ်ကြောင်း ၂ ခုက ကျေးရွာ ၂၃ ရွာကို မီးရှို့ဖျက်စီးသွားခဲ့တယ်လို့ ဒေသခံတွေက ပြောပါတယ်။

အဲဒီစစ်ကြောင်း ၂ ခုကတော့ ခမရ (၃၆၃)နဲ့ ခလရ (၇၀၁) တို့ဖြစ်ကြပြီး၊ သူတို့ကခန့်မှန်းခြေ အင်းအား ၂၀၀ ကျော်လောက်နဲ့ ဒီဇင်ဘာv ၁၀ ရက်ကနေစတင်ပြီး ၂၂ ရက်အထိ ရွာပေါင်း ၂၃ ရွာကို အကြောင်းမဲ့ မီးရှို့ဖျက်ဆီးသွားခဲ့ကြတာဖြစ်တယ်လို့ ရေဦး ပကဖ/ပလဖရဲဘော် အမေ့သားက မြေလတ်အသံကို ပြောပါတယ်။

“၂၃ ရွာဆိုတော့ မီးလောင်ပြာကျသွားတဲ့နေအိမ်တွေက အိမ်ခြေတထောင်ကျော်လောက် ရှိမယ်လို့ခန့်မှန်းထားပါတယ်။ မြေပြင်အခြေအနေက မကောင်းသေးတော့ စာရင်းတိတိကျကျကိုတော့ မကောက်နိုင်သေးဘူးဗျ။ မီးရှို့ခံရတဲ့ရွာတွေက ရွာလုံးကျွတ်များတယ်။ အဲဒီမှာ အိမ်ခြေသုံးရာရှိတဲ့ရွာကြီးတွေလည်းပါတာ။ စစ်​ကောင်စီတွေက တရွာဝင်၊တရွာထွက်လှည့်ပတ်ပြီးတော့ မီးရှို့နေတာဗျ” လို့ဆိုပါတယ်။

အခုလို နေအိမ်တွေမီးရှို့ခံလိုက်ရတဲ့ ကျေးရွာ ၂၃ ရွာက ခန့်မှန်းလူဦးရေ ၅ ထောင်ကျော်ကို ကာကွယ်ရေးတပ်ဖွဲ့တွေနဲ့ မီးရှို့မခံလိုက်ရတဲ့ ကျေးရွာသားတွေပူးပေါင်းပြီးတော့ နေထိုင်၊စားသောက်ရေးတွေကို တတ်နိုင်သလောက် ဖြေရှင်ပေးထားရတယ်လို့ ရဲဘော်အမေ့သားက ပြောပါတယ်။

“ဒေသခံတွေမှာက စားဖို့ထက်အခုလက်ရှိနေဖို့ တဲလေးတွေတောင်မရှိတဲ့သူများတယ်ဗျ။ တောင်သူတွေမှာဆိုရင်လည်း စပါးတိုက်တွေ၊ နေလှန်းထားတဲ့စပါးတွေ မီးရှို့တဲ့အထဲပါသွားတော့ ဘာမှမကျန်တော့ဘူး။ ပြီးတော့တရက်လုပ်မှ တရက်စားရတဲ့သူတွေကများတယ်။ စားဖို့အတွက်ကိုတော့ ရွာနီးစပ်တွေက ထမင်းထုပ်တွေ၊ ဆန်ပိုင်းလေးတွေ လာပေးကြပါတယ်။ အဲဒါလေးတွေနဲ့ပဲ ဖြေရှင်းနေရတာပေါ့။ အကူအညီတွေတော်တော်လည်း လိုအပ်နေပါတယ်” လို့ဆိုပါတယ်။

မီးရှို့ခံလိုက်ရတဲ့ကျေးရွာတွေကတော့ ဒီဇင်ဘာ ၁၀ ရက်မှာ ပေါက်သာ၊ ဇိန့်ဇွန်း၊ ပိဋကတ်ကျ၊ ၁၁ရက်မှာ မုတ်ဆီ၊ ၁၃ ရက်မှာ ရွာမိဿ၊ ၁၄ ရက်မှာ ချမ်းသာ၊ ကုန်းသာ၊ ရွာသစ်၊ ထန်းပင်ကုန်း၊ ၁၅ ရက်မှာ သံသည်၊ ၁၆ ရက်မှာ ဇဝ၊ ရွက်ဖိုး၊ တောင်ကုန်း၊ မဲအိုး၊ ၁၈ ရက်မှာ ချောင်းဆုံ၊ ငှက်ပျောတော၊ ကွမ်းအုံ၊ ၁၉ ရက်မှာ မကျည်းကုန်း၊ ညောင်ပင်သာ၊ ၂၂ ရက်မှာ ရွာဗုကြီး၊ ပေကုန်း၊ ကလှဇဥ်၊ ကြိုတိမ်ရွာတို့ဖြစ်ကြပါတယ်။

