ရင်ငြိမ်း

ပဲခူး၊ ဧပြီ ၂၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊ စိန်ကန့်လန့်ရွာအခြေစိုက် ခလရ ၁ တပ်ရင်း က အချုပ်သား ၁ ဦးနဲ့ ကင်းသမား ၂ ဦး မတ်လ ၂၃ ရက် မနက်အစောပိုင်းက ထွက်ပြေးသွားလို့ အဲ့ဒီနေ့ တာဝန်ကျအရာရှိနဲ့ ဗဟိုကင်းတာဝန်ကျကင်းတွဲက စစ်ကောင်စီတပ်ဖွဲ့ဝင် ၂ ဦး ဖမ်းဆီးခံထားရတယ်လို့ သိရပါတယ်။

ဖမ်းဆီးခံရသူတွေဟာ အခင်းဖြစ်ပွားတဲ့နေ့က ဗဟိုကင်းတာဝန်ကျကင်းမှူး တပ်ကြပ်ကြီး ရဲလှိုင်ဝင်း၊ ဒု-ကင်းမှူး ဒုတပ်ကြပ် ဇော်လတ်နဲ့ တာဝန်မှူးအရာရှိ သန့်ဇင်တို့ဖြစ်ပြီး သူတို့ကို ကင်းတာဝန်ပေါ့လျော့မှုနဲ့ အဲ့ဒီနေ့မနက်ပိုင်းမှာဘဲ ဖမ်းဆီးထားခဲ့တာလို့ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

“ဖြစ်တာကသူတို့ ကင်းချိန်မှာဖြစ်တာတော့မဟုတ်ဘူး။ ကင်းမှူးနဲ့ဒုကင်းမှူးက ညဦးပိုင်းစောင့်ရတာ။ ထွက်ပြေးတာက အချုပ်သားနဲ့သူတို့အောက်က ကင်းကျတဲ့သူတွေထွက်ပြေးတာဆိုတော့ တာဝန်ပေါ့လျော့တယ်ဆိုပြီး သူတို့ကိုဖမ်းထားတာ” လို့ ပြောပါတယ်။

ဖမ်းဆီးထားတဲ့စစ်ကောင်စီတပ်ဖွဲ့ဝင် ၃ ဦးကို ထွက်ပြေးနေသူတွေနဲ့ ဆုံးရှုံးသွားတဲ့လက်နက်ခဲယမ်းတွေ ပြန်လည်မရရှိရင် သေဒဏ်ပေးမယ်လို့လည်း ခြိမ်းခြောက်ထားတယ်လို့ သူကပြောပါတယ်။

လက်နက်၊ခဲယမ်းတွေနဲ့အတူထွက်ပြေးနေတဲ့ စစ်ကောင်စီတပ်သားတွေထဲက ၂ ဦးဟာ လက်ရှိအထိ ထွက်ပြေးလွတ်မြောက်နေဆဲဖြစ်ပြီး ၎င်းတို့နဲ့အတူ သေနတ် ၃ လက်၊ ကျည်ဆံ ၂၀၀၀၊ လက်ပစ်ဗုံး ၂၀ လုံးကိုပါ သယ်ဆောင်ထွက်ပြေးနေတာလို့ ဆိုပါတယ်။

ထွက်ပြေးသွားတဲ့ စစ်ကောင်စီတပ်သား ၃ ဦးထဲက တပ်သား ဖိုးလပြည့်ဆိုသူကို မတ်လ ၂၄ ရက်နေ့မှာပဲ ပဲခူးရိုးမအတွင်းက ရှားတောပြန့်နဲ့ပျဉ်းကတိုးခင်းကျေးရွာအနီးမှာ ပြန်လည်ဖမ်းဆီးခံခဲ့ရပြီး သူ့ကို ခလရ ၁ စစ်ကောင်စီတပ်အရာရှိတွေက သတ်ဖြတ်လိုက်ပြီလို့လည်း တပ်တွင်းသတင်းရင်းမြစ်တွေက ပြောပါတယ်။

ပဲခူး၊ မတ် ၂၇၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊ စိန်ကန့်လန့်ရွာအခြေစိုက် ခလရ ၁ တပ် ကနေ လက်နက်တွေယူဆောင်ထွက်ပြေးသွားတဲ့ စစ်ကောင်စီတပ်ဖွဲ့ဝင် ၃ ဦးထဲက ၁ ဦး ပြန်လည်ဖမ်းဆီးခံလိုက်ရတယ်လို့ သိရပါတယ်

မတ်လ ၂၃ ရက် မနက် ၃ နာရီခန့်မှာ ခလရ ၁ က အချုပ်သား ၁ ဦးနဲ့ ဗဟိုကင်းစောင့်တပ်သား ၂ ဦး လက်နက်တွေနဲ့အတူ ထွက်ပြေးသွားတာဖြစ်ပြီး စစ်ကောင်စီတပ်သားတွေက တောနင်းရှာဖွေရာမှာ မတ်လ ၂၄ ရက် မနက် ၆ နာရီလောက်မှာ ပဲခူးရိုးမအတွင်းက ရှားတောကွင်းကျေးရွာမှာ ၁ ဦး ပြန်လည်ဖမ်းဆီးခံခဲ့ရတာလို့ ခလရ ၁ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

