ခင်နှင်းဖြူစိုး

မကွေး၊ ဖေဖော်ဝါရီ ၁၇၊ ၂၀၂၃။

မကွေးတိုင်း၊ ချောက်မြို့နယ်အတွင်းမှာ အမည်မသိအမျိုးသားတဦးက ချောက်မြို့နယ် ပြောက်ကျားတပ်ဖွဲ့ အဖွဲ့အမည်သုံးပြီး လုပ်ငန်းရှင် အချို့နဲ့ ပြည်သူတွေဆီကနေ ငွေလိမ်တောင်းခံ‌နေမှုတွေ ပြုလုပ်နေတယ်လို့ သိရပါတယ်။

ဖေဖော်ဝါရီ လဆန်းကစပြီး အမျိုးသားတဦးက CGF ပြောက်ကျားအဖွဲ့အမည်ကို အသုံးချကာ ချောက်မြို့နယ်အတွင်းက လုပ်ငန်းရှင်အချို့ကို အလှူခံတာတွေ၊ ခြိမ်းခြောက်ငွေ တောင်းခံတာတွေ ပြုလုပ်နေတာကြောင့် မနေ့က ဖေဖော်ဝါရီလ ၁၆ ရက်နေ့မှာ စာထုတ်ပြီး စုံစမ်းစစ်ဆေးမှုတွေ လုပ်နေတယ်လို့ ချောက်မြို့နယ်ပြောက်ကျားတပ်ဖွဲ့ C.G.F တာဝန်ရှိသူတဦးက ပြောပါတယ်။

“ကျနော်တို့အဖွဲ့နာမည်ကို အလွဲသုံးစားလုပ်ပြီး ငွေတောင်းနေတာ၊ တောက်လျှောက် အဲ့လိုတွေ လုပ်တယ်လို့ ကြားရတယ်ဗျ။ တချို့ကို အလှူခံတယ်။ တချို့လုပ်ငန်းရှင်တွေကို ခြိမ်းခြောက်ပြီး ငွေတောင်းတယ်။ တယ်လီနောနဲ့ လိုက်ဆက်တာ ပြီးရင် ကဒ်ပိတ်လိုက်တယ်။ အသံအရတော့ အရွယ်က လူငယ်ပိုင်းထဲကပဲ” လို့ သူက ဆက်ပြောပါတယ်။

CGF ပြောက်ကျားတပ်ဖွဲ့အနေနဲ့ ငွေလိမ်လည်တောင်းခံမှု ပြုလုပ်နေသူတွေကို စုံစမ်းနေပြီး ခုလိုလုပ်ဆောင်တာမျိုး မိမိတို့အဖွဲ့အနေနဲ့ လုပ်မှာမဟုတ်သလို အလှူငွေတွေကို မတရားတောင်းခံတာ၊ ခြိမ်းခြောက်တာမျိုးလုပ်ပြီး လိမ်လည်နေသူတွေကို စုံစမ်းဖော်ထုတ် အရေးယူသွားမယ်လို့ ဆိုပါတယ်။

ဒါ့အပြင် လက်ရှိမှာလည်း စစ်ကိုင်းတိုင်း၊ မကွေးတိုင်းမြို့နယ် အချို့မှာ ဒေသခံပြည်သူတွေကို PDF ထောက်ပံ့နေတယ်ဆိုပြီး ဆက်သွယ်ခြိမ်းခြောက် ငွေညှစ်တာတွေများလာတာကြောင့် ပြည်သူတွေ သတိထားကြဖို့ ထည့်သွင်းပြောထားပါတယ်။

စစ်ကိုင်း၊ ဖေဖော်ဝါရီ ၁၃၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကျွန်းလှမြို့နယ်က ဒေသခံတွေ၊ ကျွန်းလှမြို့နယ် အထွေထွေသပိတ်ကော်မတီ၊ CDM ဝန်ထမ်းတွေနဲ့အတူ ပြည်သူ့ကာကွယ်ရေးရဲဘော်တွေ ပူးပေါင်းပြီး ဒီနေ့ဖေဖော်ဝါရီလ ၁၃ ရက်မှာစစ်ကောင်စီကို ဆန့်ကျင်ကြောင်း စုပေါင်းဆန္ဒပြခဲ့ပါတယ်။

