ကျန်းမာရေး

ညောင်ဦး၊ ဇွန် ၂၇၊ ၂၀၂၅။

မန္တလေးတိုင်း၊ ညောင်ဦးမြို့နယ်အတွင်းရှိ တော်လှန်ရေးတပ်တွေစိုးမိုးထားတဲ့ကျေးရွာ ၁၀ ရွာက ပြည်သူတွေနဲ့ စစ်ရှောင်ပြည်သူတွေကိုအခမဲ့‌ကျန်းမာရေးစောင့်ရှောက်မှုပေးနေပြီး ဆေးဝါးလိုအပ်ချက် တွေရှိတယ်လို့ People’s Democratic Army-(PDA)အဖွဲ့ဆီက သိရပါတယ်။

ညောင်ဦးမြို့နယ်အတွင်းက တော်လှန်ရေးတပ်တွေစိုးမိုးထားတဲ့ ကျေးရွာတွေက ပြည်သူတွေနဲ့ လတ်တလော စစ်ကြောင်းတွေကြောင့် စစ်ရှောင်နေရတဲ့ပြည်သူတွေကို ဇွန် ၁၁ ရက်ကနေ ၂၇ ရက်အထိ အခမဲ့ ကျန်းမာရေးစောင့်ရှောက်မှုတွေ ပြုလုပ်ပေးခဲ့တာလို့ သိရပါတယ်။

“၂၅၊‌‌ ၂၆ရက် နေ့လောက်က စစ်ကြောင်းထိုးနေတော့ တချို့ရွာတွေက စစ်ရှောင်ကြရတာပေါ့ဗျာ။ စစ်ရှောင်နေတုန်းလည်း ကျနော်တို့ ကျန်းမာရေးစောင့်ရှောက်မှုတွေပေးတယ်”လို့ People’s Democratic Army-PDA တာဝန်ခံ ရဲဘော်အုပ်စိုးက ပြောပါတယ်။

ယခင်ကတည်းက ဒီကျေးရွာ ၁၀ ရွာမှာ ရွေ့လျားဆေးခန်း( Mobile Clinic)အဖြစ် ကျန်းမာရေးကုသပေးနေတာဖြစ်ပြီး လက်ရှိစစ်ကြောင်း‌ကြောင့် စစ်ရှောင်ပြည်သူတွေထဲက သက်ကြီးရွယ်အိုတွေ ထိတ်လန့်မှုတွေဖြစ်တာကြောင့် စစ်ရှောင်ပြည်သူတွေအထိ လိုက်လံ ကုသပေးနေတယ်လို့ ဆိုပါတယ်။

အဲဒီဒေသက ဒေသခံပြည်သူ လူကြီးပိုင်းတွေမှာ သွေးတိုး၊ ဆီးချိုနဲ့ခါးနာဝေဒနာတွေအဖြစ်များပြီး မိုးရာသီဖြစ်နေတာမို့ ကလေးငယ်တွေက ယားနာဖြစ်ပွားမှုများတယ်လို့ သိရပါတယ်။

ဒီ‌‌ကျန်းမာရေး စောင့်ရှောက်မှုပေးတာကို PDAတပ်ဖွဲ့က CDM ဆရာ၊ ဆရာမတွေ ကိုယ်တိုင် ဦးဆောင်ပြီးတော့ အခြေခံကျန်းမာရေးသင်တန်းဆင်းထားတဲ့ ဆရာ၊ ဆရာမတွေနဲ့ စုပေါင်းပြီးတော့ ဆေးဝါးကုသမှုတွေပေးကြတာဖြစ်တယ်လို့ တပ်ဖွဲ့တာဝန်ရှိသူကပြောပါတယ်။

ဒေသခံပြည်သူတွေကို အခမဲ့ ဆေးကုသပေးနေတာဖြစ်ပြီး ဆေးဝါးလိုအပ်ချက်တွေရှိနေတယ်လို့ သိရပါတယ်။

“ဆေးဝါးလိုအပ်ချက်က ရှိနေတာပေါ့။ တချို့ရွာတွေဆို ကျနော်တို့ ကုနေရင်းတန်းလန်းနဲ့ သောက်ဆေးပေးဖို့ ပြတ်လပ်သွားတာမျိုးရှိတယ်။ ဆေးဝါးအခက်အခဲကရှိတာပေါ့။ ကျနော်တို့ သိုသိုသိပ်သိပ် ဝယ်ရတာ”လို့ တပ်ဖွဲ့ တာဝန်ရှိသူက ပြောပါတယ်။