စစ်ကိုင်း၊ ဒီဇင်ဘာ ၂၃၊ ၂၀၂၂။

စစ်ကိုင်းတိုင်း၊ ကန့်ဘလူမြို့နယ်၊ ဂါးဂလှော်ရွာကို စစ်ကောင်စီစစ်ကြောင်း ဝင်ရောက်မီးရှို့ပြီးနောက် အမျိုးသမီး၂ ဦးအပါအဝင် ဒေသခံ ၄ ဦးပျောက်ဆုံးနေကာ မီးရှို့ခံထားရတဲ့ အရိုးစုတချို့လည်းရှိနေတယ်လို့ သိရပါတယ်။

ဒီဇင်ဘာလ ၁၇ ရက်ကနေ ဒီကနေ့ထိပျောက်ဆုံးနေဆဲဖြစ်ပြီး ဧည့်သည်တွေစားသောက်ဖို့အတွက် ရွာဘေးက တောင်ကုန်းတခုမှာ ချက်ပြုတ်နေချိန် ခမရ-‌၃၆၈ စစ်ကြောင်းက အင်အား ၁၆၀ လောက်နဲ့ ရွာကို ရုတ်တရက်ဝင်စီးတဲ့အတွက် ပြင်ဆင်ချိန်ပြေးချိန်မရဘဲ ဖြစ်သွားခဲ့တာလို့ ဒေသခံအမျိုးသမီးတဦးက ပြောပါတယ်။

“အမျိုးသမီး၂ ဦးကတော့ အစအနကိုပျောက်နေတာ၊ အဲ့ဘက်က တောနက်လို့ ပြေးရင်းနယ်လွန်သွားတာလားတော့ မသေချာဘူး၊ အမတို့အတွေ့ကြုံအရဆိုရင်တော့ ဖမ်းသွားပြီထင်တယ်၊ ညမလေးတယောက်ဆို အမတို့ရဲဘော်နဲ့အိမ်ထောင်ကျတဲ့ ကျောင်းဆရာမလေး၊ သူတို့က မြန်မာလို ၁၃ ရက်နေ့ မင်္ဂလာဆောင်၊ စခတွေဝင်တာက ၉ ရက်နေ့ဆိုတော့၊ မင်္ဂလာပွဲပျက်တဲ့အပြင် သတိုးသမီးလေးပါ ပျောက်သွားတာပေါ့၊ သူလည်း တအားကိုစိတ်ထိခိုက်နေတယ်။”လို့ ပြောပါတယ်။

စစ်ကြောင်းထွက်သွားပြီးနောက် ရွာထဲမှာအသတ်ခံရတဲ့ ဦးရွှေဘဆိုသူရဲ့အလောင်းနဲ့ ရုပ်ဖျက်မီးရှို့ခံထားရတဲ့ အမျိုးသားအရိုးစု ၂စု တွေ့ခဲ့ပြီး၊ ဒေသခံတွေကတော့ အဆိုပါအလောင်းတွေဟာ ချက်ပြုတ်တဲ့နေရာကနေ ဖမ်းဆီးခံလိုက်ရတဲ့သူတွေဖြစ်နိုင်ပြီး အမျိုးသမီးတွေကတော့ ပျောက်ဆုံးနေဆဲဖြစ်တယ်လို့ ပြောဆိုနေကြပါတယ်။

အိမ်ခြေ ၁၀၀ ဝန်းကျင်ရှိတဲ့ ဂါးဂလှော်ရွာဟာ စစ်ကောင်စီခြေမြန်တပ်ရင်းရဲ့ လက်နက်ကြီးနဲ့ပစ်ခတ်ကာ မီးရှို့မှုတွေကြောင့် ဘုန်းကြီးကျောင်းနဲ့ ကျန်းမာရေးဆေးပေးခန်းအပြင် နေအိမ် ၂၃ လုံးမီးရှို့ ဖျက်ဆီးခံခဲ့ရတာလည်း ဖြစ်ပါတယ်။

