ရင်ငြိမ်း

မန္တလေး၊ ဧပြီ ၂၆၊ ၂၀၂၃။

မန္တလေးတိုင်း၊ ပြင်ဦးလွင်မြို့အခြေစိုက် တပ်မတော်သိပ္ပံနဲ့ သုတေသနနည်းပညာဌာနချုပ်(သသန)တပ်မှ ဗိုလ်မှူး မောင်မောင်သွင်ကို လက်နက်အလွဲသုံးစားလုပ်တယ်လို့ဆိုကာ ဧပြီလဆန်းပိုင်းကစလို့ စစ်ကောင်စီတပ်က ဖမ်းဆီးစစ်ဆေးနေတယ်လို့ သိရပါတယ်။

ဗိုလ်မှူး မောင်မောင်သွင်ဟာ ရုရှားနိုင်ငံကိုပညာသင်သွားမယ့် စစ်ကောင်စီတပ်အရာရှိငယ်တွေကို စာသင်ကြားပေးရသူဖြစ်ပြီး၊ သူ့ကိုဖမ်းဆီးတာဟာ လက်နက်အလွဲသုံးစားမှုလို့သာသိရကာ လက်ရှိမှာ သူ့ကို မန္တလေးလပခနန်းတွင်းစစ်ကြောရေးမှာ စစ်ဆေးနေဆဲဖြစ်ပြီး အမှုအသေးစိတ်ကိုတော့ မသိရသေးဘူးလို့ သူနဲ့နီးစပ်သူတဦးက မြေလတ်အသံကိုပြောပါတယ်။

“ဒီကောင်က သသနမှာ ရုရှားသွားမယ့်ကောင်တွေကို စာသင်တာ။ သူကိုယ်တိုင်လည်း ရုရှားပြန်။ ဖမ်းခံရတာက ဧပြီ ၁ ရက်နေ့ကတည်းက။ အမှုက ကြားရတာက လက်နက်နဲ့ပတ်သက်တဲ့ အလွဲသုံးစားမှုလို့တော့သိရတယ်။ လက်နက်ဘဲရောင်းစားတာလား၊ ကြားထဲကပွဲစားလုပ်ပေးတာလား သေချာမသိဘူး။ လောလောဆယ် နန်းတွင်းစစ်ကြောရေးမှာ စစ်နေတုန်း” လို့ ပြောပါတယ်။

ဗိုလ်မှူး မောင်မောင်သွင်ဟာ စစ်တက္ကသိုလ်အပတ်စဉ် ၄၆ ဆင်းဖြစ်ပြီး ပြင်ဦးလွင်တပ်တွေကနေ မပြောင်းရွှေ့လိုတဲ့အတွက် “ရာထူးတိုးမယူ” ဟုဆိုကာ စစ်ကောင်စီတပ်ဆီမှာ လက်မှတ်ထိုးထားသူ ဖြစ် တယ်လို့သိရပါတယ်။

“ဒီကောင်က မေဂျာ(ဗိုလ်မှူး)ဖြစ်ပြီးကတည်းက တပ်ရင်းမှူးဖြစ်ရင် ခြေလျင်တပ်တွေပြောင်းရမှာစိုးလို့ ရာထူးတိုးမယူဘူးဆိုပြီး ဘွန်း(Bond)ထိုးထားတာ။ အရင်က DSA စာပေ ၂ က နည်းပြအရာရှိ။ DSA လို စစ်ကျောင်းတွေမှာက စာပေနဲ့လေ့ကျင့်ရေး ၂ ခုခွဲထားတာ။ စာပေဘက်ရောက်သွားရင် ရာထူးတိုးမယူဘဲ စာသင်တဲ့နည်းပြအနေနဲ့ဘဲ ဆက်နေသွားမယ်ဆိုပြီး ဆန္ဒပြုလက်မှတ်ထိုးလို့ရတယ်။ အိုဗာဝိတ်(over weight)ဖြစ်နေတာလည်း ပါတယ်။ သသန တပ်က စာပေ ၂ နဲ့ကပ်လျက်၊ ကပ်ပြီးပြောင်းသွားတာ။ ပြင်ဦးလွင်မှာ သူ့စီးပွားရေးလုပ်ငန်းတွေရှိတော့ မပြောင်းချင်လို့ ရာထူးတိုးမယူဘဲ သသန ကနေ ရုရှားသွားမယ့်ကောင်တွေကို စာသင်ပြီး ဌာနမှူးလုပ်နေတာ” လို့ သူကပြောပါတယ်။

