စစ်ကိုင်း၊ ဇွန် ၁၅၊ ၂၀၂၃။

ဖမ်းဆီးစစ်ဆေးခံနေရတယ်လို့ သတင်းတွေထွက်ပေါ်ခဲ့တဲ့ စစ်ကိုင်းတိုင်း၊ မုံရွာမြို့နယ်အခြေစိုက်၊အနောက်မြောက်တိုင်းစစ်ဌာနချုပ်(နမခ) တိုင်းမှူး ဗိုလ်ချုပ် သန်းထိုက် ကို ဇွန်လ ၁၄ ရက်မှာ စစ် ကောင်စီဘက်က လူမြင်ကွင်းကို ထုတ်ပြလာခဲ့ပါတယ်။

ဗိုလ်ချုပ် သန်းထိုက်ဟာ မုံရွာမြို့မှာကျင်းပတဲ့ လက်နက်ခဲယမ်းနဲ့အတူ စစ်ကောင်စီထံအလင်းဝင်လာတဲ့ PDF တွေကို လက်ခံတာနဲ့ ထောက်ပံ့ပေးတဲ့အခမ်းအနားကို ဇွန်လ ၁၄ ရက် မနေ့က တက်ရောက်ခဲ့တာအပြင် မနေ့တရက်ထဲမှာပဲ နေပြည်တော်ကလာတဲ့ ကစထ ၁၊ ကစထမှူး ဒု-ဗိုလ်ချုပ်ကြီး တေဇကျော်နဲ့အတူ စစ်ဆေးရုံကလူနာတွေကို သွားရောက်ကြည့်ရှုတယ်လို့ စစ်ကောင်စီထိန်းချုပ်မီဒီယာ မြဝတီမှာ မနေ့ညပိုင်းမှာ ထုတ်ပြန်လာတာပါ။

ဗိုလ်ချုပ် သန်းထိုက် ဟာ စစ်ခေါင်းဆောင်တွေက ခေါ်ဆောင်တာကြောင့် ဇွန်လ ၁၂ ရက်က ရဟတ်ယာဉ်နဲ့ နေပြည်တော်ကို အရေးပေါ်သွားရောက်ခဲ့ရတယ်လို့ နမခနဲ့နီးစပ်တဲ့ သတင်းရင်းမြစ်တွေက မြေ လတ်အသံကိုပြောဆိုပါတယ်။

အဲ့ဒီနောက် တဆက်တည်းမှာပဲ ဗိုလ်ချုပ် သန်းထိုက် ကို နေပြည်တော်မှာ စစ်ခေါင်းဆောင်တွေက ဖမ်းဆီးစစ်ဆေးနေတယ်လို့ သတင်းတွေထွက်ပေါ်ခဲ့တာပါ။

“သူ့ကိုနေပြည်တော်က အရေးပေါ်လာခေါ်သွားတယ်ဆိုတာ ကျနော်တို့လည်းသတင်းရတယ်။ စစ်ဆေးနေတယ်လို့လည်း သတင်းတွေထွက်တယ်ပေါ့။ ခုစကစ သတင်းမှာ နေပြည်တော်က ကစထမှူးပါ မုံရွာကို ပါလာတာတွေ့ရတယ်။ တိုင်းမှူးဖမ်းခံရတဲ့သတင်းတွေကြောင့် အောက်ခြေကောင်တွေစိတ်ဓာတ်ကျမှာစိုးလို့ ကိုယ်ရှိန်သတ်တဲ့အနေနဲ့ ပြန်ထုတ်ပြလာတာလို့မြင်တယ်” လို့ CDM တပ်မတော်သား အရာရှိတဦးက ပြောပါတယ်။

ဒါ့အပြင် အဲ့ဒီတိုင်းမှူးအနေနဲ့လည်း သိပ်မကြာခင်ကာလမှာ နယ်ဘက် သို့မဟုတ် အရန်အင်အားကို ပို့ဆောင်ခံရဖို့ အနီးဆုံး အခြေအနေဖြစ်နေပြီလို့ သူက ဆက်ပြောပါတယ်။

