စစ်ကိုင်း

ဝက်လက်၊ မတ် ၇၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်အခြေစိုက် Acid တော်လှန်ရေးအဖွဲ့မှာ ရှေ့တန်းထွက်တဲ့အခါ အသုံးပြုဖို့ ကားမရှိတဲ့အတွက် နွားလှည်းငှားပြီး ရှေ့တန်းအတွက် လက်နက်ကြီးတွေ သယ်နေရတယ်လို့ သိရပါတယ်။

အဖွဲ့မှာရှိတဲ့ ဆိုင်‌‌ကယ်တွေကလည်း ပျက်နေတဲ့အတွက် လူအင်အားနဲ့သယ်ရင်လည်း ခရီးအဝေးထိ မသွားနိုင်လို့ နီးစပ်ရာ ပြည်သူတွေဆီကနေ နွားလှည်းငှားပြီး သွားနေရတာဖြစ်တယ်လို့ ဆိုပါတယ်။

“ကျတော်တို့မှာက ဆိုင်ကယ် ၃ စီးပဲ ရှိတယ်။ တစီးက လတ်တလော အင်ဂျင်ခွဲရမှာ။ တစီးကကျတော့လည်း တမိုင်တောင် မရောက်သေးဘူး ထိုးထိုးရပ်သွားတာ။ အရင်က ဆိုင်ကယ်နဲ့ သွားတယ်။ ခုက လုံးဝမှ ဆိုင်ကယ် အဆင်မပြေတဲ့ အချိန်မို့ဗျ။ လူနဲ့ထမ်းဖို့ကျလည်း ကြာကြာမထမ်းနိုင်တော့ နွားလှည်းနဲ့ပဲ သွားလိုက်တာ။ ရေရှည်သုံးဖို့တော့ မပြေဘူး။” လို့ Acid အဖွဲ့ခေါင်းဆာင် ကိုဟယ်ရီက ပြောပါတယ်။

အဖွဲ့မှာကလည်း တိုက်ပွဲဝင်ဖို့ ကားမရှိတဲ့အတွက် ထော်လာဂျီငှားကာ ရှေ့တန်းထွက်လေ့ရှိပြီး၊ အခုကတော့ လတ်တလော အခက်ခဲ ပြေလည်အောင်နဲ့ ကိုယ့်ဘက်က အချိန်ရတဲ့အခါတွေမှာသာ နွားလှည်းအသုံးပြုတာ ဖြစ်ပြီး၊ သွားလာရတာ နှေးကာ အချိန်ကုန်တဲ့အတွက် ရေရှည်တော့ မသုံးဘူးလို့ ဆိုပါတယ်။

Acid အဖွဲ့ဟာ ပြည်သူထောက်ပံ့မှုနဲ့ လည်ပတ်နေတဲ့ တော်လှန်ရေးအဖွဲ့တခု ဖြစ်ပြီး၊ ပြီးခဲ့တဲ့ ဖေဖော်ဝါရီလကပဲ မီတာ ၃၀၀ ကနေ ၄၀၀အထိ ပစ်ခတ်နိုင်တဲ့ ရိုင်ဖယ်သေနတ် ထုတ်လုပ်မှု အောင်မြင်ထားတာလည်း ဖြစ်ပါတယ်။

စာတည်း – 007

အင်းတော်၊ မတ် ၇၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ မန္တလေး- မြစ်ကြီးနားကားလမ်းမပေါ်မှာ ခရီးသွားလာနေတဲ့ ဒေသခံပြည်သူတွေဆီက ဖုန်း ၈ လုံးနဲ့ ဆိုင်ကယ် ၃ စီးတို့ကို စစ်ကောင်စီတပ်သားတွေက အဓမ္မသိမ်းယူခဲ့တယ်လို့ ဒေသခံတွေက ပြောပါတယ်။