ဗိုလ်မှူး မောင်မောင်သွင်ဟာ မကွေးတိုင်း၊ စလင်းမြို့ဇာတိဖြစ်ပြီး သူ့ဇနီးဟာ ဒေါ်မျိုးမြတ်မြတ်ထွန်း ဆိုသူဖြစ်ကာ အဖမ်းခံရပြီးကတည်းက စလင်းမြို့က သူ့မိဘတွေက ပြင်ဦးလွင်ကိုလိုက်သွားခဲ့ပြီး လက်ရှိအချိန်ထိတော့ နေရပ်ကိုပြန်မရောက်သေးဘူးလို့ ဆိုပါတယ်။

“သူ့မိန်းမနဲ့မိဘတွေကို ဖမ်းတာတော့မကြားသေးဘူး။ စဖမ်းတဲ့နေ့ကတည်းက ပြင်ဦးလွင်ကအိမ်ကို သူ့မိဘတွေလိုက်သွားတာ၊ စစ်ကြောရေးမပြီးသေးလို့ထင်တယ် ခုထိပြန်ရောက်မလာသေးဘူး” လို့ သူက ဆက်ပြောပါတယ်။

ဗိုလ်မှူး မောင်မောင်သွင်ဟာ ပြင်ဦးလွင်မှာ ကိုယ်ပိုင်စီးပွားရေးလုပ်ငန်းတချို့ ထူထောင်ထားပြီး တပ်ပိုင်မြေကွက်တွေကို အကွက်ရိုက်ရောင်းစားကာ ကြီးပွားနေသူတဦးဖြစ်တယ်လို့လည်း ဆိုပါတယ်။

ပြီးခဲ့တဲ့ ၂၀၂၂ ခုနှစ်အတွင်းကလည်း ကော့ကရိတ်အခြေစိုက် အမှတ် ၁၂ စစ်ဆင်ရေးကွပ်ကဲမှုဌာနချုပ် (စကခ ၁၂) က စစ်ဦးစီးမှူး(ဒုတိယတန်း) G-2 ဗိုလ်မှူး ၁ ဦးနဲ့ သင်္ကန်းညီနောင်အခြေစိုက် စကခ ၁၂ လက်အောက်ခံ ခမရ ၃၅၇ လက်အောက်ခံ ဌာနချုပ်တပ်ခွဲမှူး ဗိုလ်မှူး ၁ ဦးတို့ဟာ ကော့ကရိတ်ကနေ ရှမ်းပြည်နယ်မြောက်ပိုင်းကို လက်နက်သေတ္တာ ၁၂ လုံး စစ်ယာဉ်တန်းနဲ့သယ်ယူပို့ဆောင်ပေးတယ်ဆိုပြီး စစ်ကောင်စီတပ်က ဖမ်းဆီးခဲ့ပါ သေးတယ်။

ပဲခူး၊ ဧပြီ ၁၆၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ မင်းလှမြို့နယ်၊ စိန်ကန့်လန့်ရွာအခြေစိုက် အမှတ် ၁ ခြေလျင်တပ်ရင်း (ခလရ ၁) တပ်ရင်းမှူးရဲ့ဇနီးဖြစ်သူက တိုက်ပွဲတွင်းသေဆုံးတဲ့ စစ်ကောင်စီတပ်ဖွဲ့ဝင်တွေအတွက် မိသားစုတွေရရှိတဲ့ မြေကွက်တွေကို ကြားဖြတ်ကာ ဈေးနှိမ်ဝယ်ယူနေတယ်လို့ သိရပါတယ်။