စစ်အာဏာသိမ်းပြီးတဲ့နောက် တော်လှန်ရေးအင်အားစုတွေ အားကောင်းတဲ့နယ်မြေတွေကို စစ်ဆင်ရေး အဓိကကိုင်တွယ်နေရတဲ့ ကစထမှူး၊ စစ်တိုင်းမှူး၊ တပ်မမှူးတွေ မကြာခဏဆိုသလို အနားပေးခံရတာ၊ အရန်အင်အားကိုပို့ဆောင်ခံရတာ၊ နေရာရွှေ့ပြောင်းခံနေရတာနဲ့ စစ်ဆေးခံရမှုတွေရှိနေတာပါ။

၂၀၂၂ နဲ့ ၂၀၂၃ ခုနှစ်အတွင်းမှာပဲ ရဲချုပ်နဲ့ ကစထ ၆ မှူးဟောင်း ဒု-ဗိုလ်ချုပ်ကြီး သန်းလှိုင်၊ အမှတ် ၄ စစ်ဆင်ရေးအထူးအဖွဲ့မှူး (ကစထ ၄ မှူး)ဟောင်း ဒု-ဗိုလ်ချုပ်ကြီး ခင်လှိုင်တို့ အရန်အင်အားကို ပို့ဆောင်ခံခဲ့ရသလို၊ နမခတိုင်းမှူးဟောင်း ဗိုလ်မှူးချုပ် ဖြိုးသန့် ၊ အရှေ့တောင်တိုင်းစစ်ဌာနချုပ်(ရတခ) တိုင်းမှူးဟောင်း ဗိုလ်ချုပ် မြတ်သက်ဦးတို့ နယ်ဘက် ဝန်ကြီးဌာနကိုပြောင်းရွှေ့ခံခဲ့ရပြီး၊ တပ်မ ၆၆ တပ်မမှူး ဟောင်း ဗိုလ်မှူးကြီး ကျော်လင်းအောင် အရန်အင်အားကို ပို့ဆောင်ခံခဲ့ရကာ တပ်မ ၄၄ တပ်မမှူးဟောင်း ဗိုလ်မှူးကြီး တင်မိုးနိုင် လည်း နေပြည်တော်မှာ စစ်ဆေးခံခဲ့ရပြီးတဲ့နောက် ဦးပိုင်(MEC) ကို ပြောင်းရွှေ့ခံခဲ့ရတာပါ။

စာတည်း – ရင်ငြိမ်း

စစ်ကိုင်း၊ ဇွန် ၁၃၊ ၂၀၂၃။

စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်းစစ်ဌာနချုပ် (နမခ) တိုင်းမှူး ဗိုလ်ချုပ်သန်းထိုက် နေပြည်တော်ကို အရေးပေါ်ဆင့်ခေါ်ခံရလို့ ဇွန်လ ၁၂ ရက် မနေ့နေ့လယ် ၃ နာရီဝန်းကျင်က ရဟတ်ယာဉ်နဲ့ သွားရောက်ခဲ့ရတယ်လို့ သိရပါတယ်။

“ နမခ ကနေ မနေ့က နေ့လယ်ပိုင်းက Mi 17 နဲ့အားချင်း ထွက်သွားတာ။ ပြန်မရောက်သေးတာတော့ သေချာတယ်” လို့ နမခစစ်ဌာနချုပ်နဲ့ နီးစပ်တဲ့သတင်းရင်းမြစ်က မြေလတ်အသံကိုပြောပါတယ်။

နေပြည်တော်ကို ခေါ်ဆောင်ခံရတဲ့ နမခ စစ်တိုင်းမှူး ဗိုလ်ချုပ်သန်းထိုက်ကို လက်ရှိမှာ စစ်ခေါင်းဆောင်တွေက နေပြည်တော်မှာဘဲ ဖမ်းဆီးထိန်းသိမ်းထားတယ်လို့လည်း ဆိုပါတယ်။

“ နေပြည်တော်မှာ ဖမ်းထားတာလို့ သတင်းထွက်နေတယ်။ သူ့အပြောင်းအရွှေ့ကိစ္စနဲ့ပတ်သက်ပြီး အရက်ဝိုင်းမှာ ပြောတာတွေက နေပြည်တော်က စစ်ခေါင်းဆောင်တွေကို စော်ကားသလိုဖြစ်သွားလို့ အဖမ်းခံရတာလို့တော့ သိရတယ် ” လို့ အမည်မဖော်လိုတဲ့ အခြားစစ်ဘက်သတင်းရင်းမြစ်တဦးက ဆိုပါတယ်။