ပြီးခဲ့တဲ့ရက်ပိုင်းက ညောင်ဦးမြို့နယ်အတွင်းကို စစ်ကောင်စီရဲ့စစ်ကြောင်းနှစ်ကြောင်းခွဲကာ ထိုးစစ်ဆင်ခဲ့တာကြောင့် ဒေသခံတွေလည်း စစ်ဘေးရှောင်ခဲ့ရပြီး ဇွန် ၂၇ ရက်ဒီနေ့မနက်ပိုင်းကတော့ ငါ့သရောက်မြို့နယ်ကလာတဲ့ စစ်ကြောင်းကရဲစခန်းထဲကို ပြန်ဝင်သွားပြီလို့သိရပါတယ်။

သတင်း – ဒိန်းဂျား

တောင်ငူ၊ ဖေဖော်ဝါရီ ၂၆၊ ၂၀၂၅။

ပဲခူးတိုင်း၊ တောင်ငူမြို့၊ အုန်းတောမြိုင်ရပ်ကွက်မှာ လမ်းဘေးကကောက်လာတဲ့ ကြက်သားကို ကြော်စားရာမှာ ကလေးငယ် ၃ ဦး အစာအဆိပ်သင့်မှုဖြစ်ခဲ့တယ်လို့ ဒေသခံတွေထံက သိရပါတယ်။

ဖေဖော်ဝါရီ ၂၅ ရက် ညနေ ၆ နာရီကျော်လောက်မှာ အုန်းတောမြိုင်ရပ်ကွက်နေ ပလုံကောက်တဲ့အလုပ် လုပ်တဲ့မိသားစုတစုမှာ လမ်းဘေးကကောက်လာတဲ့ ကြက်သားကိုကြော်စားရာမှ အသက် ၁ နှစ်နဲ့ ၅ နှစ်အရွယ် ယောကျာ်းလေး၂ ဦး၊ အသက် ၈ နှစ်အရွယ် မိန်းကလေး ၁ ဦး စုစုပေါင်းကလေးငယ် ၃ ဦး အစာအဆိပ်သင့်မှုဖြစ်ခဲ့တယ်လို့ ဆိုပါတယ်။

“ကလေးတွေရဲ့အဖေက ပလုံကောက်ရင်း ဟိုတယ်တခုက စွန့်ပစ်ထားတဲ့ ကြက်သားထုတ်ကိုတွေ့တော့ စားစရာလည်းမရှိတော့ ကောက်လာပြီး အသားဟင်းဆိုတော့ကြော်ပြီးကလေးတွေကို ကျွေးလိုက်တာ။ အဲ့ဟာကလည်း မလတ်ဆတ်လို့ အဆိပ်သင့်သလိုဖြစ်သွားတာ”လို့ ဒေသခံတဦးက ပြောပါတယ်။

မိဘတွေက အသားဟင်းဖြစ်တာကြောင့် ကလေး ၃ ဦးကိုသာ ဦးစားပေးကျွေးခဲ့တာဖြစ်ပြီး အနည်းငယ်သာစားခဲ့လို့ မိဘ ၂ ဦးကတော့ အစာအဆိပ်သင့်မှုမဖြစ်ခဲ့ဘူးလို့ သိရပါတယ်။

ကြက်ကြော်ကိုစားပြီးနောက် ကလေးငယ် ၃ ဦးဟာ ခေါင်းမူး၊ အော့အန်၊ ဝမ်းသွား၊ ကိုယ်ပူတာနဲ့ ခန္ဓာကိုယ်မှာ သွေးဆုတ်ဖြူရော်သွားတဲ့အ​ခြေနေအထိဖြစ်ပေါ်ခဲ့တာကြောင့် တောင်ငူပြည်သူ့ဆေးရုံကို ဒေသခံတွေက ကူညီပို့ဆောင်ပေးခဲ့ရပါတယ်။

ဆေးရုံရောက်ချိန်မှာ ဆေးကုသမှုခံယူလိုက်ရလို့ အသက် ၁ နှစ်အရွယ် ကလေးငယ်မှာ ပြန်လည်သက်သာလာပြီး အကြီး ၂ ယောက်ကတော့ ဆက်လက်စောင့်ကြည့်ရမယ့် အခြေနေမှာ ရှိနေပါတယ်။