“အချုပ်ကျနေတာက သာယာဝတီ ခလရ ၃၅ တပ်က တပ်ကြပ်ကြီး၊ ပဲခူးရိုးကို စစ်ကြောင်းထိုးထွက်မယ်ဆို ပဲခူးအနောက်ခြမ်းက တပ်တွေက ခလရ ၁ မှာ စုရတာဆိုတော့ ခလရ ၁ မှာ လာတွဲဖက်နေရင်းကနေ အချုပ်ကျနေတာ။ အဲ့တာကို ဗဟိုကင်းစောင့် ၂ ယောက်က ကယ်ထုတ်ပြီး ၃ ယောက် အတူတူပြေးကြတာ။ နောက်တရက်မှာပဲ ပဲခူးရိုးထဲကရွာနားမှာ တပ်သား ၁ ယောက် ပြန်မိတယ်” လို့ ပြောပါတယ်။

ပြန်လည်ဖမ်းဆီးခံရသူဟာ ခလရ ၁ တပ်က ဗဟိုကင်းစောင့် တပ်သား ဖိုးလပြည့် ဆိုသူဖြစ်ပြီး ဖမ်းဆီးခံရပြီးနောက် စစ်ကောင်စီတပ်သားက သတ်ဖြတ်လိုက်တယ်လို့ သိရပါတယ်။

“အဲ့ဒီတပ်သားလေးက အုတ်ဖို၊ တိမ်မြုပ်တပ်က ပြောင်းလာတာ သိပ်မကြာသေးဘူး။ သူ့ကိုပြန်မိတယ်ဆိုပေမယ့် သူ့ဆီက သေနတ်တွေ ဘာတွေဘာမှပြန်မရဘူး။ ကျန်တဲ့ ၂ ယောက်ကိုမေးတာလည်း မေးလို့မရဘူး။ စစ်ကြောရေးအရာရှိက သူ့ကိုသတ်ပြီး အလောင်းကိုမီးရှို့လိုက်ပြီလို့ သိရတယ်” လို့ သူကဆက်ပြောပါတယ်။

ခလရ ၁ စစ်ကောင်စီတပ်သား ၃ ဦးထွက်ပြေးချိန်မှာ ၎င်းတို့နဲ့အတူ သေနတ် ၃ လက်၊ ကျည်ဆန်အတောင့် ၂၀၀၀၊ လက်ပစ်ဗုံးအလုံး ၂၀ တို့ကို ယူဆောင်ထွက်ပြေးသွားတာ ဖြစ်ပြီး ၂ ဦးက လွတ်မြောက်နေဆဲ ဖြစ်တယ်လို့ သိရပါတယ်။

လက်နက်၊ ခဲယမ်းတွေနဲ့ ထွက်ပြေးလွတ်မြောက်နေတဲ့ စစ်ကောင်စီတပ်သားတွေကို ခလရ ၁ စစ်ကောင်စီတပ်က ပဲခူးရိုးမအတွင်း ရွာတွေဖြစ်တဲ့ ရှားတောကွင်းရွာ၊ ပျဉ်းကတိုးခင်းရွာတွေအပါအဝင် ပဲခူးရိုးမတလျှောက် ဒီကနေ့အထိ ပိုက်စိတ်တိုက် ရှာဖွေနေဆဲဖြစ်တယ်လို့ သိရပါတယ်။

သာယာဝတီ၊ မတ် ၂၅၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ သာယာဝတီမြို့နယ်၊ သာယာအေးကျေးရွာအုပ်စုအတွင်းက မူရင်းပိုင်ရှင် တောင်သူတွေဆီ စွန့်လွှတ်ပြီးဖြစ်တဲ့ တပ်ပိုင်မြေတွေရဲ့ ပိုင်ဆိုင်မှု ပုံစံ-၇ တွေကို စစ်ကောင်စီကျေးရွာအုပ်စု အုပ်ချုပ်ရေးမှူးက မတ်လ ၂၁ ရက်နေ့ကစတင်ကာ လော်စပီကာနဲ့အော်ပြီး ပြန်အပ်ခိုင်းနေတယ်လို့ သိရပါတယ်။

သာယာဝတီမြို့အခြေစိုက် ခလရ ၃၅ တပ်က ယခင်စစ်အစိုးရလက်ထက်မှာ သိမ်းဆည်းထားတဲ့ သာယာအေးကျေးရွာအုပ်စုအတွင်းက လယ်မြေဧက ၃၀၀ ကို ၂၀၁၃ ခုနှစ်မှာ တပ်ပိုင်မြေအဖြစ်ကနေ စွန့်လွှတ်ခဲ့ရတာဖြစ်ပြီး လက်ရှိမှာ အဲ့ဒီမြေ ပိုင်ဆိုင်ထားသူတွေဆီက ပိုင်ဆိုင်မှု ပုံစံ-၇ စာချုပ်တွေကို ရပ်၊ကျေးလယ်ယာမြေစီမံခန့်ခွဲရေးကော်မတီထံ အပ်နှံခိုင်းနေတာလို့ ဒေသခံတဦးက မြေလတ်အသံကို ပြောပါတယ်။

