ပဲခူး၊ ဇူလိုင် ၃၊ ၂၀၂၅။

ရေကြီး၊ ရေလျှံမှုတွေဖြစ်နေတဲ့ ပဲခူးမြို့မှာ နေအိမ်အတွင်းအိပ်ကျန်ခဲ့တဲ့ အသက် ၁ နှစ်ခွဲကလေး ရေနစ်သေဆုံးသွားတယ်လို့ ဒေသခံတွေထံက သိရပါတယ်။

ဇူလိုင် ၃ ရက် ဒီကနေ့ မနက် ၆ နာရီခန့်က ပဲခူးမြို့အနိမ့်ပိုင်းရပ်ကွက်တခုဖြစ်တဲ့ ဇိုင်းတောင်ရပ်ကွက်၊ မင်္ဂလာလမ်း၊ သာမဏေကျော်ဘုန်းကြီး ကျောင်းအနီး နေအိမ်တခုရဲ့ ရေအမြင့် ၂ ပေ ကျော်ရှိ နေအိမ်အောက်ကိုဝင်ရောက်နေတဲ့ရေထဲမှာ အသက် ၁ နှစ်ခွဲအရွယ်သားဖြစ်သူကို ဖခင်ဖြစ်သူက သေဆုံးလျက်တွေ့ရှိခဲ့တာလို့ ဆိုပါတယ်။

” မနက် ၄ နာရီလောက် မိဘတွေက စျေးသွားတယ်။ ကလေးတွေကအိပ်ပျော်နေလို့ထားခဲ့တာ။ အိပ်ယာနိုးတော့ မအေကိုမတွေ့တော့ ဆင်းရှာတာ။ (အဖေဖြစ်သူ) ပြန်လာတော့ပေါလောပေါ်နေတယ်။ ရေဝင်နေ တဲ့ရပ်ကွက်တွေ၊ သူခြံထဲမှာရေကဒူးခေါင်းကျော်ရှိတာ”လို့ ဖြစ်စဥ်ကိုသိရှိတဲ့ပဲခူးမြို့ခံတဦးက မြေလတ်အသံကို ပြောပါတယ်။

ရေနစ်သေဆုံးသွားတဲ့ကလေးငယ်ကို ဒီကနေ့ နေ့လယ် ၁ နာရီခန့်မှာပဲ ပဲခူးမြို့၊ ဆင်ဖြူကွင်းသုသာန်မှာ သင်္ဂြိုဟ်လိုက်တယ်လို့ ဆိုပါတယ်။

ပဲခူးမြစ်ရေမြင့်တက်လာမှုကြောင့် ဇူလိုင် ၁ ရက်ကစတင်ကာ ပဲခူးမြို့ရဲ့အနိမ့်ပိုင်းရပ်ကွက်တွေဖြစ်တဲ့ ဇိုင်းတောင်၊ မြို့သစ်၊ ကျောက်ကြီး၊ ကျွန်းသာယာ၊ ကလျာဏီရပ်ကွက်တွေမှာ ရေဝင်ရောက်နေပြီး ကမ်းနဲ့နီးတဲ့အနိမ့်ပိုင်းတွေမှာ ရေအမြင့် ၄ ပေကျော်အထိ ဝင်ရောက်နေတယ်လို့ သိရပါတယ်။

စာတည်း – ဟိန်းစံ

ငလျင်ကြီးအပြီး နောက်ဆက်တွဲငလျင် ၁၉၄ ကြိမ်မြောက်လှုပ်ခဲ့

မန္တလေး၊ ဇွန် ၂၅၊ ၂၀၂၅။

ပဲခူးတိုင်းနဲ့မန္တလေးတိုင်းအတွင်းမှာ ဇွန် ၂၂ ရက်ကနေ ၂၅ ရက်အထိ ငလျင် ၄ ကြိမ်လှုပ်ခတ်ခဲ့တယ်လို့ မိုးလေဝသနဲ့ဇလဗေဒညွှန်ကြားမှုဦးစီးဌာနရဲ့ ထုတ်ပြန်ချက်တွေအရ သိရပါတယ်။

