ကလေး

■ ၃ ရက်ဆက်တိုက် လေကြောင်းတိုက်ခိုက်မှုအတွင်း အရပ်သား ၁၀ ဦး သေဆုံးထား

စစ်ကိုင်း၊ ဖေဖော်ဝါရီ ၂၊ ၂၀၂၅။

စစ်ကိုင်းတိုင်း၊ ကလေးမြို့နယ်တောင်ပိုင်းက တင်သားကျေးရွာနဲ့ ဒိုးနွယ်ကျေးရွာကို စစ်ကောင်စီတပ်ဖွဲ့ဝင်တွေက လေကြောင်းနဲ့ ဗုံးကြဲခဲ့တာကြောင့် ပြည်သူ တဦး ထပ်မံသေဆုံးခဲ့တယ်လို့ ဒေသခံတွေဆီက သိရပါတယ်။

ဇန်နဝါရီ ၂ ရက် ဒီကနေ့ နေ့လယ် ၁၁ နာရီကျော်မှာ ဂျက်ဖိုက်တာနဲ့ ကျေးရွာ ၂ ရွာကို မိနစ်ပိုင်းပဲခြားကာ ဗုံးကျဲခဲ့တာဖြစ်တယ်လို့ ဆိုပါတယ်။

“တင်သားနဲ့ ဒိုးနွယ်သင်္ချိုင်းကိုကြဲတာ၊ ထိတဲ့ ပြည်သူ ၁ ဦးက သေပြီ၊ ၂ ဦးထိတာ။”လို့ ကလေးဒေသခံတဦးက ပြောပါတယ်။

လေကြောင်းကြဲချိန် တင်သားရွာက ပြည်သူ ၂ ဦး ထိမှန်ခဲ့ပြီး အသက် ၅၀ အရွယ် အမျိုးသားကတော့ သေဆုံးခဲ့ကာ ၁ ဦးကတော့ ဆေးကုသမှုခံယူနေတယ်လို့ ဆိုပါတယ်။

ဖေဖော်ဝါရီ ၁ ရက် မနေ့ကလည်း ဆည်တော်ရွာ စာသင်ကျောင်းကို စစ်ကောင်စီက လေကြောင်းတိုက်ခိုက်မှုပြုလုပ်ချိန် ၁ ဦး ဝမ်းဗိုက်ထိမှန်ဒဏ်ရာရခဲ့တယ်လို့ သိရပါတယ်။

ဒါ့အပြင် ဇန်နဝါရီ ၃၁ ရက်နေ့ကလည်း ကလေးတောင်ပိုင်းက ကုက္ကိုလ်ရွာ ကျောင်းဝန်းထဲကို စစ်ကောင်စီက လေကြောင်းနဲ့ ဗုံးကြဲခဲ့တာကြောင့် စစ်ရှောင်တွေ နေထိုင်တဲ့ တဲအိမ်တွေပေါ် ကျရောက်ပေါက်ကွဲကာ အင်းကျွန်းနဲ့ ဟံသာဝတီရွာက စစ်ရှောင်ပြည်သူ ၉ ဦး သေဆုံးခဲ့ပါတယ်။

အဲ့ဒီသေဆုံးသူတွေထဲမှာ အသက် ၅ နှစ်ကနေ ၁၂ နှစ်အရွယ်ကြား ကလေးငယ် ၄ ဦးနဲ့ အသက် ၁၇ နှစ်ကနေ ၄၆ နှစ်ကြား အမျိုးသမီး ၅ ဦးတို့ပါဝင်ပြီး အကြီးစားထိခိုက်ဒဏ်ရာရသူ ၄ ဦးအပါအဝင် အရပ်သားပြည်သူ ၃၀ ဝန်းကျင်ဒဏ်ရာရခဲ့တယ်လို့ သိရပါတယ်။