ဗိုလ်ချုပ် သန်းထိုက် ဖမ်းဆီးခံရမှုနဲ့ပတ်သက်ပြီး မြေလတ်အသံသတင်းဌာနအနေနဲ့ အသေးစိတ်သိရဖို့ ဆက်လက်စုံစမ်းနေပါတယ်။

ဗိုလ်ချုပ် သန်းထိုက်ဟာ စစ်တက္ကသိုလ် DSA အမှတ်စဉ် ၃၈ ဆင်း စစ်ဗိုလ်ချုပ်တဦးဖြစ်ပြီး စစ်အာဏာ သိမ်းပြီးတဲ့နောက် တော်လှန်ရေးတပ်ဖွဲ့တွေအားကောင်းနေတဲ့ စစ်ကိုင်းတိုင်းကို ကိုင်တွယ်ရတဲ့ ဒုတိယမြောက် စစ်တိုင်းမှူးဖြစ်ပါတယ်။

ဗိုလ်ချုပ် သန်းထိုက်ဟာ နမခ စစ်တိုင်းမှူး တာဝန်မယူခင်က ကလေးဝမြို့အခြေစိုက် အမှတ် ၁၀ စစ်ဆင်ရေးကွပ်ကဲမှုဌာနချုပ် ( စကခ ၁၀) စကခမှူး ဖြစ်ပြီး ၂၀၂၂ ခုနှစ်၊ ဇန်နဝါရီလမှာ ယခင် နမခ တိုင်းမှူး ဗိုလ်မှူးချုပ် ဖြိုးသန့် ကို စစ်ခေါင်းဆောင်တွေက ဖယ်ရှားကာ သူ့ကိုအစားထိုးခန့်အပ်ခဲ့တာပါ။

ပြီးခဲ့တဲ့ ဧပြီလထဲကလည်း ယခင် အရှေ့တောင်တိုင်းစစ်ဌာချုပ် (ရတခ) တိုင်းမှူး ဗိုလ်ချုပ်မြတ်သက်ဦး ကို နေပြည်တော်မှာ ဖမ်းဆီးစစ်ဆေးခဲ့သလို သူ့ရဲ့ဇာတိရွာ ယင်းမာပင်မြို့နယ်၊ စုန်းချောင်းရွာက ဆွေမျိုးသားချင်းတွေကိုလည်း စစ်ကောင်စီတပ်က ဖမ်းဆီးခဲ့တယ်လို့ သတင်းတွေထွက်ပေါ်ခဲ့ပါသေးတယ်။

ပဲခူး၊ ဇွန် ၈၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ လက်ပံတန်းမြို့က စတိုးဆိုင်တခု ဇွန်လ ၆ ရက် မနက် အစော ၁ နာရီခန့်မှာ ဖောက်ထွင်းခံရလို့ ငွေသားနဲ့ ရွှေထည်တွေအများအပြား ဆုံးရှုံးသွားတယ်လို့ သိရပါတယ်။

လက်ပံတန်းမြို့၊ မင်းရပ် ရပ်ကွက်၊ ကုလားကုန်းရပ်၊ လမ်းမတော်လမ်းမှာရှိတဲ့ သိန်းသိန်းစတိုး ဖောက်ထွင်းခံခဲ့ရတာဖြစ်ပြီး အပေါင်ဆိုင်နဲ့ပါ တွဲဖက်ဖွင့်ထားတာကြောင့် ရွှေထည်အများအပြားပါ ဖောက်ထွင်းခံခဲ့ရတာလို့ မြို့ခံတဦးက မြေလတ်အသံကိုပြောပါတယ်။

“ဆိုင်ရှင်တွေက လက်ပံတန်းမှာ အရမ်းချမ်းသာကြတဲ့သူတွေ။ တခြားဟိုတယ်တွေလည်းပိုင်တာရှိတယ် ။ စတိုးဆိုင်က အပေါင်ဆိုင်နဲ့တွဲဖွင့်ထားတာ။ ဆိုင်ရော၊ အိမ်ရောတွဲထားတာပေါ့။ ညသန်းခေါင်ကျော် ဝင်ပြီး ဖောက်ထွင်းသွားတာ ဆိုင်ကလူတွေလည်း တယောက်မှမနိုးဘူး” လို့ ပြောပါတယ်။

