စစ်ကိုင်း

ရေဦး၊ မတ် ၆၊ ၂၀၂၃။

စစ်ကိုင်းတိုင်း၊ ရေဦးမြို့နယ်၊ ဖလံဂုဏ်ရွာက ကျေးရွာကာကွယ်ရေးတပ်ဖွဲ့ဝင် ၅ ဦး ကျဆုံးသွားတဲ့အပြင် အခြေချနေထိုင်နေတဲ့ ကျောင်းစာသင်ခန်း တခုလည်း စီးနင်းခံလိုက်ရတယ်လို့ ကျေးရွာကာကွယ်ရေး တပ်ဖွဲ့ဝင်ဆီက သိရပါတယ်။

မတ်လ ၄ ရက်နေ့ မနက် ၃ နာရီခွဲလောက်မှာ စစ်ကောင်စီစစ်ကြောင်းဟာ အင်အား ၆၀ နီးပါးနဲ့ ဖလံဂုဏ်ရွာထဲက နေအိမ်တအိမ်မှာ ဝင်ရောက်ခိုလှုံခဲ့ပြီး မနက် ၅ နာရီကျော်လောက်မှာတော့ ရွာရဲ့ စာသင်ကျောင်းကို ဝင်ရောက်စီးနင်းခဲ့လို့ ကာကွယ်ရေးတပ်ဖွဲ့ဝင် ၅ ဦး ကျဆုံးခဲ့တာပါ။

ဒါအပြင် ထွက်ပြေးတိမ်းရှောင်ကြတဲ့ ရဲဘော် ၂ ဦးနဲ့ ရွာသားတဦးလည်း ထိခိုက်ဒဏ်ရာ ရရှိသွားတယ်လို့ ရေဦးမြို့နယ်အတွင်းက ကျေးရွာလုံခြုံရေးတပ်ဖွဲ့ဝင် တဦး ဖြစ်တဲ့ ကိုရှောလူ က မြေလတ်အသံကို ပြောပါတယ်။

“တခြားရဲဘော်တွေကတော့ နယ်မြေကျွမ်းကျင်မှုကြောင့် လွတ်သွားတယ်။ ရဲဘော် ၅ ယောက်ကတော့ စခန်းဝင်စီးတဲ့အချိန်မှာပဲ အပစ်ခံလိုက်ရတာပါ။ ရွာသားတဦးကတော့ ဆီးခုံနဲ့ ခြေထောက်ထိသွားတယ် စိုးရိမ်ရတယ်။ စခန်းကနေ သေနတ် အတိုတလက်၊ အရှည်တလက် ပါသွားတယ်။ ရဲဘော်တွေရဲ့အိတ်ထဲကနေ အဝတ်အစားအသစ်တွေ ယူသွားတယ်” လို့ ဆိုပါတယ်။

ကျဆုံးသွားတဲ့ ရဲဘော်တွေဟာ အသက် (၁၇) နှစ်အရွယ် ၃ ဦး၊ အသက် (၂၀)ကျော် ၁ ဦး နဲ့ အသက် (၃၀) ကျော် ရဲဘော်တို့ပဲ ဖြစ်ပါတယ်။ သူတို့ရဲ့ နာမည်တွေကိုတော့ မိသားစုဝင်ရဲ့လုံခြုံရေးအရ ထုတ်ဖော်ပြောဆိုခြင်း မရှိပါဘူး။

စစ်ကောင်စီစစ်ကြောင်းဟာ ကျေးရွာကနေ မထွက်ခွာခင် ဒေသခံတဦးရဲ့နေအိမ်ကို မီးရှို့သွားတဲ့အပြင် ကျဆုံးသွားတဲ့ ရဲဘော် ၅ ဦးကို မီးရှို့သွားပြီး ရွာသားတွေကိုလည်း ကျေးရွာဘုန်းကြီးကျောင်းထဲမှာ ဝင်ရောက်နေထိုင်ခိုင်းတယ်လို့ တာဝန်ခံက ဆက်ပြောပါတယ်။