စစ်ကောင်စီတပ်ဖွဲ့ဝင်တွေက ကလေးမြို့နယ်တောင်ပိုင်းကို ၃ရက်ဆက်တိုက် လေကြောင်းတိုက်ခိုက်မှုပြုလုပ်ခဲ့တာဖြစ်ပြီး စုစုပေါင်း အရပ်သားပြည်သူ ၁၀ ဦး သေဆုံးထားတာပါ။

ပဲခူး၊ ဇန်နဝါရီ ၃၁၊ ၂၀၂၅။

ပဲခူးတိုင်းအနောက်ခြမ်း၊ ကြို့ပင်ကောက်မြို့နယ်၊ ကံဦးအုပ်စု၊ ရင်းတိုက်ကွင်းရွာက လသားအရွယ် ကလေးငယ်တွေနဲ့ အသက်ကြီးသူတွေအပါအဝင် ကျေးရွာသား ၄၀ နီးပါးကို ဇန်နဝါရီ ၃၀ ရက် မနက် ၃ နာရီဝန်းကျင်မှာ စစ်ကောင်စီက ဖမ်းဆီးသွားတယ်လို့ ဒေသခံတဦးက ပြောပါတယ်။

ရင်းတိုက်ကွင်းရွာနဲ့ ၃ မိုင်အကွာလောက်အကွာမှာရှိတဲ့ ကွင်းချောင်းရွာက ပျူစောထီးအပါအဝင် စစ်ကောင်စီ တပ်ဖွဲ့ဝင် အင်အား ၄၀ ဦးလောက်က လသားအရွယ်ကလေးငယ်နဲ့ အသက် ၈၀ နှစ်ကျော်အရွယ်အပါအဝင် အမျိုးသားနဲ့ အမျိုးသမီးအပါ ၃၇ ဦးကို လာရောက်ဖမ်းဆီးသွားတာဖြစ်တယ်လို့ ဆိုပါတယ်။

“မနက်အစောကြီးတံခါးတွေကို ကန်ဖွင့်ပြီး အိမ်ထဲတွေ့တဲ့သူ ကလေးလူကြီးအားလုံးကို အကုန်ဖမ်းဆီးပြီး ကွင်းချောင်းရွာကို ဒါ့အပြင် ရင်းတိုက်ကွင်းရွာဟာ မြို့နယ်အတွင်းတိုက်ပွဲဖြစ်ပွားခဲ့ဖူးတဲ့ အေးရွာလေးရွာ၊ ရုံးချောင်းရွာ စတဲ့ရွာတွေနဲ့လည်း အလှမ်းဝေးတယ်“လို့ သိရပါတယ်။

ဖမ်းဆီးခံရသူတွေကို ကျန်ခဲ့တဲ့မိသားစုဝင်တွေက တွေ့ဆုံဖို့ကြိုးစားပေမယ့် တွေ့ခွင့်မရသေးဘူးလို့ ဒေသခံတဦးက ပြောပါတယ်။

ခြေလျင်ခေါ်သွားတာ၊ ထွက်ပြေးလို့ လွတ်သွားသူတွေလည်းရှိတယ်၊ အကြောင်းမဲ့သက်သက် ပြည်သူတွေကိုအနိုင်ကျင့်ဗိုလ်ကျတယ်လို့ပဲမြင်တယ်” လို့ အဆိုပါဒေသခံတဦးက ပြောပါတယ်။

ရင်းတိုက်ကွင်းရွာဟာ ကြို့ပင်ကောက်မြို့နဲ့ ၁၀ မိုင်လောက်အကွာမှာရှိပြီး အိမ်ခြေ ၂၀၀ ဝန်းကျင်ရှိကာ အခုလို စစ်ကောင်စီက ကျေးရွာအတွင်း ဝင်ရောက်ဖမ်းဆီးတာမျိုး အရင်က မရှိခဲ့ဘူးလို့ အဆိုပါဒေသခံဆီက သိရပါတယ်။