အင်းတော်မြို့နဲ့ ၆ မိုင်အကွာမှာရှိတဲ့ နဘားကျေးရွာ ကားလမ်းမပေါ်မှာ စစ်ဆေးရေး လုပ်ဆောင်နေတဲ့ စစ်ကောင်စီတပ်သား ၇၀ ဝန်းကျင်ဟာ မတ်လ ၆ ရက် မနက်ပိုင်းအချိန်က ဆိုင်ကယ်စီးနင်းလာတဲ့ ခရီးသွားတွေဆီကနေ ဖုန်း၊ဆိုင်ကယ်တွေကို သိမ်းယူခဲ့တာ ဖြစ်တယ်လို့ ကာယကံရှင်တွေရဲ့ပြောဆိုချက်ကို ကိုးကားပြီးတော့ Indaw Revolution-IR တာဝန်ရှိသူက မြေလတ်အသံကို ပြောပါတယ်။

“စကစတွေက ဖုန်းတွေကို သံသယရှိလို့ စစ်ဆေးစရာရှိတယ်ဆိုပြီး သိမ်းသွားတာ။ ဖုန်းတွေကို ပြန်မအပ်ဘဲ ဒီအတိုင်းပြန်ခိုင်းလို့ ပြန်ခဲ့ရတယ်။ ဆိုင်ကယ် ၃ စီးကိုကျတော့ လိုင်စင်မရှိလို့ဆိုပြီး အင်းတော်မြို့ကို သုံးဘီးတစီးနဲ့ တင်သွားတယ်။ လူတွေကိုတော့ ပြန်လွှတ်ပေးလိုက်တယ်။ စကစတွေက လမ်းသွားခရီးသည်တွေကို စစ်ဆေးနေတာ ၇ ရက်လောက် ရှိပြီ။ ဆန်တွေ၊ စားစရာပစ္စည်းတွေ ပါရင်လည်း တောင်းယူကြတယ်” လို့ ပြောပါတယ်။

ခရီးသွားပြည်သူတွေဆီက ပစ္စည်းတွေကို အဓမ္မသိမ်းယူခဲ့တဲ့ စစ်ကောင်စီတပ်သားတွေဟာ နဘားကျေးရွာကို လာရောက်တပ်စွဲနေကြတဲ့ တပ်မ ၈၈ လက်အောက်ခံ ခမရ ၃၀၁ နဲ့ ခမရ ၄၁၆ တပ်ရင်းတွေက စစ်ကောင်စီတပ်သားတွေ ဖြစ်တယ်လို့ သိရပါတယ်။

ဒါ့အပြင် ပြီးခဲ့တဲ့ ဖေဖော်ဝါရီလကုန်ပိုင်းလောက်က စတင်ပြီးတော့ စစ်ကောင်စီတပ်ဖွဲ့တွေဟာ PDF အသွင်ဆောင်ပြီး နဘားကျေးရွာနဲ့ ၂ ဖာလုံဝေးတဲ့ နားရခေါင်ကျေးရွာ ကားလမ်းမပေါ်မှာ အင်အား ၅၀ ကျော်နဲ့ ဂိတ်ချကာ ဆိုင်ကယ်၊ ကားတွေကို စစ်ဆေးမှု ပြုလုပ်ခဲ့သလို လမ်းကြေးအဖြစ် ကားတစီးကို ငွေကျပ် ၅၀၀၀ ထောင်နှုန်း ကောက်ခံတယ်လို့ ဒေသခံတွေက ပြောဆိုကြပါတယ်။

စာတည်း – ရင်ငြိမ်း

ဘုတလင်၊ မတ် ၇၊ ၂၀၂၃။

စစ်ကိုင်းတိုင်း၊ ဘုတလင်မြို့နယ်မှာ မတ်လ ၅ ရက်နဲ့ ၆ ရက်အတွင်း ဒေသခံပြည်သူ ၅ ဦး မိုင်းနင်းမိပြီး ထိခိုက်ဒဏ်ရာရခဲ့တယ်လို့ သိရပါတယ်။

မတ်လ ၅ ရက်က ဘုတလင်မြို့ရဲ့ အနောက်တောင်ခြမ်းရှိ တောတိုက် ၂ နေရာမှာ ဒေသခံအမျိုးသား ၂ ဦးနဲ့ အမျိုးသမီး ၁ ဦး၊ မတ်လ ၆ ရက်မှာတော့ ဘုတလင်မြို့၊ ကျွဲတဲရွာအနီးမှာ အမျိုးသား ၂ ဦးတို့ အသီးသီး မိုင်းနင်းမိပြီး ထိခိုက်ဒဏ်ရာ ရခဲ့ကြတာလို့ Myammar Defence Force ရဲ့ အဖွဲ့ဝင်တဦးက ပြောပါတယ်။