“ဒီမြေတွေက ဦးသိန်းစိန်လက်ထက်မှာ တောင်သူတွေ အမှန်တကယ် စိုက်ပျိုးမြေတွေဖြစ်လို့ တပ်ပိုင်မြေအဖြစ်ကနေ စွန့်လွှတ်ခဲ့ပြီး သူ့မူရင်းပိုင်ရှင်တွေကို တရားဝင်ပြန်လွှဲထားတဲ့ မြေတွေ။ ခုလို ပုံစံ ၇ ပြန်အပ်ခိုင်းတာက တပ်ပိုင်မြေအဖြစ် ပြန်သိမ်းဖို့ ပြင်ဆင်နေတာလို့ ယူဆပါတယ်” လို့ ပြောပါတယ်။

အရပ်သားအစိုးရလက်ထက်တုန်းကလည်း စစ်ကောင်စီတပ်က အဲ့ဒီမြေဧက ၃၀၀ နဲ့ပတ်သက်လို့ မူရင်းပိုင်ရှင်တွေကို ပြန်လည်လွှဲပြောင်းပေးရာမှာ အငြင်းပွားမှုတွေရှိခဲ့တယ်ဆိုပြီး အကြောင်းပြကာ ပြန်လည်သိမ်းယူဖို့ ကြိုးစားခဲ့ဖူးတယ်လို့ ဆိုပါတယ်။

“NLD လက်ထက် ၂၀၁၇ လောက်မှာ အဲ့ဒီမြေတွေနဲ့ပတ်သက်ပြီးတော့ ဒီမူရင်းပိုင်ရှင်တွေကြားမှာ အငြင်းပွားတာတွေဖြစ်လို့ ၃၅ တပ်က ပြန်သိမ်းဖို့ လုပ်သေးတယ်။ NLD ခံနေလို့ သူတို့မအောင်မြင်တာ” လို့ သူကဆက်ပြောပါတယ်။

အဲ့ဒီမြေဧက ၃၀၀ ရဲ့ ပိုင်ဆိုင်မှုစာချုပ်ပုံစံ ၇ တွေ စစ်ကောင်စီရပ်/ကျေးလယ်ယာမြေစီမံခန့်ခွဲရေးကော်မတီကို ပြန်လည်အပ်နှံဖို့ ခလရ ၃၅ တပ်က တပ်ကြပ်ကြီး သိန်းဦးနဲ့ သာယာအေးရွာအုပ်စု အုပ်ချုပ်ရေးမှူးတို့က ဦးစီးလုပ်ဆောင်နေတာလို့ ဆိုပါတယ်။

သာယာအေးကျေးရွာအုပ်စုထဲမှာ သင်တောရိုး၊ ကညင်ကောက်၊ သာယာအေး၊ ဂွေးချောင်းစတဲ့ရွာတွေ ပါဝင်တာဖြစ်ပြီး စစ်ကောင်စီတပ်က အဲ့ဒီရွာတွေထဲ လယ်မြေဧက ၃၀၀ ကို ၁၉၉၃ ခုနှစ် စစ်အစိုးရခေတ်မှာ တပ်ပိုင်မြေအဖြစ် သိမ်းဆည်းခဲ့တာဖြစ်ကာ ၂၀၁၃ ခုနှစ်မှာ တပ်ပိုင်မြေအဖြစ်ကနေ ပြန်လည်စွန့်လွှတ်ခဲ့ရတာလို့ သိရပါတယ်။

မင်းလှ၊ မတ် ၂၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊ စိန်ကန့်လန့်ရွာအခြေစိုက် ခလရ ၁ တပ်က အချုပ်သား ၁ ဦးနဲ့ စစ်ကောင်စီတပ်သား ၂ ဦး မတ်လ ၂၃ ရက် ဒီနေ့မနက် ၃ နာရီလောက်မှာ လက်နက်တွေယူပြီး ထွက်ပြေးသွားတယ်လို့ သိရပါတယ်။

ထွက်ပြေးသွားသူတွေဟာ ခလရ ၁ ဗဟိုကင်းတပ်တွင်းအချုပ်မှာ ဖမ်းခံထားရတဲ့ စစ်ကောင်စီတပ်ဖွဲ့ဝင်အချုပ်သား ၁ ဦးနဲ့ တပ်ဗဟိုကင်းအချုပ်စောင့် တပ်သား ၂ ဦးဖြစ်ပြီး သေနတ် ၃ လက်ယူပြီး ထွက်ပြေးနေတာလို့ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

“အချုပ်စောင့်တဲ့ဗဟိုကင်း ကင်းသမား ၂ ယောက်ရယ်၊ အချုပ်သားတယောက်ရယ် မနက် ၃ နာရီလောက်ကြီး ထွက်ပြေးသွားတာ။ ခလရ ၁ က တောအစပ်မှာဆိုတော့ပြေးလို့လွယ်တယ်။ သေနတ်တလက်စီ ပါသွားတယ်” လို့ ပြောပါတယ်။

