ကိုပါအမေရိက

မြေလတ်အသံ၊ ဇူလိုင် ၁၅၊ ၂၀၂၄။

ယနေ့မနက် ယှဉ်ပြိုင်ခဲ့တဲ့ အာဂျင်တီးနားနဲ့ ကိုလံဘီယာတို့ရဲ့ ကိုပါအမေရိက ဗိုလ်လုပွဲမှာ အာဂျင်တီးနားအနိုင်ရရှိခဲ့ပြီး ကိုပါအမေရိကချန်ပီယံဆုဖလားကို ၂ ကြိမ်ဆက် သိမ်းပိုက်နိုင်ခဲ့ပါတယ်။

မြန်မာစံတော်ချိန် မနက် ၆ နာရီခွဲမှာ စတင်ကစားမယ့်ပွဲမှာ ကွင်းအတွင်း ပရိသတ်ဝင်ရောက်မှုအပိုင်းမှာ ပြသနာအနည်းငယ်ရှိခဲ့လို့ ၁ နာရီကျော် နောက်ကျပြီး မနက် ၇ နာရီ ၄၅ မိနစ်မှ ပြိုင်ပွဲကို စတင်နိုင်ခဲ့တာ ဖြစ်ပါတယ်။

ဒီပွဲမှာ အာဂျင်တီးနားအသင်းက ခြေစွမ်းပြသွင်းဂိုးတွေရယူပေးနေတဲ့ တိုက်စစ်မှူး လော်တာရိုမာတီနက်ဇ်ကို ချန်လှပ်ထားခဲ့ပြီး အဲဗာရက်ဇ်နဲ့ ပွဲထွက်လာခဲ့တာပါ။

ကြံ့ခိုင်မှုအသားပေးပြီး ကြမ်းကြမ်းတမ်းတမ်း ကစားတဲ့ ကိုလံဘီယာအသင်းကြောင့် အာဂျင်တီးနားတို့ ကစားရခက်ခဲခဲ့ပြီး နှစ်ဖက်အသင်းသား ထိခိုက်ဒဏ်ရာရမှုတွေမကြာခဏဖြစ်ခဲ့ကာ အာဂျင်တီးနားအသင်းခေါင်းဆောင် မက်ဆီလည်း ၆၆ မိနစ်မှာ ဒဏ်ရာရလို့ လူစားလဲခဲ့ရပါတယ်။

နှစ်ဖက်အသင်းအပြန်အလှန်ဂိုးပေါက်ခြိမ်းခြောက်မှုတွေ ပြုလုပ်နိုင်ခဲ့ပေမယ့် ဂိုးသမားတွေ လက်စွမ်းပြနိုင်ခဲ့ကြလို့ သွင်းဂိုးမရရှိခဲ့ဘဲ ပွဲကစားချိန် မိနစ် ၉၀ ပြည့်ကာ အချိန်ပို မိနစ် ၃၀ ဆက်လက် ကစားခဲ့ရတာပါ။

အချိန်ပိုပထမပိုင်း ၉၇ မိနစ်မှာ ချန်လှပ်ခံထားရတဲ့ တိုက်စစ်မှူး လော်တာရိုမာတီနက်ဇ် လူစားဝင်ရောက်လာခဲ့ပြီး ၁၁၂ မိနစ်အရောက်မှာတော့ ကွင်းလယ်လူ လိုဆယ်လ်ဆိုရဲ့ ဖန်တီးပေးမှုကနေတဆင့် မာတီနက်ဇ်က ဂိုးသမားနဲ့တဦးချင်းအတွေ့မှာ တိတိကျကျကန်သွင်းပြီး အဖိုးတန် အနိုင်ဂိုးကို ရယူပေးခဲ့ပါတယ်။

လက်ကျန်ပွဲကစားချိန်တွေမှာတော့ ကိုလံဘီယာအသင်းက တိုက်စစ်ဖွင့်ပြီး ချေပဂိုးရရှိနိုင်ဖို့ ကြိုးစားခဲ့ပေမယ့် အာဂျင်တီးနားအသင်းက အနိုင်ရလဒ်ကို ထိန်းသိမ်းကာ ပွဲကစားချိန် ၁၂၀ မိနစ်အပြီးမှာတော့ ၁-၀ ရလဒ်နဲ့ ကိုပါအမေရိကဖလားကို အာဂျင်တီးနားအသင်း ကိုင်မြှောက်နိုင်ခဲ့တာပဲ ဖြစ်ပါတယ်။

