ဒိန်းဂျား

ဆင်ဖြူကျွန်း၊ ဇန်နဝါရီ ၂၊ ၂၀၂၆။

မကွေးတိုင်း၊ ဆင်ဖြူကျွန်းမြို့မှာ ထွေထွေအုပ်ချုပ်ရေးမှူးရုံးနဲ့ စက်မှုလယ်ယာရုံး မီးလောင်ပျက်စီးပြီး စစ်ကော်မရှင်တပ်ဖွဲ့ဝင်တွေက လက်နက်ကြီးနဲ့ပစ်ခတ်တာကြောင့် ဒေသခံ ၂ ဦးသေဆုံးခဲ့တယ်လို့ ဆင်ဖြူကျွန်းမြို့ခံတွေဆီက သိရပါတယ်။

ဇန်နဝါရီ ၁ ရက် နေ့လယ် ၁ နာရီခွဲမှာ ဆင်ဖြူကျွန်းမြို့၊ သစ္စာမြိုင်ကွက်သစ်ရှိ စက်မှုလယ်ယာရုံးနဲ့ သရက်တောရွာထိပ်ရှိ အထွေထွေအုပ်ချုပ်ရေးမှူးရုံးတို့ မီးလောင်ခဲ့တာဖြစ်ပြီး အဆိုပါရုံး ၂ ခုဟာ အကွာအဝေး ၃ ဖာလုံခန့်သာရှိတယ်လို့ ဆိုပါတယ်။

“အဲ့ဒါက သူတို့(စစ်ကော်မရှင်)ပစ်တဲ့ လက်နက်ကြီးကျတာ၊ နွယ်တမယ်တံတားထိပ်ကနေ လှမ်းပစ်တာ၊ မနေ့ကပါ၊ ထွေအုပ်ရုံးနဲ့ စက်မှုလယ်ယာကို လက်နက်ကြီးကျည်ကျတာ၊ တခြားမီးကူးတာတွေတော့မရှိဘူး၊ လက်ရှိကတော့ အခုအချိန်ထိ ငြိမ်နေကြတယ်၊ ဘာမှတော့ မထူးသေးဘူး၊ အပြန်အလှန် ပစ်ခတ်မှုလည်း မရှိသေးဘူး” လို့ ဆင်ဖြုကျွန်းမြို့ခံတဦးက ပြောပါတယ်။

အထက်ပါဌာနဆိုင်ရာရုံးတွေမှာ လူနေထိုင်တာမရှိတဲ့အတွက် ထိခိုက်သေဆုံးမှုမရှိဘဲ ခုလိုမီးလောင်တာ ဟာ စစ်ကော်မရှင်တပ်တွေပစ်တဲ့လက်နက်ကြီးတွေ ကျရောက်ပေါက်ကွဲတာကြောင့်လို့ ဆိုပေမယ့် မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ ဒီဇင်ဘာ ၃၁ ရက်ကလည်း ဆင်ဖြူကျွန်းမြို့၊ နွယ်တမယ်ရွာထိပ်မှာ အထိုင်ချတပ်စွဲထားတဲ့ စစ်ကော်မရှင်တပ်ကပစ်ခတ်တဲ့လက်နက်ကြီးက ဆင်ဖြူကျွန်းမြို့၊ မန်းကျည်းတောကွက်သစ်က နေအိမ်ပေါ်ကျရောက်ပေါက်ကွဲပြီး အသက် ၆၀ အရွယ် ဒေါ်ဆယ်မိ နဲ့ အမျိုးသား ၁ ဦးသေဆုံးကာ၂ ဦး ဒဏ်ရာရခဲ့တယ်လို့ ဆိုပါတယ်။

“နွယ်တမယ်ရွာထိပ်ကနေ နတ်စင်ရွာဘက်ကို လှမ်းပစ်တာကနေ မန်းကျည်းတောကွက်သစ်ဘက်ကို လက်နက်ကြီးကျည်ကျတာ၊ အိမ်ပေါ်တည့်တည့်ကျတာ၊ မန်းကျည်း‌တောကွက်သစ်က ဆင်ဖြူကျွန်းနားမှာပဲရှိတာ၊ ရှားတောမြောက်ဘက်မှာ ရှိတာ၊ သေတာက ၂ ဦးသေတယ်၊ ၂ ဦးဒဏ်ရာရတယ်၊ ၁ ဦးကတော့ လက်ပြတ်တယ်၊ ၁ ဦးက နားစည် ကွဲသွားတယ်”လို့ သူက ဆက်ပြောပါတယ်။