စတိုးဆိုင်အတွင်းရှိ မီးခံသေတ္တာဖောက်ထွင်းခံခဲ့ရတာဖြစ်ပြီး ဖောက်ထွင်းခံရမှုကြောင့် ငွေကျပ် သိန်း ၂၀၀၀ ခန့်နဲ့ ရွှေထည်ပစ္စည်းမျိုးစုံ ၇၀၀ ကျော် ရွှေချိန် ၃ ပိဿာနီးပါး ဆုံးရှုံးသွားတယ်လို့ ဆိုပါတယ်။

ဆိုင်တွင်း CCTV တွေကို ပြန်လည်စစ်ဆေးရာမှာ ဝင်ရောက်ဖောက်ထွင်းနေတဲ့ အမျိုးသားတဦးကို တွေ့ ရှိခဲ့ပြီး ဆိုင်ပြင်က CCTV ကင်မရာတွေကိုတော့ ဖောက်ထွင်းသူတွေက ရွှံ့နဲ့ပိတ်ကာ အိမ်အနောက်ဘက်ကနေ ဝင်ရောက်ဖောက်ထွင်းသွားလို့ သိရပါတယ်။

ဖောက်ထွင်းခံရတဲ့ စတိုးဆိုင်ဟာလည်း လက်ပံတန်းမြို့မရဲစခန်းနဲ့ ၁ မိုင်ခန့်အကွာမှာသာ တည်ရှိတယ်လို့ မြို့ခံတွေဆီကသိရပါတယ်။

ပြီးခဲ့တဲ့ ၂၀၂၂ ခုနှစ် ဩဂုတ်လအတွင်းကလည်း လက်ပံတန်းမြို့၊ ဗိုလ်အောင်ကျော်လမ်းက နေအိမ်တခုမှာ နေ့ခင်းဘက်ကြီး အိမ်ရှင်ကိုကြိုးတုပ် ဓားပြတိုက်မှုဖြစ်ပွားခဲ့ပါသေးတယ်။

စာတည်း – ရင်ငြိမ်း

ပဲခူး၊ ဇွန် ၂၊ ၂၀၂၃။

ပဲခူးတိုင်း(အနောက်ခြမ်း)၊ ပြည်မြို့နယ်စစ်ကောင်စီ(စီမံအုပ်ချုပ်ရေးကောင်စီ) အဖွဲ့ဝင် ၁ အဖြစ်တာဝန်ယူထားသူ အောင်လံမြို့နယ်၊ ကျော်စွာအခြေစိုက် အမှတ် ၇ ကာကွယ်ရေးပစ္စည်းစက်ရုံ (ကပစ ၇) မှ ဗိုလ်မှူး စိုပြေလင်း မေလတတိယအပတ်ကစလို့ မိန်းမမှုနဲ့စစ်ခုံရုံးဖွဲ့ စစ်ဆေးခံနေရတယ်လို့ သိရပါတယ်။

ဗိုလ်မှူး စိုပြေလင်းဟာ ကပစ ၇ က တတပ်တည်းနေ စစ်ကောင်စီတပ်ဖွဲ့ဝင်တပ်ကြပ်ကြီး ၁ ဦးရဲ့ သမီး ဖြစ်သူ အသက် ၂၀ ဝန်းကျင်အရွယ် အမျိုးသမီးနဲ့ အတူတကွပေါင်းသင်းနေထိုင်ပြီးနောက် ကိုယ်ဝန်ရရှိလာတဲ့အပေါ်မိဘဖြစ်သူတပ်ကြပ်ကြီးက ကပစ ၇ စက်ရုံမှူးမှတဆင့် နေပြည်တော်၊ ကာကွယ်ရေးပစ္စည်းထုတ်လုပ်ရေးအရာရှိချုပ်ရုံး (ကကထုတ်) ကို ပြီးခဲ့တဲ့မေလအတွင်းက လိပ်မူတိုင်ကြားခဲ့လို့ စုံစမ်းစစ်ဆေးရေးခုံရုံးဖွဲ့ စစ်ဆေးခံနေရတာလို့ ဆိုပါတယ်။