နံနက် ၇ နာရီခန့်မှာ ရင်းတိုက်ကွင်းရွာကနေ စစ်ကြောင်းပြန်ထွက်သွားပြီးတဲ့နောက် ကျေးရွာသားတွေ ရွာထဲကို ပြန်ဝင်လာကြတယ်လို့ ဆိုပါတယ်။

ဒီနေ့ဆက်သွယ်မေးမြန်းချက်အရ ပျူစောထီးတွေနဲ့ နီးစပ်ဆက်စပ်သူ ၄ ဦးသာ ပြန်လည်လွတ်မြောက်လာပြီး ကျန်သူတွေကတော့ မလွတ်မြောက်လာသေးဘူးလို့ သိရပါတယ်။

ရင်းတိုက်ကွင်းရွာဟာ ကြို့ပင်ကောက်မြို့နဲ့ ၁၀ မိုင်လောက်အကွာမှာရှိပြီး အိမ်ခြေ ၂၀၀ ဝန်းကျင်ရှိကာ အခုလို စစ်ကောင်စီက ကျေးရွာအတွင်း ဝင်ရောက်ဖမ်းဆီးတာမျိုး အရင်က မရှိခဲ့ဘူးလို့ အဆိုပါဒေသခံဆီက သိရပါ တယ်။

စာတည်း – လင်းဇေ

စစ်ကိုင်း၊ ဇန်နဝါရီ ၃၀၊ ၂၀၂၅။

စစ်ကိုင်းတိုင်း၊ ကလေးမြို့အကျဥ်းထောင်အရာရှိတွေဖြစ်တဲ့ ထောင်ပိုင်အောင်မိုးဟိန်းနဲ့ ထောင်လုံခြုံရေးတာဝန်ခံတပွင့် ဟန်ဝင်းအောင်တို့က နိုင်ငံရေးအကျဉ်းသားတွေရဲ့မိသားစုဝင်တွေအပေါ်မှာ လိင်ပိုင်းဆိုင်ရာနှောင့်ယှက်ပြောဆိုမှုတွေရှိနေတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် – PPNM က ဇန်နဝါရီ ၃၀ ဒီနေ့မှာ ထုတ်ပြန်ပါတယ်။

ကလေးထောင်က နိုင်ကျဉ်းတဦးရဲ့ ဇနီးဖြစ်သူတဦးက ထောင်ဝင်စာဧည့်တွေ့ပြီး နေအိမ်ကိုပြန်ရောက်ချိန် ထောင်ပိုင်အောင်မိုးဟိန်းက ဖုန်းကနေတဆင့် လိင်ပိုင်းဆိုင်ရာစော်ကားပြောဆိုမှု လုပ်ဆောင်ခဲ့တာလို့ ဆိုပါတယ်။

“ဧည့်တွေ့ပြန်လာချိန်မှာ ဖုန်းဆက်လာတော့ ထောင်ပိုင်ကြီးက သူ့ကို အဘတို့၊ ဦးလေးတို့ခေါ်တာကို မခေါ်နဲ့၊ ကိုကြီးလို့ခေါ်ပါ အဲ့ကနေစကားစတယ်။ စကားစပြီးတော့ သူနဲ့သီးသန့်တွေ့ပေးမယ်၊ ချိန်းတွေ့ပြီးတော့အတူနေပေးမယ်ဆိုရင် အမျိုးသားကိုလျှော့ရက်တွေရမယ်။ လျှော့ရက်တွေရအောင်လုပ်ပေးလို့ရတယ်ဆိုပြီးတော့ ပြောသွားတယ်။”လို့ မြန်မာနိုင်ငံလုံးဆိုင်ရာနိုင်ငံရေးအကျဥ်းသားများကွန်ရက် – PPNM မှ ရုံးတာဝန်ခံ လင်း ကပြောပါတယ်။