“ဒီနေ့ ဖေဖော်ဝါရီလ ၁၃ ရက်နေ့မှာကျရောက်တဲ့ ဗိုလ်ချုပ်မွေးနေ့အထိမ်းအမှတ်အဖြစ် ကျွန်းလှမြို့ သဖန်း ဆိပ်ဆည်အနောက်ခြမ်း ပြောင်သွယ်ချောင်းရိုးတလျှောက် ကျေးရွာတွေစုပေါင်းပြီး စစ်အာဏာရှင်ဆန့်ကျင်ရေးသပိတ် ပြုလုပ်ခဲ့သလို လူထုစည်းရုံးရေးဟောပြောပွဲတွေပါ ပြုလုပ်ခဲ့တာပါ။ အင်အား ၂၀၀ နီးပါးလောက်ရှိတယ်”လို့ သပိတ်အဖွဲ့ဝင်ဒေသခံတဦးက ပြောပါတယ်။

“ဆောင်းကျွတ်ပေမယ့် ဒေါင်းခွပ်တာရပ်မသွားဘူး၊ အောင်လံလွှင့်ဖို့ ပြင်ထားကြ ” “ဖက်စစ်ရွေးကောက်ပွဲသပိတ်မှောက်၊ ဖက်ဒရယ်လမ်းကို ရဲရဲလျှောက် “ အစရှိတဲ့ စာတန်းတွေကို ကိုင်ဆောင်ပြီး ချီတက်ဆန္ဒပြခဲ့ကြတာပါ။

ချီတက်ဆန္ဒပြပြီးနောက် သပိတ်ကော်မတီအဖွဲ့ဝင်၊ CDM ပြည်သူ့ဝန်ထမ်းတွေက ဗိုလ်ချုပ်အောင်ဆန်းနဲ့ ပတ်သက်တဲ့အကြောင်းအရာတွေ တော်လှန်ရေးနဲ့နိုင်ငံရေးသဘောတရားတွေကို စုပေါင်းဟောပြော တာတွေ ပြုလုပ်ခဲ့တယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၃၊ ၂၀၂၃။

စစ်ကိုင်းတိုင်း၊ ဒီပဲယင်းမြို့နယ်မှာ ဒီနေ့ ဖေဖော်ဝါရီလ ၁၃ ရက်နေ့ မနက်ပိုင်းမှာ ပင်လုံစာချုပ်ချုပ်ဆိုတဲ့နေ့ အထိမ်းအမှတ်အဖြစ် ကျေးရွာ ငါးရွာက ဒေသခံတွေစုပေါင်းပြီး ကျေးလက်လူထု ဆိုင်ကယ်သပိတ် စစ်ကြောင်းနဲ့ ချီတက်ဆန္ဒပြခဲ့ကြတယ်လို့ သိရပါတယ်။

“ကျနော်အနေနဲ့ ဒီပင်လုံစာချုပ်ချုပ်ဆိုခဲ့တဲ့နေ့ကို ‘ပြည်ထောင်စုနေ့’ လို့ သတ်မှတ်ခဲ့ပေမယ့် လွတ်လပ်ရေးရပြီးချိန်က စ တွက်ကြည့်ရင် ပြည်ထောင်စုဆိုတာမျိူးကို ဘယ်ပြည်သူကမှ ပြည့်ပြည့်ဝဝ ခံစားသိရှိခဲ့ကြတာ မဟုတ်ဘူး။ ပါးစပ်ဖျားပေါ်မှာသာ ရှိခဲ့တဲ့ ပြည်ထောင်စုမျိုး ဖြစ်ခဲ့ပါတယ်။ အခု နွေဦးတော်လှန်ရေးက အစပြုပြီး တကယ့်စစ်မှန်တဲ့ ပြည်ထောင်စုမျိုးကို ရည်ရွယ်ပြီး ဖက်ဒရယ်ဒီမိုကရေစီ နိုင်ငံတော်ကို အားမလျှော့၊ နောက်မဆုတ်ဘဲ အဆုံးသတ်ထိ နိုင်သမျှ တာဝန်ကိုယ်စီ ထမ်းဆောင်သွားကြမှာပါ” လို့ သပိတ်ကော်မတီဝင်တဦးက ပြောပါတယ်။