လက်ရှိမှာ သေနတ်တွေယူဆောင်ထွက်ပြေးသွားတဲ့ စစ်ကောင်စီတပ်သားတွေကို ခလရ ၁ နောက်တန်း စစ်ကောင်စီတပ်ဖွဲ့ဝင်တွေက တောနင်းရှာဖွေနေပြီး တွေ့တဲ့နေရာ ပစ်သတ်ဖို့ ညွှန်ကြားထားတယ်လို့လည်း ဆိုပါတယ်။

“သူတို့သေနတ်တွေကို နိုင်သလောက်သယ်ဖို့လုပ်နေတာလို့ သိရတယ်။ လက်နက်တိုက်ဖောက်နေတာကို ဟိုတလောက မုဒိန်းမှုနဲ့အချုပ်ကျနေတဲ့ ထွန်းနိုင်ကတွေ့လို့ အော်လိုက်လို့တယောက်တလက်စီပဲ ပါသွားတာ။ ခုတပ်ထဲမှာလည်း ဆူညံပွက်လောရိုက်နေတာ။ သူတို့ကို စစ်ကြောင်းထိုး တောနင်းရှာနေတယ်။ ပစ်မိန့်လည်း ပေးထားတယ်။ လူတွေအရှင်မမိရင်နေ သေနတ်တွေပြန်ရအောင် ရှာရမယ်ဆိုပြီး အမိန့်ထုတ်ထားတယ်” လို့ သူကဆက်ပြောပါတယ်။

စစ်ကောင်စီတပ်သားတွေကို ချုပ်နှောင်ထားတဲ့ တပ်တွင်းအချုပ် ဗဟိုကင်းဟာ တပ်ရင်းတခုလုံးရဲ့ လက်နက်၊ ခဲယမ်းတွေကို သိမ်းဆည်းထားရှိတဲ့ လက်နက်တိုက်လည်း ဖြစ်တယ်လို့ သိရပါတယ်။

လက်ရှိအချိန်ထိ ထွက်ပြေးသွားသူတွေကို အောက်ခြေမှာ တောနင်းရှာဖွေနေဆဲဖြစ်ပြီး ဖြစ်စဉ်ဖြစ်ပွားမှုကို ခလရ ၁ နောက်တန်းအရာရှိတွေက တပ်မ ၆၆ နဲ့ ဒကစ(ပြည်)ဌာနချုပ်တွေကို တင်ပြတာမျိုးမရှိသေးဘဲ ကြိတ်ပြီးရှာဖွေနေတယ်လို့ ဆိုပါတယ်။

မင်းလှအခြေစိုက် ခလရ ၁ တပ်ဟာ တပ်မ ၆၆ လက်အောက်ခံ တပ်ရင်းတခုဖြစ်ပြီး ကရင်နီပြည်နယ်အတွင်း စစ်ဆင်ရေးဝင်ရောက်နေတဲ့တပ်ဖြစ်ကာ၊ ရှေ့တန်းစစ်ဆင်ရေးမှာလည်း ထိခိုက်ကျဆုံး များနေသလို နောက်တန်းမှာလည်း အုပ်ချုပ်မှုလျော့နည်းဖြစ်စဉ် အမှုအခင်းတွေ ဆက်တိုက်ဖြစ်ပွားနေကာ အခုမတ်လအတွင်းမှာပဲ ခလရ ၁ က စစ်ကောင်စီတပ်သား ထွန်းနိုင်ဟာ စိန်ကန့်လန့်ရွာနေ အငြိမ်းစားဗိုလ်ကြီး မျိုးမြင့်ရဲ့သမီးဖြစ်သူ စိတ်ဝေဒနာသည်ကို အကြိမ်ကြိမ်အဓ္ဓမပြုကျင့်မှု ဖြစ်ပွားခဲ့သေးတယ်လို့ တပ်တွင်းသတင်းရင်းမြစ်တွေဆီက သိရပါတယ်။

သာယာဝတီ၊ မတ် ၁၆၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင် မင်းလှမြို့နယ် လတ်ဆတ်ကျေးရွာအုပ်စု စိန်ကန့်လန့်ရွာအခြေစိုက် ခလရ ၁ က စစ်ကောင်စီတပ်သားက စစ်ကောင်စီတပ်ကနေ အငြိမ်း စားယူထားတဲ့ ဗိုလ်ကြီးရဲ့သမီးဖြစ်သူကို အကြိမ်ကြိမ် အဓမ္မပြုကျင့်ခဲ့တယ်လို့ တပ်တွင်းသတင်းရင်းမြစ်တွေနဲ့ ဒေသခံတွေဆီက သိရပါတယ်။

