MLAT

ပဲခူး၊‌ မတ် ၂၉၊ ၂၀၂၂။

ပဲခူးတိုင်း ပြည်မြို့နယ် တမ္မကောက်အုပ်စု တီတွတ်စံပြရွာက တိုင်းဒေသကြီးလွှတ်တော်ကိုယ်စားလှယ် အမှတ်(၁) ဦးသက်ဝင်းလှိုင်ရဲ့ နေအိမ်ကို စစ်ကောင်စီက ဒီနေ့ ညနေပိုင်းမှာ ချိတ်ပိတ်သွားခဲ့တယ်လို့ သိရပါတယ်။

ချိတ်ပိတ်ခံရတဲ့ လွှတ်တော်ကိုယ်စားလှယ်ဟာ ပြီးခဲ့တဲ့ နှစ် မေလ ၃ရက်က တော်လှန်‌ရေးလုပ်ငန်းဆောင်ရွက်နေစဥ် မတော်တဆမှုတခုကြောင့် ကျဆုံးသွားခဲ့သူဖြစ်ပြီး ဒီနေ့မှာ နေအိမ်ကို စစ်ကောင်စီက ချိတ်ပိတ်လိုက်တာကြောင့် ကျန်ခဲ့တဲ့ မိသားစုတွေဟာ အိမ်ငှားပြီး နေနေရတယ်လို့ ဒေသခံတဦးက ပြောပါတယ်။

” သူ့မိသားစုက လက်ရှိအိမ်ငှားပြီး နေနေရတယ် သားလေးရယ် သမီးလေးရယ် အမျိုးသမီးရယ်ပေါ့၊ သူတို့က အရမ်းကြောက်နေကြတယ်” လို့ ‌မိသားစုနီးစပ်သူ တဦးက ပြောပါတယ်။

ဥပဒေမဲ့ အာဏာသိမ်းပြီး ဥပဒေမဲ့ လုပ်ရပ်တွေကို လုပ်နေတဲ့ စစ်ကောင်စီကိုတော့ ပြောစရာ စကားမရှိပေမယ့် ကျန်နေခဲ့တဲ့ မိသားစုအတွက် ဒီလုပ်ရပ်ဟာ လူမဆန်တဲ့ လုပ်ရပ်တခုဖြစ်တယ်လို့ လုပ်ဖော်ကိုင်ဖက် သူငယ်ချင်းဖြစ်သူ လွှတ်တော်ကိုယ်စားလှယ် ဦးကျော်ဇေယျက ပြောပါတယ်။

” ဖခင်တယောက် ‌သေဆုံးထားလို့ ပူဆွေးသောကရောက်နေရတဲ့ သားသမီးတွေနဲ့ ခင်ပွန်းကို ဆုံးရှုံးထားလို့ သောကရောက်နေရတဲ့ ဇနီးသည်တွေ အတွက်ကို တော်တော်လူမဆန်တဲ့ လုပ်ရပ်ပေါ့ “လို့ ပြောပါတယ်။

ပြီးခဲ့တဲ့ ရက်ပိုင်းအတွင်းကလည်း ပြည်မြို့ ခေတ္တရာမြို့သစ် ၁လမ်းထိပ်က မိုဘိုင်းကမ္ဘာ ဖုန်းဆိုင်ကိုလည်း စစ်ကောင်စီက ချိတ်ပိတ်ခဲ့ပြီး ကပိုင်ရှင်ဖြစ်သူကို ဖမ်းဆီးသွားခဲ့တယ်လို့ သိရပါတယ်။

မကွေး၊‌ မတ် ၂၉၊ ၂၀၂၂။

မကွေးတိုင်း၊ ရေစကြိုမြို့နယ်က ကံပွင့်ပလက်စတစ်စက်ရုံကို စစ်ကောင်စီနဲ့ ပျူစောထီးတွေကို အဓိက ကူညီထောက်ပံ့နေလို့ ဒီနေ့ နေ့လယ်ပိုင်းမှာ ဖောက်ခွဲပြီး မီးရှို့ခံလိုက်ရတယ်လို့ ဒေသခံတဦးဆီက သိရပါတယ်။

ရေစကြိုမြို့၊ ပေကုန်းတိုးချဲ့ ရပ်ကွက်မှာ ရှိတဲ့ ကံပွင့်လုပ်ငန်းရဲ့ ပလက်စတစ်စက်ရုံကို မတ်လ ၂၉ရက် ဒီနေ့ နေ့လယ် ၂နာရီလောက်က ကားတစီးနဲ့ PDF တဖွဲ့ရောက်လာပြီး ဖောက်ခွဲမီးရှို့ခဲ့တာဖြစ်တယ်လို့ ဒေသခံတဦးက ပြောပါတယ်။

