ကျော်ကြီး 
ဝက်လက်၊ ဩဂုတ် ၁၅၊ ၂၀၂၆။
စစ်ကိုင်းတိုင်း၊ ဝက်လက်မြို့နယ် အနောက်ခြမ်းကျေးရွာတွေမှာရေကြီးလို့ အိမ်ခြေ ၃၀၀၀ ဝန်းကျင်နဲ့ စိုက်ပျိုးပြီးလယ်ဧက ၂၀,၀၀၀ ကျော်ပျက်စီးတယ်လို့ သက်ဆိုင်ရာတိုက်နယ်ပကဖတာဝန်ခံတွေဆီက သိရပါတယ်။
ဩဂုတ် ၇ ရက်ကစတင်ပြီး မူးမြစ်ရေ မြင့်တက်လာတာကြောင့် စိုင်နိုင်၊ လှတော၊ ရွှေပန်းကုန်းတိုက်နယ်ထဲက ကျေးရွာ ၂၅ ရွာကျော်မှာ ရေကြီးနစ်မြုပ်မှုဖြစ်ပေါ်ခဲ့တာလို့ ဆိုပါတယ်။
“အိမ်အကုန်လုံးမြုပ်သွားတဲ့အတိုင်းတာရှိတယ်။ အိမ်ခေါင်မိုးထိမြုပ်ကြတာ။ ကျနော့်တိုက်နယ်ထဲမှာဆို ၃ ရွာကအဆိုးဆုံးဖြစ်တာ။ တဲတွေဆို ရေမျောတာတွေလည်းပါတယ်။ တိုက်ခံတွေကျတော့ မျောပါတာမရှိပေမယ့် ပျက်စီးကြတယ်”လို့ စိုင်နိုင်တိုက်နယ်ပကဖ တာဝန်ခံကပြောပါတယ်။
စိုင်နိုင်တိုက်နယ်ထဲက ကျေးရွာ ၄ ရွာမှာ ရေကြီးလို့အိမ်ခြေ ၁,၅၀၀ ဝန်းကျင်ထိပျက်စီးပြီး လယ်ယာမြေဧက ၁၀,၀၀၀ ကျော်ပျက်စီးထားတယ်လို့ ကနဦးသိရပြီး မြေပြင်စာရင်းကောက်ယူပြီးပါက အပျက်အစီးကပိုနိုင်တယ်လို့ ဆိုပါတယ်။
အလားတူ လှတောတိုက်နယ်ထဲက ကျေးရွာတရွာ၊ ရွှေပန်ကုန်းတိုက်နယ်ထဲက ကျေးရွာ ၁၉ ရွာလည်း ရေနစ်မြုပ်ခဲ့ပြီး အိမ်ခြေ ၁,၅၀၀ ကျော်နဲ့ လယ်ဧက ၁၀,၀၀၀ ကျော်ပျက်စီးထားတယ်လို့ သိရပါတယ်။
“ကျနော်တို့ဘက်ဆို မနေ့ကမှ ရေစကျတယ်။ လယ်ယာမြေပျက်စီးဆုံးရှုံးမှုက တော်တော်လေးများတယ်။ တောထဲမှာနေတဲ့ တဲတွေဆိုတော်တော်များများပျက်စီးတယ်။ အိမ်ခေါင်မိုးမြုပ်တဲ့အထိဆိုတော့ အိမ်တွေက သွပ်မိုး၊ ထရံကာတွေများတော့ လေးငါးရက်ရေမြူပ်တာဆိုတော့ ပျက်စီးကြတယ်”လို့ရွှေပန်းကုန်းတိုက်နယ်တာဝန်ခံက ပြောပါတယ်။
လယ်ယာမြေတွေအပါအဝင် ဌက်ပျောနဲ့ သင်္ဘောပင်အပြင် ရာသီပေါ်သီးနှံစိုက်ခင်းတွေလည်း ပျက်စီးကြပါတယ်။
လက်ရှိမှာ ရေပြန်ကျနေပေမယ့် ရေကြီးမှုအတွင်း ရေဘေးရှောင်ရသူ ပြည်သူ ၁၀,၀၀၀ ကျော်ထဲမှာ အနည်းစုလောက်သာ ကျေးရွာထဲပြန်နေကြရပြီး အများစုက ရေဘေးရှောင်နေရာတွေမှာပင် ဆက်လက်နေထိုင်နေကြရပါတယ်။
ရေကြီးမှုကြောင့် ပျက်စီးခဲ့တဲ့ လယ်ယာ၊ စိုက်ခင်းမြေတွေမှာ အသစ်ပြန်လည်စိုက်ပျိုးနိုင်ဖို့ အချိန်ကျော်လွန်သွားပြီးဖြစ်သလို မျိုးစေ့လိုအပ်ချက်တွေကြောင့်လည်း ပြန်လည်စိုက်ပျိုးနိုင်ဖို့ မဖြစ်နိုင်ကြတော့ဘူးလို့ ဆိုပါတယ်။
လယ်ယာမြေတွေနစ်မြုပ်ပျက်စီးကြလို့ ငွေကြေးတောင့်တင်းတဲ့ တောင်သူတွေအတွက်က ထိခိုက်ပျက်စီးမှုတွေကြောင့် စားဝတ်နေရေးမခက်ခဲကြပေမယ့် ငွေကြေး မပြည့်စုံတဲ့တောင်သူတွမှာတော့ စားဝတ်နေရေးတွေကြပ်တည်းလာနိုင်တယ်လို့ ဆိုပါတယ်။
ဒါ့အပြင် ရေဘေးသင့်ပြည်သူတွေနဲ့အိုးအိမ်တွေပြန်လည်ထူထောင်ရေးအတွက် အစားအစာ၊ ဆေးဝါးနဲ့ငွေကြေးအကူအညီတွေလည်းလိုအပ်နေတယ်လို့ သိရပါတယ်။