အဓမ္မပြုကျင့်ခံရသူဟာ မင်းလှမြို့နယ်၊ စိန်ကန့်လန့်ရွာ၊ ရေစက်တန်းလမ်းနေ အသက် ၂၁ နှစ်အရွယ် စိတ်ကျန်းမာရေးချို့တဲ့သူ မအဉ္ဇလီမျိုးမြင့် ဖြစ်ပြီး ၎င်းကို ခလရ ၁ တပ်ရင်း အမှတ် ၃ တပ်ခွဲက အသက် ၅၅ နှစ် အရွယ် စစ်ကောင်စီတပ်ဖွဲ့ဝင် တပ်သား ထွန်းနိုင်က မတ်လ ၄ ရက်နဲ့ ၅ ရက်တွေမှာ ၃ ကြိမ် အဓမ္မပြုကျင့်ခဲ့တာလို့ ခလရ ၁ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

အဓမ္မပြုကျင့်ခံခဲ့ရတဲ့ မအဉ္ဇလီမျိုးမြင့်ရဲ့မိဘတွေဟာ စစ်ကောင်စီတပ်အငြိမ်းစား ဗိုလ်ကြီးမျိုးမြင့်နဲ့ ဒေါ်ခင်မာလာ ဆိုသူတို့ဖြစ်ပြီး ဧရာဝတီတိုင်း၊ ဖျာပုံမြို့ကို ခရီးသွားနေချိန်မှာ အခုလိုဖြစ်ခဲ့တာပါ။

“ရေစက်တန်းလမ်းဆိုတာ အဲ့နားမှာလည်း စစ်တပ်အငြိမ်းစားတွေချည်းပဲ နေကြတာ။ ခလရ ၁ နဲ့ အဲ့ဒီနေရာနဲ့က လမ်းပဲခြားတယ်။ အဲ့ဒီရက်ပိုင်းက မိဘတွေက ခရီးထွက်နေတဲ့အချိန် အိမ်နီးနားချင်းတွေနဲ့ အပ်ထားခဲ့တာ။ အဲ့ဒီအချိန်မှာ ထွန်းနိုင်က ခလေးမလေးကို မုဒိန်းဝင်ကျင့်တာ။ သူလုပ်တာက ၃ ကြိမ်တောင်ဆိုတော့ အဲ့ဒီအိမ်ကို အဝင်၊အထွက်ထူးခြားနေတာကို သတိထားမိပြီး နောက်ဆုံးအကြိမ်မှာ ဘေးအိမ်နီးချင်းတွေက အိမ်ထဲဝင်ကြည့်တော့ အဲ့ဒီလို တန်းလန်းကြီးမိတာ” လို့ ခလရ ၁ တပ်တွင်းသတင်းရင်းမြစ်က ပြောပါတယ်။

မတ်လ ၄ ရက် မနက် ၈ နာရီမှာ ၁ ကြိမ်၊ ၅ ရက်နေ့ မနက် ၁၀ နာရီနဲ့ နေ့လည် ၂ နာရီတို့မှာ ၂ ကြိမ် အဓမ္မပြုကျင့်ခဲ့တာဖြစ်ပြီး နောက်ဆုံးပြုကျင့်တဲ့ နေ့လည် ၂ နာရီလောက်မှာ အိမ်နီးချင်းတွေက ဝိုင်းဝန်းဖမ်းဆီးခဲ့တာလို့ ဆိုပါတယ်။

“အဲ့ဒီလိုမိတော့ ကလေးမလေးကို ဝိုင်းမေးကြတော့ စလုပ်တဲ့နေ့က အတင်းဝင်လာ တွန်းလှဲပြီး အော်ရင် သတ်ပစ်မယ်ဆိုပြီး ခြိမ်းခြောက်ပြီး တခါလုပ်တယ်။ နောက်ရက်မိတဲ့နေ့မှာလည်း ၂ ခါလုပ်တယ်လို့ဖြေပြီး ကြောက်လို့ပါဆိုပြီး ငိုယိုနေတယ်။ ကိုထွန်းနိုင်က အသက်တွေလည်း ကြီးနေပြီ အမှုတွေလည်း တောက်လျှောက်ဖြစ်လို့ ခုအရွယ်ထိ တပ်သားအဆင့်ပဲ” လို့ သူက ဆက်ပြောပါတယ်။

အဓမ္မပြုကျင့်ခဲ့တဲ့ ခလရ ၁ စစ်ကောင်စီတပ်ဖွဲ့ဝင် တပ်သား ထွန်းနိုင်ဟာ ခလရ ၁ တပ်အတွင်း နေထိုင်သူဖြစ်ပြီး ၎င်းမှာ မိန်းမဖြစ်သူနဲ့သမီး ၃ ယောက်ရှိကာ သားသမက်တွေလည်း ရှိသူဖြစ်တယ်လို့ သိရပါတယ်။