” PDF က Light Truck ကားနဲ့လာပြီး အလုပ်သမားတွေအကုန်ထွက်ခိုင်းပြီး စက်ရုံဖောက်ခွဲပြီး မီးနဲ့ ရှို့ပစ်လိုက်တာ ၊ကံပွင့်ပိုင်ရှင်က ရှင်မတောင်ဆရာတော်၊ ပျူစောထီးအဖွဲ့ စစ်တပ် နဲ့ ဦးစိုးမောင်တို့ကိုအဓိကပံ့ပိုးသူဖြစ်နေတာ၊ တမြို့လုံးလည်းသိပါတယ်၊တနိုင်ငံလုံးလည်းသိတယ်၊ စစ်တပ်ဆိုရင် ကံပွင့်ပိုင်ရှင်က ခါးပိုက်ဆောင်လိုထားတာ” လို့ အဲ့ဒီဒေသခံက ပြောပါတယ်။

အဲ့ဒီ စက်ရုံပိုင်ရှင်က ကံပွင့်ဆိုတဲ့ နာမည်နဲ့ လုပ်ငန်းပေါင်းစုံရှိပြီး ဆေးခန်းတခုလည်း ဖွင့်ထားပြီး ဆရာဝန်တွေကိုလည်း ဖိနှိမ့်တာမျိုးတွေရှိတယ်လို့ ‌သိရပါတယ်။

” သူဖမ်းချင်တဲ့ CDM လုပ်တဲ့လူတွေ သူ့ဆေးခန်းမလာတဲ့သူတွေဆိုရင် တခါထဲသွားဖမ်းခိုင်းတာ၊သူနဲ့မပြေလည်တဲ့သူမှန်သမျှစစ်တပ်ကိုလက်တို့လိုက်ရင် အကုန်လိုက်ဖမ်းတာ၊အဲလိုလုပ်နိုင်အောင်လည်း စစ်တပ်ကလူမှန်သမျှကို ပံ့ပိုးတယ်၊ကားလိုချင်ကားပေးထားတာ၊နောက်ပြီးတော့ကင်းလှည့်တဲ့စစ်သားမှန်သမျှ အရက်သောက်ဖိုးဟာကို သူ့သား ဖိုးသွေးက အရက်ဆိုင်မှန်သမျှကို ဘေဖွင့်ပေးထားတာ” လို့ ဒေသခံတဦးက ပြောပါတယ်။

စစ်သားတွေနဲ့ ပျူစောထီးမှန်သမျှ ကင်းလှည့်ပြီးပြန်လာချိန်မှာ အဲ့ဒီဆိုင်တွေမှာ ဝင်သောက်ခွင့်ရှိပြီး ကုန်ကျစရိတ်အားလုံးကို ကံပွင့်လုပ်ငန်းပိုင်ရှင်တွေက ထောက်ပံ့ပေးနေတာ ဖြစ်လို့ PDF အဖွဲ့က လာရောက် ဖောက်ခွဲ မီးရှို့ခဲ့တာဖြစ်ပြီး မီးသတ်ကား ၄စီးနဲ့ ငြှိမ်းသတ်နေတယ်လို့ ပြောပါတယ်။

ကံပွင့်လုပ်ငန်းပိုင်ရှင် ဦးအောင်သန်းဟာ အရင်က ကြံ့ခိုင်းရေးပါတီရဲ့ အမျိုးသားလွတ်တော် ကိုယ်စားလှယ်ဟောင်းတဦးဖြစ်သလို လက်ရှိသားဖြစ်သူက စစ်ကောင်စီကို အဓိက ထောက်ပံ့နေသူဖြစ်တယ်လို့ နောက်ထပ် ဒေသခံတဦးကလည်း မြေလတ်အသံကို ပြောပါတယ်။

” သူ့သားက လာသမျှ စခတွေ တို့ ပျူတို့ကို လာသမျှဟာတွေကို ဒိုင်ခံ ဧည့်ပြုတာ ထောက်ပံ့တာ ၊ အဲ့တာကြောင့်မလို့ PDF ဝင်ပြီး ဆုံးမတာ ဒီနေ့ ဒီနေ့” လို့ အတည်ပြု ပြောပါတယ်။

