ဒိန်းဂျား

မြေလတ်အသံ၊ ဒီဇင်ဘာ ၂၂၊ ၂၀၂၅။

မကွေးတိုင်း၊ မြိုင်နဲ့ ပေါက်မြို့နယ်တို့မှာ စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့တာကြောင့် သက်ကြီးပိုင်းအမျိုးသား ၁ ဦးထိခိုက်ပြီး နေအိမ်အဆောက်အအုံ တချို့လည်းပျက်စီးခဲ့တယ်လို့ ဒေသခံတွေဆီက သိရပါတယ်။

ဒီဇင်ဘာ ၂၂ ရက်မနက် ၁၀ နာရီခွဲမှာ မြိုင်မြို့နယ်၊ ရွာသစ်ကုန်းရွာကို မကွေးလေတပ်ဘက်က တက်လာတဲ့ MiG-29 ပေါ်ကနေ ဗုံးကြဲ၊ ပစ်ခတ်ခဲ့ပြီး မနက် ၁၀ နာရီ ၅၀ မိနစ်မှာ မုံရွာနမခ ကတက်လာတဲ့ ဂျိုင်ရိုကော်ပတာ ၂ စီးနဲ့ ပေါက်မြို့နယ်၊ လက်ပံတိုရေနံမြေစခန်းအနီးကို ဗုံးကြဲခဲ့တာလို့ ဆိုပါတယ်။

ခုလို ဗုံးကြဲပစ်ခတ်လို့ ရွာသစ်ကုန်းရွာတိုက်ခိုက်မှုမှာ အသက် ၆၀ အရွယ်အမျိုးသား ၁ ဦးထိခိုက် ဒဏ်ရာရကာ နေအိမ် ၁ လုံးပျက်စီးပြီး လက်ပံတိုရေနံမြေအနီးက မှော်မင်းသား KTV အဆောက်အအုံ ၁ ခုပျက်စီးခဲ့တယ်လို့ ဒေသခံတဦးကပြောပါတယ်။

“ဒဏ်ရာရသူ ၁ ဦးတော့ ရှိပါတယ်၊ အသက် ၆၀ အရွယ် အဘိုး ၁ ဦးပါ၊ မစိုးရိမ်ရပါဘူး၊ ပွတ်ပြီးထိသွားတာပါ၊ လောလောဆယ်တော့ နယ်ခံဆေးပေးခန်းမှာ ဆေးထည့်ပေးထားပါတယ်၊ သေဆုံးမှုတော့ မရှိပါဘူး၊ ကျတာကတော့ အိမ်ပေါ်တည့်တည့်ကျတာပါ၊ ကျတဲ့အိမ်ပေါ်မှာက လူက ၁ ဦးမှမရှိလို့ပါ၊ နေအိမ်တော့ပျက်စီးသွားပါတယ်”လို့ မြိုင်မြို့ခံတဦးက ပြောပါတယ်။

ရွာသစ်ကုန်းရွာမှာ အိမ်ခြေ ၂၀၀ နဲ့ လူဦးရေ ၄၀၀ ဝန်းကျင်ရှိပြီး လေကြောင်းတိုက်ခိုက်ခံရပြီးနောက် ဒေသခံတွေဟာ ရွာထဲကနေတိမ်းရှောင်နေကြတယ်လို့ ဆိုပါတယ်။

ဒါ့အပြင် စစ်ကော်မရှင်တပ်က လေကြောင်းတိုက်ခိုက်တာတွေကြောင့် ပေါက်နဲ့မြိုင်မြို့နယ်အတွင်း လူဦးရေ ၃,၀၀၀ ဝန်းကျင်စစ်ရှောင်နေရတယ်လို့လည်း အထက်ပါဒေသခံကဆက်ပြောပါတယ်။

ပြီးခဲ့တဲ့ ဒီဇင်ဘာ ၂၁ ရက်ကလည်း မြိုင်မြို့နယ်၊ ဘုန်းကြီးကန်ရွာကို စစ်ကော်မရှင်တပ်က ဂျိုက်‌ရိုကော်ပတာပေါ်ကနေ ပစ်ခတ်ခဲ့တာကြောင့် အမျိုးသမီး ၁ ဦးသေဆုံးခဲ့ပါသေးတယ်။