တိုက်ပွဲတွင်း သေဆုံးသူတွေ၊ သက်ပြည့်ပင်စင်နဲ့ထွက်မယ့် စစ်ကောင်စီတပ်သားတွေကို စစ်ခေါင်းဆောင်တွေက မင်းလှမြို့၊ သီဟိုမြိုင်ရပ်ကွက်မှာ မြေကွက်တွေချပေးနေတာဖြစ်ပြီး တပ် ရင်းမှူးရဲ့ဇနီး ဒေါ်ဝင့်နှင်းဖြူက အဲ့ဒီမြေကွက်ပိုင်ဆိုင်မှုတွေကို လွှဲပြောင်းမပေးဘဲ လက်ရှိပေါက်ဈေးအောက်ကို ဈေးနှိမ်ကာ အဓမ္မဝယ်ယူနေတာလို့ ခလရ ၁ နဲ့နီးစပ်တဲ့ သတင်းရင်းမြစ်တဦးက မြေလတ်အသံကိုပြောပါတယ်။

“တိုက်ပွဲကျသွားတဲ့သူတွေရဲ့ မိသားစုတွေကို ပေ ၄၀၊၆၀ မြေကွက်တွေ သီဟိုမြိုင်ဘက်မှာ အကွက်ရိုက်ပြီးပေးတာကို တပ်ရင်းမှူးမိန်းမက ငါပြန်ဝယ်မယ်ဆိုပြီး သိန်း ၄၀၊၅၀ လောက်တန်တဲ့မြေ ကွက်ကို အဆမတန်ဈေးဖြတ်ပြီး ၁၄၊၅ သိန်းလောက်ဘဲပိုက်ဆံပေးတာ” လို့ ပြောပါတယ်။

မြေကွက်လွှဲပြောင်းပိုင်ဆိုင်မှု စာရွက်၊စာတမ်းတွေကို ကျန်ရစ်ခဲ့တဲ့မိသားစုဝင်တွေက လက်ခံရရှိကြောင်း လက်မှတ်ရေးထိုးပေးရပေမယ့် မြေကွက်မရရှိဘဲ ငွေကြေးအနည်းငယ်သာရရှိလို့ တပ်မိသားစုဝင်တွေအကြား ကျေနပ်မှုမရှိဘူးလို့လည်း ဆိုပါတယ်။

“မြေကွက်တွေကတော့ အာဏာမသိမ်းခင် အရင်ခေတ်ကတည်းကပေးတာ။ အရင်ကတော့ တိုက်ပွဲလည်းနည်းတော့ သက်ပြည့်သမားတွေလောက်ရကြတာ၊ သက်ပြည့်နဲ့ထွက်တာလည်း တော်တော် ရှားပါတယ်။ ခုနောက်ပိုင်းတိုက်ပွဲကျတွေ များလာပြီး ထိခိုက်သေဆုံးတွေများလာလို့ မြေကွက်ပေးတဲ့ကိစ္စတွေ များလာတာ” လို့ သူကဆက်ပြောပါတယ်။

ခလရ ၁ ဟာ အင်းမအခြေစိုက် တပ်မ ၆၆ လက်အောက်ခံတပ်တခုဖြစ်ပြီး တပ်ရင်းမှူးမှာ ဒု-ဗိုလ်မှူးကြီး သူရိန် ဆိုသူဖြစ်ကာ လက်ရှိမှာတော့ တပ်မ ၆၆ နဲ့ လက်အောက်ခံတပ်ရင်းတွေက ကရင်နီပြည်နယ်အတွင်း တိုက်ခိုက်ရေး ဝင်ရောက်နေတာ ၁ နှစ်ခွဲကျော်ရှိပြီး အဲ့ဒီကာလအတွင်း တပ်ရင်းမှူးအဆင့်အပါအဝင် ထိခိုက်သေဆုံးများပြားနေတဲ့ တပ်မတခုလည်း ဖြစ်ပါတယ်။

ပဲခူး၊ ဧပြီ ၁၆၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ လက်ပံတန်းမြို့၊ အဝိုင်းကြီး ၁ လမ်း မီးသတ်ရုံဘေးမှာရှိတဲ့ စစ်ကောင်စီဗဟိုမဏ္ဍပ်အရှေ့မှာ ဧပြီလ ၁၄ ရက် သင်္ကြန်အကျနေ့ ညနေပိုင်းက မူးပြီးရန်ဖြစ်တဲ့ လူငယ်တချို့ ဖမ်းဆီးခံလိုက်ရတယ်လို့ သိရပါတယ်။