အဲ့ဒီစက်ရုံဖောက်ခွဲမီးရှို့တာကို ဘယ် PDF က လုပ်တယ်ဆိုတာမျိုး မထုတ်ပြန်သေးသလို ဘယ်အဖွဲ့ဆိုတာလဲ မသိရသေးပဲ စစ်ကောင်စီကတော့ ရမ်းသမ်းပစ်ခတ်တာတွေ လုပ်နေတယ်လို့ ပြောပါတယ်။

ကံပွင့်အမွှေးတိုင်လုပ်ငန်းကို အဓိက လုပ်ဆောင်ပြီး ရေသန့်၊ ပလက်စတစ်နဲ့ ဆေးခန်းအပြင် ၄ထပ် ဆေးရုံကိုလည်းတိုးချဲ့ ဆောက်နေပြီး အဓိက စစ်ကောင်စီကို ထောက်ပံ့နေတဲ့ လုပ်ငန်းတခုဖြစ်တယ်လို့ ဒေသခံတွေဆီက သိရပါတယ်။

ပဲခူး၊‌ မတ် ၂၉၊ ၂၀၂၂။

ပဲခူးတိုင်းဒေသကြီး၊ ပြည်မြို့တွင် လမ်းလျှောက်သင်္ကြန်၊ ဗဟိုမဏ္ဍပ်နှင့်နာမည်ကြီးဖျော်ဖြေရေးမဏ္ဍပ် များပါ ထည့်သွင်းကျင်းပရန် စစ်ကောင်စီက ပြင်ဆင်လျှက်ရှိသည်။

စစ်ကောင်စီက ဗဟိုမဏ္ဍပ်ကို ပြည်မြို့ နာရီစင်နှင့် စာတိုက်တန်းလမ်းတွင်ပြုလုပ်မည်ဖြစ်ပြီး လမ်းလျှောက်သင်္ကြန်ကို ကမ်းနားလမ်း ဈေးကြီနှင့်တရုတ်ဘုံကျောင်းအထိ၊ ရေကစားမဏ္ဍပ်နှင့်ဖျော်ဖြေရေး အစီစဉ်များတွင်လည်း မြို့၏ နာမည်ကြီးဂိုဏ်းများဖြင့်ဖွဲ့စည်းထားသည့်အဖွဲ့များပါဝင်မည်ဖြစ်ကြောင်း မြို့ခံများက ပြောသည်။

” နာမည်ကြီးမဏ္ဍပ်တခုကတော့ ညဈေးတန်းမှာ ဆောက်ဖို့ ပြင်ဆင်နေတယ်။ လူကြီးသားသမီးတွေ၊ စစ်ထောက်ခံတဲ့သူတွေ လူမိုက်တွေ စီးပွားလုပ်ငန်းရှင်တွေရဲ့သားသမီးတချို့လည်းပါဝင်တဲ့အဖွဲ့ပေါ့။ ဗဟိုမဏ္ဍပ်ကတော့ စာတိုက်တန်းလမ်းကိုပိတ်ပြီး ဆောက်မယ်။”ဟု မြို့ခံတဦးကပြောသည်။

ဖြေဖျော်ရေးယိမ်းအဖွဲ့များအတွက်လည်း နယ်မြေအလိုက် အသက် ၁၃ နှစ်မှ ၁၆ နှစ်အထိ မိန်းကလေးငယ် ၂၀ ဦးစီရွေးချယ်ခိုင်းထားပြီး စာရင်းကောက်မှုများလည်း ပြုလုပ်နေပြီဖြစ်ကာ ရပ်ကွက်အားလုံးမဏ္ဍပ် ဆောက်လုပ်ရမည်ဖြစ်ကြောင်း ရပ်ကျေးအုပ်ချုပ်ရေးမှူးတဦးထံ ကသိရသည်။

“ယိမ်းတွေအတွက်လည်း အမျိုးသမီးငယ်တွေကို လိုက်ရွေးနေတယ်။ သူတို့လက်အောက်ခံအုပ်ကြီးတွေနဲ့ စစ်ထောက်ခံအစိမ်းတွေအများဆုံးပါတယ်” ဟု မြို့ခံတဦးကပြောသည်။

မဏ္ဍပ်ဆောက်လုပ်ရန်နှင့် ယိမ်းအဖွဲ့များအတွက် လောင်းကစားလုပ်ငန်းများနှင့် KTV၊ စားသောက်ဆိုင်များ စီးပွားရေးလုပ်ငန်းရှင်များထံက ငွေကြေးကောက်ခံမှုများပြုလုပ်နေပြီဖြစ်ကြောင်း မြို့ခံများကပြောသည်။