ဒါ့အပြင် ဒီဇင်ဘာ ၃၁ ရက် ဒီနေ့လယ် ၂ နာရီဝန်းကျင်မှာ ချောင်းဖြူရွာနဲ့ နတ်စင်ရွာကို စစ်ကော်မရှင် တပ်ကဂျက်ဖိုက်တာနဲ့ ဗုံး ၆ လုံးကြဲချခဲ့ပါသေးတယ်။

ဆင်ဖြူကျွန်းမြို့မှာ ဒီဇင်ဘာ ၂၃ ရက်နဲ့ ၂၄ ရက်က ဒေသခံကာကွယ်ရေးတပ်တွေနဲ့ စစ်ကော်မရှင်တပ်တို့ တိုက်ပွဲဖြစ်ခဲ့ပြီးနောက် တိုက်ပွဲငြိမ်သက်ခဲ့ရာက ဒီဇင်ဘာ ၃၀ ရက်ည ၇ နာရီကနေ ၁၁ နာရီခွဲအထိ ဆင်ဖြူကျွန်းမြို့အနီး နွယ်တမယ်တံတားရှိ စစ်ကော်မရှင်တပ်ဖွဲ့ဝင်တွေနဲ့ ဒေသခံတော်လှန်ရေးတပ်တွေ ပစ်ခတ်မှုပြန်ဖြစ်ခဲ့ပါတယ်။

လက်ရှိမှာတော့ တိုက်ပွဲငြိမ်နေပြီး စစ်ကော်မရှင်တပ်ဖွဲ့ဝင်တွေဟာ ဆင်ဖြူကျွန်းမြို့၊ အသိရိဘုရား၊ မဟာစေတီလှဘုရား၊ ရဲစခန်းနဲ့ နွယ်တမယ်ရွာထိပ်စတဲ့ နေရာ ၄ နေရာမှာ အင်အား ၂၀၀ ကျော်နဲ့ တပ်စွဲနေထိုင်တယ်လို့ သိရပါတယ်။

စာတည်း – လင်း

ဆင်ဖြူကျွန်း၊ ဒီဇင်ဘာ ၂၆၊ ၂၀၂၅။

မကွေးတိုင်း၊ ဆင်ဖြူကျွန်းမြို့ကို ဒီဇင်ဘာ ၂၆ ရက်မှာ ဗုံးကြဲတိုက်ခိုက်ခဲ့ပြီး လေထီးအသုံးပြုကာ ရိက္ခာတွေပစ်ချနေတယ်လို့ ဆင်ဖြူကျွန်းမြို့ခံတွေဆီက သိရပါတယ်။

ဒီဇင်ဘာ ၂၆ ရက် မနက် ၇ နာရီခွဲလောက်မှာ စစ်ကော်မရှင်လေယာဥ်တွေပေါ်ကနေ လက်နက်ခဲယမ်းတွေလို့ယူဆရတဲ့အထုပ်တွေကို လေထီးတွေနဲ့ပစ်ချခဲ့ပြီး နေ့လယ် ၁၂ နာရီခွဲလောက်မှာ ဆင်ဖြူကျွန်းမြို့ပေါ်ကို ဂျက်ဖိုက်တာနဲ့ဗုံးကြဲခဲ့တယ်လို့ ဆိုပါတယ်။

“အခုတော့ငြိမ်နေတယ်၊ စစ်ကော်မရှင်က ကောင်းကင်ကနေ လေယာဉ်တွေအသုံးပြုပြီး လေထီးတွေနဲ့ ရိက္ခာလာချတယ်။ ကုန်းလမ်းကနေ ကားတွေနဲ့ သူတို့မလာရဲကြဘူး။ ရိပ်သာ တောင်ဘက်နားမှာ ၃ ထုပ်ကျတယ်၊ သူတို့ဖိနပ်တောင်မပါဘူး။ သေနက် ၃ လက်လောက်နဲ့ ၁၅ ဦးလောက်ရောက်လာပြီး လာသယ်သွားတယ်။” လို့ ဆင်ဖြူကျွန်းမြို့ခံတဦးက ပြောပါတယ်။

ဒါ့အပြင် ဂျက်ဖိုက်တာနဲ့ ဗုံး ၆ လုံးကြဲချတိုက်ခိုက်ခဲ့ဖြစ်ပြီး ထိခိုက်မှုအခြေအနေတွေကိုတော့ အတည်မပြုနိုင်သေးဘူးလို့ သူကဆက်ပြောပါတယ်။

