မန္တလေး၊ ဇွန် ၁၊ ၂၀၂၅။

ရတနာပုံတော်လှန်ရေးတပ်ဖွဲ့ရဲ့ ဗဟိုကော်မတီဝင် တပ်မှူး ရဲဘော်ခွန်စိုင်း (ခေါ်) ဗိုလ်ဒေါင်းဟာ စစ်ကောင်စီကိုတိုက်ခိုက်ရင်း ကျဆုံးသွားခဲ့ပြီး မေ ၃၁ ရက်မှာ ဈာပနအခမ်းအနားပြုလုပ်ပြီးခဲ့တယ်လို့ ရတနာပုံတော်လှန်ရေးအဖွဲ့ YRF ဆီကနေ သိရပါတယ်။

မေ ၂၈ ရက်က စစ်ကောင်စီစခန်းကိုဝင်ရောက်တိုက်ခိုက်ရင်း တပ်မှူးခွန်စိုင်း (ခေါ်) ဗိုလ်ဒေါင်းဟာ လက်နက်စထိမှန်ကာ ကျဆုံးသွားခဲ့တာဖြစ်တယ်လို့ သိရပါတယ်။

စစ်ကောင်စီကိုတိုက်ခိုင်ရင်း ကျဆုံးသွားခဲ့တဲ့ တပ်မှူးခွန်စိုင်းဟာ အသက် ၂၃ နှစ်အရွယ်ရှိပြီး စစ်အာဏာသိမ်းပြီးနောက် စစ်သင်တန်းတက်ခဲ့ပြီး၂၀၂၁၊ ဧပြီလလောက်မှာစစ်သင်တန်းဆင်းကာ ၂၀၂၂ ခုနှစ်မှာတော့ မန္တလေးမြို့ပေါ် မြို့ပြပြောက်ကျား UG အဖြစ်လုပ်ကိုင်ရင်း ရတနာပုံတပ်ဖွဲ့ရဲ့တပ်မှူးအဖြစ်တာဝန်ထမ်းဆောင်ခဲ့တယ်လို့ သိရပါတယ်။

“တော်လှန်ရေးကာလတလျောက်လုံးမှာ သူလုပ်နိုင်တဲ့တာဝန်မှန်သမျှ အကုန်လုပ်ခဲ့တယ်။ အမှတ်တရတွေတော့ အများကြီးပဲပေါ့ဗျာ။ တိုက်ပွဲရဲ့ ရှေ့တန်းတနေရာမှာ ကျဆုံးသွားတာပါ။ တော်လှန်ရေးသိက္ခာက အသက်ထက်အရေးကြီးတယ်ဆိုတာ သူသက်သေပြသွားနိုင်ခဲ့တယ်။”လို့ တော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

တပ်မှူးခွန်စိုင်း ကျဆုံးသွားခဲ့တဲ့ ရှေ့တန်းနေရာနဲ့ သေဆုံးနိုင်လောက်တဲ့အထိ ရရှိခဲ့တဲ့ဒဏ်ရာအခြေအနေ အသေးစိတ်ကိုတော့ လုံခြုံရေးအရမပြောပြနိုင်သေးဘူးလို့ သူကဆက်ပြောပါတယ်။

တပ်မှူးခွန်စိုင်းရဲ့နာရေးကို ကျန်ရစ်တဲ့တပ်ဖွဲ့ဝင်တွေနဲ့အတူ ဒေသခံတွေလည်း ဦးညွှတ်ဂုဏ်ပြုခဲ့ကြတယ်လို့ သိရပါတယ်။

တပ်မှူးခွန်စိုင်း ခေါ် ဗိုလ်ဒေါင်းဟာ နိုင်ငံရေးအရတက်ကြွသူတဦးဖြစ်ခဲ့ပြီး လူထုသပိတ်တိုက်ပွဲတွေကိုလည်း ဦးဆောင်သူတဦးအဖြစ်ပါဝင်ကာ စစ်အာဏာရှင်ကို ရဲရဲဝံ့ဝံ့ဆန့်ကျင်တော်လှန်ခဲ့သူဖြစ်တယ်လို့ ရတနာပုံတော်လှန်ရေးတပ်ဖွဲ့ YRFက ထုတ်ပြန်ထားပါတယ်။