မဏ္ဍပ်အရှေ့မှာ ခုန်ပေါက် ကနေသူတွေအချင်းချင်း ခိုက်ရန်ဖြစ်ပွားခဲ့တာဖြစ်ပြီး ရန်ပွဲကို တားမြစ်လို့မရလို့ မဏ္ဍပ်စောင့်စစ်ကောင်စီတပ်သားတွေက သေနတ်ပစ်ဖောက်ကာ ရန်ဖြစ်ရာမှာ ပါဝင်တဲ့ လူငယ် ၄ ဦးလောက်ကို ဖမ်းဆီးခေါ်ဆောင်သွားတာလို့ မြို့ခံတဦးက မြေလတ်အသံကိုပြောပါတယ်။

“ဘောမမင်းထက်ဆိုတဲ့ကောင် သီချင်းတက်ဆိုနေတဲ့အချိန် အောက်မှာကနေတဲ့ကောင်တွေက ကနေရင်း ထိခိုက်မိလို့ထင်တယ်၊ ရန်ထဖြစ်တာ။ စစ်သားတွေက ပထမသေနတ်တချက် ပစ်ဖောက်ပြီးတားတာ တားမရဘူး။‌ နောက်တချက်ဖောက်ပြီး ရန်ဖြစ်တဲ့ကောင်တွေကိုဖမ်းသွားတယ်။ အောက်မှာကနေတာလည်း သူတို့လူ မြို့ထဲကဘောမတွေ များပါတယ်” လို့ ပြောပါတယ်။

ရန်ဖြစ်သူတွေကို သေနတ်ပစ်ဖောက်ဖမ်းဆီးသွားပေမယ့် ပွဲပျက်သွားတာမျိုးတော့မရှိဘဲ မဏ္ဍပ်ရှေ့မှာဆက်လက်ကနေကြပြီး ဖမ်းဆီးခံရသူတွေရဲ့အခြေအနေတွေကိုတော့ မသိရှိရသေးပါဘူး။

လက်ပံတန်းမှာ ဧပြီလ ၁၃ ရက် အကြိုနေ့မနက်အစောပိုင်းက အဲ့ဒီစစ်ကောင်စီသင်္ကြန်မဏ္ဍပ်နဲ့ ရဲစခန်း ဂိတ်တို့မှာ ဗုံးပေါက်ကွဲမှုဖြစ်ပွားခဲ့ပါသေးတယ်။

ဒါ့အပြင် ဧပြီလ ၁၅ ရက် သင်္ကြန်အကြတ်နေ့ မနေ့ညနေပိုင်းမှာလည်း လက်ပံတန်းစစ်ကောင်စီမဏ္ဍပ်မှာ စစ်တပ်ထောက်ခံတဲ့ အဆိုတော် ထက်ထက် ဆိုသူအမျိုးသမီး သီချင်းဆိုနေချိန် စင်အောက်မှာ ကနေသူတချို့ ထပ်မံခိုက်ရန်ဖြစ်ပွားခဲ့သေးတယ်လို့ သိရပါတယ်။

မြေလတ်အသံ၊ ဧပြီ ၁၅၊ ၂၀၂၃။

စစ်ကောင်စီရုံးစိုက်ရာ နေပြည်တော်ကောင်စီနယ်မြေ၊ ဇေယျာသီရိမြို့နယ်၊ စစ်ကောင်စီလက်အောက် စစ်ဘက်ရေးရာလုံခြုံရေးအရာရှိချုပ်ရုံး(စရခ)ကနေ ထွက်ပြေးသွားတဲ့ အမျိုးသမီး တပ်ကြပ်ကြီး/စာရေး ၂ ဦး လွတ်မြောက်နေဆဲဖြစ်တယ်လို့ သိရပါတယ်။

ထွက်ပြေးသွားသူတွေဟာ နေပြည်တော် စရဖ စစ်ရုံးချုပ်က အရေးကြီးအချက်အလက်တွေထိန်းသိမ်းထားတဲ့ဌာနမှာ တာဝန်ထမ်းဆောင်ခဲ့တဲ့ တပ်ကြပ်ကြီး/စာရေး ဝင်းပပအောင်နဲ့ သန္တာစိုးတို့ဖြစ်ပြီး ဖေဖော်ဝါရီလဆန်းပိုင်းက စစ်ရုံးချုပ်ကနေထွက်ပြေးသွားတာဖြစ်ကာ လက်ရှိမှာသူတို့ ၂ ဦးကို တပ်ပြေးကြေငြာထားတယ်လို့ ဆိုပါတယ်။