အဲ့ဒီစစ်ကြောင်းဟာ လွှဲ‌‌ဆိပ်၊ လက်ခုပ်ကုန်း၊ ဘောရွာတို့ကို မီးရှို့ခဲ့တဲ့စစ်ကြောင်းဖြစ်ပြီး အခုလက်ရှိ ကန့်ဘလူရှေ့ခြမ်းက စစ်ကောင်စီဂိတ်ကြီးရှိတဲ့ ဇင်းရွာဘက်မှာရှိနေတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၃၊ ၂၀၂၂။

စစ်ကိုင်းတိုင်း၊ မြောင်မြို့နယ်၊ ညောင်ကားယားကျေးရွာထဲကို စစ်ကောင်စီက ဒရုန်းနဲ့ အီနာဂါတွေကြဲချခဲ့လို့ လူနေအိမ်တချို့ပေါ်ကျရောက်ပေါက်ကွဲခဲ့ပြီး အိမ်ထဲမှာရှိတဲ့သူတွေ ထိမှန်ခဲ့သလို ကလေးတဦးလည်းသေဆုံးခဲ့တယ်လို့ သိရပါတယ်။

ဒီဇင်ဘာလ ၂၃ ရက်ဒီကနေ့မနက် ၁၀ နာရီက ဧရာဝတီမြစ်အရှေ့ဘက်ကမ်းမှာရှိတဲ့ ကိုင်းကျေးရွာကနေ ‌မြစ်အနောက်ဖက်ကမ်းက ညောင်ကားယားရွာထဲကို ၆၀ မမ ၃လုံးတွဲ ၂ခါကြဲခဲ့တာဖြစ်ပြီး တလုံးကတော့ နေအိမ်ထဲမှာရှိနေတဲ့ မြေးအဖွား၂ယောက်ရှေ့ကို ကျကာပေါက်ကွဲခဲ့တယ်လို့ ဆိုပါတယ်။

“ကလေးကတော့ နောက်စေ့နဲ့ခေါင်းတွေမှန်တာ၊ အဖွားကလည်း တော်တော်လေးတော့ ကုရမယ့်အနေထားမှာရှိတယ်၊ တချို့ကကျောတွေ၊ ပေါင်တွေ၊ ရင်ဘတ်တွေ နံပိုင်းတွေ အစမှန်ဒဏ်ရာရတယ်၊ အီနာဂါက ခဏခဏလာလာချတယ်၊ နဂါးပေါက်ရွာကိုချတာတောင်မှ ၃ကြိမ်ရှိသွားပြီ။” လို့ CDSOM အဖွဲ့တာဝန်ခံကပြောပါတယ်။

ပေါက်ကွဲမှုကြောင့် ၄ နှစ်အရွယ်ကလေးငယ်တဦး သေဆုံးခဲ့ပြီး၊ ၁၆ နှစ်အရွယ် လူငယ်တဦးနဲ့ အမျိုးသမီး ၅ဦးထိမှန်ခဲ့ကာ၊ အသက် ၆၀အရွယ် အဖွားနဲ့ ၁၆နှစ်ရွယ်လူငယ်တဦးက ဒဏ်ရာတွေများတဲ့အတွက် စောင့်ကြည့်ကုသပေးရမယ့် အခြေနေမှာရှိတယ်လို့ ဆိုပါတယ်။

ဧရာဝတီမြစ် အရှေ့ဘက်ကမ်းကရွာတိုင်းနီးပါးမှာ စစ်တပ်အထိုင်စခန်းတွေရှိပြီး အဆိုပါစခန်းတွေကနေ ကျေးရွာပြည်သူတွေဆီကို မကြာခဏဆိုသလို အီနာဂါဗုံးသီးတွေ လာကြဲလေ့ရှိကာ ပထမအကြိမ်တွေတုန်းက အနည်းငယ်ထိခိုက်တာမျိုးရှိပေမယ့် ခုတကြိမ်ကတော့ လူသေတဲ့ထိ အဆိုးရွားဆုံးဖြစ်တယ်လို့ သိရပါတယ်။