မကွေး၊‌ မတ် ၂၉၊ ၂၀၂၂။

မကွေးတိုင်း၊ ဆောမြို့နယ် ကျောက်ထုမြို့မှာ ရှိတဲ့ အမြောက်တပ်ကို PDF က ဝင်တိုက်မယ်ဆိုတဲ့ သတင်း တပ်တွင်းပြန့်နှံ့နေပြီး အဲ့ဒီအချိန်က စလို့ အမြောက်တပ်အတွင်းမှာ မနက်ရောညပါ ပဌာန်းရွတ်နေကြတယ်လို့ ဒေသခံတဦးဆီက သိရပါတယ်။

ပြီးခဲ့တဲ့ မတ်လ ၂၇ရက်က စပြီး မနက်စောစောနဲ့ ညပိုင်းတွေမှာ ရွတ်ဖတ်သံတွေကြားရပြီး ဒီနေ့အထိ ရွတ်ဖတ်နေကြဆဲ ဖြစ်တယ်လို့ အဲ့ဒီဒေသခံတဦးက ပြောပါတယ်။

” သူတို့ နေ့ရောညရော ပဌာန်းတွေရွတ်တယ်၊ တူးထားတဲ့ ကျင်းတွေထဲမှာ အမြဲတမ်းကင်းစောင့်တယ်၊ ပတ်ပတ်လည်မှာလည်း ကျင်းတွေတူးထားတာရှိတယ် ၊ ကျင်းတွေထဲမှာ အချိန်ပြည့်ကင်းစောင့်ပြီးတော့ PDF ကလာတိုက်မယ်ဆိုတဲ့ သတင်းမှားရပြီး သူတို့ဘက်က အမြဲတမ်း အဆင်သင့်ဆိုတဲ့ ပုံစံမျိုး” လို့ ဒေသခံတဦးက ပြောပါတယ်။

ပြီးခဲ့တဲ့ ဇန်နဝါရီလ ၁၇ရက်က ကျောက်ထုအမြောက်တပ်ကို PDF က လက်နက်ကြီးနဲ့ ၃ချက် စမ်းသပ်ပစ်ခတ်ခံခဲ့ရဖူးတဲ့ နေရာဖြစ်ပါတယ်။

စစ်ကိုင်း၊‌ မတ် ၂၈၊ ၂၀၂၂။

စစ်ကိုင်းတိုင်း၊ မြောင်မြို့နယ်အတွင်း မတ်လ ၂၇ ရက် မနေ့ကညနေပိုင်းမှာ စစ်ကောင်စီတပ်ဖွဲ့ဝင်တွေစီးလာတဲ့ ကားတစီး မိုင်းဆွဲတိုက်ခိုက် ခံခဲ့ရပါတယ်။

မြောင်မြို့ကနေထွက်လာတဲ့ အဲ့ဒီကားကို မြောင်မြို့တောင်ဘက်အထွက် ဆီဆိုင် ၂ ဆိုင်ကြားမှာ PDF သုံးဖွဲ့က ဆီးကြိုပြီး ပဒေသာမိုင်းနဲ့တိုက်ခိုက်ခဲ့တာလို့ မြောင်မြို့နယ်တော်လှန်ရေးတပ် – MRA တာဝန်ခံက ပြောပါတယ်။

“ ကျနော်တို့မိုင်းဆွဲတိုက်ခိုက်လိုက်တာပါ၊ မြောင်မြို့တောင်ဘက်အထွက် ဆီဆိုင် ၂ ဆိုင်ကြားထဲမှာ မိုင်းခွဲတိုက်ခိုက်လိုက်တာပါ၊ သူတို့က မြောင်ကနေ တောင်ဘက်ထွက်အလာ ညနေ ၄ နာရီလောက်မှာ ကျနော်တို့ တိုက်ခိုက်လိုက်တာပါ၊” လို့ သူကပြောပါတယ်။

တိုက်ခိုက်လိုက်တဲ့အချိန်မှာ ကားမှန်တွေလည်းကြေမွသွားပြီး၊ ကားထဲလိုက်ပါလာတဲ့ စစ်ကောင်စီတပ်ဖွဲ့ဝင် ၂ ဦးလည်း သေဆုံးခဲ့တယ်လို့ MRA တာဝန်ခံက ဆက်ပြောပြပါတယ်။