“အခြေအနေက မကောင်းဘူး။ အောက်ကမတိုက်ဘဲနဲ့ လေယာဉ်နဲ့ အခုကြဲနေတာ၊ အခုကို ၆ လုံးလောက် ရှိသွားပြီ။ ဘယ်တွေကျတယ်ဆိုတာတော့ မသိရသေးဘူး။ ထွက်မှမထွက်ရတာ”လို့ သူက ဆက်ပြောပါတယ်။

ဆင်ဖြူကျွန်းမြို့မှာ ဒီဇင်ဘာ ၂၃ ရက်မနက်ပိုင်းကစလို့ ဒေသခံကာကွယ်ရေးတပ်တွေနဲ့ စစ်ကော်မရှင်တပ်တို့ တိုက်ပွဲဖြစ်ခဲ့ပြီးနောက် စစ်ကော်မရှင်ဘက်က နေ့စဥ်နီးပါးလေကြောင်းနဲ့ လက်နက်ကြီးကို အလွန်အကျွံပစ်ခတ်နေတာကြောင့် နေအိမ်ပျက်စီးမှုနဲ့ ဒေသခံထိခိုက်မှုတွေရှိခဲ့ပါတယ်။

လက်ရှိအချိန်ထိ ဆင်ဖြူကျွန်းမြို့ထဲမှာ ပိတ်မိနေသူတွေရှိနေပြီး တချို့ကတော့ကုန်းလမ်းက တိမ်းရှောင်ဖို့မလွယ်တာကြောင့် ရေလမ်းကနေ အဓိကထွက်ပြေးတိမ်းရှောင်နေကြတယ်လို့ ဒေသခံတွေဆီက သိရပါတယ်။

ဒီကနေ့မှာတော့ ဆင်ဖြူကျွန်းမြို့ပေါ်နဲ့ အနီးတဝိုက်မှာတိုက်ပွဲဖြစ်တာမရှိဘဲ စစ်ကော်မရှင်တပ်ဖွဲ့ဝင်တွေကတော့ မြို့ပေါ်ရှိ မဟာစေတီလှဘုရားအတွင်းမှာ လက်နက်ကြီးတွေတပ်ဆင်ပြီး အထိုင်ချတပ်စွဲထားတယ်လို့ သိရပါတယ်။

စလင်းပကဖ ဘက်ကလည်း ဆင်ဖြူကျွန်းမြို့ကို အပြီးသတ်သိမ်းပိုက်သွားမှာဖြစ်လို့ မြို့ခံတွေအနေနဲ့ ဒီဇင်ဘာ ၂၅ ရက် မနက် ၈ နာရီကနေ ညနေ ၆ နာရီအတွင်း စလင်းမြို့နယ်ဘက်ကို ပြောင်းရွှေ့ကြဖို့ မနေ့က မနက်ပိုင်းမှာ ထုတ်ပြန်တိုက်တွန်းခဲ့ပါသေးတယ်။

စာတည်း – လင်း

စစ်ကြောင်းကိုထွက်ကြည့်တဲ့ အမျိုးသား ၁ ဦးပစ်ခတ်ခံရပြီး လက်နက်ကြီးထိလို့ဒဏ်ရာရသူတွေရှိ

ဆင်ဖြူကျွန်း၊ ဒီဇင်ဘာ ၂၄၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့‌မှာ စစ်ကော်မရှင်တပ်နဲ့ တော်လှန်ရေးပူးပေါင်းတပ်တွေအကြား တိုက်ပွဲတွေဆက်ဖြစ်နေပြီး မြို့တွင်းမှာပိတ်မိနေတဲ့အရပ်သားတချို့ လက်နက်ကြီးဗုံးစထိမှန်ဒဏ်ရာရရှိခဲ့တယ်လို့ မြို့ခံတွေဆီက သိရပါတယ်။

ဒီဇင်ဘာ ၂၃ ရက် ယမန်နေ့ မနက်အစောပိုင်းကစတင်ခဲ့တဲ့ ဆင်ဖြူကျွန်းမြို့တိုက်ပွဲဟာ ဒီကနေ့အထိ ဆက်ဖြစ်နေတာဖြစ်ပြီး စစ်ကော်မရှင်တပ်က လေယာဥ်နဲ့ လက်နက်ကြီးပစ်ကူတွေ ဆက်တိုက်ပစ်ခတ်နေတယ်လို့ ဆိုပါတယ်။