“ရွာသားတွေအားလုံးကို ဘုန်းကြီးကျောင်းထဲမှာ ဝင်ခိုင်းတယ်။ ပြီးတော့ သူတို့(စစ်ကောင်စီ)တွေ ရွာထဲကနေ နဲနဲစီ ထွက်သွားကြတယ်။ ဘယ်ကိုထွက်သွားလဲဆိုတာတော့ မသိဘူး။ ရွာသားတချို့ကတော့ ရွာထဲမှာ ပြန်နေပြီး၊ တချို့ကတော့ ရွာထဲမှာ ပြန်မနေကြသေးဘူး” လို့ ဆိုပါတယ်။

အခုလို ဝင်ရောက်ပစ်ခတ်ခံရတာဟာ ပထမအကြိမ်ဖြစ်ကြောင်း ကျဆုံးသွားတဲ့ရဲဘော် ၅ ဦးရဲ့ ရုပ်အလောင်းတွေကို မြေမြှုပ်သဂြိုလ်ပေးမယ်လို့လည်း သိရပါတယ်။

စာတည်း – 007

ရွှေဘို၊ မတ် ၆၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်မှာ ဆိုင်ကယ်စီးလာတဲ့ စစ်သားနဲ့ ပျူစောထီးတဦး မတ်လ ၅ ရက်က မိုင်းထိခဲ့တာကြောင့် ပျူစောထီးတဦးသေကာ စစ်သားတဦး ပြင်းထန်ဒဏ်ရာ ရရှိသွားတယ်လို့ ဗိုလ်ကျားရိုင်း-ရွှေဘို LPDF က သတင်းထုတ်ပြန်ထားပါတယ်။

ရွှေဘိုမြို့နယ် ညောင်ကိုင်းရွာကနေ စစ်တပ်စခန်းချထားတဲ့ ဇီးဖြူကုန်းရွာကို အပြန် မနေ့နေ့လယ် ၁၂ နာရီလောက်မှာ ဂျိုးမြေဇင်းရွာနဲ့ မြို့လှရွာကြားမှာ မိုင်းမိခဲ့တာ​လို့ သိရပါတယ်။

“ဆိုင်ကယ်က စုတ်ပြတ်သွားပြီးတော့ ပျူကတော့ ပွဲချင်းပြီး သေသွားတယ်။ စစ်သားကတော့ ခြေတဖက် ပြတ်သွားတယ်။ သေနတ်ဖောက်သံလည်း မကြားရဘူး။ တနာရီလောက်ကြာတော့မှ အလောင်းနဲ့ ဒဏ်ရာရစစ်သားကို လာကောက်သွားတယ်” လို့ ဗိုလ်ကျားရိုင်း – ရွှေဘိုရဲ့တာဝန်ခံ ရဲဘော်ဗလကြီးက ပြောပါတယ်။

ခြေတဖက် ပြတ်သွားသူဟာ တပ်ကြပ်ငစိုးဆိုသူ ဖြစ်ပြီး သေဆုံးတဲ့ ပျူစောထီးဟာ တည်သီးတောရွာသား ဝေဠုဆိုသူ ဖြစ်တယ်လို့ သူက ဆက်ပြောပါတယ်။

ဗိုလ်ကျားရိုင်း-ရွှေဘို (LPDF) အဖွဲ့ ၊ ဗိုလ်ဂျပန်ကြီး (T.T.T) – SHWEBO (LPDF) အဖွဲ့၊ မတစ်ထောင်(တစ်ကောင်ဘွား ) – ဒီပဲယင်းအဖွဲ့နဲ့ ရွှေဘိုမြို့နယ် တိုက်နယ် -၂ မဟာမိတ်အင်အားစုတွေက ပူးပေါင်းခဲ့တာလို့ သိရပါတယ်။

ဗိုလ်ကျားရိုင်း ရွှေဘိုနဲ့ပူးပေါင်းအဖွဲ့ဟာ ဖေဖေါ်ဝါရီလ ၂၁ ရက်ကလည်း ရွှေဘိုမြို့နယ်ကို စစ်သားနဲ့ပျူစောထီး အင်အား ၇၀ ကျော်လောက်က ပေါက်ချိုင်ကျေးရွာကို စစ်ကြောင်းထိုးမီးရှို့နေချိန် တိုက်မိုင်း၊ ဆွဲမိုင်း၊ လက်နက်ကြီးတွေ၊ ဒရုန်းတွေနဲ့ တိုက်ခိုက်ခဲ့လို့ စစ်သားနဲ့ပျူစောထီးတွေ သေ​ဆုံးဒဏ်ရာ ရခဲ့ပါသေးတယ်။