စာတည်း – လင်း

မြိုင်၊ ဒီဇင်ဘာ ၂၁၊ ၂၀၂၅။

မကွေးတိုင်း၊ မြိုင်မြို့နယ်၊ ဘုန်းကြီးကန်ရွာကို စစ်ကော်မရှင်ဘက်က ဂျိုင်ရိုကော်ပတာပေါ်ကနေ ပစ်ခတ်ခဲ့တာကြောင့် အမျိုးသမီး ၁ ဦးသေဆုံးပြီး နေအိမ်ပျက်စီးမှုတွေရှိခဲ့တယ်လို့ မြိုင်မြို့ခံတွေဆီက သိရပါတယ်။

ဒီဇင်ဘာ ၂၁ ရက် နေ့လယ် ၂ နာရီ ၂၀ မိနစ်လောက်မှာ ဘုန်းကြီးကန်ရွာကို ဂျိုင်ရိုကော်ပတာ ၂ ပေါ်ကနေ ၁၂၀ မမ လက်နက်ကြီးနဲ့ပစ်ခတ်ခဲ့တာကြောင့် အသက် ၃၀ အရွယ်အမျိုးသမီး ၁ ဦးသေဆုံးပြီး အသက် ၇၀ အရွယ် အဘိုး၊ အဘွား ၂ ဦးဒဏ်ရာရခဲ့တယ်လို့ ဆိုပါတယ်။

“အဲ့ဒီရွာမှာက တိုက်ပွဲဖြစ်ပွားခြင်းလည်း မရှိဘူး၊ ဂျိုက်ရိုကော်ပတာ ၂ စီးနဲ့ ပစ်သွားတာ၊ ၁၂၀ မမနဲ့ ၂ လုံး ပစ်သွားတာ၊ နေအိမ် ၃ လုံး ပျက်စီးတယ်၊ နွား ၁ ကောင်သေတယ်၊ အမျိုးသမီး ၁ ဦးသေတယ်။ အဘိုး၊ အဘွား ၂ ဦးဒဏ်ရာရတယ်။ ဒေသခံတွေကတော့ ရွာထဲမှာ အိပ်ကြမယ်မထင်ဘူး၊ တောထဲမှာ အိပ်ကြလောက်တယ်။” လို့ မြိုင်မြို့ခံတဦးက ပြောပါတယ်။

ဘုန်းကြီးကန်ရွာဟာ အိမ်ခြေ ၆၀၀ နဲ့ လူဦးရေ ၁,၀၀၀ ကျော်ရှိတဲ့ကျေးရွာတရွာဖြစ်ပြီး ခုလို လေကြောင်းကနေ တိုက်ခိုက်ခံရတာကြောင့် ဒေသခံတွေလည်းကြောက်လန့်ပြီး တောထဲကိုထွက်ပြေးနေကြရတယ်လို့ သိရပါတယ်။

ပြီးခဲ့တဲ့ ဒီဇင်ဘာ ၁၉ ရက်ကလည်း မြိုင်မြို့နယ်၊ ကန်ကြီးကုန်းရွာကို မကွေးလေတပ်ဘက်ကလာတဲ့ ဂျက်ဖိုက်တာပေါ်ကနေ ၂ ကြိမ် ဗုံးကြဲချတိုက်ခိုက်ခဲ့ပါသေးတယ်။

စာတည်း – လင်း

ပေါက်၊ ဒီဇင်ဘာ ၁၅၊ ၂၀၂၅။

မကွေးတိုင်း၊ ပေါက်မြို့နယ်၊ သပြေညိုတောင်ပေါ်ကို စစ်ကော်မရှင်တပ်က ၄ ရက်ဆက်ဗုံးကြဲတိုက်ခိုက်ခဲ့တာကြောင့် အဆိုပါတောင်ပေါ်ရှိ သပြေညိုရေနံမှော်ပေါ်ကျရောက်ပေါက်ကွဲပြီး ထိခိုက်ပျက်စီးမှုရှိခဲ့တယ်လို့ ပေါက်မြို့ခံတွေဆီက သိရပါတယ်။