“ကောင်မလေး ကိုယ်ဝန်ရှိသွားတာကို သူ့မိဘတွေမေးမြန်းတော့မှ သူ(ဗိုလ်မှူး စိုပြေလင်း)နဲ့ဖြစ်တယ်ဆိုတာ သိပြီးပြသနာတက်ကြတာ။ ဖြစ်ကာစက မတိုင်ဖို့ ညှိနှိုင်းသေးတယ်။ ပြည် ဒကစ ကလည်း ကြားထဲက ဝင်ညှိပေးသေးတယ်။ ကောင်မလေးကို တာဝန်မယူနိုင်တာမျိုးနဲ့ ဘလိုညှိမရလဲတော့မသိဘူး။ နောက်ဆုံးကောင်မလေးမိဘတွေက တိုင်လိုက်တာ” လို့ ကပစ ၇ နဲ့ နီးစပ်တဲ့သတင်းရင်းမြစ်တဦးက မြေလတ်အသံကိုပြောပါတယ်။

ဗိုလ်မှူး စိုပြေလင်း ဟာ မိန်းမရှုပ်ပွေသူတဦးဖြစ်ပြီး ပြည်မြို့ ပြည်-အောင်လံကားလမ်းမဘေး ဘုရားကြီးဆည်မြောင်းရုံးရှေ့က မင်္ဂလာဂါးဒင်းဟိုတယ်ကို ကောင်မလေးအများအပြားနဲ့ မကြာခဏဆိုသလို လာရောက်ပေါင်းသင်းနေထိုင်တယ်လို့ သူနဲ့ရင်းနှီးမှုရှိတဲ့ စီးပွားရေးလုပ်ငန်းရှင်အသိုင်းအဝိုင်း သတင်းရင်းမြစ်တဦးက ပြောပါတယ်။

“သူ(စိုပြေလင်း)က မိန်းမတအားရှုပ်တယ်။ ကောင်မလေးတွေအများကြီးနဲ့ မင်္ဂလာဂါးဒင်းမှာ မကြာခဏလာအိပ်တယ်။ ညအိပ်ရော အချိန်ပိုင်းရောလာနေတာ။ ရန်ကုန်ကလာတဲ့ မိန်းကလေးတွေနဲ့လာတာလည်း ရှိတယ်။ တလကို မိန်းကလေး ၁၀ ယောက်လောက်လဲပြီးလာနေတယ်” လို့ ဆိုပါတယ်။

ပြည်မြို့နယ်စစ်ကောင်စီအဖွဲ့ဝင်ဖြစ်တဲ့ ဗိုလ်မှူး စိုပြေလင်းဟာ ပြည်မြို့ စီးပွားရေးလုပ်ငန်းရှင်အသိုင်းအဝိုင်းမှာလည်း ပေါက်ရောက်သူဖြစ်ပြီး ဒေသကွပ်ကဲမှုစစ်ဌာနချုပ်(ပြည်)၊ ဒကစမှူး ဗိုလ်မှူးချုပ် အောင်နိုင်ဦး က သဘောကျသူတဦးဖြစ်တယ်လို့ သိရပါတယ်။

လက်ရှိမှာ ဗိုလ်မှူး စိုပြေလင်းကို နေပြည်တော် ကို ခေါ်ယူစစ်ဆေးနေတယ်လို့သိရပြီး သက်သေခံကောက်နှုတ်ချက်ရယူတာတွေလုပ်ဆောင်ဖို့ ခေါ်ယူတာဖြစ်နိုင်တယ်လို့ တပ်သတင်းရင်းမြစ်တဦးက ပြောပါတယ်။

“တိုင်တာက နေပြည်တော် ကကထုတ်(ကာကွယ်ရေးပစ္စည်းထုတ်လုပ်ရေးအရာရှိချုပ်ရုံး) ကို တိုင်တာဆိုတော့ ကကထုတ်က တိုက်ရိုက်ကိုင်ဖို့ နေပြည်တော်ကို ပို့လိုက်တာလား။ အမှုအတွက်သက်ကောက်(သက်သေခံကောက်နှုတ်ချက်) ယူဖို့ခေါ်သွားတာလားတော့ မသိဘူး” လို့ ဆိုပါတယ်။

မိန်းမမှုနဲ့ ဖမ်းဆီးစစ်ဆေးခံနေရတဲ့ ဗိုလ်မှူး စိုပြေလင်း ရဲ့ ပြည်မြို့နယ်စီမံအုပ်ချုပ်ရေးအဖွဲ့ဝင် ၁ လစ်လပ်နေရာကို ကပစ ၇ က ဗိုလ်မှူး ဝေဖြိုးအောင် ဆိုသူ အစားထိုးခန့်အပ်ထားတယ်လို့ ပြည်မြို့စစ်ကောင်စီအသိုင်းအဝိုင်းထံက သိရပါတယ်။