ဇွန် ၂၅ ရက်နေ့လယ် ၂ နာရီကျော်က ချမ်းမြသာစည်မြို့နယ် အရှေ့မြောက်ဘက် ၂ မိုင်ခန့်အကွာမှာ ပြင်းအား ၃.၉ ရစ်(ခ်)တာစကေးရှိ ငလျင်တခုက မြေအောက်အနက် ၁၀ ကီလိုမီတာကနေ လှုပ်ခတ်ခဲ့ တာလို့ ထုတ်ပြန်ချက်မှာ ဖော်ပြပါတယ်။

“သိလိုက်ရုံလေးဘဲ မနေ့ကနဲ့ဟိုတနေ့ကလောက်မပြင်းဘူး။ အချို့လူတွေဆို သိလိုက်မှာတောင် မဟုတ်ဘူး။”လို့ ချမ်းမြသာစည်ဒေသခံ လူမှုကူညီရေးအသင်း တာဝန်ရှိသူတဦးက ပြောပါတယ်။

ဇွန် ၂၄ ရက်မနက် ၁၁ နာရီခန့်မှာလည်း မတ္တရာမြို့ရဲ့ အရှေ့-အရှေ့မြောက်ဘက် ၆ မိုင်အကွာမှာ ပြင်းအား ၃.၁ ရစ်(ခ်)တာစကေးရှိ ငလျင်တခုက မြေအောက်အနက် ၁၅ ကီလိုမီတာကနေ လှုပ်ခတ်ခဲ့ပါတယ်။

အလားတူ ဇွန် ၂၃ ရက်မှာ တောင်ငူမြေငလျင်စခန်းမှ အနောက်ဘက် ၇၃ မိုင်ခန့် ကွာဝေးတဲ့ ပြည်မြို့ရဲ့ အရှေ့ဘက် ၉ မိုင်ခန့်အကွာမှာ ပြင်းအား ၃.၈ ရစ်(ခ်)တာစကေးရှိ ငလျင်တခုဟာ မြေအောက်အနက် ၁၇ ကီလိုမီတာကနေလှုပ်ခဲ့ပါတယ်။

ဇွန် ၂၂ ရက်မှာလည်း ပုသိမ်ကြီးမြို့ရဲ့ အရှေ့-အရှေ့မြောက်ဘက် (၇) မိုင်ခန့်အကွာ ၃.၈ ရစ်(ခ်) တာစကေးရှိငလျင်တို့ လှုပ်ခတ်ခဲ့ပြီး အဲ့ဒီနေ့မှာပဲ လွိုင်ကော်မြို့အရှေ့ဘက် ၇ မိုင်အကွာမှာ ၃.ဝ ရစ်(ခ်) တာစကေးရှိ ငလျင်၊ သာဝတ္ထိမြို့ရဲ့ အရှေ့ဘက် ၃၁ မိုင်ခန့်အကွာမှာ ၃.၂ ရစ်(ခ်)တာစကေးရှိ ငလျင် တို့လှုပ်ခတ်ခဲ့တယ်လို့ မိုးဇလထုတ်ပြန်ချက်အရ သိရပါတယ်။

မတ် ၂၈ ရက်နေ့မှာ လှုပ်ခတ်ခဲ့တဲ့ ပြင်းအား ၇.၇၆ ရစ်ချက်စတာစကေးရှိ ငလျင်ကြီးလှုပ်ခတ်ပြီး နောက်မှာ ၃ လကျော်ထိ ငလျင်ငယ်တွေဆက်တိုက်လှုပ်ခတ်နေပြီး နောက်ဆက်တွဲငလျင် ၁၉၄ ကြိမ် လုပ်ထားတယ်လို့ ဆိုထားပါတယ်။

ငလျင်ကြီးကြောင့် ပြိုကျပျက်စီးခဲ့တဲ့ မန္တလေး sky villa ဟိုတည်လို အဆောက်အဦအောက်တွေမှာလည်း ဒီနေ့အထိ ရုပ်အလောင်းတွေ ဆက်လက်ရှာဖွေတွေ့ရှိနေသေးတယ်လို့ မြန်မာနိုင်ငံ မီးသတ်တပ်ဖွဲ့ထုတ် ပြန်ချက်တွေအရ သိရပါတယ်။