စာတည်း – 007

ကနီ၊ မတ် ၆၊ ၂၀၂၃။

စစ်ကိုင်းတိုင်း၊ ကနီမြို့နယ်က ကျေးရွာတရွာမှာ မတ်လ ၅ ရက် မနေ့ကမနက်ပိုင်းက ဒေသတွင်းတော်လှန်ရေး အင်အားစုဝင်တွေ ဦးဆောင်ပြီး ကလေးသူငယ်အခွင့်အရေးဆိုင်ရာ ဟောပြောပွဲကို ပြုလုပ်ခဲ့ကြပါတယ်။

ပဋိပက္ခတွေကြားမှာ ကလေးသူငယ်တွေအနေနဲ့ စိတ်ဓာတ်ကျမသွားဖို့၊ ဒီလိုအခက်အခဲအကြပ်အတည်းကြားမှာ တော်လှန်ကြရေးနဲ့ ကြားကာလအခြေပြုပညာရေးတွေကို သင်ကြားတဲ့နေရာမှာ စိတ်ဓာတ်မကျဘဲ နိုးကြားပါဝင်ကြဖို့အတွက် ရည်ရွယ်တယ်လို့ နွေဦးတော်လှန်ရေးသပိတ်အင်အားစု (ကနီမြို့နယ်)မှ တာဝန်ရှိသူတဦးက ပြောပါတယ်။

“ဟောပြောပွဲ ကြာချိန်ကတော့ ၆ နာရီလောက် ကြာမြင့်ခဲ့တယ်။ ကလေးသူငယ်တွေ၊ မိဘတွေ စုစုပေါင်း ငါးရာလောက် တက်ခဲ့ကြတယ်။ ဖက်ဒရယ်ဒီမိုကရေစီစနစ်ကို သွားတဲ့အချိန်မှာ ကလေးသူငယ်အခွင့်အရေးက ရသင့်တယ်ဗျ။ စစ်ပွဲကြားနဲ့ ပဋိပက္ခကြားမှာ ကလေးသူငယ်အခွင့်အရေးတွေ မရတာရှိတယ်။ ကလေးတွေအနေနဲ့လည်း ဒီလိုအခြေအနေမှာ ငါတို့ရသင့်တဲ့ အခွင့်အရေးတွေ ရှိပါလားဆိုတာကို သိဖို့ လိုတယ်” လို့ ပြောပါတယ်။

ဒီဟောပြောပွဲမှာ ကလေးသူငယ်အခွင့်အရေး တက်ကြွလှုပ်ရှားသူများ၊ Committee Representative Sagaing Region Hluttaw – CRSH လွှတ်တော်၊ ကနီမြို့နယ် ပြည်သူ့လုံခြုံရေးအဖွဲ့၊ ကနီမြို့နယ် နွေဦးတော်လှန်ရေး သပိတ်အင်အားစုတွေရှိ ကလေးသူငယ်အခွင့်အရေး ကျွမ်းကျင်သူတွေက ကလေးသူငယ်တွေရဲ့ အခွင့်အရေးအကြောင်း အသီးသီးကို ဟောပြောခဲ့ကြပြီး၊ ဟောပြောပွဲကို ဒေသခံပြည်သူ ၅၀၀ ဝန်းကျင် တက်ရောက်ခဲ့တယ်လို့ ဆိုပါတယ်။

ဒါ့အပြင် ကလေးသူငယ်အခွင့်အရေး မိဘ၊ ဆရာဝန်းရံပေး၊ ဖက်ဒရယ်ပညာရေးရရှိရေး ဒို့အရေးစတဲ့ ကြွေးကြော်သံတွေနဲ့အတူ ကလေးသူငယ်တွေက မြန်မာ့ယဥ်ကျေးမှု အကတွေနဲ့ ကပြဖျော်ဖြေခဲ့ကြပါတယ်။