ကိုပါအမေရိကဖလားရရှိခဲ့လို့ အာဂျင်တီးနားအသင်းဟာ ကိုပါအမေရိကဖလား ၂ကြိမ်ဆက် ဗိုလ်စွဲခဲ့ပြီး မက်ဆီအနေနဲ့လည်း နိုင်ငံတကာပွဲစဉ် အောင်မြင်မှုအနေနဲ့ ကိုပါအမေရိကဖလား ၂ကြိမ် ကမ္ဘာ့ဖလား ၁ကြိမ် ရရှိခဲ့ပါတယ်။

AFA – Selección Argentina 

မြေလတ်အသံ၊ ဇူလိုင်၁၄၊၂၀၂၄။

ယနေ့မနက် မြန်မာစံတော်ချိန် ၆ နာရီ ၃၀ မိနစ်မှာ ကျင်းပခဲ့တဲ့ ကိုပါအမေရိက တတိယနေရာလုပွဲမှာ ဥရုဂွေးအသင်းက ကနေဒါအသင်းကို ပင်နယ်တီအဆုံးအဖြတ်နဲ့ အနိုင်ရရှိပြီး ကိုပါအမေရိက တတိယနေရာကို ရရှိခဲ့ပါတယ်။

ပွဲအစ ၈ မိနစ်မှာ ဘန်တန်ကာ ရဲ့သွင်းဂိုးနဲ့ ဥရုဂွေးတို့ ဦးဆောင်နိုင်ခဲ့ပြီး ပထမပိုင်း ၂၂ မိနစ်မှာ ထောင့်ကန်ဘောကနေ တဆင့် ကိုနေးရဲ့ နောက်ပြန်ကန်ချက်နဲ့အတူ ကနေဒါအသင်းက ချေပဂိုးပြန်လည်ရရှိခဲ့ပါတယ်။ ကနေဒါတို့ ချေပဂိုးရပြီး မိနစ်ပိုင်းအတွင်းမှာပဲ ဥရုဂွေးအသင်းက ပယ်လီစရီရဲ့ ဦးဆောင်ဂိုးရရှိခဲ့ပေမယ့် အာရာအူဟို လူကျွံနေခဲ့လို့ ဂိုးမရရှိခဲ့ပါဘူး။

ဒုတိယပိုင်းပြန်အစမှာတော့ ဥရုဂွေးတိုက်စစ်မှူး ဒါဝင်နူနက်ဇ်ကို ထုတ်ပြီး ဝါရင့်တိုက်စစ်မှူး ဆွာရက်ဇ်နဲ့လူစားလဲခဲ့ပေမယ့် ဥရုဂွေးအသင်းရဲ့တိုက်စစ်ကို ကနေဒါအသင်း အကောင်းဆုံးဟန့်တားနိုင်ခဲ့ပြီး ပွဲကစားချိန် မိနစ် ၈၀ အရောက်မှာ အဝေးကန်ချက်ကနေ ဂိုးသမား ပြန်ပုတ်ထုတ်တဲ့ဘောလုံးကို တိုက်စစ်မှူး ဂျွန်နသန် ဒေးဗစ်က အပိုင်ပိတ်သွင်းပြီး ကနေဒါတို့ ဦးဆောင်ဂိုး ရရှိခဲ့ပါတယ်။

ကနေဒါအသင်း ဦးဆောင်ဂိုးကို ဆက်လက်ထိန်းထားဖို့ကြိုးစားနေရင်း မိနစ် ၉၀ ပြည့်လို့ နာကျင်အချိန်ပို ၅ မိနစ်ပေးထားခဲ့ရာကနေ ဥရုဂွေးအသင်းရဲ့ လူစားဝင် ဝါရင့်တိုက်စစ်မှူး ဆွာရက်ဇ် က ၉၂ မိနစ်မှာ ချေပဂိုး ပြန်လည်သွင်းယူနိုင်ခဲ့ပြီး ဥရုဂွေးအသင်း ပြန်လာနိုင်ခဲ့ကာ ပွဲပြီးချိန်မှာ ၂-၂ ရလဒ်နဲ့ အဆုံးသတ်ခဲ့ပါတယ်။