အလားတူ နောက်ထပ်နိုင်ငံရေးအကျဉ်းသားတွေရဲ့ မိသားစုဝင်အမျိုးသမီးတွေကိုလည်း အခုလို လိင်ပိုင်းဆိုင်ရာစော်ကားနှောင့်ယှက်တဲ့စကားတွေကို ဖုန်းကနေတဆင့်ပြောဆိုမှုတွေရှိနေပြီး သတင်းပေးပို့ထားတာတွေလည်းရှိထားတယ်လို့ ဆိုပါတယ်။

“စော်ကားခံရတဲ့ အယောက်အရေအတွက် အတိအကျကို ကျနော်တို့ပြောလို့မရပါဘူး။ ကျနော်တို့ဆီကိုသတင်းပေးပို့လာတာတောင်မှ ၄၊ ၅ ဦးလောက်အထိရှိတယ်။”လို့ PPNM မှ ရုံးတာဝန်ခံ လင်း ကဆက်ပြောပါတယ်။

ကလေးအကျဉ်းထောင်အာဏာပိုင်တွေ လိင်ပိုင်းဆိုင်ရာ နှောင့်ယှက်မှုကျူးလွန်တာဟာ နိုင်ငံရေးအကျဉ်းသားတွေရဲ့ဇနီးဖြစ်သူနဲ့ မိသားစုဝင်အမျိုးသမီးတွေအပေါ် ဦးတည်ပြီးပြုလုပ်နေတာလို့ PPNMရဲ့ထုတ်ပြန်ချက်မှာ ဖော်ပြပါတယ်။

ဒါ့အပြင် ထောင်ဝန်ထမ်းတွေအနေနဲ့လည်း နိုင်ကျဉ်းမိသားစုဝင် အမျိုးသမီးတွေဆီကနေ ငွေကြေးအပါအဝင် နာရီ အစရှိတဲ့ အသုံးဆောင်ပစ္စည်းတွေ၊ ခရီးစရိတ်တောင်းခံတာတွေကိုလည်း ပြုလုပ်နေကြတယ်လို့ ဆိုထားပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ ဇန်နဝါရီ ၂၉ ရက်အထိ စစ်ကောင်စီနဲ့၎င်းရဲ့လက်ပါးစေတွေကြောင့် ဖမ်းဆီးခံထားရသူစုစုပေါင်း ၂၈,၄၀၅ ဦးရှိပြီး အဲ့ဒီထဲမှာ ၂၁,၆၈၃ ဦးကတော့ ထိန်းသိမ်းခံထားရဆဲဖြစ်တယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

စစ်ကိုင်း၊ ဇွန် ၁၇၊ ၂၀၂၃။

စစ်ကိုင်းတိုင်း၊ ကလေးမြို့နယ်၊ သာစည်ရွာကို စစ်ကောင်စီက လက်နက်ကြီးနဲ့ ပစ်ခတ်ခဲ့လို့ ရွာဘုန်းကြီးကျောင်းအတွင်း ကျရောက်ပေါက်ကွဲပြီး စာသင်နေတဲ့ ကလေးငယ်တွေထိမှန်ကာ တဦးသေဆုံးခဲ့တယ်လို့ ဒေသခံတွေက ပြောပါတယ်။

ဇွန် ၁၆ရက် မနေ့ မနက် ၁၀နာရီခွဲဝန်းကျင်က အဖွဲ့စက်ရွာ စစ်ကောင်စီဂိတ်ကနေ လက်နက်ကြီး ၄လုံးနဲ့ ပစ်ခတ်ခဲ့တာဖြစ်ပြီး ကလေးတဦးက ဗိုက်ပွင့်ဒဏ်ရာနဲ့ သေဆုံးခဲ့ကာ ကလေး ၂ ဦးကတော့ ဒဏ်ရာပြင်းထန်ရခဲ့လို့ ဆေးကုသနေဆဲဖြစ်တယ်လို့ ဆိုပါတယ်။