“ဖေဖော်ဝါရီလဆန်းပိုင်းကခွင့်မဲ့စဖြစ်တာ၊ ခွင့်မဲ့ ၂၁ ရက်ဆို တပ်ပြေးကြေညာတယ်။ တပ်ရင်းတွေမှာ ဆိုရင်တာ့ကြိတ်ရှာကြတာ ခွင့်မဲ့တော်တော်နဲ့မကြေညာဘူး။ စစ်ရုံးထဲမို့ တန်းကြေညာတာ။ သူတို့ကို အခုထိပြန်မိတာမျိုးတော့မကြားသေးဘူး” လို့ စစ်ရုံးချုပ်နဲ့နီးစပ်တဲ့ သတင်းရင်းမြစ်တဦးက မြေလတ်အသံကို ပြောပါတယ်။

အဲ့ဒီတပ်ကြပ်ကြီး/စာရေး အမျိုးသမီး ၂ ဦးဟာ စရဖ စစ်ရုံးချုပ်ရဲ့အရေးကြီးအချက်အလက်တွေထိန်းသိမ်းထားတဲ့ဌာနတွေမှာ တာဝန်ထမ်းဆောင်ခဲ့တာကြောင့် ထွက်ပြေးသွားချိန်မှာ အရေးကြီးဒေတာတွေ ပါသွားနိုင်တယ်ဆိုတဲ့ ယူဆချက်တွေနဲ့ စစ်ဘက်အကြီးတန်းအရာရှိတွေက သူတို့ ၂ ဦးကို တွေ့တဲ့နေရာပစ်သတ်ဖို့အထိ ညွှန်ကြားထားတယ်လို့ ဆိုပါတယ်။

ထွက်ပြေးနေတဲ့အမျိုးသမီးတပ်ကြပ်ကြီး/စာရေး ၂ ဦးဟာ မှော်ဘီမြို့အခြေစိုက် အမှတ် ၄ အရာခံနဲ့ အကြပ်ကြီးသင်ကျောင်း(ရကသ ၄)မှာဖွင့်လှစ်တဲ့ ကွန်ပျူတာဒီပလိုမာတပ်ကြပ်ကြီး/စာရေးသင်တန်း အမှတ်စဉ် ၃ ဆင်း တပ်ကြပ်ကြီးတွေဖြစ်ပြီး စစ်မှုထမ်းသက် ၇ နှစ်ဝန်းကျင်ရှိပြီလို့ သိရပါတယ်။

စစ်ကောင်စီတပ်ရဲ့ စစ်ဘက်ရေးရာလုံခြုံရေးတပ်ဖွဲ့အရာရှိချုပ်ရုံး (စရခ)ဟာ စစ်ကောင်စီလက်အောက် တိုင်းစစ်ဌာနချုပ်တွေရဲ့ စစ်ဘက်ရေးရာလုံခြုံရေးဌာန(စရန)၊ စရဖသင်တန်းကျောင်း၊ စစ်ကြောရေးတွေအပါအဝင် စရဖတပ်အားလုံးကိုကွပ်ကဲနေတဲ့ စစ်ရုံးချုပ်ဖြစ်ပြီး တော်လှန်ရေးအင်အားစုတွေကို အသွင်အမျိုးမျိုးနဲ့ဖမ်းဆီးနေတဲ့ အဓိကတပ်ဖွဲ့တခုလည်းဖြစ်တယ်လို့ သိရပါတယ်။

မင်းလှ၊ ဧပြီ ၁၄၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊စိန်ကန့်လန့်ရွာအခြေစိုက်စစ်ကောင်စီ ခလရ ၁ တပ်ရဲ့အခုနှစ်တပ်သင်္ကြန်ကို တပ်တွင်းမှာသာ မဏ္ဍပ်ထိုးပြီး ပြုလုပ်နေတယ်လို့ မင်းလှမြို့ခံတွေဆီက သိရပါတယ်။