“မြို့အနီးက တောတိုက်တွေနဲ့ ပြည်သူတွေ သွားလာတဲ့လှည်းလမ်းတွေ၊ တောတိုက်တွေက ခြေလျင်လမ်းတွေမှာ နင်းမိုင်းတွေ ထောင်ထားတာပါ။ အလုံးရေက ရာဂဏန်းတော့ ရှိမယ်မှန်းတယ်။ မြို့သိမ်းတိုက်ပွဲ ဆင်နွှဲမယ်ဆိုတဲ့ သတင်းထွက်ပြီးကတည်းက နင်းမိုင်းတွေ စထောင်တာ” လို့ ပြောပါတယ်။

မိုင်းနင်းမိသူတွေအနေနဲ့ ထိခိုက်ဒဏ်ရာသာ ရရှိခဲ့တာကြောင့် လက်ရှိမှာ သူတို့ကို ဆေးကုသပေးနေကာ နာမည်နဲ့ နေရပ်ကိုတော့ လုံခြုံရေးအခြေအနေကြောင့် ထည့်သွင်းပြောကြားခဲ့ခြင်း မရှိပါဘူး။

ဒေသခံ PDF တွေက မြို့သိမ်းတိုက်ပွဲဝင်မယ်ဆိုတဲ့ သတင်းတွေ ထွက်ပေါ်နေတာကြောင့် စစ်ကောင်စီတပ်တွေက ခုလိုမြို့တပတ်လည်မှာ မိုင်းတွေထောင်ထားတာလို့ ကာကွယ်ရေးတပ်ဖွဲ့ဝင်တွေက ခန့်မှန်းပေမယ့် ဒီမိုင်းတွေကို ဘယ်အဖွဲ့အစည်းက ထောင်ထားလဲ ဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

ဒီနင်းမိုင်းတွေကို ဒေသခံလယ်သမားနဲ့ စျေးသည်တွေ သွားလာနေတဲ့ တောတိုက်တွေထဲက လှည်းလမ်းတွေနဲ့ ခြေလျင်လမ်းတွေမှာ ထောင်ထားတာဖြစ်ပြီး၊ လက်ရှိမှာ Myanmar Defence Force နဲ့ မဟာမိတ်တပ်ဖွဲ့တွေ ပေါင်းပြီး မိုင်းရှာဖွေမှုတွေ ပြုလုပ်နေတယ်လို့ ဆိုပါတယ်။

မတ်လ ၆ ရက် မနေ့ကမနက်၉ နာရီလောက်မှာလည်း ဘုတလင်မြို့ရဲ့အရှေ့ခြမ်း ၆ မိုင်အကွာလောက်က ကံသစ်ရွာအနီးမှာ အင်အား ၅၀ လောက်ရှိတဲ့ စစ်ကောင်စီတပ်နဲ့ ဒေသခံမဟာမိတ်တပ်တွေ ထိတွေ့တိုက်ပွဲ ဖြစ်ပွားခဲ့တယ်လို့ သိရပါတယ်။

စာတည်း – လင်း

ခင်ဦး၊ မတ် ၆၊ ၂၀၂၃။

ပျူစောထီးတပ်ဖွဲ့တွေက လက်နက်ကြီးတွေနဲ့ ပစ်ခတ်ပြီး စစ်ကြောင်းထိုးလာလို့ စစ်ကိုင်းတိုင်း၊ ခင်ဦးမြို့နယ်က အသက် ၈ နှစ်အရွယ် ကလေးတဦးဟာ ထွက်ပြေးတိမ်းရှောင်ရင်း ကျည်ထိမှန် သေဆုံးခဲ့တယ်လို့ သိရပါတယ်။