စစ်ကိုင်းမြို့နဲ့ မန္တလေးမြို့အနီးကို အခြေပြုလှုပ်ခတ်ခဲ့တဲ့ စစ်ကိုင်းငလျင်ကြောင့် သေဆုံးသူ ၃,၇၄၀ ဦး၊ ထိခိုက်ဒဏ်ရာရသူ ၅,၁၀၄ ဦးနဲ့ ပျောက်ဆုံးနေသူ ၆၇ ဦးရှိပြီး တွက်ချက်မှုတွေအရ ငွေကျပ် ၃,၆၂၉ ဒသမ ၂၀၈ ဘီလီယံ ပျက်စီးဆုံးရှုံးခဲ့တယ်လို့ ဇွန် ၁ ရက်နေ့ စစ်ကောင်စီပိုင်သတင်းစာမှာ ဖော်ပြထားပါတယ်။

ငလျင်ကြီးဖြစ်ပေါ်ခဲ့တာ ၃ လနီးပါးရှိလာပေမယ့် ငလျင်ဒဏ်သင့်ဒေသတွေမှာ အပျက်အစီးတွေကို မြန်မာနိုင်ငံမီးသတ်တပ်ဖွဲ့နဲ့ လူမှူကူညီရေးအဖွဲ့ဝင်တွေလည်း ရှင်းလင်းရှာဖွေရေးလုပ်ငန်းတွေကို လုပ်ကိုင်နေရဆဲဖြစ်တယ်လို့ သိရပါတယ်။

စာတည်း – လင်း

တောင်ငူ၊ ဇွန် ၂၀၊ ၂၀၂၅။

ပဲခူးတိုင်း၊ တောင်ငူမြို့နယ်မှာ ခပေါင်းချောင်းရေလျှံလာတဲ့အတွက် ဒေသခံရာချီ‌ရွှေ့ပြောင်းနေရတယ်လို့ ကူညီကယ်ဆယ်ရေးပြုလုပ်ပေးနေသူတွေဆီက သိရပါတယ်။

မိုးသည်းထန်စွာရွာသွန်းတဲ့အတွက် ဆည်ရေလွှတ်ပြီး ချောင်းရေလည်းလျှံလာတာကြောင့် ဇွန် ၂၀ ရက် ဒီမနက် ၁ နာရီ မထိုးခင်ကတည်းက ရေတက်လာတာကြောင့် တောင်ငူ-ကင်းဆိပ်ကျေးရွာ သွားလမ်းဘေးက ဒေသခံတွေ နေရာရွှေ့ပြောင်းနေရတာလို့ ဆိုပါတယ်။

“ယာယီရေကြီးတာပါ။ လောလောဆယ်တော့နည်းနည်းပြန်ကျနေပြီး။ အဲဒီရေက အနိမ့်ပိုင်းတွေ စီးနေတယ်။ ရွှေ့ပြောင်းရတာက ရွှေဝါဆီပန့်ကနေ ကင်းဆိပ်ဘက်သွားတဲ့ လမ်းဘေးအနိမ့်ပိုင်းက လူတွေက အရေးကြီးစာရွက်စာတမ်းတွေ၊ သက်ကြီးကလေးတွေ ယာယီရွှေ့တာပါ။ အရမ်းကြီးစိုးရိမ်စရာမရှိသေးဘူး။ နောက်တကြိမ်ထပ်တက်ရင်တော့မပြောတတ်ဘူး။”လို့ ကူညီကယ်ဆယ်ရေး လုပ်ဆောင်ပေးနေသူတဦးက ပြောပါတယ်။

ရေကြီးရေလျှံတာတွေဖြစ်လာလို့ အနိမ့်ပိုင်းကျေးရွာတွေမှာ ရေအမြင့်ပေ ၃ ကျော်လောက်ထိ မြင့်တက်လာနေပြီး ကလေးငယ်တွေနဲ့သက်ကြီးပိုင်းတွေက နီးစပ်ရာကုန်းမြင့်ပိုင်းတွေဘက်ကို ပြောင်းရွေ့နေရတယ်လို့ ဆိုပါတယ်။