လက်ရှိမှာ စစ်ကောင်စီတပ်သား ထွန်းနိုင် ကို ခလရ ၁ တပ်တွင်းအချုပ်မှာ ချုပ်နှောင်ထားပြီး ဒီအမှုနဲ့ပတ်သက်လို့ ခလရ ၁ နောက်တန်းမှူးက တပ်မ ၆၆ ဌာနချုပ်နဲ့ ဒေသကွပ်ကဲမှုစစ်ဌာနချုပ် (ဒကစ- ပြည်) တို့ကို သတင်းပို့တင်ပြတာမျိုး မရှိသေးဘဲ ပြုကျင့်ခံရတဲ့ အမျိုးသမီးငယ်ရဲ့မိသားစုဝင်တွေကို အမှုကြေအေးပေးဖို့ လတ်ဆတ်ကျေးရွာအုပ်စု စစ်ကောင်စီခန့်အုပ်ချုပ်ရေးမှူး ထွန်းမြင့် ကနေတဆင့် ခလရ ၁ တပ် တာဝန်ရှိအရာရှိတွေက ဖိအားပေးပြောဆိုခိုင်းနေတယ်လို့ ဆိုပါတယ်။

စစ်ကောင်စီတပ်ရဲ့ ခလရ ၁ တပ်ရင်းဟာ သဲကုန်းမြို့နယ်၊ အင်းမမြို့အခြေစိုက် အမှတ် ၆၆ ခြေမြန်တပ်မ ဌာနချုပ်(တမခ ၆၆) လက်အောက်ခံတပ်ရင်းတခုဖြစ်ပြီး လက်ရှိ တပ်မ ၆၆ နဲ့လက်အောက်ခံတပ်ရင်းတွေဟာ ကရင်နီ(ကယား)ပြည်နယ်အတွင်း တိုက်ခိုက်ရေး ဝင်ရောက်နေတဲ့ တပ်မတခု ဖြစ်ပါတယ်။

တပ်မ ၆၆ နဲ့ လက်အောက်ခံတပ်ရင်းတွေဟာ ကရင်နီ(ကယား)ပြည်နယ်အတွင်း စစ်အာဏာသိမ်းပြီး နောက်၂၀၂၁ ခုနှစ်၊ နိုဝင်ဘာလကစလို့ တိုက်ခိုက်ရေးဝင်ရောက်နေတာဖြစ်ပြီး ကရင်နီပူးပေါင်းအဖွဲ့တွေနဲ့ ၁ နှစ်ခွဲနီးပါးကာလအတွင်း တိုက်ပွဲတွေအကြား တပ်ရင်းမှူးအဆင့်တွေပါ အပါအဝင် အများအပြားထိခိုက်သေဆုံးဒဏ်ရာရမှု‌၊ အရှင်ဖမ်းဆီးခံရမှုနဲ့ ဒေသကာကွယ်ရေးတပ်ဖွဲ့တွေဘက်ကို ဘက်ပြောင်း CDM ပြုလုပ်မှုတွေ များပြားနေလို့ စစ်အင်အား သိသိသာသာ ယုတ်လျော့နေတဲ့ တပ်မတခု ဖြစ်တယ်လို့ တပ်တွင်း သတင်းရင်းမြစ်တွေက ပြောပါတယ်။

စစ်ကောင်စီတပ် တပ်မ ၆၆ ရဲ့ စစ်အင်အား အများအပြား ယုတ်လျော့လာမှုတွေကြောင့် စစ်ခေါင်းဆောင်တွေအနေနဲ့ စစ်အင်အား ထပ်မံမပြုန်းတီးစေရေးအတွက် ၎င်းတို့လက်အောက်ခံ စစ်ကောင်စီတပ်ဖွဲ့ဝင်တွေက သူတို့အပေါ် အမိန့်မနာခံ စစ်ပုန်ကန်မှုကလွဲရင် ကျန်တဲ့အမှုတွေကို အရေးယူဆောင်ရွက်တာမျိုး လုပ်ဆောင်မှာမဟုတ်ဘူးလို့ CDM တပ်မတော်သားအရာရှိ တဦးက ပြောပါတယ်။

“လက်ရှိအခြေအနေမှာ စကစတပ်က စစ်ဆင်ရေးအမှု၊ နောက် သူတို့သတင်းတွေအပြင်ကိုပေးတဲ့ ဖရဲသီးလိုအမှုမျိုးကလွဲရင် ကျန်တဲ့ကာရိုက်တာအမှုတွေနဲ့ပတ်သက်ပြီးအတတ်နိုင်ဆုံးအရေးမယူတော့ဘူး။ မလိုအပ်ဘဲအင်အားထပ်ပြီးပြုန်းတီးမခံတော့ဘူးပေါ့။ အောက် ခြေ စစ်ကောင်စီတပ်သားတွေ စိတ်ပျက်ပြီးထွက်ပြေးမှာကိုသူတို့အတော်စိုးရိမ်နေတယ်။ အဲ့တာကြောင့်ဒီလိုအမှုတွေကိုလည်း အင်အားမပြုန်းအောင် သတင်းဖုံးဖိပြီးအမှုကြေအေးနိုင်ဖို့ ဖိအားပေးလုပ်ဆောင်နေတာဖြစ်တယ်” လို့ CDM တပ်မတော်သား ဗိုလ်ကြီး ဇင်ယော်က ပြောပါတယ်။