“အဲ့မှာက ဘုန်းတော်ကြီးသင်ပညာရေးကျောင်း ဖွင့်တယ်၊ ကျောင်းက ကလေး ၃ ယောက်ထိတာ၊ ကလေးတွေက ထိတာ တော်တော်များတယ်၊ အူတွေပါထွက်တယ်”လို့ ကလေးဒေသခံတဦးက ပြောပါတယ်။

လက်နက်ကြီးကျလို့ လူနေအိမ်တလုံး မီးလောင်သွားပါတယ်။ အဲဒီနောက် စစ်ကောင်စီတပ်တွေ ရွာထဲဝင်လာပြီး လူနေအိမ် ၂ လုံးကို ထပ်မံမီးရှို့ခဲ့သလို ကျန်တဲ့အိမ်တွေကိုလည်း အကုန်ဝင်မွှေသွားတယ်လို့ ဒေသခံတွေက ဆိုပါတယ်။

ဇွန်လ ၁၅ရက်က သာစည်ရွာနားမှာ စစ်ကောင်စီရဲ့ ဆောက်လုပ်ရေး ပစ္စည်းတွေတင်လာတဲ့ ကား၂စီးကို ဒေသကာကွယ်ရေးတပ်ဖွဲ့တွေက ဖမ်းဆီးခဲ့လို့ အခုလို ကျေးရွာကိုမဲပြီး လက်နက်ကြီးနဲ့ပစ်ခတ်ကာ ရွာကို မီးဝင်ရှို့သွားတာဖြစ်တယ်လို့ ဆိုပါတယ်။

စစ်ကောင်စီတပ်တွေဟာ သာစည်ရွာကို ပစ်ခတ်ဝင်ရောက်ခဲ့ပြီး ပြန်ထွက်ခွာချိန်မှာလည်း နင်းမိုင်းတွေ ထောင်ထားခဲ့တယ်လို့ သိရပါတယ်။

ဒါ့အပြင် ကလေးမြို့ပေါ် အမြောက်တပ်ကနေလည်း ကလေးတောင်ပိုင်းကို လက်နက်ကြီးတွေနဲ့ ပစ်ခတ်နေပြီး နေ့လယ် ၁၁နာရီကနေ ည ၉နာရီအတွင်း လက်နက်ကြီး ၁၃ လုံး ပစ်ခတ်ခဲ့ပါတယ်။

ပြီးခဲ့တဲ့ ဇွန်လ ၉ရက်တုန်းကလည်း ဒေသကွပ်ကဲမှုစစ်ဌာနချုပ်(ဒကစ)ထဲကနေ ပစ်ခတ်တဲ့ လက်နက်ကြီး ၂ လုံးဟာ ရေလဲဦးရွာက စစ်ရှောင်တဲနားကို ကျရောက်ပေါက်ကွဲခဲ့ပြီး အသက် ၅၀ ဝန်းကျင် အမျိုးသမီးတဦး ဝမ်းဗိုက်ထိမှန် သေဆုံးခဲ့ပါသေးတယ်။

ပုံစာ – သာစည်ရွာ မီးရှို့ခံရတဲ့ပုံနဲ့ ၁၆ရက်က သာစည်ရွာအဝင်မှာ တူးရခဲ့တဲ့ နင်းမိုင်း။

စာတည်း – လင်းဇေ

စစ်ကိုင်း၊ ဇွန် ၅၊ ၂၀၂၃။

စစ်ကိုင်းတိုင်း၊ ကလေးမြို့နယ်မြောက်ပိုင်းကို စစ်ကောင်စီက လေကြောင်းသုံးတိုက်ခိုက်တဲ့အပြင် လက်နက်ကြီးနဲ့ပါ ဆက်တိုက်ပစ်ခတ်နေတာကြောင့် ဒေသခံပြည်သူ ၈ ဦး ထိမှန်ဒဏ်ရာ ရထားတယ်လို့ သိရပါတယ်။