လက်ရှိမှာ အိမ်ခြေ ၂၀၀ ကနေ ၄၀၀ ကြားရှိ ကင်းဆိပ်၊ ဇီးပင်သာ၊ ဆင်ဆိပ်၊ အုန်းပင်စု၊ သျှားယာကုန်း၊ ပွတ်စု၊ ကုက္ကိုင်ပင်စုရွာက ဒေသခံ ၇၀၀ ဝန်းကျင်ရွေ့ပြောင်းနေကြရတယ်လို့ သိရပါတယ်။

ရေဝင်တဲ့ကျေးရွာတွေက ဒေသခံတွေကို လူမှုကူညီရေးအသင်းတွေနဲ့ မီးသတ်တပ်ဖွဲ့ဝင်တွေက နေရာရွေ့ပြောင်းဖို့ကူညီဆောင်ရွက်ပေးနေကြတယ်လို့ ဆိုပါတယ်။

ပြီးခဲ့နှစ်ကလည်း တောင်ငူမြို့နယ်မှာ စစ်တောင်းမြစ်ရေတက်တဲ့အတွက် ရေဘေးသင့်မှု ၄ ကြိမ်ဖြစ်ခဲ့ပြီး ဒေသခံပြည်သူသောင်းချီရေဘေးသင့်ခဲ့ရပါသေးတယ်။

စာတည်း – လင်း

မန္တလေး၊ မေ ၃၁၊ ၂၀၂၅။

မန္တလေးမြို့၊ ချမ်းအေးသာစံမြို့နယ်မှာ မေ ၃၁ ရက် ဒီညနေက ငလျင်ဒဏ်သင့်အဆောက်အဦပြိုကျပြီး အမျိုးသား ၁ ဦးသေဆုံးခဲ့တယ်လို့ မြို့ခံတွေဆီကသိရပါတယ်။

ဒီညနေ ၆ နာရီဝန်းကျင်မှာ ချမ်းအေးသာစံမြို့နယ်၊ ၂၆ လမ်းနဲ့ လမ်း‌ ‌၆၀ ထောင့်ရှိ ငလျင်ဒဏ်ကြောင့်ပျက်စီးနေတဲ့ အဆောက်အဦကိုဖြိုဖျက်နေချိန် ပြိုကျခဲ့တာကြောင့် အမျိုးသား ၂ ဦးကိုပိပြီး ၁ ဦးက သေဆုံးခဲ့တာလို့ဆိုပါတယ်။

“အပေါ်ကနေ ဖြိုချနေရင်းပြိုကျပြီး ပိတဲ့အထဲပါသွားတာလို့ သိရတယ်။ ည ပိမိပြီး ကယ်ထုတ်ဖို့ ကြိုးစားနေရင်း သေသွားတာလို့သိရပါတယ်။”လို့ မြို့ခံအမျိုးသားတဦးက ပြောပါတယ်။

ပြိုကျပြီးနောက် မီးသတ်နဲ့ လူမှုကူညီရေးအသင်းတွေရောက်လာပြီး ရှင်းလင်းရေးတွေပြုလုပ်နေတယ်လို့ သိရပါတယ်။

အလားတူ မနေ့ကနေ့လယ် ၁ နာရီ ခွဲလောက်မှာလည်း ချမ်းအေးသာစံမြို့နယ်၊ ၂၆ လမ်း၊ ၈၆လမ်းနဲ့ ၈၇ လမ်းကြားက ငလျင်ဒဏ်ထိထားတဲ့တိုက်ကိုဖြိုရာကနေ စလစ်ပြင်ပြိုကျပြီး အလုပ်သမား ၂ ဦး ခြေထောက်ပိကာ ဒဏ်ရာရခဲ့ပါသေးတယ်။