ခလရ ၁ ယခင် တပ်ရင်းမှူး ဒု-ဗိုလ်မှူးကြီး ကျော်ဇေယျ မှာလည်း ကရင်နီပြည်နယ်အတွင်း တိုက်ပွဲကျ သေဆုံးခဲ့တာဖြစ်ပြီး သူ့သေဆုံးမှုဟာ တပ်ရေးဗိုလ်ကြီး မျိုးဝင်းခိုင်ဆိုသူနဲ့လူမှုရေးဖောက်ပြန်နေတဲ့ ဇနီးဖြစ်သူ တပ်ရင်းမှူးကတော်ရဲ့ အောက်လမ်းအစီအရင်တွေကြောင့် တိုက်ပွဲကျသေဆုံးခဲ့တာလို့ တပ်တွင်းမှာ လက်ရှိအချိန်ထိ ဝေဖန်ပြောဆိုနေကြတယ်လို့ သိရပါတယ်။

မင်းဘူး၊ မတ် ၄၊ ၂၀၂၃။

မကွေးတိုင်း၊ မင်းဘူးခရိုင်၊ ငဖဲမြို့နယ်၊ တုံးကြီးကျေးရွာက ဒေသခံအရှိုချင်းအမျိုးသမီး ၁ ဦးကို PDF နဲ့ Facebook လူမှုကွန်ယက်မှာ သူငယ်ချင်းဖြစ်နေလို့ဆိုပြီး စစ်ကောင်စီတပ်က ဖမ်းဆီးထားတယ်လို့ ဒေသခံတွေဆီက သိရပါတယ်။

ဖမ်းဆီးခံရတဲ့အမျိုးသမီးဟာ အသက် ၂၉ နှစ်အရွယ် မိုင်စန်းစန်းအေး(ခ)မိုင်ချန်ဆာရ် ဆိုသူဖြစ်ပြီး၊ ဖေဖော်ဝါရီလ ၂၇ ရက်က သူနေထိုင်တဲ့ရွာကနေ ငဖဲမြို့ပေါ်ကို မှတ်ပုံတင်လဲလှယ်ဖို့သွားရောက်စဉ်မှာ ငဖဲမြို့၊ စစ်ကောင်စီတပ်စစ်ဆေးရေးဂိတ်က သူ့ဖုန်းကိုစစ်ဆေးပြီး ဖမ်းဆီးထားတာလို့ ဆိုပါတယ်။

“သူနဲ့သူ့မောင်လေးနဲ့က အဲ့ဒီနေ့က ငဖဲလဝကကို မှတ်ပုံတင်သွားလဲတာ၊ ငဖဲမှာ စစ်တပ်က သူ့ဖုန်းကို စစ်ပြီး PDF နဲ့ Facebook Fri ဖြစ်နေလို့ဆိုပြီး ဖမ်းထားတာ။ သူတို့က တုံးကြီးရွာမှာဈေး ဆိုင်ဖွင့်ထားတာ။ အဲ့ဒီနားမှာတပ်စွဲတဲ့စစ်သားတွေလည်း အမြဲဝင်၊ထွက်ဈေးဝယ်နေကြတာ။ သူ့မောင်လေးက မနေ့ကပြန်လွတ်လာတယ်” လို့ မိသားစုနဲ့နီးစပ်တဲ့ ဒေသခံတဦးက မြေလတ်အသံကို ပြောပါတယ်။

သူဖမ်းဆီးခံရတာနဲ့ပတ်သက်လို့ ငဖဲမြို့နယ်နဲ့ စေတုတ္တရာမြို့နယ်အတွင်းလှုပ်ရှားနေတဲ့ ဒေသတွင်းပြည်သူ့ကာကွယ်ရေးတပ်ဖွဲ ့CDF-Asho က တာဝန်ရှိသူတဦးကိုမေးမြန်းရာမှာ အခုလိုပြောပါတယ်။

“သူက အာဏာမသိမ်းခင်ထဲက ကျနော်တို့သူငယ်ချင်းပေါ့နော်၊ ကျနော်နဲ့ဟိုအရင်ထဲက ဖေ့ဘွတ်မှာ Fri ဖြစ်တာပေါ့။ အဲ့ဒီနေ့က ကျနော်ကPDFယူနီဖောင်းနဲ့ ဖေ့ဘွတ်မှာပုံချိန်းလိုက်တော့၊ မြို့စစ်ဆေးရေးဂိတ်မှာ သူ့ဖုန်းကိုစစ်တဲ့အချိန် ကျနော်နဲ့ဖရန့်ဖြစ်နေလို့ဆိုပြီး ဖမ်းသွားတာလို့သိရတယ်။ သူက ကျနော်တို့ကိုထောက်ပံ့တာမျိုးမရှိသလို၊ တော်လှန်ရေးလုပ်တာမျိုးလည်းမရှိဘူး” လို့ ပြောပါတယ်။