ဒေသခံစုစုပေါင်းအင်အား ရာကျော်နဲ့ “ပြည်ထောင်စုဆိုတာ ဘာလဲ” “ပြည်ထောင်စုဆိုတာ တကယ်ရှိခဲ့သလား” အစရှိတဲ့စာသားတွေ ကိုင်ဆောင်ပြီး စစ်အာဏာရှင်စနစ်နဲ့ အတုအယောင် ပြည်ထောင်စု အလိုမရှိကြောင်း ဆန္ဒထုတ်ဖော်ခဲ့ကြတာပါ။

စစ်ကိုင်း၊ ဖေဖော်ဝါရီ ၁၁၊ ၂၀၂၃။

စစ်အုပ်ချုပ်ရေး ကြေညာထားတဲ့ စစ်ကိုင်းတိုင်းထဲက မြို့နယ်တွေမှာ စစ်ကောင်စီက ပြီးခဲ့တဲ့ ဖေဖော်ဝါရီလ ၄ ရက်နောက်ပိုင်းကစပြီး ညနေ ၆ နာရီကနေ နောက်တနေ့မနက် ၆ နာရီအထိ အပြင်မထွက်ရ အမိန့်ထုတ်ပြန်လိုက်တာကြောင့် ဒေသခံတွေ အခက်အခဲဖြစ်နေတယ်လို့ သိရပါတယ်။

စစ်ကိုင်းတိုင်းထဲက အင်းတော်၊ ဗန်းမောက်၊ ကောလင်း၊ ပင်လယ်ဘူး၊ မြောင်၊ ဆားလင်းကြီး၊ ပုလဲ၊ ယင်းမာပင်၊ ခင်ဦး၊ တန့်ဆည်နဲ့ ရေဦးမြို့နယ်တွေမှာ စစ်အုပ်ချုပ်ရေးအပြင် အခုလိုညမထွက်ရအမိန့်ပါ ထပ်တိုးထုတ်ပြန်ထားတာလည်း ဖြစ်ပါတယ်။

“စစ်အုပ်ချုပ်ရေး ကြေညာချက်နဲ့အတူ ခု ညမထွက်ရဆိုပြီး တင်းကျပ်မှုတွေ လုပ်လာတာပါ။ ဒေသခံတွေမှာ တနေ့တနေ့ထိတွေ့တိုက်ပွဲတွေ မီးလောင် ဆုံးရှုံးတာတွေအပြင် ခုဆို ညရေးညတာတောင် သွားမရထွက်မရဖြစ်နေပြီ။ သူတို့က စစ်ကိုင်းကို ရည်ရွယ်ချက်ရှိရှိ တင်းကျပ်မှုတွေလုပ်နေတာ” လို့ ခင်ဦး PDF တာဝန်ရှိသူတဦးက ပြောပါတယ်။

ဒေသကာကွယ်ရေးတပ်တွေနဲ့ စစ်ကောင်စီတပ်ဖွဲ့တွေကြား တိုက်ပွဲ ပြင်းထန်နေတဲ့ စစ်ကိုင်းတိုင်း၊ မကွေးတိုင်း၊ တနင်္သာရီတိုင်း၊ ပဲခူးတိုင်း၊ ချင်းပြည်နယ်၊ မွန်ပြည်နယ်၊ ကရင်ပြည်နယ် နဲ့ ကယားပြည်နယ်ထဲက မြို့နယ် ၃၇ မြို့နယ်ကို ၂၀၂၃ ခုနှစ်၊ ဖေဖော်ဝါရီလ ၂ ရက်ကစပြီး စစ်ကောင်စီက စစ်အုပ်ချုပ်ရေး ကြေညာလိုက်တာပါ။

“ကျနော်တို့ဆီမှာတော့ နေ့တိုင်းနီးပါး ထိတွေ့တိုက်ပွဲ ဖြစ်နေတုန်းပဲ။ အရေးအကြောင်းဆို ညအချိန်တွေလည်း ထပြေးနေရတုန်းပဲ။ ခုက စစ်အုပ်ချုပ်ရေးတွေ ညမထွက်ရတွေ လုပ်ထားတော့ ဘာတွေဆက်ဖြစ်မလဲကို မသိတော့ဘူး။ စစ်*တွေကြောင့် ဒေသခံတွေပဲ အမြဲအခက်အခဲ ဖြစ်နေရတာ” လို့ စစ်ကိုင်းတိုင်းအတွင်းက ဒေသခံတဦးက ဆိုပါတယ်။