စာတည်း – လင်း

ရွှေကျင်၊ ဧပြီ ၁၁၊ ၂၀၂၅။

ပဲခူးတိုင်း၊ ရွှေကျင်မြို့နယ်မှာ တိုက်ပွဲတွေဖြစ်ပွားပြီး တော်လှန်ရေးပူးပေါင်းတပ်တွေဘက် ၂ ဦး ကျဆုံးကာ ၁ ဦးပျောက်ဆုံးနေတယ်လို့ မြေပြင်တိုက်ပွဲပါဝင်ခဲ့သူတွေထံက သိရပါတယ်။

ဧပြီလ ၁၁ ရက် ယနေ့မနက် ၅ နာရီကျော်ခန့်မှာ ကွမ်းဆိပ်ရွာအခြေစိုက် ခမရ ၅၉၈ တပ်ကို တော်လှန်ရေးပူးပေါင်းတပ်တွေဘက်က သွားရောက်တိုက် ခိုက်ခဲ့ပြီး အဆိုပါတိုက်ခိုက်ရေးအဖွဲ့အတွက် ညောင်ခြေထောက်ကျေးရွာဘုန်းကြီးကျောင်းကနေ ရှေ့ကင်းအနေနဲ့ရှိနေတဲ့တပ်စိတ်ကို မနက် ၅ နာရီခွဲကျော်မှာ စစ်ကောင်စီအင်အား ၅၀ ကျော်က ပြန်လည်ပိတ်ဆို့တိုက်ခိုက်ခဲ့တာလို့ ဆိုပါတယ်။

” ဒီမနက် ၅၉၈ ကို သွားလုပ်တဲ့အချိန် ညောင်ခြေထောက်မှာ ကင်းထောက်ထားတဲ့ တပ်စိတ်ကို စစ်ကူလာတဲ့စစ်ကြောင်းက ပြန်ဝိုင်းတာခံရတာ။ နှစ်ဖက်ပစ်ကြတော့ ပထမဆုံးထိတဲ့ သူတွေကကျန်ခဲ့ပြီး ကျန်တဲ့သူတွေတော့ လွတ်ခဲ့တယ်။ ရွာကပဲ စကစကို သတင်းပေးလိုက်တာနေမယ်” လို့ မြေပြင်တိုက် ခိုက်ရေးမှာပါဝင်ခဲ့တဲ့ တပ်ဖွဲ့ဝင်တဦးက ပြောပါတယ်။

ညောင်ခြေထောက်ဘုန်းကြီးကျောင်းက ရှေ့ကင်းတပ်စိတ်တိုက်ခိုက်ခံရမှုမှာ တောင်ညိုစစ်ကြောင်းတပ်ဖွဲ့ဝင် နွားကြီး၊ ငထက်တို့ ၂ ဦး ကျဆုံးခဲ့ရပြီး အင်းတကော်ပကဖတပ်ဖွဲ့ဝင် ၁ ဦး ပျောက်ဆုံးနေသလို ဘုရားကြီးပကဖတပ်ဖွဲ့ဝင် ၁ ဦးလည်း ဒဏ်ရာရရှိခဲ့တာပါ။

ဒါ့အပြင် တပ်ဖွဲ့ဝင်တွေကိုင်ဆောင်တဲ့ အာပီဂျီ စိန်ပြောင်း ၁ လက်၊ သေနတ် ၁ လက်နဲ့ စစ်သုံးပစ္စည်းအချို့လည်း ကျန်ရစ်ခဲ့တယ်လို့ သိရပြီး စစ်ကောင်စီဘက်ကလည်း သေဆုံးထိခိုက်ရှိပေမယ့် အတိအကျရဖို့စုံစမ်းနေဆဲလို့ ၄င်းက ဆိုပါတယ်။

ခမရ ၅၉၈ ကိုတိုက်ခိုက်ရာမှာတော့ စစ်ကောင်စီဘက်က ထိခိုက်သေဆုံးရှိနိုင်ပြီး ကာကွယ်ရေးပူးပေါင်းတပ်တွေဘက်တော့ အထိအခိုက်မရှိဘဲ မနက် ၉ နာရီကျော်မှာ ပြန်ဆုတ်လာနိုင်တယ်လို့ သိရပါတယ်။

တိုက်ပွဲတွေကြောင့်ညောင်ခြေထောက်ကျေးရွာနဲ့ ကွမ်းဆိပ်ကျေးရွာတွေက ဒေသခံအချို့ဘေးလွတ်ရာကို ထွက်ပြေးတိမ်ရှောင်နေပြီး ထွက်မပြေးဘဲ နေ အိမ်ကတုတ်ကျင်းတွေထဲ ပုန်းခိုနေကြသူတွေလည်းရှိတယ်လို့ သိရပါတယ်။

စာတည်း – ဟိန်းစံ