အဲ့ဒီအရှိုချင်းအမျိုးသမီး အဖမ်းခံရပြီးနောက် ဖေဖော်ဝါရီလ ၂၈ ရက်နဲ့ မတ်လ ၁ ရက်မှာလည်း ငဖဲမြို့နယ်၊ ဂုတ်ကြီးရွာမှာနေတဲ့ ဦးထွန်းထွန်းဝင်းနဲ့ ဆလိုင်းတင်ကိုလှဆိုသူ အမျိုးသား ၂ ဦးကို စစ်ကောင်စီတပ်က လာရောက်ဖမ်းဆီးသွားတယ်လို့ သိရပါတယ်။
မိုင်စန်းစန်းအေး ဖမ်းဆီးခံရတာနဲ့ပတ်သက်လို့ စစ်ကောင်စီဘက်က တစုံတရာထုတ်ပြန်လာတာမျိုး မရှိသေးဘဲ လက်ရှိအချိန်မှာ သူအပါအဝင် ဂုတ်ကြီးရွာသား ၂ ဦးကို ငဖဲမြို့မရဲစခန်းမှာ ချုပ်နှောင်စစ်ဆေးနေတယ်လို့ သိရပါတယ်။

မင်းလှ၊ မတ် ၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်အတွင်းက ပဲခူးရိုးမပေါ်ကို စစ်ကြောင်းထိုးဖို့ စစ်ကား ၁၀ စီးကျော်နဲ့ အင်အားအများအပြား တင်ဆောင်ပြီး မတ်လ ၃ ရက် ဒီကနေ့မနက်ပိုင်းမှာ ထပ်တက်သွားတယ်လို့ သိရပါတယ်။

ပဲခူးရိုးပေါ်က PDF တွေ ခိုအောင်းနိုင်တဲ့နေရာတွေကို စစ်ကြောင်းထိုးဖို့ သွားရောက်တာ ဖြစ်ပြီး မတ်လ ၂ ရက် မနေ့က မနက်အစောပိုင်းကလည်း စစ်ကား ၃ စီးနဲ့ သွားရောက်တာမှာ ပဲခူးရိုး၊ ခါချဉ်တောင်အတက်မှာ ကားမှောက်ခဲ့လို့ ဗိုလ်မှူးအဆင့်အပါအဝင် စစ်သား ၅ ဦးကျော် သေဆုံး၊ ဒဏ်ရာရခဲ့တာကြောင့် နောက်ကြောင်းပြန်ဆုတ်လာခဲ့ရပါတယ်။

“မနေ့က ကားမှောက်လို့သေတဲ့ စကစ ဗိုလ်မှူးက ဒီမင်းလှ၊ သရက်တပင်တာဆုံမှာ KTV မယ်တွေနဲ့ အတူနေပျော်ပါးပြီး မနက် ၄ နာရီလောက်ကြီး ထသွားတာ။ ကားပေါ်မှာလည်း ဘီယာ၊ အရက်တွေအကုန် တင်သွားတာ။ အဲ့ဒီပဲခူးရိုးက ကရင်မောင်နှမဆိုတာ ရှိတယ်။ နတ်ကြီးတယ်။ အမှားမခံဘူး။ အဲ့ဒီနေရာက အရင်ကတည်းက ကားခဏခဏမှောက်လို့ အသေအပျောက် များတဲ့နေရာ။ ဒီနေ့မနက်လည်း ထပ်တက်သွားပြန်ပြီ” လို့ မင်းလှမြို့ခံ တဦးက မြေလတ်အသံကို ပြောပါတယ်။

စစ်ကောင်စီတပ်တွေ ပဲခူးရိုးပေါ်တက်ရောက် စစ်ကြောင်းထိုးဖို့ ရောက်ရှိနေလို့ ဒေသခံပြည်သူတွေအနေနဲ့ ရိုးမအတွင်းကို သတိထားသွားလာကြဖို့ သာယာ၀တီခရိုင် PDF တာဝန်ရှိသူတဦးက ပြောပါတယ်။

“ဒီမနက် ထပ်တက်လာတယ်ဆိုတာ ကျနော်တို့လည်း သတင်းရထားတယ်။ လောလောဆယ် ရိုးပေါ်ကို ရှေ့ပြေးအနေနဲ့ စစ်ကား ၄ စီး‌ ရောက်နေတာ တွေ့တယ်။ ကျန်တဲ့ကားတွေတော့ ဘယ်မှာထားခဲ့ပြီး စောင့်နေလည်း မသိဘူး။” လို့ သူက ပြောပါတယ်။

ပဲခူးရိုးပေါ်ကို စစ်ကြောင်းထိုးနေတဲ့ စစ်ကောင်စီတပ်တွေဟာ ပဲခူးအနောက်ခြမ်းကို အခြေပြုထားတဲ့ တပ်မ ၆၆ လက်အောက်ခံတပ်ရင်းတွေရဲ့ နောက်ချန်အင်အားတွေကို စုဖွဲ့ထားတာဖြစ်ပြီး မင်းလှမြို့နယ် စိန်ကန့်လန့်ရွာအခြေစိုက် ခလရ ၁ မှာ စစ်အင်အား ၂၀၀ ကျော် စုဖွဲ့အင်အား ဖြည့်တင်းထားတယ်လို့ သိရပါတယ်။