စစ်ကိုင်း၊ ဒီဇင်ဘာ ၂၃၊ ၂၀၂၂။

စစ်ကိုင်းတိုင်း၊ ဒီပဲယင်းမြို့နယ်မှာ စစ်ကောင်စီတပ်စစ်ကြောင်းထိုးပစ်ခတ်နေပြီး ကလေးငယ်သုံးဦး လက်နက်ကြီးထိမှန်ထားတယ်လို့ ဒီပဲယင်းမြို့နယ်ညီနောင်များအဖွဲ့က ဆိုပါတယ်။

ထိခိုက်ဒဏ်ရာရသူသုံးဦးမှာ မသိမ့်ရတာနာစိုး(ခ)မဖွေးဖွေး အသက် ၁၁ နှစ်ဖြစ်ပြီး ဗိုက်ပေါက်ထွက်ခဲ့သလို မောင်အောင်ငွေဖြိုး အသက် ၁၄ နှစ်မှာ နောက်ကျောလက်နက်ကြီးစ ဖောက်ဝင်ပြီး ဒူးခေါင်းထိခိုက်ခဲ့ပြီး ကျန်ကလေးငယ်တဦးကတော့ လက်ပွန်းပဲ့-အသေးစားဒဏ်ရာရရှိခဲ့တယ် လို့ဆိုပါတယ်။

စစ်ကြောင်းထိုးမီးရှို့နေတဲ့ စစ်ကောင်စီတပ်ဟာ ဒီနေ့ဒီဇင်ဘာလ ၂၃ ရက်မှာ ဒီပဲယင်းမြို့နယ်၊ အနောက်တောင်ဘက်ခြမ်းကျေးရွာတွေကို ဝင်ရောက်လာသလို လက်နက်ကြီးတွေနဲ့ပစ်ခတ်လို့ ဒီပဲယင်းမြို့နယ်၊ ကြည်ဘုရားထွက်ကျေးရွာအတွင်းကျရောက်ပြီး ကလေးငယ်သုံးဦးလက်နက်ကြီးထိမှန်ခဲ့သလို ဒေသခံတွေ ထွက်ပြေးတိမ်းရှောင်နေရတယ်လို့ ဆိုပါတယ်။

“ကလေးတွေအပြင် နွားတွေလည်းထိမှန်ခဲ့တယ်၊ ခုကတော့ အားလုံးပြေးနေရလို့ စာရင်းအတိအကျမသိနိုင်သေးဘူး”လို့ ဒီပဲယင်းမြို့နယ်ညီနောင်များအဖွဲ့က ဆိုပါတယ်။

စစ်ကောင်စီတပ်ဟာဒီဇင်ဘာလအတွင်းမှာပဲ ဒီပဲယင်းမြို့နယ်၊ ချောင်းပေါက်ကျေးရွာကနေအိမ် ၃၂ လုံး ကိုမီးရှို့ဖျက်ဆီးသွားခဲ့သလို ဒီဇင်ဘာလ ၂၂ ရက်ကလည်း ပျံကျရွာကို မီးဝင်ရှို့သွားခဲ့ကြောင်း သိရပါတယ်။

ဒီပဲယင်းမြို့နယ်အတွင်း စစ်ကောင်စီတပ်ဟာ ဒီဇင်ဘာလ ၁ ရက်မှ ၁၀ ရက်အထိ ကျေးရွာပေါင်း ၁၉ ရွာမှ ပြည်သူနေအိမ် ၁၇၀၀ ကျော်မီးရှို့ဖျက်ဆီးသွားခဲ့ပြီး၊ အာဏာသိမ်းပြီးချိန်ကစလို့ ၂ နှစ်နီးပါး ကာလအတွင်း မီးရှို့ဖျက်ဆီးခံရမှု နေအိမ် ၃၀၀၀ ကျော်သွားပြီလို့ဆိုပါတယ်။

ဒီဇင်ဘာလအတွင်း စစ်ကြောင်းထိုးဖျက်ဆီးမှုတွေကြောင့် မုံရွာ – ဒီပဲယင်း – ရေဦး ကားလမ်း ယာဥ်များအသွားအလာတွေရပ်နားပေးကြဖို့လည်း ဒေသတွင်းအဖွဲ့တွေက မေတ္တာရပ်ခံထားတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၃၊ ၂၀၂၂။

စစ်ကိုင်းတိုင်းမုံရွာမြို့နယ်၊ သာစည်ရွာက အကျဥ်းထောင်အသစ်မှာ အကျဥ်းသားမထားပဲ ဝင်ရောက်တပ်စွဲနေတဲ့စစ်သားတွေကို ဒေသခံပြည်သူ့ကာကွယ်ရေးတပ်ဖွဲ့တွေက လက်နက်ကြီးတွေနဲ့တိုက်ခိုက်ခဲ့တယ်လို့ DRPA က သတင်းထုတ်ပြန်ထားပါတယ်။