ဒီဇင်ဘာ ၁၂ ရက် နေ့လယ် ၁၂ နာရီမှာ ၁ ကြိမ်၊ ၁၃ ရက် နေ့လယ် ၂ နာရီခွဲမှာ ၁ ကြိမ်၊ ၁၄ ရက် ညနေ ၄ နာရီမှာ ၁ ကြိမ်နဲ့ ၁၅ ရက် နေ့လယ် ၁၂ နာရီ ၁၅ မိနစ်မှာ ၁ ကြိမ် ဂျိုင်ရိုကော်ပတာနဲ့ ဗုံးကြဲချခဲ့တာလို့ ဆိုပါတယ်။

“၁၂ ရက်နေ့ကနေ ၁၅ ရက်အထိ ကြဲတာ၊ ၁၂ ရက်က လူမနေတဲ့ တောင်တွေပေါ်ကျတယ်၊ ၁၃ ရက်ကလည်း ၃ ကြိမ်လောက်လာကြဲတယ်၊ ဆီချက်တဲ့ ချက်ဖိုနားကျတယ်၊ ၁၄ ရက်ကတော့ ၃ ကြိမ်မြောက်လာကြဲတာက ရေနံကျင်းပေါ်ကျပြီး မီးလောင်သွားတယ်၊ ဒီနေ့ နေ့လယ် ၁၂ နာရီ ၁၅ မိနစ်ကလည်း ကြဲသွားတယ်၊ ၁၂၀ မမ ဗုံးသီးတွေနဲ့ ကြဲတာ၊ ဗုံးသီး‌တွေကို ကပစ ထုတ်မဟုတ်ဘဲ ကွန်ဂျူး (PVC ပိုက်)နဲ့ လက်လုပ်ထားတာကြောင့်ထင်တယ် ပေါက်ကွဲအားပိုပြင်းတယ်” လို့ ပေါက်မြို့ခံတဦးက ပြောပါတယ်။

ဒီဗုံးကြဲမှုကြောင့် ဒေသခံတွေထိခိုက်မှုမရှိဘဲ ရေနံမှော်က ချက်ဖို ၁ ခုနဲ့ တဲ ၁ လုံးမီးလောင်ပျက်စီးပြီး ဒေသခံထိခိုက်မှုအခြေအနေကိုတော့ မကြားမိသေးဘူးလို့ ဆိုပါတယ်။

“ဒေသခံတွေက လက်လုပ်လက်စားတွေပါ၊ ထိခိုက်မှုတော့ မကြားမိသေးဘူး၊ ချက်ဖို ၁ ခုနဲ့ တဲ ၁ လုံးတော့ မီးလောင်ပျက်စီးသွားတယ်၊ အရင်တခါတွေက ကြဲတာခံရပြီးကတည်းက ဝေဟင် လေကြောင်းသံကြားရင် ကတုတ်ကျင်းထဲဝင်နေကြတော့တာ” လို့ သူက ဆက်ပြောပါတယ်။

ပေါက်မြို့နယ်၊ သပြေညိုတောင်ပေါ်က သပြေညိုရေနံမှော်ဒေသတဝိုက်မှာ ဒေသခံထောင်ကျော်နေထိုင်ကြပြီး အများစုက ရေနံလုပ်ငန်းလုပ်ကိုင်စားသောက်နေကြသူတွေဖြစ်တယ်လို့ သိရပါတယ်။

ပြီးခဲ့တဲ့ အောက်တိုဘာ ၈ ရက်မနက် ၁၀ နာရီဝန်းကျင်မှာလည်း သပြေညိုရေနံမှော်ကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် အလုပ်သမားလင်မယား ၂ ဦးသေဆုံးပြီး ကလေးဖြစ်သူ ဒဏ်ရာရခဲ့ပါသေးတယ်။