မြေလတ်အသံ၊ မေ ၃၀၊ ၂၀၂၅။

၄ ရက်အတွင်း မန္တလေး၊ စစ်ကိုင်း၊ မကွေးနဲ့ ပဲခူးတိုင်းတို့မှာ မိုးသက်လေပြင်းကျပြီး ရေကြီးနိုင်တယ်လို့ မေ ၃၀ ရက် ဒီမနက်မှာ မိုးလေဝသနဲ့ဇလဗေဒဦးစီးဌာနက ထုတ်ပြန်ပါတယ်။

ဘင်္ဂလားဒေ့ရှ်နိုင်ငံ၊ ဒါကာမြို့ရဲ့အနောက်တောင်ဘက်မှ ကုန်းတွင်းပိုင်းဒေသတွေကို ဖြတ်ကျော်ခဲ့တဲ့ အားကောင်းတဲ့မုန်တိုင်းငယ် (Deep Depression) ကြောင့် အထက်ပါဒေသတွေမှာ မေ ၃၀ ရက်ဒီမနက် ၉ နာရီကျော်ကနေ ဇွန် ၂ ရက်အထိ မိုးသည်းထန်စွာရွာတာ၊ လေပြင်းတိုက်တာ၊ မိုးထစ်ချုန်းရွာတာ၊ မိုးကြိုးပစ်လျှပ်စီးလက်တာ၊ မိုးသီးကြွေတာတွေဖြစ်နိုင်တယ်လို့ ဆိုပါတယ်။

ဒါ့အပြင်လျှပ်တပြက်ရေကြီးတာ၊ မြေပြိုတာစတဲ့ သဘာဝဘေးအန္တရာယ်တွေလည်းဖြစ်နိုင်တာကြောင့် ကုန်းမြင့်ဒေသအနီးနေထိုင်သူတွေအနေနဲ့ သတိပြုနေထိုင်ဖို့၊ ရေကြောင်း၊ လေကြောင်းသွားလာရေးတွေကိုလည်း ကြိုတင်သတိပြုနိုင်ဖို့ မိုးဇလကသတိပေးထားပါတယ်။

ဒါကြောင့် ကုန်းမြင့်ဒေသအနီး နေထိုင်ကြသူတွေအနေနဲ့ မြေပြိုမှုအန္တရာယ်၊ မြစ်ငယ်၊ ချောင်းငယ်တွေအနီး နေထိုင်ကြသူတွေအနေနဲ့ ရေကြီး၊ ရေလျှံမှုတွေကို ကြိုတင်သတိပြု ရှောင်ရှားနိုင်ရန်နဲ့ ပြည်တွင်း ရေ ကြောင်းသွားလာရေးနဲ့ လေကြောင်း ပျံသန်းရေးအနေနဲ့လည်း ကြိုတင်သတိပြုနိုင်ဖို့ မိုးဇလကသတိပေးထားပါတယ်။

မြစ်ဝကျွန်းပေါ်၊ ရခိုင်ကမ်းရိုးတန်းတလျှောက်နဲ့ ကမ်းလွန်ပင်လယ်ပြင်တို့မှာမကြာခဏ မိုးသက်လေပြင်းကျရောက်ပြီး ရေပြင်၊ မြေပြင်လေဟာ ၁ နာရီကို မိုင် ၄၀ ကနေ ၄၅ မိုင်အထိ တိုက်ခတ်နိုင်သလို လှိုင်းအမြင့်မှာလည်း မြစ်ဝကျွန်းပေါ်၊ ရခိုင်ကမ်းရိုးတန်းတလျှောက်နဲ့ ကမ်းလွန်ပင်လယ်ပြင်တို့မှာ ၁၄ ပေမှ ၁၆ ပေခန့်ရှိနိုင်တယ်လို့ ခန့်မှန်းထားပါတယ်။

အထက်ပါ အားကောင်းတဲ့မုန်တိုင်းငယ်ဟာ ဒါကာမြို့ရဲ့ အနောက်မြောက်ဘက်မှ ကုန်းတွင်းပိုင်းဒေသတွေကို ဆက်လက်ဖြတ်ကျော်လျက်ရှိတယ်လို့ ထုတ်ပြန်ချက်မှာဖော်ပြပါတယ်။

စာတည်း – လင်း