အင်အား ၃၀ လောက်နဲ့တပ်စွဲထားတာဖြစ်ပြီး ဒီဇင်ဘာလ ၂၁ ရက်ည ၉ နာရီခွဲလောက်မှာလက်နက်ကြီးတွေနဲ့ နာရီဝက်ကြာခန့်တိုက်ခိုက်ခဲ့ကြတာလို့ ဆိုပါတယ်။

“ကျနော်တို့ မဟာမိတ်တွေပူးပေါင်းပြီး ၄၀ မမ ၆၀ မမ ၁၂၀ မမ တွေနဲ့ သွားပစ်တာဗျ။ သာစည်လမ်းတလျှောက် စစ်တာဆေးတာတွေဒေသခံတွေကို ဖိနှိပ်တာတွေ လုပ်နေတဲ့အတွက် မုံရွာပကဖရဲ့ ခွင့်ပြု့မိန့်ယူပြီး mission ဖော်ဆောင်ခဲ့တာဗျ” လို့ DRPA ရဲ့သတင်းတာဝန်ခံကပြောပါတယ်။

မဟာမိတ်တွေတိုက်ခိုက်ချိန်မှာ စစ်သားတွေပြန်ပြီးပစ်ခတ်တာမျိုး မလုပ်တော့ကြောင်း ဒီဇင်ဘာလ ၁၆ ရက်ညက စီးပွားရေးတက္ကသိုလ်ကျောင်းနားက ကင်းဂိတ်ကို တိုက်ခိုက်တုန်းကမဟာမိတ်တွေ ပစ်ခတ်နေတဲ့ဘက်ကို ထွက်လာတဲ့စစ်သားတချို့ မိုင်းကွင်းမိပြီးအထိနာထားတာရှိသလို အခုအခါမှာလည်း အရက် မူးနေတာနဲ့ အရင်လိုမိုင်းကွင်းထိမှာ ကြောက်ပြီး ပြန်မပစ်တော့တာလို့ သူကဆက်ပြောပါတယ်။

တိုက်ခိုက်မှုကြောင့် ထောင်အတွင်းရှိ ကင်းစခန်းတခုမီးလောင်ပျက်စီးသွားပြီး စစ်ကောင်စီတပ်သားတွေရဲ့ထိခိုက်မှုကို မသိရှိသေးဘူးလို့ ထုတ်ပြန်ချက်မှာ ဖော်ပြထားပါတယ်။

အဲဒီတိုက်ခိုက်မှုမှာ မဟာမိတ်တပ်ပေါင်းစုံအဖွဲ့ဝင်တွေဖြစ်တဲ့ DRPA(မုံရွာ)မြို့ပြပြောက်ကျားတပ်ဖွဲ့၊ မုံရွာခရိုင်တပ်ရင်း24-MONYWARANGER TRUTHARMY၊MACYပြောက်ကျားတပ်ဖွဲ့၊ ပုဏ္ဏကပြောက်ကျားတပ်ဖွဲ့၊ FUTURESTAR(L.P.D.F)၊ Thousand Of Silver Stars နယ်မြေစည်းမခြားပြောက်ကျားတပ်ဖွဲ့တို့ပူးပေါင်းခဲ့တာလို့ သိရပါတယ်။

DRPA အဖွဲ့ ဟာဒီဇင်ဘာလ ၇ ရက်ကလည်း စစ်ကောင်စီဖမ်းဆီးထားရာကထွက်ပြေးလာသူကို လိုက်ဖမ်းတဲ့စစ်တပ်နဲ ကနီမြို့နယ်၊ဆင်တန်းရွာအနီးမှာထိပ်တိုက်တိုးပြီး နာရီဝက်ကြာ ပြန်လှန်ပစ်ခတ်မှု ဖြစ်ပွားခဲ့သေးပါတယ်။

စစ်ကိုင်း၊ ဒီဇင်ဘာ ၂၃၊ ၂၀၂၂။

စစ်ကိုင်းတိုင်း၊ မုံရွာမြို့လယ်မီးပွိုင့်မှာ ဒီဇင်ဘာလ ၂၃ ရက် ဒီနေ့မနက်အစောပိုင်းက လူငယ်တွေဦးဆောင်ပြီး အာဏာရှင်ဆန့်ကျင်ရေးပျောက်ကြားသပိတ်ပြုလုပ်ခဲ့ကြပါတယ်။