အလားတူ စစ်ကိုင်းတိုင်း အပါအဝင် မကွေးတိုင်း၊ ချင်းပြည်နယ်တို့က မြို့နယ် ပေါင်း ၂၀ ကျော်မှာလည်း ဖေဖော်ဝါရီလ ၄ ရက် နောက်ပိုင်းကစပြီး စစ်ကောင်စီက ညနေ ၆ နာရီကနေ နောက်တနေ့ မနက် ၆ နာရီအထိ ညမထွက်ရအမိန့်ကို ထုတ်ပြန်ထားတယ်လို့ သိရပါတယ်။

မုံရွာ၊ ဖေဖော်ဝါရီ ၉၊ ၂၀၂၃။

မုံရွာလူထုသပိတ်တိုက်ပွဲ ဦးဆောင်ကော်မတီ ဖွဲ့စည်းခြင်း ၂ နှစ်ပြည့်အဖြစ် မုံရွာမြို့အဝင် မုဒ်ဦးရှေ့မှာ ဒီနေ့ဖေဖော်ဝါရီ ၉ ရက် မနက်ပိုင်းမှာ အင်အားအများအပြားနဲ့ စစ်အာဏာရှင်ဆန့်ကျင်ရေးအတွက် ချီတက်ဆန္ဒပြခဲ့ကြပါတယ်။

“ဒီကနေ့ဟာ ကျနော်တို့ မုံရွာလူထုသပိတ်တိုက်ပွဲ ဦးဆောင်ကော်မတီ ဖွဲ့စည်းခြင်း ၂ နှစ်ပြည့်မြောက်တဲ့နေ့ ဖြစ်ပါတယ်။ ဒီနေ့ ကျရောက်တဲ့ ၂ နှစ်ပြည့် အထိမ်းမှတ်အနေနဲ့ မုံရွာမြို့လမ်းမထက်ကို ချီတက်ပြီး “(၂)နှစ်ပြည့်မှသည် ရှေ့သို့ချီ စုပေါင်းအားနှင့် ရုန်းကြမည်” ဆိုတဲ့ စာသားနဲ့အတူ လူထုသပိတ်စစ်ကြောင်း ချီတက်ခဲ့ကြတာပါ” လို့ သပိတ်ကော်မတီဝင်တဦးက ပြောပါတယ်။

အဆိုပါသပိတ်စစ်ကြောင်းအတွင်း စစ်အာဏာရှင်ဆန့်ကျင်ရေး လူထုကြွေးကြော်သံတွေ ဟစ်ကြွေးပြီး လမ်းမတလျောက် ချီတက်သပိတ်မှောက်ခဲ့ကြသလို ၂ နှစ်တာကာလအတွင်း ဖက်ဒရယ်ဒီမိုကရေစီရေးအတွက် အသက်ပေးခဲ့ရသူတွေ၊ မတရားဖမ်းဆီးခံထားရတဲ့ ရဲဘော်တွေနဲ့အတူ၊ မလွတ်မြောက်သေးတဲ့ သူတွေအတွက် ဖက်ဒရယ်ဒီမိုကရေစီပြည်ထောင်စုအတွက် ဆက်လက်တိုက်ပွဲဝင်သွားမယ်လို့ ဆိုပါတယ်။

၂ နှစ်တာကာလအတွင်း ပြည်သူလူထုနဲ့အတူ တသားတည်း ရပ်တည်ကာ လူထုလုပ်ရှားမှုတွေ အားကောင်းလာစေဖို့နဲ့အတူ ဖက်ဒရယ်ဒီမိုကရေစီ နိုင်ငံသစ်မျှော်ရည်မှန်းချက်တို့အတွက် ပြည်သူတွေ ပါဝင်လာနိုင်ရေးတို့ကို တစိုက်မတ်မတ် ကြိုး‌စားဆောင်ရွက်ခဲ့ပြီး စစ်အာဏာရှင်စနစ်ဆိုးကို ဆန့်ကျင်တော်လှန်လျက် ရှိသလို ပြည်သူတွေနဲ့အတူ တသားတည်း ရပ်တည်ကာ အတူချီတက် တိုက်ပွဲဝင်သွားမည် ဖြစ်ကြောင်း ချီတက်ဆန္ဒပြခဲ့ကြတာပါ။