စာတည်း – လင်း

ပေါက်၊ ဒီဇင်ဘာ ၁၃၊ ၂၀၂၅။

မကွေးတိုင်း၊ ပေါက်မြို့အခြေစိုက် ကပစ ၂၄ စစ်ကြောင်းမှာပါလာတဲ့ စစ်ကော်မရှင်တပ်သား ၁ ဦး ရှေ့ကင်းထွက်ဖို့လာချိန် ဒီဇင်ဘာ ၁၂ ရက်မှာ လက်နက်ခဲယမ်းတွေယူပြီး ဘက်ပြောင်းခိုလှုံလာတယ်လို့ မြိုင်မြို့နယ် ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဘက်ပြောင်းခိုလှုံလာသူဟာ အသက် ၂၈ နှစ်အရွယ် ဇင်ဝင်းထက်ဖြစ်ပြီး ပေါက်မြို့၊ ဝက်ပုတ်ရွာမှာ ရှေ့ပြေးကင်းထွက်ခိုင်းတဲ့အချိန် ဘက်ပြောင်းလာတာလို့ ဆိုပါတယ်။

“စစ်ကြောင်းက မီတာ ၆၀၀ အကွာမှာရှိတာ၊ သူ့ကိုရှေ့ပြေးကင်းထွက်ခိုင်းတဲ့အချိန်မှာ သူကိုင်ဆောင်ထားတဲ့ MA 4 ၁ လက်၊ ကျည်ဘောက် ၄ ခုနဲ့ ကျည် ၉၂ တောင့်ယူဆောင်ပြီး ဘက်ပြောင်းခိုလှုံလာတာ”လို့မြိုင်မြို့နယ်ပကဖ တာဝန်ရှိသူတဦးက ပြောပါတယ်။

ဧရာဝတီတိုင်း၊ ဒေးဒရဲမြို့နယ်၊ ကျုံးဒူးရွာဇာတိ ဇင်ဝင်းထက်ဟာ ရွာမှာစစ်မှုထမ်းဖို့ မဲပေါက်ပြီး စတခ ၄ (ပင်လောင်း) မှာ စစ်သင်တန်း ၃ လတက်ခဲ့ကာ အဲ့ဒီကတဆင့် တမခ ၉၉ မှာ တာဝန်ထမ်းဆောင်ခဲ့ရာကနေ ပေါက်အခြေစိုက် ကပစ ၂၃ ကိုရောက်ရှိလာတာလို့ ဆိုပါတယ်။

“သူက ဧရာဝတီတိုင်း၊ ဒေးဒရဲမြို့နယ်၊ ကျူံးဒူးရွာ ဇာတိပါ၊ တောင်သူလယ်သမားတဦးပါ၊ သူ စစ်မှုထမ်းဖို့ မဲနှိုက်ရတာ၊ မဲပေါက်တာ ၃ သိန်းခွဲ မပေးနိုင်လို့ သင်တန်းတက်ရတာ၊ သူကတော့ နေရပ်ကို ပြန်ချင်တယ်ပြောပါတယ်၊ ပြန်ပို့ခိုင်းပါတယ်၊ ခုတော့ ထိန်းသိမ်းထားပြီး စောင့်ကြည့်ရအုံးမှာ” လို့ အထက်ပါတာဝန်ရှိသူတဦးက ပြောပါတယ်။

MA 4 ၁ လက်၊ ကျည်ဘောက် ၄ ခုနဲ့ ကျည် ၉၂ တောင့် ယူဆောင်လာတဲ့ ဇင်ဝင်းထက်ကို ဆုကြေးငွေ ကျပ် ၃၅ သိန်းချီးမြှင့်ထားပြီး စခန်းမှာပဲထိန်းသိမ်းထားတယ်လို့လည်း ဆိုပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ ဒီဇင်ဘာ ၁၂ ရက်အထိ မြိုင်ပကဖဆီ ဘက်ပြောင်းခိုလှုံလာတဲ့ စစ်ကော်မရှင်တပ်ဖွဲ့ဝင်နဲ့ ပြည်သူ့စစ်တွေအပါအဝင် စုစုပေါင်း ၁၀၀ ဦးထက်မနည်းရှိပြီလို့ သိရပါတယ်။

စာတည်း – လင်း