MLAT 
■ နိုင်ငံတကာကို စားနပ်ရိက္ခာအဓိကဖြည့်ဆည်းတင်ပို့နိုင်ဖို့ မျှော်မှန်းထားတယ်လို့ ဆို
မြေလတ်အသံ၊ ဇွန် ၂၇၊ ၂၀၂၆ ။
လယ်ယာစိုက်ပျိုးရေးလုပ်ငန်းတွေမှာ AI (ဉာဏ်ရည်တု)စနစ်တွေနဲ့ စက်ကိရိယာတွေ အသုံးချနိုင်ဖို့ လိုအပ်တယ်လို့ စစ်ခေါင်းဆောင်ဟောင်း အသွင်ပြောင်းသမ္မတက ပြောဆိုလိုက်ပါတယ်။
ဇွန် ၂၆ ရက် ယမန်နေ့က နေပြည်တော်မှာ စစ်ခေါင်းဆောင်ဦးဆောင်ပြီးပြုလုပ်တဲ့ စားရေရိက္ခာမူဝါဒကော်မရှင်ရဲ့အစည်းအဝေးမှာ အခုလို ပြောဆိုခဲ့တာလည်း ဖြစ်ပါတယ်။
ယနေ့ခေတ်ဟာ သိပ္ပံနဲ့နည်းပညာခေတ်၊ IT ခေတ် ၊ AI ခေတ် ဖြစ်လာပြီဖြစ်ကြောင်း၊ စစ်ခေါင်းဆောင်ဟောင်းအနေနဲ့ မကြာခင်ကသွားရောက်ခဲ့တဲ့ အိန္ဒိယနဲ့ တရုတ်နိုင်ငံခရီးစဥ်တွေမှာ အဲ့ဒီနိုင်ငံတွေရဲ့ ခေတ်မီစိုက်ပျိုးရေးစနစ်တွေကို လေ့လာသိရှိခဲ့ရပြီး နိုင်ငံတွင်းမှာလည်း ခေတ်မီတဲ့စိုက်ပျိုးရေးစနစ်ကို တတ်နိုင်တဲ့ကဏ္ဍတွေမှာ ဆောင်ရွက်သွားကြဖို့နဲ့ စက်မှုလယ်ယာစနစ်ကို ဖော်ဆောင်ကြဖို့ကို သူကပြောပါတယ်။
” ကျွဲနွားများ ရှားပါးလာခြင်းနဲ့ လုပ်သားအင်အားရှားပါးလာခြင်းတို့ကြောင့် လယ်ယာစိုက်ပျိုးရေးလုပ်ငန်းများမှာ စက်ပစ္စည်းကိရိယာများကို လုံလောက်စွာအသုံးပြုနိုင်ရန်လိုကြောင်း၊ အလားတူ စိုက်ပျိုးရေးလုပ်ငန်းသုံးစက်ပစ္စည်းကိရိယာများကို ပြည်တွင်းမှာ ထုတ်လုပ်နိုင်ရန်လိုကြောင်း၊ မိမိတို့အနေနဲ့ စိုက်ပျိုးရေးလုပ်ငန်းများကို ဆောင်ရွက်ရာမှာ သိပ္ပံနည်းကျခေတ်မီတဲ့စိုက်ပျိုးရေးစနစ်၊ IT စနစ် ၊ AI စနစ်များ စက်ကိရိယာများကို အသုံးချနိုင်ရန်လိုကြောင်း” ဆိုကာ အသွင်ပြောင်းသမ္မတက ပြောပါတယ်။
ဒါ့အပြင်မြန်မာနိုင်ငံဟာ နိုင်ငံတကာမှာ စားနပ်ရိက္ခာအဓိကဖြည့်ဆည်းတင်ပို့ပေးနိုင်တဲ့ နိုင်ငံတနိုင်ငံ ဖြစ်ဖို့မျှော်မှန်းထားတာကြောင့် ဆန်၊ ပဲနဲ့ အခြားစားသောက်ကုန်ပစ္စည်းတွေ၊ ရေထွက်ကုန်ပစ္စည်းတွေကို ပိုမိုတိုးမြှင့်ထုတ်လုပ်နိုင်ဖို့ အမြဲသုတေသနပြု လေ့လာသုံးသပ်စနစ်တကျဆောင်ရွက်သွားကြဖို့လည်း စစ်ခေါင်းဆောင်က ပြောပါတယ်။