စစ်အာဏာမသိမ်းမီနှစ်တွေက ခလရ ၁ တပ်ဟာ တပ်အဝင်မုဒ်ဦးအရှေ့ မင်းလှ-စိန်ကန့်လန့်-မြို့ချောင်းရိုးမဖြတ်ကျော်လမ်းမှာ မဏ္ဍပ်ထိုးပြုလုပ်တာဖြစ်ပြီး ဒီနှစ်သင်္ကြန်ကိုတော့ တပ်တွင်းမှာသာ မဏ္ဍပ်ထိုးကာ အပြင်လူဝင်၊ထွက်ခွင့်ကိုလည်း ပိတ်ပင်ထားတယ်လို့ တပ်နဲ့နီးစပ်တဲ့မြို့ခံတဦးက မြေလတ်အသံကို ပြောပါတယ်။

“အဓိက က PDF ဗုံးကို ကြောက်တာပေါ့။ တပ်ထဲမှာက လူလည်း သိပ်မရှိတာရယ်။ နောက်ပြီး အရင်လို တပ်ပြင်ထွက် မဏ္ဍပ်ထိုးလည်း ဘယ်သူမှ မလာလောက်ဘူးဆိုတာ သိလို့နေမှာ။ တပ်ထဲကလူလည်း အပြင်မထွက်ခိုင်းဘူး။ အပြင်ကလူလည်း ဘယ်သူမှ အထဲမခေါ်ခိုင်းဘူးလို့။ ဒါတောင် သူတို့ သင်္ကြန်သာ လုပ်နေတာ ဒရုန်းကြောက်လို့အပေါ်ကို တကြည့်ကြည့်နဲ့ ကနေကြတာ” လို့ ပြောပါတယ်။

ခလရ ၁ တပ်ဟာ မင်းလှမြို့ပေါ်က စစ်ကောင်စီပြုလုပ်တဲ့ သင်္ကြန်မဏ္ဍပ်မှာလည်း လုံခြုံရေးအစောင့်တွေ ပို့ဆောင်ထားရတာဖြစ်ပြီး အင်အားမလုံလောက်တာကြောင့် တပ်သင်္ကြန်အတွက် လုံခြုံရေးပေးဖို့ လူမရှိလို့ အခုလိုတပ်တွင်းမှာသာ လုပ်ဆောင်နေရတာလို့ သူကဆက်ပြောပါတယ်။

ခလရ ၁ တပ်တွင်းသင်္ကြန်မဏ္ဍပ်ကိုတော့ တပ်တွင်းမူကြိုကျောင်းဘေး တပ်သက်သာဆိုင် အရှေ့မှာပြုလုပ်တာဖြစ်ပြီး တပ်ရင်းမှူးမိန်းမဖြစ်သူ ဒေါ်ဝင့်နှင်းဖြူက ဦးဆောင်ပြုလုပ်နေတာလို့ သိရပါတယ်။

ခလရ ၁ တပ်ဟာ တပ်မ ၆၆ လက်အောက်ခံ တပ်ရင်းတခုဖြစ်ပြီး ကရင်နီပြည်နယ်အတွင်း တိုက်ခိုက်ရေး ဝင်ရောက်နေရကာ ထိခိုက်သေဆုံးများပြားနေတဲ့ တပ်ရင်းဖြစ်သလို နောက်တန်းအင်အားလည်း လုံလောက်မှုမရှိတာကြောင့် စစ်ကောင်စီတပ်ဖွဲ့ဝင်တွေရဲ့မိန်းမတွေအပြင် သား၊သမီးတွေကိုပါ စစ်သင်တန်းပေးပြီး လုံခြုံရေးအတွက် လိုအပ်သလိုအသုံးပြုနေတယ်လို့ သိရပါတယ်။

မုံရွာ၊ ဧပြီ ၈၊ ၂၀၂၃။

စစ်ကိုင်းတိုင်း၊ မုံရွာခရိုင်အတွင်း ချင်းတွင်းမြစ်ကမ်းဘေးကျေးရွာများသပိတ်စစ်ကြောင်းက ဧပြီလ ၇ ရက်နေ့ ညနေပိုင်းမှာ “ပြည်သူရှိနေသရွေ့ ပါတီရှိနေမယ်” စာသားကိုင်ဆောင်ပြီး စစ်အာဏာရှင်ဆန့်ကျင်ဆန္ဒပြကာ လူထုသပိတ်ဖော်ဆောင်ခဲ့တယ်လို့သိရပါတယ်။