ပွဲကစားချိန်ပြည့်တဲ့နောက် ပင်နယ်တီအဆုံးအဖြတ်မှာတော့ ကနေဒါအသင်းက အရင်ကန်သွင်းခွင့်ရခဲ့ပြီး တတိယမြောက် ကန်သွင်းတဲ့ ကိုနေးရဲ့ ကန်ချက်ကို ဥရုဂွေးဂိုးသမား ရိုချက် ကာကွယ်နိုင်ခဲ့ကာ ပဉ္စမမြောက်ကန်သွင်းရသူ အဖွန်ဆို ဒေးဗီးစ်ရဲ့ Peneka ကန်ချက်က ဘားမှန်ခဲ့လို့ ပင်နယ်တီလေးဂိုးစလုံး အမှားအယွင်းမရှိ ကန်သွင်းနိုင်ခဲ့တဲ့ ဥရုဂွေးအသင်းက အနိုင်ရရှိခဲ့ပြီး ပွဲစဉ်ရဲ့ အကောင်းဆုံးကစားသမားဆုကိုတော့ လူစားဝင်တိုက်စစ်မှူး ဆွာရက်ဇ်က ရရှိခဲ့ပါတယ်။

ကိုပါအမေရိက ပွဲစဉ်ရဲ့ ဗိုလ်လုပွဲမှာတော့ အာဂျင်တီးနားနဲ့ ကိုလံဘီယာတို့ တွေ့ဆုံမှာဖြစ်ပြီး ဇူလိုင် ၁၅ ရက် မနက်ဖြန် မြန်မာစံတော်ချိန် နံနက် ၆ နာရီ ၃၀ မိနစ်မှာ ယှဉ်ပြိုင်သွားမှာ ဖြစ်ပါတယ်။

Photo – Copa América FB

မြေလတ်အသံ၊ ဇူလိုင် ၁၁၊ ၂၀၂၄။

အမေရိကန်နိုင်ငံက အိမ်ရှင်အဖြစ် လက်ခံကျင်းပတဲ့ ကိုပါအမေရိက ၂၀၂၄ ပြိုင်ပွဲရဲ့ ဗိုလ်လုပွဲစဉ်မှာ အာဂျင်တီးနားနဲ့ ကိုလံဘီယာ​အသင်းတို့ တွေ့ဆုံကြမှာ ဖြစ်ပါတယ်။

အာဂျင်တီးနားအသင်းဟာ အုပ်စုအဆင့်ပွဲစဉ်တွေမှာ ကနေဒါ၊ ချီလီ၊ ပီရူး အသင်းတို့ကို အနိုင်ရရှိခဲ့ပြီး ကွာတားဖိုင်နယ်မှာ အီကွေဒေါအသင်းကို ပင်နယ်တီအဆုံးအဖြတ်နဲ့ အနိုင်ရခဲ့ကာ ဆီမီးဖိုင်နယ်အဆင့်မှာတော့ ကနေဒါအသင်းကို ကျော်ဖြတ်ပြီး ဗိုလ်လုပွဲကို ရောက်ရှိခဲ့တာ ဖြစ်ပါတယ်။

ကိုလံဘီယာအသင်းအနေနဲ့လည်း အုပ်စုပွဲစဉ်တွေမှာ ပါရာဂွေးနဲ့ ကော်စတာရီကာကို အနိုင်ရရှိခဲ့ကာ ဘရာဇီးကို သရေရယူနိုင်ခဲ့တာဖြစ်ပါတယ်။ အဲ့ဒီနောက် ကွာတားဖိုင်နယ်အဆင့်မှာ ပနားမားအသင်းနဲ့ ဆီမီးဖိုင်နယ်အဆင့်မှာ ဥရုဂွေး အသင်းတို့ကိုအနိုင်ယူခဲ့ကာ ဗိုလ်လုပွဲကို ရောက်ရှိခဲ့တာဖြစ်ပါတယ်။

ကိုပါအမေရိက ဗိုလ်လုပွဲကို အမေရိကန်နိုင်ငံ၊ မိုင်ယာမီမှာရှိတဲ့ Hard Rock Stadium မှာ ဇူလိုင် ၁၄ ရက် ဒေသစံတော်ချိန် ည ၈ နာရီ​ (မြန်မာစံတော်ချိန် ဇူလိုင် ၁၅ ရက် မနက် ၆ နာရီ ၃၀ မိနစ်) အချိန်မှာ ကျင်းပသွားမှာ ဖြစ်ပါတယ်။

ဓါတ်ပုံ – ESPN