“စစ်ခွေး နိဂုံး2023” စာသားပါဘန်နာကိုကိုင်ဆောင်ကြွေးကြော်ပြီး မင်းအောင်လိူင်ဓါတ်ပုံကို နင်းခြေဖျက်စီးကာ အာဏာရှင်စနစ်ဆန့်ကျင်ရေး ရေးသားထားတဲ့ စာရွက်တွေဖြန့်ကြဲခဲ့ကြတယ်လို့ သိရပါတယ်။

Monywa Road Information (MRI) ဖွဲ့စည်းခြင်းတနှစ်ပြည့်ဂုဏ်ပြုခြင်းအနေနဲ့ စစ်အာဏာရှင်ဆန့်ကျင်ရေး ပျောက်ကြားသပိတ်ပြုလုပ်တာဖြစ်ပြီး အညာပစ်တိုင်းထောင်လေးများအဖွဲ့ကဦးဆောင်ကာ မုံရွာတော်လှန်လူငယ်ကွန်ယက်က ပူးပေါင်းဝန်းရံခဲ့ကြတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၂၊ ၂၀၂၂။

စစ်ကိုင်းမြို့နယ်၊ မိုးသောက်(ဘောက်သောက်) ကျေးရွာအုပ်စုအတွင်းရှိ ကျေးရွာ ၅ ရွာက နေအိမ် ၇၀၀ ကျော်ကို ဒီဇင်ဘာလ ၂၁ ရက်မနေ့မနက်ပိုင်းမှာ စစ်တပ်ကဝင်ရောက်မီးရိူ့ခဲ့တယ်လို့ဒေသခံတဦးဆီက သိရပါတယ်။

စစ်ကိုင်းမြို့အခြေစိုက် ခမရ ၃၃ တပ်က မနေ့မနက် ၁၀ နာရီလောက်မှာ ဝင်ရောက်မီးရိူ့ခဲ့လို့ မိုးသောက်ရွာကနေအိမ် ၂၅၀၊ လင်းယဥ်ရွာက ၁၅၀၊ လင်းယဉ်ရွာသစ်ကနေအိမ် ၁၃၀၊ ရှမ်းကုန်းရွာက ၁၄၈ အိမ်နဲ့ ကုန်းကြီးရွာက ၅၁ အိမ်အပါ စုစုပေါင်း လူနေအိမ် ၇၂၉လုံး မီးရှို့ဖျက်ဆီးခံခဲ့ရတာလို့ သိရပါတယ်။

“မနေ့ကမနက် ၁၀ နာရီလောက်က တပ်မ ၃၃ ကနေ အင်အား ၇၀ လောက်နဲ့လာပြီး ကုန်းကြီးရွာကို မီးစရိူ့တာပါ၊ မီးဘေးသင့်ပြည်သူခန့်မှန်းခြေ သုံးထောင်ကျော်ရှိပါမယ်။ မီးဘေးသင့်ပြည်သူတွေကတော့ လက်ရှိမှာကြုံသလိုနေထိုင်နေရပါတယ်” လို့ စစ်ကိုင်းသတင်းမှန်ပြန်ကြားရေးတာဝန်ခံက ပြောပါတယ်။

အဲဒီအထဲက လင်းယဥ်ကျေးရွာဟာ နဝမရွှေကျင်သာသနာပိုင်စံကင်းဆရာတော်ကြီးနဲ့မန္တလေးမြို့အနောက်ပြင် မဟာဝိသုဒ္ဓါရုံတိုက်သစ် ဝါဆိုကျောင်းက ရွှေကျင်ဂိုဏ်း သာသနာပိုင် ဆရာတော်ဥုးအဂ္ဃိယတို့ရဲ့ဇာတိရွာဖြစ်တယ်လို့ ပြန်ကြားရေးတာဝန်ခံကဆက်ပြောပါတယ်။

လက်ရှိမှာ မီးဘေးသင့်ပြည်သူတွေအတွက် အရေးပေါ်ရိက္ခာ၊ မိုးကာ၊ အဝတ်အထည်၊စောင်နဲ့ ဆေးဝါးပစ္စည်းတွေ လိုအပ်နေတယ်လို့သိရပါတယ်။