ဒီတိုက်ခိုက်မှုကို မြောင်မြို့နယ်တော်လှန်ရေးတပ် – MRA ၊ စစ်ကိုင်းခရိုင်တပ်ရင်း ၁ အရန်တပ်ခွဲ ၁ နဲ့ Zarmani Revolution Force ပြောက်ကျားတပ်ဖွဲ့တို့က ပူးပေါင်းတိုက်ခိုက်တာလို့ MRA ရဲ့ ထုတ်ပြန်ချက်မှာ ဆိုထားပါတယ်။

ဒါ့အပြင် မြောင်မြို့နယ်အတွင်း ပြောက်ကျားစစ်ဆင်ရေးတွေကို အရှိန်အဟုန်မြင့်လုပ်ဆောင်နေပြီး၊ အဲ့လိုလုပ်ဆောင်ရာမှာလည်း ပြည်သူတွေကို အထိအခိုက်မရှိအောင် ဂရုတစိုက်ဆောင်ရွက်နေတာဖြစ်သလို ပြည်သူတွေအနေနဲ့ကတော့ စစ်ကောင်စီတပ်တွေရဲ့ လှုပ်ရှားမှုတွေကို သတိကြီးကြီးထားပြီး ဂရုတစိုက်သွားလာကြဖို့ MRA က သတိပေး ပြောကြားထားပါသေးတယ်။

ဒီဖြစ်စဥ်မတိုင်ခင် ပြီးခဲ့တဲ့ မတ်လ ၂၄ ရက် ညပိုင်းမှာလည်း မြင်းမူမြို့နယ်အတွင်း ပတ်ကင်းလှည့်နေတဲ့ စစ်ကောင်စီအင်အား ၄၀ ကျော်ကို MRA အပါအဝင် မဟာမိတ် ၄ ဖွဲ့က မိုင်းဆွဲတိုက်ခိုက်ခဲ့တာကြောင့် စစ်သား ၂ ဦးသေဆုံးပြီး၊ ၈ ဦး ဒဏ်ရာပြင်းထန်ရရှိခဲ့တယ်လို့ မြေပြင်တိုက်ခိုက်သူ ရဲဘော်တွေရဲ့ပြောဆိုချက်အရ သိရပါတယ်။

မကွေး၊‌ မတ် ၂၇၊ ၂၀၂၂။

မကွေးတိုင်း၊ ရေစကြိုမြို့ ၂၅၈ တပ်ရင်းက ပစ်လိုက်တဲ့ လက်နက်ကြီးထိမှန်ခဲ့တာကြောင့် ၉ နှစ်အရွယ်ကလေးငယ်အပါအဝင် သားအဖနှစ်ဦးသေဆုံးခဲ့ပြီး၊ မိခင်ဖြစ်သူ ကိုယ်ဝန်ဆောင်အမျိုးသမီးလည်း ဆေးရုံတင်ထားရတယ်လို့ ဒေသခံတွေဆီက သိရပါတယ်။

မတ်လ ၂၆ ရက်မနေ့က ည ၁၁ နာရီလောက်မှာ စစ်ကောင်စီပစ်လိုက်တဲ့ လက်နက်ကြီးကျည်က ရေစကြိုမြို့နယ်၊ ညောင်တောကျေးရွာအုပ်စု၊ ကူတုတ်ကျေးရွာက နေအိမ်တလုံးပေါ်ကျရောက်ခဲ့ပြီး၊ အဲ့ဒီအိမ်က အသက် ၅၀ အရွယ် ဦးမန်းကျော်နဲ့ ၉ နှစ်အရွယ် မောင်ဖိုးသင်္ကြန်တို့ သားအဖ ၂ ဦ:စလုံး နေရာမှာတင် ပွဲချင်းပြီးသေဆုံးခဲ့တာလို့ ဒေသခံတဦးကပြောပါတယ်။

“၂၅၈ တပ်က မနေ့ညကလက်နက်ကြီးနဲ့ရမ်းသမ်းပစ်တာ၊ ကူတုပ်ရွာကအိမ်ပေါ်ကို လက်နက်ကြီးကျည်ကျပြီး ကိုမန်းကျော် အသက် ၅၀ ဖိုးသင်္ကြန် ၉ နှစ် သားအဖ ၂ ယောက်စလုံးပွဲချင်းသေတယ်။ မိန်းမ မညိုက ကိုယ်ဝန် ၄ လနဲ့ စိုးရိမ်ဒဏ်ရာရပြီး ရေစကြိုဆေးရုံမှာတင်ထားရတယ်။ ည ၁၁ နာရီဝန်းကျင်က လှမ်းပစ်တာ” လို့ သူကပြောပါတယ်။