မတ်လ ၆ ရက် ဒီမနက် ၁၁ နာရီလောက်မှာ အင်အား ၁၀၀ ဝန်းကျင်ရှိတဲ့ ပျူစောထီးတပ်ဖွဲ့ဝင်တွေက ကျီစုရွာဘက်ကို စစ်ကြောင်းထိုးလာချိန်မှာ ထွက်ပြေးတိမ်းရှောင်နေကြတဲ့ မုံလှကျေးရွာက အသက် ၈ နှစ်အရွယ် မိန်းကလေးငယ်တဦး ကျည်ထိမှန် သေဆုံးခဲ့တာလို့ ခင်ဦးမြို့နယ် သတင်းမှန်ကြားရေး တာဝန်ခံတဦးက မြေလတ်အသံကို ပြောပါတယ်။

“တိုက်ပွဲလည်း မဖြစ်ဘဲနဲ့ ထွက်ပြေးနေတဲ့ ဒေသခံတွေကိုလက်နက်ကြီးတွေနဲ့ ပစ်တယ်။ စက်သေနတ်တွေနဲ့လည်း ပစ်တယ်။ အဲဒီမှာ ကလေးတဦးက ဆုံးသွားတယ်။ အသက် ၆၀ အရွယ် အဖိုးတဦးလည်း လက်နက်ကြီး ထိသွားတယ်” လို့ ဆိုပါတယ်။

အဲ့ဒီပျူစောထီးအဖွဲ့ဟာ ရေဦးမြို့နယ်၊ အောင်သာယာကျေးရွာက ဖြစ်ပြီး၊ ခုလိုစစ်ကြောင်းထိုးလာတဲ့အတွက် ခင်ဦးနယ်ထဲက ငါးရုံကြီး၊ ရှားတောရွာနဲ့ မုံလှရွာစတဲ့ ကျေးရွာကဒေသခံတွေ ရွာကနေ ထွက်ပြေးနေရတယ်လို့လည်း သိရပါတယ်။

အလားတူ မတ်လ ၅ ရက်မှာလည်း ခင်ဦးမြို့နယ်၊ အလယ်ရှိုရွာက ၁၂ နှစ်အရွယ် ကလေးငယ်တဦးဟာ နွားကျောင်းနေစဥ် မပေါက်ကွဲဘဲ ကျန်နေတဲ့ ၄၀ မမ လက်နက်ကြီးကျည်အဖူးကို ကိုင်မိရာမှ ပေါက်ကွဲမှုဖြစ်ပြီး ထိမှန်သေဆုံးခဲ့သေးတယ်လို့လည်း အထက်ပါတာဝန်ခံက ဆက်ပြောပါတယ်။

“ကလေးက ကျောင်းသားပါ။ ကျောင်းပိတ်လို့ နွားကျောင်းသွားရင်း လက်နက်ကြီးကိုတွေ့တော့ ကောက်ယူပြီး ရေကန်ဘောင်ပေါ်မှာ တင်ထားတယ်။ အဲဒါ မတော်တဆ ပြုတ်ကျပြီးတော့ လက်နက်ကြီးက ပေါက်သွားတယ်။ အသံကြားလို့ တောထဲက လူတွေ၊ ရွာထဲက လူကြီးတွေ လာပေမဲ့လည်း ကလေးက အသက်မမှီတော့ဘူး။ အဲဒီလက်နက်ကြီးက ဖေဖော်ဝါရီလကတည်းက စခတွေ ရမ်းသမ်းပစ်ခတ်ခဲ့တဲ့ဟာတွေပါ” လို့ ဆိုပါတယ်။

ခင်ဦးမြို့နယ်ထဲမှာ ပြီးခဲ့တဲ့ ၂၀၂၂ ခုနှစ်ကနေ ယခုနှစ် ၂၀၂၃ ခုနှစ်အထိ စစ်ကောင်စီတပ်ဖွဲ့ဝင်တွေရဲ့ လက်နက်ကြီးကျည် ထိမှန်မှုကြောင့် အသက်မပြည့်သေတဲ့ ကလေးငယ် ၁၀ ဦးထက်မနည်း သေဆုံးခဲ့တယ်လို့ ခင်ဦးမြို့နယ် သတင်းမှန်ကြားရေးတာဝန်ခံဆီက သိရပါတယ်။