စစ်ကိုင်း၊ ဒီဇင်ဘာ ၂၂၊ ၂၀၂၂။

စစ်ကိုင်းတိုင်းဒေသကြီး၊ ကန့်ဘလူမြို့နယ်၊ စစ်ဘေးရှောင်တွေအတွက် စားနပ်ရိက္ခာနဲ့ဆေးဝါးတွေ အဓိကလိုအပ်နေလို့ အကူညီတွေ လိုအပ်နေတယ်လို့ ကန့်ဘလူတိုင်းဒေသကြီး လွှတ်တော် ကိုယ်စားလှယ် ဦးနေဇင်လတ်က ပြောပါတယ်။

“ကန့်ဘလူဘက်ကို စစ်ကြောင်းတွေက ဖိနေတယ်။ စစ်ကြောင်းတွေ ဝင်တာနဲ့ပြေးရ စစ်ကြောင်းထွက်ရင် ရွာနားပြန်သွားအဲလိုတွေဖြစ်နေတာ။ စစ်ဘေးရှောင်တွေက တစ်နေ့ထက်တစ်နေ့ ပိုများလာတော့ သူတို့အတွက် ရိက္ခာနဲ့ဆေးဝါးတွေလိုအပ်နေတယ်။ ရာသီဥတုကြောင့် ဖျားနာသူတွေလည်း များနေတယ်” လို့ သူက ဆက်ပြောပါတယ်။

အကြမ်းဖက်စစ်ကောင်စီရဲ့ ခမရ(၃၇၆)တပ်က ကန့်ဘလူအတွင်း ဒီဇင်ဘာလ ၁၆ ရက်နေ့ကစပြီး စစ်အင်အား ၁၂၀ လောက် ထပ်မံတိုးချဲ့လာခဲ့ပြီး စစ်အင်အားတိုးချဲ့မှုတွေပြုလုပ်နေသလို ကျေးရွာတွေကို အကြောင်းမဲ့ ဝင်ရောက်မီးရှို့ဖျက်ဆီးတာတွေ ပြုလုပ်နေတယ်လို့ သူကဆက်ပြောပါတယ်။

မနေ့ကလည်း ကန့်ဘလူနယ်ထဲက ပေလယ်ရွာက လယ်တဲ ၁၄ လုံးကို အကြောင်းမဲ့မီးရှို့သွားသလို စစ်ကောင်စီနဲ့ ပျူစောထီးအင်အား ၃၀ ကျော် ဝင်ရောက်လာတယ်လို့ ဆိုပါတယ်။

ကန့်ဘလူနယ်အတွင်း ဒီဇင်ဘာလ နှစ်ပတ်အတွင်းမှာ ပဲဘောရွာ၊ လက်ခုပ်ကုန်းရွာအပါအဝင် ကျေးရွာ ၈ ရွာနီးပါး မီးရှို့ဖျက်ဆီးခံလိုက်ရပြီး အိမ်ခြေ ၃၀၀ နီးပါး မီးလောင်ပျက်စီးခဲ့တယ်လို့ ဆိုပါတယ်။

အကြမ်းဖက်စစ်အုပ်စုစစ်ကြောင်းကြောင့် ကန့်ဘလူအတွင်း ၂၀၂၂ ခုနှစ်အတွင်းမှာ ရွာပေါင်း(၁၈) ရွာက ဒေသခံ ပြည်သူပေါင်း၂‌ သောင်းခွဲကျော် အိုးအိမ်စွန့်ခွါ ထွက်ပြေးတိမ်းရှောင်နေကြရတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၂၊ ၂၀၂၂။

စစ်ကိုင်းတိုင်း၊ တန့်ဆည်မြို့နယ်နဲ့ ရေဦးမြို့ နယ်က ကျေးရွာ ၁၇ ရွာကို စစ်ကောင်စီနဲ့ ပျူစောထီး အင်အား ၁၀၀ ကျော်လောက်က ဒီဇင်ဘာလ ၄ ရက်နေ့မှစတင်ကာ ဒီဇင်ဘာလ ၂၂ ရက် ဒီကနေ့မနက်ပိုင်းအချိန်ထိ မီးရှို့ဖျက်စီးခဲ့တယ်လို့ သိရပါတယ်။