” ပိတ်မိနေတာက မြို့ပတ်ချာလည် အနောက်နဲ့တောင်တွေမှာ တိုက်ပွဲတွေကဖြစ်နေတာ့ မြို့ထဲကနေ အပြင်ထွက်လို့မရဘူး။ တိုက်ပွဲဖြစ်မှာကိုလည်း မြို့ခံတွေက ကြိုမသိတော့ ပြေးချိန်လည်းမရှိဘူး။ ခုတော့ ကိုယ့်အိမ်ထဲကို နေနေရတယ်”လို့ ဆင်ဖြူကျွန်းမြို့ခံတဦးက မြေလတ်အသံကို ပြောပါတယ်။

စစ်ကော်မရှင်တပ်အင်အား ၂၀၀ နီးပါးဟာ ပရိက္ခရာရပ်ကွက်ရှိ ဆင်ဖြူကျွန်းမြို့ရဲစခန်းနဲ့ အမှတ် ၂ ရပ်ကွက်ရှိ အသိရိဘုရားဝန်းတွေအတွင်း လက်နက်ကြီးအထိုင်တပ်စွဲပြီး စလင်းမြို့အနောက်ဘက် ကျေးရွာတွေဖြစ်တဲ့ နွ​ယ်တမယ်၊ ချောင်းဖြူရွာတွေဘက်ကို အဆက်မပြတ်ပစ်ခတ်နေတာပါ။

ယမန်နေ့ ဒီဇင်ဘာ ၂၃ ရက်နေ့လယ်ပိုင်းမှာ စစ်ကော်မရှင်တပ်ပစ်ခတ်တဲ့လက်နက်ကြီးဗုံးသီးတွေဟာ ပိုးအနောက်ရပ်ကွက်ရှိနေအိမ်တချို့ပေါ်ကျရောက် ပေါက်ကွဲခဲ့တာကြောင့် မြို့ခံအမျိုးသမီး ၂ ဦး၊ အမျိုးသား ၁ ဦးအပါ ၆ ဦးခန့် ဗုံးစထိမှန်ဒဏ်ရာရခဲ့တယ်လို့ သိရပါတ​ယ်။

ဒါ့အပြင် ယမန်နေ့ မနက် ၁၀ နာရီလောက်မှာ စစ်ကော်မရှင်တပ်စစ်ကြောင်းကို ထွက်ကြည့်တဲ့ ဆင်ဖြူကျွန်းမြို့၊ သုံးပင်တောင်ရပ်ကွက်နေ အသက် ၄၀ ဝန်း ကျင်အမျိုးသား ၁ ဦးကို စစ်ကော်မရှင်စစ်ကြောင်းက သေနတ်နဲ့ပစ်ခတ်သွားတာကြောင့် နောက်ကျောကျည်ထိမှန်ဒဏ်ရာ(မစိုးရိမ်ရ)ရရှိခဲ့တယ်လို့ ဆိုပါတယ်။

လက်ရှိ ဆင်ဖြူကျွန်းမြို့မှာ တိုက်ပွဲတွေဆက်ပြင်းထန်နေပြီး စစ်ကော်မရှင်တပ်က လက်နက်ကြီးတွေ ဆက်တိုက်ပစ်ခတ်နေသလို ဒီကနေ့မနက်ပိုင်းမှာပဲ တိုက်ပွဲဖြစ်ပွားရာနေရာတွေအနီးကို တိုက်လေယာဥ် ၂ စီးနဲ့ တိုက်ခိုက်နေတယ်လို့ အထက်ပါမြို့ခံက ပြောပါတယ်။

” ခုလေးတင်ပဲ ဖိုက်တာနဲ့ လှည့်ပတ်ပစ်နေတာ နွယ်တမယ်တံတားဘက်နဲ့ မြို့အစပ်နေရာတွေကို စက်လက်တွေနဲ့လည်း ဆက်တိုက်ပစ်နေတာ ” လို့ သူက ပြောပါတယ်။

မြို့တွင်းမှာလည်း စစ်ကော်မရှင်တပ်က အမှတ် ၂ နဲ့ အမှတ် ၃ ရပ်ကွက်တွေမှာ အင်အား ၅၀ စီနဲ့ ကင်းပုန်းဝပ်နေပြီး ထပ်မံအင်အားဖြည့်တင်းတာတွေလည်း လုပ်ဆောင်နေကာ ဆင်ဖြူကျွန်းမြို့ကို အင်တာနက်လိုင်းတွေဖြတ်တောက်ထားတာလည်း ဖြစ်ပါတယ်။

စာတည်း – ဟိန်းစံ