မြင်းမူ၊ မတ် ၆၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ လက္ကပင်ကျေးရွာကို စစ်ကောင်စီတပ်သားတွေက မတ်လ ၅ ရက်မနေ့ကမနက် ၅ နာရီခန့်ကတည်းက ဝင်ရောက်စီးနင်းပြီး ရွာထဲတပ်စွဲကာ ရွာခံပြည်သူ ၂၀၀ ၀န်းကျင်ကိုလည်း ဖမ်းဆီးထားတယ်လို့ သိရပါတယ်။

အင်အား ၁၀၀ ကျော်ရှိတဲ့ စစ်သားတွေဟာ ရွာရဲ့ဘုန်းတော်ကြီးကျောင်းထဲမှာ တပ်စွဲထားပြီး ဖမ်းဆီးထားတဲ့ အမျိုးသား၊အမျိုးသမီး ၂၀၀ ၀န်းကျင်ကို မတ်လ ၆ ရက် ဒီကနေ့ ညနေ ၄ နာရီကျော်အထိ ပြန်မလွှတ်သေးဘဲ ဖမ်းဆီးထားဆဲဖြစ်တယ်လို့ မြင်းမူအခြေစိုက် Knight Commanders PDF မှ တာဝန်ခံ ဘယ်သန်ကြီးက ပြောပါတယ်။

“ဒီရွာမှာက PDF လည်း မရှိဘူး။ ရွာခံတောင်သူ လယ်သမားတွေနဲ့ မီးရှို့ခံထားရတဲ့ တခြားရွာတွေက ပြည်သူတွေ လာနေကြတာ။ ဒီစကစတွေက တိုက်ပွဲမဖြစ်ဘဲ အကြောင်းမဲ့ဝင်လာပြီးတော့ ဖမ်းဆီးထားတာဗျ။ ဖမ်းခံထားရတဲ့ အထဲက အမျိုးသား ၃ ယောက်ကို သတ်ဖြတ်လိုက်ပြီလို့ သတင်းရတယ်။ မနေ့က သေနတ်ပစ်သံတွေ ကြားရတယ်။ ဒီနေ့နဲ့ဆို စကစတွေ ရွာထဲတပ်စွဲနေတာ ၂ ရက်ရှိပြီ” လို့ ဆိုပါတယ်။

အမျိုးသား ၃ ဦး အသက်ခံရတာနဲ့ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

လက္ကပင်ကျေးရွာကို ဝင်ရောက်တပ်စွဲနေတဲ့ စစ်ကြောင်းဟာ မတ်လ ၂ ရက်က စစ်ကိုင်း မြို့နယ်၊ တာတိုင်ကျေးရွာက ရွာခံအမျိုးသား၊ အမျိုးသမီး ၁၆ ဦးကို သတ်ခဲ့တဲ့ စစ်ကြောင်းဖြစ်တယ်လို့ ဘယ်သန်ကြီးက ဆက်ပြောပါတယ်။

“ဒီစစ်ကြောင်းက တမခ ၉၉ လက်အောက်ခံ ခြေမြန်တပ်ရင်းတခုကလို့ သိထားရတယ်ဗျ။ ဒီစစ်ကြောင်းက တာတိုင်ကနေ မြင်းမူကိုဖြတ်၊ မြင်းမူကနေ အလ္လကပ္ပရွာကို ဝင်မီးရှို့တယ်။ ပြီးမှ အခုဒီရွာကို ရောက်နေတာ။ ပြီးတော့ ဒီကောင်တွေက စစ်ယူနီဖောင်းတွေ မဝတ်ဘူးဗျ။ PDF လိုလို၊ အရပ်သားလိုလို နေကြတာ” လို့ ဆိုပါတယ်။

လက္ကပင်ကျေးရွာမှာ အိမ်ခြေ ၃၀၀ ကျော်ရှိပြီး ရွာရဲ့ဘုန်းတော်ကြီးကျောင်းမှာ မီးရှို့ခံထားရတဲ့ တခြားကျေးရွာက ပြည်သူတွေလည်း လာရောက်ခိုလှုံနေတဲ့ ကျေးရွာတရွာလည်း ဖြစ်ပါတယ်။

စာတည်း – လင်း

ကန့်ဘလူ၊ မတ် ၆၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကျေးရွာသုံးရွာက နေအိမ် ၅၅ လုံးကို ၂ ရက်အတွင်း စစ်ကောင်စီ၊ ပျူစောထီးတပ်ဖွဲ့တွေက မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