ဇွန်လ ၅ ရက် ဒီနေ့မနက် ၁၀ နာရီခွဲဝန်းကျင်မှာ တိုက်ခိုက်ရေး ရဟတ်ယာဉ်တစီးနဲ့ ရှုခင်းသာရွာကို တိုက်ခိုက်ခဲ့တာဖြစ်ပြီး၊ ၁၁ နာရီခွဲဝန်းကျင်မှာတော့ ကလေးမြို့ပေါ်ကနေ လက်နက်ကြီးနဲ့ပစ်ခတ်လို့ လက်ပံချောင်းရွာအနီး ကျရောက်ပေါက်ကွဲခဲ့တာကြောင့် ဒေသခံတွေ ထိမှန်ဒဏ်ရာ ရရှိခဲ့တာလည်း ဖြစ်ပါတယ်။

“ကလေးမြောက်ပိုင်းကို လေကြောင်းပစ်နေပြီ၊ စာသင်ကျောင်း ပစ်ခံရတာ၊ လက်နက်ကြီးနဲ့ပစ်တာလည်း ထိထားတယ်၊ ခုလည်း လေယာဉ်နောက်တစီးပတ်ဝဲနေတာမို့ သတိထားနေရတယ်” လို့ ကလေးဒေသခံတဦးက ပြောပါတယ်။

လေကြောင်းပစ်ခတ်ခံရလို့ ရှုခင်းသာရွာက ဒေသခံ ၄ ဦး ထိမှန်ဒဏ်ရာရခဲ့တဲ့အပြင် ကျေးရွာစာသင်ကျောင်း လည်းပျက်စီးခဲ့ပြီး သေဆုံးသူတွေရှိတယ်လို့ သတင်းတွေထွက်ပေါ်နေပေမယ့် မြေလတ်အသံက သီးခြားအတည်မပြုနိုင်သေးပါဘူး။

ဒါ့အပြင် လက်နက်ကြီးနဲ့ပစ်ခတ်လို့ လက်ပံချောင်းရွာက ဒေသခံ ၄ ဦး ကျည်ထိမှန်ခဲ့ကာ တဦးကတော့ ခြေထောက်ပြတ်သွားပြီး တဦးက စိုးရိမ်ရတယ်လို့ သိရပါတယ်။

ထိခိုက်သူတွေထဲမှာ အမျိုးသား၊ အမျိုးသမီးဘယ်နှစ်ဦး ပါလဲဆိုတာနဲ့ လူနာတွေရဲ့ အသေးစိတ်အချက်လက်ကိုတော့ စုံစမ်းနေဆဲဖြစ်တယ်လို့ မြေပြင်နဲ့နီးစပ်သူ အထက်ပါဒေသခံက ပြောပါတယ်။

နေ့လယ် ၁၂ နာရီမှာလည်း နောက်ထပ် တိုက်ခိုက်ရေးရဟတ်ယာဉ်တစီးက ကလေးမြို့ပေါ်ကို ပျံသန်းတာတွေ လုပ်နေတဲ့အတွက် ကလေးမြို့မြောက်ပိုင်းက ပြည်သူတွေ သတိနဲ့နေနေရတယ်လို့ ဆိုပါတယ်။

ကလေးမြို့တောင်ပိုင်းမှာ မေလ ၂၇ ရက်က ၃ ပွင့်ဗိုလ်တဦးအပါအဝင် စစ်ကောင်စီတပ်သား ၁၅ ဦးကျော်သေဆုံးခဲ့ပြီးနောက် စစ်ကောင်စီက ကလေးမြို့ပေါ်ကို စဉ့်ကူးကနေ အင်အား ၃၀၀ နီးပါး ထပ်မံဖြည့်တင်းထားပြီး ဂန့်ဂေါ-ကလေးနယ်စပ်မှာလည်း စစ်ရေးတင်းမာမှုတွေရှိနေတယ်လို့ သိရပါတယ်။

စာတည်း – လင်း