အလားတူ တော်လှန်လူငယ်တေးဂီတအဖွဲ့ကလည်း တော်လှန်တေးသီချင်းတွေ တီးခတ်စည်းရုံးလှုံ့ဆော်ခဲ့ကာ NUG ကာကွယ်ရေးအလံကို အလေးပြုခြင်း၊ ခေတ်အဆက်ဆက်နဲ့ မြန်မာ့နွေဦးတော်လှန်ရေး ကာလတလျှောက် ကြွေလွင်ခဲ့တဲ့ အာဇာနည်သူရဲကောင်းတွေကို ဦးညွှတ်အလေးပြုခြင်း စတဲ့အစီအစဥ်တွေ ပြုလုပ်ပြီး အခမ်းအနားကို ရုတ်သိမ်းခဲ့ကြတယ်လို့ သိရပါတယ်။

စာတည်း – လင်း

စစ်ကိုင်း၊ မတ် ၆၊ ၂၀၂၃။

စစ်ကိုင်းတိုင်း၊ စစ်ကိုင်းမြို့မှာ မတ်လ ၅ ရက် မနေ့ညနေပိုင်းက ဧရာဝတီမြစ်အတွင်း ရေဆင်းကူးရာကနေ ကိုရင် တပါး ရေနစ်သေဆုံးခဲ့ပြီး ဘုန်းကြီးတပါးလည်း မြစ်ထဲခုန်ချမှု ဖြစ်ပွားခဲ့တယ်လို့ မြို့ခံတွေဆီက သိရပါတယ်။

စစ်ကိုင်းမြို့၊ ဝါဆိုကျောင်းက ကိုရင် ၃ ပါးဟာ မနေ့ညနေပိုင်းက ဧမြဝတီရပ်ကွက်မှာရှိတဲ့ ဧရာဝတီမြစ်‌ရေဆိပ်မှာ ရေဆင်းကူးရာကနေ အသက် ၁၂ နှစ်အရွယ် ကိုရင် ၁ ပါး ရေနစ်သေဆုံးခဲ့တာလို့ ဒေသခံတဦးက မြေလတ်အသံကို ပြောပါတယ်။

“ကိုရင် ၃ ပါးက ဧမြဝတီရေဆိပ်မှာ ရေဆင်းဆော့ရင်း နစ်တာ။ အဲဒါမှာ ကိုရင် ၂ ပါးကတော့ အသက်ရှင်လျက် ပြန်ရတယ်။ တပါးကတော့ ဆုံးသွားတယ်” လို့ ပြောပါတယ်။

ရေနစ်သေဆုံးခဲ့တဲ့ ကိုရင်ရဲ့ရုပ်အလောင်းကို ရှာဖွေတွေ့ရှိခဲ့ပြီး သုခကာရီပရဟိတအသင်းကားနဲ့ စစ်ကိုင်းဆေးရုံက ရင်ခွဲရုံကို ပို့ဆောင်ထားတယ်လို့ သိရပါတယ်။

ဒါ့အပြင် မနေ့ညနေပိုင်းမှာပဲ အမရပူရနဲ့ စစ်ကိုင်းမြို့ကို ဆက်သွယ်ထားတဲ့ ဧရာဝတီတံတား (ရတနာပုံ)ပေါ်ကနေ ဧရာဝတီမြစ်အတွင်းကို ဘုန်းကြီး ၁ ပါး ခုန်ချသွားခဲ့လို့ ရှာဖွေကယ်ဆယ်ရေးလုပ်ငန်းတွေ လုပ်ဆောင်နေရတယ်လို့ သိရပါတယ်။

“မနေ့ညနေမှာပဲ နောက်ဖြစ်စဥ်တခုက သံဃာတပါးက ဧရာဝတီတံတားပေါ်ကနေ ခုန်ချမှု ဖြစ်ခဲ့တာ။ ညနေပိုင်း ကယ်ဆယ်ရေးအဖွဲ့တွေ ရှာဖွေပေမယ့် ရှာမတွေ့သေးဘူး။ ခုန်ချတဲ့သံဃာက ဘယ်ကျောင်းတိုက်က ဆိုတာနဲ့ ဘာကြောင့် ခုန်ချတယ်ဆိုတာလဲ မသိရသေးဘူး” လို့ သူက ဆက်ပြောပါတယ်။