တန့်ဆည်မြို့နယ်မှာ ဒီဇင်ဘာ ၄ ရက်နေ့ကနေ ၁၉ ရက်နေ့အထိ မီးရှို့ဖျက်စီးခံလိုက်ရတဲ့ကျေးရွာတွေကတော့ သာခေါင်ကြီးရွာနေအိမ် ၇၆ လုံး၊ ကမ်းဖြူရွာ နေအိမ် ၄၀ လုံး၊ ဝက်တိုးရွာ ၁၇ လုံး၊ ပုတီးရွာ ၆ လုံး၊ ပေချောင်ရွာ ၉၇ လုံး ၊ ထန်းကုန်းကြီးရွာ ၇၅ လုံး၊ မူးကျင်းစုရွာ ၇၃ လုံး၊ သာဂလရွာ ၄၁ လုံး၊ သာဂရရွာ ၁၁၇ လုံး၊ ထန်းပင်ကုန်းရွာ ၂၉ လုံး၊ ရွာရှည်(မ)ရွာ ၆ လုံး၊ ဂွေးကုန်းရွာ ၁၀ လုံး၊ ဖလံချိုင်ရွာတို့မှ ဆန်စက်ဆီစက်တွေ လည်းပါဝင်ပြီး စုစုပေါင်း အိမ်ခြေ ၈၄၈ လုံး ပြာကျပျက်စီးခဲ့တယ် လို့ ရေဦးမြို့ ပကဖ/ပလဖ ရဲဘော်အမေ့သား ကပြောပါတယ်။

“ဒီစကစတွေက ကန့်ဘလူနယ်ဘက်ကနေ စထွက်လာတာက ၁၈၀ လောက်ပါမယ်ဗျ။၈၀ လောက်က ကန့်ဘလူနယ်ဘက် ပြန်ဝင်သွားတယ်ဗျ။ ၁၀၀ လောက်က တန့်ဆည်နယ်နဲ့ အခုရေဦးနယ်ကိုဝင်လာပြီး ကျေးရွာတွေကို တိုက်ပွဲဖြစ်ပွားခြင်းမရှိပဲ မီးရှို့တာပါ။ အခုတော့ ပျက်စီးအခြေအနေကိုမသိရသေးဘူးဗျ။ စကစတွေကရွာထဲမှာဘဲရှိသေးတယ်။အပျက်အဆီးများနိုင်ပါတယ်။ ရွာဗုကြီး၊ ကလှဇဥ်၊ ပေကုန်း၊ ကြိုတိမ်ရွာတွေက ကပ်ရက်တွေပါဗျ” လို့ဆိုပါတယ်။

တပ်မ (၃၃) လက်အောက်ခံ ခမရ ၃၆၁ နဲ့ ၃၆၉ တပ်ရင်းတွေက စစ်ကောင်စီတွေနဲ့ဗျူစောထီးတွေ အင်အား ၁၀၀ကျော်က စစ်ကြောင်း ၂ကြောင်းနဲ့ ရေဦးမြို့နယ်က ကျေးရွာ ၄ ရွာဖြစ်တဲ့ ရွာဗုကြီး၊ ပေကုန်း၊ ကလှဇဥ်၊ ကြိုတိမ်ရွာတွေကို ဒီဇင်ဘာလ ၂၂ ရက်ဒီကနေ့မနက်ပိုင်းမှာ မီးရှို့ဖျက်စီးနေတယ်လို့ ရဲဘော်အမေ့သားက ပြောပါတယ်။

ပြီးခဲ့တဲ့၂၀၂၁ ဖေဖေါ်ဝါရီလ ၁ ရက်ကစလို့ အခု၂၀၂၂ ခုနှစ်၊ သြဂုတ်လ ၂၅ ရက်အထိ စစ်ကိုင်းတိုင်းက နေအိမ်ပေါင်း ၂၀၁၅၃ လုံး၊ မကွေးတိုင်းက နေအိမ်ပေါင်း ၅၄၁၈ လုံး၊ ချင်းပြည်နယ်က နေအိမ်ပေါင်း ၁၄၁၇ လုံးနဲ့ တခြားမြို့နယ်တွေက နေအိမ်ပေါင်း ၁၄၀၀ လုံးတို့ကို စစ်ကောင်စီတပ်သားတွေက မီးရှို့ဖျက်စီးခဲ့တယ်လို့ Data For Myanmar ရဲ့အချက်အလက်မှတ်တမ်းအရ သိရပါတယ်။