မီးရှို့ခံရတဲ့ ကျေးရွာသုံးရွာဟာ ချပ်သင်းရွာ၊ ပင့်သာရွာ နဲ့ အောက်တဲရွာ တို့ဖြစ်ပြီး မတ်လ ၄ ရက်နေ့က ကိုးတောင်ဘို့တိုက်နယ်ထဲမှာရှိတဲ့ အောက်တဲရွာကို မနက် ၆ နာရီလောက်မှာ စစ်ကောင်စီလက်အောက်ခံ ခြေလျင်တပ်ရင်း (၁၃၇)က အင်အား ၅၀ ကျော်နဲ့ ကျေးရွာက နေအိမ် ၂ လုံးကို မီးရှို့ဖျက်ဆီးခဲ့တယ်လို့ ကျွန်းလှတက်ကြွလှုပ်ရှားသူများအဖွဲ့မှ တာဝန်ရှိသူတဦးက ပြောပါတယ်။

“အဲဒီကျေးရွာ သုံးရွာက အကွာအဝေးတွေတော့ ကျနော်တို့ အတိအကျ ပြောမရပါဘူး။ ရွာတွေကို မီးရှို့တဲ့အဖွဲ့တွေကလည်း မတူပါဘူး။ အောက်တဲရွာက အခုအကြိမ်နဲ့ဆို မီးရှို့ခံရတာ တတိယအကြိမ်မြောက်ပါ။ နေအိမ်စုစုပေါင်း ၄၂ လုံး အထိ မီးလောင်သွားပါပြီ” လို့ ဆိုပါတယ်။

အဲဒီနေ့မှာပဲ ချပ်သင်းရွာထဲက အုတ်တိုက် (၇) လုံးကို ပျူစောထီးတပ်ဖွဲ့တွေက မီးရှို့ဖျက်ဆီးသွားခဲ့ပြန်တယ်လို့ သိရပါတယ်။

အလားတူ မတ်လ ၄ ရက်နဲ့ ၅ ရက်နေ့မှာ ပင့်သာ(တည်ပင်)ရွာကို ပျူစောထီးတပ်ဖွဲ့တွေက အင်အား ၂၀၀ ကျော်နဲ့ ၂ ရက်ဆက်တိုက် မီးရှို့ဖျက်ဆီးခဲ့တဲ့အတွက် ပြည်သူပိုင်နေအိမ် ၅၁ လုံးနဲ့ လယ်ယာသုံးပစ္စည်းတချို့ မီးလောင်ပျက်စီးသွားပါတယ်။

“ပင့်သာရွာက ပြီးခဲ့တဲ့ ၂၀၂၂ ခုနှစ် သြဂုတ်လကတည်းက ပထမအကြိမ် မီးရှို့ခံရတာပါ။ အခုအကြိမ်နဲ့ဆို လေးကြိမ်မြောက် ရှိပါပြီ။ နေအိမ် ၁၅၀ လုံးအထိ မီးလောင်ပျက်စီးသွားတယ်” လို့ အဆိုပါတာဝန်ခံက ဆက်ပြောပါတယ်။

အခုလက်ရှိမှာ ပျူစောထီးတပ်ဖွဲ့တွေကို စစ်ကောင်စီတပ်က လက်နက်တပ်ဆင်ပေးလိုက်တဲ့အတွက် ပျူစောထီးတပ်ဖွဲ့ဟာ ကန့်ဘလူခရိုင်ထဲက ကျေးရွာ‌တွေဖြစ်တဲ့ ကိုးတောင်ဘို့၊ ချပ်သင်း နဲ့ ပင့်သာတိုက်နယ်အတွင်း စစ်ကြောင်းထိုးမီးရှို့မှုတွေ ဆက်တိုက်ပြုလုပ်လာတဲ့အတွက် ဒေသခံပြည်သူ သုံးသောင်းကျော်ဟာ ထွက်ပြေးတိမ်းရှောင်နေရတယ်လို့လည်း ကျွန်းလှတက်ကြွလှုပ်ရှားသူများအဖွဲ့က ထုတ်ပြန်ထားပါတယ်

စာတည်း – 007