ဧရာဝတီမြစ်အတွင်း ခုန်ချသွားတဲ့ ဘုန်းကြီးကို မြို့ခံပရဟိတအသင်းအဖွဲ့တွေက ဒီကနေ့ မနက်ပိုင်းမှာလည်း ဆက်လက်ရှာဖွေနေဆဲဖြစ်ပြီး လက်ရှိအချိန်ထိ တွေ့ရှိတာမျိုး မရှိသေးဘူးလို့ သိရပါတယ်။

စာတည်း – ရင်ငြိမ်း

ကလေး၊ မတ် ၆၊ ၂၀၂၃။

စစ်ကိုင်းတိုင်း၊ ကလေးမြို့ပေါ်က ပျူစောထီးအဖွဲ့ရဲ့ ခေါင်းဆောင်ဆိုသူကို မတ်လ ၅ ရက်မနက် ၁၂ နာရီကျော်မှာ ပစ်ခတ်ရှင်းလင်းခဲ့တယ်လို့ မြို့ပြ UG အဖွဲ့တာဝန်ရှိသူက ပြောပါတယ်။

သေဆုံးသူမှာ အောင်မေတ္တာရပ်ကွက်နေ ချမ်းမြေ့အောင်(ခ)ဖိုးချမ်းဖြစ်ပြီး၊ သူ့ကို စမ်းမြို့ရပ်ကွက်၊ ဗိုလ်ချုပ်လမ်းမကြီးပေါ်မှာ ပစ်ခတ်ခဲ့တာ ဖြစ်တယ်လို့ ကလေးမြို့ မြို့ပြစီမံချက် UG အဖွဲ့မှ ဦးဆောင်သူ ကိုရန်မင်းနိုင်က ပြောပါတယ်။

“ခေါင်းကို သုံးချက် ပစ်ခဲ့တာပါ။ နေရာမှာတင် ပွဲချင်းပြီးတယ်။ သူက အဲဒီရပ်ကွက်ကို ဘာသွားလုပ်တာလဲတော့ မသိဘူး။ သူက တယောက်တည်းသွားနေတာ” လို့ ဆိုပါတယ်။

ဖိုးချမ်းမှာ က‌လေးမြို့ပေါ်နဲ့ ကျေးရွာတွေက ဆိုင်ကယ် အစီးပေါင်း ၁၀၀ ကျော် ခိုးယူရာမှာ ဂိုဏ်းခေါင်းဆောင် ပြုလုပ်သူ၊ အိတ်စွပ်ရွာက ၁၅ နှစ်အရွယ် မိန်းကလေးတစ်ဦးအား အဓမ္မပြုကျင့် သတ်ထားခဲ့သူ၊ ရွှေဘုံသာဘုရားကြီးလမ်းက လူမိုက်ကျော်ကြီးတို့အဖွဲ့အား ဦးဆောင်ကာ ခိုးဆိုးလုနှိုက် အနုကြမ်းစီးရန် စေခိုင်းခဲ့သူ ဖြစ်တယ်လို့ ဆိုပါတယ်။

ဒါ့အပြင် ကလေးမြို့ရွှေဆိုင်တဆိုင်ကို သေနတ်အတိုတလက်နဲ့ အနုကြမ်းစီးခဲ့ဖူးသူ၊ တော်လှန်ရေးသမားတွေကို ဖမ်းဆီးရာမှာ ​ရှေ့က ဦးဆောင်ပြီး ပါဝင်သူ ဖြစ်သလို PDF တွေရဲ့ လည်းချောင်းသွေးဖောက်သောက်မည်ဟု ကြိမ်းဝါးထားသူ ဖြစ်တယ်လို့ ကိုရန်မင်းနိုင်က ပြောပါတယ်။

ဒါ့အပြင် ကလေးမြို့ မြို့ပြစီမံချက် UG အဖွဲ့အနေနဲ့ မြို့ပေါ်မှာ ကျန်ရှိနေသေးတဲ့ စစ်ကောင်စီ လက်ပါးစေသူတွေကို သတိပေးထားတယ်လို့ ဆိုပါတယ်။

စာတည်း – 007

ရေဦး၊ မတ် ၅၊ ၂၀၂၃။

စစ်ကိုင်းတိုင်း၊ ရေဦးမြို့နယ်၊ ဖလံဂုဏ်ရွာကို မတ်လ ၄ ရက်မနေ့မနက် ၄ နာရီလောက်မှာ စစ်တပ်က အလစ်အငိုက်ဝင်ရောက်တိုက်ခိုက်ခဲ့တာကြောင့် ကျေးရွာကာကွယ်ရေးရဲဘော် ၅ ဦး ကျဆုံးခဲ့တယ်လို့ People’s Defence Comrade က သတင်းထုတ်ပြန်ထားပါတယ်။