မိသားစုက ချို့တဲ့တာကြောင့် အရင်ကလည်း ပလုံကောက်ရင်း လမ်းဘေးအမှိုက်ပုံတွေမှာတွေ့ရတဲ့ အသားတွေကိုကောက်လာပြီး ချက်ပြုတ်စားသောက်လေ့ရှိတယ်လို့ သိရပါတယ်။

အစာအဆိပ်သင့်မှုဖြစ်ခဲ့တဲ့ မိသားစုဆေးရုံကို ရောက်လာချိန်မှာ အဝတ်အစားနဲ့စောင်တွေမပါလာလို့ ပတ်ဝန်းကျင်က ကူညီထားရပြီး ဆေးဖိုးလိုအပ်ချက်တွေလည်းရှိနေတယ်လို့ ဆိုပါတယ်။

စာတည်း – ဈာန်မြင့်

ပခုက္ကူ၊ ဖေဖော်ဝါရီ ၁၅၊ ၂၀၂၃။

မကွေးတိုင်း၊ ပခုက္ကူမြို့နယ်အခြေစိုက်အဖွဲ့တခုဖြစ်တဲ့ ပခုက္ကူခရိုင်တပ်ရင်းအမှတ် ၁၆၊ တပ်ခွဲ-၁ရဲ့ ထိန်းချုပ်နယ်မြေထဲမှာ တိုက်ပွဲနားချိန်တွေဆို ပြည်သူတွေကို ဆေးကုသပေးတယ်လို့ သိရပါတယ်။

တပ်တွင်းဆေးခန်းလေးကို ၂၀၂၂ ခုနှစ် ၈ လပိုင်း၊ ၂၁ ရက်နေ့က ဖွင့်လှစ်ခဲ့ကာ အသေးစားလူနာတွေကနေ မွေးလူနာတွေထိကုသပေးနိုင်အောင် ကြိုးစားစီစဉ်ထားပြီး၊ ရွာထဲထိဆင်းကာ ကုသပေးတာတွေလည်းရှိတယ်လို့ ဆိုပါတယ်။

“ဒီနေ့ဆို မနက်ထဲကဖွင့်တာ ခုချိန်ထိ မပိတ်ရသေးဘူး။ တပ်ရင်းရုံးမှာ တခုပဲဖွင့်ထားပြီး ရွာတွေကိုပတ်ပြီး ကုပေးတယ်။ ကျတော်တို့က စစ်တပ်တခုလို ဖွဲ့စည်းထားတော့ ပြည်သူတွေက အထဲကိုလာမပြရဲဘူး။ အဲ့တော့ ရွာတွေပတ်ကုပေးတယ်။” လို့ Pakokku Generation Z အဖွဲ့ တပ်ရင်းမှူးက ပြောပါတယ်။

ဆေးခန်းက ပြည်သူလှူတန်းငွေနဲ့ပဲ လည်ပတ်နေတာဖြစ်တဲ့အတွက် ဆေးဝါး ပြန်လည်ဝယ်ယူချိန်ဆို သိန်း ၂၀၊ ၃၀ ထိကုန်ကျကာ ငွေကြေးအခက်ခဲဖြစ်ပြီး တပ်ရင်းအတွက် သုံးရမယ့်အသုံးစရိတ်ကိုဖဲ့ကာ ဆေးခန်း ဆေးပြတ်လပ်မှုမရှိအောင် လုပ်ဆောင်ထားတယ်လို့ ဆိုပါတယ်။

စခန်းစတင်ဖွဲ့စည်းချိန်တုန်းက လေ့ကျင့်ရေးဒဏ်ကြောင့် ရဲဘော်တွေဖျားနာတာတွေဖြစ်နေလို့ ကုသဖို့အတွက် ဆေးခန်းစတင်ဖွင့်ဖြစ်ခဲ့ပြီး၊ ‌နောက်ပိုင်းတွေမှာ ကျေးရွာပြည်သူတွေအတွက်ပါ ထပ်တိုးကုသမှုတွေ လုပ်နေတာဖြစ်တယ်လို့ ပြောပါတယ်။

တိုက်ပွဲနားချိန်ဆို တပ်ရင်းအထိုင်ဆေးခန်းသာမက၊ ရွာထဲထိပါဆင်းပြီး ဆေးခန်းဖွင့်ပေးထားနိုင်ပေမယ့်၊ တိုက်ပွဲတွေရှိနေချိန်ဆိုရင်တော့ တပ်ရင်းထဲမှာပဲ အထိုင်ဆေးခန်း ဖွင့်ထားပေးတယ်လို့ သိရပါတယ်။