ပဲခူး၊ ဧပြီ ၂၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊ စိန်ကန့်လန့်ရွာအခြေစိုက် ခလရ ၁ တပ်ရင်း က အချုပ်သား ၁ ဦးနဲ့ ကင်းသမား ၂ ဦး မတ်လ ၂၃ ရက် မနက်အစောပိုင်းက ထွက်ပြေးသွားလို့ အဲ့ဒီနေ့ တာဝန်ကျအရာရှိနဲ့ ဗဟိုကင်းတာဝန်ကျကင်းတွဲက စစ်ကောင်စီတပ်ဖွဲ့ဝင် ၂ ဦး ဖမ်းဆီးခံထားရတယ်လို့ သိရပါတယ်။

ဖမ်းဆီးခံရသူတွေဟာ အခင်းဖြစ်ပွားတဲ့နေ့က ဗဟိုကင်းတာဝန်ကျကင်းမှူး တပ်ကြပ်ကြီး ရဲလှိုင်ဝင်း၊ ဒု-ကင်းမှူး ဒုတပ်ကြပ် ဇော်လတ်နဲ့ တာဝန်မှူးအရာရှိ သန့်ဇင်တို့ဖြစ်ပြီး သူတို့ကို ကင်းတာဝန်ပေါ့လျော့မှုနဲ့ အဲ့ဒီနေ့မနက်ပိုင်းမှာဘဲ ဖမ်းဆီးထားခဲ့တာလို့ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

“ဖြစ်တာကသူတို့ ကင်းချိန်မှာဖြစ်တာတော့မဟုတ်ဘူး။ ကင်းမှူးနဲ့ဒုကင်းမှူးက ညဦးပိုင်းစောင့်ရတာ။ ထွက်ပြေးတာက အချုပ်သားနဲ့သူတို့အောက်က ကင်းကျတဲ့သူတွေထွက်ပြေးတာဆိုတော့ တာဝန်ပေါ့လျော့တယ်ဆိုပြီး သူတို့ကိုဖမ်းထားတာ” လို့ ပြောပါတယ်။

ဖမ်းဆီးထားတဲ့စစ်ကောင်စီတပ်ဖွဲ့ဝင် ၃ ဦးကို ထွက်ပြေးနေသူတွေနဲ့ ဆုံးရှုံးသွားတဲ့လက်နက်ခဲယမ်းတွေ ပြန်လည်မရရှိရင် သေဒဏ်ပေးမယ်လို့လည်း ခြိမ်းခြောက်ထားတယ်လို့ သူကပြောပါတယ်။

လက်နက်၊ခဲယမ်းတွေနဲ့အတူထွက်ပြေးနေတဲ့ စစ်ကောင်စီတပ်သားတွေထဲက ၂ ဦးဟာ လက်ရှိအထိ ထွက်ပြေးလွတ်မြောက်နေဆဲဖြစ်ပြီး ၎င်းတို့နဲ့အတူ သေနတ် ၃ လက်၊ ကျည်ဆံ ၂၀၀၀၊ လက်ပစ်ဗုံး ၂၀ လုံးကိုပါ သယ်ဆောင်ထွက်ပြေးနေတာလို့ ဆိုပါတယ်။

ထွက်ပြေးသွားတဲ့ စစ်ကောင်စီတပ်သား ၃ ဦးထဲက တပ်သား ဖိုးလပြည့်ဆိုသူကို မတ်လ ၂၄ ရက်နေ့မှာပဲ ပဲခူးရိုးမအတွင်းက ရှားတောပြန့်နဲ့ပျဉ်းကတိုးခင်းကျေးရွာအနီးမှာ ပြန်လည်ဖမ်းဆီးခံခဲ့ရပြီး သူ့ကို ခလရ ၁ စစ်ကောင်စီတပ်အရာရှိတွေက သတ်ဖြတ်လိုက်ပြီလို့လည်း တပ်တွင်းသတင်းရင်းမြစ်တွေက ပြောပါတယ်။