ရေဦးမြို့ကနေ ၂ မိုင်လောက်သာဝေးတဲ့ ရေဦး-တမာတော-ကံထူးမ ကားလမ်းဘေးက အိမ်ခြေ ၂၀၀ လောက်ရှိတဲ့ ဖလံဂုဏ်ရွာကို ခမရ ၃၆၄ နဲ့ ခလရ ၇၀၁ တပ်က အင်အား ၇၀ ကျော်လောက်နဲ့ စီးနင်းရာမှာ ကျဆုံးခဲ့တာလို့ People’s Defence Comrade ရဲဘော် အမေ့သားကပြောပါတယ်။

“ဖလံဂုဏ်ရွာက မထင်မှတ်ပဲ အငိုက်ခံလိုက်ရတယ်၊ အိပ်မောကျနေတဲ့အချိန် တိတ်တဆိတ်ဝင်လာတာဗျ။ ရပ်ရွာကင်းစောင့်နေတဲ့ ပကဖအဖွဲ့ဝင် ရဲဘော် ၅ ဦးရော ပြည်သူတွေရော ပိတ်မိတယ်။ ရဲဘော် ၅ ဦးကို ဖမ်းဆီးပြီး ဦးခေါင်းတေ့ပစ်သတ်ခဲ့တယ်။ စစ်တပ်ထွက်သွားလို့ မနေ့ကပဲသဂြိုဟ်ပြီးပါပြီ”လို့ ပြောပါတယ်။

ကျဆုံးရဲဘော်တွေမှာ အသက် ၂၃ နှစ်အရွယ်တဦးနဲ့ ၁၉ နှစ်အရွယ် ၄ ဦးဖြစ်ပြီး သူတို့ဆီက လက်လုပ်သေနတ်၊ ၃ လက်၊ မိုင်းနဲ့လက်နက်ခဲယမ်းအချို့ သိမ်းဆည်းခံလိုက်တယ်လို့ သူကဆက်ပြောပါတယ်။

ကျဆုံးရဲဘော်တွေရဲ့ အမည်နဲ့အသေးစိတ်အချက်အလက်တွေကိုတော့ ကျန်ရစ်သူမိသားစုတွေရဲ့ လုံခြုံရေးအခြေအနေေကြောင့် ထည့်သွင်းပြောကြားခဲ့ခြင်းမရှိပါဘူး။

စစ်တပ်ဝါဒဖြန့် တယ်လီဂရမ်ချန်နယ်တွေမှာတော့ အလောင်းငါးလောင်းနဲ့ M-22 သေနတ်တလက်၊ လက်လုပ်သေနတ် နှစ်လက်၊ မိုင်းနဲ့ခဲယမ်းတချို့ သိမ်းဆည်းရရှိတယ်လို့ ဝါဒဖြန့်ထားပါတယ်။

လက်ရှိမှာ ရေဦးနယ်မြောက်ဘက်ခြမ်းက ဖလံဂုဏ်၊ ပန်းကုံး၊ ဗိုလ်ရုံ၊ အုန်းနှဲပေါင်း၊ ဆပ်သေ၊ အင်တော၊ တူမောင်းကျေးရွာတွေက ပြည်သူပေါင်း ၃၀၀၀ ကျော်စစ်ရှောင်နေကြရပြီး ရိက္ခာအခက်အခဲဖြစ်နေတယ်လို့ ဒေသခံဆီက သိရပါတယ်။

စစ်ရှောင်တွေကို လှူဒါန်းလိုသူတွေအနေနဲ့ ရေဦးမြို့နယ်စစ်ရှောင်ပြည်သူ – ထောက်ပံ့ရေးစာမျက်နာကနေ ဆက်သွယ်လှူဒါန်းနိုင်တယ်လို့လည်း ရဲဘော်အမေ့သားကဆိုပါတယ်။