‌မြေလတ်အသံ၊ ဖေဖော်ဝါရီ ၈၊ ၂၀၂၃။

တစ်နိုင်ငံလုံးအတိုင်းအတာနဲ့ လူဦးရေစာရင်း အချက်အလက်တွေကို ကောက်ယူခဲ့ရာမှာ ရည်မှန်းထားတဲ့ အိမ်ထောင်စုရဲ့ ၈၆ ဒဿမ ၇ ရာခိုင်နှုန်းအထိ ကောက်ယူနိုင်ခဲ့တယ်လို့ စစ်ကောင်စီလက်အောက်ခံ လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးဌာနက မနေ့က ဖေဖော်ဝါရီလ ၇ ရက်နေ့က ထုတ်ပြန်ကြေညာခဲ့ပါတယ်။

စာရင်းကောက်ယူမှုကို ဇန်နဝါရီလ ၉ ရက်နေ့ကနေ ၃၁ အထိ ရုံးပိတ်ရက်မှအပ ရက်ပေါင်း ၂၀ ကြာ ကောက်ယူခဲ့တာလို့ဆိုပါတယ်။

တနိုင်ငံလုံးအတိုင်းအတာနဲ့ ကောက်ယူရာမှာ ၈၆ ရာခိုင်နှုန်းကျော် ပြီးစီးသလို၊ ရခိုင်ပြည်နယ်မှာတော့ တပြည်နယ်လုံးရဲ့ ၉၉ ရာခိုင်နှုန်းအထိ ကောက်ယူပြီးစီးခဲ့တယ်လို့ လူဝင်မှုကြီးကြပ်ရေးနဲ့ ပြည်သူ့အင်အားဝန်ကြီးဌာန MOIP က ဆိုပါတယ်။

“သူတို့က ၈၀ ရာခိုင်နှုန်းကျော် ကောက်နိုင်တယ်သာ ပြောနေတာ ကျွန်တော်တို့ ဒေသမှာတော့ ခုချိန်ထိ စာရင်း လာကောက်တာမျိုး မကြားဘူး။ လာလို့လည်း မရဘူး။ ဒီဘက်မှာက နေ့တိုင်းလိုလို ထိတွေ့တိုက်ပွဲတွေ ပစ်ခတ်မှုတွေ ဖြစ်နေတာ။ ရွေးကောက်ပွဲ လက်မခံတဲ့ ဆန္ဒပြပွဲတွေကလည်း နေ့တိုင်းနီးပါး ပြုလုပ်နေတယ်။ လက်ခံဖို့ အစီအစဉ်လည်း မရှိဘူး” လို့ စစ်ကိုင်းတိုင်းအတွင်းက မြို့နယ် ပကဖတာဝန်ရှိသူတဦးက ပြောပါတယ်။

ရခိုင်ပြည်နယ်အတွင်း အိမ်ထောင်စု စာရင်းမရှိသူများကို အလွတ်ပုံစံနဲ့ ကောက်ယူခဲ့ပြီး အိမ်ထောင်စုပေါင်း ၁ ဒသမ ၄ သိန်းကျော်ကို ကောက်ယူနိုင်ခဲ့တယ်လို့ ထည့်သွင်းဖော်ပြထားပါတယ်။ ၂၀၁၄ ခုနှစ် သန်းခေါင်စာရင်းနဲ့ အိမ်ထောင်စုအကြောင်းအရာ အချက်အလက်အရ မြန်မာနိုင်ငံမှာ အိမ်ထောင်စု ၁၁ သန်းကျော်အထိ ရှိပါတယ်။

စစ်ကောင်စီဘက်က ကောက်ယူပြီးစီးခဲ့တယ်ဆိုပြီး တိုင်းနဲ့ ပြည်နယ်တွေရဲ့ အိမ်ထောင်စုစာရင်း စုစုပေါင်းကို အတိအကျထုတ်ပြန်တာမျိုး မရှိသေးသလို အိမ်ထောင်စုစာရင်းတွေ ကောက်ယူချိန်မှာလည်း ထိတွေ့တိုက်ပွဲတွေနဲ့ ၊ ပစ်ခတ်မှုတွေနေ့စဉ်နီးပါးဖြစ်နေတဲ့ စစ်ကိုင်း၊ မကွေး၊ ကယား၊ ကရင်၊ ချင်းပြည်နယ် အပါအဝင် ဒေသအတော်များများမှာ လာရောက်စာရင်းကောက်ယူတာမျိုး မရှိခဲ့ဘူးလို့ သိရပါတယ်။