လက်နက်ကြီးနဲ့ ၃ ချက်ပစ်ခတ်ခဲ့ပြီး၊ ခုလိုပစ်ခတ်တာဟာ တိုက်ပွဲဖြစ်တာမဟုတ်ပဲ PDF တွေ ရှိတယ်အထင်နဲ့ ရေစကြိုမြို့အခြေက ကျေးရွာတွေကို ပစ်ခတ်ခဲ့တာလို့ ဒေသခံတွေဆီက သိရပါတယ်။

နိုင်ငံရေးအကျဥ်းသားများ ကူညီစောင့်ရှောက်ရေးအဖွဲ့ – AAPP ထုတ်ပြန်ချက်အရ ၂၀၂၁ ခုနှစ် ဖေဖော်ဝါရီ ၁ ရက်ကနေ ၂၀၂၂ ခုနှစ် မတ်လ ၂၅ ရက်ထိ စစ်တပ်ရဲ့လက်ချက်နဲ့ သေဆုံးသူ စုစုပေါင်း ၁၇၀၇ ဦးရှိပြီလို့ ဆိုထားပေမယ့် လက်ရှိမြေပြင်မှာတော့ ဒီထက်ပိုပြီးများနိုင်ပါတယ်။

စစ်ကိုင်း၊ မတ် ၂၆၊ ၂၀၂၂။

စစ်ကိုင်းတိုင်း၊ ကလေးမြို့မှာ မတ်လ ၂၅ ရက်မနေ့က CDM လှုပ်ရှားမှုပါဝင်တဲ့အလယ်တန်းပြ ကျောင်းဆရာမတဦးကို စစ်ကောင်စီက ဖမ်းဆီးသွားတယ်လို့ ဒေသခံတွေဆီက သိရပါတယ်။

အောင်သစ္စာရပ်ကွက် အမှတ် ၂ အလယ်တန်းကျောင်းခွဲ မှာ တာ ဝန်ထမ်းဆောင်ခဲ့တဲ့ အသက် ၅၅ နှစ်အရွယ် အလယ်တန်းပြဆရာမ ဒေါ်အေးမွန်ဖြစ်ပြီး၊ မနေ့က ညနေ ၅ နာရီလောက်မှာ အဲ့ဒီကျောင်းအနီးက သူနေတဲ့နေရာမှာပဲ အဖမ်းခံလိုက်ရတာလို့ ဒေသခံတဦးက ပြောပါတယ်။

“မနေ့ကညနေ ၅ နာရီလောက်က ဖမ်းသွားတာ၊ သတင်းပေး အတိအကျရှိလို့ ဖြစ်မယ်၊ အင်အားက ကား ၄ စီးနဲ့လာတာ၊ အမျိုးသမီးတွေရောပါတယ်” လို့ သူကပြောပါတယ်။

ဆရာမ ဒေါ်အေးမွန်ဟာ အခြားဒေသကနေ တာဝန်အရ အောင်သစ္စာရပ်ကွက်အမှတ် ၂ အလယ်တန်းကျောင်းခွဲအနီးက အဆောင်မှာ အာဏာမသိမ်းခင်ကတည်းက နေထိုင်နေတာလို့ သိရပြီး၊ သူ့ကို စစ်ကောင်စီက ဒေသကွပ်ကဲမှုစစ်ဌာနချုပ် – ဒကစ ( ကလေး) ကို ဖမ်းဆီး ခေါ်ဆောင်သွား တယ်လို့လည်း ဒေသခံတဦးက ဆက်ပြောပါတယ်။

ဒီဖြစ်စဥ်နဲ့ ပတ်သက်တဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲပါ။ စစ်တပ်ကအာဏာသိမ်းလိုက်တဲ့အချိန်ကစပြီး လက်ရှိအချိန်ထိ ကလေးမြို့အတွင်းက စစ်ကောင်စီရဲ့ဖမ်းဆီးခံထားရသူ ၄၀၀ ကျော်ရှိတယ်လို့လည်း ကလေးမြို့ပင်မသပိတ်အင်အားစု တာဝန်ခံက မြေလတ်အသံကို ပြောပါတယ်။