အခုစစ်ကြောင်းဟာ ပြီးခဲ့တဲ့ဖေဖေါ်ဝါရီလ တလလုံး ခင်ဦးနယ်အတွင်း မီးလှည့်ရိူ့တဲ့တပ်ဖြစ်ပြီး မနေ့မနက်ပိုင်းက ဖလံဂုဏ်ရွာကထွက်ကာ အခုညနေမှာတော့ ဖလံဂုဏ်ရွာအနီးက ပန်းကုံးရွာမှာ တပ်စွဲထားတယ်လို့ သိရပါတယ်။

အင်းတော်၊ မတ် ၅၊ ၂၀၂၃။

စစ်ကိုင်းတိုင်း၊ အင်းတော်မြို့နယ်မှာ ပကဖအဖွဲ့ဝင် ၂ ဦး ဖမ်းဆီးခံခဲ့ရပြီးနောက် အလှူရှင်စာရင်းတချို့ စစ်ကောင်စီလက်ထဲရောက်သွားကာ နောက်ဆက်တွဲအနေနဲ့ ပြည်သူ ၁၅ ဦးကျော် ဖမ်းဆီးခံထားရတာဖြစ်ပါတယ်။

‌ပြီးခဲ့တဲ့ မတ်လ ၃ ရက်နေ့ မနက် ၇ နာရီလောက်က မြို့ထဲကမီးပွိုင့်မှာ စစ်ကောင်စီစစ်ဆေးရေးနဲ့တွေ့ပြီး ရဲဘော် ၂ ဦးဖမ်းဆီးခံခဲ့ရကာ၊ သူတို့နဲ့ဆက်စပ်တယ်ဆိုပြီး မြို့ထဲက ပြည်သူတချို့ကို လိုက်လံဖမ်းဆီးနေတာဖြစ်ပြီး CDM ဆရာမတွေလည်း ပါသွားတယ်လို့ ဆိုပါတယ်။

“မြို့ထဲမှာ ပကဖရဲဘော်၂ ဦး အဖမ်းခံလိုက်ရတာ၊ အဖမ်းခံလိုက်ရတော့ သူတို့အလှူရှင်နာမည်တွေပါပါသွားတာ စာရွက်နဲ့ပေါ့၊ မြို့ထဲမှာက အဲ့စာရင်းအတိုင်း လိုက်ဖမ်းတာ၊ အလှူရှင်စာရင်းက စစ်ကောင်စီ လက်ထဲကို ရောက်သွားတယ်” လို့ အင်းတော်ဒေသခံတဦးက ပြောပါတယ်။

ပကဖအဖွဲ့ဝင်တွေဖြစ်တဲ့ ပြည့်ဖြိုးအောင် အသက် ၂၄ နှစ်နဲ့ ရဲရင့်အောင်အသက်၂၂ နှစ်တို့ ဖမ်းဆီးခံခဲ့ရပြီး နောက်ဆက်တွဲဖမ်းဆီးခံရတဲ့ ပြည်သူတွေရဲ့ အချက်လက်တွေကတော့ မြေလတ်အသံအနေနဲ့ စုံစမ်းနေဆဲဖြစ်ပြီး သတင်းမေးမြန်းနေစဉ်အတွင်းမှာပဲ နောက်ထပ်ပြည်သူ ၃ ဦး ထပ်မံ ဖမ်းဆီးခံလိုက်ရတယ်လို့ သိရပါတယ်။

အင်းတော် ဈေးတိုက်တန်းတဝိုက်က ပြည်သူအများစု ဖမ်းဆီးခံခဲ့ရပြီး၊ အဲဒိဖမ်းဆီးခံထားရတဲ့သူတွေကို အင်း‌တော်စစ်တပ်ကုန်းထဲကို ခေါ်ဆောင်သွားတယ်လို့ သိရပါတယ်။

စစ်ကောင်စီဘက်ကလည်း ဒီကနေ့ နေ့လည်ထဲက မြို့ထဲမှာ ကားနဲ့လှည့်လည်ကာ ရှာဖွေတာတွေ၊ ဖမ်းဆီးတာတွေလုပ်နေပြီး အဆက်သွယ်ရှိထားတဲ့ ပြည်သူတွေအနေနဲ့ သတိထားရှောင်တိမ်းကြဖို့ လိုအပ်နေတယ်လို့ သိရပါတယ်။